Connect with us

LATEST

ഈ അനുഭവം ആർക്കും ഉണ്ടാവാതിരിക്കട്ടെ.

Published

on

(2011 നവംബർ 5 നാണ് സൗദിയിലെ ജിദ്ദയിലെ ഷറഫിയയിൽ ശാര സിത്തീനിലെ ഫ്‌ളാറ്റിൽ വെച്ചാണ് ഈ ഈ കഥക്ക് ആധാരമായ സംഭവം നടക്കുന്നത്. സ്വകാര്യത സൂക്ഷിക്കുന്നതിനായി ഇതിലെ മലയാളികളായ വ്യക്തികളുടെ പേരുകളിലും വിവരണങ്ങളിലും മറ്റു വിവരങ്ങളിലും മാറ്റം വരുത്തിയിട്ടുണ്ട്.)

“ഏയ് ഹിന്ദീ… ഇവിടെ വാ…”

മജീദ് തല ഉയർത്തി നോക്കി. താടി നീട്ടി വളർത്തിയ മുത്തവയാണ്. മജീദ് അടുത്തേക്ക് ചെന്നു. മേശപ്പുറത്തിരുന്ന ബാറ്റൺ കൊണ്ട് പുറത്ത് ആഞ്ഞൊരടി കിട്ടി. വേദന കൊണ്ട് മജീദ് പുളഞ്ഞു പോയി.

“കാഫിർ. മുസൽമാനാണെന്നും പറഞ്ഞു നടക്കുന്നു. നിനക്കൊക്കെ വ്യഭിചാരിക്കാൻ മക്കക്കടുത്തുള്ള സ്ഥലം മാത്രമേ കിട്ടിയുള്ളൂ. ലോകത്തിന്റെ പല ഭാഗത്ത് നിന്നും പ്രാർത്ഥിക്കാൻ ആളുകൾ ഇങ്ങോട്ട് വരുന്നു. ഇവിടെയുള്ള നീയൊക്കെ ഇങ്ങിനെ അഴിഞ്ഞാടി നടക്കുന്നു. എങ്ങിനെ സാധിക്കുന്നു ഇതൊക്കെ?”

പറഞ്ഞു തീർന്നതും അടുത്ത അടി കിട്ടി. വേദന കൊണ്ട് ബോധം മറയുന്ന പോലെ തോന്നി മജീദിന്. ഒരടി കൂടി കൊടുത്ത ശേഷം അവിടെ പോയിരിക്കാൻ മുത്തവ മജീദിനോട് ആജ്ഞാപിച്ചു.

ഇന്ന് നാല് മണിയോടെയാണ് മജീദിനേയും പാക്കിസ്ഥാൻ സ്വദേശി ജഹാംഗീർ അക്തറിനെയും ജിദ്ദയിലെ ഷറഫിയക്കടുത്ത് ശാര സിത്തീനിലെ ഫ്ളാറ്റില്‍ നിന്ന് മതകാര്യ പോലീസ് പിടികൂടിയത്. ഫ്‌ളാറ്റിൽ വെച്ച് ഇന്തോനേഷ്യന്‍ യുവതിയുമായി അനാശാസ്യത്തിൽ ഏർപ്പെട്ടു എന്നാണ് ആരോപണം. മജീദിനും അക്തറിനും ഒപ്പം വ്യഭിചാര കേന്ദ്രം നടത്തിയിരുന്ന മലയാളിയായ ഫാറൂഖിനെയും യുവതിയേയും മുതവമാർ പിടികൂടിയിരുന്നു.

അക്തറിനൊപ്പം പോയ ആ ശപിക്കപ്പെട്ട നിമിഷത്തെ ഈ ചുരുങ്ങിയ സമയത്തിനുള്ളിൽ തന്നെ ആയിരം തവണയെങ്കിലും മജീദ് മനസ്സിൽ ശപിച്ചു കഴിഞ്ഞിരുന്നു. മനസ്സറിയാത്ത കുറ്റത്തിനാണ് താൻ പിടിയിലായത്. ഇനി ഈ വിവരം ഷറഫിയ മുഴുവൻ അറിയും. അവിടെ നിന്നും നാട്ടിലും വീട്ടിലും അറിയും.

ഉപ്പ, ഉമ്മ, അനിയൻ ഇവരുടെയൊക്കെ മുഖത്ത് താൻ ഇനിയെങ്ങനെ നോക്കും. നാട്ടിൽ പോയാൽ പുറത്തിറങ്ങി നടക്കാൻ സാധിക്കുമോ. വീട്ടിലെത്തിയാൽ ഫർഹാനയുടെ മുഖത്ത് എങ്ങിനെ നോക്കും. താൻ വ്യഭിചാരിച്ചിട്ടില്ലെന്ന് പറഞ്ഞാൽ അവൾ ഇനി വിശ്വസിക്കിമോ. മജീദ് കാലുകൾക്കിടയിൽ തല വെച്ചിരുന്ന് നിശബ്ദമായി തേങ്ങി.

ശപിക്കപ്പെട്ട ആ നിമിഷങ്ങൾ മജീദ് വീണ്ടും വീണ്ടും ഓർത്തു. സഫ്‌വാ മോൾക്ക് ബേബി ഡോൾ വാങ്ങാനാണ് റൂമിൽ നിന്നും പുറത്തേക്ക് പോയത്. ഒരെണ്ണം ആദ്യമേ വാങ്ങി വെച്ചിരുന്നുവെങ്കിലും റൂമിൽ കൂടെയുള്ള ബാബുക്ക അപ്പോൾ കുറച്ചു പണം കൂടി കടമായി തന്നതിനാൽ കുറച്ചു കൂടി വലിയ ബേബി ഡോൾ വാങ്ങുക എന്നതായിരുന്നു ഉദ്ദേശം.

പോകുന്ന വഴിയിലാണ് പാക്കിസ്ഥാനി ജഹാംഗീർ അക്തറിനെ കണ്ടത്. ഒരുപാട് തവണ ഒരുമിച്ചു ജോലി ചെയ്തിട്ടുണ്ട്. നല്ല സുഹൃത്തുമാണ്. ഇന്ന് വൈകിട്ട് നാട്ടിലേക്ക് പോകുമെന്ന് പറഞ്ഞപ്പോൾ തനിക്ക് ഭക്ഷണം വാങ്ങി തരണമെന്ന് അക്തറിന് നിർബന്ധം. താൻ പല തവണ ഭക്ഷണം വാങ്ങി കൊടുത്തിട്ടുണ്ട്. അതിന് പകരം വീട്ടുകയാണ്. ഭക്ഷണവും കഴിച്ച് മോൾക്കുള്ള ഡോളും വാങ്ങി തിരിച്ച് അക്തറുമൊത്ത് റൂമിലേക്ക് വരുമ്പോഴാണ് ശാര സിത്തീനിലെ ഫ്‌ളാറ്റിൽ നിന്നും ഫാറുഖ് അക്തറിനെ കൈ വീശി കാണിക്കുന്നത്.

തനിക്ക് ഫാറൂഖുമായി വലിയ ബന്ധമില്ല. ഫാറൂഖ് അത്ര നല്ല പുള്ളിയൊന്നുമല്ല എന്ന് കേട്ടിട്ടുമുണ്ട്. ഒന്ന് കേറിയിട്ട് പോകാം മജീദ് ബായ് എന്ന് അക്തർ നിർബന്ധിച്ചപ്പോൾ അക്തറിനൊപ്പം മജീദും പോയി. അക്തറും ഫാറൂഖും തമ്മിൽ എന്തൊക്കെയോ രഹസ്യം സംസാരിക്കുന്നു. വിലപേശുന്നു.

അക്തർ തിരിച്ചു വന്ന് തന്റെ കയ്യിൽ നിന്നും നൂറ് റിയാൽ ചോദിച്ചു വാങ്ങി ഫാറൂഖിന് കൊടുത്തു. കുറച്ചു സമയത്തിന് ശേഷം ഫ്‌ളാറ്റിനകത്തെ റൂമിന്റെ ഡോർ തുറന്ന് ഫാറൂഖ് തന്നെ അകത്തേക്ക് വിളിച്ചു. “മജീദിക്കാ, ഒന്ന് വന്ന് നോക്കിയിട്ട് പോ”. മജീദ് അകത്തേക്ക് ചെന്നു. മുറിയിൽ കട്ടിലിൽ ഒരു ഇൻഡോനേഷ്യൻ യുവതി ഇരിക്കുന്നു.

ഫാറൂഖ് പുറത്തേക്ക് ഇറങ്ങിയപ്പോഴേക്കും മുറിക്ക് പുറത്ത് ചില അസ്വാഭാവിക ശബ്ദങ്ങൾ കേട്ടു. അഞ്ചോളം മതപൊലീസുകാർ ഉള്ളിലേക്ക് കടന്നു മജീദിനെയും യുവതിയേയും പിടികൂടി മുറിയിൽ നിന്നും പുറത്തിറക്കി.

ഫാറൂഖിന്റെ ഫ്ലാറ്റ് കേന്ദ്രീകരിച്ച് അനാശാസ്യം നടക്കുന്നുവെന്ന രഹസ്യ വിവരം ലഭിച്ചതിനെ തുടര്‍ന്ന് അവിടെയെത്തിയ മതപൊലീസുകാരുടെ സംഘത്തിൽ പെട്ടവരായിരുന്നു അവർ.

മുത്തവമാർ നാല് പേരെയും നിരത്തി നിലത്ത് മുട്ടുകുത്തി നിർത്തി ചിത്രങ്ങൾ എടുത്തു. അടുത്തുള്ള ഫ്‌ളാറ്റുകളിലെ നാല് പേരെ കൊണ്ട് വന്ന് കാണിച്ചു കൊടുത്തു. തുടർന്ന് ജീപ്പിൽ കയറ്റി ഓഫീസിലേക്ക് കൊണ്ട് പോയി.

