«

»

Print this Post

നിയമത്തില്‍ കാതലായ മാറ്റം: ചെക്ക് നല്‍കുന്നവര്‍ കുരുക്കിലാകും. ദുരുപയോഗ സാധ്യത കൂടുതല്‍

 

ചെക്ക് സംബന്ധിച്ച പണമിപാടുകളെ കുറിച്ചുള്ള നിയമത്തില്‍ ഭേദഗതി വരുത്തുന്നതിനായി കേന്ദ്ര സര്‍ക്കാര്‍ കഴിഞ്ഞ ദിവസം ലോകസഭയില്‍ അവതരിപ്പിച്ചു പാസ്സാക്കിയ ബില്ലിനെ കുറിച്ച് സുപ്രീം കോടതി അഭിഭാഷകന്‍ ഷിയാസ് കുഞ്ഞിബാവ എഴുതുന്നു….

——————————————————————————————————————————-

പണമിടപാടുകളില്‍ നല്‍കുന്ന ചെക്കുകളെ സംബന്ധിച്ച പരാതിക്കാര്‍ക്ക് ആശ്വാസമേകുന്ന പുതിയ വകുപ്പുകള്‍ ഉള്‍പ്പെടുത്തിയാണ് കേന്ദ്ര സര്‍ക്കാര്‍ ലോകസഭയില്‍ പുതിയ ബില്‍ അവതരിപ്പിച്ചത്. നിലവിലുള്ള നിയമത്തില്‍ മാറ്റം വരുത്തി അവതരിപ്പിച്ച ഈ ബില്‍ ലോകസഭ കഴിഞ്ഞ ദിവസം അംഗീകരിച്ചു. ഇത്തരത്തില്‍ വരുത്തിയ മാറ്റങ്ങള്‍ പണമിടപാടുകളില്‍ പരാതിക്കാര്‍ക്ക് ആശ്വാസം നല്‍കുന്നതോടൊപ്പം തന്നെ ചെക്ക് നല്‍കുന്നവര്‍ക്ക് കുരുക്കാകും. ബിൽ നിയമമായി മാറുമ്പോൾ പുതിയ വ്യവസ്ഥകളെ ദുരുപയോഗം ചെയ്യാനുള്ള സാധ്യതകളും ഏറെയാണ്‌.

കോടതികളില്‍ ഫയല്‍ ചെയ്യപ്പെടുന്ന ചെക്ക് കേസുകളില്‍ വിധി ഉണ്ടാകാന്‍ വരുന്ന കാലതാമസം മൂലം പരാതിക്കാര്‍ക്ക് സാമ്പത്തിക ഇടപാടുകളില്‍ വന്‍നഷ്ടം സംഭവിക്കുന്നുവെന്ന് ബിസിനസ് വൃത്തങ്ങളില്‍ നിന്നും കാലങ്ങളായി ഉയര്‍ന്നു വന്ന ആവശ്യം കണക്കിലെടുത്താണ് സര്‍ക്കാര്‍ ചെക്കിനെ സംബന്ധിക്കുന്ന നെഗോഷ്യബിള്‍ ഇന്‍സ്ട്രമെന്റ്സ് ആക്റ്റില്‍ (Negotiable Instruments Act) പുതിയ വകുപ്പുകള്‍ ഉള്‍പ്പെടുത്തി നിയമത്തില്‍ കാതലായ മാറ്റം വരുത്തുന്നത്. ബില്‍ നിയമമാകുന്നതോടെ കേസുകള്‍ കോടതിയില്‍ എത്തുമ്പോള്‍ ചെക്ക് നല്‍കിയ വ്യക്തി പ്രസ്തുത ചെക്ക് തുകയുടെ 20 ശതമാനം വരെ പരാതിക്കാരന് മുന്‍‌കൂര്‍ ആയി തന്നെ ഇടക്കാല നഷ്ട പരിഹാരമായി നല്‍കേണ്ടി വരും.

