Connect with us

LATEST

സൗദിയിലെ സാധാരണക്കാരായ പ്രവാസികള്‍ക്ക് നേരിടേണ്ടി വരുന്ന പൊതുവായ 16 നിയമ ലംഘനങ്ങള്‍

Published

on

സൗദിയില്‍ സ്പോണ്‍സര്‍ നന്നായാല്‍ പ്രവാസ ജീവിതം പകുതി രക്ഷപ്പെട്ടു എന്ന് പ്രവാസികള്‍ സാധാരണമായി പറയുന്ന ഒരു പ്രയോഗമാണ്. ഇത് വ്യക്തികള്‍ സ്പോണ്‍സര്‍ ആയവരെയും ഹൌസ് ഡ്രൈവര്‍മാരും വീട്ടു വേലക്കാരികളും അടങ്ങുന്ന ഗാര്‍ഹിക തൊഴിലാളികളെ സംബന്ധിച്ചിടത്തോളം അക്ഷരാര്‍ത്ഥത്തില്‍ ശരിയാണ്. വ്യക്തികളുടെ സ്പോണ്‍സര്‍ഷിപ്പില്‍ ഉള്ളവര്‍ പലപ്പോഴും തങ്ങള്‍ക്ക് നേരെ ഉണ്ടാകുന്ന തൊഴില്‍ നിയമ ലംഘനങ്ങളെ കുറിച്ച് പരാതിപ്പെടാറില്ല. എന്നാല്‍ സ്ഥാപനങ്ങളിലും കമ്പനികളിലും ജോലി ചെയ്യുന്നവര്‍ പലപ്പോഴും ഇതിനെ കുറിച്ച് മേലുദ്യോഗസ്ഥന്മാര്‍ക്ക് പരാതികള്‍ നല്കാറുണ്ട്.

നിലവിലെ കണക്കുകള്‍ പ്രകാരം ഏതാണ്ട് 15൦ ലധികം രാജ്യങ്ങളില്‍ മലയാളികള്‍ പ്രവാസ ജീവിതം നയിക്കുന്നുണ്ട്. ഗള്‍ഫില്‍ യു.എ.ഇ യിലും സൗദി അറബ്യയിലുമാണ് ഏറ്റവും കൂടുതല്‍ മലയാളികള്‍ ഉള്ളത്. യു.എ.ഇ യില്‍ എട്ടു ലക്ഷത്തില്‍ അധികം മലയാളികളും സൗദി അറേബ്യയില്‍ 4.87 ലക്ഷം മലയാളികളും ജോലിയെടുക്കുട്ടുണ്ട് എന്നാണ് ഏകദേശ കണക്കുകള്‍. 34ലക്ഷം ഇന്ത്യക്കാര്‍ യു.എ.ഇ യിലും 26 ലക്ഷം ഇന്ത്യക്കാര്‍ സൗദി അറേബ്യയിലും ജോലിയെടുക്കുന്നു. (കോവിഡ് പ്രതിസന്ധി മൂലം വിവിധ രാജ്യങ്ങളില്‍ നിന്നും എട്ടു ലക്ഷത്തില്‍ അധികം മലയാളികള്‍ തിര്‍ച്ചെത്തിയിട്ടുണ്ട് എന്നും കണക്കുകള്‍ സൂചിപ്പിക്കുന്നു) സവിശേഷമായ തൊഴില്‍ നൈപുണ്യത്തിന്‍റെ അഭാവം മൂലം അതില്‍ 8൦ശതമാനം പേരും കുറഞ്ഞ ശമ്പളമുള്ള ബ്ലൂ കോളര്‍ ജോലി ചെയ്യുന്നവരാണ്.

സൗദി അറേബ്യയില്‍ ഉന്നത പദവിയും ശമ്പളവും ലഭിക്കുന്ന മലയാളികള്‍ വെറും പത്തു ശതമാനത്തില്‍ താഴെയാണ് എന്നാണ് കണക്കുകള്‍ സൂചിപ്പിക്കുന്നത്. താഴ്ന്ന നിലയിലുള്ള ജോലികള്‍ ചെയ്ത് പ്രവാസ ജീവിതത്തിന്റെ രണ്ടറ്റവും മുട്ടിക്കുന്ന ഇവര്‍ക്ക് പല തരത്തിലുള്ള ബുദ്ധിമുട്ടുകളും നേരിടേണ്ടി വരാറുണ്ട്. പക്ഷെ അവകാശങ്ങളും ആനുകൂല്യങ്ങളും പറഞ്ഞു വാങ്ങുന്നവര്‍ പ്രവാസ സൗദിയില്‍ കുറവാണ്.

നിയമ മേഖലയുടെ പ്രത്യേകത മൂലം തങ്ങള്‍ക്ക് നേരെ സംഭവിക്കുന്ന തൊഴില്‍ നിയമ ലംഘനങ്ങളില്‍ കൂടുതലും റിപ്പോര്‍ട്ട് ചെയ്യപ്പെടുന്നില്ല എന്നതാണ് സത്യം. ചുരുങ്ങിയ ശതമാനം തൊഴിലാളികള്‍ മാത്രമാണ് തൊഴില്‍ നിയമ ലംഘനങ്ങള്‍ ലേബര്‍ ഓഫീസിലേക്കും തൊഴില്‍ കോടതികളിലേക്കും ഏഅത്തിക്കാറുള്ളൂ. മറ്റുള്ളവരെല്ലാം സഹിച്ചും ക്ഷമിച്ചും മുന്നോട്ട് പോകുകയാണ് ചെയ്യുന്നത്.

വേതനം നല്‍കാതിരിക്കുക, ഹുറൂബ് ആക്കുക തുടങ്ങുയ നിയമ ലംഘനങ്ങള്‍ ഏറെ റിപ്പോര്‍ട്ട് ചെയ്യപ്പെടാറുണ്ട് എങ്കിലും മറ്റു പല തരത്തിലുള്ള തൊഴില്‍ നിയമ ലംഘനങ്ങളും കൃത്യമായി റിപ്പോര്‍ട്ട് ചെയ്യപ്പെടുന്നില്ല. സൗദി അറേബ്യയിലെ തൊഴില്‍ നിയമത്തിന്റെ സാങ്കേതികതയിലേക്ക് കടക്കാതെ സൗദി അറേബ്യയില്‍ സാധാരണ വിദേശ തൊഴിലാളികള്‍ തങ്ങളുടെ തൊഴിലുടമകളില്‍ നിന്നും നേരിടേണ്ടി വരുന്ന സാധാരണമായ തൊഴില്‍ നിയമ ലംഘനങ്ങളാണ് താഴെ പറയുന്നത്.

1. തൊഴിലാളിയുടെ ഇഖാമ, ലെവി, ഇന്‍ഷുറന്‍സ് ഫീസുകള്‍ നല്കാതിരിക്കുക

ഓരോ വിദേശ തൊഴിലാളിയുടെയും റിക്രൂട്ട്മെന്റ് ഫീസ്‌, ഇഖാമ ഫീസ്‌, വര്‍ക്ക് പെര്‍മിറ്റ്‌, ഇഖാമയുടെയും വര്‍ക്ക് പെര്‍മിറ്റിന്‍റെയും പുതുക്കാനുള്ള ഫീസ്‌, ഇവ പുതുക്കുന്നതിന് താമസം നേരിട്ടാല്‍ അതിന്മേല്‍ വരുന്ന പിഴകള്‍, ലെവി, ഇന്‍ഷുറന്‍സ് എന്നീ അംഗീകൃത ഫീസുകള്‍ അടക്കേണ്ടത് തൊഴില്‍ നിയമപ്രകാരം തൊഴിലുടമയുടെ കടമയാണ്.

ഭൂരിഭാഗം സ്ഥാപനങ്ങളും കമ്പനികളും ഈ നിബന്ധന പാലിച്ചു പോരുന്നതായി കാണാന്‍ സാധിക്കുന്നുണ്ട്. എന്നാല്‍ വ്യക്തികളായ ചില സ്പോണ്‍സര്‍മാര്‍, ചെറിയ വ്യാപാര സ്ഥാപനങ്ങള്‍ എന്നിവ ബാധ്യത തൊഴിലാളികള്‍ക്ക് മേല്‍ തന്നെ അടിച്ചേല്‍പ്പിക്കുന്നതും കാണാന്‍ സാധിക്കുന്നു. ചിലര്‍ ഇഖാമ, വര്‍ക്ക് പെര്‍മിറ്റ്‌ തുടങ്ങിയവക്കുള്ള പണം അടച്ച ശേഷം പിന്നീട് തൊഴിലാളികളുടെ വേതനത്തില്‍ നിന്നും മാസം തോറും ആ പണം തവണകളായി ഈടാക്കുന്നതും കാണാറുണ്ട്. പലര്‍ക്കും തങ്ങളുടെ ഫീസുകള്‍ അടക്കേണ്ടത് തൊഴിലുടമയാണ് എന്ന കാര്യം അറിയില്ല. അറിയുന്ന പലരും ഇക്കാര്യത്തില്‍ പരാതിയുമായി മുന്നോട്ട് പോകാറുമില്ല.

2. തൊഴില്‍ കരാര്‍ എഴുതാതിരിക്കുക

സൗദി അറബിയെ സംബന്ധിച്ചിടത്തോളം തൊഴില്‍ കരാറാണ് ഒരു തൊഴിലാളിയുടെ ഏറ്റവും പ്രധാനവും പ്രാഥമികവും ആയ രേഖ എന്ന് പറയാം. എല്ലാ വിദേശ തൊഴിലാളികള്‍ക്കും തൊഴില്‍ കരാര്‍ ഉണ്ടായിരിക്കണം എന്നുള്ളത് നിര്‍ബന്ധവുമാണ്. തൊഴില്‍ കരാറിലാണ് തൊഴിലാളിക്ക് ലഭിക്കേണ്ട ശമ്പളം, ആനുകൂല്യങ്ങള്‍, മറ്റു അവകാശങ്ങള്‍ എന്നിവ വ്യക്തമാക്കിയിരിക്കുക.

എന്നാല്‍ താഴെക്കിടയില്‍ ജോലി ചെയ്യുന്ന ഭൂരിഭാഗം തൊഴിലാളികള്‍ക്കും തൊഴില്‍ കരാര്‍ ഉണ്ടായിരിക്കില്ല. വ്യക്തികളുടെ സ്പോണ്‍സര്‍ഷിപ്പില്‍  എത്തുന്നവര്‍ക്കാണ് തൊഴില്‍ കരാര്‍ നല്‍കാത്തത്. പക്ഷെ തൊഴില്‍ കരാര്‍ ഇല്ലെന്ന് കരുതി ആ തൊഴിലാളിക്ക് യാതൊരു ആനുകൂല്യവും ലഭിക്കില്ല എന്ന് ഭയപ്പെടെണ്ടതില്ല. തൊഴില്‍ കരാര്‍ ഇല്ലെങ്കിലും ആ തൊഴിലാളിക്ക് സൗദി തൊഴില്‍ നിയമം അനുശാസിക്കുന്ന മുഴുവന്‍ ആനുകൂല്യങ്ങളും ലഭിക്കും.