ഇന്ത്യക്കാരനായ ഫാറൂഖ് അനധികൃത താമസക്കാരിയായിരുന്ന ഇന്തോനേഷ്യന്‍ യുവതിയെ ഉപയോഗിച്ച് വ്യഭിചാര കേന്ദ്രം നടത്തിയിരുന്നുവെന്നും ഇടപാടുകാരില്‍ നിന്നും നൂറു റിയാല്‍ വീതം ഈടാക്കിയായിരുന്നു ഇടപാട് എന്നും രഹസ്യ വിവരം ലഭിച്ചതിനെ തുടര്‍ന്ന് ഇടപാടുകാരായി അഭിനയിച്ചു കേന്ദ്രത്തിലെത്തിയ അധികൃതര്‍ നാല് പേരെയും കയ്യോടെ പിടികൂടുകയായിരുന്നു എന്നുമായിരുന്നു കേസ്.

 

താൻ പിടിയിലായിട്ട് രണ്ടു വർഷം കഴിഞ്ഞു. ഇന്ന് തന്റെ കേസിൽ ജിദ്ദയിലെ കോടതി വിധി പറയും. നിർവികാരനായിരുന്നു മജീദ്. ഇനി എന്ത് വിധി വന്നാലും തനിക്കെന്താണ്. ജീവിതത്തിൽ തനിക്കെല്ലാം നഷ്ടപ്പെട്ടു കഴിഞ്ഞു. ഫർഹാനയെയും മോളെയും ഒരുനോക്ക് കാണണം എന്ന് ആഗ്രഹമുണ്ട്. ഇനി അത് മാത്രമേ ആഗ്രഹമുള്ളൂ.

അന്നുച്ചയോടെ മജീദിനെയും ഫാറൂഖിനെയും അക്തറിനെയും ജിദ്ദയിലെ കോടതിയിൽ കൊണ്ട് പോയി. കോടതി വിധി മജീദ് വ്യക്തമായി കേട്ടു.

ഒന്നാം പ്രതി മജീദിനെ കല്ലെറിഞ്ഞു കൊല്ലാന്‍ വിധിച്ചിരിക്കുന്നു. രണ്ടാം പ്രതിയായ അനാശാസ്യ കേന്ദ്രം നടത്തിപ്പുകാരന്‍ ഫാറൂഖിന് ആറു വര്‍ഷം തടവും 12,00 അടിയും ഇന്തോനേഷ്യക്കാരി യുവതിക്ക് ഒരു വര്‍ഷത്തെ തടവും ആയിരം അടിയും വിധിച്ചു. മൂന്നാം പ്രതിയായ പാക്കിസ്ഥാന്‍ പൗരൻ ജഹാംഗീർ‌ അക്തറിനെ കുറ്റക്കാരനല്ലെന്ന് കണ്ടു വെറുതെ വിട്ടു.

മുറിയിൽ നിന്നും മജീദിനെയും യുവതിയെയും പിടികൂടിയത് കൊണ്ടും മജീദ് കുറ്റസമ്മതം നടത്തിയത് കൊണ്ടുമാണ് മജീദിന് വധശിക്ഷ ലഭിച്ചത്. വിവാഹിതനായിട്ടും വ്യഭിചാരം നടത്തിയതിനും സാക്ഷികള്‍ സഹിതം പിടിയിലായതും മജീദിന് വിനയായി. മറ്റു പ്രതികള്‍ അവിവാഹിതരായതിനാലാണ് വധശിക്ഷ ഒഴിവായത്.

വിധി പകര്‍പ്പ് ലഭിക്കുകയും അപ്പീല്‍ നല്‍കാതിരിക്കുകയും ചെയ്യുകയാണെങ്കില്‍ 30 ദിവസത്തിനകം വധശിക്ഷ നടപ്പിലാക്കണമെന്നാണ് നിയമം. ശിക്ഷക്കെതിരെ അപ്പീല്‍ നല്‍കാന്‍ മജീദിന് കോടതി അനുമതി നല്‍കി.

 

“ഇനി ഒരു ആഗ്രഹം കൂടിയേ ബാക്കിയുള്ളൂ ബാബുക്കാ…. ഫർഹാനയെയും മോളേയും ഒന്ന് കൂടി കാണണം. ഇനി അത് നടക്കുമെന്ന് തോന്നുന്നില്ല. അവസാനത്തെ ആഗ്രഹമെന്ന നിലയിൽ എനിക്ക് ഒരു ഉംറ ചെയ്യണം. കഅബയിൽ പോയി പൊട്ടിക്കരഞ്ഞു എല്ലാം പറയണം. ഞാൻ നിരപരാധിയാണെന്ന് പടച്ചവന് അറിയാം. പടച്ചവൻ ഒരു വഴി കാണിച്ചു തരും. ബാബുക്ക എനിക്ക് വേണ്ടി ഒരു ഉംറ ചെയ്യണം. ഭൂമിയിൽ ദിവസങ്ങൾ എണ്ണി കഴിയുന്നവന്റെ അവസാനത്തെ ആഗ്രഹമാണ്”. മജീദിന്റെ ഷറഫിയയിലെ മുറിയിൽ കൂടെ താമസിച്ചിരുന്ന ബാബുക്കയുടെ മുന്നിൽ ജയിൽ പരിസരം മറന്ന് മജീദ് പൊട്ടിക്കരഞ്ഞു കൊണ്ട് അപേക്ഷിക്കുകയാണ്.

“ചെയ്യാം മോനെ….. ഇന്നു തന്നെ ചെയ്യാം. നീ നിരപരാധിയാണെന്ന് എനിക്ക് അറിയാം.ഇതൊക്കെ പടച്ചവന്റെ പരീക്ഷണങ്ങളാണ്. മോൻ പടച്ചവനോട് മനസറിഞ്ഞു തേടിക്കൊണ്ടിരിക്ക്. ഞാൻ മോന് വേണ്ടി ഇന്നുതന്നെ ഉംറ ചെയ്തോളാം”.

കഴിഞ്ഞ 11 വർഷമായി തന്റെ മുറിയിൽ താമസിക്കുന്നവനാണ് മജീദ്. മജീദിന്റെ സ്വഭാവം തനിക്ക് നന്നായറിയാം. ഭാര്യയും മോളും കഴിഞ്ഞേ അവൻ മറ്റൊരു ലോകമുള്ളൂ. ആ പാക്കിസ്ഥാനിയാണ് എല്ലാത്തിനും കാരണം. നല്ല മനസ്സ് ഉള്ളവർക്ക് നല്ലതേ വരൂ. അവൻ തെറ്റ് ചെയ്തിട്ടില്ലെങ്കിൽ അവന് രക്ഷ കിട്ടും. പടച്ചവൻ വിധിച്ചത് പടപ്പുകൾക്കു മാറ്റാൻ സാധിക്കില്ല. മുറിയിലെത്തിയ ബാബുക്ക ഇഹ്‌റാം വേഷം ധരിച്ച് മക്കയിലേക്ക് പുറപ്പെട്ടു.

മനസ്സ് നൊന്ത് കൊണ്ടാണ് ബാബുക്ക ത്വവാഫ് തുടങ്ങിയത്. ഓരോ തവണ കഅബയെ വലം വെക്കുമ്പോഴും മനസ്സറിഞ്ഞു പ്രാർത്ഥിച്ചു. ഏഴാമത്തെ ത്വവാഫ് പൂർത്തിയാക്കി മർവയിലേക്ക് പോകും മുൻപ് സംസം വെള്ളം കുടിച്ച് അൽപ നേരം വിശ്രമിച്ചു.

എഴുന്നേൽക്കുന്ന സമയത്താണ് താടി നീട്ടി വളർത്തിയ ഒരു സൗദി വൃദ്ധൻ തൊട്ടു മുന്നിലിരുന്ന് ഖുർആൻ പാരായണം നടത്തുന്നത് ബാബുക്കായുടെ ശ്രദ്ധയിൽ പെട്ടത്. നല്ല തേജസ്സുള്ള മുഖം. എന്തോ പറയും പോലെ അയാൾ ബാബുക്കയുടെ മുഖത്തേക്ക് നോക്കി. ബാബുക്ക അയാളുടെ അടുത്തേക്ക് ചെന്നു. സംസം വെള്ളം കാനുകൾ കുറച്ച് അപ്പുറത്താണ്. നടക്കാൻ വയ്യ. “കുറച്ച് വെള്ളം കൊണ്ട് വന്നു തരാമോ?”

സന്തോഷത്തോടെ ബാബുക്ക വെള്ളം കൊണ്ട് വന്നു കൊടുത്തു. അപ്പോഴാണ് വൃദ്ധന്റെ അടുത്ത ആവശ്യം. “ബാത്റൂമിലേക്ക് ഒന്ന് കൊണ്ട് പോകാമോ”. വൃദ്ധനായ തന്റെ പിതാവിനെ മനസ്സിലോർത്ത് ബാബുക്ക അയാളെ കുറച്ചകലെയുള്ള ബാത്റൂമിലേക്ക് കൊണ്ട് പോയി. പോകുന്ന സമയത്ത് അയാൾ വിവരങ്ങളൊക്കെ ചോദിച്ചു. വൃദ്ധൻ ഇരുപത് വർഷം മക്കയിലെ ശരീഅത് കോടതിൽ ജോലി ചെയ്തിരുന്ന വ്യക്തിയാണ്. വീട്ടിലേക്ക് തിരിച്ചു പോകാനായി ഡ്രൈവറെ കാത്തിരിക്കുകയാണ്. ബാബുക്ക മജീദിന്റെ വിവരങ്ങൾ ചുരുക്കി പറഞ്ഞു.

