Connect with us

LATEST

എയര്‍ ഇന്ത്യാ ബന്ദി നാടകം: പൈലറ്റിനെതിരെ ഹൈക്കോടതി സ്വമേധയാ കേസെടുത്തു

Published

on

 

1

 

കൊച്ചി/അബൂദബി: കഴിഞ്ഞ വര്‍ഷം ഒക്ടോബര്‍ 19 ന് അബൂദബി – കൊച്ചി എയര്‍ ഇന്ത്യ എക്സ്പ്രസ് വിമാനം തിരുവനന്തപുരത്ത് ഇറക്കി യാത്രക്കാരോടെ ബസ്സില്‍ യാത്ര ചെയ്യാന്‍ നിര്‍ദ്ദേശിച്ചതിനെ തുടര്‍ന്ന് പ്രതിഷേധിച്ച യാത്രക്കാര്‍ക്കെതിരെ വിമാനം റാഞ്ചി തന്നെ ബന്ദിയാക്കി എന്നരോപിച്ച എയര്‍ ഇന്ത്യാ പൈലറ്റ് രൂപാലി വാഗ്മാറിനെതിരെ കേരള ഹൈക്കോടതി സ്വമേധയാ കേസെടുത്തു.

ജസ്റ്റിസുമാരായ കെ.ടി.ശങ്കരന്‍, എം.എല്‍.ജോസഫ്‌ ഫ്രാന്‍സിസ്‌ എന്നിവരടങ്ങിയ ബഞ്ചാണ് പൈലറ്റിനെതിരെ കേസെടുത്തത്. സംഭവത്തെ സംബന്ധിച്ച് യാത്രക്കാരുടെ പേരില്‍ ഹൈക്കോടതിക്ക് ലഭിച്ച കത്തിന്റെ അടിസ്ഥാനത്തിലാണ് കേസെടുത്തത്.

സംഭവത്തില്‍ ആര്‍ക്കെങ്കിലും എതിരെ കേസുകളോ നടപടികളോ എടുത്തിട്ടുണ്ടോ എന്ന് അറിയിക്കണമെന്ന് കേന്ദ്ര-സംസ്ഥാന സര്‍ക്കാരുകള്‍ക്ക് ഹൈക്കോടതി നിര്‍ദ്ദേശം നല്‍കി. കേസില്‍ കോടതിയെ സഹായിക്കാന്‍ അമിക്കസ് ക്യൂറിയായി പി.സേതുമാധവനെ കോടതി ചുമതലപ്പെടുത്തിയിട്ടുണ്ട്.

 ———————————————————————————————————-

 

എയര്‍ ഇന്ത്യാ സംഭവത്തില്‍ പ്രവാസികളായ മുഴുവന്‍ യാത്രക്കാര്‍ക്കും വേണ്ടി മുന്നില്‍ നിന്നു ശബ്ദമുയര്‍ത്തിയ ഡിം ബ്രെയ്റ്റ്‌ കാദര്‍ എന്നറിയപ്പെടുന്ന ശ്രീ. അബ്ദുല്‍ കാദറുമായി പ്രവാസി കോര്‍ണര്‍ ഡോട്ട് കോം പ്രതിനിധി കഴിഞ്ഞ വര്‍ഷം നടത്തിയ അഭിമുഖത്തിന്റെ പൂര്‍ണ്ണ രൂപം: 


1

 

‘എയര്‍ ഇന്ത്യ ഹൈജാക്ക് ഡ്രാമ’ എന്ന് ദേശീയ മാധ്യമങ്ങള്‍ പോലും വിശേഷിപ്പിച്ച ആ സംഭവത്തിന്‌ നേതൃത്വം നല്‍കിയ ആളായിരുന്നല്ലോ താങ്കള്‍. എപ്പോഴാണ് യഥാര്‍ത്ഥത്തില്‍ യാത്രക്കാര്‍ പ്രതികരിച്ചു തുടങ്ങിയത് ?

യഥാര്‍ത്ഥത്തില്‍ ഈ ഫ്ലൈറ്റില്‍ ജീവനക്കാര്‍ കുറവായിരുന്നു. കേവലം 5 സ്റ്റാഫിനെ വെച്ച് കൊണ്ടാണ് ഈ ഫ്ലൈറ്റ് ഓപ്പറേറ്റ്‌ ചെയ്തിരുന്നത്. ഞങ്ങള്‍ അബുദാബി എയര്‍പോര്‍ട്ടില്‍ വരുമ്പോള്‍ തന്നെ ഏതാണ്ട് നൂറു മീറ്ററോളം വരുന്ന മൂന്നു ക്യൂവിലാണ് ആളുകള്‍ നിന്നിരുന്നത്. ഇത്രയും ആളുകളെ മാനേജ് ചെയ്യാന്‍ ഈ അഞ്ചു സ്റ്റാഫിനെ കൊണ്ട് കഴിയില്ല എന്ന കാരണം കൊണ്ടാണ് ഫ്ലൈയ്റ്റ്‌ മൂന്നു മണിക്കൂര്‍ വൈകി അവിടെ നിന്നും പുറപ്പെട്ടത്‌. രാത്രി ഒരു മണി കഴിഞ്ഞിട്ടാണ് ഭക്ഷണം തന്നത്. അപ്പോഴൊന്നും യാത്രക്കാര്‍ ഒരു പ്രശ്നവും ഉണ്ടാക്കിയിട്ടില്ല.

കൊച്ചിയില്‍ വന്നു ഇറക്കാന്‍ ശ്രമിച്ചു, സാധിച്ചില്ല. പിന്നീട് തിരുവനന്തപുരത്ത് വന്നു. കൊച്ചിയില്‍ ഇറക്കാതെ തിരുവനന്തപുരത്തു ഇറക്കിയത് മൂടല്‍ മഞ്ഞു മൂലമാണ്. അത് സുരക്ഷയുടെ ഭാഗമാണ്. പ്രകൃതിയില്‍ ഉണ്ടായ പ്രതിഭാസമാണ്. അത് നമ്മള്‍ അംഗീകരിച്ചേ പറ്റൂ.അത് യാത്രക്കാരെല്ലാവരും അംഗീകരിച്ചതുമാണ്. തിരുവനന്തപുരത്തു വന്നപ്പോള്‍ മറ്റു മൂന്നു ഫ്ലൈറ്റുകള്‍ അവിടെ കിടപ്പുണ്ട്. ഇതേ കാരണത്താല്‍. എത്തിഹാദ്‌, ഖത്തര്‍ എയര്‍വേയ്സ്‌, കിങ്ങ്ഫിഷര്‍ എന്നെ മൂന്നു വിമാനങ്ങളാണ് കൊച്ചിയില്‍ ഇറക്കാന്‍ പറ്റാതെ തിരുവനന്തപുരതു ഇറക്കിയിരുന്നത്. പിന്നീട് ആ മൂന്നു ഫ്ലൈറ്റുകളും അവരുടെ യാത്രക്കാരെ എടുത്തു കൊച്ചിയിലേക്ക് പറന്നു. അപ്പോഴും യാത്രക്കാര്‍ പ്രശ്നമുണ്ടാക്കിയില്ല.

ഒന്നര മണിക്കൂര്‍ കഴിഞ്ഞിട്ടും എയര്‍ ഇന്ത്യയുടെ ജീവനക്കാര്‍ ഒന്നും പറയാതെ വന്നപ്പോള്‍ അവരോടു ഞങ്ങള്‍ വിവരം അന്വേഷിച്ചു. അപ്പോഴാണ്‌ ഞങ്ങളുടെ ഡ്യൂട്ടി സമയം കഴിഞ്ഞു എന്നും നിങ്ങള്‍ കൊച്ചിയിലേക്ക് ബസ്സില്‍ പോകണമെന്നും അവര്‍ ഞങ്ങളോട് പറഞ്ഞത്. അപ്പോള്‍ മാത്രമാണ്  യാത്രക്കാര്‍ പ്രതികരിക്കുന്നത്. അത് വരെ യാത്രക്കാര്‍ ഒന്നും പ്രതികരിച്ചിട്ടില്ല.

യാത്രക്കാരുടെ ആവശ്യം എന്തായിരുന്നു ?

ജീവനക്കാരുടെ ജോലി സമയം അവസാനിച്ചു എങ്കില്‍ അവര്‍ പോയ്ക്കോട്ടെ എന്നും മറ്റൊരു പൈലറ്റിനെ കൊണ്ട് വന്നു ഞങ്ങളെ കൊച്ചിയില്‍ എത്തിക്കണമെന്ന് മാത്രമായിരുന്നു ഞങ്ങളുടെ ആവശ്യം.ഞങ്ങള്‍ ടിക്കെറ്റ് എടുത്തിരിക്കുന്നത് കൊച്ചിയിലേക്കാണ്. ബസ്സിന്റെ ടിക്കറ്റ് അല്ല. ഫ്ലൈറ്റിന്റെ ടിക്കറ്റ് തന്നെയാണ്. കൊച്ചിയില്‍ എത്തിക്കുക എന്നത് അവരുടെ കടമയും ഞങ്ങളുടെ അവകാശവുമാണ്. ഞങ്ങള്‍ നല്‍കിയ പണത്തിന്റെ സേവനം ഞങ്ങള്‍ക്ക് ലഭിക്കണം. അത് തീര്‍ച്ചയായും ഞങ്ങള്‍ക്ക് ലഭിച്ചേ മതിയാകൂ. ഇത് മാത്രമേ ഞങ്ങള്‍ പറഞ്ഞിട്ടുള്ളൂ.

മുഖ്യമന്ത്രി അടക്കമുള്ളവര്‍ പിന്നീട് പറഞ്ഞത് ഇത് യാത്രക്കാരുടെ സ്വാഭാവിക പ്രതികരണം മാത്രമാണ് എന്നാണ് . ഇത്രയും സമയം ഫ്ലൈറ്റിനകത്തു പീഡിപ്പിക്കപ്പെട്ട കുട്ടികളും, ഗര്‍ഭിണികളും, പ്രായമായവരും അടങ്ങുന്ന യാത്രകാരുടെ സ്വാഭാവിക പ്രതികരണം.

ഹൈജാക്ക് ചെയ്തുവെന്ന സന്ദേശം ഏതു സാഹചര്യത്തിലായിരുന്നു ? റാഞ്ചുന്നതിന് സമാനമായ സാഹചര്യമുണ്ടായിരുന്നോ?

ഞങ്ങള്‍ ഫ്ലൈറ്റ് ഹൈജാക്ക് ചെയ്തു എന്ന് പറഞ്ഞു പൈലറ്റ് ബട്ടന്‍ അമര്‍ത്തുകയായിരുന്നു.ഹൈജാക്ക് ചെയ്തു എന്ന് പറഞ്ഞു ഫ്ലൈറ്റിലെ കോക്ക്പിറ്റിലെ ഒരു ബട്ടന്‍ അമര്‍ത്തിയാല്‍ ഇന്ത്യയിലെ എല്ലാ എയര്‍പോര്‍ട്ടുകളിലും അത് സംബന്ധിച്ച സന്ദേശം പോകും. അതാണവിടെ സംഭവിച്ചത്. പക്ഷെ അതൊന്നും ഞങ്ങള്‍ അറിയുന്നുണ്ടായിരുന്നില്ല.ഹൈജാക്ക് ചെയ്യണമെങ്കില്‍ ഞങ്ങളുടെ കയ്യില്‍ ഏതെന്കിലും തരത്തിലുള്ള ആയുധം വേണം. ഞങ്ങള്‍ ആരെയെങ്കിലും തടഞ്ഞു വെച്ചിട്ടുണ്ടായിരിക്കണം. അല്ലെങ്കില്‍ മറ്റെന്തെങ്കിലും തരത്തിലുള്ള അക്രമങ്ങള്‍ ഞങ്ങള്‍ കാണിച്ചിട്ടുണ്ടായിരിക്കണം. ഇതൊന്നുമില്ലാതെ ഞങ്ങള്‍ ഫ്ലൈറ്റ് ഹൈജാക്ക് ചെയ്തു എന്ന് പറയുന്നത് അത്രയും നീചമായ പ്രവര്‍ത്തിയാണ്.അതിനെതിരെ പ്രതികരിച്ചതിനാണ് ഞങ്ങളെ തീവ്രവാദികളാക്കി ചിത്രീകരിച്ചത്.

ഇവിടെ ഞങ്ങളല്ല വിമാനം ഹൈജാക്ക്‌ ചെയ്തത്. പൈലറ്റ് ആണ് ഞങ്ങളെ ഹൈജാക്ക് ചെയ്തു തിരുവനന്തപുരത്തു കൊണ്ട് ചെന്നിറക്കിയത് എന്നാണു വാസ്തവത്തില്‍ പറയേണ്ടത്.

യാത്രക്കാരില്‍ മൂന്നു പേര്‍ കോക്ക്പിറ്റിനകത്തു കടന്നു പൈലറ്റിനെ ഭീഷണിപ്പെടുത്തി, അവര്‍ക്ക് പിന്തുണയുമായി മറ്റു മൂന്നു പേര്‍ കൂടി എത്തി എന്ന ആരോപണം ഉണ്ടായിരുന്നു ?

ഞങ്ങള്‍ കോക്ക്പിറ്റിനകത്തു കടന്നു എന്ന് പറയുന്നു. കോക്ക്പിറ്റിനകത്തെക്ക് പുറത്തു നിന്ന് ഒരാള്‍ക്കും കടക്കാന്‍ സാധിക്കില്ല. കാരണം അവര്‍ ഡോര്‍ ലോക്ക് ചെയ്‌താല്‍ പിന്നീട് പുറത്തു നിന്നുള്ള ആര്‍ക്കും അത് തുറക്കാന്‍ സാധിക്കില്ല. അത് പുറത്തു നിന്ന് ഒരാള്‍ക്ക്‌ തുറക്കണമെങ്കില്‍ മറ്റൊരു സ്ഥലത്ത് പാസ്‌വേഡ് ഇട്ടു ലോക്ക് ചെയ്തു വെച്ചിരിക്കുന്ന കീ കൊണ്ട് വന്നു വേണം തുറക്കാന്‍.

