സൗദിക്കെതിരെ ആക്രമണം അഴിച്ചു വിടണമെന്ന പ്രകോപനപരമായ വീഡിയോയുമായി ഭീകര സംഘടനയായ ഐസിസ് രംഗത്ത്. സൗദിയും മറ്റു അറബ് രാജ്യങ്ങളും ഇസ്രേയലുമായി അടുക്കുന്ന സാഹചര്യമാണ് ഐസിസിന്റെ പ്രകോപനത്തിന് കാരണം.

ഇസ്രേയലിന്റെ വിമാനങ്ങൾക്ക് പറക്കാനായി വ്യോമപാത തുറന്ന സൗദിയെ ആക്രമിക്കണമെന്നാണ് വീഡിയോയിൽ പറയുന്നത്. ആക്രമിക്കാൻ നിരവധി കേന്ദ്രങ്ങൾ ഉണ്ടെന്നും സൗദിയുടെ വരുമാന മാർഗ്ഗങ്ങളുടെ സ്രോതസുകൾ ആക്രമിക്കണമെന്നും ഇതിനായി സൗദിയിലെ എന്ന പൈപ്പ്ലൈനുകളോ, വ്യാപാര സാമ്പത്തിക കേന്ദ്രങ്ങളോ, വിദേശരാജ്യങ്ങളുടെ മിലിട്ടറി ബേസുകളോ ആക്രമിക്കണമെന്നാണ് വിഡിയോയിൽ ആഹ്വാനം ചെയ്യുന്നത്. റോയിട്ടേഴ്‌സാണ് വീഡിയോ പുറത്ത് വിട്ടിരിക്കുന്നത്.

യു എ ഇ യു എ ഇ യും ബഹ്‌റിനും ഇസ്രേയലുമായുള്ള ബന്ധം സാധാരണ നിലയിലാക്കിയത് ഐസിസിനെ പ്രകോപിച്ചിട്ടുണ്ട്. കഴ്ഞ്ഞ മാസം വാഷിംഗ്ടണിൽ ഒപ്പുവെച്ച അബ്രഹാം കരാർ ഇസ്‌ലാമിനെ വഞ്ചിക്കലാണെന്നും സൗദി ഇതിന് കൂട്ട് നിന്നുവെന്നും ഐസിസ് ആരോപിക്കുന്നു.

ഐസിസിന്റെ വീഡിയോയോട് സൗദി അറേബ്യ ഇതുവരെ പ്രതികരിച്ചിട്ടില്ല. ഇസ്രേയൽ പലസ്തീൻ ഭൂപ്രദേശങ്ങൾ കൈവശം വെക്കുന്നത് അവസാനിപ്പിക്കണമെന്നും പലസ്തീൻ രാഷ്ടത്തെ അംഗീകരിക്കണം എന്നുമാണ് സൗദിയുടെ പരസ്യ നിലപാട്.

സൗദിയിലെ നിർമാണ രംഗത്തെ ഭീമൻ കമ്പനിയായ നാസർ അൽ ഹജ്‌രി കമ്പനിക്കെതിരെ ഗുരുതര ആരോപണങ്ങളുമായി തൊഴിലാളികൾ രംഗത്ത്. കോവിഡ് കാലത്ത് ചാർട്ടേഡ് ഫ്ലൈറ്റിൽ കമ്പനി ഇന്ത്യയിലെത്തിച്ച തൊഴിലാളികളാണ് അർഹതപ്പെട്ട ആനുകൂല്യങ്ങൾ ലഭിച്ചിട്ടില്ലെന്നാരോപിച്ച് രംഗത്തെത്തിയത്.

ഇക്കര്യം വ്യക്തമാക്കി അഭിഭാഷകൻ മുഖേന ഇവർ കമ്പനിക്കെതിരെ കേന്ദ്ര സർക്കാരിന് പരാതി നൽകിയിട്ടുണ്ട്. കോവിഡ് പ്രതിസന്ധി കമ്പനി പിരിച്ചുവിട്ട 280 ഓളം തൊഴിലാളികളാണ് പരാതിയുമായി രംഗത്തെത്തിയത്. കഴിഞ്ഞ ജൂലൈ മുതലാണ് ഇവർക്ക് ജോലി നഷ്ടപ്പെട്ടത്. പിന്നീട് കമ്പനി ഇവരെ ചാർട്ടേഡ് ഫ്ലൈറ്റിൽ നാട്ടിലെത്തിക്കുകയായിരുന്നു.

കമ്പനിയിൽ അഞ്ചു വർഷം മുതൽ പത്ത് വർഷം വരെ ജോലി ചെയ്തിട്ടുള്ള തൊഴിലാളികളാണ് പരാതിയുമായി മുന്നോട്ട് വന്നിരിക്കുന്നതെന്ന് പരാതിക്കാരുടെ അഭിഭാഷകൻ സുഭാഷ് ചാന്ദ് വ്യക്തമാക്കി. കരാർ പ്രകാരം ഇവർക്ക് സേവനന്തര ആനുകൂല്യമായി നല്ലൊരു തുക ലഭിക്കാനുണ്ടെന്നും അഭിഭാഷകൻ പറഞ്ഞു.