വൃദ്ധനെ തിരിച്ചു കൊണ്ട് ചെന്നാക്കി പോകാൻ തുനിഞ്ഞ ബാബുക്കയോട് അയാൾ ഇരിക്കാൻ പറഞ്ഞു. “മോനെ പേടിക്കേണ്ട. ഒന്നും സംഭവിക്കില്ല. ധൈര്യമായിരിക്ക്. നിനക്കു ഞാൻ ഒന്ന് രണ്ടു കാര്യങ്ങൾ പറഞ്ഞു തരാം. ചിലപ്പോൾ ഇത് നിന്നെ അറിയിക്കാൻ വേണ്ടിയായിരിക്കും എന്നെ വീട്ടിലേക്ക് കൊണ്ട് പോകാൻ എന്നും കൃത്യ സമയത്ത് വരാറുള്ള ഡ്രൈവർ നേരം വൈകിയത്”.

ബാബുക്ക വൃദ്ധന്റെ അരികിൽ ഇരുന്നു. വൃദ്ധൻ പറഞ്ഞു തുടങ്ങി. “ഗുരുതരവും നീചവുമായ കുറ്റകൃത്യങ്ങളില്‍ ഏര്‍പ്പെടുന്നവരെ കല്ലെറിഞ്ഞു കൊല്ലാനുള്ള നിയമം സൗദി നിയമ സംഹിതയില്‍ ഉള്‍പ്പെടുന്നവയാണ്‌. അത്തരം കുറ്റകൃത്യങ്ങളില്‍ ഉൾപ്പെടുന്നവർ കുറ്റക്കാരാണെന്ന് കണ്ടെത്തിയാൽ കല്ലെറിഞ്ഞു കൊല്ലാനുള്ള ശിക്ഷയും സൗദിയിലെ ശരീഅത് കോടതികള്‍ വിധിക്കുന്നു. അത് പ്രകാരം നിരവധി പേരെ കല്ലെറിഞ്ഞു കൊല്ലാന്‍ കഴിഞ്ഞ വര്‍ഷങ്ങളിലായി വിധിച്ചിട്ടുമുണ്ട്”

“അത്തരത്തില്‍ കല്ലെറിഞ്ഞു കൊല്ലാനുള്ള നിരവധി സ്ഥലങ്ങള്‍ റിയാദിലും ജിദ്ദയിലും മറ്റു നഗരങ്ങളിലുമുള്ള സ്ഥലങ്ങളില്‍ സജ്ജീകരിക്കപ്പെട്ടിരുന്നു. എന്നാൽ നിനക്കറിയാമോ, കഴിഞ്ഞ കുറെ വര്‍ഷങ്ങളായി ഒരാളെ പോലും സൗദിയിൽ കല്ലെറിഞ്ഞു കൊന്നിട്ടില്ല”

ബാബുക്കാക്ക് ഒരു പുതിയ അറിവായിരുന്നു അത്. “എന്ത് കൊണ്ടാണെന്ന് അറിയാമോ? ഞാൻ പറഞ്ഞു തരാം. അത് പോലെ ചെയ്യാൻ നിന്റെ സുഹൃത്തിനോട് പറയണം”.

വൃദ്ധൻ തുടർന്നു. “ചെയ്ത കുറ്റങ്ങളില്‍ കുറ്റസമ്മതം നടത്തുന്നവരെയാണ് കൂടുതലും കല്ലെറിഞ്ഞു കൊല്ലാന്‍ വിധിക്കുന്നത്. എന്നാല്‍ കല്ലെറിഞ്ഞു കൊല്ലാന്‍ വിധിക്കപ്പെട്ട കുറ്റവാളികള്‍ക്ക് ശിക്ഷ നടപ്പാക്കുന്നതിന് മുൻപായി അവരുടെ കുറ്റസമ്മത മൊഴി പിന്‍വലിക്കാനുള്ള അവസരം ശരീഅത് നിയമം നൽകുന്നുണ്ട്”

“ഇത്തരത്തില്‍ കുറ്റസമ്മതം പിന്‍വലിക്കുന്ന അവസരത്തില്‍ അവരെ കല്ലെറിഞ്ഞു കൊല്ലാനുള്ള ശിക്ഷയില്‍ നിന്നും അവരെ ഒഴിവാക്കപ്പെടുമെന്നു ശിക്ഷ നടപ്പാക്കുന്നതിന് മുൻപായി അവരെ ധരിപ്പിക്കണം. ആ സമയത്ത് മജീദിന് തന്റെ കുറ്റസമ്മതം പിന്‍വലിക്കാം. എങ്കിൽ കല്ലെറിഞ്ഞു കൊല്ലാനുള്ള ശിക്ഷയില്‍ നിന്നും മജീദ് ഒഴിവാക്കപ്പെടും. നിയമ പ്രകാരം വിചാരണ നടത്തി മറ്റു ശിക്ഷകള്‍ വിധിക്കുകയം ചെയ്യും”

ബാബുക്ക ശ്വാസം വിടാതെ വൃദ്ധന്റെ വാക്കുകൾ മാത്രം ശ്രദ്ധിച്ചിരുന്നു. മജീദിന്റെ കാര്യത്തിൽ പ്രതീക്ഷയുടെ ഒരു വെട്ടം കടന്നു വരുന്നതായി ബാബുക്കാക്ക് മനസ്സിലായി.

“ഇത് പോലെ ചെയ്‌താൽ നിന്റെ സുഹൃത്ത് കല്ലെറിഞ്ഞു കൊല്ലൽ എന്ന ശിക്ഷയിൽ നിന്നും രക്ഷപ്പെടും. ചിലപ്പോൾ പുനർവിചാരണയിൽ വധശിക്ഷ ഒഴിവാക്കി വളരെ അധികം വർഷം ജയിൽ ശിക്ഷയായി മാറാൻ സാധ്യതയുണ്ട്”.

“പേടിക്കേണ്ട. നിന്റെ സുഹൃത്ത് വിചാരിച്ചാൽ ജയിൽ ശിക്ഷ മുഴുവൻ അനുഭവിക്കേണ്ടി വരില്ല. അതിനും ഒരു വഴിയുണ്ട്. അതും ഞാൻ പറഞ്ഞു തരാം”. തുടർന്ന് മജീദിന് ജയിൽ ശിക്ഷാ കാലാവധി തീരുന്നതിന് മുൻപ് തന്നെ ജയിൽ വിമുക്തനാവാനുള്ള വഴിയും അഭിഭാഷകൻ പറഞ്ഞു കൊടുത്തു.

“വിശുദ്ധ ഖുറാനിലെ അധ്യായങ്ങള്‍ മനപാഠമാക്കിയ കുറ്റവാളികള്‍ക്ക് മോചനം നല്‍കാം എന്ന് മുൻപ് ഒരു രാജകല്പനയുണ്ട്. അന്തരിച്ച ഫഹദ്‌ ബിന്‍ അബ്ദുല്‍ അസീസ്‌ രാജാവിന്റെ രാജകല്‍പ്പന പ്രകാരമാണ് കുറ്റവാളികളെ ഇങ്ങിനെ വിട്ടയക്കല്‍ തുടങ്ങി വച്ചത്. ഇത് പ്രകാരം ജയിലിൽ കഴിയുന്ന കാലയളവിൽ മജീദ് ഖുർആനിലെ മുഴുവൻ അധ്യായങ്ങളും മനഃപാഠം ആക്കിയിരിക്കണം”.

“അതുപോലെതന്നെ മുഴുവന്‍ ശിക്ഷാ കാലാവധിയുടെ പകുതി കാലം ശിക്ഷ അനുഭവിച്ചു കഴിഞ്ഞിരിക്കണം. എന്നാൽ നിന്റെ സുഹൃത്തിന് ഇത്തരത്തിലുള്ള ജയിൽ മോചനം ഒരു അവകാശം എന്ന തരത്തിൽ ആവശ്യപ്പെടാൻ സാധിക്കില്ല. ഇത് അധികൃതരുടെ വിവേചന അധികാരത്തില്‍ പെടുന്ന ഒന്നാണ്. പക്ഷെ നിന്റെ സുഹൃത്തിന് ശ്രമിക്കാം. ചിലപ്പോൾ നടക്കും. പലപ്പോഴും നടക്കാറുണ്ട്. ശ്രമിക്കാൻ പറയൂ. പടച്ചവൻ അനുഗ്രഹിക്കട്ടെ“

വിവരങ്ങൾ പറഞ്ഞുതീർന്നതും വൃദ്ധനെ കൊണ്ട് പോകാൻ ഡ്രൈവർ എത്തി. ബാബുക്കാട് സലാം പറഞ്ഞു വൃദ്ധൻ പോയി.

ഈ വിവരങ്ങൾ ബാബുക്കയെ അറിയിക്കുവാൻ വൃദ്ധനെ ആരോ നിയോഗിച്ച പോലെയാണ് ബാബുക്കാക്ക് തോന്നിയത്. ഖിബിലക്ക് മുന്നിൽ ഒരു തവണ കൂടി സുന്നത്ത് നമസ്കരിച്ച് ആ വൃദ്ധനെ തന്റെ മുന്നിലെത്തിച്ച പടച്ചവനോട് ആയിരം തവണ നന്ദി പറഞ്ഞു സഇ പൂർത്തിയാക്കാൻ ബാബുക്ക മർവയിലേക്ക് പോയി.

