സൗദി അറേബ്യ/യു.എ.ഇ/കുവൈറ്റ്: കൊറോണ വ്യാപനം തടയാനായി നാട്ടിൽ നിന്നും തിരിച്ചെത്തുന്ന വിദേശികൾക്ക് നിർബന്ധിത ഐസൊലേഷൻ നിർബന്ധമാക്കിയിരിക്കുകയാണ് ജി സി സി രാജ്യങ്ങൾ. സർക്കാർ നിർദ്ദേശ പ്രകാരം നടപ്പാക്കുന്ന ഈ സ്വയം കരുതൽ ചില രാജ്യങ്ങളിൽ തൊഴിലാളിയും സ്പോൺസറും കമ്പനിയും തമ്മിലുള്ള അസ്വാരസ്യങ്ങളിലേക്ക് വഴി വെക്കുന്നതായി റിപ്പോർട്ടുകൾ സൂചിപ്പിക്കുന്നു.

ചില കമ്പനികളും സ്ഥാപനങ്ങളും ഈ ദിവസങ്ങളിലെ വേതനം തൊഴിലാളികൾക്ക് നൽകാൻ വിസമ്മതിക്കുന്നതായാണ് റിപ്പോർട്ടുകൾ സൂചിപ്പിക്കുന്നത്. പലപ്പോഴും തൊഴിൽ നിയമത്തിലെ സാങ്കേതികത്വം ചൂണ്ടിക്കാട്ടിയും സർക്കാർ വിഭാഗങ്ങളിൽ നിന്നും ആവശ്യമായ നിർദ്ദേശങ്ങൾ ലഭിച്ചില്ല എന്ന കാരണം പറഞ്ഞുമാണ് വേതനം നിഷേധിക്കാൻ ഒരുങ്ങുന്നത്.

സൗദി അറേബ്യയിലും യു എ ഇ യിലും കുവൈറ്റിലും ഇത് സംബന്ധിച്ച പരാതികൾ ഉയർന്നു കഴിഞ്ഞു. തൊഴിലാളികളോട് ഈ ദിവസങ്ങളിൽ ശമ്പളം ലഭ്യമാവില്ല എന്ന മറുപടിയാണ് പല തൊഴിലുടമകളും നൽകുന്നത്.

യു.എ.ഇ

തൊഴിൽ നിയമം ജി സി സി യിലെ ഓരോ രാജ്യത്തും വ്യത്യസ്തമാണ്. അതിനാൽ തന്നെ അത് കൊണ്ട് തന്നെ ഓരോ രാജ്യത്തേയും നിയമത്തെ വിലയിരുത്തി കൊണ്ട് മാത്രമാണ് ഇതിലെ നിയമ വശങ്ങളിൽ അഭിപ്രായം പറയാൻ സാധിക്കുക.

യു എ ഇ യെ സംബന്ധിച്ചിടത്തോളം ഗവർമെന്റ് വകുപ്പുകളോ മന്ത്രാലയമോ കോവിഡ് 19 മൂലം ക്വാറന്റൈനിൽ ആകുന്ന ദിവസങ്ങളിലെ വേതനം സംബന്ധിച്ച വ്യക്തമായ ഒരു നിർദ്ദേശം പുറപ്പെടുവിച്ചിട്ടില്ല. (സമീപ ദിവസങ്ങളിൽ ഇത് സംബന്ധിച്ച നിർദ്ദേശം പുറപ്പെടുവിക്കാനുള്ള സാധ്യതയും തള്ളിക്കളയാനാവില്ല). അത് കൊണ്ട് തന്നെ രാജ്യത്തെ തൊഴിൽ നിയമ വകുപ്പുകൾ വ്യാഖ്യാനിച്ചു കൊണ്ട് ഇക്കാര്യത്തിൽ വ്യക്തമായ അഭിപ്രായം പറയാൻ സാധിക്കും.

അവധിക്ക് ശേഷമോ ബിസിനസ് ആവശ്യങ്ങൾക്ക് രാജ്യത്ത് നിന്നും പുറത്ത് പോയതിന് ശേഷമോ യു എ ഇ യിൽ തിരിച്ചെത്തുന്ന തൊഴിലാളിയോട് നിശ്ചിത ദിവസങ്ങളിൽ ഐസൊലേഷന് വേണ്ടി അവധിയിൽ കഴിയാൻ തൊഴിലുടമ നിർദ്ദേശിച്ചാൽ ആ നിർദ്ദേശിച്ച ദിവസങ്ങളിലെ വേതനം തൊഴിലാളിക്ക് നൽകാൻ തൊഴിലുടമ ബാധ്യസ്ഥനാണ്. ഇത് രാജ്യത്തെ ഫെഡറൽ നിയമത്തിലെ (Federal Law No. 8 of 1980) വകുപ്പ് 83 (2) പ്രകാരമുള്ള സിക്ക് ലീവ് ആയി കരുതപ്പെടുന്നതിനാലാണ് തൊഴിലുടമ വേതനം തൊഴിലാളിക്ക് നൽകേണ്ടി വരുന്നത്.