യഥാര്‍ത്ഥത്തില്‍ പൈലറ്റ് ചെയ്തിരുന്നത്, അവര്‍ ഡോര്‍ തുറന്നു ഞങ്ങള്‍ക്ക് വിശദീകരിച്ചു നല്‍കുകയായിരുന്നു. ഈ മീറ്റര്‍ ഫ്ലൈറ്റ് സ്റ്റാര്‍ട്ട് ചെയ്തതിനു ശേഷം റണ്‍ ചെയ്യാനുള്ള സമയമാണ്, ആ സമയം അവസാനിച്ചിരിക്കുന്നു, അത് കൊണ്ട് ഇവിടെ നിന്ന് ഇന്ധനം നിറച്ചു തരുന്നില്ല എന്നൊക്കെ.

സാങ്കേതിക കാരണങ്ങളാലാണ് കൊച്ചിയിലേക്ക് നിങ്ങളെ തിരികെ കൊണ്ട് പോകാന്‍ കഴിയാതിരുന്നത് എന്നാണു എയര്‍ ഇന്ത്യയുടെ വാദം ?

ഇതേ പറഞ്ഞ സാങ്കേതികത്വങ്ങളും മറി കടന്നു മറ്റൊരു പൈലറ്റ് വന്നു വിമാനം പറത്തിയിട്ടാണ് ഞങ്ങളെ കൊച്ചിയില്‍ എത്തിച്ചത്. അത് വരെ ഞങ്ങളെഎയര്‍ ഇന്ത്യ വഞ്ചിക്കുകയായിരുന്നു എന്ന് അതില്‍ നിന്ന് തന്നെ വ്യക്തമാണ്.ആകാശത്ത് വെച്ച് പൈലറ്റിന്റെ സമയം അവസാനിച്ചിരുന്നുവെങ്കില്‍ അവര്‍ പാരച്യൂട്ടിലൂടെ ഇറങ്ങി പോകുമായിരുന്നോ?

യാത്രക്കാരുടെ പ്രധാന ആവശ്യം എന്തായിരുന്നു ?

ഞങ്ങള്‍ പറഞ്ഞത്,ഞങ്ങള്‍ക്ക് സാങ്കേതികത്വം അറിയേണ്ട കാര്യമില്ല. കൊച്ചിയിലേക്ക് ടിക്കെറ്റ് എടുത്താല്‍ ഞങ്ങളെ കൊച്ചിയില്‍ ഇറക്കുക. ഇന്ധനം ഇല്ലെങ്കില്‍ ഇന്ധനം നിറക്കുക. പൈലറ്റിന്റെ സമയം കഴിഞ്ഞു എന്നുണ്ടെങ്കില്‍ പുതിയ പൈലറ്റിനെ കൊണ്ട് വരിക.ഇതൊക്കെ ചെയ്തു നിങ്ങള്‍ ഞങ്ങളെ കൊച്ചിയിലെത്തിക്കണം. ഇത് പറഞ്ഞപ്പോഴാണ് പോലീസിനെ വിളിച്ചും കേന്ദ്ര സേനയെ വിളിച്ചും ഞങ്ങളെ ഉപദ്രവിക്കാന്‍ ശ്രമിച്ചത്.

പൈലറ്റ് രൂപാലി വാഗ്മര്‍ ഒരു ഇന്റെര്‍വ്യൂവില്‍ പറഞ്ഞിരുന്നു യാത്രക്കാര്‍ കുറച്ചു സമയം കൂടി സംയമനം പാലിക്കുകയായിരുന്നെന്കില്‍ പ്രശ്നങ്ങള്‍ ഉണ്ടാകില്ലായിരുന്നു എന്ന് ?

ഈ പ്രശ്നത്തിന് കാരണം ഈ പൈലറ്റ് തന്നെയാണ്. ഞങ്ങള്‍ ഫ്ലൈറ്റില്‍ നിന്ന് ഇറങ്ങാന്‍ തയാറാകാതിരുന്നതിനാല്‍ അവര്‍ക്കും ഇറങ്ങി പോകാന്‍ സാധിച്ചില്ല. ഫ്ലൈറ്റില്‍ യാത്രക്കാരേക്കാള്‍ ആദ്യം കയറേണ്ടത് ജീവനക്കാര്‍ ആണ്. അവസാനത്തെ  യാത്രക്കാരനും ഇറങ്ങിയതിനു ശേഷം മാത്രമേ അതിലെ ജീവനക്കാര്‍ക്ക് പുറത്തിറങ്ങാന്‍ സാധിക്കൂ. അത് നിയമമാണ്. മൂന്നു തവണ സ്റ്റാഫിന്റെ സമയം കഴിഞ്ഞതായി അവര്‍ അനൌന്‍സ്‌ ചെയ്തു.പിന്നെയും ഞങ്ങള്‍ പുറത്തിറങ്ങാതായപ്പോള്‍ ഞങ്ങള്‍ ഇറങ്ങി പോകുന്നതിനു വേണ്ടി അവര്‍ ഏ.സി ഓഫ് ചെയ്തു. ഭക്ഷണം തന്നില്ല. വെള്ളം തന്നില്ല. എന്നിങ്ങനെ പരമാവധി പീഡിപ്പിക്കാന്‍ ശ്രമിച്ചു. അതൊന്നും വക വെക്കാതെ ഞങ്ങള്‍ ഫ്ലൈറ്റില്‍ ഇരുന്നതാണ് തെറ്റ് എന്ന് പറയുന്നത്.

അവര്‍ ഇപ്പോള്‍ പറയുന്നത് ഞങ്ങളെ കൊച്ചിയിലേക്ക് കൊണ്ട് പോകാന്‍ അവര്‍ തയ്യാറായിരുന്നു എന്നാണു. യാതൊരു കാരണവശാലും കൊച്ചിയിലേക്ക് പോകില്ല എന്ന് അവര്‍ മൂന്നു തവണ അന്ന് ഫ്ലൈറ്റില്‍ അനൌന്‍സ്‌ ചെയ്തതാണ്.

യാത്രക്കാര്‍ പൈലറ്റിനെതിരെ വധ ഭീഷണി മുഴക്കിയെന്നു ആരോപണമുണ്ട് ?

ഫ്ലൈറ്റില്‍ കുട്ടികള്‍ക്ക് ഭക്ഷണം ഉണ്ടായിരുന്നില്ല. ഒരു യാത്രയില്‍ എത്ര ഭക്ഷണമാണ് നമ്മള്‍ ഒരു കുട്ടിക്ക് കരുതുക?ഇതൊന്നും മുന്‍കൂട്ടി തീരുമാനിച്ചതനുസരിച്ചു നടന്നതല്ലല്ലോ? ഭക്ഷണം തന്നതിന് ശേഷം 22 മണിക്കൂര്‍ കഴിഞ്ഞിരുന്നു അപ്പോള്‍. ഫ്ലൈറ്റില്‍ ഭക്ഷണവും വെള്ളവും കിട്ടാതെ കിടന്നിരുന്ന ഒരു കുഞ്ഞിനെ കൊണ്ട് പൈലറ്റിനു കാണിച്ചു കൊടുത്തിരുന്നു.  

ആ കുഞ്ഞിനെന്തെന്കിലും സംഭവിച്ചാല്‍ ഞാന്‍ എന്തെങ്കിലും ചെയ്യും എന്ന് ആ കുഞ്ഞിന്റെ പിതാവ് അഷറഫ്‌ പറഞ്ഞതാണ് വധഭീഷണിയായി അവരെടുത്തിരിക്കുന്നത്. ആ പറഞ്ഞതിന്റെ സാഹചര്യം കൂടി നമ്മള്‍ മനസ്സിലാക്കണം. ആ ദമ്പതികള്‍ക്ക് ആദ്യത്തെ പ്രസവത്തില്‍ ഉണ്ടായ ഇരട്ട കുട്ടികളില്‍ രണ്ടു  പേരും മരിച്ചു. പിന്നീടുണ്ടായ ഇരട്ട കുട്ടികളില്‍ ഒരു കുഞ്ഞും മരിച്ചു. അതില്‍ മരിക്കാതെ ലഭിച്ച കുഞ്ഞാണിത്. മൂന്നു മാസം ഇന്ക്യുബേറ്ററില്‍ കിടന്ന ആറു മാസം പ്രായമായ ആ കുട്ടിയുടെ കാര്യത്തില്‍ പിതാവ് വികാരാധീനനാവുക സ്വാഭാവികമാണ്.

ഭക്ഷണമില്ലാതെ, വെള്ളമില്ലാതെ 22 മണിക്കൂര്‍ ദുരിതത്തിലാകുമ്പോള്‍ ഏതൊരു മനുഷ്യനും പ്രതികരിക്കില്ലേ? ഞങ്ങളും മനുഷ്യരല്ലേ? ആ സ്വാഭാവിക പ്രതികരണം മാത്രമേ ഞങ്ങളും ചെയ്തിട്ടുള്ളൂ. ഈ സംഭവം തമിഴ്നാട്ടിലോ, യു.പി യിലോ ആയിരുന്നെങ്കില്‍ ഫ്ലൈറ്റ് തന്നെ അവര്‍ കത്തിച്ചു കളഞ്ഞേനെ. പക്ഷെ ഞങ്ങള്‍ അന്തസ്സിന്റെ ഒരു പരിധി പോലും വിട്ടു പെരുമാറിയിട്ടില്ല.

കുടിക്കാന്‍ വെള്ളം ചോദിച്ചപ്പോള്‍ കേന്ദ്ര സേനയിലെ ഉദ്യോഗസ്ഥന്‍ ‘മൂത്രം കുടിക്കാന്‍ തരാം’ എന്ന് പറഞ്ഞുവോ ?

എയര്‍ ഇന്ത്യ ജീവനക്കാര്‍ ഭക്ഷണവും വെള്ളവും എല്ലാം തീര്‍ന്നു എന്ന് പറഞ്ഞപ്പോള്‍ തളര്‍ന്നു കിടന്ന കുഞ്ഞിനു കൊടുക്കാനായി വിമാനത്തിന് താഴെ നിന്നിരുന്ന കേന്ദ്ര സേനയിലെ ഒരു ഉദ്യോഗസ്ഥനോട് കുറച്ചു വെള്ളം ചോദിച്ചു. അപ്പോഴാണ്‌ അയാള്‍ പറഞ്ഞത്, ‘വെള്ളമല്ല, കുടിക്കാന്‍ മൂത്രം തരാമെന്നു’.അതുകേട്ടപ്പോള്‍  എല്ലാവരും കൂടി ബഹളമുണ്ടാക്കി. ഉടനെ അയാള്‍ അവിടെ നിന്നും അപ്രത്യക്ഷനായി. പിന്നെ അയാളെ കണ്ടിട്ടില്ല.

പോലീസിന്റെയും കേന്ദ്ര സേനയുടെയും പെരുമാറ്റം എങ്ങിനെയായിരുന്നു ?

ഫ്ലൈറ്റിനകത്തു കയറിയിട്ടാണ് പോലീസ്‌ ഞങ്ങളെ ഉപദ്രവിക്കാന്‍ ശ്രമിച്ചത്‌. നിങ്ങളൊക്കെ കണ്ടിട്ടുണ്ടാകും ആ വീഡിയോകള്‍. അതിനകത്ത് കണ്ടതൊക്ക അവിടെ നടന്ന സത്യങ്ങള്‍ ആണ്.

കൊച്ചിയില്‍ വന്നതിനു ശേഷം അവിടെ എയര്‍ ഇന്ത്യക്കാരും കേന്ദ്ര സേനയും ചേര്‍ന്ന് മറ്റൊരു തരത്തില്‍ പീഡിപ്പിക്കുകയായിരുന്നു.ഫ്ലൈറ്റിന്റെ വാതിലില്‍ നിന്ന് എമിഗ്രേഷന്‍ കൌണ്ടര്‍ വരെ നിന്ന കേന്ദ്ര സേനക്കാരുടെ ഇടയിലൂടെയാണ് പത്തു പേര് വീതമായി ഞങ്ങളെ ഇറക്കി കൊണ്ട് വന്നത്. അതില്‍ നിന്നും ഞങ്ങള്‍ ആറു പേരെ തിരഞ്ഞു പിടിച്ചുമാറ്റിയിരുത്തുകയായിരുന്നു. ഞങ്ങളുടെ പാസ്പോര്‍ട്ട് വാങ്ങി വെച്ചു. എന്താണ് കാരണമെന്ന് ചോദിച്ചപ്പോള്‍ മിണ്ടിപ്പോകരുത് എന്ന് മാത്രമായിരുന്നു കേന്ദ്ര സേനക്കാരുടെ മറുപടി. ഒന്നും പറയാന്‍ അനുവദിക്കാതെ ഞങ്ങളെ ഭീഷണിപ്പെടുത്തുകയായിരുന്നു കേന്ദ്ര സേനയിലെ ഉയര്‍ന്ന ഉദ്യോഗസ്ഥന്മാര്‍.  അതിനു മാത്രം എന്ത് തെറ്റാണ് ഞങ്ങള്‍ ചെയ്തത്. പണം മുടക്കി എടുത്ത ടിക്കെറ്റില്‍ പറഞ്ഞ സ്ഥലത്ത് ഇറക്കി തരണം എന്ന് പറഞ്ഞതോ. അതാണോ തെറ്റ്?