 

വർഷങ്ങൾ ഏഴ് കഴിഞ്ഞിരിക്കുന്നു. മജീദിന്റെ ഖുർആൻ മനഃപാഠമാക്കൽ ഏതാണ്ട് പൂർത്തിയാക്കി കഴിഞ്ഞു. ജയിലിലെ ഏറ്റവും നല്ല സ്വഭാവത്തിനുടമയായ കുറ്റവാളിയും ഇപ്പോൾ മജീദ് തന്നെ. കോടതിയുടെ പുനർവിചാരണ വിധി പ്രകാരമുള്ള ശിക്ഷാ കാലാവധിയുടെ പകുതി കാലം കഴിയുന്നതിന് ഇനി മൂന്ന് വർഷം കൂടി ബാക്കിയുണ്ട്. അതിനുശേഷം ഒരുപക്ഷേ മജീദിന് മോചനം ലഭിച്ചേക്കാം. തനിക്ക് വേണ്ടി ഇപ്പോഴും കാത്തിരിക്കുന്ന ഫർഹാനയെ കാണാനും സ്‌കൂൾ വിദ്യാഭ്യാസം പൂർത്തിയാക്കാൻ ഒരുങ്ങുന്ന സഫ്‌വ മോളെയും കാണാൻ സാധിക്കുമെന്ന മജീദിന്റെ ആഗ്രഹം പൂവണിഞ്ഞേക്കാം. മജീദിന്റെ ആഗ്രഹം പൂവണിയാൻ സർവ്വശക്തൻ അനുഗ്രഹിക്കട്ടെ.

LATEST

യു.എ.ഇ യില്‍ 14 ദിവസം താമസിക്കേണ്ട, സൗദിയിലേക്ക് അനധികൃത ചവിട്ടി കയറ്റല്‍

Published

on

റിയാദ്: യു.എ.ഇ യില്‍ നിന്നും കോവിഡ് നിബന്ധനകളോ നിയമങ്ങളോ പാലിക്കാതെ സൗദിയിലേക്ക് ഇന്ത്യക്കാര്‍ അടക്കമുള്ള യാത്രക്കാര്‍ എത്തുന്നതായി റിപ്പോര്‍ട്ട്. റോഡ്‌ മാര്‍ഗ്ഗമാണ് അനധികൃതമായി യാത്രക്കാരെ സൗദിയിലേക്ക് എത്തിക്കുന്നത്. രണ്ടോ മൂന്നോ ദിവസം യു.എ.ഇ യില്‍ താമസിച്ചവര്‍ പോലും ഇത്തരത്തില്‍ ദുബായില്‍ നിന്നും റോഡ്‌ മാര്‍ഗ്ഗം സൗദിയില്‍ എത്തിയിട്ടുണ്ട്.

സൗദിയില്‍ നിന്നും രണ്ടു വാക്സിന്‍ എടുക്കാത്ത വിദേശികള്‍ മറ്റൊരു രാജ്യത്ത് പതിനാലു ദിവസം താമസിച്ച ശേഷം മാത്രമേ സൗദിയിലേക്ക് പ്രവേശിക്കാന്‍ പാടുള്ളൂ എന്നാണു നിബന്ധന. എന്നാല്‍ ഈ നിബന്ധന മറി കടന്നു കൊണ്ടാണ് വിദേശികളെ സൗദിയിലേക്ക് അനധികൃതമായി എത്തിക്കുന്നത്.

ബസ് മാര്‍ഗ്ഗമാണ് ഇങ്ങിനെ വിദേശികള്‍ അനധികൃതമായി സൗദിയിലേക്ക് പ്രവേശിക്കുന്നത്. ബസ് സര്‍വീസ് നടത്തുന്നവരും ചില എജന്റുമാരും ചേര്‍ന്നാണ് അനധികൃതമായി യാത്രക്കാരെ ചവിട്ടി കയറ്റുന്നത്.

യു.എ.ഇ യില്‍ രണ്ടോ മൂന്നോ ദിവസം താമസിച്ച ശേഷം സൗദിയിലേക്ക് പ്രവേശിക്കാന്‍ സാധിക്കുമോ എന്നും ഇത് നിയമപരമാണോ എന്നും ആരാഞ്ഞു കൊണ്ട് നിരവധി സന്ദേശങ്ങള്‍ കഴിഞ്ഞ ദിവസങ്ങളില്‍ ഞങ്ങള്‍ക്ക് ലഭിച്ചിരുന്നു. ഇതേ തുടര്‍ന്ന് ഞങ്ങളുടെ ദുബായിലുള്ള പ്രതിനിധി യാത്രക്കാരന്‍ എന്ന വ്യാജേന അവിടുത്തെ ഒരു ട്രാവല്‍ എജന്റുമായി ബന്ധപ്പെടുകയുണ്ടായി.

ഓരോ തവണയും ചുരുങ്ങിയ എണ്ണം യാത്രക്കാരെ ഇങ്ങിനെ ചവിട്ടി കയറ്റാമെന്നാണ് എജന്റ് വെളിപ്പെടുത്തിയത്. അതിനു ഓരോ യാത്രക്കാരനും ആറായിരം രൂപ മുതല്‍ എണ്ണായിരം രൂപ വേറെ അധികമായി നല്‍കേണ്ടി വരും. ദുബായ് വിസ എടുത്ത ശേഷം പത്തു ദിവസം കഴിഞ്ഞതിനു ശേഷം മാത്രം ദുബായിലേക്ക് പുറപ്പെട്ടാല്‍ മതി.

ദുബായില്‍ എത്തി രണ്ടോ മൂന്നോ ദിവസം മാത്രം താമസിച്ചാല്‍ മതിയാകും. അതിനുള്ളില്‍ ദമ്മാമില്‍ എത്തിക്കാമെന്നും എജന്റ് ഉറപ്പ് നല്‍കുന്നു. പിടിക്കപ്പെടില്ലെന്ന ഉറപ്പും എജന്റ് നല്‍കുന്നു. മുറിയില്‍ തന്നെ ഉണ്ടാകണമെന്നും ബസ്സില്‍ ഒഴിവ് ഉണ്ടാകുമ്പോള്‍ വിളിക്കുമെന്നും ഉടനെ തന്നെ യാത്രക്ക് സജ്ജരായി ഏത്തണമെന്നുമാണ് നിര്‍ദ്ദേശം.

താമസിക്കുന്ന സ്ഥലത്തെ ആളുകളോടോ സഹായാത്രികരോടോ യാത്രാ വിവരങ്ങളെ കുറിച്ച് യാതൊന്നും വെളിപ്പെടുത്തരുത് എന്നാണ് ഈ യാത്രക്കാര്‍ക്ക് ലഭിക്കുന്ന നിര്‍ദ്ദേശം. യാത്രക്കുള്ള നിര്‍ദ്ദേശം ലഭിക്കുന്ന മാത്രയില്‍ തയ്യാറായി ബസ്സിലേക്ക് പ്രവേശിക്കണമെന്നും മറ്റുള്ള കാര്യങ്ങള്‍ എല്ലാം തന്നെ തങ്ങളുടെ ആളുകള്‍ നോക്കി കൊള്ളൂമെന്നുമാണ് ഇത്തരം യാത്രക്കാരോട് പറയുന്നത്.

ഇതിനെ കുറിച്ച് ഞങ്ങള്‍ നടത്തിയ കൂടുതല്‍ അന്വേഷണത്തില്‍ നിരവധി പേര്‍ ഇത്തരത്തില്‍ അനധികൃതമായി സൗദിയില്‍ എത്തിയതായി വ്യക്തമായി. ഇങ്ങിനെ പ്രവേശിച്ചവരില്‍ കൂടുതല്‍ പേരും വടക്കേ ഇന്ത്യക്കാരാണ്. ബസ്സ്‌ മാര്‍ഗ്ഗമാണ് ഇവര്‍ എല്ലാവരും സൗദിയിലേക്ക് പ്രവേശിച്ചിട്ടുള്ളത്.

സമീപ ദിവസങ്ങളില്‍ ഒരു തമിഴ്നാട്ടുകാരനും ഇങ്ങിനെ സൗദിയിലേക്ക് പ്രവേശിച്ചതായി നേരിട്ട് വ്യക്തമായി. ഇയാള്‍ക്ക് ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട് പോലും ഉണ്ടായിരുന്നില്ല. ഒരു വാക്സിന്‍ മാത്രമെടുത്ത ഇയാള്‍ തവക്കല്‍നയില്‍ ഇമ്മ്യൂണും ആയിരുന്നില്ല.

മൂന്ന് വടക്കേ ഇന്ത്യക്കാര്‍ ഒക്ടോബര്‍ 28 ന് ദുബായില്‍ എത്തിയവരാണ്. രണ്ടു ദിവസം മാത്രം ദുബായില്‍ താമസിച്ച ശേഷം ഇവര്‍ കഴിഞ്ഞ ദിവസം സൗദിയിലേക്ക് പ്രവേശിക്കുകയും ചെയ്തതായി ഞങ്ങളുടെ അന്വേഷണത്തിലൂടെ നേരിട്ട് മനസ്സിലാക്കാന്‍ സാധിച്ചിട്ടുണ്ട്.

സൗദി അതിര്‍ത്തി ചെക്ക് പോസ്റ്റില്‍ ഓരോ യാത്രക്കാരുടെയും പാസ്പോര്‍ട്ട് വിശദമായി പരിശോധിക്കാത്തത് മുതലെടുത്താണ് യാത്രക്കാരെ ഇത്തരത്തില്‍ ചവിട്ടി കയറ്റുന്നത്. ബസ്സിലുള്ള എല്ലാ യാത്രക്കാരുടെയും രേഖകള്‍ ശേഖരിച്ച് ബസ് ജീവനക്കാര്‍ ചെക്ക് പോസ്റ്റില്‍ നല്‍കുകയാണ് ചെയ്യുന്നത്. അതിനിടയിലാണ് കൃത്രിമം നടക്കുന്നത്.

നേരിട്ട് പ്രവേശിക്കാന്‍ വിലക്കുള്ള രാജ്യങ്ങളില്‍ നിന്നുള്ളവര്‍ സൗദിയുടെ റെഡ് ലിസ്റ്റില്‍ ഇല്ലാത്ത മറ്റൊരു രാജ്യത്ത് പതിനാല് ദിവസം താമസിച്ച ശേഷം മാത്രമേ സൗദിയിലേക്ക് പ്രവേശിക്കാന്‍ അനുമതിയുള്ളൂ. ഇങ്ങിനെ മലയാളികള്‍ അടക്കമുള്ള ആയിരക്കണക്കിന് പേര്‍ ദിവസവും ദുബായില്‍ നിന്നും സൗദിയിലേക്ക് പ്രവേശിക്കുന്നുണ്ട്. ഇവരുടെ മറവിലാണ് അനധികൃതമായി ചവിട്ടി കയറ്റല്‍ നടക്കുന്നത്.