എന്നാൽ ഇവിടെ ഒരു കാര്യം പ്രത്യേകമായി തൊഴിലാളികൾ ശ്രദ്ധിക്കേണ്ടതുണ്ട്. തൊഴിലാളി തൊഴിലുടമയുടെ നിർദ്ദേശമില്ലാതെ സ്വമേധയാ ക്വാറന്റൈനിലായാൽ അയാൾ സിക്ക് ലീവ് എന്ന തൊഴിൽ നിയമത്തിലെ ആനുകൂല്യം ലഭിച്ചെന്ന് വരില്ല.

പക്ഷെ അയാൾ കോവിഡ് 19 പരിശോധനയിൽ പോസിറ്റിവ് ആണെന്ന് കണ്ട് രോഗാതുരനായാൽ അയാൾ സിക്ക് ലീവിന് അർഹനായി മാറും.

ഇവിടെ തൊഴിലാളികൾ ശ്രദ്ധിക്കേണ്ട ഒരു കാര്യം നിങ്ങൾ ഐസൊലേഷനിൽ പോകുന്നുണ്ടെങ്കിൽ തൊഴിലുടമയുടെ ഭാഗത്ത് നിന്നുള്ള ഒരു നിർദ്ദേശത്തിന്റെ തെളിവ് സൂക്ഷിക്കുന്നത് നല്ലതാണ്. രേഖാമൂലമായ അല്ലെങ്കിൽ ഇ മെയിലോ വാട്സാപ്പോ വഴിയുള്ള നിർദ്ദേശമോ മറ്റോ ഉണ്ടായാൽ ഭാവിയിൽ ഏതെങ്കിലും തരത്തിലുള്ള തർക്കം ഉണ്ടാവുകയാണെങ്കിൽ നിങ്ങൾക്ക് ഇക്കാര്യം എളുപ്പത്തിൽ തെളിയിക്കാൻ സാധിക്കും.

സൗദി അറേബ്യ

സൗദി അറേബ്യയിൽ ഇക്കാര്യത്തിൽ മന്ത്രാലയത്തിന്റെ വ്യക്തമായ നിർദ്ദേശം വന്നു കഴിഞ്ഞിട്ടുണ്ട്. മാർച്ച് 13 വെള്ളിയാഴ്ച്ച മുതൽ രാജ്യത്തെത്തുന്ന സ്വദേശികളും വിദേശികളും മറ്റുള്ളവരുമായി സമ്പർക്കം പുലർത്താതെ താമസ സ്ഥലത്ത് തന്നെ ഐസൊലേഷനിൽ കഴിയണമെന്ന് മന്ത്രാലയം നിർദ്ദേശം നൽകിയിട്ടുണ്ട്. ഈ കാലയളവ് നിയമാനുസൃത അവധിയായി പരിഗണിക്കണമെന്നും ഈ കാലയളവിൽ മെഡിക്കൽ ലീവ് അനുവദിക്കണമെന്നും മന്ത്രാലയം അർത്ഥശങ്കക്കിടയില്ലാത്ത വിധം വ്യക്തമാക്കിയിട്ടുമുണ്ട്. അതിനായി രാജ്യത്ത് പ്രവേശിച്ച് രണ്ടു ദിവസത്തിനുള്ളിൽ ‘സിഹ്വത്തി’ എന്ന പോർട്ടലിൽ രജിസ്റ്റർ ചെയ്ത് ലീവ് ഉറപ്പാക്കാം.

