Connect with us

LATEST

സൗദി പ്രവാസികൾ അശ്രദ്ധയും അജ്ഞതയും മൂലം ഉണ്ടാകുന്ന ഈ അപകടം ഒഴിവാക്കൂ

Published

on

സൗദി നിയമത്തെ കുറിച്ചുള്ള അജ്ഞത മൂലം ജയിലിലാവുന്നവരുടെയും നാട് കടത്തപ്പെടുന്ന പ്രവാസികളുടെ എണ്ണം വർദ്ധിച്ചു വരുന്നതായാണ് സമീപകാല സംഭവങ്ങൾ സൂചിപ്പിക്കുന്നത്. അതിൽ പ്രധാനമായ ഒരു കാരണമാണ് ആവശ്യമായ മുൻകരുതലുകൾ എടുക്കാതെ നാട്ടിൽ നിന്നും മരുന്നുകൾ സൗദിയിലേക്ക് കൊണ്ട് വരുന്നത്. പലപ്പോഴും അജ്ഞതയും അശ്രദ്ധയും മൂലം ഇവർക്ക് ബലി കൊടുക്കേണ്ടി വരുന്നത് പ്രവാസ ജീവിതവും സ്വന്തം ജോലിയും ഭാവിയുമാണ്. (ഇതിന്റെ അവസാന ഭാഗത്ത് കൊടുത്തിട്ടുള്ള സൗദിയിലെ നിയമ വിദഗ്ദർ പരാമർശിക്കുന്ന 16 കാര്യങ്ങൾ ശ്രദ്ധിക്കുന്നതിലൂടെ ഈ അപകടം നിങ്ങൾക്ക് ഒഴിവാക്കാനാവും.)

സൗദിയിലേക്ക് നാട്ടിൽ നിന്നും മരുന്നുകൾ കൊണ്ട് വന്നതിന് അഞ്ചു വർഷം ജയിൽ ശിക്ഷ അനുഭവിക്കേണ്ടി വന്നവരിൽ ഒരാളായ അബ്ദുൽ വഹീദ് എന്ന ഹൈദരാബാദ് സ്വദേശി അടുത്തിടെയാണ് സൽമാൻ രാജാവിന്റെ കാരുണ്യം മൂലമുള്ള പൊതുമാപ്പിൽ മോചനം ലഭിച്ച് സാമൂഹിക പ്രവർത്തകനായ ശിഹാബ് കൊട്ടുകാടിന്റെ സഹായത്തോടെ നാട്ടിലെത്തിയത്. സൗദിയിൽ ബാങ്ക് ജീവനക്കാരനായി ജോലി ചെയ്തിരുന്ന വഹീദ് റിയാദ് എയർപോർട്ടിൽ വെച്ചാണ് പിടിയിലായത്. അഞ്ചു വർഷം ജയിൽശിക്ഷ അനുഭവിക്കേണ്ടിയും വന്നു. 

നാട്ടിൽ നിന്നും കൊണ്ട് വരുന്ന മരുന്നുകളിൽ സൗദിയിൽ നിരോധിക്കപ്പെട്ട മരുന്നുകൾ ഉൾപ്പെടുന്നതാണ് നിരവധി പ്രവാസികൾക്ക് ജയിൽ ശിക്ഷ ലഭിക്കുന്നതിന് കാരണമാകുന്നത്. മുഴുവൻ മരുന്നും നിരോധിക്കപ്പെട്ടതാവണം എന്ന് നിർബന്ധമില്ല. കൊണ്ട് വരുന്ന ഏതെങ്കിലും ഒരുമരുന്നിൽ നിരോധിക്കപ്പെട്ട മരുന്നിന്റെ അംശങ്ങൾ അടങ്ങിയാലും ജയിൽ ശിക്ഷയും നാടുകടത്തലും ഉറപ്പാണ്.

അത് കൊണ്ടാണ് സൗദിയിലേക്ക് മരുന്നുകൾ കൊണ്ട് വരുമ്പോഴും പോകുമ്പോഴും വേണ്ടത് അതീവ ശ്രദ്ധ പുലർത്തേണ്ടത് ഏറ്റവും അത്യാവശ്യമാണെന്ന് നിയമ വിദഗ്ദർ മുന്നറിയിപ്പ് നൽകുന്നത്. പിടിക്കപ്പെടുന്ന അവസരത്തിൽ ഈ നിയമം അറിയില്ലായിരുന്നു എന്ന വാദത്തിന് യാതൊരു പ്രസക്തിയുമില്ല. കാരണം മനഃപൂർവ്വം മയക്കു മരുന്ന് കടത്തുന്നവരും മനപൂർവ്വമല്ലാതെ കടത്തുന്നവരും പിടിക്കപ്പെടുന്ന സമയത്ത് ഒരുപോലെ ഉയർത്തുന്ന കാരണമാണിത് എന്നത് കൊണ്ട് ഒരു ഉദ്യോഗസ്ഥനും കോടതിയും ഈ കാരണം മുഖവിലക്ക് എടുക്കാറില്ല. 

അത് കൊണ്ട് തന്നെ ഇത് സംബന്ധിച്ച നിയമം  വ്യക്തമായും കൃത്യമായും അറിഞ്ഞിരിക്കേണ്ടത് സൗദിയിലേക്ക് പോകുകയും വരികയും ചെയ്യുന്ന ഒരു പ്രവാസിയെ സംബന്ധിച്ചിടത്തോളം ഏറ്റവും പ്രധാനമാണ്. ആവശ്യമായ മുൻകരുതലുകൾ എടുത്തില്ലെങ്കിൽ മരുന്നുകൾ സ്വന്തം ആവശ്യത്തിന് കൊണ്ട് വരുന്നവർ മാത്രമല്ല, മറ്റുള്ളവർക്ക് വേണ്ടി നാട്ടിൽനിന്നും കൊണ്ട് വരുന്നവരും പിടിക്കപ്പെടും.

മുകളിൽ പറഞ്ഞ അബ്ദുൽ വഹീദ് മരുന്നുകൾ കൊണ്ട് വന്നത് സ്വന്തം ആവശ്യത്തിനോ ഉപയോഗത്തിനോ ആയിരുന്നില്ല. സുഹൃത്തിന്റെ ഭാര്യക്ക് ഉപയോഗിക്കുന്നതിന് വേണ്ടിയായിരുന്നു ഇയാൾ മരുന്നുകൾ കൊണ്ട് വന്നത്. ഉറക്കം ഇല്ലയ്മക്കും അമിത ഉൽക്കണ്ഠക്കും പരിഹാരമായി ഡോക്ടർമാർ നിർദ്ദേശിച്ച BECALM എന്ന മരുന്ന് ഇയാൾ കൊണ്ട് വന്ന മരുന്നുകളുടെ  കൂട്ടത്തിൽ ഉൾപ്പെട്ടിരുന്നു. അതിൽ അൽപ്രാസോളം എന്ന നിരോധിത മരുന്നിന്റെ അംശങ്ങൾ ഉണ്ടായിരുന്നത് മൂലമാണ് വഹീദ് പിടിയിലായത്. 