ഇതിനെല്ലാം ഒരു മാറ്റം ഉണ്ടാകുന്നതിന് വേണ്ടിയാണ് കഴിഞ്ഞ മാര്‍ച്ചില്‍ നിലവില്‍ വന്ന പുതിയ സ്പോണ്‍സര്‍ഷിപ്പ് നിയമത്തില്‍ തൊഴില്‍ കരാറിന് പരമ പ്രാധാന്യം നല്‍കുന്നത്. ഇത് പ്രകാരം സ്പോണ്‍സറുടെ അനുവാദമില്ലാതെ സ്പോണ്‍സര്‍ഷിപ്പ് മാറുന്നതിനും ഫൈനല്‍ എക്സിറ്റിനും റീ എന്‍ട്രിക്കും എല്ലാം ആധാരമായിരിക്കുക തൊഴില്‍ കരാറാണ്.

3. പ്രൊഫഷന്‍ മാറി ജോലി ചെയ്യാന്‍ നിര്‍ബന്ധിക്കുക

സൗദി അറേബ്യയെ സംബന്ധിച്ചിടത്തോളം ഓരോ തൊഴിലിനും പ്രത്യേക വിസയാണ് തൊഴിലുടമകള്‍ക്ക് അനുവദിച്ചു നല്‍കുന്നത്. പ്രസ്തുത വിസയില്‍ രാജ്യത്തേക്ക് റിക്രൂട്ട് ചെയ്യുന്ന തൊഴിലാളിക്ക് ആ പ്രൊഫഷനില്‍ മാത്രമേ ജോലി ചെയ്യാനുള്ള അനുവാദമുള്ളൂ. അയാളുടെ പ്രൊഫഷന്‍ ഇഖാമയില്‍ രേഖപ്പെടുത്തിയിരിക്കും. ഇഖാമയില്‍ രേഖപ്പെടുത്തിയതല്ലാത്ത മറ്റു ജോലികള്‍ ചെയ്യുന്നത് നിയമ ലംഘനമാണ്.

എന്നാല്‍ ആവശ്യമായ പ്രൊഫഷനില്‍ വിസ ലഭിക്കാത്ത അവസരങ്ങളില്‍ ചില തൊഴിലുടമകള്‍ ലഭ്യമായ വിസകളില്‍ വിദേശത്ത് നിന്നും തൊഴിലാളികളെ റിക്രൂട്ട് ചെയ്തു കൊണ്ട് വന്നു മറ്റു തൊഴിലുകള്‍ ചെയ്യിക്കുന്നുണ്ട്. സൗദിയിലെ ഇപ്പോഴത്തെ ഭീമമായ ലെവിയില്‍ നിന്നും രക്ഷപ്പെടുന്നതിനായി വിദേശികളില്‍ പലരും ഹൌസ് ഡ്രൈവര്‍ വിസയില്‍ എത്തി മറ്റു തൊഴിലുകള്‍ ചെയ്തു വരുന്നുണ്ട്.

ഇത്തരക്കാരെ പിടികൂടുന്നതിനായി മാനവശേഷി സാമൂഹിക വികസന മന്ത്രാലയവും ആഭ്യന്തര മന്ത്രാലയവും തിരച്ചിലുകളും പരിശോധനകളും നടത്താറുണ്ട്. പിടികൂടിയാല്‍ നാടുകടത്തല്‍ കേന്ദ്രമായ തര്‍ഹീലിലൂടെ നാട് കടത്തുകയാണ് ചെയ്യുക.

4. അന്യായമായി ഹുറൂബ് ആക്കുക

ഒരു സൗദി പൗരന്റെയോ സ്ഥാപനത്തിന്റെയോ വിസയില്‍ എത്തിയ തൊഴിലാളിയെ കുറിച്ച് നിശ്ചിത ദിവസത്തേക്ക് വിവരമൊന്നും ഇല്ലാതിരിക്കുന്ന അവസരത്തിലാണ് അയാളെ ഒളിച്ചോടിയതായി പ്രഖ്യാപിക്കുന്ന ഹുറൂബ് രജിസ്റ്റര്‍ ചെയ്യാന്‍ അയാളുടെ സ്പോണ്‍സര്‍ക്ക് നിയമം അനുമതി നല്‍കുന്നത്.

ഒരു തൊഴിലാളി സൗദിയിലേക്ക് എതുന്നത് ഒരു സൗദി പൌരന്റെയോ സ്ഥാപനത്തിന്റെയോ സ്പോണ്‍സര്‍ഷിപ്പിലാണ്. അത് കൊണ്ട് തന്നെ ആ വിദേശ തൊഴിലാളിയുടെ ഉത്തരവാദിത്വം സ്പോണ്‍സര്‍ക്കായിരിക്കും. പ്രസ്തുത തൊഴിലാളി സ്പോണ്‍സറില്‍ നിന്നും ഒളിച്ചോടിയാല്‍ അയാളെ ഒളിച്ചോടിയതായി റിപ്പോര്‍ട്ട് ചെയ്യുന്നതോടെ അയാളുടെ മേലുള്ള സ്പോണ്‍സറുടെ ഉത്തരവാദിത്വം അവസാനിക്കുന്നു.

അതോടെ അയാളുടെ അംഗീകൃത താമസക്കാരന്‍ എന്ന പദവി നഷ്ടപ്പെടുകയും നിയമപരമായ യാതൊരു ആനുകൂല്യത്തിനും അര്‍ഹതയില്ലാത്ത നിയമ ലംഘകനായി മാറുകയും ചെയ്യുന്നു. പിന്നീട് രാജ്യം നല്‍കുന്ന ഒരു ആനുകൂല്യത്തിനും അയാള്‍ക്ക്‌ അര്‍ഹത ഉണ്ടായിരിക്കില്ല. പിന്നീട് അയാള്‍ സുരക്ഷാ വകുപ്പുകളുടെ നിരീക്ഷണത്തില്‍ ആയിരിക്കും. അയാളെ പിടികൂടിയാല്‍ നാടുകടത്തല്‍ കേന്ദ്രമായ തര്‍ഹീല്‍ വഴി മാതൃ രാജ്യത്തേക്ക് നാട് കടത്തുകയാണ് ചെയ്യുക.

എന്നാല്‍ നിയമം നല്‍കുന്ന ഈ ആനുകൂല്യം ദുരുപയോഗപ്പെടുത്തുന്ന നിരവധി സ്പോണ്‍സര്‍മാരുണ്ട്. തൊഴിലാളി തന്‍റെ ചൊല്‍പ്പടിക്ക് നില്‍ക്കാതെ വരുന്ന അവസരത്തില്‍ അയാളെ ഭീഷണിപ്പെടുത്തുന്നതിന് ഹുറൂബ് എന്ന ആയുധം പ്രസ്തുത സ്പോണ്‍സര്‍മാര്‍ ഉപയോഗിക്കുന്നു. ഒരു തൊഴിലാളിക്ക് തന്‍റെ തൊഴില്‍ കരാര്‍ അവസാനിച്ചു നാട്ടിലേക്ക് മടങ്ങുന്ന അവസരത്തില്‍ അയാളുടെ സേവനാനന്തര ആനുകൂല്യമായ ഇ.എസ്.ബി നല്‍കാതിരിക്കനായി തൊഴിലാളിയെ ഹുറൂബ് ആക്കുന്ന സ്പോണ്‍സര്‍മാരും ഉണ്ട്. ഇത്തരത്തില്‍ വ്യാജമായ ഒട്ടേറെ ഹുറൂബ് പരാതികളില്‍ അധികൃതര്‍ നടപടികള്‍ എടുത്തത് ഹുറൂബ് റദ്ദാക്കിയിട്ടുണ്ട്.

5. അവധിക്ക് പോകുമ്പോള്‍ ലീവ് സാലറി നല്‍കാതിരിക്കുക

ഓരോ തൊഴിലാളിക്കും ഓരോ വര്‍ഷവും നിയമ പരമായ അവധി അനുവദിക്കേണ്ടത് തൊഴിലുടമയുടെ ഉത്തരവാദിത്വമാണ്. സൗദി തൊഴില്‍ നിയമത്തിലെ വകുപ്പ് 109 പ്രകാരം ഓരോ വര്‍ഷത്തേക്കും 21 ദിവസവും അഞ്ചു വര്‍ഷം പൂര്‍ത്തിയാക്കിയവര്‍ക്ക് ഓരോ വര്‍ഷത്തേക്കും 3൦ ദിവസവുമാണ് അവധി അനുവദിക്കേണ്ടത്. വെക്കേഷനായി നാട്ടിലേക്ക് പോകുവാനായാണ് ഈ അവധി അനുവദിച്ചു നല്‍കേണ്ടത്.

നാട്ടിലേക്ക് പോകുന്ന അവസരത്തില്‍ ഈ അവധിയുടെ വേതനത്തിന് തുല്യമായ തുക തൊഴിലാളിക്ക് ലീവ് സാലറി ആയി നല്‍കണമെന്നും തൊഴില്‍ നിയമം അനുശാസിക്കുന്നുണ്ട്. എന്നാല്‍ പല തൊഴിലാളികള്‍ക്കും ഈ ആനുകൂല്യങ്ങള്‍ ലഭിക്കാറില്ല.

6. ഫൈനല്‍ എക്സിറ്റിന് പകരം റീ എന്‍ട്രി നല്‍കുക

തൊഴില്‍ കരാര്‍ അവസാനിക്കുന്നതോടെ കരാര്‍ പുതുക്കാന്‍ ഉദ്ദേശിക്കുന്നില്ലെങ്കില്‍ വിദേശ തൊഴിലാളിക്ക് ഫൈനല്‍ എക്സിറ്റില്‍ മാതൃ രാജ്യത്തേക്ക് മടങ്ങി പോകാനുള്ള അവകാശമുണ്ട്. ഫൈനല്‍ എക്സിറ്റില്‍ മടങ്ങി പോകുന്ന തൊഴിലാളിക്ക് പുതിയ വിസയില്‍ മറ്റൊരു സ്ഥാപനത്തിലോ സ്പോണ്‍സറുടെ കീഴിലോ ജോലിയെടുക്കാനായി നിയമ പ്രകാരം തന്നെ സൗദിയിലേക്ക് തിരിച്ചു വരാവുന്നതാണ്.

എന്നാല്‍ ഒരു തൊഴിലാളി പിന്നീട് പുതിയ വിസയില്‍ സൗദിയിലേക്ക് മടങ്ങി വരാതിരിക്കാനായി ഫൈനല്‍ എക്സിറ്റിന് പകരമായി റീ എന്‍ട്രി മാത്രം നല്‍കി പറഞ്ഞയക്കുന്ന തൊഴിലുടമകള്‍ ഉണ്ട്. തൊഴിലില്‍ കിട മത്സരം നിലനില്‍ക്കുന്ന മേഖലയിലോ സ്ഥാപനങ്ങള്‍ തമ്മില്‍ തൊഴില്‍പരമായ മത്സരങ്ങള്‍ നടക്കുമ്പോഴോ തന്‍റെ ജോലിക്കാരനായിരുന്ന മിടുക്കനായ തൊഴിലാളി തന്‍റെ എതിരാളി സ്ഥാപനത്തില്‍ പുതിയ വിസയില്‍ തിരച്ചു വരാതിരിക്കാനയാണ് ഇങ്ങിനെ ചെയ്യുന്നത്.