എന്നാൽ സൗദി അറേബ്യയിൽ മറ്റൊരു നിയമ പ്രശ്‍നം ഉയർന്ന് വന്നിട്ടുള്ളത് നിലവിൽ രാജ്യത്തുള്ള തൊഴിലാളികൾക്ക് വേതനമില്ലാത്ത അവധി തൊഴിലുടമകൾ നിർബന്ധിച്ചു നൽകുന്നു എന്നതാണ്. ഇത് ഗവർമെന്റ് കൊറോണ വൈറസ് ബാധയുടെ പ്രത്യേക സാഹചര്യത്തിൽ നിർദ്ദേശിച്ചിട്ടുള്ള ഐസൊലേഷൻ നിബന്ധനയുടെ പരിധിയിൽ വരുന്നില്ല. രാജ്യത്തുള്ള തൊഴിലാളികളുടെ അവധിക്കാര്യത്തിൽ തീരുമാനം എടുക്കേണ്ടത് രാജ്യത്തെ തൊഴിൽ നിയമം അനുസരിച്ചാണ്.

രാജ്യത്തെ തൊഴിൽ നിയമം അനുസരിച്ച് വേതനമില്ലാത്ത അവധി തൊഴിലാളിക്ക് അനുവദിക്കുന്നതിന് മുൻപായി തൊഴിലാളിയുടെ സമ്മതം തേടേണ്ടത് ആവശ്യമാണ്. തൊഴിലാളികളുടെ സമ്മതമില്ലാതെ തൊഴിലുടമകൾ വേതനമില്ലാത്ത അവധി തൊഴിലാളികൾക്ക് നൽകാൻ പാടില്ല. അത് തൊഴിൽ നിയമത്തിന്റെ വകുപ്പുകൾക്ക് വിരുദ്ധമാണ്.

രാജ്യത്ത് നിലവിലുള്ള പ്രത്യേക സാഹചര്യത്തിൽ തെഴിലാളികൾക്ക് അവരുടെ നിലവിലുള്ള ജോലി സ്വാഭാവികമായി ചെയ്യാനുള്ള സാഹചര്യം നിലവിലില്ലെങ്കിൽ മറ്റു തരത്തിലുള്ള സാഹചര്യങ്ങൾ തൊഴിലുടമക്ക് അന്വേഷിക്കാം. ഉദാഹരണമായി താമസ സ്ഥലത്തിരുന്ന് ജോലി ചെയ്യാൻ ആവശ്യപ്പെടാം. ഇക്കാര്യത്തിൽ മന്ത്രാലയത്തിന്റെ നിബന്ധനകൾ മന്ത്രാലയ വെബ്‌സൈറ്റിൽ പ്രസിദ്ധീകരിച്ചിട്ടുണ്ട്.

തൊഴിലാളിയും തൊഴിലുടമയും തമ്മിലുള്ള ബന്ധം ഒരു തൊഴിൽ നിയമ പ്രകാരമുള്ള ഒരു തൊഴിൽ കരാറിന്റെ അടിസ്ഥാനത്തിൽ ഉള്ളതാണ്. അത് പരസ്പര സമ്മത പ്രകാരം ഒപ്പു വെച്ചിട്ടുള്ളതുമാണ്. ആ കരാറിന് നിയമ പ്രാബല്യം ഉണ്ടായിരിക്കുന്ന സമയത്ത് ആ കരാറിന്റെ നിബന്ധനകളാണ് ഇരുകൂട്ടരും പാലിക്കേണ്ടത്. രാജ്യത്തുണ്ടാകുന്ന അസാധാരണ സാഹചര്യങ്ങൾ ആ തൊഴിൽ കരാറിന്റെ സാധുതയെ വിപരീതമായി ബാധിക്കുന്നില്ല. അല്ലാത്ത പക്ഷം ഗവർമെന്റിന്റെ വ്യക്തമായ നിർദ്ദേശങ്ങൾ ഉണ്ടായിരിക്കണം.

അതിനാൽ രാജ്യത്തിനകത്തുള്ള തൊഴിലാളികളുടെ അവധി സംബന്ധമായ കാര്യങ്ങൾ തൊഴിൽ നിയമത്തിന്റെയും തൊഴിലാളിയും തൊഴിലുടമയും തമ്മിലുള്ള തൊഴിൽ കരാറിന്റെയും അടിസ്ഥാനത്തിലുള്ളതാണ്. അതിൽ മാറ്റം വരുത്താൻ തൊഴിലാളിക്കോ തൊഴിലുടമക്കോ ഏകപക്ഷീയമായി സാധിക്കില്ല. അതിനാൽ രാജ്യത്തിനകത്തുള്ള തൊഴിലാളിക്ക് ശമ്പളമില്ലാത്ത അവധി അനുവദിക്കണമെങ്കിൽ അതിന് തൊഴിലാളിയുടെ സമ്മതം കൂടി ആവശ്യമാണ്.