പിടിയിലായ വഹീദിനെ അധികൃതർ ചോദ്യം ചെയ്തപ്പോൾ അയാളുടെ സുഹൃത്തായ അബ്ദുൽ മൊയിസ് എന്ന ഹൗസ് ഡ്രൈവറുടെ ആവശ്യപ്രകാരമാണ് മരുന്നുകൾ കൊണ്ട് വന്നതെന്ന് വെളിപ്പെട്ടു. മൊയിസിനെ കസ്റ്റഡിയിൽ എടുത്തപ്പോഴാണ് ഈ മരുന്നുകൾ അയാളുടെ സുഹൃത്തായ ഷൈക്ക് ബദർ എന്ന ഹൈദരാബാദ് സ്വദേശിയുടെ നിർദ്ദേശപ്രകാരമാണ് കൊണ്ട് വരാൻ ആവശ്യപ്പെട്ടതെന്ന് മൊഴി നൽകി. തുടർന്ന് ഷെയ്ക്ക് ബദറിനെ ചോദ്യം ചെയ്തപ്പോൾ അയാളുടെ ഭാര്യ ഹാജറ ബീഗത്തിന് വേണ്ടിയാണ് മരുന്നുകൾ കൊണ്ട് വന്നതെന്ന് തെളിഞ്ഞു. 

പിടിയിലായ ഒരാൾക്ക് പോലും ഈ മരുന്ന് സൗദിയിലേക്ക് കൊണ്ട് വരാൻ പാടില്ലായിരുന്നു എന്ന നിയമ വശം അറിയുമായിരുന്നില്ല. പക്ഷെ ഈ വാദം കോടതി കണക്കിലെടുത്തില്ല. അന്വേഷണത്തിൽ ഹാജറ ബീഗം ഇതിന് മുൻപ് ഈ മരുന്നോ ഇതുപോലെയുള്ള മരുന്നുകളോ ഉപയോഗിച്ചിരുന്നില്ലെന്ന് അന്വേഷണത്തിൽ വെളിപ്പെട്ടത് ഇവർക്ക് വിനയായി.

2015 ൽ വിചാരണക്കൊടുവിൽ അബ്ദുൽ വഹീദിന് എട്ടു വർഷം തടവും എണ്ണൂറു ചാട്ടയടിയും ഒരുലക്ഷം റിയാൽ പിഴയൊടുക്കാനും വിധിച്ചു. ഷെയ്ക്ക് ബദറിനും ഭാര്യക്കും അഞ്ചു വർഷം വീതം തടവും 500 ചാട്ടയടിയും മോയിസിന് രണ്ടര വർഷം തടവും മുന്നൂറ് ചാട്ടയടിയും കോടതി ശിക്ഷ വിധിച്ചു.എന്നാൽ അപ്രതീക്ഷിതമായെത്തിയ രാജകാരുണ്യത്തിൽ കാലാവധി തികയും മുൻപേ തന്നെ ഇവർക്ക് മോചനം ലഭിക്കുകയായിരുന്നു.

വ്യക്തിപരമായ ആവശ്യത്തിനായാലും മറ്റുള്ളവർക്ക് വേണ്ടിയായാലും സൗദിയിലേക്ക് മരുന്നുകൾ കൊണ്ട് വരുന്നവർ അപകടങ്ങൾ ഒഴിവാക്കാൻ ആവശ്യമായ മുൻകരുതലുകൾ സ്വീകരിക്കുന്നത് അത്യന്താപേക്ഷിതമാണെന്ന് നിയമ വിദഗ്ദർ മുന്നറിയിപ്പ് നൽകുന്നു. 

സൗദിയിലേക്ക് മരുന്നുകൾ കൊണ്ട് വരുന്നവർ താഴെ പറയുന്ന കാര്യങ്ങളിൽ അതീവ ശ്രദ്ധ പുലർത്തുക: 

1.മരുന്ന് കൊണ്ട് വരുന്നവർ ഈമരുന്നോ മരുന്നിൽ അടങ്ങിയിട്ടുള്ള ഏതെങ്കിലും അംശങ്ങളോ സൗദിയിലോ അന്താരാഷ്ട്രാ തലത്തിലോ നിരോധിക്കപ്പെട്ടതാണോ അല്ലെങ്കിൽ നിയന്ത്രിക്കപ്പെട്ടിട്ടുള്ളതോ (Restricted) എന്ന് അറിഞ്ഞിരിക്കേണ്ടതാണ്.

2.മയക്കു മരുന്നായി കണക്കാക്കുന്ന മരുന്നുകളുടെ അംശങ്ങള്‍ (Narcotic Properties) അടങ്ങിയിട്ടുള്ള മരുന്നുകള്‍ കൊണ്ട് വരുമ്പോൾ കൂടുതൽ ജാഗ്രത പുലർത്തുക. 

3.കൊണ്ടു വന്നിട്ടുള്ള മരുന്നുകള്‍ രോഗിയുടെ പരമാവധി ആറു മാസത്തെ ഉപയോഗത്തിന് ആവശ്യമായ അളവിലുള്ളത് ആയിരിക്കണം. അതില്‍ കൂടുതല്‍ കൊണ്ട് വരാന്‍ പാടില്ല. 

4.പ്രസ്തുത വ്യക്തി ആറു മാസത്തെ കാലാവധിയിലും കുറവാണ് രാജ്യത്ത്‌ താമസിക്കാന്‍ ഉദ്ദേശിച്ചിട്ടുള്ളതെങ്കില്‍ അത്രയും കാലത്തേക്ക് ഉപയോഗിക്കാന്‍ ആവശ്യമായ അളവില്‍ മാത്രമേ മരുന്നുകള്‍ കൊണ്ട് വരുന്നതിന് അനുവാദമുണ്ടായിരിക്കുകയുള്ളൂ. 

5.രോഗിയുടെ ആവശ്യത്തിനുള്ളതില്‍ കൂടുതല്‍ മരുന്നുകള്‍ കൊണ്ട് വരികയാണെങ്കില്‍ അധികമുള്ള മരുന്നുകള്‍ കണ്ടു കെട്ടും.

6.മരുന്ന് കൊണ്ട് വരുന്ന വ്യക്തി രോഗി ആണെങ്കില്‍ ആ വ്യക്തിയുടെ കൈവശം മെഡിക്കൽ റിപ്പോർട്ട് ഉണ്ടായിരിക്കണം. 