ഇത്രയും കാലം പണമിടപാടുകളില്‍ ചെക്ക് നല്‍കുന്നവര്‍ക്ക് പ്രസ്തുത ചെക്ക് പണമില്ലാതെ മടങ്ങിയാല്‍ കോടതിയിലെ വിധി വരുന്നത് വരെ യാതൊരു തുകയും നല്‍കേണ്ടതില്ലായിരുന്നു. മാത്രമല്ല കോടതി വിധി വരാന്‍ ഉണ്ടാകുന്ന കാലതാമസം ചെക്ക് കേസുകളിലെ പ്രതികള്‍ക്ക്  അനുകൂല ഘടകവുമാണെന്ന വിമര്‍ശനവും നില നിന്നിരുന്നു. ഈ പഴുത് കണക്കിലെടുത്ത് ബിസിനസ് ഇടപാടുകളില്‍ മനപ്പൂര്‍വ്വം  ചെക്കുകള്‍ നല്‍കി വഞ്ചിക്കുന്ന പ്രവണതക്കാണ് പുതിയ ബില്‍ നിയമമാകുന്നതോടെ കടിഞ്ഞാന്‍ വീഴാന്‍ പോകുന്നത്. ചെക്ക് പണമില്ലാതെ മടങ്ങിയാല്‍ ചെക്ക് ലഭിക്കുന്നയാള്‍ കോടതിയില്‍ കേസ് ഫയല്‍ ചെയ്‌താല്‍ തന്നെ കേസ് വിധിയാകുന്ന അവസരത്തില്‍ തുക നല്‍കി ഒത്തുതീര്‍പ്പാക്കുകയോ അല്ലെങ്കില്‍ വിധിക്കെതിരായി അപ്പീല്‍ നല്‍കി കാലതാമസം വരുത്തുകയോ ചെയ്യുന്ന പ്രവണതയും വ്യാപകമായിരുന്നു.

ചെക്കുകള്‍ ലഭിക്കുന്ന വ്യക്തിക്ക് പ്രതിക്കെതിരായി നെഗോഷ്യബിള്‍ ഇന്‍സ്ട്രമെന്റ്സ് ആക്റ്റിലെ വകുപ്പ് പ്രകാരം നല്‍കാവുന്ന ക്രിമിനല്‍ കേസിന് പുറമേ പ്രതിക്കെതിരായി സിവില്‍ കേസ് കൂടി ഫയല്‍ ചെയ്ത് ലഭിക്കാനുള്ള തുക വസ്തുവഹകള്‍ ഉണ്ടെങ്കില്‍ അതില്‍ നിന്നും ഈടാക്കാനുള്ള നിയമ പരിരക്ഷ ഇപ്പോള്‍ തന്നെ നിലവിലുണ്ട്. എന്നാല്‍ വന്‍ തുകകള്‍ ഉള്‍പ്പെടുന്ന ചെക്ക് കേസുകളില്‍ പ്രതിക്കെതിരായി സിവില്‍ കോടതിയില്‍ കേസ് ഫയല്‍ ചെയ്യുമ്പോള്‍ കോടതി ഫീസായി കെട്ടി വെക്കേണ്ടി വരുന്ന വന്‍ തുക പരാതിക്കാരന് അധിക ബാധ്യത വരുത്തുന്നു. അത് കൊണ്ട് തന്നെ പലരും ചെക്ക് കേസുകള്‍ സിവില്‍ കേസ് ഫയല്‍ ചെയ്യാതെ ക്രിമിനല്‍ കേസുകളെ ആശ്രയിച്ചിരുന്നു. ഈ അസൗകര്യം മുതലെടുത്തു ചെക്ക് പണമില്ലാതെ മടങ്ങുമെന്ന് മനസ്സിലാക്കി തന്നെ മനപ്പൂര്‍വ്വം  ചെക്കുകള്‍ നല്കിയിരുന്നവരുടെ എണ്ണം വര്‍ദ്ധിച്ചു വന്നിരുന്നു. ഈ അവസ്ഥക്കാണ്‌ പുതിയ ബില്‍ പ്രകാരം മാറ്റം വരുന്നത്.

