«

»

Print this Post

സൗദിയില്‍ സന്ദര്‍ശന വിസ പെര്‍മെനന്‍റ് വിസയാക്കി മാറ്റാന്‍ സാധിക്കുമോ?

 

f

 

സൗദിയില്‍ വിസിറ്റിംഗ് വിസ പെര്‍മെനന്‍റ് വിസയാക്കി മാറ്റാന്‍ സാധിക്കുമോ? സാധിക്കുമെങ്കില്‍ എന്താണ് അതിന്റെ വിശദാംശങ്ങള്‍ ? – ഹരി പോയ്യില്‍ 

 

കഴിഞ്ഞ ജൂണ്‍ മാസത്തില്‍ ആണ് സൗദി അറേബ്യയില്‍ ഇത്തരത്തിലൊരു വാര്‍ത്ത വ്യാപകമായി പ്രചരിക്കുന്നത്. സൗദിയിലെ ഒരു ഇംഗ്ലീഷ്‌ ദിനപത്രം അവരുടെ വായനക്കാര്‍ക്ക് നിയമ സംശയങ്ങള്‍ തീര്‍ത്തു കൊടുക്കുന്നതിന്റെ ഭാഗമായി നടത്തിയ രണ്ടു മണിക്കൂര്‍ ഫോണ്‍ ഇന്‍ പരിപാടിയില്‍ പങ്കെടുത്തു കൊണ്ട് ജവാസാതിലെ മുതിര്‍ന്ന ഉദ്യോഗസ്ഥനായ കേണല്‍ മുഹമ്മദ്‌ അല്‍ ഹുസൈന്‍റെ ഒരു പരാമര്‍ശത്തില്‍ നിന്നാണ് ഈ വിവാദത്തിനു തുടക്കം.  

കുടുംബ സന്ദര്‍ശന വിസ സ്ഥിരമായ വിസയാക്കി മാറ്റാമോ എന്ന ഫോണ്‍ ഇന്‍ പരിപാടിയില്‍ പങ്കെടുത്ത ഒരാളുടെ ചോദ്യത്തിനുള്ള ഉത്തരമായാണ് മുഹമ്മദ്‌ അല്‍ ഹുസൈന്‍ ഈ ഉത്തരം നല്‍കിയത്. അത് പ്രത്യേക സാഹചര്യങ്ങളില്‍ സാധ്യമാണെന്നും അതിനായുള്ള അപേക്ഷ അഭ്യന്തര മന്ത്രാലയം അംഗീകരിക്കെണ്ടതുണ്ടെന്നും പ്രത്യേക അനുമതി ആവശ്യമാണെന്നുമാണ് അദ്ദേഹം പറഞ്ഞത്. രണ്ടു മണിക്കൂര്‍ നീണ്ട പരിപാടിയില്‍ മറ്റുള്ള നിരവധി ചോദ്യങ്ങള്‍ക്കും ഉത്തരം പറഞ്ഞ കൂട്ടത്തില്‍ തന്നെയാണ് ഈ ചോദ്യത്തിനും മറുപടി പറഞ്ഞത്,.

എന്നാല്‍ പ്രസ്തുത പത്രത്തിന്‍റെ സ്റ്റാഫ്‌ റിപ്പോര്‍ട്ടര്‍ അത് വളരെയധികം പ്രാധാന്യതോടെയുള്ള വാര്‍ത്തയായി കൊടുക്കുകയും വാര്‍ത്തയുടെ ഉള്ളടക്കം വായിക്കാതെ തലക്കെട്ട്‌ മാത്രം വായിച്ചു പരമാവധി പ്രചാരം കൊടുക്കുന്ന വ്യക്തികള്‍ ഈ തലേക്കെട്ടിന് മാത്രം വ്യാപകമായ പ്രചാരം നല്‍കി. സന്ദര്‍ശന വിസയില്‍ ഉള്ളവര്‍ക്കെല്ലാം അപേക്ഷിച്ചാല്‍ ഉടന്‍ പെര്‍മെനന്‍റ് വിസ നല്‍കുമെന്ന തരത്തിലായിരുന്നു പ്രചാരണം.