7.ഈമെഡിക്കൽ റിപ്പോർട്ട് അയാളെ ചികിത്സിച്ചിരുന്ന ആശുപത്രിയുടെതായിരിക്കണം. റിപ്പോർട്ടിന് ആറു മാസ കാലാവധിയില്‍ കൂടുതല്‍ പഴക്കം ഉണ്ടായിരിക്കരുത്. 

8.ഈ മെഡിക്കൽ റിപ്പോർട്ടിൽ പ്രസ്തുത വ്യക്തിയുടെ വ്യക്തിപരമായ വിവരങ്ങള്‍ രേഖപ്പെടുത്തിയിരിക്കണം. അയാളുടെ രോഗവും മരുന്നുകള്‍ കഴിക്കേണ്ട രീതിയും എത്ര നാള്‍ മരുന്നുകള്‍ കഴിക്കണമെന്നും വ്യക്തമായി രേഖപ്പെടുത്തിയിരിക്കണം. 

9.ഈ മെഡിക്കൽ റിപ്പോർട്ടിൽ മരുന്നിന്റെ ശാസ്ത്രീയ നാമവും ഫാര്‍മസ്യൂട്ടിക്കല്‍ ബ്രാന്‍ഡ്‌ നാമവും മരുന്ന് കഴിക്കേണ്ട അളവുകളും അതില്‍ ഉണ്ടായിരിക്കണം.

10.പ്രസ്തുത ഹോസ്പിറ്റലിലെ അംഗീകാരമുള്ള ഡോക്ടറുടെ പ്രിസ്‌ക്രിപ്‌ഷൻ ഉണ്ടായിരിക്കണം. ആ പ്രിസ്‌ക്രിപ്‌ഷൻ കഴിഞ്ഞ ആറു മാസത്തിനുള്ളില്‍ നല്കിയതായിരിക്കണം. 

11.ഈ പ്രിസ്‌ക്രിപ്‌ഷനിൽ അതില്‍ ഡോക്ടറുടെ രോഗ നിര്‍ണ്ണയവും മരുന്നിന്‍റെ ശാസ്ത്രീയ നാമവും ഫാര്‍മസ്യൂട്ടിക്കല്‍ ബ്രാന്‍ഡ്‌ നാമവും ഉണ്ടായിരിക്കണം. 

12.പ്രിസ്‌ക്രിപ്‌ഷനിൽ മരുന്നിന്‍റെ ഉപയോഗ ക്രമവും ചികില്‍സയുടെ ദൈര്‍ഘ്യവും രേഖപ്പെടുത്തിയിരിക്കണം. 

13.പ്രിസ്‌ക്രിപ്‌ഷനിൽ പ്രസ്തുത വ്യക്തിയ ചികിത്സിച്ചിരുന്ന ആശുപത്രിയുടെ സീല്‍ ഉണ്ടായിരിക്കണം. 

14.മറ്റൊരാള്‍ക്ക് വേണ്ടി മരുന്ന് സൗദിയിലേക്ക് കൊണ്ട് വരുന്നയാള്‍ രോഗിയുടെ മാതാപിതാക്കളോ, മക്കളോ, സഹോദരങ്ങളോ, ഭര്‍ത്താവോ തുടങ്ങിയ ബന്ധുക്കള്‍ ആണെങ്കില്‍ രോഗിയുടെ ഔദ്യോഗിക തിരിച്ചറിയൽ രേഖ പകർപ്പ്‌ കൈവശം കരുതണം. 

15.രോഗിക്ക് വേണ്ടി മരുന്നുകള്‍ കൊണ്ട് വരുന്നത് രോഗിയുടെ പ്രതിനിധി ആണെങ്കില്‍ പ്രസ്തുത മരുന്നുകള്‍ കൊണ്ട് വരുന്നതിന് സമ്മതം അറിയിച്ചു കൊണ്ടുള്ള സത്യവാങ്മൂലം ആവശ്യമാണ്‌. 

16.രാജ്യത്ത്‌ നിന്ന് പുറത്തേക്കു പോകുന്ന രോഗികള്‍ ഇത്തരത്തിലുള്ള മരുന്നുകള്‍ കൂടെ കൊണ്ട് പോകുകയാണെങ്കിലും നിബന്ധനകള്‍ പാലിക്കേണ്ടതുണ്ട്. അവര്‍ ആഭ്യന്തരമായും അന്താരാഷ്ട്രാ തലത്തിലും നിരോധിക്കപ്പെട്ടിട്ടുള്ളതോ നിയന്ത്രിക്കപ്പെട്ടിട്ടുള്ളതോ (Restricted) ആയ മരുന്നുകള്‍ കൊണ്ട് പോകാന്‍ പാടില്ല.

ഇത്തരം രേഖകൾ ഒരു വ്യക്തിയുടെ നിരപരാധിത്വം വെളിവാക്കുന്നതിന് ഹാജരാക്കാവുന്ന രേഖകളായി മാത്രമേ കണക്കാക്കുന്നുള്ളൂ. ഇതിന്റെ ആധികാരികതയെ കുറിച്ചും വിശ്വാസ്യതയെ കുറിച്ചും അവസാന തീരുമാനം ബന്ധപ്പെട്ട സൗദി അധികൃതരുടേതാണ്. ഹാജരാക്കുന്ന രേഖകൾ കൃത്യമാണെങ്കിലും ഏതെങ്കിലും തരത്തിലുള്ള സംശയങ്ങൾ ഉണ്ടായാൽ അത് ദുരീകരിക്കുന്നത് വരെ അന്വേഷണ വിധേയമായി കസ്റ്റഡിയിൽ വെക്കുകയും ചെയ്യാറുണ്ട്.

രേഖകൾ കൃത്യമായിട്ടും വിശ്വാസ്യതയെ കുറിച്ചുള്ള സംശയങ്ങൾ മൂലം ചില പ്രവാസികൾക്ക് ബുദ്ധിമുട്ടുകൾ അനുഭവിക്കേണ്ടി വന്നിട്ടുണ്ട്. വർഷങ്ങൾക്ക് മുൻപ് നാട്ടില്‍ നിന്നും അവധി കഴിഞ്ഞു വരുമ്പോള്‍ സുഹൃത്തിന്റെ ആവശ്യത്തിനായി കൊണ്ടു വന്ന മരുന്നുകളുടെ കൂട്ടത്തില്‍ സൗദിയില്‍ നിരോധിച്ച മരുന്നുകള്‍ ഉള്‍പ്പെട്ടതിനാല്‍ സൗദിയിലെ യാമ്പു എയര്‍പോര്‍ട്ടില്‍ നിന്ന് ഒരു മലയാളി പിടിയിലായിരുന്നു. കോഴിക്കോട്‌ പാലിശ്ശേരി സ്വദേശി ഷംസുവായിരുന്നു പിടിയിലായത്. യാമ്പുവിൽ തന്നെ ജോലി ചെയ്യുന്ന കോഴിക്കോട് സ്വദേശി സിദ്ദിഖിന് വേണ്ടിയായിരുന്നു ഷംസു മരുന്നുകൾ കൊണ്ടുവന്നത്.

