ജിദ്ദ – നിർമ്മാണ സംബന്ധമായ ജോലികൾ മൂലം നഗരത്തിൽ ഒമ്പതു ഡിസ്ട്രിക്ടുകളിൽ ജലവിതരണം താൽക്കാലികമായി നിർത്തിവെക്കുമെന്ന് ദേശീയ ജല കമ്പനി അറിയിച്ചു. ഈ ദിവസങ്ങളിൽ വെള്ളം ആവശ്യമുള്ളവർ ടാങ്കർ ലോറികളെ ആശ്രയിക്കണമെന്നും ദേശീയ ജല കമ്പനി ആവശ്യപ്പെട്ടു.

അൽറൗദ, അൽസലാമ, അൽനഈം, അൽസഹ്‌റാ, അൽനഹ്ദ, അൽഖാലിദിയ, ബവാദി, മുഹമ്മദിയ, ഫൈസലിയ എന്നീ ഒൻപത് ഡിസ്ട്രിക്ടുകളിലാണ് പൈപ്പ് ലൈൻ മുഖേനയുള്ള ജല വിതരണം നിർത്തിവെക്കുക. നാളെ മുതൽ അഞ്ചു ദിവസത്തേക്കാണ് ജല വിതരണം നിർത്തിവെക്കുന്നത്.

കിംഗ് ഫഹദ് (സിത്തീൻ) റോഡും ശാരി സ്ട്രീറ്റും കൂട്ടിമുട്ടുന്ന ഇന്റർസെക്ഷനിലെ മേൽപാലത്തിന്റെ നിർമാണ ജോലികൾ പൂർത്തീകരിക്കുന്നതിന്റെ ഭാഗമായാണ് പൈപ്പ് ലൈനിൽ ജോലികൾ ആവശ്യമായി വന്നത്.

ഇതിന്റെ ജോലികൾ പൂർത്തീകരിക്കുന്നതിനായി 1,200 മില്ലിമീറ്റർ വ്യാസമുള്ള ജല പൈപ്പ്‌ലൈൻ മാറ്റി സ്ഥാപിക്കേണ്ടതുണ്ട്. അതിന്റെ ജോലികൾക്കായാണ് ജലവിതരണം താൽക്കാലികമായി നിർത്തി വെക്കേണ്ടി വരുന്നത്.

സൗദിയിലെ ജോലി നഷ്ടപ്പെട്ട് നാട്ടിൽ തിരിച്ചെത്തിയ യുവാവ് പിടിച്ചുപറി കേസിൽ അറസ്റ്റിലായി. സൗത്ത് ഡൽഹിയിലെ ജാമിയ നഗറിലെ അബുൽ ഫാസിലിലെ പച്ചക്കറി കടയുടമയുടെ മൊബൈൽ ഫോൺ തട്ടിപ്പറിച്ചു കടന്നു കളഞ്ഞ ഷഹീൻ ബാഗ് സ്വദേശി സൽമാനാണ് (32) പിടിയിലായത്. 

സൗദി അറേബ്യയിലെ ജിദ്ദയിൽ ആറു വർഷം ടാക്സി ഡ്രൈവറായി ജോലിയെടുത്തിരുന്ന സൽമാൻ കോവിഡ് പ്രതിസന്ധിയെ തുടർന്ന് ജോലി നഷ്ടപ്പെട്ട് നാട്ടിൽ തിരിച്ചെത്തുകയായിരുന്നു. 

അതിന് ശേഷം ഒരു ഗ്രാമീണ സേവ എന്ന പ്രാദേശിക സംഘടനയുടെ ഡ്രൈവറായി ജോലി നോക്കിയെങ്കിലും പിന്നീട് ആ ജോലിയും നഷ്ടപ്പെടുകയായിരുന്നു. തുടർന്നാണ് നിത്യ ചെലവുകൾക്ക്  പണം കണ്ടെത്താനായി മൊബൈൽ തട്ടിപ്പറിച്ചതെന്നും ഡെപ്യൂട്ടി പോലീസ് കമ്മീഷണർ ആർ.പി മീണ പറഞ്ഞു.

അബുൽ ഫാസിലിലെ പച്ചക്കറി ഉടമയായ ഇഹ്‌താശാമിന്റെ പരാതിയെ തുടർന്നായിരുന്നു അറസ്റ്റ്. നവംബർ അഞ്ചിന് അജ്ഞാതനായ യുവാവ് കടയിലെത്തി മൊബൈൽ തട്ടിപ്പറച്ചു കടന്നു കളഞ്ഞതായി ഇയാൾ പോലീസിൽ പരാതിപ്പെട്ടിരുന്നു. തുടർന്ന് സമീപത്തെ സിസിടിവി ദൃശ്യങ്ങൾ പരിശോധിച്ച പോലീസ് പ്രദേശ വാസികളുടെ സഹായത്തോടെ സൽമാനാണ് കൃത്യം നടത്തിയതെന്ന് തിരിച്ചറിഞ്ഞു പിടികൂടുകയായിരുന്നു.