തിരുവനന്തപുരത്തു വെച്ച് മന്ത്രിമാര്‍ ആരെങ്കിലും പ്രശ്നത്തില്‍ ഇടപെട്ടിരുന്നോ ? 

ഇത്രയും സംഭവങ്ങള്‍ അവിടെ നടന്നു. ടീവിയിലൂടെയും, ഇന്റെര്‍നെറ്റിലൂടെയും മറ്റും ലോകം മുഴുവനും ഇത് കണ്ടു കൊണ്ടിരുന്നിട്ടും തിരുവനന്തപുരതുണ്ടായിരുന്ന ഒരു മന്ത്രി പോലും ഞങ്ങള്‍ക്കനുകൂലമായി പറയാനുണ്ടായിരുന്നില്ല എന്നത് വളരെ ദുഖകരമായിരുന്നു. പ്രവാസികളുടെ ചുമതലയുള്ള കേന്ദ്ര മന്ത്രിയുണ്ട് നമുക്ക്, കേരളത്തിലെ പ്രവാസികളുടെ ചുമതലയുള്ള മന്ത്രിയുണ്ട്, ഇവരൊന്നും ഇതിനെപ്പറ്റി ഒരക്ഷരം മിണ്ടിയില്ല. പ്രവാസികളുടെ സഹായം വാങ്ങാന്‍ എല്ലാവരുമുണ്ട്. ഇതിനൊക്കെ ഒരു പരിഹാരമുണ്ടായെ പറ്റൂ. എത്ര കാലമായി നമ്മളിത് അനുഭവിക്കുന്നു?

എട്ടു ദിവസത്തെ ലീവിന് വന്ന ആള്‍ക്ക് അതില്‍ നാല് ദിവസം പോകുക എന്നത് ദുഖകരമല്ലേ. പെരുന്നാളിന്റെ ലീവിന് വന്ന ആളുകള്‍ ആയിരുന്നു അധികവും. പിതാവ്‌ അത്യാസന്ന നിലയില്‍ ആശുപത്രിയില്‍ കിടക്കുന്ന ഒരു മകനുണ്ടായിരുന്നു അതില്‍. വന്നതിന്റെ പിറ്റേ ദിവസം ബാപ്പ മരിക്കുന്നു. നഷ്ടപ്പെട്ട സമയത്തെ കുറിച്ച് അയാള്‍ക്കെത്ര വിഷമമുണ്ടാകും.ജോലിക്കായി ഇന്റര്‍വ്യൂവിനു വന്നിരുന്ന ആളുകളുണ്ടായിരുന്നു. കല്യാണത്തിന് വന്നവര്‍, അങ്ങിനെ എത്ര പേര്‍. അതില്‍ കുറച്ചു പേരെ പിന്നീട് മൊഴിയെടുക്കാന്‍ വിളിപ്പിക്കുക, തെളിവെടുപ്പിന് വിളിപ്പിക്കുക, എന്തൊരു അക്രമമാണിത്?

ഈ സംഭവത്തെ തുടര്‍ന്ന് നിങ്ങള്‍ക്കെതിരെ പോലീസ്‌ കേസ്‌ എടുത്തിട്ടുണ്ടോ ?

ഈ കേസിലെ പ്രധാന വിഷയം കേസിനെ സംബന്ധിച്ച ഒന്നും തന്നെ പോലീസ്‌ വെളിപ്പെടുത്തുന്നില്ല എന്നതാണ്. ഞങ്ങള്‍ ചോദിക്കുന്നതിനൊന്നും അവര്‍ വ്യക്തമായി മറുപടി പറയുന്നില്ല. ഞങ്ങള്‍ക്കെതിരെ കേസ്‌ എടുക്കില്ല എന്ന് പറഞ്ഞു. എന്നാല്‍ എഫ്ഫ.ഐ.ആര്‍ ഇട്ടിട്ടുണ്ട്. എഫ.ഐ.ആര്‍ ഇടാത്ത ഒരു കേസിന് ഞങ്ങളെ മൊഴിയെടുക്കാന്‍ വിളിക്കേണ്ട ആവശ്യമില്ല. കേസില്ല എന്ന് പറഞ്ഞു പറഞ്ഞയക്കുന്ന സമയത്ത് അവര്‍ പിന്നെയും ഞങ്ങളുടെ എല്ലാവരുടെയും ഫോട്ടോ എടുത്തു. ഞങ്ങള്‍ ആറു പേരെയും നിരത്തി നിര്‍ത്തിയാണ് ഫോട്ടോ എടുത്തത്‌. പിന്നീട് അത് എന്തിനൊക്കെ ഉപയോഗിച്ച് എന്നറിയില്ല.എന്തെങ്കിലും പ്രശ്നങ്ങള്‍ ഉണ്ടാവുകയാണെങ്കില്‍ അതേ നാണയത്തില്‍ തന്നെ നേരിടാം എന്നാണു ഞങ്ങള്‍ക്ക് ലഭിച്ച നിയമോപദേശം.

എഫ്.ഐ.ആറിന്റെ കോപ്പി ഞങ്ങള്‍ ചോദിച്ചില്ല. വാക്കാല്‍ മാത്രമേ കേസില്ല എന്ന് പറഞ്ഞിട്ടുള്ളൂ. പൈലറ്റ് എയര്‍പോര്‍ട്ട് അധികൃതര്‍ക്ക്‌ നല്‍കിയ പരാതിയില്‍ ഡല്‍ഹിയില്‍ നിന്നും വന്ന ഒരു ഉന്നത ഉദ്യോഗസ്ഥന്‍ ഞങ്ങളെ വിളിപ്പിച്ചു. ഞങ്ങള്‍ ഇവിടെ വന്നു രണ്ടു ദിവസം കഴിഞ്ഞിട്ടാണ് വിളിപ്പിച്ചത്. അപ്പോള്‍ ഞങ്ങള്‍ പോയി മൊഴി കൊടുത്തിരുന്നു.  ആ മൊഴി കൊടുത്തതിന്റെ കോപ്പി ഞങ്ങളുടെ കൈവശമുണ്ട്.

തിരുവനന്തപുരം വലിയതുറ പോലീസ്‌ സ്റേഷനില്‍ പൈലറ്റ് രൂപാലി പരാതി നല്‍കിയിട്ടുണ്ട്. എന്നാല്‍ ഹൈജാക്ക് ചെയ്തു എന്നതിന് ബ്ലാക്ക്‌ ബോക്സ് വിശദാംശങ്ങള്‍ നല്‍കണം. അത ഇത് വരെ കൊടുത്തിട്ടില്ല. അത് കൊടുത്താല്‍ ഞങ്ങള്‍ ചെയ്തത് നൂറു ശതമാനം ശരിയാണ് എന്ന് തെളിയും. അത് കൊണ്ടാണ് കൊടുക്കാത്തത്.

യാത്രക്കാര്‍ മദ്യപിച്ചിരുന്നു എന്ന് പറയുന്നു ?

ഫ്ലൈറ്റില്‍ അന്ന് മദ്യം വിതരണം ചെയ്തിരുന്നില്ല. ഭക്ഷണം തന്നെ വളരെ താമസിച്ചായിരുന്നു നല്‍കിയത്. ഫ്ലൈറ്റില്‍ 185 യാത്രക്കാരോളമുണ്ടായിരുന്നു. അവര്‍ പരസ്പരം അറിയുന്നവരല്ല. എല്ലാം ഒരു പ്ലാനിങ്ങുമില്ലാതെ നടന്നതാണ്. എല്ലാം യാദൃശ്ചികമായിരുന്നു. യാതൊരു കോര്‍ഡിനേഷനും ഉണ്ടായിരുന്നില്ല. അവിടെ ഓരോരുത്തരുടെയും അവസ്ഥയും വികാരവും അവര്‍ പ്രകടിപ്പിച്ചു.

തിരുവനന്തപുരത്ത് നിന്നും കൊച്ചിയിലേക്ക് കൊണ്ട് വരുമ്പോള്‍ കേസ് ഉണ്ടാവില്ല എന്ന് ഉറപ്പു തന്നിരുന്നോ ?

തിരുവനന്തപുരത്ത് നിന്നും കൊച്ചിയിലേക്ക് കൊണ്ട് വരുമ്പോള്‍ കേസ് ഉണ്ടാവില്ല എന്ന് ആരും ഉറപ്പു പറഞ്ഞിരുന്നില്ല. അത്തരം പത്രവാര്‍ത്തകളില്‍ ഞങ്ങള്‍ വിശ്വസിക്കുന്നില്ല. കാരണം കേസില്ല എങ്കില്‍ തിരുവനന്തപുരത്തെ വലിയതുറ പോലീസ്‌ സ്റേഷനില്‍ വെച്ച് മൊഴിയെടുതത്തിനു ശേഷം എന്തിനാണ് ഞങ്ങളുടെ ഫോട്ടോ എടുത്തത്. അതിനാണ്  അബ്ദുല്‍ ഖാദര്‍ എം.എല്‍.എ അവിടെ നിരാഹാരമിരുന്നത്. അതിനു അദ്ദേഹത്തിന്റെ പേരിലും കേസുണ്ട്, പോലീസ്‌ സ്റ്റേഷന്റെ പ്രവര്‍ത്തനം തടസ്സപ്പെടുത്തി എന്ന പേരില്‍.

കൊച്ചിയിലെത്തിയപ്പോള്‍ കസ്റ്റഡിയിലായ നിങ്ങളെ കൂടാതെ മറ്റു യാത്രക്കാര്‍ വിമാനത്താവളത്തിന് പുറത്തിറങ്ങി എന്നും നിങ്ങളുടെ ബന്ധുക്കള്‍ പ്രതികരിച്ചപ്പോഴാനു അവര്‍ നിങ്ങളെ വിട്ടു കിട്ടാന്‍ സമരം തുടങ്ങിയതെന്നും പത്രവാര്‍ത്തയുണ്ടായിരുന്നല്ലോ ?

അത് ശരിയല്ല. ഞങ്ങളെ ആറു പേരെ മാത്രം തടഞ്ഞു വെച്ച്. ബാക്കിയുള്ള എല്ലാവരെയും എമിഗ്രേഷന്‍ കഴിഞ്ഞു താഴേക്കു വിട്ടു. അവര്‍ വന്നു ലഗേജ്‌ എടുത്തു പുറത്തു പോകുന്നതിനു മുന്‍പ് ഈ ആറു പേരയും വിട്ടു തരണമെന്ന് ആവശ്യപ്പെട്ടു. ഞങ്ങള്‍ ഒരുമിച്ചു പ്രതികരിച്ചവരാണ്, അവരെ വിട്ടു തരാതെ ഞങ്ങള്‍ പുറത്തു പോവില്ല എന്ന് പറഞ്ഞു യാത്രക്കാര്‍ എയര്‍പോര്‍ട്ടില്‍ നിന്ന് പുറത്തിറങ്ങാതെ ഉള്ളില്‍ തന്നെ ഇരുന്നു. അങ്ങിനെ ഒന്നര മണിക്കൂറിലധികം ഇരുന്നപ്പോഴാണ് മറ്റു യാതൊരു വഴിയുമില്ലാതെ ഞങ്ങളെ വിട്ടയക്കുന്നത്.

കേന്ദ്ര സേനയിലെ അറുപതോളം ആളുകള്‍ തോക്കുമായി ലഗേജ്‌ എടുക്കുന്ന സ്ഥലത്തുനിന്നും വാഹനം നില്‍ക്കുന്ന സ്ഥലം വരെ വളഞ്ഞാണ് ഞങ്ങളെ കൊണ്ട് പോയത്. എന്തിനാണ് തീവ്രവാദികളെ കൊണ്ട് പോകുന്നത് പോലെ ഞങ്ങളെ കൊണ്ട് പോയത്. ഒരു തെറ്റും ചെയ്യാതെ തീവ്രവാദി എന്ന് മുദ്ര കുത്തുമ്പോള്‍ ഉണടാകുന്ന ഞങ്ങളുടെ അവസ്ഥ നിങ്ങള്ക്ക് ഊഹിക്കാവുന്നതേയുള്ളൂ.

കേരള പോലീസിന്റെ പെരുമാറ്റം എങ്ങിനെയായിരുന്നു ?

കേരള പോലീസിലെ ഉയര്‍ന്ന രണ്ടു ഉദ്യോഗസ്ഥന്മാരടക്കം ഏതാണ്ട് പതിനഞ്ചു പേര്‍ തിരുവനതപുരത്ത് വെച്ച് ഫ്ലൈറ്റിനടുത്തെക്ക് വന്നു ഞങ്ങളോട് ഉള്ളില്‍ കയ്യറി ഇരിക്കാന്‍ ആവശ്യപ്പെട്ടു. പക്ഷെ ആ സമയത്ത് ഉള്ളില്‍ കയറി ഇരിക്കാന്‍ പറ്റുന്ന അവസ്ഥ ആയിരുന്നില്ല വിമാനത്തില്‍. ഏ.സി ഓഫ് ചെയ്തിരുന്നു. വെള്ളമില്ലാത്തത് മൂലം അതിനകത്ത് ദുര്‍ഗന്ധം നിറഞ്ഞിരുന്നു. ആ സമയത്ത് കേരള പോലീസിലെ ഒരു ഉന്നത ഉദ്യോഗസ്ഥന്‍ മാത്രമാണ് ഞങ്ങളോടെ വളരെ മോശമായി പെരുമാറിയത്. എന്തിന്റെ അടിസ്ഥാനത്തിലാണ് അദ്ദേഹം അങ്ങിനെ പെരുമാറിയത്‌ എന്ന് അറിയില്ല.