എന്നാല്‍ ഈ പുതിയ സ്ഥകള്‍ക്ക് ഒരു മറുവാദം കൂടി വിമര്‍ശകര്‍ ഉന്നയിക്കുന്നുണ്ട്‌. പലപ്പോഴും നിലവിലുള്ള നിയമം തന്നെ ദുരുപയോഗപ്പെടുന്നുണ്ട് എന്ന വസ്തുത വിസ്മരിച്ചു കൂടാ എന്നവര്‍ പറയുന്നു. കാരണം പലപ്പോഴും ചെക്ക് കേസുകള്‍ കോടതിയില്‍ ഫയല്‍ ചെയ്യപ്പെടുന്നത് പണമിടപാടുകളില്‍ സെക്യൂരിറ്റിയായും മറ്റും ആദ്യമേ വാങ്ങി വെക്കുന്ന തിയ്യതിയും തുകയും രേഖപ്പെടുത്താത്ത ചെക്കുകള്‍ ഉപയോഗിച്ചാണ്. നല്‍കുന്ന പണത്തിനുള്ള മുന്‍കരുതലായി മുന്‍കൂട്ടി വാങ്ങി വെക്കുന്ന ഈ ചെക്കുകളില്‍ പരാതിക്കാരന്‍ തന്നെ പിന്നീട് തിയ്യതിയും തുകയും എഴുതി ചേര്‍ത്താണ് പലപ്പോഴും കോടതിയില്‍ കേസ് ഫയല്‍ ചെയ്യുന്നത്. പലപ്പോഴും യഥാര്‍ത്ഥത്തില്‍ ലഭിക്കാനുള്ള തുകയേക്കാള്‍ വളരെ കൂടുതല്‍ എഴുതി ചേര്‍ത്താണ് ഫയല്‍ ചെയ്യുക. ഈ സാഹചര്യത്തില്‍ യഥാര്‍ത്ഥത്തില്‍ ലഭിക്കാനുള്ള തുകയുടെ അഞ്ചിരട്ടി എഴുതി ചേര്‍ത്താല്‍ കേസ് ഫയല്‍ ചെയ്യുമ്പോള്‍ തന്നെ പരാതിക്കാരന് തനിക്ക് ലഭിക്കാനുള്ള തുക വസൂലാക്കി എടുക്കാം എന്നാണു വിമര്‍ശകരുടെ പക്ഷം.

ലോകസഭ പാസാക്കിയ ബില്‍ പ്രകാരം നെഗോഷ്യബിള്‍ ഇന്‍സ്ട്രമെന്റ്സ് ആക്ടില്‍ 143 A ആയി ഒരു പുതിയ വകുപ്പ് കൂടി ഉള്‍പ്പെടുത്തിയിട്ടുണ്ട്. ഈ വകുപ്പ് പ്രകാരം ചെക്ക് മടങ്ങിയതായുള്ള പരാതി കോടതിയില്‍ എത്തുമ്പോള്‍ പ്രതി കുറ്റം സമ്മതിക്കാതെ കേസ് തുടരുന്ന പക്ഷം നിശ്ചത തുക ഇടക്കാല നഷ്ടപരിഹാരമായി പരാതിക്കാരന് നല്‍കാന്‍ പ്രതിയോട് കോടതിക്ക് ഉത്തരവിടാം. എന്നാല്‍ ഈ തുക മൊത്തം ചെക്ക് തുകയുടെ 20 ശതമാനത്തില്‍ അധികമാകാന്‍ പാടില്ല എന്ന് വ്യവസ്ഥയുണ്ട്. ഈ തരത്തില്‍ കോടതി ഉത്തരവിട്ടാല്‍ 60 ദിവസത്തിനകം തന്നെ തുക നല്‍കണം. മതിയായ കാരണം ഉണ്ടെങ്കില്‍ ഈ തുക നല്‍കാന്‍ 30 ദിവസം കൂടി അധിക സമയമായി കോടതി അനുവദിക്കും.

ഇപ്രകാരമുള്ള ഈ തുക പരാതിക്കാരനാണ് നല്‍കുക. എന്നാല്‍ വിചാരണക്ക് ശേഷം പ്രസ്തുത കേസില്‍ പ്രതി കുറ്റക്കാരനല്ലെന്ന് കണ്ടു കോടതി വെറുതെ വിട്ടാല്‍ ഇത്തരത്തില്‍ ഇടക്കാല്‍ നഷ്ട പരിഹാരമായി പരാതിക്കാരന്‍ കൈപ്പറ്റിയ തുക പലിശ സഹിതം പ്രതിക്ക് തിരികെ നല്‍കണമെന്നു ബില്‍ വ്യവസ്ഥ ചെയ്യുന്നു. റിസര്‍വ്  ബാങ്ക് നിശ്ചയിച്ചിട്ടുള്ള പലിശ സഹിതമാണ് ഈ തുക തിരികെ നല്‍കേണ്ടത്.  കോടതി വിധി വന്ന് 60 ദിവസത്തിനുള്ളില്‍ ഈ തുക തിരികെ നല്‍കണം. മതിയായ കാരണം ബോധിപ്പിച്ചാല്‍ 30 ദിവസം കൂടി തുക തിരികെ നല്‍കാന്‍ അധിക സമയമായി കോടതി അനുവദിക്കും.