പിടിക്കപ്പെടില്ലെന്ന് ഏജന്റുമാര്‍ ഉറപ്പ് നല്കുന്നുണ്ടെങ്കിലും ഏതെങ്കിലും കാരണവശാല്‍ സൗദി ചെക്ക് പോസ്റ്റില്‍ ഉള്ള അധികൃതര്‍ ഓരോ പാസ്പോര്‍ട്ടും പ്രത്യേകം പരിശോധിച്ചാല്‍ ഇവര്‍ പിടിക്കപ്പെടും എന്നുള്ളത് ഉറപ്പാണ്. കാരണം ദുബായില്‍ വന്നിറങ്ങിയ തിയ്യതിയില്‍ നിന്നും  ഇവര്‍ എത്ര ദിവസം യു.എ.ഇ യില്‍ താമസിച്ചു എന്ന് പാസ്പോര്‍ട്ടില്‍ സ്റ്റാമ്പ് ചെയ്തതില്‍ നിന്നും മനസ്സിലാക്കാന്‍ സാധിക്കും. ദുബായ് ചെക്ക് പോസ്റ്റില്‍ നിന്നും എക്സിറ്റ് സ്റ്റാമ്പ് ചെയ്തതിനാല്‍ കൃത്രിമം പിടിക്കപ്പെട്ടു കഴിഞ്ഞാല്‍ പിന്നീട് യു.എ.ഇ യിലേക്ക് മടങ്ങി പോകാനും സാധിക്കില്ല.

കോവിഡ് പ്രോട്ടോക്കോള്‍ ലംഘനവും മറ്റു അനുബന്ധ നിയമ ലംഘനങ്ങളുമാണ് ഇവരില്‍ ചുമത്തുക. ഇത്തരക്കാരെ ജയിലിലേക്ക് മാറ്റുകയും നിയമം അനുശാസിക്കുന്ന കനത്ത പിഴയും തടവും ചുമത്തുകയും ചെയ്യും. പിന്നീട് സൗദിയിലേക്ക് തിരിച്ചു വരാന്‍ സാധിക്കാത്ത വിധം തര്‍ഹീല്‍ വഴി നിയമ ലംഘകരെ നാട് കടത്തുകയാണ് ചെയ്യുക.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DlSqnw7eVy9HWYdQHH8ljx

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading

LATEST

നാട്ടുകാരന്റെ ജീവനെടുക്കാന്‍ കൂട്ടു നിന്ന ഈ സൗദി മലയാളികള്‍ ശരിക്കും മാപ്പ് അര്‍ഹിക്കുന്നുണ്ടോ?

Published

on

റിയാദ്: സൗദിയിലെ മലയാളി സമൂഹത്തെ ഞെട്ടിച്ച കൊലപാതകത്തില്‍ നാട്ടുകാരനായ സഹജീവിയുടെ ജീവനെടുക്കാന്‍ കൂട്ടു നിന്നുവെന്ന ആരോപണത്തില്‍ പിടിയിലായി വിചാരണക്ക് ശേഷം വധശിക്ഷക്ക് വിധിക്കപ്പെട്ട രണ്ടു മലയാളികള്‍ ജീവന്‍ നഷ്ടമാകുന്നതിന്റെ ഒരു കടമ്പ മാത്രം പിന്നിലാണ്. കൊല്ലപ്പെട്ട മലയാളി യുവാവിന്റെ കുടുംബം മാപ്പ് നൽകിയാൽ മാത്രമേ വധ ശിക്ഷയിൽ നിന്ന് രക്ഷപ്പെടാനാകൂ. എന്നാല്‍ കുടുംബം മാപ്പ് നല്‍കാന്‍ തയ്യാറല്ല എന്നാണു ഏറ്റവും ഒടുവിലായി നാട്ടില്‍ നിന്നും ലഭിക്കുന്ന റിപ്പോര്‍ട്ടുകള്‍.

കോഴിക്കോട് കൊടുവള്ളി മുക്കിലങ്ങാടി സ്വദേശി ഷമീറിനെ കൊലപ്പടുത്തിയ കേസിൽ പ്രതികളായ തൃശൂർ കൊടുങ്ങല്ലൂർ ഏറിയാട് സ്വദേശി ചീനികപ്പുറത്ത് നിസാം സാദിഖ് (നിസാമുദ്ദീൻ), കുറ്റ്യാടി സ്വദേശി കുറ്റ്യാടി സ്വദേശി ആശാരിത്തൊടിക അജ്മല്‍ എന്നിവരാണ് കീഴ്ക്കോടതി വിധിച്ച വധശിക്ഷ ദമാം അപ്പീൽ കോടതിയും ശരി വെച്ചതോടെ വധശിക്ഷയിലെക്ക് നടന്നടുക്കുന്നത്. ഇവര്‍ക്ക് പുറമേ അസ്വദ്, ഹുസൈന്‍ അമ്മാര്‍, ഹുസൈന്‍ സലമി, അബുറയ്യാന്‍ എന്ന അലി എന്നീ 4 സൗദി പൗരന്മാർക്കും വധശിക്ഷ വിധിച്ചിട്ടുണ്ട്.

ഷമീറിന്റെ വധത്തില്‍ രണ്ടു മലയാളികള്‍ക്കും കൃത്യമായ പങ്കുണ്ടെന്നാണ് കോടതി കണ്ടെത്തിയിരിക്കുന്നത്. മദ്യ വാറ്റുകാരെയും പലിശക്കാരെയും ചീട്ടുകളി സംഘത്തേയും കണ്ടത്തെി ആക്രമിച്ച് പണവും വിലപിടിപ്പുള്ള സാധനങ്ങളും കൊള്ളയടിക്കുന്ന സൗദി കവർച്ചാ സംഘത്തിനു ഷമീറിനെക്കുറിച്ചുള്ള വിവരങ്ങൾ നൽകിയത് മലയാളികളായ പ്രതികളായിരുന്നുവെത്രേ.

അത്യന്തം ക്രൂരമായാണ് സ്വദേശികളായ ഷമീറിനെ പ്രതികള്‍ കൊലപ്പെടുത്തിയത് എന്നാണ് റിപ്പോര്‍ട്ടുകള്‍. പലപ്പോഴും കണ്ണുകള്‍ മറച്ച് തല കീഴായി കെട്ടിയിട്ടായിരുന്നു മര്‍ദ്ദനം. മൂന്ന് ദിവസത്തോളം തുടര്‍ന്ന മര്‍ദ്ദനത്തിന് ഒടുവിലായാണ് ഷമീറിനു ജീവന്‍ നഷ്ടപ്പെട്ടത്. ഷമീറിനെക്കുറിച്ചുള്ള വിവരങ്ങൾ നല്‍കിയതിന് പുറമേ ബന്ദിയാക്കി വിലപേശാനും പ്രതികളായ മലയാളികള്‍ കൂട്ടു നിന്നതായാണ് കോടതി കണ്ടെത്തിയിരിക്കുന്നത്.

അഞ്ച് വർഷം മുന്‍പ് ഒരു ചെറിയ പെരുന്നാൾ ദിനത്തിന്റെ തലേന്നാണ് ഷമീറിന്റെ മൃതദേഹം കണ്ടെത്തുന്നത്. മൂന്ന് ദിവസം മുമ്പ് കാണാതായ ഷമീറിനെ ബന്ധുക്കളും പൊലീസും തിരയുന്നതിനിടയിലാണ് മൃതദേഹം ജുബൈല്‍ വര്‍ക്ഷോപ്പ് ഏരിയയിലെ മണല്‍ വില്‍ക്കുന്ന ഭാഗത്ത് ബലദിയ വേസ്റ്റ് ബോക്സിനു സമീപം പുലര്‍ച്ചെ പുതപ്പിൽ പൊതിഞ്ഞ നിലയില്‍ കണ്ടെത്തിയത്.

ഷമീറിന്റെ മരണത്തെ കുറിച്ച് വിവിധങ്ങളായ ഊഹാപോഹങ്ങള്‍ മലയാളി സമൂഹത്തില്‍ പ്രചരിച്ചിരുന്നു. കൊല്ലപ്പെട്ട ഷമീര്‍ ഹവാല എജന്റ് ആയിരുന്നുവെന്നും, വ്യാജ മദ്യ വില്‍പ്പനക്ക് ഇടനിലക്കാരനായി പ്രവര്‍ത്തിച്ചിരുന്നുവെന്നും പറയപ്പെടുന്നുണ്ട്.  പണം കവരാൻ വേണ്ടി പ്രതികൾ തട്ടിക്കൊണ്ട് പോകുകയായിരുന്നുവെന്നും ഹവാല പണം ഷമീറിൽ നിന്ന് ലഭിക്കാത്തതിനാല്‍ തടവിലാക്കി വിലപേശുന്നതിനിടയില്‍ മര്‍ദ്ദനം മൂലം ഷമീര്‍ കൊല്ലപ്പെടുകയായിരുന്നുവെന്നുമാണ് പോലീസിന്റെ കണ്ടെത്തല്‍. ആളുമാറി കൊലപ്പെടുത്തിയെന്ന പ്രചരണം വ്യാപമാകുന്നതിനിടയിലായിരുന്നു മരണ കാരണവും പ്രതികളുടെ അറസ്റ്റ് വിവരവും പോലീസ് പുറത്ത് വിടുന്നത്.