പലർക്കും പാസ്‌പോർട്ടും ടിക്കറ്റും നൽകുന്നതിന് മുൻപായി ഒന്നും എഴുതാത്ത പേപ്പറുകളിൽ കമ്പനി അധികൃതർ ഒപ്പിട്ടു വാങ്ങിയതായും അഭിഭാഷകൻ പറയുന്നു. ഒപ്പ് ലഭിച്ചതിന് ശേഷം മാത്രമാണ് പാസ്‌പോർട്ടും ടിക്കറ്റും തൊഴിലാളികൾക്ക് കൈമാറിയതെത്രെ. ഭൂരിഭാഗം പേർക്കും ലഭിക്കാൻ ബാക്കിയുള്ള തുക ലഭിക്കാതെ തിരിച്ചു പോരാൻ താൽപ്പര്യം ഇല്ലായിരുന്നുവെങ്കിലും മറ്റു വഴികൾ ഇല്ലാത്തതിനാൽ നിർബന്ധ അവസ്ഥയിൽ തിരിച്ചു പോരേണ്ടി വന്നുവെന്നും അഭിഭാഷകൻ വ്യക്തമാക്കുന്നു

തൊഴിലാളികളുടെ പരാതി ലഭിച്ചതായും പരാതി കമ്പനിക്ക് കൈമാറിയെന്നും വിശദീകരണത്തിനായി കാത്തിരിക്കുകയാണെന്നും റിയാദിലെ ഇന്ത്യൻ എംബസ്സി വ്യക്തമാക്കുന്നു.

പ്രതിരോധം സംബന്ധിച്ച മുൻകരുതലുകളിൽ അശ്രദ്ധ ഉണ്ടായാൽ കോവിഡിന്റെ രണ്ടാം തരംഗത്തിന് കാരണമാവുമെന്ന് സൗദി ആരോഗ്യ മന്ത്രി ഡോ. തൗഫീഖ് അൽ റബീഅ വ്യക്തമാക്കി. ജനങ്ങൾ ജാഗ്രത പാലിച്ചില്ലെങ്കിൽ വരും ആഴ്ചകളിൽ കോവിഡ് ബാധിതരുടെ സംഖ്യ ഉയരാൻ സാധ്യതയുണ്ട്.

മറ്റു ചില രാജ്യങ്ങളുടെ ഉദാഹരണങ്ങൾ നമ്മുടെ മുന്നിലുണ്ട്. ഇവിടങ്ങളിൽ മുൻകരുതൽ നിബന്ധനകളിൽ ജനങ്ങൾ കാണിച്ച അശ്രദ്ധയാണ് അവിടങ്ങളിൽ രണ്ടാം തരംഗത്തിന് വഴിയൊരുക്കിയത്.

ആരോഗ്യ പ്രവർത്തകരുടെയും അധികൃതരുടെയും മുന്നറിയിപ്പുകളും സുരക്ഷാ നിബന്ധനകളും കർശനമായി പാലിച്ചതിനെ തുടർന്നാണ് രാജ്യത്ത് കോവിഡ് ബാധാ നിരക്ക് ഗണ്യമായി കുറഞ്ഞത്. അധികൃതരുടെ സുരക്ഷാ നിബന്ധനകൾ ജനങ്ങൾ കർശനമായി പാലിക്കേണ്ടതുണ്ട്. ചിലരുടെ അശ്രദ്ധ മൂലം കോവിഡിന്റെ രണ്ടാം തരംഗം പ്രതീക്ഷിക്കാവുന്നതാണെന്നും മന്ത്രി പറഞ്ഞു.

കഴിഞ്ഞ ദിവസം 16 പേരുടെ മരണം മാത്രമാണ് രാജ്യത്ത് സ്ഥിരീകരിച്ചിട്ടുള്ളത്. കഴിഞ്ഞ നാലര മാസത്തിന് ശേഷമുള്ള ഏറ്റവും കുറഞ്ഞ പ്രതിദിന മരണ നിരക്കാണിത്. ഇതുവരെ 5201 പേരാണ് സൗദിയിൽ കോവിഡ് മൂലം മരണമടഞ്ഞിട്ടുള്ളത്.

കഴിഞ്ഞ ദിവസം 381 പുതിയ രോഗബാധകളാണ് രാജ്യത്ത് റിപ്പോർട്ട് ചെയ്യപ്പെട്ടത്. ഇതോടെ രാജ്യത്ത് മൊത്തം രോഗബാധിതരുടെ എണ്ണം 342,583 ആയി. അതേ സമയം 357 രോഗമുക്തികളും റിപ്പോർട്ട് ചെയ്യപ്പെട്ടിട്ടുണ്ട്. ഇതുവരെ രോഗമുക്തി വന്നവരുടെ എണ്ണം 328,895 ആയി വർദ്ധിച്ചു. അതേ സമയം രാജ്യത്തെ ആക്റ്റീവ് കേസുകളുടെ എണ്ണം 8487 ആയിട്ടുണ്ട്.