ഷംസുവിന്റെ പക്കൽ നാട്ടില്‍ നിന്നും ഡോക്ടര്‍മാര്‍ നിര്‍ദ്ദേശിച്ച പ്രകാരമുള്ള മരുന്നുകളായിരുന്നു ഉണ്ടായിരുന്നത്. ഈ മരുന്നുകള്‍ക്ക് കോഴിക്കോട് മാലാപറമ്പിലെ ഇക്ര ഇന്റര്‍നാഷണല്‍ ആശുപത്രിയിലെ ഇ എന്‍ ടി സര്‍ജന്‍ ഡോക്ടര്‍ സഞ്ജയ്‌ രാഘവന്‍ നൽകിയ പ്രിസ്‌ക്രിപ്‌ഷനും ഉണ്ടായിരുന്നു. എന്നിട്ടും എയർപോർട്ട് അധികൃതർ ഷംസുവിനെ പിടികൂടി നാർക്കോട്ടിക് വിഭാഗത്തിന് കൈമാറുകയായിരുന്നു. 

സൗദിയില്‍ നിരോധിച്ച മരുന്നുകളുടെ അംശങ്ങള്‍ കൂട്ടത്തിലുള്ള നെക്സിറ്റോ പ്ലസ് (Escitalopram with Lonazep Combination) എന്ന ഒരു മരുന്നില്‍ കണ്ടെത്തിയാതായിരുന്നു ഷംസുവിന് വിനയായത്. പിന്നീട് ഷംസു നിരപരാധിയെന്ന് ബോധ്യപ്പെട്ടതോടെ അധികൃതർ സിദ്ദിഖിനോട് കീഴടങ്ങാൻ ആവശ്യപ്പെടുകയും സിദ്ദിഖ് അധികൃതർക്ക് മുൻപിൽ കീഴടങ്ങിയതോടെ ഷംസുവിനെ മോചിപ്പിക്കുകയായിരുന്നു. 

ഈ മരുന്ന് ഇന്ത്യയില്‍ നിരോധിച്ചിട്ടുള്ളതായിരുന്നില്ല. അനേകം വർഷങ്ങളായി ഈ മരുന്ന് ഉപയോഗിച്ചു വരുന്ന സിദ്ദിഖ് മുൻപ് പലതവണ ഇത് നാട്ടിൽ നിന്നും കൊണ്ട് വന്നിരുന്നു. പക്ഷെ ഈ മരുന്ന് കൂടിയ ഡോസിൽ ഉപയോഗിച്ചാൽ ഒരു മയക്കം ഉണ്ടാകും എന്നതിനാൽ ഇത് ദുരുപയോഗം ചെയ്യപ്പെട്ടിരുന്നതിനാൽ ഇത് അധികൃതരുടെ ഹിറ്റ് ലിസ്റ്റിൽ ഉൾപ്പെട്ടിരുന്നു. മരുന്നിന്റെ ഈ പ്രത്യേകത സിദ്ദിഖിന് പ്രതികൂലമായി. 

ജന്മനാ സംസാരിക്കുന്ന സമയത്ത് ചെറിയ തോതിൽ വിക്ക് അനുഭവപ്പെട്ടിരുന്ന സിദ്ദിഖിന് പരിഭ്രമവും ഭയവും മൂലം തന്റെ നിരപരാധിത്വം അധികൃതരുടെ മുൻപിൽ വേണ്ടവിധം വെളിപ്പെടുത്താൻ സാധിക്കാതെ പോയിരുന്നു. പിന്നീട് യാമ്പുവിലെ സാമൂഹിക പ്രവർത്തകർ ഡോക്റുടെ കുറിപ്പ് അറബിയിലേക്ക് പരിഭാഷപ്പെടുത്തി നാര്‍കോട്ടിക് വിഭാഗത്തില്‍ നൽകിയെങ്കിലും ഫലമുണ്ടായില്ല. 

അന്വേഷണത്തിന് ഒടുവിൽ മരുന്നിന്റെ പരിശോധനാ ഫലവും എതിരായതോടെ സിദ്ദിഖിനെ നാട് കടത്താൻ വിധിക്കുകയായിരുന്നു. പക്ഷെ സാധാരണ ഈ കേസുകളിൽ ലഭിക്കുമായിരുന്ന തടവ് ശിക്ഷയോ ചാട്ടയടിയോ ലഭിക്കുന്നതിൽ നിന്നും സിദ്ദിഖിനെ ഒഴിവാക്കി. 

ഏതാണ്ട് ഇതേ സമയത്ത് തന്നെ സാദിഖ് പാഷ എന്ന തമിഴ്‌നാട് സ്വദേശിയും യാമ്പുവിൽ പിടിയിലായിരുന്നു. ഇയാൾ കൊണ്ട് വന്നത് T.Anximil 0.5 എന്ന മരുന്നായിരുന്നു. പ്രമേഹം, രക്ത സമ്മര്‍ദ്ദം അമിതമായ ഉല്‍ക്കണ്ഠ എന്നിവക്ക് കുറെ വര്‍ഷങ്ങളായി ഈ മരുന്ന് സ്ഥിരമായി കഴിക്കുന്ന വ്യക്തിയായിരുന്നു പാഷ. അവധി കഴിഞ്ഞു വരുമ്പോള്‍ നാട്ടില്‍ നിന്നും കൊണ്ട് വന്നപ്പോഴായിരുന്നു പിടിയിലായത്. 

സിദ്ദിഖിന്റെ കേസിനോട് സമാനമായത് പോലെ തന്നെ ഈ മരുന്നും ഇന്ത്യയിൽ നിരോധിച്ചത് ആയിരുന്നില്ല. പക്ഷെ ഏറ്റവും മുകളിൽ പരാമർശിച്ച അബ്ദുൽ വഹീദിന്റെ കേസിന് സമാനമായി ഈ മരുന്നില്‍ Alprazolam എന്ന മരുന്നിന്‍റെ അംശം ഉണ്ടായിരുന്നു. 

