പാലക്കാട്: വീട്ടിൽ കള്ളനോട്ടടിച്ച് ഉപയോഗിച്ചിരുന്ന ദമ്പതികൾ പിടിയിലായി. കൊല്ലം ചാത്തന്നൂർ കണ്ണേറ്റ സ്വദേശികളായ രഞ്ജിത്(30), ഭാര്യ ലിജ(25)എന്നിവരാണ് പിടിയിലായത്. ഇവരിൽ നിന്നും 63,900 രൂപയുടെ വ്യാജനോട്ട് പിടിച്ചെടുത്തു.

തിങ്കളാഴ്‍ച രാവിലെ പത്തരയോടെ തേനൂരിലെ കടയിൽ നിന്ന് കള്ളനോട്ട് ഉപയോഗിച്ച് സാധനങ്ങൾ വാങ്ങാൻ ശ്രമിക്കുമ്പോഴാണ് ദമ്പതികൾ അറസ്റ്റിലായത്. കടയിൽ കയറി സാധനം വാങ്ങിയ ശേഷം കള്ളനോട്ട് നൽകുകയായിരുന്നു. നോട്ടിൽ കടയുടമ സംശയം പ്രകടിപ്പിച്ചതോടെ സാധനങ്ങൾ വാങ്ങാതെ ഇരുവരും കടയിൽ നിന്ന് പുറത്തേക്കിറങ്ങി.

ഇതോടെ സംശയം തോന്നിയ കടയുടമ ഇവരെ ബൈക്കിൽ പിന്തുടർന്നു.തേനൂരിൽ മറ്റൊരു കടയിൽ കയറി സാധനം വാങ്ങി ഇതേ നോട്ടുകൾ തന്നെ നല്കുന്നതിനിടെയാണ് ഇവരെ തടഞ്ഞു വെച്ചത്. വിവരമറിഞ്ഞു സ്ഥലത്തെത്തിയ കുഴൽമന്ദം പൊലീസാണ് ഇവരെ അറസ്റ്റ് ചെയ്‍തത്.

ചോദ്യം ചെയ്യലിൽ വീട്ടിൽ വെച്ചാണ്‌ കള്ളനോട്ട്‌ അച്ചടിക്കുന്നതെന്ന്‌ ഇവർ പൊലീസിനോട്‌ സമ്മതിച്ചു. തുടർന്ന് നടത്തിയ പരിശോധനയിൽ ഇവരിൽനിന്ന് 500 രൂപയുടെ 117ഉം 200 രൂപയുടെ 27ഉം വ്യാജനോട്ടുകൾ പിടികൂടി.

കോടതിയിൽ ഹാജരാക്കിയ ഇരുവരെയും പതിനാല് ദിവസത്തേക്ക് റിമാൻഡ്‌ ചെയ്‍തു.

വിദേശത്തിരുന്ന് സമൂഹ മാധ്യമങ്ങളിലൂടെയും മറ്റുമുള്ള കുറ്റകൃത്യങ്ങളിൽ ഉൾപ്പെടുന്നവരുടെ എണ്ണം കൂടുകയാണെന്നും കേസില്‍ ഉള്‍പ്പെടുന്നവരില്‍ അധികവും ഗള്‍ഫ് മേഖലയില്‍ ജോലി ചെയ്യുന്ന പ്രവാസികളാണെന്നും കേരള പോലീസിന്റെ സൈബർ സെൽ വൃത്തങ്ങൾ വ്യക്തമാക്കുന്നു.

ഇത്തരത്തിലുള്ള കേസുകള്‍ വിദേശത്ത് ജോലി ചെയ്യുന്നവരുടെ ജോലിയും പ്രവാസ ജീവിതത്തെയു ഗുരുതരമായി ബാധിക്കുമെന്ന് നിയമ വിദഗ്ദര്‍ പറയുന്നു. സമൂഹ മാധ്യമങ്ങളിലൂടെ മറ്റുള്ളവരെ അപകീര്‍ത്തിപ്പെടുത്തുക, മതസ്പർദ്ധ വളർത്തുക തുടങ്ങിയവയാണ് പ്രധാന പരാതികൾ.

ഇതില്‍ തന്നെ ഫേസ്ബുക്കില്‍ അപകീര്‍ത്തികരമായ പോസ്റ്റുകൾ, മത സ്പർദ്ധ വളർത്തുന്ന തരത്തിലുള്ള പോസ്റ്റുകൾ, കമന്റുകൾ, ഷെയര്‍ ചെയ്തുവെന്നോ പരാതിപ്പെടുന്നവരാണ് ഭൂരിഭാഗവും.

