പാലക്കാട്: വീട്ടിൽ കള്ളനോട്ടടിച്ച് ഉപയോഗിച്ചിരുന്ന ദമ്പതികൾ പിടിയിലായി. കൊല്ലം ചാത്തന്നൂർ കണ്ണേറ്റ സ്വദേശികളായ രഞ്ജിത്(30), ഭാര്യ ലിജ(25)എന്നിവരാണ് പിടിയിലായത്. ഇവരിൽ നിന്നും 63,900 രൂപയുടെ വ്യാജനോട്ട് പിടിച്ചെടുത്തു.

തിങ്കളാഴ്‍ച രാവിലെ പത്തരയോടെ തേനൂരിലെ കടയിൽ നിന്ന് കള്ളനോട്ട് ഉപയോഗിച്ച് സാധനങ്ങൾ വാങ്ങാൻ ശ്രമിക്കുമ്പോഴാണ് ദമ്പതികൾ അറസ്റ്റിലായത്. കടയിൽ കയറി സാധനം വാങ്ങിയ ശേഷം കള്ളനോട്ട് നൽകുകയായിരുന്നു. നോട്ടിൽ കടയുടമ സംശയം പ്രകടിപ്പിച്ചതോടെ സാധനങ്ങൾ വാങ്ങാതെ ഇരുവരും കടയിൽ നിന്ന് പുറത്തേക്കിറങ്ങി.

ഇതോടെ സംശയം തോന്നിയ കടയുടമ ഇവരെ ബൈക്കിൽ പിന്തുടർന്നു.തേനൂരിൽ മറ്റൊരു കടയിൽ കയറി സാധനം വാങ്ങി ഇതേ നോട്ടുകൾ തന്നെ നല്കുന്നതിനിടെയാണ് ഇവരെ തടഞ്ഞു വെച്ചത്. വിവരമറിഞ്ഞു സ്ഥലത്തെത്തിയ കുഴൽമന്ദം പൊലീസാണ് ഇവരെ അറസ്റ്റ് ചെയ്‍തത്.

ചോദ്യം ചെയ്യലിൽ വീട്ടിൽ വെച്ചാണ്‌ കള്ളനോട്ട്‌ അച്ചടിക്കുന്നതെന്ന്‌ ഇവർ പൊലീസിനോട്‌ സമ്മതിച്ചു. തുടർന്ന് നടത്തിയ പരിശോധനയിൽ ഇവരിൽനിന്ന് 500 രൂപയുടെ 117ഉം 200 രൂപയുടെ 27ഉം വ്യാജനോട്ടുകൾ പിടികൂടി.

കോടതിയിൽ ഹാജരാക്കിയ ഇരുവരെയും പതിനാല് ദിവസത്തേക്ക് റിമാൻഡ്‌ ചെയ്‍തു.

വിദേശത്തിരുന്ന് സമൂഹ മാധ്യമങ്ങളിലൂടെയും മറ്റുമുള്ള കുറ്റകൃത്യങ്ങളിൽ ഉൾപ്പെടുന്നവരുടെ എണ്ണം കൂടുകയാണെന്നും കേസില്‍ ഉള്‍പ്പെടുന്നവരില്‍ അധികവും ഗള്‍ഫ് മേഖലയില്‍ ജോലി ചെയ്യുന്ന പ്രവാസികളാണെന്നും കേരള പോലീസിന്റെ സൈബർ സെൽ വൃത്തങ്ങൾ വ്യക്തമാക്കുന്നു.

ഇത്തരത്തിലുള്ള കേസുകള്‍ വിദേശത്ത് ജോലി ചെയ്യുന്നവരുടെ ജോലിയും പ്രവാസ ജീവിതത്തെയു ഗുരുതരമായി ബാധിക്കുമെന്ന് നിയമ വിദഗ്ദര്‍ പറയുന്നു. സമൂഹ മാധ്യമങ്ങളിലൂടെ മറ്റുള്ളവരെ അപകീര്‍ത്തിപ്പെടുത്തുക, മതസ്പർദ്ധ വളർത്തുക തുടങ്ങിയവയാണ് പ്രധാന പരാതികൾ.