കൊച്ചിയിലെത്തിയപ്പോള്‍ കേരള പോലീസ്‌ ഏറ്റവും നന്നായാണ് പെരുമാറിയത്. മാത്രമല്ല ഞങ്ങളെ അഭിനന്ദിക്കുകയും ചെയ്തു. കുറേക്കാലമായി എയര്‍ ഇന്ത്യ നടത്തുന്ന ഇത്തരം പെരുമാറ്റങ്ങളോട് ഇങ്ങിനെ തന്നെയായിരുന്നു പ്രതികരിക്കേണ്ടത് എന്ന് അവര്‍ ഞങ്ങളോട് പറഞ്ഞു. ഇന്ന് വരെ എയര്‍ ഇന്ത്യ തിരുവന്തപുരത്തു ഇറക്കിയവരെ ഫ്ലൈറ്റില്‍ തന്നെ കൊച്ചിയിലെത്തിച്ചിട്ടില്ല. നിങ്ങളെ കൊണ്ട് അത് സാധിച്ചു എന്ന് പറഞ്ഞു ഉന്നത ഉദ്യോഗസ്ഥര്‍ വരെ വന്നു ഞങ്ങളെ അഭിനന്ദിച്ചിരുന്നു.

സംഭവത്തില്‍ പെട്ട അഷറഫ്, അഗസ്റ്റിന്‍, റാഷിദ്, മനോജ്,തോമസ് മറ്റു അഞ്ചു പേരുടെ അവസ്ഥ എന്താണ് ?

സംഭവത്തില പെട്ടിട്ടുള്ള മറ്റു അഞ്ചു പേരുമായി നിരന്തര സമ്പര്‍ക്കമുണ്ട്. എല്ലാവരും തിരിച്ചെത്തി. എയര്‍പോര്‍ട്ടില്‍ നിന്നും പോലീസ്‌ പിടിച്ചു കൊണ്ട് പോകാന്‍ നോക്കിയ തോംസനൊക്കെ തിരിച്ചെത്തിയപ്പോള്‍ നല്ല സ്വീകരണമാണ് പ്രവാസികള്‍ എയര്‍പോര്‍ട്ടില്‍ വെച്ഗ്  നല്‍കിയത്. 

സംഭവത്തിന്‌ ശേഷമെങ്കിലും മന്ത്രിമാരോ ജനപ്രതിനിധികളോ ബന്ധപ്പെട്ടിരുന്നോ?

ഈ സംഭവത്തിന്‌ ശേഷം മന്ത്രിമാരോ മറ്റുള്ളവരോ ബന്ധപ്പെട്ടിട്ടില്ല. കൊച്ചിയില്‍ മൊഴി കൊടുത്തു മടങ്ങുമ്പോള്‍ കെ.വി.അബ്ദുല്‍ ഖാദര്‍ എം.എല്‍.എ ബന്ധപ്പെട്ടിരുന്നു. അദ്ദേഹം ഇങ്ങോട്ട് ബന്ധപ്പെടുകയായിരുന്നു. അദ്ദേഹം ഞങ്ങളുടെ മുന്നില്‍ വെച്ച് തന്നെ മുഖ്യ

മന്ത്രിയുമായി മൊബൈല്‍ ഫോണില്‍ ബന്ധപ്പെട്ടു. ഒരു കാരണവശാലും ഞങ്ങള്‍ക്കെതിരെ കേസെടുക്കില്ല എന്ന് മുഖ്യമന്ത്രി അദ്ദേഹത്തോട് പറയുന്നത് ഞങ്ങള്‍ കേട്ടിരുന്നു. അതിനു പിറ്റേ ദിവസമാണ് തിരുവനന്തപുരത്ത് നിന്ന് പോലീസ്‌ വിളിക്കുന്നത്. അപ്പോള്‍ ആര് പറയുന്നതാണ് വിശ്വസിക്കുക?മുഖ്യമന്ത്രി പറയുന്നത് പോലും നടക്കുന്നില്ല എന്ന അവസ്ഥയാണുള്ളത്. ആരോടാണ് പിന്നെ സങ്കടം പറയുക?

നമുക്ക് പ്രവാസകാര്യത്തിനു മാത്രമായി ഒരു ഒരു കേന്ദ്രമന്ത്രിയില്ലേ?. അദ്ദേഹം ഇത് വരെ ഇതിനെപ്പറ്റി ഒന്നും പറഞ്ഞില്ല. പ്രതികരിച്ച ആളുകളെ കമ്മ്യൂണിസ്റ്റ്കാരാക്കി,പെണ്‍വാണിഭക്കാരാക്കി. എന്ത് മോശമാണിതൊക്കെ? നമ്മുടെ പേരിലാണ് അദ്ദേഹം ഈ ലോകം ചുറ്റുന്നത്. ഈ സുഖ സൌകര്യങ്ങളൊക്കെ അനുഭവിക്കുന്നത്.

ഞങ്ങള്‍ക്ക് ഒരു വ്യക്തിയോടും വ്യക്തിപരമായി വൈരാഗ്യമില്ല. എന്നാല്‍ പ്രവാസികളുടെ പേരില്‍ ശമ്പളം വാങ്ങി, മറ്റുള്ള എല്ലാ ആനുകൂല്യങ്ങളും പറ്റുന്ന ആളുകള്‍ പ്രവാസികള്‍ക്ക് വേണ്ടി ഒരക്ഷരം പറയാന്‍ തയ്യാറാവുന്നില്ല എന്നറിയുമ്പോള്‍ അതിലും കൂടുതല്‍ സങ്കടം എന്താണുള്ളത്?

പുതിയ മന്ത്രി വേണുഗോപാല്‍ ആദ്യമായി വന്നു.പ്രവാസികള്‍ക്ക് പ്രതീക്ഷയുണ്ടായിരുന്നു. എന്നാല്‍ തിരിച്ചു പോയത് ആരെങ്കിലും അറിഞ്ഞോ? എന്തെങ്കിലും പ്രസ്താവനയുണ്ടായോ? ഒരു എം.എല്‍.എ വന്നു, ഷാഫി പറമ്പില്‍. ഇവരൊക്കെ വന്നത് മാത്രമേ അറിയുന്നുള്ളൂ. പോയത് ആരും അറിയുന്നില്ല. ഞാനിവിടെ വന്നു, ഒരു പരാതി കിട്ടി, അതിനു ഇന്ന തരത്തിലുള്ള നടപടി ഉണ്ടാവും എന്ന് പറയാന്‍ ഒരു മന്ത്രിക്കു പോലും സാധിക്കാത്ത അവസ്ഥയാണിപ്പോള്‍.

നാട്ടുകാരില്‍ നിന്നുള്ള പ്രതികരണം എങ്ങിനെ ആയിരുന്നു ?

നാടുകാരില്‍ നിന്നും നല്ല പ്രതികരണമായിരുന്നു. നാലഞ്ചു ദിവസത്തോളം പത്ര മാധ്യമങ്ങളിലും മറ്റും ഞങ്ങള്‍ നിറഞ്ഞു നിന്നിരുന്ന ഒരു സമയമായിരുന്നു. എല്ലാവരും, പ്രത്യേകിച്ച് പ്രവാസി കുടുംബങ്ങളില്‍ ഉള്ളവര്‍ നിങ്ങള്‍ ചെയ്തത് വളരെ നന്നായി എന്ന രീതിയിലാണ് പ്രതികരിച്ചത്. കാരണം ഒട്ടു മിക്ക പ്രവാസികളും എയര്‍ ഇന്ത്യയില്‍ നിന്ന് ഒരിക്കലെങ്കിലും ഇത്തരം പെരുമാറ്റങ്ങള്‍ ലഭിച്ചവരാണ്.

എയര്‍ ഇന്ത്യയുടെ പ്രതികരണം എങ്ങിനെ ?

ചരിത്രത്തില്‍ ആദ്യമായാണ് ഇത്തരം ഒരു സമരം വിജയിക്കുന്നത്. അതിനാല്‍ എയര്‍ ഇന്ത്യ വിറളി പൂണ്ടിരിക്കുന്നു. എയര്‍ ഇന്ത്യയുടെ പേടി ഈ സംഭവം ഒരു തുടര്‍ച്ചയാകുമോ എന്നാണു. ഇനിയും ഇത്തരം പ്രതികരണങ്ങള്‍ തുടര്‍ന്നാല്‍ അത് എയര്‍ ഇന്ത്യയുടെ ഉത്തരവാദിത്വമില്ലായ്മക്ക് കൂടുതല്‍ ഭീഷണിയാകും. ഞങ്ങള്‍ പ്രതികരിച്ചതിന്റെ അടുത്ത ദിവസം തന്നെ കോഴിക്കോട്‌ ഇറക്കേണ്ട ഫ്ലൈറ്റ് കൊണ്ട് വന്നു കൊച്ചിയിലിറക്കി. ആളുകളോട് ബസ്സില്‍ പോകാന്‍ പറഞ്ഞു. യാത്രക്കാരെല്ലാവരും പുറത്തിറങ്ങി നിന്നു. ആ അവസ്ഥയില്‍ ഒരു ഫ്ലൈറ്റ് പോലും ഇറക്കാന്‍ സാധിച്ചില്ല. അവസാം അവരെ കോഴികോട് കൊണ്ട് പോയി ഇറക്കി കൊടുത്തു. ഇത് ഒരു തുടര്‍ കഥയാകുമോ എന്ന് എയര്‍ ഇന്ത്യക്ക് പേടിയുണ്ട്. അതുണ്ടാവാതിരിക്കാന്‍ ഞങ്ങളെ പലതും പറഞ്ഞു പേടിപ്പിക്കുകയാണ്.

എയര്‍ ഇന്ത്യക്കെതിരെ നിയമ നടപടിക്ക് ഉദ്ദേശമുണ്ടോ ?

എയര്‍ ഇന്ത്യക്കെതിരെ മാനസിക പീഡനത്തിനും ഉപഭോക്തൃ സംരക്ഷണ നിയമനുസരിച്ചും നടപടി സ്വീകരിക്കുന്നതിനുള്ള കാര്യങ്ങള്‍ ആലോചിച്ചു വരികയാണ്. നിയമ വശങ്ങള്‍ മുഴുവന്‍ പഠിച്ച ശേഷം എംബസ്സി മുഖേന പരാതി നല്‍കും.

എയര്‍ ഇന്ത്യ ഇനിയും രക്ഷപ്പെടുമെന്ന് തോന്നുന്നുണ്ടോ ?

എന്തൊക്കെ പറഞ്ഞാലും എയര്‍ ഇന്ത്യ തകരണമെന്നോ എയര്‍ ഇന്ത്യയെ ബഹിഷ്കരിക്കണമെന്നോ ഉള്ള അഭിപ്രായം എനിക്കില്ല. കാരണം അതു നമ്മുടെ ഓരോരുത്തരുടെയും സ്വത്താണ്. നമ്മള്‍ നാടിലേക്ക് വരാന്‍ ടിക്കെറ്റ് എടുക്കുന്നതിനു വേണ്ടി വെബ്സൈറ്റില്‍ തിരയുമ്പോള്‍ നമ്മുടെ കൈ ആദ്യം പോകുക എയര്‍ ഇന്ത്യ എക്സ്പ്രസ്സിലേക്ക് ആയിരിക്കും. അത് നമ്മുടെ ദേശീയ ബോധം കൊണ്ടാണ്.

അത് നശിപ്പിക്കാന്‍ നമ്മള്‍ കൂട്ട് നില്‍ക്കരുത്. നമ്മളതിനെ നന്നാക്കിയെടുക്കാനാണ് ശ്രമിക്കേണ്ടത്. നന്നാക്കിയെടുക്കാന്‍ ഇപ്പോഴുള്ളവര്‍ക്ക് പറ്റുന്നില്ലെങ്കില്‍ പറ്റുന്നവരെ നിയമിക്കുക. യൂസഫലി പോലുള്ള ആളുകള്‍ അതില്‍ നിന്നും പുറത്തു പോരുമ്പോള്‍, കെടുകാര്യസ്ഥത എത്രയുണ്ടെന്ന് മനസ്സിലാക്കാം. ഈ സ്ഥാപനം നശിപ്പിച്ചിട്ട് അതിനെ വില കുറച്ചു ആര്‍ക്കും വേണ്ടാതാക്കി ഏറ്റെടുക്കാന്‍ ചില ആളുകള്‍ ഒരുങ്ങിയിരിക്കുന്നുണ്ട്.അവര്‍ക്ക് വേണ്ടി മറ്റുള്ളവര്‍ കളിക്കുന്ന കളികളുടെ ഉദാഹരണങ്ങളാണിതൊക്കെ. അല്ലെങ്കില്‍ അജിത്‌ സിംഗിനെ പോലുള്ളവര്‍ ഇങ്ങിനെ സംസാരിക്കുമോ?

പ്രവാസിയുടെ പ്രശ്നം എയര്‍ ഇന്ത്യ മാത്രമാണോ ?

പ്രവാസിക്ക് ഇപ്പോള്‍ എയര്‍ ഇന്ത്യ പ്രശ്നം മാത്രമല്ല ഉള്ളത്. മറ്റു ഒരു പാട് പ്രശ്നങ്ങളുണ്ട്. ഒരാളും ആവശ്യപ്പെടാത്ത ഒന്നാണ് ശ്മശാനം. നമുക്ക് വേണ്ടത് ശ്മശാനമല്ല. മറിച്ച് നമുക്ക് ലഭിക്കേണ്ട ന്യായമായ അവകാശങ്ങളാണ്. കപ്പല്‍ സര്‍വീസ്‌ ഉണ്ടായിരുന്നല്ലോ ഇവിടെ, എന്ത് സൌകര്യമായിരുന്നു, നിരവധി ആളുകള്‍ അതുപയോഗിച്ചിരുന്നില്ലേ? അതൊക്കെ അവസാനിപ്പിച്ചത് സ്വാര്‍ത്ഥ ലാഭത്തിനു വേണ്ടി മാത്രമാണ്. കൂട്ടായ അവകാശഷങ്ങള്‍ക്ക് വേണ്ടി എല്ലാവരും നിലകൊള്ളണം.