തട്ടിപ്പറിച്ച മൊബൈൽ ഫോൺ സഹിതം കാളിന്ദി കുഞ്ചിൽ നിന്നാണ് സൽമാനെ പോലീസ് പിടികൂടിയത്. വിശദമായ അന്വേഷണത്തിൽ സൽമാൻ ഇതിന് മുൻപ് മറ്റൊരു കുറ്റകൃത്യത്തിലും ഏർപ്പെട്ടിട്ടില്ലെന്ന് വ്യക്തമായതായും കമ്മീഷണർ ആർ.പി മീണ പറഞ്ഞു.

Q

റിയാദ്: കോവിഡ് പശ്ചാത്തലത്തിൽ നിർത്തി വെച്ചിരുന്ന പരിശോധനകൾ അധികൃതർ പുനരാരംഭിച്ചതോടെ നിരവധി താമസ, തൊഴിൽ നിയമ ലംഘകർ പിടിയിലാവുന്നു. റിയാദിന്റെ വിവിധ ഭാഗങ്ങളിൽ പോലീസും ബന്ധപ്പെട്ട വകുപ്പുകളും ചേർന്നാണ് നിയമ ലംഘകരെ പിടികൂടുന്നത്.

വിമാന സർവീസുകൾ ഭാഗികമായി പുനരാരംഭിച്ചതോടെയാണ് അധികൃതർ പരിശോധനകൾ ശക്തമാക്കിയത്. മലയാളികൾ അടക്കം അനേകം ഇന്ത്യക്കാർ പിടിയിലായിട്ടുണ്ട്. പിടിക്കപ്പെട്ട് നാട്ടിലേക്ക് കയറ്റി വിടാനായി തർഹീലിൽ എത്തിച്ച മറ്റു രാജ്യക്കാരുടെ കൃത്യമായ വിവരങ്ങൾ ലഭ്യമല്ല. എന്നാൽ മുന്നൂറിലധികം ഇന്ത്യക്കാർ ഇത്തരത്തിൽ പിടിക്കപ്പെട്ട് തർഹീലിൽ ഉണ്ടെന്നാണ് അധികൃതർ വ്യക്തമാക്കുന്നത്.

താമസ നിയമങ്ങൾ ലംഘിച്ച് രാജ്യത്ത് താങ്ങുന്നവരെയാണ് പ്രധാനമായും പിടികൂടുന്നത്. പ്രാഥമിക പരിശോധനയിൽ ഇഖാമയില്ലെന്ന് കണ്ടാൽ ഉടനെ തർഹീലിലേക്ക് മാറ്റുന്നു. കൂടാതെ സ്വദേശിവൽക്കരണം നടത്തിയ തസ്തികകളിൽ ജോലി ചെയ്യുന്ന വിദേശികളെയും പിടികൂടി തർഹീലിലേക്ക് മാറ്റുന്നുണ്ട്.

പരിശോധനയിൽ പിടിക്കപ്പെട്ടാൽ ഉടനെ വിരലടയാളം എടുത്ത ശേഷം തർഹീലിലേക്ക് കൊണ്ട് പോകുകയാണ് ചെയ്യുന്നത്. നടപടിക്രമങ്ങൾ പൂർത്തിയാകുന്നതോടെ ഇവരെ നാട്ടിലേക്ക് കയറ്റി വിടുകയാണ് ചെയ്യുന്നത്.

പരിശോധനയിൽ പിടിയിലായി തർഹീലിൽ കഴിഞ്ഞിരുന്ന 393 പേരെ കഴിഞ്ഞ ദിവസം നാട്ടിലെത്തിച്ചിരുന്നു. റിയാദിൽ നിന്നും സൗദി എയർലൈൻസ് വിമാനത്തിൽ ഡെൽഹിയിലേക്കാണ് ഇവരെ എത്തിച്ചത്. ഇനിയും മുന്നൂറിലധികം ഇന്ത്യക്കാർ കൂടി തർഹീലിൽ ഉണ്ടെന്നാണ് ഇന്ത്യൻ എംബസി വൃത്തങ്ങൾ വ്യക്തമാക്കുന്നത്.