ഇതില്‍ തന്നെ ഫേസ്ബുക്കില്‍ അപകീര്‍ത്തികരമായ പോസ്റ്റുകൾ, മത സ്പർദ്ധ വളർത്തുന്ന തരത്തിലുള്ള പോസ്റ്റുകൾ, കമന്റുകൾ, ഷെയര്‍ ചെയ്തുവെന്നോ പരാതിപ്പെടുന്നവരാണ് ഭൂരിഭാഗവും.

സാധാരണ പ്രവാസികള്‍ക്ക് ഇടയില്‍ പ്രിയങ്കരവും ഉപയോഗിക്കാന്‍ ഏറ്റവും എളുപ്പവുമായതിനലുമാണ് ഫേസ് ബുക്ക്‌ മുഖേന അപകീര്‍ത്തിപ്പെടുത്തിയെന്ന പരാതികള്‍ വര്‍ദ്ധിക്കുന്നത്.

ഇത്തരത്തിലുള്ള കേസുകളില്‍ നിയമ നടപടികള്‍ വേഗത്തില്‍ സ്വീകരിക്കാറില്ലെങ്കിലും ഗുരുതരമായ കുറ്റകൃത്യങ്ങളുടെ പരാതികളിൽ പോലീസ് ഉടനെ നടപടികള്‍ സ്വീകരിക്കാറുണ്ട്. ഇത്തരം ഗുരുതരമായ കേസുകളില്‍ വിദേശത്ത് നിന്നും സമ്മര്‍ദ്ദ തന്ത്രങ്ങളിലൂടെ കുറ്റവാളികളെ നാട്ടിലെത്തിക്കുകയോ അതിനു കഴിയാത്ത സാഹചര്യങ്ങളില്‍ വിദേശ ഏജന്‍സികളുമായി സഹകരിച്ചു നാട്ടിലെത്തിക്കുന്നതിനുള്ള നടപടികളോ സ്വീകരിച്ചു വരുന്നുണ്ട്.

സാധാരണ കേസുകളില്‍ കുറ്റം ചെയ്തവര്‍ക്കെതിരെ പോലീസ് ഉടനെ കര്‍ശന നടപടികള്‍ എടുക്കാത്തതിനാല്‍ ആരെങ്കിലും തനിക്കെതിരെ പരാതി നല്‍കിയിട്ടുണ്ടോ എന്ന് പോലും ചിലപ്പോള്‍ കുറ്റം ചെയ്ത ആള്‍ അറിഞ്ഞെന്നു വരില്ല. എന്നാല്‍ അവധിയില്‍ വരുമ്പോള്‍ അറസ്റ്റും മറ്റു നിയമ നടപടികളും നടന്നേക്കാം. വരുമ്പോഴോ പോകുമ്പോഴോ എയര്‍പോര്‍ട്ടുകളില്‍ വച്ച് അറസ്റ്റ് നടന്ന സംഭവങ്ങളും ഉണ്ടായിട്ടുണ്ട്.

നിരവധി കേസുകളില്‍ കുറ്റവാളികളെ അറസ്റ്റ് ചെയ്തിട്ടുണ്ടെങ്കില്‍ കൂടി ഇതുവരെ ആര്‍ക്കും ഗുരുതരന്മായ ശിക്ഷകള്‍ ലഭിച്ചിട്ടില്ലെന് നിയമ വിദഗ്ദര്‍ പറയുന്നു. സെല്ലില്‍ രജിസ്റ്റര്‍ ചെയ്തിട്ടുള്ള കേസുകളില്‍ വിരലില്‍ എണ്ണാവുന്ന കേസുകളില്‍ മാത്രമാണ് അന്വേഷണം മുന്നോട്ടു കൊണ്ട് പോകാന്‍ പോലീസിനു സാധിച്ചിട്ടുള്ളത്.