മുഖ്യമന്ത്രിയും മറ്റും പറഞ്ഞിട്ട് നടക്കുന്നില്ല.പ്രവാസികാര്യ മന്ത്രി മിണ്ടുന്നില്ല. ലക്ഷകണക്കിനു വരുന്ന നമ്മുടെ പ്രതിനിധി എന്ന നിലക്ക് ഒരു മന്ത്രി പോലും നമ്മളെ സപ്പോര്‍ട്ട് ചെയ്യാനില്ലാത്ത അവസ്ഥയില്‍  നമ്മള്‍ നമ്മളെ മനസിലാക്കുക.രാഷ്ട്രീയ പാര്‍ട്ടിക്കതീതമായി പ്രവാസികളെ സഹായിക്കുന്നവര്‍ക്ക് വോട്ടു ചെയ്യണമെന്നു നമ്മുടെ കുടുംബങ്ങളോട് ആവശ്യപ്പെടണം.

പ്രവാസികള്‍ ഏതു രീതിയില്‍ പ്രവര്തിക്കനമെന്നാണ് താന്കള്‍ ആഗ്രഹിക്കുന്നത് ?

ഇനിയും നമ്മള്‍ അനുഭവിക്കാനാണ് ആഗ്രഹമെന്കില്‍ ആയിക്കോട്ടെ. അല്ലാത്ത പക്ഷം പ്രവാസി പ്രതികരിക്കണം. കേരളത്തിന്റെ ഒരു വര്‍ഷത്തെ ബജറ്റിനെക്കാള്‍ അധികമാണ് പ്രവാസികള്‍ അയക്കുന്ന പണം. കേരളത്തില്‍ ഇത്രയും വികസനമുണ്ടാവാന്‍ കാരണം പ്രവാസികള്‍ തന്നെയാണ്. ഇവിടെ പ്രവാസി സ്വാധീനമില്ലാത്ത ഒരു കുടുംബത്തിനെ പറയാമോ? അത്രയും സ്വാധീനമുള്ള നമ്മള്‍ ഇത്രയും പീഡനം ഏറ്റു വാങ്ങേണ്ട ആവശ്യമെന്ത്ന്തു? അതിനു നമ്മളൊന്നായേ പറ്റൂ. ചര്‍ച്ചകള്‍ക്കും, പരാതി വാങ്ങാനും എത്തുന്ന നേതാക്കളോട് നമ്മുടെ പ്രശ്നങ്ങള്‍ എഴുതി നല്‍കി പ്രശ്ന പരിഹാരം എഴുതി വാങ്ങിക്കണം.  

ഗള്‍ഫിലെ പ്രവാസി സംഘടനകളുടെ പ്രതികരണം എങ്ങിനെ ആയിരുന്നു ?

ഏറ്റവും നന്നായി പ്രതികരിച്ചവരാണ്  സൗദിയിലെ പ്രവാസികളും, അബുദാബിയിലെ കെ.എം.സി.സിയും. എനിക്ക് വ്യക്തമായ രാഷ്ട്രീയമുണ്ട്. ഞാന്‍ ഇടതുപക്ഷ അനുഭാവിയാണ്. പക്ഷെ നല്ലത് ചെയ്യുമ്പോള്‍ പറയാതിരിക്കാന്‍ വയ്യ. അബുദാബി കെ എം സി സി ഏറ്റവും നന്നായി 

പ്രതികരിച്ചു. ഏറ്റവും അധികം ആളുകളെ ഉള്‍പ്പെടുത്തി ചര്‍ച്ചകളും മറ്റും സംഘടിപ്പിച്ചു. ഈ പ്രശ്നത്തില്‍ യു.എ.ഇ യില്‍ മുന്നില്‍ നിന്നത് കെ.എം.സി.സി ആണ്.

സൗദിയിലെ കുറെ കൂട്ടായ്മയിലെ ആളുകള്‍ ഒരു യോഗം വിളിച്ചിരുന്നു. ഞാന്‍ അതില്‍ ഫോണിലൂടെ സംസാരിച്ചിരുന്നു. ഫേസ് ബുക്കിലും മറ്റുമൊക്കെ സൗദി പ്രവാസികള്‍ ഏറ്റവും നന്നായി പ്രതികരിച്ചു, ചര്‍ച്ച ചെയ്തു. എങ്കിലും നമുക്ക് ചര്‍ച്ചകള്‍ക്ക് അപ്പുറം പ്രായോഗികമായി മുന്നോട്ടു പോയേ പറ്റൂ. എപ്പോഴും ചര്‍ച്ചയും സെമിനാറും മാത്രമായാല്‍ ഒന്നും നടക്കില്ല. കുറേക്കാലമായി നമ്മള്‍ ഈ ചര്‍ച്ചകളുമായി നടക്കുന്നു. ഇനി പ്രായോഗികമായി പ്രവര്‍ത്തിക്കേണ്ട സമയമായി.

ഭാവി പരിപാടികള്‍ എന്തെങ്കിലും ആസൂത്രണം ചെയ്തിട്ടുണ്ടോ?

ഞങ്ങള്‍ ഒരു രേജിസ്ട്രെട് സംഘടന ഉണ്ടാക്കാന്‍ പോകുന്നു. അതില്‍ രാഷ്ട്രീയമില്ല. പിരിവുകളില്ല. സോഷ്യല്‍ മീഡിയകളിലൂടെ നിരവധി മികച്ച ബന്ധങ്ങള്‍ ലഭിച്ചിട്ടുണ്ട്. അത് ഉപയോഗപ്പെടുത്തി ഓരോ ഭാഗത്തും നല്ല കൂട്ടായ്മകള്‍ ഉണ്ടാക്കി കൂട്ടായ തീരുമാനങ്ങളെടുക്കുക. നാട്ടിലുള്ള ആളുകളും പ്രവാസികളും പിന്തുണക്കുകയാനെന്കില്‍ എംബസ്സി വഴി പരാതി നല്‍കാന്‍ സാധിക്കും. അങ്ങിനെ പരാതികള്‍ നല്‍കുക. നല്ല അഭിഭാഷകര്‍ അതിലുണ്ട്. അവരെല്ലാം വളരെ താല്പ്പര്യതോട് കൂടി നമ്മളെ പിന്തുണയ്ക്കാമെന്ന് അറിയിച്ചിട്ടുണ്ട്.

ഒരു സംഘടനയുമായി മുന്നോട്ടു പോയാല്‍ എല്ലാം ശരിയാക്കാം എന്ന് തോന്നുന്നുണ്ടോ?

നമുക്ക് സാധിക്കും. കാരണം വയലാര്‍ രവി പോലുള്ള ഒരു കേന്ദ്രമന്ത്രി വന്നിട്ട് കേവലം അമ്പതു ആളുകളെ പോലും സദസ്സില്‍ തികച്ചു അണിനിരത്താന്‍ കിട്ടിയില്ല എന്നത് ഒരു വലിയ കാര്യം തന്നെയാണ്. ഉള്ളവരില്‍ തന്നെ മുപ്പതു പേരോളം പത്രക്കാരായിരുന്നു. ഈ വികാരം നിലനിര്‍ത്തി കൊണ്ട് മുന്നേറിയാല്‍ പ്രവാസികള്‍ക്ക് പലതും നേടിയെടുക്കാന്‍ സാധിക്കും. അതിന എല്ലാവരും ഒറ്റക്കെട്ടാവണം എന്നാണു എനിക്ക് പറയാനുള്ളത്. ഒരു രാഷ്ട്രീയവും ഇതിലില്ല. ഗ്രൂപ്പും ഇല്ല. പ്രവാസി എന്ന ഒരു ഐക്യ ബോധവും ചിന്തയും മാത്രം.

പ്രവാസം നമ്മെലെന്നു തുടങ്ങിയോ അന്നു മുതലുണ്ട് ഈ പ്രശ്നം. ഇത്രയും കാലം നമ്മളിവരെ തീറ്റിപോറ്റി. ഗള്‍ഫിലേക്ക് വരുന്നവരെ നമ്മള്‍ സുഖിപ്പിച്ചു വിട്ടു. അന്നൊക്കെ അവര്‍ പല വാഗ്ദാനങ്ങളും നല്‍കി. ഇനി അങ്ങിനെ വിട്ടു കൊടുക്കേണ്ടതില്ല. തിരഞ്ഞെടുപ്പില്‍ നമ്മുടെ ആവശ്യങ്ങള്‍ അംഗീകരിക്കാന്‍ തയാറുള്ള ആളുകളെ മാത്രമേ നമ്മള്‍ അംഗീകരിക്കൂ എന്ന് പ്രവാസികള്‍ കൂട്ടായി തീരുമാനിക്കുകയാണെങ്കില്‍ ഇവരെല്ലാം വരച്ച വരയില്‍ വരും. ഒരു സംശയവുമില്ല. അതിനായി കൂട്ടായ ചര്‍ച്ചകള്‍ ഇപ്പോള്‍ മീഡിയകളിലൂടെ നടന്നു കൊണ്ടിരിക്കുന്നു.

നമ്മള്‍ പ്രവാസികള്‍ രാഷ്ട്രീയത്തിന് വേണ്ടിയും മതത്തിനു വേണ്ടിയും വളരെയധികം കലഹങ്ങള്‍ ഉണ്ടാക്കുന്നു. ആ കലഹത്തിന് പകരം സ്വന്തം ആവശ്യത്തിന് വേണ്ടി ആരും നില കൊള്ളുന്നില്ല. എന്നാല്‍ നില കൊള്ളുന്ന ഒരു അവസ്ഥയിലേക്ക് ഇപ്പോള്‍ നമ്മള്‍ എത്തിയിട്ടുണ്ട്. ഇത് നില നിര്‍ത്താന്‍ സാധിച്ചാല്‍ പ്രവാസികള്‍ രക്ഷപ്പെട്ടു. 

 

LATEST

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

Published

on

ഞാന്‍ ഇപ്പോള്‍ റിയാദില്‍ ഹൗസ് ഡ്രൈവര്‍ വിസയില്‍ ജോലി ചെയ്യുകയാണ്. സ്വന്തമായാണ് പുറത്ത് ജോലി ചെയ്യുന്നത്. ഹൗസ് ഡ്രൈവര്‍മാര്‍ക്ക് ലെവി ബാധകമാക്കിയല്‍ മുന്നോട്ട് തുടര്‍ന്ന് പോകാന്‍ സാധിക്കില്ല. എന്ന് മുതലാണ്‌ ഈ നിയമം നിലവില്‍ വരുന്നത്, ഏതെങ്കിലും തരത്തിലുള്ള ഒഴിവാക്കലുകള്‍ ഉണ്ടാകുമോ തുടങ്ങിയ കാര്യങ്ങള്‍ വിശദീകരിക്കാമോ? സ്പോണ്‍സര്‍ഷിപ്പ് മാറുന്നതിന് എന്തൊക്കെ നടപടി ക്രമങ്ങളാണ് സ്വീകരിക്കേണ്ടത് എന്നും പറഞ്ഞു തരാമോ?

സൗദിയില്‍ കോവിഡ് വ്യാപനം രൂക്ഷമാവുന്നതിന് മുന്‍പ് അനധികൃത വിദേശികളെ പിടികൂടുന്നതിന് വേണ്ടി വ്യാപകമായ പരിശോധന നടന്നിരുന്നു. നിലവിലെ പ്രത്യേക സുരക്ഷാ ഭീഷണി സാഹചര്യങ്ങള്‍ മുന്‍നിറുത്തി അധികൃതര്‍ ലക്ഷ്യമിട്ടിരുന്നത് പ്രധാനമായും യാതൊരു രേഖകളും ഇല്ലാതെ അതിര്‍ത്തി പ്രദേശങ്ങളിലൂടെ നുഴഞ്ഞു കയറിയവര്‍, രേഖകളുടെ കാലാവധി അവസാനിച്ചിട്ടും രാജ്യത്ത് തുടര്‍ന്നവര്‍ തുടങ്ങിയ അനധികൃത താമസക്കാരെ ആയിരുന്നു. മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധന അല്ലാതിരുന്നിട്ടു കൂടി ഈ പരിശോധനകളില്‍ ജവാസാതിന്റെയും സംയുക്ത സുരക്ഷ സേനകളുടെയും പിടിയില്‍ പത്തു ശതമാനത്തോളം വിദേശികളും ഉള്‍പ്പെട്ടിരുന്നു. ഇതില്‍ അധികവും ഹൗസ് ഡ്രൈവര്‍ വിസയില്‍ സൗദിയിലെത്തി സ്വന്തമായി ജോലി ചെയ്തു വന്നിരുന്നവര്‍ ആയിരുന്നു.

അത് പോലെ തന്നെ മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധനകളില്‍ നിരവധി സ്ഥാപനങ്ങളില്‍ അനേകം ഗാര്‍ഹിക തൊഴിലാളികള്‍ അനധികൃതമായി ജോലി ചെയ്തു വരുന്നതായി കണ്ടെത്തിയിരുന്നു. ഹൗസ് ഡ്രൈവര്‍ വിസയില്‍ രാജ്യത്തെത്തി സ്വതന്ത്രമായി ജോലി ചെയ്തു വരുന്നവരായിരുന്നു ഇവര്‍. ഹൗസ് ഡ്രൈവര്‍മാര്‍ക്ക് ലെവി ബാധകമല്ലാത്തതിനാലാണ് വന്‍തുകയുടെ സാമ്പത്തിക ബാധ്യത ഒഴിവാക്കുന്നതിനായി വിദേശികള്‍ ഈ വിസയില്‍ എത്തി ജോലി ചെയ്തു വന്നിരുന്നത്.

