Connect with us

OMAN

ഖത്തറില്‍ പൗരന്‍മാരല്ലാത്തവര്‍ക്കും ഭൂഉടമാവകാശം; വില്ലകളും ഫ്‌ളാറ്റുകളും സ്വന്തം പേരില്‍ വാങ്ങാം

Published

on

പൗരന്മാരല്ലാത്ത വ്യക്തികള്‍ക്കും സ്ഥാപനങ്ങള്‍ക്കും ഇനി ഖത്തറില്‍ ഭൂമി സ്വന്തമാക്കാം. ഇതിനായി പ്രത്യേക കരട് പ്രമേയത്തിന് ഖത്തര്‍ മന്ത്രിസഭ അംഗീകാരം നല്‍കി. ഖത്തറില്‍ വാണിജ്യസംരംഭങ്ങള്‍ നടത്തുന്ന വിദേശികള്‍ക്കും കമ്പനിയുടമകള്‍ക്കും സന്തോഷം പകരുന്ന തീരുമാനമാണ് മന്ത്രിസഭ പാസാക്കിയത്

വസ്തുക്കളില്‍ ഖത്തരികളല്ലാത്തവര്‍ക്ക് ഉടമസ്ഥാവകാശവും ഉപയോഗവും അനുവദിക്കുന്നത് സംബന്ധിച്ച 2018ലെ 16ാം നമ്പര്‍ നിയമം നടപ്പാക്കുന്നതുമായി ബന്ധപ്പെട്ടാണ് പ്രമേയം തയാറാക്കിയത്.

അമീരി ദിവാനില്‍ പ്രധാനമന്ത്രിയും ആഭ്യന്തരമന്ത്രിയുമായ ശൈഖ് അബ്ദുല്ല ബിന്‍ നാസര്‍ ബിന്‍ ഖലീഫ അല്‍താനിയുടെ അധ്യക്ഷതയില്‍ ചേര്‍ന്ന മന്ത്രിസഭായോഗമാണ് കരട് പ്രമേയം അംഗീകരിച്ചത്. ഇതോടെ പൗരന്മാരല്ലാത്തവര്‍ക്കും ഇനി മുതല്‍ രാജ്യത്തെ ഭൂമിയുടെയും കമ്പനികളുടെയും ഉടമകളാകാം.

റിയല്‍ എസ്റ്റേറ്റ് ഇന്‍വെസ്റ്റ്മെന്റ് ഫണ്ടുകള്‍ക്കും റിയല്‍ എസ്റ്റേറ്റില്‍ ഉടമസ്ഥാവകാശത്തിന് അനുമതിയുണ്ടാകും. ഖത്തരികളല്ലാത്തവര്‍ക്ക് പത്തു സ്ഥലങ്ങളില്‍ റിയല്‍ എസ്റ്റേറ്റ് ഉടമസ്ഥാവകാശത്തിന് അനുമതിയുണ്ട്. 16 മേഖലകളില്‍ 99 വര്‍ഷത്തേക്ക് റിയല്‍എസ്റ്റേറ്റിനായി ഉപയോഗിക്കാനും അനുമതി നല്‍കും.

റസിഡന്‍ഷ്യല്‍ കോംപ്ലക്സുകള്‍ക്കുള്ളില്‍ റസിഡന്‍ഷ്യല്‍ വില്ലകളുടെയും ഉടമസ്ഥാവകാശം നേടാം. വാണിജ്യ കോംപ്ലക്സുകളില്‍ ഷോപ്പുകളുടെ ഉടമസ്ഥാവകാശത്തിനും അനുമതി നല്‍കും.

നീതിന്യായമന്ത്രിയും ക്യാബിനറ്റ് കാര്യ ആക്ടിങ് മന്ത്രിയുമായ ഡോ.ഇസ്സ ബിന്‍ സഅദ് അല്‍ജഫാലി അല്‍നുഐമി അജണ്ട വിശദീകരിച്ചു. കരട് പ്രമേയത്തിന്റെ വിശദാംശങ്ങള്‍ വ്യക്തമാക്കാന്‍ അടുത്തയാഴ്ച വാര്‍ത്താസമ്മേളനം വിളിക്കുമെന്നാണ് അധികൃതര്‍ അറിയിച്ചത്.

error: Content is protected !!