ഇത്തരം കേസുകളില്‍ പ്രതികളെ എല്ലാ പഴുതുകളും അടച്ചു ശിക്ഷ വാങ്ങി കൊടുക്കാനായി ആവശ്യമായ തെളിവുകള്‍ ശേഖരിക്കാനുള്ള സാങ്കേതിക സംവിധാനങ്ങളോ നിയമ വിദഗ്ദരോ പോലീസില്‍ നിലവില്‍ ഇല്ല. കൂടാതെ ഭൂരിഭാഗം കേസുകളിലും ഒത്തുതീര്‍പ്പിലെത്തുന്നതിനെ തുടര്‍ന്ന് പരാതിക്കാര്‍ പരാതികള്‍ പിന്‍വലിക്കുന്ന പ്രവണതയും മറ്റൊരു കാരണമാണ്.

എന്നിരുന്നാലും കേസില്‍ ഉള്‍പ്പെടുന്ന പ്രവാസിയുടെ പ്രവാസ ജീവിതത്തെയും ജോലിയേയും ഇത് ദോഷകരമായി ബാധിക്കുമെന്ന് നിയമ വിദഗ്ദര്‍ വിലയിരുത്തുന്നു. കുറ്റം ചെയ്തവരെ കോടതിയില്‍ ഹാജരാക്കുമ്പോള്‍ ജാമ്യം ലഭിക്കുമെങ്കില്‍ തന്നെയും കോടതി പാസ്പോര്‍ട്ട് കോടതിയില്‍ കെട്ടി വെക്കാന്‍ ആവശ്യപ്പെട്ടാല്‍ പിന്നീട് കേസ് തീരുന്നത് വരെയോ ഒത്തു തീര്‍പ്പിലെത്തി കേസ് പിന്‍വലിക്കുന്നത് വരെയോ പ്രവാസിക്ക് തിരിച്ചു പോകാന്‍ സാധിക്കില്ല.

കണ്ണൂർ: രണ്ടര വയസ്സുള്ള കുട്ടിയെ ഉപേക്ഷിച്ച് ഫേസ്‌ബുക്ക് കാമുകനോടൊപ്പം ഒളിച്ചോടിയ യുവതിയെ കോടതി പതിനാല് ദിവസത്തേക്ക് റിമാൻഡ് ചെയ്തു.

ആലക്കാട് വലിയ പള്ളിയുടെ സമീപം ഓലിയന്റകത്ത് പോയ്യിൽ റുമൈസയെയാണ് കൂത്തുപറമ്പ് മജിസ്‌ട്രേറ്റ് കോടതി ജുവനൈൽ ജസ്റ്റിസ് നിയമ പ്രകാരം റിമാൻഡ് ചെയ്തത്.

റുമൈസയുടെ കാമുകനായ ചാരപ്പടവിൽ റാഷിദിനെയും കോടതി റിമാൻഡ് ചെയ്തിട്ടുണ്ട്. കുഞ്ഞിനെ ഉപേക്ഷിച്ച് ഒളിച്ചോടാൻ റുമൈസയെ പ്രേരിപ്പിച്ചതിനാണ് റാഷിദിനെയും കോടതി പതിനാലു ദിവസത്തേക്ക് റിമാൻഡ് ചെയ്തത്.

റുമൈസയുടെ ഭർത്താവ് വിദേശത്താണ്. ഫേസ്ബുക്കിലൂടെയാണ് റാഷിദ് റുമൈസയുമായി ബന്ധം സ്ഥാപിക്കുന്നത്. പ്രണയം മുറുകിയപ്പോൾ ഇരുവരും ഒളിച്ചോടാൻ തീരുമാനിക്കുകയായിരുന്നു.

ഈ മാസം 12 നാണ് കുട്ടിയെ മാതാവിനെ ഏൽപ്പിച്ച് റുമൈസ വീട്ടിൽ നിന്നും ഇറങ്ങിയത്. പിന്നീട് റാഷിദിനൊപ്പം എറണാകുളത്തും ബംഗളൂരുവിലും താമസിച്ചു.

അതിനിടയിൽ റുമൈസയെ കാണാതായതോടെ പിതാവ് പോലീസിൽ പരാതി നൽകിയിരുന്നു. മൊബൈൽ ഫോൺ കേന്ദ്രീകരിച്ച് പോലീസ് അന്വേഷണം തുടങ്ങിയതോടെ കുടുങ്ങുമെന്നുറപ്പായ ഇരുവരും പോലീസ് സ്റ്റേഷനിൽ വന്ന് ഹാജരാവുകയായിരുന്നു.