2014 ജൂലൈയിലാണ് രാജ്യത്ത് ആദ്യമായി സ്വകാര്യ മേഖലയിലെ വിദേശ തൊഴിലാളികൾക്ക് ലെവി ബാധകമാക്കിയത്. 2017 ജൂലൈയിൽ ആശ്രിതർക്കും ലെവി നിലവിൽവന്നു. എങ്കിലും ഗാർഹിക തൊഴിലാളികൾക്ക് ലെവി ബാധകമായിരുന്നില്ല. ഈ പഴുത് മുതലെടുത്ത്‌ കൊണ്ടാണ് പല വിദേശികളും ഹൗസ് ഡ്രൈവര്‍ വിസയിലേക്ക് മാറുകയോ ഫൈനല്‍ എക്സിറ്റില്‍ പോയോ പുതിയ ഹൌസ് ഡ്രൈവർ ഉൾപ്പെടെയുള്ള ഗാർഹിക വിസകളില്‍ രാജ്യത്തെത്തുകയോ ചെയ്തു കൊണ്ടിരുന്നത്.

പരിശോധനകളില്‍ ഹൗസ് ഡ്രൈവര്‍ വിസയില്‍ രാജ്യത്തെത്തിയ അനേകം തൊഴിലാളികള്‍ പിടിലാകുന്നത് വര്‍ദ്ധിച്ചതോടെയാണ് ഈ വിഷയം അധികൃതരുടെ ശ്രദ്ധയില്‍ പെടുന്നത്. തുടര്‍ന്ന് ഈ പഴുത് അടക്കുന്നതിനു വേണ്ടിയുള്ള ശ്രമങ്ങളുടെ ഭാഗമായാണ് ഗാര്‍ഹിക തൊഴിലാളികള്‍ക്ക് ലെവി ഏര്‍പ്പെടുതാനുള്ള തീരുമാനം മാനവശേഷി സാമൂഹിക വികസന മന്ത്രാലയ ശുപാര്‍ശ പ്രകാരം സൗദി കാബിനറ്റ്‌ കൈക്കൊള്ളുന്നത്.

പുതിയ തീരുമാന പ്രകാരം ഹൗസ് ഡ്രൈവർ വിസയിലുൾപ്പെടെയുള്ള മുഴുവൻ ഗാർഹിക തൊഴിലാളികൾക്കും ലെവി ബാധകമാണ്. ഓരോ തൊഴിലാളിക്കും വർഷത്തിൽ 9,600 റിയാൽ, അഥവാ പ്രതിമാസം 800 റിയാൽ തോതിലാണ് ലെവി. എന്നാല്‍ ആവശ്യമായ മുന്‍കരുതലുകള്‍ എടുത്തു കൊണ്ട് തന്നെയാണ് ഈ തീരുമാനം മന്ത്രാലയം കൈക്കൊണ്ടിട്ടുള്ളത്. പുതിയ തീരുമാനം മൂലം സ്വദേശികള്‍ക്കും വിദേശികള്‍ക്കും പെട്ടെന്ന് അസൗകര്യം ഉണ്ടാകാത്ത വിധത്തിലാണ് പുതിയ നിബന്ധനകള്‍ നടപ്പിലാക്കുക.

അതായത്, എല്ലാ ഗാര്‍ഹിക തൊഴിലാളികള്‍ക്കും ലെവി ഏര്‍പ്പെടുത്തിയിട്ടില്ല. നാലിൽ കൂടുതൽ ഗാർഹിക തൊഴിലാളികളുള്ള സ്വദേശികളും, രണ്ടിൽ കൂടുതൽ തൊഴിലാളികളുള്ള വിദേശികളും മാത്രമേ പുതിയ തീരുമാന പ്രകാരം ലെവി അടക്കേണ്ടി വരുന്നുള്ളൂ. വിസ കച്ചവടവും അനധികൃത വിസ കൈമാറ്റവും തടയുന്നതിനാണ് ഈ നിബന്ധനകള്‍ കൊണ്ട് വന്നിട്ടുള്ളത്.

മാത്രമല്ല, ഗാര്‍ഹിക തൊഴിലാളികള്‍ക്ക് മറ്റു തൊഴിലുകളിലേക്ക് മാറുന്നതിനാവശ്യമായ സാവകാശവും മന്ത്രാലയം പരോക്ഷമായി നല്‍കുന്നുണ്ട്. അത് കൊണ്ട് തന്നെ രണ്ട് ഘട്ടങ്ങളിലായാണ് തീരുമാനം നടപ്പിലാക്കുക. ഈ വർഷം മെയ് 22 ന് ആരംഭിക്കുന്ന ഒന്നാം ഘട്ടത്തിൽ പുതിയ ഗാർഹിക വിസയിൽ വരുന്ന തൊഴിലാളികൾക്ക് മാത്രമേ ലെവി അടക്കേണ്ടതുള്ളൂ.

കൂടാതെ ഈ വിഷയത്തില്‍ മന്ത്രാലയത്തിന്റെ ഉദാരമായ നിലപാടും പ്രശംസാര്‍ഹമാണ്. പ്രത്യേക വൈദ്യ പരിചരണ ആവശ്യമുള്ള ആളുകൾ, ഭിന്നശേഷിക്കാർക്കുള്ള പരിചരണം തുടങ്ങി മാനുഷികമായ പരിഗണന ആവശ്യപ്പെടുന്ന സന്ദർഭങ്ങളിൽ അത്തരം ജോലികൾക്കായി നിയമിക്കുന്ന ഗാർഹിക തൊഴിലാളിക്ക് ലെവി ബാധകമാവില്ല.

നിലവിൽ രാജ്യത്തുള്ള ഗാർഹിക തൊഴിലാളികൾക്ക് ഒരു വർഷത്തിന് ശേഷം മാത്രമേ ലെവി ബാധകമാകുകയുള്ളൂ. 2023 മെയ് 13 മുതലാണ് ഇവർക്ക് ലെവി അടക്കേണ്ടിവരിക. ഇതിനിടയില്‍ ഇവര്‍ക്ക് മറ്റുള്ള പ്രൊഫഷനുകളിലെക്ക് മാറാനോ ഫൈനല്‍ എക്സിറ്റില്‍ രാജ്യം വിട്ടു പോകാനോ ഉള്ള സാവകാശം ലഭിക്കും. ഇപ്പോൾ ഹൗസ് ഡ്രൈവർ തസ്തികയിലുള്ളവർക്ക് പ്രൊഫഷൻ മാറ്റം അനുവദിക്കുന്നതിനാൽ കൂടുതൽ സുരക്ഷിതമായ തൊഴിലുകൾ കണ്ടെത്തി മാറാവുന്നതാണ്.

സ്പോണ്‍സര്‍ഷിപ്പ് മാറുന്നതിനായി ഖിവ പ്ലാറ്റ്ഫോം വഴിയാണ് അപേക്ഷ നല്‍കേണ്ടത്. പുതിയ സ്പോണ്‍സര്‍ ആണ് മാറാന്‍ അപേക്ഷ നല്‍കേണ്ടത്. തൊഴിലാളിയുടെ ഇഖാമ കാലാവധി ഒരു വര്‍ഷത്തില്‍ കൂടുതല്‍ ഉള്ളതാകരുത് എന്ന നിബന്ധന നിലവിലുണ്ട്. പുതിയ സ്പോണ്‍സര്‍ ഓണ്‍ലൈന്‍ വഴി അപേക്ഷ നല്‍കിയാല്‍ പഴയ സ്പോണ്‍സര്‍ക്ക് എസ്.എം.എസ് ലഭിക്കും. നിലവിലെ സ്പോണ്‍സര്‍ ഇത് അംഗീകരിക്കുന്നതോടെ സ്പോണ്‍സര്‍ഷിപ്പ് മാറ്റം പൂര്‍ത്തിയാകും.

ഹൗസ് ഡ്രൈവര്‍ വിസയില്‍ എത്തി സ്വന്തമായി ജോലി ചെയ്യുകയോ മറ്റു പ്രൊഫഷനുകളില്‍ ജോലി ചെയ്യുകയോ ചെയ്തു വരികയാണെങ്കില്‍ ഈ നിബന്ധന നിലവില്‍ വരുന്നതോടെ താങ്കളുടെ നിലനില്പ് തന്നെ അപകടത്തിലാകും. താങ്കളുടെ സ്പോണ്‍സര്‍ക്ക് നാലില്‍ കൂടുതല്‍ ഗാര്‍ഹിക തൊഴിലാളികള്‍ നിലവില്‍ ഉണ്ടെങ്കില്‍ വർഷത്തിൽ 9,600 റിയാൽ നല്‍കി കൊണ്ട് ഹൗസ് ഡ്രൈവര്‍ വിസയില്‍ മുന്നോട്ട് പോകാന്‍ സാധിക്കില്ല. അതിനാല്‍ നിബന്ധന നിലവില്‍ വരുന്നതിന് മുന്‍പായി ലെവി അടക്കാന്‍ സാധിക്കുന്ന വരുമാനം ലഭിക്കുന്ന മറ്റു പ്രൊഫഷനിലെക്ക് മാറുകയോ അല്ലാത്ത പക്ഷം ഫൈനല്‍ എക്സിറ്റില്‍ പോകുകയോ ചെയ്യുന്നതാണ്‌ ഉചിതം.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD 

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

 

വിവരങ്ങള്‍ നല്‍കിയത്: 

Adv. Shiyas Kunjhibava. Lead Partner, SK Associates. (Dubai, Riyadh, Delhi, Kochi)

Continue Reading

LATEST

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

Published

on

അടുത്ത മാസം പകുതിയോടെ സൗദി അറേബ്യയില്‍ ഓയില്‍ സെക്ടറില്‍ പുതിയ വിസയില്‍ പോകാന്‍ ഒരുങ്ങുകയാണ്. ആദ്യമായാണ് സൗദി കമ്പനിക്ക്  വേണ്ടി ജോലി ചെയ്യാന്‍ സാധിക്കുന്നത്. ഉയര്‍ന്ന തസ്തികയിലാണ് വിസ. ഈ തസ്തിക കാലക്രമേണ നിതാഖാതില്‍ ഉള്‍പ്പെടുത്തി സ്വദേശിവല്‍ക്കരണം ഉണ്ടാകുമെന്നും ജോലി നഷ്ടപ്പെടുമെന്നും നിലവിലുള്ള ജോലി നഷ്ടപ്പെടുത്തി സൗദിയിലേക്ക് പോകുന്നത് ശരിയായ തീരുമാനമല്ല എന്ന് സുഹൃത്ത് പറയുന്നു. എന്താണ് നിതാഖാത് എന്നതിന്റെ അടിസ്ഥാനപരമായ കാര്യങ്ങള്‍ വിശദീകരിച്ചു തരാമോ?    

 

സൗദി അറേബ്യയില്‍ ജോലി ചെയ്യുന്ന വിദേശികളെ സംബന്ധിച്ചിടത്തോളം അല്‍പ്പം അസ്വസ്ഥത പകരുന്ന വാക്കാണ്‌ സൗദി പൗരന്മാരെ നിയമിക്കുന്നതിന് സ്വകാര്യ മേഖലയെ പ്രോത്സാഹിപ്പിക്കുന്നതിനായി സൗദി മാനവ വിഭവശേഷി, സാമൂഹിക വികസന മന്ത്രാലയം രൂപം നല്‍കിയ ഒരു പദ്ധതിയുടെ പേരായ നിതാഖാത്.

പലരും കരുതുന്നത് പോലെ വിദേശികളെ സൗദി അറേബ്യയുടെ തൊഴില്‍ രംഗത്ത് നിന്നും ആത്യന്തികമായി പുറത്താക്കുക എന്നതല്ല മറിച്ച് സ്വദേശി പൗരന്മാരുടെ തൊഴിലില്ലായ്മ കുറക്കുകയും അവര്‍ക്ക് രാജ്യത്തിന്റെ സ്വകാര്യ മേഖലയില്‍ ജോലി ഉറപ്പു വരുത്തുകയാണ് ഈ പദ്ധതിയുടെ ലക്‌ഷ്യം. തങ്ങളുടെ പൗരന്മാര്‍ക്ക് തൊഴിലും ഉയര്‍ന്ന ജീവിത സാഹചര്യങ്ങളും ഉറപ്പു വരുത്തുക എന്നത് ഏതൊരു രാജ്യത്തിന്റെയും പ്രാഥമിക കര്‍ത്തവ്യം കൂടിയാണ് എന്ന തത്വത്തില്‍ അധിഷ്ഠിതമായ പദ്ധതി കൂടിയാണ് നിതാഖാത്.

2011-ൽ ആരംഭിച്ചത് മുതൽ, ഈ പദ്ധതിയിലൂടെ കാലാനുസൃതമായി വിവിധ തൊഴിലുകളെ ദേശസാൽക്കരിക്കാനും സ്വദേശി പൗരന്മാരുടെ കഴിവുകളെ വൈവിധ്യവല്‍ക്കരിക്കാനും ആവശ്യമായ നടപടികൾ നടപ്പിലാക്കിയിട്ടുണ്ട്. ഇതുമൂലം ലക്ഷക്കണക്കിന്‌ സ്വദേശികള്‍ക്ക് തൊഴിലവസരങ്ങള്‍ സൃഷ്ടിക്കാന്‍ സാധിച്ചിട്ടുണ്ട്. ലക്‌ഷ്യത്തിലേക്ക് എത്തുന്നതിനായി കഴിഞ്ഞ 11 വര്‍ഷമായി നിരന്തരമായ അപ്ഡേറ്റുകൾക്കും നിതാഖാത് വിധേയമായിട്ടുണ്ട്. അതിൽ ഏറ്റവും പുതിയത് “അഡ്വാൻസ്ഡ് നിതാഖാത്”/ “പരിഷ്കരിച്ച നിതാഖാത്” എന്ന പേരില്‍ 2021 ഡിസംബറിൽ ആയിരുന്നു.