കുവൈറ്റ്

കുവൈറ്റിലും സമാനമായ പ്രശ്നങ്ങൾ ഉയർന്നു വരുന്നുണ്ട്. രാജ്യത്ത് കൊറോണ വൈറസ് വ്യാപനം തടയുന്നതിന്റെ ഭാഗമായി ഷോപ്പുകൾ അടച്ചിടുന്നത് തൊഴിലാളികളെ എതിരായി ബാധിക്കുന്നു എന്ന പരാതി വ്യാപകമായി ഉയരുന്നുണ്ട്.

പല ഷോപ്പുടമകളും അടഞ്ഞു കിടക്കുന്ന ദിവസങ്ങളിലെ വേതനം നൽകില്ല എന്ന നിലപാടെടുത്തിരിക്കുന്നു. പലരും ഇക്കാര്യം തൊഴിലാളികളെയും അറിയിച്ചിട്ടുണ്ട്. എന്നാൽ തൊഴിലാളികൾ ഇക്കാര്യത്തിൽ പൂർണ്ണമായും തൊഴിലുടമകളോട് യോജിക്കുന്നില്ലാത്തതിനാൽ പ്രശ്നങ്ങൾ ഉയർന്നു വരുന്നുണ്ട്. കൊറോണ രോഗ ബാധയുടെ ശമനത്തിന് ശേഷം ഇതൊരു നിയമ പ്രശ്നമായി ഉയർന്ന് വരാൻ സാധ്യത ഏറെയാണ്.

എന്നാൽ ഇക്കാര്യത്തിൽ തൊഴിലാളികൾക്കും തൊഴിലുടമകൾക്കും വ്യത്യസ്ത അഭിപ്രായങ്ങളാണ് ഉള്ളത്. കാരണം ഷോപ്പുകൾ അടച്ചിടുന്ന സാഹചര്യം ഉണ്ടായത് തൊഴിലാളികളുടെ വീഴ്ച കൊണ്ടല്ല. തൊഴിലാളികൾ ജോലി ചെയ്യാൻ തയ്യാറാണ്. ഈ സാഹചര്യത്തിൽ തൊഴിലാളികളുടെ വേതനം നൽകാതിരിക്കുന്നത് നിയമ പരമായും ധാർമികമായും ശരിയല്ല എന്നാണ് തൊഴിലാളികളുടെ നിലപാട്.

എന്നാൽ തൊഴിലുടമകളും കാര്യങ്ങൾ അവരുടെ ഭാഗത്ത് നിന്ന് മാത്രമാണ് നോക്കിക്കാണുന്നത്. തങ്ങൾ ഷോപ്പുകൾ തുറക്കാൻ തയ്യാറാണെന്നും എന്നാൽ രോഗ വ്യാപനം തടയുന്നതിനായി ഷോപ്പുകൾ അടച്ചിടണമെന്ന അധികൃതരുടെ തീരുമാനം അനുസരിക്കുക മാത്രമാണ് തങ്ങൾ ചെയ്യുന്നതെന്നും ഷോപ്പുടമകളും പറയുന്നു.

എന്നാൽ വിഷയത്തിൽ നിയമം തൊഴിലാളികളുടെ കൂടെയാണ്. തൊഴിലാളികൾക്ക് ഈ ദിവസങ്ങളിലെ വേതനം ലഭിക്കാൻ നിയമപരമായി തന്നെ അർഹതയുണ്ടെന്ന് നിയമ വിദഗ്ദർ വ്യക്തമാക്കുന്നു.

നിയമത്തിലെ ആർട്ടിക്കിൾ 61 പ്രകാരം ഈ സമയങ്ങളിൽ തൊഴിലാളികൾക്ക് വേതനം നൽകണം. കാരണം ഷോപ്പുകൾ അടച്ചിടേണ്ടി വരുന്നത് തൊഴിലാളികൾ തൊഴിലുടമയുടെ കിഴിൽ ഷോപ്പിൽ ജോലി ചെയ്യാൻ വിസമ്മതിച്ചത് പ്രകാരമല്ല. അവർ ജോലി ചെയ്യാൻ തയ്യാറാണ്.

തൊഴിലാളികളുടേതല്ലാത്ത കാരണം മൂലം ഷോപ്പുകൾ അടച്ചിടേണ്ടി വരുന്ന സാഹചര്യത്തിൽ തൊഴിലുടമ തൊഴിലാളിക്ക് നിർബന്ധമായും വേതനം നൽകണമെന്ന് വകുപ്പ് 61 നെ ഉദ്ധരിച്ചു കൊണ്ട് നിയമ വിദഗ്ദർ വ്യക്തമാക്കുന്നു.