മേൽ പറഞ്ഞിട്ടുള്ളവ ചില ഉദാഹരണങ്ങൾ മാത്രമാണ്. ഇതുപോലെ നിരവധി പ്രവാസികൾ അശ്രദ്ധയോ അജ്ഞതയോ മൂലം ജയിലിലാകുകയോ തടവ് ശിക്ഷയും പിഴയും നാടുകടത്തലും അനുഭവിക്കേണ്ടി വന്നിട്ടുണ്ട്. ഇപ്പോഴും നിരവധി പേർ ഇക്കാരണങ്ങളാൽ പിടിക്കപ്പെടുന്നുണ്ട്. അതിനാൽ സൗദി പ്രവാസികൾ ഇക്കാര്യങ്ങളിൽ അതീവ ശ്രദ്ധ പുലർത്തേണ്ടത് ആവശ്യമാണെന്ന് നിയമ വിദഗ്ദർ മുന്നറിയിപ്പ് നൽകുന്നു.

LATEST

ദുബായ് വഴി സൗദിയിൽ എത്തുന്നവർ കുടുങ്ങാതിരിക്കാൻ അറിഞ്ഞിരിക്കേണ്ട 26 നിബന്ധനകൾ

Published

on

ഇന്ത്യ അന്താരാഷ്ട്ര വിമാന സര്‍വീസുകള്‍ പുനരാരംഭിക്കാത്തതിനാലും സൗദി എയർലൈൻസ് ഇന്ത്യയിലേക്ക് ഇപ്പോൾ സർവീസുകൾ നടത്തതിനാലും ഇന്ത്യയിൽ നിന്നും സൗദിയിലെത്താൻ ദുബായ് വഴിയുള്ള യാത്ര തിരഞ്ഞെടുക്കുന്ന പ്രവാസികൾ അനവധിയാണ്.

എന്നാൽ ദുബായ് വഴിയുള്ള യാത്രക്ക് ആവശ്യമായ നടപടിക്രമങ്ങൾ അറിയാത്തതിനാലും പാലിക്കാത്തതിനാലും അനേകം പേർ വിമാനത്താവളത്തിൽ കുടുങ്ങി പോകുന്ന അവസ്ഥ സമീപ ദിവസങ്ങളിൽ ഉണ്ടായി. ഇതില്‍ ചിലര്‍ മണിക്കൂറുകൾ നീണ്ട കാത്തിരിപ്പിന് ശേഷം നടപടിക്രമങ്ങൾ പൂർത്തിയാക്കി വിമാനത്താവളത്തിൽ നിന്നും പുറത്തിറങ്ങിയെങ്കിലും പലർക്കും ദുബായ് വിമാനത്തവാളത്തില്‍നിന്നു തന്നെ നാട്ടിലേക്കു മടങ്ങേണ്ട അവസ്ഥയും ഉണ്ടായി.

ഇപ്പോഴത്തെ നിർബന്ധിത സാഹചര്യത്തിൽ പ്രവാസികളിൽ നിന്നും എങ്ങിനെയെങ്കിലും പണമുണ്ടാക്കാൻ തുനിഞ്ഞ പല ഏജന്റുമാരും ഈ നടപടിക്രമങ്ങളുടെ വിശദശാംശങ്ങൾ യാത്രക്കാരെ ശരിയാംവണ്ണം ധരിപ്പിക്കാത്തതായിരുന്നു ഈ പ്രശ്നങ്ങൾക്ക് കാരണം. അതിനാൽ ദുബായ് വഴി സൗദിയിൽ എത്തിച്ചേരാൻ ആഗ്രഹിക്കുന്ന ഓരോ പ്രവാസിയും ദുബായിലെ മാറികൊണ്ടിരിക്കുന്ന നടപടിക്രമങ്ങൾ സൂക്ഷ്‌മമായി നിരീക്ഷിച്ചു കൊണ്ടിരിക്കുകയും ഇനി പറയുന്ന കാര്യങ്ങളിൽ ഏറ്റവും ശ്രദ്ധ പതിപ്പിക്കുകയും ചെയ്യേണ്ടത് സുരക്ഷിതമായ യാത്രക്ക് അത്യന്താപേക്ഷിതമാണ്.

ദുബായ് വഴി സൗദി അറേബ്യയില്‍ എത്തിപ്പെടാന്‍  ആഗ്രഹിക്കുന്നവര്‍ താഴെ പറയുന്ന കാര്യങ്ങൾ ഉണ്ട് എന്ന് ഉറപ്പ് വരുത്തുക:

1.ദുബായ് വിസിറ്റ് വിസ
2.ടിക്കറ്റ്
3.റിട്ടേണ്‍ ടിക്കറ്റ്
4.ഒരു മാസത്തെ ഇന്‍ഷുറന്‍സ്
5.കോവിഡ് പി.സി.ആര്‍ ടെസ്റ്റ് നെഗറ്റിവ് റിസൾട്ട്
6.റോമിങ് ഉള്ള മൊബൈൽ
7.താമസിക്കാനുള്ള സൗകര്യം
8.ഭക്ഷണത്തിനുള്ള സൗകര്യം
9.നിർബന്ധമായും കൈവശം കരുതേണ്ട 2000 ദിര്‍ഹം ( റിട്ടേണ്‍ ടിക്കറ്റും രണ്ടായിരം ദിര്‍ഹവും നിർബന്ധമാണ്. ഇത് കൈവശം ഇല്ലാത്തവരാണ് സമീപ ദിവസങ്ങളിൽ വിമാനത്താവളത്തില്‍ കുടങ്ങിയത്)
10.ദുബായിൽ താമസത്തിന് ശേഷം പരിശോധന ഫലം പോസറ്റിവ് ആയാൽ 72 മണിക്കൂറിനകം സൗദിയില്‍ എത്താനാവും വിധത്തില്‍ വിമാന ടിക്കറ്റും തയ്യാറാക്കണം.

ദുബായിൽ താമസിക്കുന്ന സമയത്ത് ശ്രദ്ധിക്കേണ്ട കാര്യങ്ങൾ:

1.കേരളത്തില്‍നിന്ന് പുറപ്പെടുന്നതിനു മുന്‍പ് തന്നെ കോവിഡ് പി.സി.ആര്‍ ടെസ്റ്റ് നടത്തി റിസൾട്ട് സമ്പാദിക്കണം.

2.നെഗറ്റീവ് ആണെങ്കില്‍ 92 മണിക്കൂറിനുള്ളിൽ ദുബായില്‍ നിർബന്ധമായും എത്തിയിരിക്കണം.