സൗദി പൗരന്മാര്‍ക്ക് തൊഴില്‍ ഉറപ്പ് വരുത്തുന്നതിനായി സ്വകാര്യ മേഖലയിലെ പ്രത്യേക തൊഴിലുകള്‍ അവര്‍ക്കായി മാത്രം പരിമിതപ്പെടുത്തുക, അതിനായി സ്ഥാപനങ്ങളെ വിവിധ വിഭാഗങ്ങളാക്കി തരം തിരിക്കുക എന്നതാണ് നിതാഖാത് പദ്ധതിയുടെ അടിസ്ഥാന പ്രവര്‍ത്തന രീതി. ഈ പദ്ധതിയിലൂടെ സൗദി പൗരന്മാര്‍ക്ക് കൃത്യമായ അടിസ്ഥാന പ്രതിമാസ ശമ്പളവും മന്ത്രാലയം ഉറപ്പു വരുത്തുന്നുണ്ട്. സൗദി തൊഴിൽ നിയമം ഒരു സൗദി പൗരന് കൃത്യമായ മിനിമം വേതനം നിര്‍ദ്ദേശിക്കുന്നില്ല എന്ന പരിമിതിയെ ഈ പദ്ധതിയിലൂടെ മറികടക്കാനും മന്ത്രാലയത്തിന് സാധിക്കുന്നു.

ആറു ജീവനക്കാരും അതിൽ കൂടുതലുമുള്ള എല്ലാ സ്ഥാപനങ്ങൾക്കും നിതാഖാത്ത് ബാധകമാണ്. നിലവില്‍ ചുവപ്പ്, ഇളം പച്ച, ഇടത്തരം പച്ച, കടും പച്ച, പ്ലാറ്റിനം എന്നിങ്ങനെ അഞ്ച് വിഭാഗങ്ങളാക്കിയാണ് സ്വകാര്യ മേഖലയിലെ സ്ഥാപനങ്ങളെ നിതാഖാത് പദ്ധതി പ്രകാരം തരം തിരിച്ചിട്ടുള്ളത്. പദ്ധതിയുടെ നിബന്ധനകള്‍ പൂര്‍ത്തീകരിക്കുന്നതിന്റെ അടിസ്ഥാനത്തിലാണ്, അതായത് സൗദിവൽക്കരണത്തിന്റെ ശതമാനത്തെ അടിസ്ഥാനമാക്കിയാണ് ഈ സ്ഥാപനങ്ങള്‍ക്ക് പ്രത്യേക അവകാശങ്ങളും പരിമിതികളും ഏര്‍പ്പെടുത്തിയിരിക്കുന്നത്. മിനിമം സൗദിവൽക്കരണം പാലിക്കാത്ത സ്ഥാപനങ്ങൾക്ക് മന്ത്രാലയത്തിൽ നിന്നുള്ള സേവനങ്ങൾ വിലക്കുകയും നിര്‍ദ്ദിഷ്ട സൗദിവല്‍ക്കരണം പാലിക്കുന്ന സ്ഥാപനങ്ങള്‍ക്ക് ആവശ്യമായ പ്രോത്സാഹനം നല്‍കുകയുമാണ് ചെയ്യുന്നത്.

സ്ഥാപനങ്ങളെ തരം തിരിക്കുന്നതിനായി ഇന്റർനാഷണൽ ക്ലാസിഫിക്കേഷൻ സ്റ്റാൻഡേർഡ് (“ISIC4”) എന്ന മാനദണ്ഡമാണ് മൂന്ന് വർഷമായി ഉപയോഗിക്കുന്നത്. ഈ മാനദണ്ഡം ഉപയോഗിച്ച് സ്ഥാപനങ്ങള്‍ ഉള്‍പ്പെടുന്ന മേഖല, സ്ഥാപനത്തിന്റെ പ്രവർത്തനങ്ങൾ, പ്രസ്തുത സ്ഥാപനത്തിലെ ജീവനക്കാരുടെ എണ്ണം തുടങ്ങിയവ ഒരു നിർദ്ദിഷ്‌ട സമവാക്യം ഉപയോഗിച്ച് നിര്‍ണ്ണയിച്ച്  വരുന്ന ഒന്നും രണ്ടും മൂന്നും വർഷങ്ങളിൽ പ്രസ്തുത സ്ഥാപനം  ഏത് വിഭാഗത്തില്‍ ഉള്‍പ്പെടുമെന്ന് നിര്‍ണ്ണയിക്കുന്നു.

പരിഷ്‌കരിച്ച നിതാഖാത്ത് പ്രകാരം സ്വകാര്യ സ്ഥാപനങ്ങൾ മൂന്നു വർഷത്തിനുള്ളിൽ സൗദിവൽക്കരണം ഘട്ടം ഘട്ടമായി നിശ്ചിത ശതമാനം ഉയർത്തൽ നിർബന്ധമാണെന്ന് മന്ത്രാലയം വ്യക്തമാക്കിയിട്ടുണ്ട്. അല്ലാത്ത പക്ഷം ഈ സ്ഥാപനങ്ങളുടെ വിഭാഗത്തിൽ മാറ്റം വരികയും ഉയര്‍ന്ന വിഭാഗത്തില്‍ നിന്നും താഴെയുള്ള വിഭാഗങ്ങളിലേക്ക് പോവുകയും ചെയ്യും. പുതിയ പദ്ധതി പ്രകാരം ആവശ്യമായ മാറ്റങ്ങള്‍ വരുത്തുന്നതിന് ആവശ്യമായ സമയം അനുവദിക്കുക എന്നതാണ് ഈ മൂന്ന് വര്‍ഷ സമയ പരിധിയുടെ ഉദ്ദേശം. ഈ സമയ പരിധിക്കുള്ളില്‍ നാല് ലക്ഷത്തോളം പുതിയ സ്വദേശി തൊഴിലവസരങ്ങളാണ് മന്ത്രാലയം ലക്ഷ്യമിടുന്നത്.

ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍:

മുകളില്‍ അഞ്ചാമത്ത ഖണ്ഡികയില്‍ പറഞ്ഞിരിക്കുന്നത് പോലെ അഞ്ചു വിഭാഗങ്ങളായാണ് നിതാഖത് പദ്ധതി പ്രകാരം സ്വകാര്യ കമ്പനികളെ തരം തിരിച്ചിരിക്കുന്നത്. അതില്‍ ഏറ്റവും താഴെയായി കിടക്കുന്ന സ്ഥാപനങ്ങളാണ് ചുവന്ന വിഭാഗത്തിലുള്ള സ്ഥാപനങ്ങള്‍. മന്ത്രാലയം നിര്‍ദ്ടെഷിചിരിക്കുന്നതരത്തിലുള്ള നിബന്ധനകള്‍ പാലിക്കാന്‍ സാധിക്കാത്ത സ്ഥാപനങ്ങളാണ് ഈ വിഭാഗത്തില്‍ ഉള്‍പ്പെടുന്നത്.അത് കൊണ്ട് തന്നെ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം നല്‍കുന്ന ഉത്തേജന/പ്രോത്സാഹന മാര്‍ഗ്ഗങ്ങള്‍ ലഭ്യമാകില്ല. മറിച്ച് ഇത്തരം സ്ഥാപനങ്ങള്‍ക്ക് അവക്ക് ലഭ്യമായിരുന്ന അടിസ്ഥാന അവകാശങ്ങള്‍ പോലും നഷ്ടമാകുകയും ചെയ്യുന്നു. സ്ഥാപനത്തിനും അതിലെ തൊഴിലാളികള്‍ക്കും താഴെ പറയുന്ന ആനുകൂല്യങ്ങള്‍ നിഷേധിക്കപെടുന്നു:

  1. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് അതിലെ തൊഴിലാളികളുടെ വർക്ക് പെർമിറ്റ് പുതുക്കാൻ സാധിക്കില്ല.
  2. ഇത്തരം സ്ഥാപനങ്ങള്‍ക്ക് തങ്ങളുടെ തൊഴിലാളികളുടെ പ്രൊഫഷനുകള്‍ മാറ്റാൻ സാധിക്കില്ല.
  3. ഈ സ്ഥാപനങ്ങള്‍ക്ക് പുതിയ വിദേശ തൊഴിലാളികൾക്ക് വർക്ക് പെർമിറ്റ് നൽകാൻ സാധിക്കില്ല.
  4. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ വിസകൾക്ക് വേണ്ടി അപേക്ഷിക്കാന്‍ സാധിക്കില്ല.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് വിസ ട്രാന്‍സ്ഫര്‍ ചെയ്യാന്‍ സാധിക്കില്ല.
  6. സ്ഥാപനങ്ങളുടെ പുതിയ ശാഖകൾക്കോ പുതിയ സൗകര്യങ്ങൾക്കോ വേണ്ടി പുതിയ ഫയലുകൾ തുറക്കാൻ അനുവാദം ഉണ്ടായിരിക്കില്ല.

ഇളം പച്ച വിഭാഗത്തില്‍ പെടുന്ന സ്ഥാപനങ്ങള്‍ (ലോ ഗ്രീൻ റേഞ്ച് സ്ഥാപനങ്ങള്‍):

ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങളെ പോലെ മുഴുവന്‍ ആനുകൂല്യങ്ങളും നിഷേധിക്കപ്പെടുന്നില്ല. നാമമാത്രമായ നിയന്ത്രണങ്ങളാണ് ഇത്തരം സ്ഥാപനങ്ങളുടെ പ്രവര്‍ത്തനത്തിലും മന്ത്രാലയം ഏര്‍പ്പെടുത്തിയിട്ടുള്ളത്.

  1. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ തൊഴില്‍ വിസകൾക്കുള്ള അപേക്ഷകൾ സമര്‍പ്പിക്കാന്‍ സാധിക്കില്ല.
  2. ഈ സ്ഥാപനങ്ങളിലെ വിദേശികളായ തൊഴിലാളികളുടെ പ്രോഫഷനുകള്‍ മാറ്റാനുള്ള അനുവാദം നല്‍കിയിട്ടുണ്ട്. എന്നാല്‍ സൗദി പൗരന്മാർക്ക് മാത്രമായി പരിമിതപ്പെടുത്തിയിരിക്കുന്ന പ്രൊഫഷനുകളിലേക്ക് മാറ്റം അനുവദിക്കില്ല.
  3. കുറഞ്ഞ പച്ച വിഭാഗത്തിന് താഴെയുള്ള വിദേശ തൊഴിലാളികളുടെ സേവനങ്ങൾ കൈമാറാനുള്ള അനുവാദം ലഭ്യമാണ്.
  4. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ ലഭ്യമാകും.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് തങ്ങളുടെ വിദേശ തൊഴിലാളിയുടെ അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വർക്ക് പെർമിറ്റ് പുതുക്കാന്‍ അനുവാദം നല്‍കും.

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (മിഡ് ഗ്രീൻ റേഞ്ച് സ്ഥാപനങ്ങള്‍)

ഇളം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന ആനുകൂല്യങ്ങള്‍ക്ക് പുറമേ മറ്റു ചില ആനുകൂല്യങ്ങള്‍ കൂടി ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം ലഭ്യമാക്കുന്നുണ്ട്.

  1. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ (replacement visa) ലഭ്യമാകും.

കടും പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (ഹൈ ഗ്രീൻ റേഞ്ച് സ്ഥാപനങ്ങള്‍):

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന എല്ലാ ആനുകൂല്യങ്ങളും ലഭ്യമാകുന്നതോടൊപ്പം മറ്റു ചില ആനുകൂല്യങ്ങള്‍ കൂടി ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം ലഭ്യമാക്കിയിട്ടുണ്ട്.

  1. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരം വിസ (replacement visa) ലഭ്യമാക്കും.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

പ്ലാറ്റിനം റേഞ്ച് കമ്പനികൾ:

നിതാഖാത് പദ്ധതി പ്രകാരമുള്ള അഞ്ചു വിഭാഗങ്ങളില്‍ ഏറ്റവും ഉയര്‍ന്ന വിഭാഗമാണ്‌ പ്ലാറ്റിനം വിഭാഗം.

  1. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കം.
  2. വിദേശികളായ തൊഴിലാളികളുടെ പ്രൊഫഷനുകള്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് ഒഴികെ മാറ്റം.
  3. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരമായി വിസ (replacement visa) ലഭ്യമാക്കും.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

സൗദി പൗരന്മാര്‍ക്ക് മിനിമം വേതനം

നിതാഖാത് പദ്ധതി പ്രകാരം വിവിധ വിഭാഗങ്ങളില്‍ ഉള്‍പ്പെടുന്ന സ്ഥാപനങ്ങള്‍ക്ക് വിവിധ തരം ആനുകൂല്യങ്ങളും പരിമിതികളും ലഭ്യമാകുമ്പോള്‍ മുകളില്‍ പറഞ്ഞ പോലെ ഒരു സൗദി പൗരന് നിര്‍ദ്ദിഷ്ട തുക അടിസ്ഥാന ശമ്പളമായി ലഭിക്കുന്നു എന്നതാണ് സ്വദേശി പൗരന്മാരെ സംബന്ധിച്ചിടത്തോളം ഈ പദ്ധതിയുടെ ഹൈലൈറ്റ്. ആനുകൂല്യങ്ങളും പരിമിതികളും സ്ഥാപനങ്ങള്‍ക്ക് ലഭ്യമാകുമ്പോള്‍ തങ്ങളുടെ പൗരന്മാരുടെ ജീവിത നിലവാരം ഉറപ്പു വരുത്തുന്നതിനുള്ള അടിസ്ഥാന ശമ്പളം ഉറപ്പു വരുത്തുന്ന രീതിയാണ് മന്ത്രാലയത്തിന്റെ നിതഖാത് പദ്ധതിയെ സ്വദേശി പൗരന്മാര്‍ക്ക് ഇടയില്‍ ജനപ്രിയമാക്കി തീര്‍ക്കുന്നത്.