ജുബൈലിലെ സാമൂഹിക പ്രവർത്തകനായ സൈഫുദ്ദീൻ പൊറ്റശ്ശേരി പ്രതിയായ നിസാമിന് ആവശ്യമായ നിയമസഹായങ്ങൾ ലഭ്യമാക്കാൻ പ്രതികളെ ജയിലില്‍ സന്ദര്‍ശിക്കുകയും ആവശ്യമായ നിയമ സഹായം ലഭിക്കുന്നതിനുള്ള സഹായങ്ങള്‍ ചെയ്യുകയും ചെയ്തപ്പോള്‍ തന്നെ പ്രതികള്‍ സഹായത്തിനും ദയക്കും അര്‍ഹരാണോ എന്ന ചോദ്യം സൗദിയിലെ പ്രവാസി സമൂഹത്തില്‍ നിന്നും ഉയര്‍ന്നിരുന്നു. നിസാമിന്റെ കുടുംബത്തിന്റെ അപേക്ഷ പരിഗണിച്ചാണ് ഇന്ത്യൻ എംബസി പ്രശ്നത്തില്‍ ഇടപെടാന്‍ സൈഫുദ്ദീന് അധികാര പത്രം നൽകിയത്.

പ്രതികൾക്ക് മാപ്പ് നൽകാൻ കുടുംബം ഷമീറിന്റെ ഇതുവരെ തയ്യാറായിട്ടില്ല. രാജാവിനടക്കം ദയാഹരജി നൽകാനുള്ള ഒരുക്കത്തിലാണ് പ്രതിയായ നിസാമിന്റെ കുടുംബം. എന്നാല്‍ ഷമീറിന്റെ കുടുംബം മാപ്പ് നൽകിയാൽ മാത്രമേ ദയാ ഹരജിക്ക് ഫലമുണ്ടാകൂ. ഈ സന്ദര്‍ഭത്തില്‍ പ്രതികളെ വധശിക്ഷയില്‍ നിന്നും രക്ഷപ്പെടുത്തുന്നതിനായി മുന്നിട്ടിറങ്ങാന്‍ ഒരു സംഘടന ആലോചിക്കുന്നതായാണ് വിവരം.

പ്രവാസി സമൂഹത്തില്‍ നിന്നും മറ്റും പണം പിരിച്ച് ഷമീറിന്റെ കുടുംബത്തിന് ദിയാ ധനമായി നല്‍കി മാപ്പ് സംഘടിപ്പിക്കാനാണ്  പദ്ധതി. ഉടനെ ഇതിനായി രംഗത്തിറങ്ങിയാല്‍ പ്രവാസി സമൂഹത്തില്‍ നിന്നും അസംതൃപ്തി ഉണ്ടാകാനുള്ള സാധ്യത മുന്‍നിര്‍ത്തി രോഷം കെട്ടടങ്ങുന്നത് വരെ കാത്തിരിക്കാനാണ് തീരുമാനം. സമീറിന്റെ മകനും മകളും മൈനര്‍മാര്‍ ആയതിനാല്‍ അതിനാവശ്യമായ സമയം ലഭിക്കുകയും ചെയ്യും.

വധശിക്ഷക്ക് വിധിക്കപ്പെട്ടവരെ സഹായിക്കാന്‍ തുനിഞ്ഞിറങ്ങുന്ന വിഷയത്തില്‍ സമ്മിശ്രമായ പ്രതികരണമാണ് സൗദിയിലെ മലയാളി പ്രവാസി മണ്ഡലങ്ങളില്‍ ഉയരുന്നത്. തെറ്റുകള്‍ മനുഷ്യ സഹജമാണെന്നും പാശ്ചാത്തപിക്കാന്‍ അവസരം നല്‍കണമെന്നും ഒരു വിഭാഗം അഭിപ്രായപ്പെടുന്നു. അതേ സമയം അറിയാതെ തെറ്റ് ചെയ്യുന്നവര്‍ക്കാണ് സഹായങ്ങള്‍ എത്തിക്കേണ്ടതെന്നും മനപ്പൂര്‍വ്വം കൊടും കുറ്റകൃത്യങ്ങള്‍ ചെയ്യുന്നവരെ നിയമത്തിന് വിട്ടു കൊടുക്കണമെന്നും സോഷ്യല്‍ മീഡിയകളില്‍ അഭിപ്രായമുയരുന്നു.

സഹായം എത്തിക്കാന്‍ ആഗ്രഹിക്കുന്ന സംഘടനകള്‍ അതിനായി സ്വന്തമായി പണം കണ്ടെത്തണമെന്നും സൗദി അറേബ്യ പോലെ ഒരു രാജ്യത്ത് വന്ന് കടുത്ത ശിക്ഷ ഉണ്ടാകുമെന്ന് അറിഞ്ഞു കൊണ്ട് തന്നെ കുറ്റകൃത്യങ്ങളും നിയമ വിരുദ്ധ പ്രവര്‍ത്തനങ്ങളും ചെയ്യുന്നവരെ സഹായിക്കാന്‍ പ്രവാസികളില്‍ നിന്നും പണം പിരിച്ചെടുക്കരുതെന്നും ചിലര്‍ അഭിപ്രായപ്പെടുന്നു.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DlSqnw7eVy9HWYdQHH8ljx

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading

LATEST

സൗദി പ്രവാസികള്‍ ഏറ്റവും അധികം ചോദിച്ച 6 ചോദ്യങ്ങള്‍. നിര്‍ബന്ധമായും അറിഞ്ഞിരിക്കേണ്ടത്.

Published

on

  1. എനിക്ക് നാട്ടില്‍ സ്വിഹത്തി അപ്ളിക്കേഷനില്‍ ലൊക്കേഷന്‍ പ്രശ്നം ഉണ്ടാകുന്നു. അപ്ളിക്കേഷന്‍ തുറക്കുമ്പോള്‍ ലൊക്കേഷന്‍ സെറ്റ് ചെയ്യാന്‍ ആവശ്യപ്പെടുന്നുണ്ട്. സിറ്റി, ഡിസ്ട്രിക്റ്റ് എങ്ങിനെയാണ് നാട്ടില്‍ നിന്നും സെറ്റ് ചെയ്യേണ്ടത്?

സൗദിക്ക് പുറത്ത് നിന്നും അപ്ളിക്കേഷന്‍ തുറക്കുമ്പോള്‍ ചിലപ്പോള്‍ ലൊക്കേഷന്‍ പ്രശ്നം ഉണ്ടാകാറുണ്ട്. സൗദിയിലെ സിറ്റികള്‍ കാണിക്കും. എന്നാല്‍ ഡിസ്ട്രിക്റ്റ് കോളത്തില്‍ ഒന്നും വരുന്നില്ല എന്ന പ്രശ്നമാണ് പലര്‍ക്കും അനുഭവപ്പെടുന്നത്. നിങ്ങളുടെ സുഹൃത്തുക്കളോ ബന്ധുക്കളോ ആരെങ്കിലും നിലവില്‍ സൗദിയില്‍ ഉണ്ടെങ്കില്‍ അവര്‍ക്ക് ഇഖാമ നമ്പര്‍, പാസ്‌വേര്‍ഡ്‌ തുടങ്ങിയ വിവരങ്ങള്‍ കൈമാറി അവരോട് അവിടെ നിന്നും നിങ്ങളുടെ അപ്ളിക്കേഷന്‍ ലൊക്കേഷന്‍ സെറ്റ് ചെയ്തു തരാനായി ആവശ്യപ്പെടുക. അതിനു ശേഷം നിങ്ങള്‍ സ്വിഹതി അപ്ളിക്കേഷന്‍ അണ്‍ഇന്‍സ്റ്റാള്‍ ചെയ്യുകയും വീണ്ടും ഇന്‍സ്റ്റാള്‍ ചെയ്യുകയും ചെയ്യുമ്പോള്‍ ലൊക്കേഷന്‍ പ്രശ്നം പരിഹരിക്കപ്പെടുന്നതായാണ് കാണപ്പെടുന്നത്.

  1. മൂന്ന് ദിവസം മുന്‍പ് എന്റെ അബ്ഷീര്‍ അക്കൗണ്ടിലേക്ക് “ടെസ്റ്റ്‌” എന്ന ഒരു സന്ദേശം വന്നിരുന്നു. പക്ഷെ അക്കൌണ്ടില്‍ പ്രത്യേകമായി ഒന്നും കാണാന്‍ സാധിച്ചില്ല. എന്ത് ടെസ്റ്റിന്റെ കാര്യമാണ് ഉദ്ദേശിക്കുന്നത്?

അത് ഒരു സാങ്കേതിക പ്രശ്നം മാത്രമാണ് എന്നാണ് മനസ്സിലാക്കാന്‍ സാധിക്കുന്നത്. താങ്കളുടെ മാത്രമല്ല, അനേകം പേരുടെ മൊബൈല്‍ ഫോണുകളിലേക്ക് അബ്ഷിര്‍ പ്ലാറ്റ്‌ഫോമില്‍നിന്ന് അബ്ഷിര്‍ പ്ലാറ്റ്‌ഫോമില്‍നിന്ന് ടെസ്റ്റ് എന്ന ഒരു സന്ദേശം വന്നിരുന്നു. പക്ഷെ എല്ലാവര്‍ക്കും ഇത് ലഭിച്ചിട്ടുമില്ല. അബ്ഷീര്‍ പ്ലാറ്റ്ഫോം ഭാഗത്ത് നിന്നും ഉണ്ടായ ഒരു സാങ്കേതിക പ്രശ്നമോ, പുതിയ അപ്ഡേറ്റ് വരുത്താനുള്ള സാങ്കേതിക നടപടികളുടെ തുടക്കമോ ആകാം. ഈ വിഷയത്തെ കുറിച്ച് ആരാഞ്ഞവരോട് ഇക്കാര്യത്തില്‍ പ്രത്യേകമായി ഒന്നും ചെയ്യേണ്ടതില്ല എന്നും അവഗണിക്കാനുമാണ് അബ്ഷിര്‍ നല്‍കിയ മറുപടി.