3.ദുബായില്‍ എത്തിയാൽ കൈവശമുള്ള റോമിംഗ് മൊബൈല്‍ നമ്പർ വിമാനത്താവള അധികൃതര്‍ക്കു നൽകുക.( ഈ ഫോണ്‍ നമ്പറിലായിരിക്കും പരിശോധന ഫലം നിങ്ങളെ അറിയിക്കുക)

4.അവിടെ കോവിഡ് ടെസ്റ്റിന് വിധേയമാവുക.

5.പരിശോധന ഫലം ലഭിക്കുന്നതു വരെ പരമാവധി രണ്ടു ദിവസം ക്വാറന്റൈനില്‍ കഴിയുക.

6.തുടർന്ന് 14 ദിവസം ദുബായില്‍ താമസിക്കണം. (ഹോട്ടലുകൾ, ബന്ധുക്കളുടെയോ, സുഹൃത്തുക്കളുടെയോ താമസ സ്ഥലം എന്നിങ്ങനെ നിങ്ങളുടെ ഇഷ്ടാനുസരണം താമസ സ്ഥലം തെരഞ്ഞെടുക്കാം).

7.ദുബായില്‍ താമസിക്കാന്‍ സൗകര്യം ഇല്ലാത്തവർക്ക് ഹോട്ടൽ മുറികളിൽ തങ്ങണമെങ്കിൽ കുറഞ്ഞത് ഒരു ലക്ഷം രൂപയെങ്കിലും വേണ്ടിവരും. ഇതിനുള്ള സൗകര്യവും കണ്ടു വെക്കുക.

8.ദുബായിൽ താമസിക്കുന്ന സമയത്ത് മറ്റുള്ളവരുമായി അധികം ഇടപഴകാൻ തുനിയരുത്. കാരണം സമ്പർക്കം മൂലം പിന്നീടുള്ള കോവിഡ് പരിശോധന ഫലം പോസറ്റിവ് ആയാൽ അനേകം ബുദ്ധിമുട്ടുകൾ നിങ്ങൾക്ക് ഉണ്ടാക്കും.

9.അതിന് ശേഷം ദുബായില്‍നിന്ന് വീണ്ടും കോവിഡ് പി.സി.ആര്‍ ടെസ്റ്റ് നടത്തണം.

10.പരിശോധന ഫലം നെഗറ്റീവ് ആണെങ്കിൽ റിസൾട്ട് സഹിതം 72 മണിക്കൂറിനകം സൗദിയിൽ എത്തണം.

11.കോവിഡ് ടെസ്റ്റ് പോസിറ്റീവ് ആയാല്‍ തുടർന്നും ചിലവുകൾ ഉണ്ടാകും. ഇതിനായുള്ള പണത്തിനുള്ള സൗകര്യവും മുൻകൂട്ടി കണ്ടു വെക്കണം.

ദുബായിൽ നിന്നും സൗദി യാത്രയിൽ ശ്രദ്ധിക്കേണ്ട കാര്യങ്ങൾ:

1.സൗദി വിമാനത്താവളത്തിൽ നല്‍കേണ്ട ഫോം പൂരിപ്പിച്ച് കൈവശം വെക്കുക.

2.വിമാനത്താവളത്തിൽ ഇറങ്ങിയാൽ പൂരിപ്പിച്ച ഫോമും കോവിഡ് ടെസ്റ്റ് ഫലവും വിമാനത്താവളത്തില്‍ നല്‍കുക.

3.തവക്കല്‍ന, തത്തമന്‍ ആപ് ഡൗണ്‍ലോഡ് ചെയ്യുക. (എമിഗ്രേഷന്‍ നടപടികള്‍ക്കു ശേഷം എട്ടു മണിക്കൂറിനുള്ളിൽ ഈ ആപ്പുകൾ ഡൗണ്‍ലോഡ് ചെയ്യുകയും വിവരങ്ങള്‍ രേഖപ്പെടുത്തുകയും ചെയ്യണം).

4.മൂന്നു ദിവസമെങ്കിലും ക്വാറന്റൈനില്‍ കഴിഞ്ഞ ശേഷം ആപ് വഴി കോവിഡ് ടെസ്റ്റിന് അപേക്ഷിക്കുക.

5.പരിശോധന ഫലം എപ്പോഴും കൈവശം സൂക്ഷിക്കുക.

ഇതൊക്കെയാണ് സാധാരണ നടപടിക്രമങ്ങളും സാധാരണ ഗതിയിൽ ഉണ്ടാകാവുന്ന ചിലവുകളും. എന്നാൽ യാത്രക്കിടയിൽ ഉണ്ടാകുന്ന അപ്രതീക്ഷിത ചിലവുകൾ ഒരുപക്ഷെ നിങ്ങളുടെ ട്രാവൽ ഏജൻസിയോ ഏജന്റോ അറിയിക്കാൻ സാധ്യതയില്ല. ദുബായ് വഴി സൗദിയിൽ എത്തുന്നവർ അപ്രതീക്ഷിത വൈഷമ്യങ്ങൾ ഒഴിവാക്കാനായി ഇക്കാര്യങ്ങൾ കൂടി മനസ്സിൽ കരുതുക.

Continue Reading

LATEST

പ്രവാസിയെ നാട് കടത്താൻ ശ്രമം: ജലീലിനെതിരെ നടപടി സാധിക്കില്ലെന്ന് പ്രവാസി നിയമ വിദഗ്ദർ

Published

on

സോഷ്യൽ മീഡിയയിലൂടെ തന്നെ വ്യക്തിപരമായി അപമാനിച്ച പ്രവാസിയെ യു എ ഇ യിൽ നിന്നും നാട് കടത്താൻ ഇടപെടണം എന്ന് മന്ത്രി കെ ടി ജലീൽ ആവശ്യപ്പെട്ടു എന്ന സ്വർണ്ണക്കടത്ത് കേസിലെ പ്രതി സ്വപ്ന സുരേഷിന്റെ മൊഴിയുടെ അടിസ്ഥാനത്തിൽ മന്ത്രിക്കെതിരെ നിയമനടപടികൾ സ്വീകരിക്കാൻ അന്വേഷണ ഏജൻസികൾക്ക് സാധിക്കില്ലെന്ന് പ്രവാസി നിയമ വിദഗ്ദർ.

മന്ത്രിയെന്ന നിലയിൽ തനിക്ക് അപകീർത്തി വരുത്താൻ ആരെങ്കിലും ശ്രമിച്ചാൽ മന്ത്രിയെന്ന നിലയിൽ ജലീൽ പരാതി നൽകേണ്ടത് പോലീസിലാണ്. പോലീസ് ആ വ്യക്തിയുടെ പേരിൽ എഫ് ആർ രജിസ്റ്റർ ചെയ്ത് നിയമപരമായ വഴിയിലൂടെയാണ് പ്രതിയെ നാട്ടിലെത്തിക്കേണ്ടത്.

