«

»

Print this Post

എന്റെ ജോലിക്കാര്‍ അവരുടെ കുടുംബം നിര്‍ബന്ധമായും സംരക്ഷിക്കണം – യൂസഫ്‌ അലി

 

മുസ്‌ലിയാം വീട്ടില്‍ അബ്ദുല്‍ഖാദര്‍ എന്ന എം.എ.യൂസഫ്‌ അലി. ഗൾഫിലെ പ്രമുഖ വ്യാപാര സ്ഥാപനമായ എം.കെ. ഗ്രൂപ്പിന്റെയും ലുലു ഹൈപ്പർ മാർക്കറ്റ് ഗ്രൂപ്പിന്റെയും മാനേജിങ് ഡയറക്ടര്‍. 2008 ൽ പത്മശ്രീ പുരസ്കാരം നേടിയ ഇദ്ദേഹം കൊച്ചി ലേക്ക്‌ ഷോർ ആശുപത്രി ചെയർമാൻ, പ്രധാനമന്ത്രിയുടെ അന്തർദേശീയ ഉപദേശക സമിതി അംഗം, ഇന്ത്യൻ വികസന സമിതി (The India Development Foundation) രക്ഷാധികാരി, അബൂദാബി ചേംബർ ഓഫ് കൊമേഴ്സ്‌ ആൻഡ്‌ ഇന്റസ്ട്രി ഡയരക്ടർ ബോർഡ്‌ അംഗം, കൊച്ചി അന്താരാഷ്ട്ര വിമാനത്താവളം (CIAL) ഡയരക്ടർ, നോർക്ക റൂട്ട്സ് ഡയറക്ടർ ബോർഡ് അംഗം എന്നിങ്ങനെ പറഞ്ഞാല്‍ തീരാത്ത അത്ര പദവികള്‍. 

തന്‍റെ കൂടെ ജോലി ചെയ്യുന്ന ജീവനക്കാരില്‍ ഭൂരിഭാഗവും കഴിഞ്ഞ 20 വര്‍ഷമായി എന്റെ കൂടെയുള്ളവരാണ് എന്ന് യൂസഫ്‌ അലി. എന്ത് കൊണ്ട് യൂസഫ്‌ അലിയുടെ കമ്പനികളില്‍ ദീര്‍ഘകാലം ജീവനക്കാര്‍ ജോലി ചെയ്യുന്നു? എന്ത് കൊണ്ട് മറ്റുള്ള കമ്പനികളിലുണ്ടാകുന്നത് പോലെ യൂസഫ്‌ അലിയുടെ സ്ഥാപനങ്ങളില്‍ ജീവനക്കാരുടെ കൊഴിഞ്ഞു പോക്ക് ഉണ്ടാകുന്നില്ല? അതിനുത്തരം യൂസുഫ്‌ അലിയുടെ വാക്കുകളില്‍ നിന്ന് തന്നെ വായിച്ചെടുക്കാം.

‘’എന്‍റെ കീഴില്‍ ജോലി ചെയ്യുന്ന ജോലിക്കാരന് അവന്‍റെ കുടുംബം നോക്കാനുള്ള ബാധ്യത ഉണ്ട്. പ്രായമായ മാതാപിതാക്കളെ നോക്കാന്‍ ബാധ്യത ഉണ്ട്. അതവര്‍ ചെയ്യുന്നുണ്ടോ എന്ന് എന്ന് ഞാന്‍ നോക്കാറുണ്ട്. അതിനായി എനിക്ക് എംപ്ലോയീ വെല്‍ഫെയര്‍ സെക്രട്ടറി ഉണ്ട്. എന്‍റെ ജോലിക്കാരന്‍ വീട്ടിലേക്കു പണം അയച്ചു കൊടുത്തില്ലെങ്കില്‍ അവരുടെ വീട്ടുകാര്‍ക്ക് എന്നെ വിവരം അറിയിക്കാം.

അവരുടെ കത്തുകള്‍ ഈ എംപ്ലോയീ വെല്‍ഫെയര്‍ സെക്രട്ടറി എന്നെ കാണിക്കും. ഞാന്‍ അവരെ വിളിപ്പിക്കും. അബുദാബിയില്‍ ആണെങ്കില്‍ ഉടനെ തന്നെ വിളിപ്പിക്കും. കാരണം അവിടെയാണ് എന്റെ ഹെഡ്‌ ക്വാര്‍ട്ടേഴ്സ്. മറ്റുള്ള രാജ്യങ്ങളില്‍ അതായത്‌ സൗദി, ഖത്തര്‍, ഒമാന്‍ തുടങ്ങിയവിടങ്ങളില്‍ ആണെങ്കില്‍ അവിടങ്ങളില്‍ പോകുന്നതിനനുസരിച്ചു വിളിപ്പിക്കും. അവരെ ഉപദേശിക്കും. ‘’നിങ്ങള്‍ ചെയ്യുന്നത് ശരിയല്ല. വീട്ടിലേക്കു പണം അയച്ചു കൊടുക്കണം. മാതാപിതാക്കളെ നോക്കണം’’. എന്നിട്ട് അവര്‍ അനുസരിക്കുന്നില്ലെന്നു കണ്ടാല്‍ അവര്‍ക്ക് മുന്നറിയിപ്പ് നല്‍കും.  

പിന്നെയും പണം അയച്ചു കൊടുത്തില്ലെങ്കില്‍ ഞാന്‍ തന്നെ മൂന്നു – നാല് മാസത്തെ അവരുടെ ശമ്പളം എന്റെ കയ്യില്‍ നിന്ന് അയച്ചു കൊടുക്കും. അങ്ങിനെ ഞാന്‍ അയച്ചു കൊടുത്തതായി അറിയുമ്പോള്‍ പശ്ചാത്താപം കൊണ്ട് ചില ജോലിക്കാര്‍ എന്റെ അടുക്കല്‍ വരാറുണ്ട്, ഞാന്‍ അയച്ചു കൊടുത്ത പണം തിരികെ നല്‍കാനായി.  ഞാന്‍ അവരില്‍ നിന്നും പണമൊന്നും തിരികെ വാങ്ങാറില്ല. ഇനി മുതല്‍ കൃത്യമായി അയച്ചു കൊടുക്കാന്‍ ഉപദേശിച്ചു പറഞ്ഞയക്കും’’.

ഓക്സ്ഫോര്‍ഡിലും കേംബ്രിഡ്ജിലും പഠിച്ചാല്‍ കിട്ടാത്ത ബിസിനെസ്സിന്റെ പ്രാഥമിക പാഠം. എല്ലാ H.R മാനേജര്‍മാരും കണ്ടു പഠിക്കേണ്ട പാഠം. എന്ത് കൊണ്ട് യൂസഫ്‌ അലി കേരളത്തിനും, പ്രവാസ ലോകത്തിനും പ്രിയങ്കരനാവുന്നു എന്നതിന് മറ്റൊരു ഉത്തരമില്ല. 

 

Permanent link to this article: http://pravasicorner.com/?p=2936

Copy Protected by Chetans WP-Copyprotect.