സാധാരണ പ്രവാസികള്‍ക്ക് ഇടയില്‍ പ്രിയങ്കരവും ഉപയോഗിക്കാന്‍ ഏറ്റവും എളുപ്പവുമായതിനലുമാണ് ഫേസ് ബുക്ക്‌ മുഖേന അപകീര്‍ത്തിപ്പെടുത്തിയെന്ന പരാതികള്‍ വര്‍ദ്ധിക്കുന്നത്.

ഇത്തരത്തിലുള്ള കേസുകളില്‍ നിയമ നടപടികള്‍ വേഗത്തില്‍ സ്വീകരിക്കാറില്ലെങ്കിലും ഗുരുതരമായ കുറ്റകൃത്യങ്ങളുടെ പരാതികളിൽ പോലീസ് ഉടനെ നടപടികള്‍ സ്വീകരിക്കാറുണ്ട്. ഇത്തരം ഗുരുതരമായ കേസുകളില്‍ വിദേശത്ത് നിന്നും സമ്മര്‍ദ്ദ തന്ത്രങ്ങളിലൂടെ കുറ്റവാളികളെ നാട്ടിലെത്തിക്കുകയോ അതിനു കഴിയാത്ത സാഹചര്യങ്ങളില്‍ വിദേശ ഏജന്‍സികളുമായി സഹകരിച്ചു നാട്ടിലെത്തിക്കുന്നതിനുള്ള നടപടികളോ സ്വീകരിച്ചു വരുന്നുണ്ട്.

സാധാരണ കേസുകളില്‍ കുറ്റം ചെയ്തവര്‍ക്കെതിരെ പോലീസ് ഉടനെ കര്‍ശന നടപടികള്‍ എടുക്കാത്തതിനാല്‍ ആരെങ്കിലും തനിക്കെതിരെ പരാതി നല്‍കിയിട്ടുണ്ടോ എന്ന് പോലും ചിലപ്പോള്‍ കുറ്റം ചെയ്ത ആള്‍ അറിഞ്ഞെന്നു വരില്ല. എന്നാല്‍ അവധിയില്‍ വരുമ്പോള്‍ അറസ്റ്റും മറ്റു നിയമ നടപടികളും നടന്നേക്കാം. വരുമ്പോഴോ പോകുമ്പോഴോ എയര്‍പോര്‍ട്ടുകളില്‍ വച്ച് അറസ്റ്റ് നടന്ന സംഭവങ്ങളും ഉണ്ടായിട്ടുണ്ട്.

നിരവധി കേസുകളില്‍ കുറ്റവാളികളെ അറസ്റ്റ് ചെയ്തിട്ടുണ്ടെങ്കില്‍ കൂടി ഇതുവരെ ആര്‍ക്കും ഗുരുതരന്മായ ശിക്ഷകള്‍ ലഭിച്ചിട്ടില്ലെന് നിയമ വിദഗ്ദര്‍ പറയുന്നു. സെല്ലില്‍ രജിസ്റ്റര്‍ ചെയ്തിട്ടുള്ള കേസുകളില്‍ വിരലില്‍ എണ്ണാവുന്ന കേസുകളില്‍ മാത്രമാണ് അന്വേഷണം മുന്നോട്ടു കൊണ്ട് പോകാന്‍ പോലീസിനു സാധിച്ചിട്ടുള്ളത്.

ഇത്തരം കേസുകളില്‍ പ്രതികളെ എല്ലാ പഴുതുകളും അടച്ചു ശിക്ഷ വാങ്ങി കൊടുക്കാനായി ആവശ്യമായ തെളിവുകള്‍ ശേഖരിക്കാനുള്ള സാങ്കേതിക സംവിധാനങ്ങളോ നിയമ വിദഗ്ദരോ പോലീസില്‍ നിലവില്‍ ഇല്ല. കൂടാതെ ഭൂരിഭാഗം കേസുകളിലും ഒത്തുതീര്‍പ്പിലെത്തുന്നതിനെ തുടര്‍ന്ന് പരാതിക്കാര്‍ പരാതികള്‍ പിന്‍വലിക്കുന്ന പ്രവണതയും മറ്റൊരു കാരണമാണ്.