അങ്ങനെയല്ലാതെ ജലീലിന് നേരിട്ട് ഇതിൽ ഇടപഴകാൻ സാധിക്കില്ല. വിദേശകാര്യ മന്ത്രാലയമാണ് ഇതിൽ ഇടപെടേണ്ടത്. കുറ്റവാളികളെ കൈമാറാൻ ഇന്ത്യയും യു എ ഇ യും തമ്മിൽ തമ്മിൽ ധാരണയും നിലനിൽക്കുന്നുണ്ട്. വ്യവസ്ഥാപിതമായ നിയമ നടപടികളിലൂടെ മാത്രമേ ഇത് സാധ്യമാകൂ.

ജലീൽ അനധികൃതമായി ഇടപെട്ടു എന്നതിന് മറ്റു തെളിവുകൾ ഒന്നും തന്നെയില്ല. ഇപ്പോഴുള്ളത് വെറുമൊരു ആരോപണം മാത്രമാണ്. ഒരു പ്രതിയുടെ മൊഴിമാത്രമാണ് നിലവിലുള്ളത്. ഒരു മൊഴിയുടെ അസിസ്‌ഥാനത്തിൽ മന്ത്രിക്കെതിരെ നിയമ നടപടി സ്വീകരിക്കാൻ സാധിക്കില്ല. മന്ത്രി രേഖാമൂലം ഒരു പരാതി കോൺസുലേറ്റിനു കൈമാറിയെങ്കിലും മാത്രമേ മന്ത്രിക്കെതിരെ നടപടിയെടുക്കാൻ നിയമത്തിൽ സാധ്യത ഉണ്ടാകുന്നുള്ളൂ.

മന്ത്രിയുടെ പരാതിയുടെ അടിസ്ഥാനത്തിൽ പോലീസ് നടപടികൾ എടുക്കുകയോ അതിന്റെ അടിസ്ഥാനത്തിൽ യു എ ഇ യിൽ പ്രസ്തുത പ്രവാസിയെ നാടുകടത്താനുള്ള പ്രാഥമിക നടപടികൾ ആരംഭിക്കുകയോ ചെയ്തതായി എവിടെയും പറയുന്നില്ല. മന്ത്രി വ്യക്തി പരമായി എന്തെങ്കിലും ചെയ്തതായും തെളിവുകളില്ല. അതുകൊണ്ട് ഇത് ഒരു ആരോപണം മാത്രമായി തന്നെ അവശേഷിക്കുമെന്ന് പ്രവാസി നിയമവിദഗ്ധർ പറയുന്നു.

Continue Reading

LATEST

ജിദ്ദയിൽ തൊഴിലാളികൾക്ക് താമസിക്കാനായി സമ്പൂർണ്ണ ലേബർ സിറ്റി. 17,000 പേർക്ക് താമസ സൗകര്യം ലഭിക്കും

Published

on

വിദേശ തൊഴിലാളികൾക്കുള്ള പാർപ്പിട സൗകര്യങ്ങൾ അടങ്ങിയ ജിദ്ദ നഗരത്തിലെ ആദ്യത്തെ സമ്പൂർണ ലേബർ സിറ്റി നിർമാണത്തിന് കരാർ ഒപ്പു വെച്ചു. കരാറിൽ ലേബർ സിറ്റി നിർമ്മാണ കരാർ ലഭിച്ച നമാരിഖ് അൽഅറേബ്യ സർവീസസ് കമ്പനിയും ജിദ്ദ നഗരസഭ പ്രതിനിധികളും ഒപ്പുവെച്ചു.

അബ്‌റുഖ് അൽരിഗാമ ബലദിയ പരിധിയിൽ രണ്ടര ലക്ഷം ചതുരശ്രമീറ്റർ വിസ്തീർണമുള്ള സ്ഥലത്താണ് വിദേശ തൊഴിലാളികൾക്കു വേണ്ടി പുതിയ ലേബർ സിറ്റി നിർമിക്കുന്നത്. കൊറോണ വൈറസ് വ്യാപനം തടയുന്ന വ്യവസ്ഥകൾക്കും മാനദണ്ഡങ്ങൾക്കും അനുസരിച്ചാണ് നിർമ്മാണം.

17,000 ലേറെ തൊഴിലാളികൾക്ക് താമസസൗകര്യം ലഭിക്കും. പകർച്ചവ്യാധികൾ പ്രത്യക്ഷപ്പെടുമ്പോൾ രോഗബാധിതരെ മാറ്റിപാർപ്പിക്കുന്നതിനുള്ള ഐസൊലേഷൻ കേന്ദ്രങ്ങളും ലേബർ സിറ്റിയിൽ നിർമ്മിക്കും.

ലേബർ സിറ്റിയിൽ സൂപ്പർമാർക്കറ്റും മറ്റു വ്യാപാര സ്ഥാപനങ്ങളും ഉണ്ടാകും. കൂടാതെ മസ്ജിദും വിനോദ കേന്ദ്രങ്ങളും സ്‌പോർട്‌സ് ഗ്രൗണ്ടുകളും കോർട്ടുകളും എ.ടി.എം സൗകര്യങ്ങളും ഉണ്ടാകും. പ്രാഥമിക ശുശ്രൂഷകൾ നൽകുന്നതിനുള്ള ക്ലിനിക്കുകളും ഇവിടെ ഒരുക്കും.

ദിവസേന 75,000 ലേറെ പാക്കറ്റ് ഭക്ഷണങ്ങൾ തയാറാക്കുന്നതിനുള്ള അത്യാധുനിക പാചകപ്പുരയും ഉണ്ടാകും. കൂടാതെ ഇവിടുത്തെ അന്തേവാസികൾക്ക് ഭക്ഷണം കഴിക്കുന്നതിനുള്ള അതിവിശാലമായ ഹാളുകളും ഉണ്ടായിരിക്കും.

സൗരോർജ്ജം ഉപയോഗപ്പെട്ടുത്തുന്നതിലൂടെ ലേബർ സിറ്റിയിലെ മൊത്തം വൈദ്യുതി ഉപഭോഗത്തിന്റെ പതിനഞ്ചു ശതമാനം ലാഭിക്കാൻ സാധിക്കും. കൂടാതെ പരിസ്ഥിതി സംരക്ഷണം മുൻനിറുത്തി കാർബൺ ബഹിർഗമനം കുറഞ്ഞ ജനറേറ്ററുകളും മലിനജല ശുദ്ധീകരണ പ്ലാന്റുകളും സ്ഥാപിക്കും.