റീ എന്‍ട്രിയില്‍ നാട്ടിലേക്ക് മടങ്ങുന്നവര്‍ക്ക് റീ എന്‍ട്രി കാലാവധിക്കുള്ളില്‍ തിരിച്ചു വന്നില്ലെങ്കില്‍ പിന്നീട് മൂന്ന് വര്‍ഷത്തേക്ക് സൗദിയിലേക്ക് പ്രവേശിക്കുന്നതിന് വിലക്കുണ്ട്. പുതിയ സ്പോണ്‍സര്‍ഷിപ്പ് നിയമത്തില്‍ ആജീവനാന്ത വിലക്കാണ് നിഷ്കര്‍ഷിച്ചിരിക്കുന്നത്. ഈ വിലക്ക് ഉപയോഗപ്പെടുത്തി പ്രസ്തുത തൊഴിലാളിയെ എതിരാളി സ്ഥാപനത്തില്‍ നിന്നും അകറ്റി നിര്‍ത്താനാണ് ചില തൊഴിലുടമകള്‍ ഇത്തരത്തില്‍ പെരുമാറുന്നത്.

ഫൈനല്‍ എക്സിറ്റില്‍ പോകുന്ന തൊഴിലാളിക്ക് സേവനാനന്തര ആനുകൂല്യങ്ങള്‍ നല്കാതിരിക്കാനും ബദല്‍ വിസകള്‍ ലഭ്യമാക്കാനും ചില തൊഴിലുടമകള്‍ ഇത്തരത്തില്‍ പെരുമാറുന്നുണ്ട്.

7. വ്യാജ പരാതികള്‍ നല്‍കുക

ഹുറൂബ് പോലെ തന്നെ അധികാര കേന്ദ്രങ്ങളില്‍ വ്യാജ പരാതികള്‍ നല്‍കുന്ന തൊഴിലുടമകളുടെയും സ്പോണ്‍സര്‍മാരുടെ എണ്ണവും കുറവല്ല. തൊഴിലാളിയുടെ അര്‍ഹതപ്പെട്ട ആനുകൂല്യങ്ങള്‍ നല്കാതിരിക്കാനായും വിരോധം തീര്‍ക്കാനായും മറ്റും മോഷണം നടത്തിയെന്ന പോലെയുള്ള വ്യാജ പരാതികള്‍ നല്‍കിയ നിരവധി സംഭവങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.

8. പിരിയുന്ന സമയത്ത് ഇ.എസ്.ബി നല്‍കാതിരിക്കുക

ഒരു തൊഴിലാളി തൊഴില്‍ കരാര്‍ അവസാനിച്ച ശേഷം നാട്ടിലേക്ക് മടങ്ങുമ്പോള്‍ ജോലി ചെയ്ത വര്‍ഷങ്ങളുടെ അടിസ്ഥാനത്തില്‍ അയാള്‍ക്ക്‌ സേവനാനന്തര ആനുകൂല്യമായ ഇ എസ് ബി തൊഴിലുടമ നല്‍കേണ്ടതുണ്ട്. അഞ്ചു വര്‍ഷം വരെ സര്‍വീസുള്ള തൊഴിലാളിക്ക് ഓരോ വര്‍ഷത്തേക്ക് 15 ദിവസത്തെ വേതനവും അഞ്ചില്‍ കൂടുതല്‍ സര്‍വീസുള്ള തൊഴിലാളിക്ക് ഓരോ വര്‍ഷവും 3൦ ദിവസത്തെ വേതനവുമാണ് ഇ എസ് ബി യായി നല്‍കേണ്ടത്.

എന്നാല്‍ വ്യവസ്ഥാപിതമായ കമ്പനികളിലും സ്ഥാപനങ്ങളിലും ജോലി ചെയ്യുന്ന തൊഴിലാളികള്‍ക്ക് മാത്രമേ ഇത് ലഭിക്കാറുള്ളൂ. ബാക്കല, ബൂഫിയ പോലെയുള്ള മറ്റു ചെറിയ സ്ഥാപനങ്ങളിലും മേഖലകളിലും ജോലി ചെയ്യുന്നവര്‍ക്കും മറ്റും ഇത് പോലുള്ള ആനുകൂല്യങ്ങള്‍ നല്‍കുന്നില്ല എന്ന പരാതികളും വ്യാപകമാണ്. ഇക്കാര്യത്തില്‍ തൊഴിലാളികളുടെ അവകാശത്തിലുള്ള അജ്ഞതയാണ് തൊഴിലുടമകള്‍ ചൂഷണം ചെയ്യുന്നത്. പല ജോലിക്കാര്‍ക്കും ഇ.എസ്.ബി എന്താണെന്ന് പോലും അറിയില്ല എന്നതാണ് ഏറെ ആശ്ചര്യകരം.

9. ഓവര്‍ടൈം നല്‍കാതിരിക്കുക

സൗദി തൊഴില്‍ നിയമ പ്രകാരം ഒരു തൊഴിലാളിയുടെ ഒരു ദിവസത്തെ ജോലി സമയം എട്ടു മണിക്കൂറാണ്. ആഴ്ചയില്‍ 48 മണിക്കൂറില്‍ കൂടുതല്‍ അയാള്‍ ജോലി ചെയ്യേണ്ടതില്ല. (വിശുദ്ധ റമദാന്‍ മാസത്തില്‍ മാത്രമാണ് ഈ നിബന്ധനയില്‍ ഇളവുണ്ടാകുക) ദിവസവും അതില്‍ കൂടുതല്‍ ജോലി ചെയ്യുന്ന തൊഴിലാളിക്ക് അധിക വേതനം ഓവര്‍ടൈം അലവന്‍സായി നല്‍കേണ്ടതുണ്ട്.

എന്നാല്‍ വ്യവസ്ഥാപിതമായ കമ്പനികളും സ്ഥാപനങ്ങളിലും മാത്രമാണ് തൊഴിലാളികള്‍ക്ക് കൃത്യമായി ഓവര്‍ടൈം ലഭിക്കുന്നത്. സൗദിയിലെ വിദേശികളില്‍ ഭൂരിഭാഗവും ജോലിയെടുക്കുന്നത് തൊഴില്‍ സമയം കൃത്യമായി നിര്‍ണ്ണയിക്കാത്ത ബക്കാലകളിലും ബൂഫിയകകളിലും മറ്റു ചെറിയ വ്യാപാര സ്ഥാപനങ്ങളിലും മറ്റുമാണ്. ഇവിടങ്ങളില്‍ ജോലിക്കാര്‍ക്ക് ഓവര്‍ടൈം ലഭിക്കാറില്ല. മാത്രമല്ല 12 മുതല്‍ 14 മണിക്കൂര്‍ വരെ ജോലിയെടുക്കേണ്ടിയും വരുന്നുണ്ട്.

10. അവധി ദിവസങ്ങളിലും ജോലിയെടുപ്പിക്കുക

തൊഴിലാളിയെ കൊണ്ട് ആഴ്ചയില്‍ ആറു ദിവസം മാതമാണ് ജോലിയെടുപ്പിക്കാന്‍ പാടുള്ളൂ എന്ന് തൊഴില്‍ നിയമം അനുശാസിക്കുന്നു. ആഴ്ചയില്‍ ഒരു ദിവസം നിര്‍ബന്ധമായും ശമ്പളത്തോട് കൂടിയ അവധി നല്‍കിയിരിക്കണം. അവധി ദിവസം പ്രസ്തുത തൊഴിലാളി ജോലിയെടുക്കുകയാണെങ്കില്‍ അയാള്‍ക്ക് ആ സമയത്തെ സാധാരണ വേതനത്തിന് പുറമെയായി ഓവര്‍ടൈം വേതനവും അധികമായി നല്‍കണം. എന്നാല്‍ വ്യവസ്ഥാപിതമല്ലാത്ത സ്ഥാപനങ്ങളില്‍ ജോലിയെടുക്കുന്ന വിദേശ തൊഴിലാളികള്‍ക്ക് ആഴ്ചയില്‍ ഏഴു ദിവസവും ജോലിയെടുക്കേണ്ടി വരുന്നു. എന്നാലാകട്ടെ കൂടുതല്‍ സമയം ജോലിയെടുന്നതിനുള്ള ഓവര്‍ടൈം അലവന്‍സ് ലഭിക്കുന്നുമില്ല.

11. ലൈസന്‍സില്ലാതെ വാഹനം ഓടിക്കാന്‍ നിര്‍ബന്ധിക്കുക

കര്‍ശനമായ ടെസ്റ്റുകള്‍ നടത്തിയാണ് സൗദി അറേബ്യയില്‍ ഡ്രൈവിംഗ് ലൈസന്‍സുകള്‍ നല്‍കുന്നത്. ഡ്രൈവിംഗ് ലൈസന്‍സുകള്‍ ലഭിക്കാനായി വിദേശികള്‍ ആരോഗ്യ സര്‍ട്ടിഫിക്കറ്റ് ഹാജരാക്കുകയും പിന്നീട തിയറി, പ്രാക്റ്റിക്കല്‍ ടെസ്റ്റുകള്‍ പാസാകുകയും ചെയ്യണം.

അത് പോലെ തന്നെ ഏതു വിഭാഗം വാഹനം ഓടിക്കുന്നതിനാണോ ലൈസന്‍സ് അനുവദിച്ചിരിക്കുന്നത്, ആ വിഭാഗം വാഹനം ഓടിക്കുവാന്‍ മാത്രമേ അവര്‍ക്ക് അനുവാദമുള്ളൂ. ആവശ്യായ വിഭാഗം തൊഴിലാളികള്‍ ഇല്ലാത്ത ചില സ്പോണ്‍സര്‍മാര്‍ ഹെവി ലൈസന്‍സ് ഇല്ലാത്ത തൊഴിലാളികളെ കൊണ്ടി വലിയ വാഹനങ്ങള്‍ ഓടിക്കുവാന്‍ നിര്‍ബന്ധിക്കുന്നതായി നിരവധി പരാതികള്‍ ഉയരാറുണ്ട്. അത് പോലെ തന്നെ ഹെവി എക്യുപ്മെന്റ്റ് ലൈസന്‍സ് ഇല്ലാത്തവരെ കൊണ്ട് അത്തരം എക്യുപ്മെന്റുകളും പ്രവര്‍ത്തിപ്പിക്കാന്‍ നിര്‍ബന്ധിക്കാറുണ്ട്.

പലപ്പോഴും പ്രവാസികള്‍ സ്പോണ്‍സറുടെ നിര്‍ബന്ധത്തിന് വഴങ്ങി ഇത്തരം നിയമ ലംഘനങ്ങള്‍ ചെയ്യുന്നതായും കാണാറുണ്ട്. എന്ത് പരിശോധയും അപകടങ്ങളും ഉണ്ടെങ്കിലം താന്‍ നോക്കിക്കൊള്ളാമെന്ന സ്പോണ്‍സറുടെ ഉറപ്പിന്മേല്‍ ആയിരിക്കും ഇവര്‍ ഈ സാഹസത്തിനു മുതിരുന്നത്. എന്നാല്‍ പലപ്പോഴും പരിശോധനയില്‍ പിടിക്കപ്പെടുകയോ അപകടങ്ങള്‍ ഉണ്ടാവുകയോ ചെയ്‌താല്‍ ഉത്തരവാദിത്വം ഏറ്റെടുക്കാതെ സ്പോണ്‍സര്‍മാര്‍ കയ്യൊഴിയുന്നതായാണ് കാണാന്‍ സാധിക്കുക. മലയാളികള്‍ അടക്കം നിരവധി പേര്‍ ഇങ്ങിനെ നിയമ കുരുക്കില്‍ ആയിട്ടുണ്ട്.