  1. സ്വിഹതി അപ്ളിക്കേഷന്‍ പലരും ഒ.ടി.പി ഇല്ലാതെ ഓപണ്‍ ചെയ്യുന്നത് കാണുന്നുണ്ട്. അവരുടേത് സ്പെഷ്യല്‍ അക്കൌണ്ട് ആണോ? എല്ലാ ഫോണിലും ഇത് ചെയ്യാന്‍ സാധിക്കുമോ? ആണെങ്കില്‍ എങ്ങിനെയാണ് ഇത് ചെയ്യാന്‍ സാധിക്കുന്നത് എന്ന് പറഞ്ഞു തരാമോ?

സ്വിഹത്തി അപ്ളിക്കേഷനില്‍ എല്ലാവര്‍ക്കും ചെയ്യാന്‍ സാധിക്കുന്ന ഒരു ഓപ്ഷന്‍ ആണിത്. എല്ലാ അപ്ളിക്കേഷനിലും അതിനുള്ള സൗകര്യം ഉണ്ട്. നിങ്ങളുടെ സ്വിഹത്തി അപ്ളിക്കേഷന്‍ തുറന്ന് അതിലെ സെറ്റിങ്ങ്സ് ഓപ്ഷനില്‍ പ്രവേശിക്കുക. അതില്‍ ലാംഗ്വേജ് സെറ്റ് ചെയ്യുന്ന ഓപ്ഷന് താഴെയായി പ്രൈവസി എന്നൊരു ഓപ്ഷന്‍ കാണാന്‍ സാധിക്കും. അതില്‍ “Allow Sehhaty to use Fingerprint or Face ID” ഓപ്ഷന്‍ കാണാന്‍ സാധിക്കും. അത് എനേബിള്‍ ആക്കി വിരലടയാളം സെറ്റ് ചെയ്യാം.

സ്വിഹത്തി അപ്ളിക്കേഷനില്‍ ഒരിക്കല്‍ ഈ സൗകര്യം ആക്റ്റിവേറ്റ് ചെയ്തു കഴിഞ്ഞാല്‍ പിന്നീട് മൊബൈല്‍ നമ്പരില്‍ ഒ.ടി.പി ലഭിക്കാതെ തന്നെ നിങ്ങള്‍ക്ക് സ്വിഹത്തി അക്കൌണ്ടില്‍ ലോഗിന്‍ ചെയ്യാന്‍ സാധിക്കും എന്നതാണ് ഏറ്റവും പ്രയോജനകരമായ കാര്യം. ഏതെങ്കിലും കാരണവശാല്‍ സിം കാര്‍ഡ് നഷ്ടപ്പെടുകയോ പ്രയോജന രഹിതമാകുകയോ ചെയ്‌താലും വിരലടയാളം ഉപയോഗിച്ച് ലോഗിന്‍ ചെയ്ത് സ്വിഹത്തി അക്കൌണ്ട് ഉപയോഗിക്കാന്‍ സാധിക്കും.

  1. കഴിഞ്ഞ ദിവസം ജിദ്ദയിലേക്ക് യാത്ര ചെയ്യാനായി എത്തിയ ഒരു പ്രവാസിയുടെ യാത്ര ആര്‍.ടി.പി.സി.ആറിലെ ക്യൂ ആര്‍ കോഡ് പ്രശ്നം മൂലം മുടങ്ങി എന്നുള്ള ഒരു വോയ്സ് മെസേജ് ഗ്രൂപ്പുകളില്‍ പ്രചരിക്കുന്നുണ്ട്. അത് ശരിയാണോ? ഞാന്‍ അടുത്ത ദിവസം റിയാദിലേക്ക് യാത്ര ചെയ്യാന്‍ ടിക്കറ്റ് എടുത്തിട്ടുണ്ട്. എങ്ങിനെയാണ് നമുക്ക് കിട്ടിയിട്ടുള്ള നമുക്ക് ആര്‍.ടി.പി.സി.ആര്‍ സര്‍ട്ടിഫിക്കറ്റിലെ ക്യൂ ആര്‍ കോഡ് ഒറിജിനലാണോ എന്ന് ഉറപ്പു വരുത്താന്‍ സാധിക്കുക?

പ്രസ്തുത വോയ്സ് മെസേജ് കേട്ടിട്ടില്ലാത്തതിനാല്‍ അതിനെ കുറിച്ച് പറയാനാവില്ല. എന്നാല്‍ നിങ്ങളുടെ കൈവശമുള്ള ആര്‍.ടി.പി.സി.ആര്‍ സര്‍ട്ടിഫിക്കറ്റിലെ ക്യൂ.ആര്‍ കോഡ് സ്കാന്‍ ചെയ്‌താല്‍ അതിന്റെ ആധികാരികത പൂര്‍ണ്ണമായും മനസ്സിലാക്കാന്‍ സാധിക്കും. അത് ഓരോരുത്തര്‍ക്കും സ്വയം പരിശോധിച്ച് ഉറപ്പു വരുത്താനും സാധിക്കുന്നതാണ്. ഇതിനായി ക്യൂ.ആര്‍ കോഡ് സ്കാനര്‍ ഉപയോഗിക്കാം. ഈ അപ്ളിക്കേഷന്‍ നിങ്ങള്‍ക്ക് പ്ലേ സ്റ്റോറില്‍ നിന്നും ഡൌണ്‍ലോഡ് ചെയ്തെടുക്കാവുന്നതാണ്.

കൈവശം ഉള്ളത് പ്രിന്റഡ് സര്‍ട്ടിഫിക്കറ്റ് ആണെങ്കിലും പിഡിഎഫ് രൂപത്തിലുള്ളത് ആണെങ്കിലും ഈ അപ്ളിക്കേഷന്‍ ഉപയോഗിച്ച് സ്വയം സ്കാന്‍ ചെയ്യാന്‍ സാധിക്കും. നിങ്ങളുടെ കൈവശമുള്ള ആര്‍.ടി.പി.സി.ആര്‍ സര്‍ട്ടിഫിക്കറ്റിലെ ക്യൂ ആര്‍ കോഡ് ഈ അപ്ളിക്കേഷന്‍ ഉപയോഗിച്ച് സ്കാന്‍ ചെയ്യുക. അപ്പോള്‍ ഒരു ലിങ്ക് നിങ്ങള്‍ക്ക് കാണാന്‍ സാധിക്കും. ആ ലിങ്കില്‍ ക്ലിക്ക് ചെയ്ത് വെബ്സൈറ്റില്‍ പ്രവേശിച്ചാല്‍ പ്രസ്തുത സര്‍ട്ടിഫിക്കറ്റിലെ മുഴുവന്‍ വിവരങ്ങളും പരിശോധിച്ച് ആധികാരികത ഉറപ്പ് വരുത്താന്‍ സാധിക്കും.

  1. എന്റെ റൂമിലുള്ള പുതിയതായി വന്നയാളുടെ തവക്കല്‍ന ഇമ്മ്യൂണ്‍ അല്ല. മറ്റൊരാള്‍ മുഖേന പണം നല്‍കി തവക്കല്‍നാ ആപ്പിലെ ഇമ്മ്യൂണ്‍ സ്റ്റാറ്റസ്, രണ്ടു ഡോസ് വാക്‌സിന്‍ സ്വീകരിച്ചവരാക്കി നല്‍കാമെന്ന് റൂമിലുള്ള മറ്റൊരു സുഹൃത്ത് പറയുന്നു. ഇത് ശരിയാണോ?

ഇത് നിയമപരമായ വഴിയാകാന്‍ സാധ്യതയില്ല. രണ്ടു ഡോസ് വാക്സിന്‍ എടുത്ത സര്‍ട്ടിഫിക്കറ്റ് അപ്‌ലോഡ്‌ ചെയ്താണ് തവക്കല്‍ന ഇമ്മ്യൂണ്‍ ആകുന്നത്. പണം നല്‍കി  തവക്കല്‍നാ ആപ്പിലെ ഇമ്മ്യൂണ്‍ സ്റ്റാറ്റസ്, രണ്ടു ഡോസ് വാക്‌സിന്‍ സ്വീകരിച്ചവരാക്കി ഇമ്മ്യൂണ്‍ ആകുന്നത് ക്രിമിനല്‍ കുറ്റവുമാണ്. നിരവധി പേര്‍ ഇതിനകംതന്നെ ഈ കുറ്റത്തിന് പിടിയിലായിട്ടുണ്ട്. കഴിഞ്ഞ ദിവസവും ഒരു പാകിസ്താന്‍ പൗരനും യെമനി പൗരനും ഈ കുറ്റത്തിന് പിടിയിലായിട്ടുണ്ട്. മൂന്ന് മാസങ്ങള്‍ക്ക് മുന്‍പ് രണ്ടു തവണയായി 150 ഓളം പേര്‍ പിടിയിലായിട്ടുണ്ട്.

ഇമ്മ്യൂണ്‍ ആക്കി നല്‍കുന്നവര്‍ പിടിയിലായാല്‍ അവരില്‍ നിന്നും ഇമ്മ്യൂണ്‍ ആയവരിലേക്ക് അന്വേഷണ ഉദ്യോഗസ്ഥര്‍ അന്വേഷിച്ചെത്തുന്ന രീതിയാണ് കാണാന്‍ സാധിക്കുന്നത്. അത് കൊണ്ട് താല്‍ക്കാലികമായി ഇമ്മ്യൂണ്‍ ആയാലും പിന്നീട് പിടിക്കപ്പെടാനുള്ള സാധ്യത തള്ളികളയാന്‍ സാധിക്കില്ല.