എന്നിരുന്നാലും കേസില്‍ ഉള്‍പ്പെടുന്ന പ്രവാസിയുടെ പ്രവാസ ജീവിതത്തെയും ജോലിയേയും ഇത് ദോഷകരമായി ബാധിക്കുമെന്ന് നിയമ വിദഗ്ദര്‍ വിലയിരുത്തുന്നു. കുറ്റം ചെയ്തവരെ കോടതിയില്‍ ഹാജരാക്കുമ്പോള്‍ ജാമ്യം ലഭിക്കുമെങ്കില്‍ തന്നെയും കോടതി പാസ്പോര്‍ട്ട് കോടതിയില്‍ കെട്ടി വെക്കാന്‍ ആവശ്യപ്പെട്ടാല്‍ പിന്നീട് കേസ് തീരുന്നത് വരെയോ ഒത്തു തീര്‍പ്പിലെത്തി കേസ് പിന്‍വലിക്കുന്നത് വരെയോ പ്രവാസിക്ക് തിരിച്ചു പോകാന്‍ സാധിക്കില്ല.

കാളിയാർ: രണ്ടു മക്കളെ ഉപേക്ഷിച്ച് അസം സ്വദേശിയായ കാമുകനൊപ്പം നാട് വിട്ട വീട്ടമ്മ അറസ്റ്റിലായി. തൊമ്മൻകുത്ത് സ്വദേശിനിയായ ഗീതുവാണ് (32) അസമിലെ കാമുകന്റെ വീട്ടിൽ നിന്ന് കാമുകനൊപ്പം പിടിയിലായത്. കോടതിയിൽ ഹാജരാക്കിയ ഇരുവരെയും കോടതി പതിനാല് ദിവസത്തേക്ക് റിമാൻഡ് ചെയ്തു.

അസം സ്വദേശിയായ മൈന എന്നു വിളിക്കുന്ന മൃദുൽ ഗോഗായി (31)ക്കൊപ്പമാണ് ഗീതു പിടിയിലായത്. ഗീതുവിന്റെ പ്രവാസിയായ ഭർത്താവ് നിർമ്മിക്കുന്ന പുതിയ വീടിന്റെ വയറിങ് പണിക്ക് വന്നപ്പോഴായിരുന്നു ഗീതു മൈനയുടെ പ്രണയത്തിലായത്.

തുടർന്ന് നാലും ഒൻപതും വയസ്സുള്ള കുട്ടികളെ ഉപേക്ഷിച്ച് 2019 സെപ്റ്റംബർ മൂന്നിന് മൈനയോടൊപ്പം ഒളിച്ചോടുകയായിരുന്നു. രാത്രിയിൽ മക്കളെ ഉറക്കി കിടത്തിയ ശേഷമാണ് ഗീതു 11 മണിയോടെ മൈനയോടൊപ്പം ഇറങ്ങി പോയത്.

ഗീതുവിനെ കാണാതായതായി പരാതി ലഭിച്ചതിനെ തുടർന്ന് പോലീസ് ഇരുവരുടെയും മൊബൈൽ ഫോണുകൾ നിരീക്ഷണത്തിലാക്കി അന്വേഷണം ആരംഭിച്ചിരുന്നു. തുടർന്ന് ഇവർ ആസമിലെ ദിംവൂർഗർ ജില്ലയിൽ യുവാവിന്റെ വീട്ടിൽ എത്തിയാതായി പോലീസ് മനസ്സിലാക്കി.

സാഹസികമായാണ് പോലീസ് മൈനയേയും ഗീതുവിനെയും അറസ്റ്റ് ചെയ്ത് കൊണ്ട് വന്നത്. ഇവരെ അറസ്റ്റ് ചെയ്തതറിഞ്ഞ മൈനയുടെ വീട്ടുകാരും കൂട്ടുകാരും മറ്റും ഇരുവരെയും വിട്ടു കിട്ടണമെന്ന് ആവശ്യപ്പെട്ട് പോലീസ് സ്റ്റേഷൻ വളഞ്ഞു.

തുടർന്ന് ഇടുക്കി ജില്ലാ പൊലീസ് മേധാവി പികെ മധു ദിബുഗർ എസ്‌പിയുമായി ബന്ധപ്പെടുകയും സിആർപിഎഫ് ജവാന്മാരുടെ പിന്തുണയോടു കൂടി ഇരുവരെയും ഗുവാഹത്തി വിമാനത്താവളത്തിലേക്ക് ഇവരെ എത്തിക്കുകയായിരുന്നു.

മൈനക്ക് നാട്ടിൽ ഭാര്യയും കുട്ടിയും ഉള്ളതായി പോലീസ് പറയുന്നു. കാളിയാർ പൊലീസ് എഎസ്‌ഐ വിജേഷ്, സിപിഒ അജിത്ത്, വനിതാ സിവിൽ പോലീസ് ഉദ്യോഗസ്ഥരായ ഷൈലജ, ശുഭ എന്നിവരടങ്ങിയ സംഘമാണ് ഇരുവരെയും മൈനയുടെ വീട്ടിൽ നിന്നും അറസ്റ്റ് ചെയ്തത്.