12. പ്രതിമാസ വേതനം പറ്റി പുറത്ത് തൊഴില്‍ ചെയ്യാന്‍ അനുവാദം നല്‍കുക

ഒരു സ്പോണ്‍സറുടെ വിസയില്‍ രാജ്യത്തെത്തുന്ന തൊഴിലാളികള്‍ ആ സ്പോണ്‍സര്‍ക്ക് കീഴില്‍ മാത്രമേ ജോലി ചെയ്യാന്‍ പാടുള്ളൂ എന്ന് തൊഴില്‍ നിയമത്തില്‍ അടിവരയിട്ട് പറഞ്ഞിട്ടുണ്ട്. തൊഴില്‍ നിയമത്തില്‍ വ്യക്തമാക്കിയിട്ടുള്ള ചില പ്രത്യേക സാഹചര്യങ്ങളില്‍ അല്ലാതെ മറ്റൊരു സാഹചര്യത്തിലും വേറൊരു സ്പോണ്‍സറുടെ കീഴില്‍ ജോലി ചെയ്യുവാന്‍ ഒരു തൊഴിലാളിക്ക് അനുവാദമില്ല എന്നാണ് സൗദി തൊഴില്‍ നിയമം വ്യക്തമാക്കുന്നത്.

അങ്ങിനെ ചെയ്‌താല്‍ അത് നിയമ ലംഘനവുമാണ്. എന്നാല്‍ ചില സ്പോണ്‍സര്‍മാര്‍ തൊഴിലാളികളെ വിദേശത്ത് നിന്നും റിക്രൂട്ട് ചെയ്തു കൊണ്ട് വന്നു മാസം തോറും ഒരു നിശ്ചിത സംഖ്യ കൈപറ്റി അവരെ സ്വന്തമായി തൊഴില്‍ തേടാന്‍ അനുവദിക്കുകയോ, തൊഴില്‍ ചെയ്യാന്‍ അനുവാദം നല്‍കുകയോ ചെയ്യുന്നുണ്ട്. ഇത് തൊഴില്‍ നിയമ ലംഘനവും കുറ്റകരവുമാണ്. ഇത്തരത്തിലുള്ള ഫ്രീ വിസ ഇടപാടുകള്‍ രാജ്യം നിയമം മൂലം നിരോധിച്ചിട്ടുള്ളതുമാണ്.

13. വേതനം കൃത്യമായി നല്‍കാതിരിക്കുക

വേതനം കൃത്യമായി നല്കാതിരിക്കുക എന്നത് സാധാരണമായ ഒരു നിയം ലംഘനമാണ്. ഭൂരിഭാഗം കമ്പനികളും തൊഴിലാളികള്‍ക്ക് കൃത്യ സമയത്ത് തന്നെ വേതനം നല്‍കി വരുന്നുണ്ട്. എന്നാല്‍ വ്യക്തികളും ചെറിയ സ്ഥാപനങ്ങളും ആയിട്ടുള്ള പല സ്പോണ്‍സര്‍മാരും തങ്ങളുടെ തൊഴിലാളികള്‍ക്ക് വേതനം കൃത്യ സമയത്ത് നല്‍കുന്നതില്‍ പരാജയപ്പെടുന്നുണ്ട് എന്നത് പരമാര്‍ത്ഥമാണ്. ഇക്കാര്യം അധികൃതര്‍ക്കും വ്യക്തമാണ്. അത് കൊണ്ടാണ് മൂന്ന് മാസം ശമ്പളം നല്‍കിയില്ലെങ്കില്‍ സ്പോണ്‍സറുടെ അനുവാദം കൂടാതെ തന്നെ സ്പോണ്‍സര്‍ഷിപ്പ് മാറുന്നതിനുള്ള അവകാശം തൊഴിലാളിക്ക് നല്‍കിയിട്ടുള്ളത്.

14. വേതനം കുറച്ചു കാണിക്കുക.

സൗദിയില്‍ സ്വകാര്യ മേഖലയില്‍ വിദേശ തൊഴിലാളികള്‍ക്ക് മിനിമം വേതനം നിശ്ചയിച്ചിട്ടില്ല. എങ്കിലും തൊഴില്‍ കരാറില്‍ പറഞ്ഞിരിക്കുന്ന വേതനം തൊഴിലാളിക്ക് നല്‍കേണ്ടത് നിര്‍ബന്ധമാണ്‌. എന്നാല്‍ ഈ വേതനം നല്‍കാതെ ജോലി എടുപ്പിക്കുന്ന നിരവധി സ്ഥാപനങ്ങളുണ്ട്. തൊഴിലാളികളുടെ വേതനത്തെ ബേസിക് സാലറി എന്നും ട്രാവല്‍ അലവന്‍സ് എന്നും ഹൌസിംഗ് അലവന്‍സ് എന്നും ഫുഡ്‌ അലവന്‍സ് എന്നുമെല്ലാം തരം തിരിച്ച് കൊടുക്കുകയാണ് ചെയ്യുന്നത്.

തൊഴിലാളി പിരിഞ്ഞു പോകുന്ന അവസരത്തില്‍ അയാളുടെ ബേസിക് സാലറിയുടെ അടിസ്ഥാനത്തിലാണ് സേവനനന്തര ആനുകൂല്യം അഥവാ ഇ.എസ്.ബി (End of Service Benefit) കണക്കു കൂട്ടി നല്‍കേണ്ടത്. ഇതില്‍ കുറവ് വരുത്തുന്നതിന് വേണ്ടിയാണ് ഇത്തരത്തില്‍ വേതനം കുറച്ചു കൊടുക്കുന്നതും കണക്കുകളില്‍ കുറച്ചു കാണിക്കുന്നതും.

15. ബിനാമി ബിസിനസിനു അനുവാദം നല്‍കുക

ഫ്രീ വിസയുടെ കുറച്ചു കൂടി വലിയൊരു പ്രവണതയാണ് ബിനാമി ബിസിനസ്. ഒരു സ്വദേശിയുടെ മറവില്‍ അയാളുടെ പേരില്‍ ലൈസന്‍സുകളും രേഖകളും ശരിയാക്കി കൊണ്ട് അയാളെന്ന ഭാവേന വിദേശി നടത്തി വരുന്ന ബിസിനസ്സാണ് ബിനാമി ബിസിനസ്. നിയമ വിരുദ്ധമാണെങ്കില്‍ തന്നെയും അടുത്തകാലം വരെ ഇത് സൗദിയില്‍ സാധാരണമായിരുന്നു. ഇപ്പോഴും അനേകം വിദേശികള്‍ ബിനാമി ബിസിനസ്സുകള്‍ ചെയ്തു വരുന്നുണ്ട്.

പ്രതിമാസ സംഖ്യയുടെയോ ലാഭ വിഹിതതിന്റെയോ അടിസ്ഥാനത്തിലായിരിക്കും സ്വദേശിയും വിദേശിയും തമ്മില്‍ ബിനാമി ബിസിനസിന് ധാരണയാവുന്നത്. എന്നാല്‍ കഴിഞ്ഞ വര്‍ഷങ്ങളില്‍ അധികൃതര്‍ ബിനാമി ബിസിനസിന് എതിരായ നടപടികള്‍ ഉര്‍ജ്ജിതമാക്കി. രാജ്യത്ത് നിന്നും ബിനാമി ബിസിനസ്സുകള്‍ പൂര്‍ണ്ണമായും നിര്‍മ്മാര്‍ജ്ജനം ചെയ്യാനാണ് ഇപ്പോള്‍ അധികൃതരുടെ ശ്രമം. ഈ വര്‍ഷം ഓഗസ്റ്റ് മാസത്തിനുള്ളില്‍ ബിനാമി ബിസിനസ് ചെയ്യുന്ന എല്ലാ വിദേശികളും പദവി ശരിയാക്കണമെന്നു അധികൃതര്‍ അന്ത്യ ശാസനവും നല്‍കിയിട്ടുണ്ട്.

16. മോശമായ പെരുമാറ്റം

ജോലി സ്ഥലത്ത് മോശമായ പെരുമാറ്റം പലരും പറയുന്ന ഒരു പരാതിയാണ്. ഇക്കാര്യത്തില്‍ സൗദി പൗരന്മാര്‍ മാത്രമല്ല ഉത്തരവാദികള്‍. ചില സന്ദര്‍ഭങ്ങളില്‍ സഹപ്രവര്‍ത്തകരോ മേലുദ്യോഗസ്ഥന്മാരോ ആയ വിദേശികളും മോശമായി പെരുമാറുന്നതായി പരാതികള്‍ ഉണ്ടാവാറുണ്ട്. സാധാരണ ഗതിയില്‍ വേതനം, ഓവര്‍ടൈം, ജോലി സമയത്തിന്റെ ദൈര്‍ഘ്യം, സേവനാനന്തര ആനുകൂല്യം, ലീവ് സാലറി തുടങ്ങിയ കാര്യങ്ങളിലാണ് അസ്വാരസ്യം പൊട്ടിപുറപ്പെടുക. പിന്നീടത് പരിഭവമോ ശത്രുതയോ ആയി മാറുന്നു.

മേല്‍ പറഞ്ഞ കാര്യങ്ങളെ സംബന്ധിച്ച് തൊഴിലാളിയും തൊഴിലുടമയും തമ്മില്‍ തര്‍ക്കങ്ങള്‍ ഉണ്ടെങ്കില്‍ ലേബര്‍ ഓഫീസില്‍ പരാതി പറയാവുന്നതാണ്. അവരുടെ ഇടപെടലില്‍ തീര്‍ന്നില്ലെങ്കില്‍ കമ്മീഷന്‍ ഫോര്‍ സെറ്റില്‍മെന്റ് ഓഫ് ലേബര്‍ എന്ന ഉന്നത ന്യയാലയത്തില്‍ പരാതിപ്പെടാം. പക്ഷേ മറ്റു യാതൊരു നിവൃത്തിയും ഇല്ലാത്ത തരത്തിലുള്ള പീഡനം ഉണ്ടെങ്കില്‍ മാത്രമേ സാധാരണ ഗതിയില്‍ വിദേശ തൊഴിലാളികള്‍ ലേബര്‍ ഓഫീസിലോ സെറ്റില്‍മെന്റ് കംമീഷനിലോ പോലീസിലോ പരാതിപ്പെടാറുള്ളൂ.

അഡ്വ.ഷിയാസ് കുഞ്ഞിബാവ. കോര്‍പറേറ്റ് ലോയര്‍ & കണ്‍സല്‍ട്ടന്റ്. ദുബായ്,റിയാദ്,ഡല്‍ഹി,കൊച്ചി.