വാദി കേസ് വിജയിക്കുന്ന പക്ഷം പിഴയായോ നഷ്ട പരിഹാരമായോ ഏതെങ്കിലും തുക വാദിക്കു നല്‍കാന്‍ കോടതി ഉത്തരവിടാറുണ്ട്. ഇത്തരത്തില്‍ ഉത്തരവിടുകയാണെങ്കില്‍ ആ തുക നല്‍കുമ്പോള്‍ ഇടക്കാല നഷ്ട പരിഹാരമായി വാദി മുന്‍പ് കൈപ്പറ്റിയ തുക കിഴിച്ച് ബാക്കി തുക പ്രതി നല്‍കിയാല്‍ മതിയാകും.

ചെക്ക് നല്‍കിയ വ്യക്തി ശിക്ഷിപ്പെടുകയാണെങ്കില്‍ പ്രസ്തുത വിധിക്കെതിരായി അപ്പീല്‍ നല്‍കുന്നതിന് വ്യക്തമായ വ്യവസ്ഥ പുതിയ വകുപ്പായി ബില്ലില്‍ കൂട്ടി ചേര്‍ത്തിട്ടുണ്ട്. ശിക്ഷിക്കപ്പെട്ട വ്യക്തിക്ക് 60 ദിവസത്തിനകം പ്രസ്തുത വിധിക്ക് എതിരായി മേല്‍ക്കോടതിയില്‍ അപ്പീല്‍ സമര്‍പ്പിക്കാം. ഇതിനായുള്ള പുതിയ വകുപ്പായ 148 പ്രകാരം ഇപ്രകാരം അപ്പീല്‍ സമര്‍പ്പിക്കുന്നതിനായി കീഴ്കോടതി പിഴയായോ നഷ്ട പരിഹാരമായോ വിധിച്ച തുകയുടെ 20 ശതമാനം അപ്പീല്‍ കോടതിയില്‍ കെട്ടി വെക്കേണ്ടി വരും. മതിയായ കാരണം ബോധിപ്പിച്ചാല്‍ ഈ തുക കെട്ടി വെക്കുന്നതിന് 30 ദിവസം കൂടി അധിക സമയമായി പ്രതിക്ക് കോടതി അനുവദിക്കും.

ഇത്തരത്തില്‍ കെട്ടി വെക്കപ്പെടുന്ന തുക അപ്പീല്‍ കേസ് തീരുന്നത് വരെ വാദിക്കാണ് നല്‍കുക. എന്നാല്‍ ശിക്ഷക്കെതിരായി സമര്‍പ്പിച്ച അപ്പീല്‍ പ്രതിക്കനുകൂലമായി വിധിക്കുകയാണെങ്കില്‍ ഈ തുക പ്രതിക്ക് മടക്കി നല്‍കണം. ഈ സാഹചര്യത്തിലും മേല്‍ പറഞ്ഞ പോലെ തന്നെ റിസര്‍വ് ബാങ്ക് നിഷ്കര്‍ഷിച്ചിട്ടുള്ള പലിശ നിരക്ക് സഹിതമാണ് പ്രതിക്ക് തുക തിരികെ നല്‍കേണ്ടത്. വിധി വന്നാല്‍ 60 ദിവസത്തിനകം തന്നെ ഈ തുക നല്കണം. മതിയായ കാരണം ബോധിപ്പിച്ചാല്‍ 30 ദിവസം കൂടി അധിക സമയമായി കോടതി അനുവദിക്കുമെന്ന് ബില്ലില്‍ വ്യവസ്ഥ ചെയ്യുന്നു.

അഡ്വ.ഷിയാസ് കുഞ്ഞിബാവ.

 

Permanent link to this article: http://pravasicorner.com/?p=19472

Copy Protected by Chetan's WP-Copyprotect.