നിതാഖാത് പദ്ധതി പ്രകാരം സ്ഥാപനങ്ങള്‍ക്ക് ആനുകൂല്യങ്ങള്‍ ലഭിക്കണമെങ്കില്‍ സ്വകാര്യ സ്ഥാപനത്തില്‍ ജോലി ചെയ്യുന്ന സൗദി പൗരന്റെ അടിസ്ഥാന പ്രതിമാസ ശമ്പളം ഏറ്റവും കുറഞ്ഞത് 4,000 റിയാൽ എന്ന് നിജപ്പെടുത്തിയിട്ടുണ്ട്. മുന്‍പ് ഈ തുക 3000 റിയാൽ ആയിരുന്നു എങ്കിലും വിവധ സാഹചര്യങ്ങള്‍ കണക്കിലെടുത്ത് സമീപ മാസങ്ങളിലാണ് ഈ തുകയില്‍ മന്ത്രാലയം വര്‍ദ്ധന ഏര്‍പ്പെടുത്തിയത്.

എങ്കിലും ഈ നിബന്ധനയില്‍ പ്രത്യക്ഷമായി ചെറിയ തരത്തിലുള്ള ഇളവ് മന്ത്രാലയം നല്‍കുന്നുണ്ട് എങ്കിലും നിതാഖാത് പ്രകാരമുള്ള പൂര്‍ണ്ണമായ ആനുകൂല്യം ലഭിക്കണമെങ്കില്‍ ഈ നിബന്ധന പൂര്‍ണ്ണമായും പാലിക്കണം എന്നത് മിനിമം വേതനതോട് കൂടി സ്വദേശി പൗരന്മാരെ തങ്ങളുടെ സ്ഥാപനങ്ങളില്‍ നിയമിക്കാന്‍ പരോക്ഷമായി സ്വകാര്യ സ്ഥാപനങ്ങളെ നിര്‍ബന്ധിതരാക്കുന്നു.

അതായത് 4000 റിയാലില്‍ കുറവ് ശമ്പളത്തിനും സ്ഥാപനങ്ങള്‍ക്ക് സ്വദേശി തൊഴിലാളികളെ നിയമിക്കാന്‍ അനുവാദമുണ്ട്. അന്നാല്‍ അതിനു ആനുപാതികമായി പദ്ധതിയില്‍ നിന്നും ലഭിക്കുന്ന ആനുകൂല്യങ്ങള്‍ക്കും കുറവുണ്ടാകും. അതായത് 4000 റിയാലിൽ താഴെയുള്ള ശമ്പളം നല്‍കി നിയമിക്കുന്ന ഒരു സ്വദേശി തൊഴിലാളിയെ നിതാഖാത് പദ്ധതി പ്രകാരം പകുതി തൊഴിലി ആയി മാത്രമേ കണക്കാക്കുകയുള്ളൂ.  പാർട്ട് ടൈം തൊഴിലാളികളുടെ കാര്യത്തിലും ഈ നിബന്ധന ബാധകമാണ്. മാസത്തില്‍ 168 മണിക്കൂറിൽ കുറയാത്ത സേവനം പൂർത്തിയാക്കിയ തൊഴിലാളിയെ (ഫ്ലക്സിബിള്‍ അവേഴ്സ്) സൗദി തൊഴിലാളിയുടെ 1/3 ആയി കണക്കാക്കും.

എന്നാല്‍ വികലാംഗരായ സ്വദേശി തൊഴിലാളികളുടെ കാര്യത്തില്‍ വലിയ ഇളവാണ് മന്ത്രാലയം നല്‍കുന്നത്. 4000 റിയാലില്‍ കുറയാത്ത ശമ്പളത്തില്‍ ഒരു സ്വദേശിയായ വികലാംഗ തൊഴിലാളിയെ നിയമിക്കുന്ന സ്ഥാപനങ്ങള്‍ക്ക് നിതാഖാത് പദ്ധതി പ്രകാരമുള്ള ആനുകൂല്യങ്ങള്‍ക്കായി ഒരു തൊഴിലാളിയെ 4 തൊഴിലാളികളായി കണക്കാക്കും. ഇതിലൂടെ അംഗ പരിമിതരായ തങ്ങളുടെ പൗരന്മാരുടെ തൊഴില്‍ ലഭ്യതയും അവര്‍ക്ക് നിര്‍ദ്ദിഷ്ട ജീവിത സാഹചര്യവും ഉറപ്പു വരുത്താന്‍ മന്ത്രാലയത്തിന് നിതാഖാത് പദ്ധതിയിലൂടെ സാധിക്കുന്നു.

 

ഇതൊക്കെയാണ് നിതാഖാത് പദ്ധതിയെ സംബന്ധിച്ചുള്ള ഏറ്റവും പുതിയ വിവരങ്ങള്‍. നിങ്ങളെ സംബന്ധിച്ച് വിസ ഉന്നത തസ്തികയില്‍ ഉള്ളതായതിനാല്‍ കുറച്ച് അപകട സാധ്യതയും ഇല്ലാതില്ല. കാരണം പലപ്പോഴും പ്രധാന തസ്തികകളാണ് സൗദിവല്ക്കരണത്തില്‍ ഉള്‍പ്പെടുത്താറുള്ളത്. വിദേശികള്‍ ധാരാളമായി ജോലി ചെയ്യുന്ന താഴ്ന്ന തസ്തികകള്‍ അധികമായി ഉള്‍പ്പെടുത്താറില്ല. നിങ്ങളുടെ തസ്തിക ഏതാണെന്ന് വ്യക്തമായി ചോദ്യത്തില്‍ ഉള്‍പ്പെടുത്താതിനാല്‍ അതിനെ കുറിച്ച് കൃത്യമായി പറയാനും സാധിക്കില്ല.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ. ലീഡ് പാര്‍ട്ണര്‍, എസ്.കെ അസോസിയേറ്റ്സ്. (ദുബായ്. റിയാദ്. ഡല്‍ഹി. കൊച്ചി)

 

Continue Reading

LATEST

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

Published

on

ഇന്ത്യന്‍ യൂണിയന്‍ മുസ്ലിം ലീഗിന്റെ വിദ്യാര്‍ത്ഥി ഘടകമായ എം.എസ്.എഫിന്റെ പ്രവര്‍ത്തന ചരിത്രത്തില്‍ പുതിയ ഒരധ്യായം എഴുതി ചേര്‍ത്തു കൊണ്ടാണ് കഴിഞ്ഞ ദിവസങ്ങളില്‍ ഡല്‍ഹിയില്‍ വെച്ചു നടന്ന ദേശീയ സമ്മേളനം സമാപിച്ചത്.

സംസ്ഥാന പ്രതിനിധികള്‍, കേന്ദ്ര സര്‍വ്വകലാശാലാ പ്രതിനിധികള്‍, മുസ്‌ലിം ലീഗ് ദേശീയ നേതാക്കള്‍, വിദ്യാര്‍ത്ഥി സംഘടനാ നേതാക്കള്‍, വിദ്യാഭ്യാസ വിചക്ഷണര്‍, ആക്റ്റിവിസ്റ്റുകള്‍ ഉള്‍പ്പടെയുള്ളവര്‍ പങ്കെടുത്ത സമ്മേളനം വന്‍ വിജയമായതോടൊപ്പം തന്നെ എം.എസ്.എഫ് ദേശീയ കമ്മിറ്റിയുടെ പുതിയ ആസ്ഥാനം പ്രവര്‍ത്തനം ആരംഭിക്കുകയും ചെയ്തു.

മുസ്‌ലിംലീഗ് ഉന്നതാധികാര സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങളാണ് പുതിയ ദേശീയ കമ്മിറ്റി ഓഫീസ് ഉദ്ഘാടനം ചെയ്തത്.

വിവിധ സംസ്ഥാനങ്ങളിലും കേന്ദ്ര, സംസ്ഥാന സര്‍വ്വകലാശാലകളിലും പതിറ്റാണ്ടുകളായി എം എസ് എഫിന്റെ പ്രവര്‍ത്തനം നടക്കുന്നുണ്ടങ്കിലും ദേശീയ കമ്മറ്റി യാഥാര്‍ഥ്യമായത് 2016ലാണ്. ദേശീയ തല പ്രവര്‍ത്തനങ്ങള്‍ എകോപിപ്പിക്കുകയും പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുകയും ചെയ്യുക എന്ന ലക്‌ഷ്യം മുന്‍നിറുത്തി 2016 ഡിസംബര്‍ 17 ന് പാലക്കാട് വെച്ചാണ് എം എസ് എഫിന് ഒരു ദേശീയ കമ്മറ്റി രൂപീകരിക്കുന്നത്. തുടര്‍ന്നാണ്‌ പ്രവര്‍ത്തനം ദേശീയ തലത്തിലേക്ക് വ്യാപിപിക്കുന്നത്.

നിലവില്‍ രാജ്യത്തെ 13 സംസ്ഥാനങ്ങളിലും, വിവിധ കേന്ദ്ര- സംസ്ഥാന സര്‍വ്വകലാശാലകളിലും എം എസ് എഫ് പ്രവര്‍ത്തനം സജീവമാണ്. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്കുന്ന മഹത്തായ ദൗത്യമാണ് എം എസ് എഫ് ദേശീയ കമ്മിറ്റി നിര്‍വ്വഹിച്ചു കൊണ്ടിരിക്കുന്നത്.

പൗരത്വ ഭേദഗതി നിയമവും, വിദ്വേഷ പ്രസംഗങ്ങളും, ആള്‍ക്കൂട്ട കൊലപാതകങ്ങളും, വസ്ത്രവിവേചനങ്ങളുമെല്ലാം കൊണ്ട് അപരവത്കരിക്കപ്പെടുന്ന കാലത്ത് വിദ്യാഭ്യാസം കൊണ്ട് കരുത്തരായി മാറുക എന്നതാണ് പ്രതിരോധമാര്‍ഗം. എം എസ് എഫ് ആ ദൗത്യ നിര്‍വ്വഹണത്തിലേക്കാണ് വിദ്യാര്‍ത്ഥികളെ ഉണര്‍ത്തുന്നത്. അതോടൊപ്പം രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലേക്ക് പാര്‍ശ്വവത്കരിക്കപ്പെട്ടിരുന്ന മുസ്‌ലിം വിദ്യാര്‍ഥികള്‍ക്ക് കടന്നു വരാനുള്ള ആത്മവിശ്വാസം സൃഷ്ടിക്കുക എന്ന ദൗത്യവും എം എസ് എഫ് വിജയകരമായി തന്നെ തുടര്‍ന്ന് പോരുകയാണ്.

മുഹമ്മദ്‌ അഷറഫ് എം എസ് എഫ് ദേശീയ കമ്മിറ്റി പ്രസിഡന്റ് ടി.പി. അഷറഫ് അലിയോടൊപ്പം

ന്യൂനപക്ഷ വിഭാഗങ്ങള്‍ക്ക് ഭരണ ഘടന വിഭാവനം ചെയ്തിട്ടുള്ള അവസര സമത്വവും സാമൂഹിക നീതിയും പോലുള്ള അവകാശങ്ങള്‍ നഷ്ടപ്പെടാതിരിക്കാനും അവകാശങ്ങള്‍ ക്രിയാത്മകമായി ഉപയോഗിക്കാനും  സംഘടിതരായി രാഷ്ട്രീയ ശക്തിയായി നിലനിന്ന് അവകാശങ്ങള്‍ക്ക് വേണ്ടി പൊരുതുക എന്നതാണ് വര്‍ത്തമാന കാലഘട്ടത്തില്‍ വിദ്യര്‍ത്ഥി സമൂഹത്തിന്റെയും ആവശ്യം. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്‍കി അത്തരത്തിലുള്ള സംവാദങ്ങള്‍ക്ക് ശക്തി പകരുകയാണ് ‘വിദ്യാഭ്യാസം, വിമോചനം, ശാക്തീകരണം’ എന്ന മുദ്രാവാക്യത്തിലൂടെ എം എസ് എഫ് നിര്‍വ്വഹിക്കുന്നത്.

രാജ്യതലസ്ഥാനത്ത് തന്നെ പുതിയ പുതിയ ദേശീയ കമ്മിറ്റി ഓഫീസ് സ്ഥാപിതമായതോടെ ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കാനും ശക്തിപ്പെടുത്താനും എം എസ് എഫിന് സാധിക്കുമെന്നാണ് പുതിയ നേതൃത്വം കരുതുന്നത്. അതോടൊപ്പം തന്നെ ഇന്ത്യയിലെ മുസ്‌ലിം സമുദായത്തിന് വരും കാലത്തേക്കുള്ള നേതൃത്വത്തെ വളര്‍ത്തിയെടുക്കുകയെന്ന ദൗത്യം നിര്‍വ്വഹിക്കാനും എം എസ് എഫ് ദേശീയ കമ്മിറ്റിക്ക് സാധിക്കുമെന്നും നേതൃത്വം പ്രത്യാശിക്കുന്നു.

മുഹമ്മദ്‌ അഷറഫ്  

ന്യൂ ഡല്‍ഹി.

 

Continue Reading
LATEST7 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST7 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST7 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST9 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST9 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST9 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST9 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST9 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST9 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST9 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST10 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST10 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST10 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST10 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST10 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!