പ്രവാസി കോർണർ നിയമ വെബ്‌ സൈറ്റിന്റെ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/KuwvFcgILVQ05OICLoEBpy

LATEST

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

Published

on

ഞാന്‍ ഇപ്പോള്‍ റിയാദില്‍ ഹൗസ് ഡ്രൈവര്‍ വിസയില്‍ ജോലി ചെയ്യുകയാണ്. സ്വന്തമായാണ് പുറത്ത് ജോലി ചെയ്യുന്നത്. ഹൗസ് ഡ്രൈവര്‍മാര്‍ക്ക് ലെവി ബാധകമാക്കിയല്‍ മുന്നോട്ട് തുടര്‍ന്ന് പോകാന്‍ സാധിക്കില്ല. എന്ന് മുതലാണ്‌ ഈ നിയമം നിലവില്‍ വരുന്നത്, ഏതെങ്കിലും തരത്തിലുള്ള ഒഴിവാക്കലുകള്‍ ഉണ്ടാകുമോ തുടങ്ങിയ കാര്യങ്ങള്‍ വിശദീകരിക്കാമോ? സ്പോണ്‍സര്‍ഷിപ്പ് മാറുന്നതിന് എന്തൊക്കെ നടപടി ക്രമങ്ങളാണ് സ്വീകരിക്കേണ്ടത് എന്നും പറഞ്ഞു തരാമോ?

സൗദിയില്‍ കോവിഡ് വ്യാപനം രൂക്ഷമാവുന്നതിന് മുന്‍പ് അനധികൃത വിദേശികളെ പിടികൂടുന്നതിന് വേണ്ടി വ്യാപകമായ പരിശോധന നടന്നിരുന്നു. നിലവിലെ പ്രത്യേക സുരക്ഷാ ഭീഷണി സാഹചര്യങ്ങള്‍ മുന്‍നിറുത്തി അധികൃതര്‍ ലക്ഷ്യമിട്ടിരുന്നത് പ്രധാനമായും യാതൊരു രേഖകളും ഇല്ലാതെ അതിര്‍ത്തി പ്രദേശങ്ങളിലൂടെ നുഴഞ്ഞു കയറിയവര്‍, രേഖകളുടെ കാലാവധി അവസാനിച്ചിട്ടും രാജ്യത്ത് തുടര്‍ന്നവര്‍ തുടങ്ങിയ അനധികൃത താമസക്കാരെ ആയിരുന്നു. മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധന അല്ലാതിരുന്നിട്ടു കൂടി ഈ പരിശോധനകളില്‍ ജവാസാതിന്റെയും സംയുക്ത സുരക്ഷ സേനകളുടെയും പിടിയില്‍ പത്തു ശതമാനത്തോളം വിദേശികളും ഉള്‍പ്പെട്ടിരുന്നു. ഇതില്‍ അധികവും ഹൗസ് ഡ്രൈവര്‍ വിസയില്‍ സൗദിയിലെത്തി സ്വന്തമായി ജോലി ചെയ്തു വന്നിരുന്നവര്‍ ആയിരുന്നു.

അത് പോലെ തന്നെ മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധനകളില്‍ നിരവധി സ്ഥാപനങ്ങളില്‍ അനേകം ഗാര്‍ഹിക തൊഴിലാളികള്‍ അനധികൃതമായി ജോലി ചെയ്തു വരുന്നതായി കണ്ടെത്തിയിരുന്നു. ഹൗസ് ഡ്രൈവര്‍ വിസയില്‍ രാജ്യത്തെത്തി സ്വതന്ത്രമായി ജോലി ചെയ്തു വരുന്നവരായിരുന്നു ഇവര്‍. ഹൗസ് ഡ്രൈവര്‍മാര്‍ക്ക് ലെവി ബാധകമല്ലാത്തതിനാലാണ് വന്‍തുകയുടെ സാമ്പത്തിക ബാധ്യത ഒഴിവാക്കുന്നതിനായി വിദേശികള്‍ ഈ വിസയില്‍ എത്തി ജോലി ചെയ്തു വന്നിരുന്നത്.

2014 ജൂലൈയിലാണ് രാജ്യത്ത് ആദ്യമായി സ്വകാര്യ മേഖലയിലെ വിദേശ തൊഴിലാളികൾക്ക് ലെവി ബാധകമാക്കിയത്. 2017 ജൂലൈയിൽ ആശ്രിതർക്കും ലെവി നിലവിൽവന്നു. എങ്കിലും ഗാർഹിക തൊഴിലാളികൾക്ക് ലെവി ബാധകമായിരുന്നില്ല. ഈ പഴുത് മുതലെടുത്ത്‌ കൊണ്ടാണ് പല വിദേശികളും ഹൗസ് ഡ്രൈവര്‍ വിസയിലേക്ക് മാറുകയോ ഫൈനല്‍ എക്സിറ്റില്‍ പോയോ പുതിയ ഹൌസ് ഡ്രൈവർ ഉൾപ്പെടെയുള്ള ഗാർഹിക വിസകളില്‍ രാജ്യത്തെത്തുകയോ ചെയ്തു കൊണ്ടിരുന്നത്.

പരിശോധനകളില്‍ ഹൗസ് ഡ്രൈവര്‍ വിസയില്‍ രാജ്യത്തെത്തിയ അനേകം തൊഴിലാളികള്‍ പിടിലാകുന്നത് വര്‍ദ്ധിച്ചതോടെയാണ് ഈ വിഷയം അധികൃതരുടെ ശ്രദ്ധയില്‍ പെടുന്നത്. തുടര്‍ന്ന് ഈ പഴുത് അടക്കുന്നതിനു വേണ്ടിയുള്ള ശ്രമങ്ങളുടെ ഭാഗമായാണ് ഗാര്‍ഹിക തൊഴിലാളികള്‍ക്ക് ലെവി ഏര്‍പ്പെടുതാനുള്ള തീരുമാനം മാനവശേഷി സാമൂഹിക വികസന മന്ത്രാലയ ശുപാര്‍ശ പ്രകാരം സൗദി കാബിനറ്റ്‌ കൈക്കൊള്ളുന്നത്.

പുതിയ തീരുമാന പ്രകാരം ഹൗസ് ഡ്രൈവർ വിസയിലുൾപ്പെടെയുള്ള മുഴുവൻ ഗാർഹിക തൊഴിലാളികൾക്കും ലെവി ബാധകമാണ്. ഓരോ തൊഴിലാളിക്കും വർഷത്തിൽ 9,600 റിയാൽ, അഥവാ പ്രതിമാസം 800 റിയാൽ തോതിലാണ് ലെവി. എന്നാല്‍ ആവശ്യമായ മുന്‍കരുതലുകള്‍ എടുത്തു കൊണ്ട് തന്നെയാണ് ഈ തീരുമാനം മന്ത്രാലയം കൈക്കൊണ്ടിട്ടുള്ളത്. പുതിയ തീരുമാനം മൂലം സ്വദേശികള്‍ക്കും വിദേശികള്‍ക്കും പെട്ടെന്ന് അസൗകര്യം ഉണ്ടാകാത്ത വിധത്തിലാണ് പുതിയ നിബന്ധനകള്‍ നടപ്പിലാക്കുക.

അതായത്, എല്ലാ ഗാര്‍ഹിക തൊഴിലാളികള്‍ക്കും ലെവി ഏര്‍പ്പെടുത്തിയിട്ടില്ല. നാലിൽ കൂടുതൽ ഗാർഹിക തൊഴിലാളികളുള്ള സ്വദേശികളും, രണ്ടിൽ കൂടുതൽ തൊഴിലാളികളുള്ള വിദേശികളും മാത്രമേ പുതിയ തീരുമാന പ്രകാരം ലെവി അടക്കേണ്ടി വരുന്നുള്ളൂ. വിസ കച്ചവടവും അനധികൃത വിസ കൈമാറ്റവും തടയുന്നതിനാണ് ഈ നിബന്ധനകള്‍ കൊണ്ട് വന്നിട്ടുള്ളത്.

മാത്രമല്ല, ഗാര്‍ഹിക തൊഴിലാളികള്‍ക്ക് മറ്റു തൊഴിലുകളിലേക്ക് മാറുന്നതിനാവശ്യമായ സാവകാശവും മന്ത്രാലയം പരോക്ഷമായി നല്‍കുന്നുണ്ട്. അത് കൊണ്ട് തന്നെ രണ്ട് ഘട്ടങ്ങളിലായാണ് തീരുമാനം നടപ്പിലാക്കുക. ഈ വർഷം മെയ് 22 ന് ആരംഭിക്കുന്ന ഒന്നാം ഘട്ടത്തിൽ പുതിയ ഗാർഹിക വിസയിൽ വരുന്ന തൊഴിലാളികൾക്ക് മാത്രമേ ലെവി അടക്കേണ്ടതുള്ളൂ.

കൂടാതെ ഈ വിഷയത്തില്‍ മന്ത്രാലയത്തിന്റെ ഉദാരമായ നിലപാടും പ്രശംസാര്‍ഹമാണ്. പ്രത്യേക വൈദ്യ പരിചരണ ആവശ്യമുള്ള ആളുകൾ, ഭിന്നശേഷിക്കാർക്കുള്ള പരിചരണം തുടങ്ങി മാനുഷികമായ പരിഗണന ആവശ്യപ്പെടുന്ന സന്ദർഭങ്ങളിൽ അത്തരം ജോലികൾക്കായി നിയമിക്കുന്ന ഗാർഹിക തൊഴിലാളിക്ക് ലെവി ബാധകമാവില്ല.

നിലവിൽ രാജ്യത്തുള്ള ഗാർഹിക തൊഴിലാളികൾക്ക് ഒരു വർഷത്തിന് ശേഷം മാത്രമേ ലെവി ബാധകമാകുകയുള്ളൂ. 2023 മെയ് 13 മുതലാണ് ഇവർക്ക് ലെവി അടക്കേണ്ടിവരിക. ഇതിനിടയില്‍ ഇവര്‍ക്ക് മറ്റുള്ള പ്രൊഫഷനുകളിലെക്ക് മാറാനോ ഫൈനല്‍ എക്സിറ്റില്‍ രാജ്യം വിട്ടു പോകാനോ ഉള്ള സാവകാശം ലഭിക്കും. ഇപ്പോൾ ഹൗസ് ഡ്രൈവർ തസ്തികയിലുള്ളവർക്ക് പ്രൊഫഷൻ മാറ്റം അനുവദിക്കുന്നതിനാൽ കൂടുതൽ സുരക്ഷിതമായ തൊഴിലുകൾ കണ്ടെത്തി മാറാവുന്നതാണ്.

സ്പോണ്‍സര്‍ഷിപ്പ് മാറുന്നതിനായി ഖിവ പ്ലാറ്റ്ഫോം വഴിയാണ് അപേക്ഷ നല്‍കേണ്ടത്. പുതിയ സ്പോണ്‍സര്‍ ആണ് മാറാന്‍ അപേക്ഷ നല്‍കേണ്ടത്. തൊഴിലാളിയുടെ ഇഖാമ കാലാവധി ഒരു വര്‍ഷത്തില്‍ കൂടുതല്‍ ഉള്ളതാകരുത് എന്ന നിബന്ധന നിലവിലുണ്ട്. പുതിയ സ്പോണ്‍സര്‍ ഓണ്‍ലൈന്‍ വഴി അപേക്ഷ നല്‍കിയാല്‍ പഴയ സ്പോണ്‍സര്‍ക്ക് എസ്.എം.എസ് ലഭിക്കും. നിലവിലെ സ്പോണ്‍സര്‍ ഇത് അംഗീകരിക്കുന്നതോടെ സ്പോണ്‍സര്‍ഷിപ്പ് മാറ്റം പൂര്‍ത്തിയാകും.