സോഷ്യല്‍ മീഡിയകളിലും മലയാളം ഓണ്‍ലൈന്‍ ടെലിവിഷന്‍, ഓണ്‍ലൈന്‍ മാധ്യമങ്ങളിലും ഇത് വന്‍ വാര്‍ത്താ പ്രാധാന്യത്തോടെ പ്രസിദ്ധീകരിക്കപ്പെട്ടു. വാര്‍ത്ത വായിക്കാതെ തലക്കെട്ട് മാത്രം വായിച്ച് ഈ വാര്‍ത്ത പല വ്യക്തികള്‍ കൈമാറി വന്നപ്പോള്‍ എല്ലാ സന്ദര്‍ശന വിസകളും പെര്‍മെനന്‍റ് വിസകള്‍ ആക്കി മാറ്റാമെന്ന രീതിയിലേക്ക് വാര്‍ത്തയുടെ സ്വഭാവം മാറി.

ഇതോടെ പല ബുദ്ധിമുട്ടുകളും സഹിച്ച് കുടുംബത്തെ കൊണ്ട് വന്നവരും സന്ദര്‍ശന വിസയുടെ കാലാവധി കഴിയാറായവരും പല കാരണങ്ങള്‍ കൊണ്ടും പെര്‍മെനന്‍റ് വിസകള്‍ ലഭിക്കാന്‍ സാധ്യതകള്‍ അടഞ്ഞവരും സന്ദര്‍ശന വിസകള്‍ പെര്‍മെനന്‍റ് വിസകള്‍ ആക്കി മാറ്റുന്നതിന് വേണ്ടി ജവാസാത്‌ ഓഫീസുകളിലേക്ക് സന്ദര്‍ശനം തുടങ്ങി. സഹിക്കാവുന്നതില്‍ അധികം തിരക്കായപ്പോള്‍ ജവാസാതിലെ ഉന്നത ഉദ്യോഗസ്ഥര്‍ തന്നെ ഈ വാര്‍ത്ത നിഷേധിച്ചു കൊണ്ടുള്ള നിഷേധ കുറിപ്പുമായി രംഗത്ത്‌ വന്നു.

യഥാര്‍ത്ഥത്തില്‍ കേണല്‍ മുഹമ്മദ്‌ ഹുസൈന്‍ പറഞ്ഞത് വാസ്തവമാണ്. പ്രത്യേക സാഹചര്യത്തില്‍ സന്ദര്‍ശന വിസയില്‍ എത്തിയവര്‍ക്ക് ആഭ്യന്തര മന്ത്രാലയത്തിന്റെ അനുമതിയോടു കൂടി പെര്‍മെനന്‍റ് വിസയാക്കി മാറ്റാം. അത് നിയമ പ്രകാരം സാധ്യവുമാണ്.

എന്നാല്‍ വ്യവസ്ഥകളോടെ യാത്ര ഒഴിവാക്കാനാവാത്ത സാഹചര്യത്തില്‍ മാത്രമാണ് വിരളമായി ഇത് അനുവദിക്കുക. ഉദാഹരണമായി യാത്ര ചെയ്യാന്‍ സാധിക്കാത്ത സാഹചര്യം ഉണ്ടാവുകയോ വളരെ അടുത്ത ബന്ധുക്കള്‍ക്ക് യാത്ര ചെയ്യാന്‍ സാധിക്കാത്ത വിധം ഗുരുതര അവസ്ഥയില്‍ ആവുകയോ മറ്റോ ചെയ്‌താല്‍ വ്യവസ്ഥകളോടെ ആഭ്യന്തര മന്ത്രാലയത്തിനു പെര്‍മെനന്‍റ് വിസ അനുവദിക്കാവുന്നതാണ്. പക്ഷെ സാധാരണ സാഹചര്യങ്ങളില്‍ ഈ ആനുകൂല്യം ലഭിക്കില്ല. 

Permanent link to this article: http://pravasicorner.com/?p=16592

Copy Protected by Chetan's WP-Copyprotect.