Continue Reading
LATEST12 hours ago

ദുബായ് വഴി സൗദിയിൽ എത്തുന്നവർ കുടുങ്ങാതിരിക്കാൻ അറിഞ്ഞിരിക്കേണ്ട 26 നിബന്ധനകൾ

LATEST18 hours ago

പ്രവാസിയെ നാട് കടത്താൻ ശ്രമം: ജലീലിനെതിരെ നടപടി സാധിക്കില്ലെന്ന് പ്രവാസി നിയമ വിദഗ്ദർ

LATEST19 hours ago

ജിദ്ദയിൽ തൊഴിലാളികൾക്ക് താമസിക്കാനായി സമ്പൂർണ്ണ ലേബർ സിറ്റി. 17,000 പേർക്ക് താമസ സൗകര്യം ലഭിക്കും

LATEST2 days ago

യുഎഇ യിൽ നബിദിന അവധി പ്രഖ്യാപിച്ചു

LATEST2 days ago

ഇക്കാര്യം ശ്രദ്ധിച്ചാൽ സൗദിയിലെ ഫാമിലി വിസക്കാർക്ക് വൻ സാമ്പത്തിക ബാധ്യത ഒഴിവാക്കാം

LATEST2 days ago

റീ എൻട്രി വിസ റദ്ദാക്കിയാൽ ഫീസ് തിരികെ ലഭിക്കില്ലെന്ന് സൗദി ജവാസാത്

LATEST2 days ago

ആറാം വയസ്സിൽ ഖുർആൻ മനപ്പാഠമാക്കി വിസ്മയിപ്പിച്ച് സൗദിയിലെ പ്രവാസി ബാലിക

LATEST2 days ago

ഫ്രീവിസ സമ്പ്രദായം സൗദിയിൽ വീണ്ടും തുടരുന്നു, ഹൗസ് ഡ്രൈവർമാർ തുടങ്ങിയവരുടെ രൂപത്തിൽ

LATEST3 days ago

കൈവിരലുകൾ അനക്കി പ്രതീക്ഷ നൽകി 15 വർഷമായി കോമയിലുള്ള സൗദി രാജകുമാരൻ

LATEST3 days ago

സൗദിയിലെ എണ്ണ പൈപ്പ്ലൈനുകളും വ്യാപാര കേന്ദ്രങ്ങളും ആക്രമിക്കാൻ ഐസിസ് ആഹ്വാനം

LATEST3 days ago

സൗദി നാസർ അൽ ഹജ്‌രി കമ്പനിക്കെതിരെ ഗുരുതര ആരോപണങ്ങളുമായി തൊഴിലാളികൾ

LATEST3 days ago

രാജ്യത്ത് കോവിഡിന്റെ രണ്ടാം തരംഗത്തിന് സാധ്യതയെന്ന് സൗദി ആരോഗ്യ മന്ത്രി

LATEST4 days ago

സൗദിയിൽ ഇന്ത്യക്കാരൻ അറസ്റ്റിലായ കേസിൽ നാടകീയ വഴിത്തിരിവ്

LATEST6 days ago

സൗദി പ്രവാസികൾ അശ്രദ്ധയും അജ്ഞതയും മൂലം ഉണ്ടാകുന്ന ഈ അപകടം ഒഴിവാക്കൂ

LATEST2 weeks ago

യുഎഇ യിലേക്ക് നേരിട്ട് തിരിച്ചെത്താതെ ജോലി രാജി വെക്കാൻ സാധിക്കുമോ?

LATEST4 days ago

സൗദിയിൽ ഇന്ത്യക്കാരൻ അറസ്റ്റിലായ കേസിൽ നാടകീയ വഴിത്തിരിവ്

LATEST2 days ago

ഇക്കാര്യം ശ്രദ്ധിച്ചാൽ സൗദിയിലെ ഫാമിലി വിസക്കാർക്ക് വൻ സാമ്പത്തിക ബാധ്യത ഒഴിവാക്കാം

LATEST2 weeks ago

സൗദി പ്രവാസികൾ ഇക്കാര്യങ്ങൾ അറിഞ്ഞിരുന്നാൽ ജയിൽ വാസവും നാട് കടത്തലുമെല്ലാം ഒഴിവാക്കാം.

LATEST6 days ago

സൗദി പ്രവാസികൾ അശ്രദ്ധയും അജ്ഞതയും മൂലം ഉണ്ടാകുന്ന ഈ അപകടം ഒഴിവാക്കൂ

LATEST2 weeks ago

എംബസിയെ വിമർശിച്ച കേസിൽ സൗദിയിൽ ജയിലിലായ മലയാളിയെ മോചിപ്പിക്കാൻ കോടതി ഉത്തരവ്

LATEST3 days ago

സൗദി നാസർ അൽ ഹജ്‌രി കമ്പനിക്കെതിരെ ഗുരുതര ആരോപണങ്ങളുമായി തൊഴിലാളികൾ

LATEST2 weeks ago

കുട്ടിയുടെ പിതാവ് മക്ക പോലീസിന്റെ പിടിയിൽ

LATEST2 weeks ago

അറിയുക സൗദിയിലെ പുതിയ അഞ്ചു റിയാൽ കറൻസിയുടെ പ്രത്യേകതകൾ

LATEST3 days ago

കൈവിരലുകൾ അനക്കി പ്രതീക്ഷ നൽകി 15 വർഷമായി കോമയിലുള്ള സൗദി രാജകുമാരൻ

LATEST2 weeks ago

സൗദിയിൽ സ്വദേശിവൽക്കരണം നിർബന്ധമാക്കുന്ന ഐടി പ്രൊഫഷനുകളുടെ വിശദമായ പട്ടിക

LATEST2 weeks ago

സൗദിയിൽ തൊഴിൽ പരിശോധനയിൽ 44 വിദേശികൾ പിടിയിൽ

LATEST2 weeks ago

സൗദിയിൽ ബഖാല നടത്തിപ്പിൽ സ്വദേശികൾക്ക് പ്രാവീണ്യം ലഭിക്കാൻ വേറിട്ട പദ്ധതിയുമായി മന്ത്രാലയം

LATEST2 weeks ago

സംഭവത്തിൽ ദുരൂഹതയെന്ന ആരോപണവുമായി ഭർത്താവ്

LATEST12 hours ago

ദുബായ് വഴി സൗദിയിൽ എത്തുന്നവർ കുടുങ്ങാതിരിക്കാൻ അറിഞ്ഞിരിക്കേണ്ട 26 നിബന്ധനകൾ

LATEST2 days ago

ഫ്രീവിസ സമ്പ്രദായം സൗദിയിൽ വീണ്ടും തുടരുന്നു, ഹൗസ് ഡ്രൈവർമാർ തുടങ്ങിയവരുടെ രൂപത്തിൽ

Trending

error: Content is protected !!