ഹൗസ് ഡ്രൈവര്‍ വിസയില്‍ എത്തി സ്വന്തമായി ജോലി ചെയ്യുകയോ മറ്റു പ്രൊഫഷനുകളില്‍ ജോലി ചെയ്യുകയോ ചെയ്തു വരികയാണെങ്കില്‍ ഈ നിബന്ധന നിലവില്‍ വരുന്നതോടെ താങ്കളുടെ നിലനില്പ് തന്നെ അപകടത്തിലാകും. താങ്കളുടെ സ്പോണ്‍സര്‍ക്ക് നാലില്‍ കൂടുതല്‍ ഗാര്‍ഹിക തൊഴിലാളികള്‍ നിലവില്‍ ഉണ്ടെങ്കില്‍ വർഷത്തിൽ 9,600 റിയാൽ നല്‍കി കൊണ്ട് ഹൗസ് ഡ്രൈവര്‍ വിസയില്‍ മുന്നോട്ട് പോകാന്‍ സാധിക്കില്ല. അതിനാല്‍ നിബന്ധന നിലവില്‍ വരുന്നതിന് മുന്‍പായി ലെവി അടക്കാന്‍ സാധിക്കുന്ന വരുമാനം ലഭിക്കുന്ന മറ്റു പ്രൊഫഷനിലെക്ക് മാറുകയോ അല്ലാത്ത പക്ഷം ഫൈനല്‍ എക്സിറ്റില്‍ പോകുകയോ ചെയ്യുന്നതാണ്‌ ഉചിതം.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD 

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

 

വിവരങ്ങള്‍ നല്‍കിയത്: 

Adv. Shiyas Kunjhibava. Lead Partner, SK Associates. (Dubai, Riyadh, Delhi, Kochi)

Continue Reading

LATEST

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

Published

on

അടുത്ത മാസം പകുതിയോടെ സൗദി അറേബ്യയില്‍ ഓയില്‍ സെക്ടറില്‍ പുതിയ വിസയില്‍ പോകാന്‍ ഒരുങ്ങുകയാണ്. ആദ്യമായാണ് സൗദി കമ്പനിക്ക്  വേണ്ടി ജോലി ചെയ്യാന്‍ സാധിക്കുന്നത്. ഉയര്‍ന്ന തസ്തികയിലാണ് വിസ. ഈ തസ്തിക കാലക്രമേണ നിതാഖാതില്‍ ഉള്‍പ്പെടുത്തി സ്വദേശിവല്‍ക്കരണം ഉണ്ടാകുമെന്നും ജോലി നഷ്ടപ്പെടുമെന്നും നിലവിലുള്ള ജോലി നഷ്ടപ്പെടുത്തി സൗദിയിലേക്ക് പോകുന്നത് ശരിയായ തീരുമാനമല്ല എന്ന് സുഹൃത്ത് പറയുന്നു. എന്താണ് നിതാഖാത് എന്നതിന്റെ അടിസ്ഥാനപരമായ കാര്യങ്ങള്‍ വിശദീകരിച്ചു തരാമോ?    

 

സൗദി അറേബ്യയില്‍ ജോലി ചെയ്യുന്ന വിദേശികളെ സംബന്ധിച്ചിടത്തോളം അല്‍പ്പം അസ്വസ്ഥത പകരുന്ന വാക്കാണ്‌ സൗദി പൗരന്മാരെ നിയമിക്കുന്നതിന് സ്വകാര്യ മേഖലയെ പ്രോത്സാഹിപ്പിക്കുന്നതിനായി സൗദി മാനവ വിഭവശേഷി, സാമൂഹിക വികസന മന്ത്രാലയം രൂപം നല്‍കിയ ഒരു പദ്ധതിയുടെ പേരായ നിതാഖാത്.

പലരും കരുതുന്നത് പോലെ വിദേശികളെ സൗദി അറേബ്യയുടെ തൊഴില്‍ രംഗത്ത് നിന്നും ആത്യന്തികമായി പുറത്താക്കുക എന്നതല്ല മറിച്ച് സ്വദേശി പൗരന്മാരുടെ തൊഴിലില്ലായ്മ കുറക്കുകയും അവര്‍ക്ക് രാജ്യത്തിന്റെ സ്വകാര്യ മേഖലയില്‍ ജോലി ഉറപ്പു വരുത്തുകയാണ് ഈ പദ്ധതിയുടെ ലക്‌ഷ്യം. തങ്ങളുടെ പൗരന്മാര്‍ക്ക് തൊഴിലും ഉയര്‍ന്ന ജീവിത സാഹചര്യങ്ങളും ഉറപ്പു വരുത്തുക എന്നത് ഏതൊരു രാജ്യത്തിന്റെയും പ്രാഥമിക കര്‍ത്തവ്യം കൂടിയാണ് എന്ന തത്വത്തില്‍ അധിഷ്ഠിതമായ പദ്ധതി കൂടിയാണ് നിതാഖാത്.

2011-ൽ ആരംഭിച്ചത് മുതൽ, ഈ പദ്ധതിയിലൂടെ കാലാനുസൃതമായി വിവിധ തൊഴിലുകളെ ദേശസാൽക്കരിക്കാനും സ്വദേശി പൗരന്മാരുടെ കഴിവുകളെ വൈവിധ്യവല്‍ക്കരിക്കാനും ആവശ്യമായ നടപടികൾ നടപ്പിലാക്കിയിട്ടുണ്ട്. ഇതുമൂലം ലക്ഷക്കണക്കിന്‌ സ്വദേശികള്‍ക്ക് തൊഴിലവസരങ്ങള്‍ സൃഷ്ടിക്കാന്‍ സാധിച്ചിട്ടുണ്ട്. ലക്‌ഷ്യത്തിലേക്ക് എത്തുന്നതിനായി കഴിഞ്ഞ 11 വര്‍ഷമായി നിരന്തരമായ അപ്ഡേറ്റുകൾക്കും നിതാഖാത് വിധേയമായിട്ടുണ്ട്. അതിൽ ഏറ്റവും പുതിയത് “അഡ്വാൻസ്ഡ് നിതാഖാത്”/ “പരിഷ്കരിച്ച നിതാഖാത്” എന്ന പേരില്‍ 2021 ഡിസംബറിൽ ആയിരുന്നു.

സൗദി പൗരന്മാര്‍ക്ക് തൊഴില്‍ ഉറപ്പ് വരുത്തുന്നതിനായി സ്വകാര്യ മേഖലയിലെ പ്രത്യേക തൊഴിലുകള്‍ അവര്‍ക്കായി മാത്രം പരിമിതപ്പെടുത്തുക, അതിനായി സ്ഥാപനങ്ങളെ വിവിധ വിഭാഗങ്ങളാക്കി തരം തിരിക്കുക എന്നതാണ് നിതാഖാത് പദ്ധതിയുടെ അടിസ്ഥാന പ്രവര്‍ത്തന രീതി. ഈ പദ്ധതിയിലൂടെ സൗദി പൗരന്മാര്‍ക്ക് കൃത്യമായ അടിസ്ഥാന പ്രതിമാസ ശമ്പളവും മന്ത്രാലയം ഉറപ്പു വരുത്തുന്നുണ്ട്. സൗദി തൊഴിൽ നിയമം ഒരു സൗദി പൗരന് കൃത്യമായ മിനിമം വേതനം നിര്‍ദ്ദേശിക്കുന്നില്ല എന്ന പരിമിതിയെ ഈ പദ്ധതിയിലൂടെ മറികടക്കാനും മന്ത്രാലയത്തിന് സാധിക്കുന്നു.

ആറു ജീവനക്കാരും അതിൽ കൂടുതലുമുള്ള എല്ലാ സ്ഥാപനങ്ങൾക്കും നിതാഖാത്ത് ബാധകമാണ്. നിലവില്‍ ചുവപ്പ്, ഇളം പച്ച, ഇടത്തരം പച്ച, കടും പച്ച, പ്ലാറ്റിനം എന്നിങ്ങനെ അഞ്ച് വിഭാഗങ്ങളാക്കിയാണ് സ്വകാര്യ മേഖലയിലെ സ്ഥാപനങ്ങളെ നിതാഖാത് പദ്ധതി പ്രകാരം തരം തിരിച്ചിട്ടുള്ളത്. പദ്ധതിയുടെ നിബന്ധനകള്‍ പൂര്‍ത്തീകരിക്കുന്നതിന്റെ അടിസ്ഥാനത്തിലാണ്, അതായത് സൗദിവൽക്കരണത്തിന്റെ ശതമാനത്തെ അടിസ്ഥാനമാക്കിയാണ് ഈ സ്ഥാപനങ്ങള്‍ക്ക് പ്രത്യേക അവകാശങ്ങളും പരിമിതികളും ഏര്‍പ്പെടുത്തിയിരിക്കുന്നത്. മിനിമം സൗദിവൽക്കരണം പാലിക്കാത്ത സ്ഥാപനങ്ങൾക്ക് മന്ത്രാലയത്തിൽ നിന്നുള്ള സേവനങ്ങൾ വിലക്കുകയും നിര്‍ദ്ദിഷ്ട സൗദിവല്‍ക്കരണം പാലിക്കുന്ന സ്ഥാപനങ്ങള്‍ക്ക് ആവശ്യമായ പ്രോത്സാഹനം നല്‍കുകയുമാണ് ചെയ്യുന്നത്.

സ്ഥാപനങ്ങളെ തരം തിരിക്കുന്നതിനായി ഇന്റർനാഷണൽ ക്ലാസിഫിക്കേഷൻ സ്റ്റാൻഡേർഡ് (“ISIC4”) എന്ന മാനദണ്ഡമാണ് മൂന്ന് വർഷമായി ഉപയോഗിക്കുന്നത്. ഈ മാനദണ്ഡം ഉപയോഗിച്ച് സ്ഥാപനങ്ങള്‍ ഉള്‍പ്പെടുന്ന മേഖല, സ്ഥാപനത്തിന്റെ പ്രവർത്തനങ്ങൾ, പ്രസ്തുത സ്ഥാപനത്തിലെ ജീവനക്കാരുടെ എണ്ണം തുടങ്ങിയവ ഒരു നിർദ്ദിഷ്‌ട സമവാക്യം ഉപയോഗിച്ച് നിര്‍ണ്ണയിച്ച്  വരുന്ന ഒന്നും രണ്ടും മൂന്നും വർഷങ്ങളിൽ പ്രസ്തുത സ്ഥാപനം  ഏത് വിഭാഗത്തില്‍ ഉള്‍പ്പെടുമെന്ന് നിര്‍ണ്ണയിക്കുന്നു.