  1. സൗദിയിലേക്ക് റോഡ്‌ മാര്‍ഗ്ഗം പോകാനായി കഴിഞ്ഞ ദിവസം മുഖീമില്‍ അറൈവല്‍ രജിസ്ട്രേഷന്‍ ചെയ്തിരുന്നു. എന്റെ രജിസ്ട്രേഷന്‍ പ്രിന്റ്‌ ഔട്ടില്‍ വാക്സിനേഷന്‍ ചെയ്ത വിവരങ്ങള്‍ കാണിക്കുന്നില്ല. എന്നാല്‍ എന്റെ സുഹൃത്തിന്റെ അറൈവല്‍ രജിസ്ട്രേഷന്‍ ഫോമില്‍ വാക്സിനേഷന്‍ ചെയ്ത വിവരങ്ങള്‍ ഒന്നാമത്തെ ഡോസ്, രണ്ടാമത്തെ ഡോസ് എന്നിങ്ങനെ മുഴുവനും വിശദമായി കാണുന്നുണ്ട്. ഇത് എന്റെ സര്‍ട്ടിഫിക്കറ്റില്‍ മാത്രം ഉണ്ടായിട്ടുള്ള ഒരു പിശകാണോ? എങ്ങിനെയാണ് ഇത് തിരുത്താന്‍ സാധിക്കുക? ഇത് മൂലം യാത്രക്ക് എന്തെങ്കിലും പ്രശ്നം ഉണ്ടാകാന്‍ സാധ്യതയുണ്ടോ?

ഇത് ഒരു പിശക് ആകാന്‍ സാധ്യതയില്ല. ആദ്യമായി നിങ്ങളുടെ സുഹൃത്തിന്റെ യാത്ര വിവരങ്ങള്‍ പരിശോധിക്കുക. നിലവിലുള്ള വിസയില്‍ അവധിക്ക് വന്നു പോകുന്ന ഇഖാമയുള്ളവരുടെ അറൈവല്‍/മുഖീം രജിസ്ട്രേഷന്‍ ഫോമിലും പുതിയ വിസയില്‍ പോകുന്നവരുടെ ഫോമിലും സാരമായ വ്യത്യാസങ്ങള്‍ ഉണ്ടായിരിക്കും. നിങ്ങളുടെ സുഹൃത്ത് പുതിയ വിസയില്‍ പോകുന്ന ആളാണോ എന്ന് ഉറപ്പു വരുത്തുക.

ഇഖാമയുള്ളവരുടെ അറൈവല്‍ രജിസ്ട്രേഷന്‍ ഫോമില്‍ പേര്, പാസ്പോര്‍ട്ട് നമ്പര്‍, ജനന തിയ്യതി, ഇഖാമ നമ്പര്‍, നാഷനാലിറ്റി, രജിസ്ട്രേഷന്‍ നമ്പര്‍, രജിസ്ട്രേഷന്‍ ഡേറ്റ് എന്നിവ മാത്രമേ കാണുകയുള്ളൂ. വാക്സിനേഷന്‍ ചെയ്ത മുഴുവന്‍ വിവരങ്ങള്‍ പ്രിന്റ്‌ ഔട്ടില്‍ സാധാരണയായി കാണാന്‍ സാധിക്കില്ല.

എന്നാല്‍ പുതിയ വിസയില്‍ പോകുന്നവരുടെ അറൈവല്‍ രജിസ്ട്രേഷന്‍ ഫോമില്‍ പേര്, പാസ്പോര്‍ട്ട് നമ്പര്‍, ജനന തിയ്യതി, വിസ നമ്പര്‍, നാഷനാലിറ്റി, രജിസ്ട്രേഷന്‍ നമ്പര്‍, രജിസ്ട്രേഷന്‍ ഡേറ്റ്, വാക്സിന്‍ എടുത്ത രാജ്യം, എടുത്ത് വാക്സിന്റെ പേര് എത്ര ഡോസ് എടുത്തു, ആദ്യ ഡോസ് എടുത്ത തിയ്യതി, രണ്ടാമത്തെ ടോസ എടുത്ത തിയ്യതി എന്നെ വിവരങ്ങള്‍ വിശദമായി ഉള്‍പ്പെടുത്തിയിരിക്കും.

നിങ്ങളുടെ അറൈവല്‍ രജിസ്ട്രേഷന്‍ ഫോമില്‍ അത്തരം വിവരങ്ങള്‍ കാണുന്നില്ല എന്നതില്‍ ആശങ്ക വേണ്ട. അറൈവല്‍ രജിസ്ട്രേഷന്‍ ഫോമിന്റെ ഇടത് വശത്ത് കാണുന്ന ക്യൂ.ആര്‍ കോഡ് സ്കാന്‍ ചെയ്തു നോക്കിയാല്‍ അധികൃതര്‍ക്ക് ആവശ്യമായ വിവരങ്ങള്‍ അറിയാന്‍ സാധിക്കും. നിങ്ങള്‍ക്കും വിവരങ്ങള്‍ ഉറപ്പ് വരുത്താന്‍ സാധിക്കും. ക്യൂ.ആര്‍ കോഡ് എങ്ങിനെയാണ് സ്കാന്‍ ചെയ്യാന്‍ സാധിക്കുക എന്നത് മുകളിലെ ചോദ്യത്തിന് ഉത്തരമായി നല്‍കിയിട്ടുണ്ട്.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DlSqnw7eVy9HWYdQHH8ljx

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading
LATEST1 month ago

യു.എ.ഇ യില്‍ 14 ദിവസം താമസിക്കേണ്ട, സൗദിയിലേക്ക് അനധികൃത ചവിട്ടി കയറ്റല്‍

LATEST1 month ago

നാട്ടുകാരന്റെ ജീവനെടുക്കാന്‍ കൂട്ടു നിന്ന ഈ സൗദി മലയാളികള്‍ ശരിക്കും മാപ്പ് അര്‍ഹിക്കുന്നുണ്ടോ?

LATEST1 month ago

സൗദി പ്രവാസികള്‍ ഏറ്റവും അധികം ചോദിച്ച 6 ചോദ്യങ്ങള്‍. നിര്‍ബന്ധമായും അറിഞ്ഞിരിക്കേണ്ടത്.

LATEST1 month ago

രാജകാരുണ്യ കാലാവധി കഴിഞ്ഞാല്‍ സൗദി പ്രവാസികള്‍ക്ക് റീ എന്‍ട്രി പുതുക്കി കിട്ടാന്‍ എന്ത് ചെയ്യണം

LATEST1 month ago

മലയാളിക്ക് സൗദിയിലേക്ക് ബോര്‍ഡിംഗ് പാസ് നിഷേധിച്ചത് ഒറ്റപ്പെട്ട സംഭവം. മറ്റു യാത്രക്കാര്‍ക്ക് ആശങ്ക വേണ്ട.

LATEST1 month ago

തവക്കല്‍ന, ഹെല്‍ത്ത് പാസ്പോര്‍ട്ട് മൂലം ബോര്‍ഡിംഗ് പാസ് ലഭിക്കാതെ സൗദിയിലേക്ക് ഒരു മലയാളിയുടെ കൂടി യാത്ര മുടങ്ങി

LATEST1 month ago

സൗദി പ്രവാസികള്‍ ആവര്‍ത്തിച്ചു ചോദിച്ച ഏറ്റവും പുതിയ 17 ചോദ്യങ്ങള്‍. നാട്ടില്‍ നിന്നും സൗദിയിലേക്ക് തിരിച്ചു വരുന്നവരും സൗദിയില്‍ ഉള്ളവരും അറിഞ്ഞിരിക്കേണ്ടത്

LATEST1 month ago

ജിദ്ദ പ്രവാസിയുടെ കൈ പിടിച്ച് പ്രമുഖ ജീവ കാരുണ്യ പ്രവർത്തക നര്‍ഗീസ് പുതിയ ജീവിതത്തിലേക്ക്

LATEST1 month ago

നാട്ടില്‍ നിന്നും സൗദി യാത്രക്ക് അനുമതി നിഷേധിച്ചെന്ന് പ്രവാസി. പിഴവ് തങ്ങളുടേതല്ലെന്ന് എയര്‍ ഇന്ത്യ

LATEST1 month ago

തവക്കല്‍ന മൂലം കഴിഞ്ഞ ദിവസം ബോര്‍ഡിംഗ് പാസ് നിഷേധിച്ച മലയാളിയെ പുതിയ ടിക്കറ്റ് എടുക്കാതെ യു.എ.ഇ യില്‍ നിന്നും ഇന്ന് സൗദിയില്‍ എത്തിച്ച് എയര്‍ അറേബ്യ

LATEST2 months ago

തവക്കല്‍നയില്‍ വീണ്ടും യു.എ.ഇ യില്‍ നിന്നും സൗദിയിലേക്കുള്ള നാല് മലയാളികളുടെ യാത്ര മുടങ്ങി. 

LATEST2 months ago

ബോര്‍ഡിംഗ് പാസ് നല്‍കാതെ സച്ചിദാനന്ദന്റെ സൗദി യാത്ര മുടക്കിയ ആ മലയാളി സ്റ്റാഫ് ഇത് കേള്‍ക്കുന്നുണ്ടോ?

LATEST2 months ago

സൗദിയിലേക്ക് തിരിച്ചു പോകുന്ന പ്രവാസികള്‍ ഏറ്റവും അധികം ചോദിച്ച 12 സംശയങ്ങള്‍

LATEST2 months ago

സൗദിയിലെ തൊഴില്‍ യോഗ്യതാ പരീക്ഷ മൂലം ഇഖാമ പുതുക്കാന്‍ സാധിക്കാതെ യാത്ര മുടങ്ങുമോ എന്ന് പരിശോധിക്കാനുള്ള നടപടി ക്രമങ്ങള്‍

LATEST2 months ago

സൗദി പ്രവാസികള്‍ ഈ കാര്യം ശ്രദ്ധിച്ചില്ലെങ്കില്‍ സൗദിയിലേക്ക് തിരിച്ചു വരവ് എളുപ്പമാകില്ല.

Trending

error: Content is protected !!