പരിഷ്‌കരിച്ച നിതാഖാത്ത് പ്രകാരം സ്വകാര്യ സ്ഥാപനങ്ങൾ മൂന്നു വർഷത്തിനുള്ളിൽ സൗദിവൽക്കരണം ഘട്ടം ഘട്ടമായി നിശ്ചിത ശതമാനം ഉയർത്തൽ നിർബന്ധമാണെന്ന് മന്ത്രാലയം വ്യക്തമാക്കിയിട്ടുണ്ട്. അല്ലാത്ത പക്ഷം ഈ സ്ഥാപനങ്ങളുടെ വിഭാഗത്തിൽ മാറ്റം വരികയും ഉയര്‍ന്ന വിഭാഗത്തില്‍ നിന്നും താഴെയുള്ള വിഭാഗങ്ങളിലേക്ക് പോവുകയും ചെയ്യും. പുതിയ പദ്ധതി പ്രകാരം ആവശ്യമായ മാറ്റങ്ങള്‍ വരുത്തുന്നതിന് ആവശ്യമായ സമയം അനുവദിക്കുക എന്നതാണ് ഈ മൂന്ന് വര്‍ഷ സമയ പരിധിയുടെ ഉദ്ദേശം. ഈ സമയ പരിധിക്കുള്ളില്‍ നാല് ലക്ഷത്തോളം പുതിയ സ്വദേശി തൊഴിലവസരങ്ങളാണ് മന്ത്രാലയം ലക്ഷ്യമിടുന്നത്.

ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍:

മുകളില്‍ അഞ്ചാമത്ത ഖണ്ഡികയില്‍ പറഞ്ഞിരിക്കുന്നത് പോലെ അഞ്ചു വിഭാഗങ്ങളായാണ് നിതാഖത് പദ്ധതി പ്രകാരം സ്വകാര്യ കമ്പനികളെ തരം തിരിച്ചിരിക്കുന്നത്. അതില്‍ ഏറ്റവും താഴെയായി കിടക്കുന്ന സ്ഥാപനങ്ങളാണ് ചുവന്ന വിഭാഗത്തിലുള്ള സ്ഥാപനങ്ങള്‍. മന്ത്രാലയം നിര്‍ദ്ടെഷിചിരിക്കുന്നതരത്തിലുള്ള നിബന്ധനകള്‍ പാലിക്കാന്‍ സാധിക്കാത്ത സ്ഥാപനങ്ങളാണ് ഈ വിഭാഗത്തില്‍ ഉള്‍പ്പെടുന്നത്.അത് കൊണ്ട് തന്നെ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം നല്‍കുന്ന ഉത്തേജന/പ്രോത്സാഹന മാര്‍ഗ്ഗങ്ങള്‍ ലഭ്യമാകില്ല. മറിച്ച് ഇത്തരം സ്ഥാപനങ്ങള്‍ക്ക് അവക്ക് ലഭ്യമായിരുന്ന അടിസ്ഥാന അവകാശങ്ങള്‍ പോലും നഷ്ടമാകുകയും ചെയ്യുന്നു. സ്ഥാപനത്തിനും അതിലെ തൊഴിലാളികള്‍ക്കും താഴെ പറയുന്ന ആനുകൂല്യങ്ങള്‍ നിഷേധിക്കപെടുന്നു:

  1. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് അതിലെ തൊഴിലാളികളുടെ വർക്ക് പെർമിറ്റ് പുതുക്കാൻ സാധിക്കില്ല.
  2. ഇത്തരം സ്ഥാപനങ്ങള്‍ക്ക് തങ്ങളുടെ തൊഴിലാളികളുടെ പ്രൊഫഷനുകള്‍ മാറ്റാൻ സാധിക്കില്ല.
  3. ഈ സ്ഥാപനങ്ങള്‍ക്ക് പുതിയ വിദേശ തൊഴിലാളികൾക്ക് വർക്ക് പെർമിറ്റ് നൽകാൻ സാധിക്കില്ല.
  4. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ വിസകൾക്ക് വേണ്ടി അപേക്ഷിക്കാന്‍ സാധിക്കില്ല.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് വിസ ട്രാന്‍സ്ഫര്‍ ചെയ്യാന്‍ സാധിക്കില്ല.
  6. സ്ഥാപനങ്ങളുടെ പുതിയ ശാഖകൾക്കോ പുതിയ സൗകര്യങ്ങൾക്കോ വേണ്ടി പുതിയ ഫയലുകൾ തുറക്കാൻ അനുവാദം ഉണ്ടായിരിക്കില്ല.

ഇളം പച്ച വിഭാഗത്തില്‍ പെടുന്ന സ്ഥാപനങ്ങള്‍ (ലോ ഗ്രീൻ റേഞ്ച് സ്ഥാപനങ്ങള്‍):

ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങളെ പോലെ മുഴുവന്‍ ആനുകൂല്യങ്ങളും നിഷേധിക്കപ്പെടുന്നില്ല. നാമമാത്രമായ നിയന്ത്രണങ്ങളാണ് ഇത്തരം സ്ഥാപനങ്ങളുടെ പ്രവര്‍ത്തനത്തിലും മന്ത്രാലയം ഏര്‍പ്പെടുത്തിയിട്ടുള്ളത്.

  1. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ തൊഴില്‍ വിസകൾക്കുള്ള അപേക്ഷകൾ സമര്‍പ്പിക്കാന്‍ സാധിക്കില്ല.
  2. ഈ സ്ഥാപനങ്ങളിലെ വിദേശികളായ തൊഴിലാളികളുടെ പ്രോഫഷനുകള്‍ മാറ്റാനുള്ള അനുവാദം നല്‍കിയിട്ടുണ്ട്. എന്നാല്‍ സൗദി പൗരന്മാർക്ക് മാത്രമായി പരിമിതപ്പെടുത്തിയിരിക്കുന്ന പ്രൊഫഷനുകളിലേക്ക് മാറ്റം അനുവദിക്കില്ല.
  3. കുറഞ്ഞ പച്ച വിഭാഗത്തിന് താഴെയുള്ള വിദേശ തൊഴിലാളികളുടെ സേവനങ്ങൾ കൈമാറാനുള്ള അനുവാദം ലഭ്യമാണ്.
  4. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ ലഭ്യമാകും.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് തങ്ങളുടെ വിദേശ തൊഴിലാളിയുടെ അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വർക്ക് പെർമിറ്റ് പുതുക്കാന്‍ അനുവാദം നല്‍കും.

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (മിഡ് ഗ്രീൻ റേഞ്ച് സ്ഥാപനങ്ങള്‍)

ഇളം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന ആനുകൂല്യങ്ങള്‍ക്ക് പുറമേ മറ്റു ചില ആനുകൂല്യങ്ങള്‍ കൂടി ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം ലഭ്യമാക്കുന്നുണ്ട്.

  1. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ (replacement visa) ലഭ്യമാകും.

കടും പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (ഹൈ ഗ്രീൻ റേഞ്ച് സ്ഥാപനങ്ങള്‍):

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന എല്ലാ ആനുകൂല്യങ്ങളും ലഭ്യമാകുന്നതോടൊപ്പം മറ്റു ചില ആനുകൂല്യങ്ങള്‍ കൂടി ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം ലഭ്യമാക്കിയിട്ടുണ്ട്.

  1. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരം വിസ (replacement visa) ലഭ്യമാക്കും.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

പ്ലാറ്റിനം റേഞ്ച് കമ്പനികൾ:

നിതാഖാത് പദ്ധതി പ്രകാരമുള്ള അഞ്ചു വിഭാഗങ്ങളില്‍ ഏറ്റവും ഉയര്‍ന്ന വിഭാഗമാണ്‌ പ്ലാറ്റിനം വിഭാഗം.

  1. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കം.
  2. വിദേശികളായ തൊഴിലാളികളുടെ പ്രൊഫഷനുകള്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് ഒഴികെ മാറ്റം.
  3. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരമായി വിസ (replacement visa) ലഭ്യമാക്കും.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

സൗദി പൗരന്മാര്‍ക്ക് മിനിമം വേതനം

നിതാഖാത് പദ്ധതി പ്രകാരം വിവിധ വിഭാഗങ്ങളില്‍ ഉള്‍പ്പെടുന്ന സ്ഥാപനങ്ങള്‍ക്ക് വിവിധ തരം ആനുകൂല്യങ്ങളും പരിമിതികളും ലഭ്യമാകുമ്പോള്‍ മുകളില്‍ പറഞ്ഞ പോലെ ഒരു സൗദി പൗരന് നിര്‍ദ്ദിഷ്ട തുക അടിസ്ഥാന ശമ്പളമായി ലഭിക്കുന്നു എന്നതാണ് സ്വദേശി പൗരന്മാരെ സംബന്ധിച്ചിടത്തോളം ഈ പദ്ധതിയുടെ ഹൈലൈറ്റ്. ആനുകൂല്യങ്ങളും പരിമിതികളും സ്ഥാപനങ്ങള്‍ക്ക് ലഭ്യമാകുമ്പോള്‍ തങ്ങളുടെ പൗരന്മാരുടെ ജീവിത നിലവാരം ഉറപ്പു വരുത്തുന്നതിനുള്ള അടിസ്ഥാന ശമ്പളം ഉറപ്പു വരുത്തുന്ന രീതിയാണ് മന്ത്രാലയത്തിന്റെ നിതഖാത് പദ്ധതിയെ സ്വദേശി പൗരന്മാര്‍ക്ക് ഇടയില്‍ ജനപ്രിയമാക്കി തീര്‍ക്കുന്നത്.

നിതാഖാത് പദ്ധതി പ്രകാരം സ്ഥാപനങ്ങള്‍ക്ക് ആനുകൂല്യങ്ങള്‍ ലഭിക്കണമെങ്കില്‍ സ്വകാര്യ സ്ഥാപനത്തില്‍ ജോലി ചെയ്യുന്ന സൗദി പൗരന്റെ അടിസ്ഥാന പ്രതിമാസ ശമ്പളം ഏറ്റവും കുറഞ്ഞത് 4,000 റിയാൽ എന്ന് നിജപ്പെടുത്തിയിട്ടുണ്ട്. മുന്‍പ് ഈ തുക 3000 റിയാൽ ആയിരുന്നു എങ്കിലും വിവധ സാഹചര്യങ്ങള്‍ കണക്കിലെടുത്ത് സമീപ മാസങ്ങളിലാണ് ഈ തുകയില്‍ മന്ത്രാലയം വര്‍ദ്ധന ഏര്‍പ്പെടുത്തിയത്.

എങ്കിലും ഈ നിബന്ധനയില്‍ പ്രത്യക്ഷമായി ചെറിയ തരത്തിലുള്ള ഇളവ് മന്ത്രാലയം നല്‍കുന്നുണ്ട് എങ്കിലും നിതാഖാത് പ്രകാരമുള്ള പൂര്‍ണ്ണമായ ആനുകൂല്യം ലഭിക്കണമെങ്കില്‍ ഈ നിബന്ധന പൂര്‍ണ്ണമായും പാലിക്കണം എന്നത് മിനിമം വേതനതോട് കൂടി സ്വദേശി പൗരന്മാരെ തങ്ങളുടെ സ്ഥാപനങ്ങളില്‍ നിയമിക്കാന്‍ പരോക്ഷമായി സ്വകാര്യ സ്ഥാപനങ്ങളെ നിര്‍ബന്ധിതരാക്കുന്നു.

അതായത് 4000 റിയാലില്‍ കുറവ് ശമ്പളത്തിനും സ്ഥാപനങ്ങള്‍ക്ക് സ്വദേശി തൊഴിലാളികളെ നിയമിക്കാന്‍ അനുവാദമുണ്ട്. അന്നാല്‍ അതിനു ആനുപാതികമായി പദ്ധതിയില്‍ നിന്നും ലഭിക്കുന്ന ആനുകൂല്യങ്ങള്‍ക്കും കുറവുണ്ടാകും. അതായത് 4000 റിയാലിൽ താഴെയുള്ള ശമ്പളം നല്‍കി നിയമിക്കുന്ന ഒരു സ്വദേശി തൊഴിലാളിയെ നിതാഖാത് പദ്ധതി പ്രകാരം പകുതി തൊഴിലി ആയി മാത്രമേ കണക്കാക്കുകയുള്ളൂ.  പാർട്ട് ടൈം തൊഴിലാളികളുടെ കാര്യത്തിലും ഈ നിബന്ധന ബാധകമാണ്. മാസത്തില്‍ 168 മണിക്കൂറിൽ കുറയാത്ത സേവനം പൂർത്തിയാക്കിയ തൊഴിലാളിയെ (ഫ്ലക്സിബിള്‍ അവേഴ്സ്) സൗദി തൊഴിലാളിയുടെ 1/3 ആയി കണക്കാക്കും.

എന്നാല്‍ വികലാംഗരായ സ്വദേശി തൊഴിലാളികളുടെ കാര്യത്തില്‍ വലിയ ഇളവാണ് മന്ത്രാലയം നല്‍കുന്നത്. 4000 റിയാലില്‍ കുറയാത്ത ശമ്പളത്തില്‍ ഒരു സ്വദേശിയായ വികലാംഗ തൊഴിലാളിയെ നിയമിക്കുന്ന സ്ഥാപനങ്ങള്‍ക്ക് നിതാഖാത് പദ്ധതി പ്രകാരമുള്ള ആനുകൂല്യങ്ങള്‍ക്കായി ഒരു തൊഴിലാളിയെ 4 തൊഴിലാളികളായി കണക്കാക്കും. ഇതിലൂടെ അംഗ പരിമിതരായ തങ്ങളുടെ പൗരന്മാരുടെ തൊഴില്‍ ലഭ്യതയും അവര്‍ക്ക് നിര്‍ദ്ദിഷ്ട ജീവിത സാഹചര്യവും ഉറപ്പു വരുത്താന്‍ മന്ത്രാലയത്തിന് നിതാഖാത് പദ്ധതിയിലൂടെ സാധിക്കുന്നു.

 

ഇതൊക്കെയാണ് നിതാഖാത് പദ്ധതിയെ സംബന്ധിച്ചുള്ള ഏറ്റവും പുതിയ വിവരങ്ങള്‍. നിങ്ങളെ സംബന്ധിച്ച് വിസ ഉന്നത തസ്തികയില്‍ ഉള്ളതായതിനാല്‍ കുറച്ച് അപകട സാധ്യതയും ഇല്ലാതില്ല. കാരണം പലപ്പോഴും പ്രധാന തസ്തികകളാണ് സൗദിവല്ക്കരണത്തില്‍ ഉള്‍പ്പെടുത്താറുള്ളത്. വിദേശികള്‍ ധാരാളമായി ജോലി ചെയ്യുന്ന താഴ്ന്ന തസ്തികകള്‍ അധികമായി ഉള്‍പ്പെടുത്താറില്ല. നിങ്ങളുടെ തസ്തിക ഏതാണെന്ന് വ്യക്തമായി ചോദ്യത്തില്‍ ഉള്‍പ്പെടുത്താതിനാല്‍ അതിനെ കുറിച്ച് കൃത്യമായി പറയാനും സാധിക്കില്ല.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ. ലീഡ് പാര്‍ട്ണര്‍, എസ്.കെ അസോസിയേറ്റ്സ്. (ദുബായ്. റിയാദ്. ഡല്‍ഹി. കൊച്ചി)

 

Continue Reading

LATEST

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

Published

on

ഇന്ത്യന്‍ യൂണിയന്‍ മുസ്ലിം ലീഗിന്റെ വിദ്യാര്‍ത്ഥി ഘടകമായ എം.എസ്.എഫിന്റെ പ്രവര്‍ത്തന ചരിത്രത്തില്‍ പുതിയ ഒരധ്യായം എഴുതി ചേര്‍ത്തു കൊണ്ടാണ് കഴിഞ്ഞ ദിവസങ്ങളില്‍ ഡല്‍ഹിയില്‍ വെച്ചു നടന്ന ദേശീയ സമ്മേളനം സമാപിച്ചത്.

സംസ്ഥാന പ്രതിനിധികള്‍, കേന്ദ്ര സര്‍വ്വകലാശാലാ പ്രതിനിധികള്‍, മുസ്‌ലിം ലീഗ് ദേശീയ നേതാക്കള്‍, വിദ്യാര്‍ത്ഥി സംഘടനാ നേതാക്കള്‍, വിദ്യാഭ്യാസ വിചക്ഷണര്‍, ആക്റ്റിവിസ്റ്റുകള്‍ ഉള്‍പ്പടെയുള്ളവര്‍ പങ്കെടുത്ത സമ്മേളനം വന്‍ വിജയമായതോടൊപ്പം തന്നെ എം.എസ്.എഫ് ദേശീയ കമ്മിറ്റിയുടെ പുതിയ ആസ്ഥാനം പ്രവര്‍ത്തനം ആരംഭിക്കുകയും ചെയ്തു.

മുസ്‌ലിംലീഗ് ഉന്നതാധികാര സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങളാണ് പുതിയ ദേശീയ കമ്മിറ്റി ഓഫീസ് ഉദ്ഘാടനം ചെയ്തത്.

വിവിധ സംസ്ഥാനങ്ങളിലും കേന്ദ്ര, സംസ്ഥാന സര്‍വ്വകലാശാലകളിലും പതിറ്റാണ്ടുകളായി എം എസ് എഫിന്റെ പ്രവര്‍ത്തനം നടക്കുന്നുണ്ടങ്കിലും ദേശീയ കമ്മറ്റി യാഥാര്‍ഥ്യമായത് 2016ലാണ്. ദേശീയ തല പ്രവര്‍ത്തനങ്ങള്‍ എകോപിപ്പിക്കുകയും പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുകയും ചെയ്യുക എന്ന ലക്‌ഷ്യം മുന്‍നിറുത്തി 2016 ഡിസംബര്‍ 17 ന് പാലക്കാട് വെച്ചാണ് എം എസ് എഫിന് ഒരു ദേശീയ കമ്മറ്റി രൂപീകരിക്കുന്നത്. തുടര്‍ന്നാണ്‌ പ്രവര്‍ത്തനം ദേശീയ തലത്തിലേക്ക് വ്യാപിപിക്കുന്നത്.

നിലവില്‍ രാജ്യത്തെ 13 സംസ്ഥാനങ്ങളിലും, വിവിധ കേന്ദ്ര- സംസ്ഥാന സര്‍വ്വകലാശാലകളിലും എം എസ് എഫ് പ്രവര്‍ത്തനം സജീവമാണ്. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്കുന്ന മഹത്തായ ദൗത്യമാണ് എം എസ് എഫ് ദേശീയ കമ്മിറ്റി നിര്‍വ്വഹിച്ചു കൊണ്ടിരിക്കുന്നത്.

പൗരത്വ ഭേദഗതി നിയമവും, വിദ്വേഷ പ്രസംഗങ്ങളും, ആള്‍ക്കൂട്ട കൊലപാതകങ്ങളും, വസ്ത്രവിവേചനങ്ങളുമെല്ലാം കൊണ്ട് അപരവത്കരിക്കപ്പെടുന്ന കാലത്ത് വിദ്യാഭ്യാസം കൊണ്ട് കരുത്തരായി മാറുക എന്നതാണ് പ്രതിരോധമാര്‍ഗം. എം എസ് എഫ് ആ ദൗത്യ നിര്‍വ്വഹണത്തിലേക്കാണ് വിദ്യാര്‍ത്ഥികളെ ഉണര്‍ത്തുന്നത്. അതോടൊപ്പം രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലേക്ക് പാര്‍ശ്വവത്കരിക്കപ്പെട്ടിരുന്ന മുസ്‌ലിം വിദ്യാര്‍ഥികള്‍ക്ക് കടന്നു വരാനുള്ള ആത്മവിശ്വാസം സൃഷ്ടിക്കുക എന്ന ദൗത്യവും എം എസ് എഫ് വിജയകരമായി തന്നെ തുടര്‍ന്ന് പോരുകയാണ്.

മുഹമ്മദ്‌ അഷറഫ് എം എസ് എഫ് ദേശീയ കമ്മിറ്റി പ്രസിഡന്റ് ടി.പി. അഷറഫ് അലിയോടൊപ്പം

ന്യൂനപക്ഷ വിഭാഗങ്ങള്‍ക്ക് ഭരണ ഘടന വിഭാവനം ചെയ്തിട്ടുള്ള അവസര സമത്വവും സാമൂഹിക നീതിയും പോലുള്ള അവകാശങ്ങള്‍ നഷ്ടപ്പെടാതിരിക്കാനും അവകാശങ്ങള്‍ ക്രിയാത്മകമായി ഉപയോഗിക്കാനും  സംഘടിതരായി രാഷ്ട്രീയ ശക്തിയായി നിലനിന്ന് അവകാശങ്ങള്‍ക്ക് വേണ്ടി പൊരുതുക എന്നതാണ് വര്‍ത്തമാന കാലഘട്ടത്തില്‍ വിദ്യര്‍ത്ഥി സമൂഹത്തിന്റെയും ആവശ്യം. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്‍കി അത്തരത്തിലുള്ള സംവാദങ്ങള്‍ക്ക് ശക്തി പകരുകയാണ് ‘വിദ്യാഭ്യാസം, വിമോചനം, ശാക്തീകരണം’ എന്ന മുദ്രാവാക്യത്തിലൂടെ എം എസ് എഫ് നിര്‍വ്വഹിക്കുന്നത്.

രാജ്യതലസ്ഥാനത്ത് തന്നെ പുതിയ പുതിയ ദേശീയ കമ്മിറ്റി ഓഫീസ് സ്ഥാപിതമായതോടെ ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കാനും ശക്തിപ്പെടുത്താനും എം എസ് എഫിന് സാധിക്കുമെന്നാണ് പുതിയ നേതൃത്വം കരുതുന്നത്. അതോടൊപ്പം തന്നെ ഇന്ത്യയിലെ മുസ്‌ലിം സമുദായത്തിന് വരും കാലത്തേക്കുള്ള നേതൃത്വത്തെ വളര്‍ത്തിയെടുക്കുകയെന്ന ദൗത്യം നിര്‍വ്വഹിക്കാനും എം എസ് എഫ് ദേശീയ കമ്മിറ്റിക്ക് സാധിക്കുമെന്നും നേതൃത്വം പ്രത്യാശിക്കുന്നു.

മുഹമ്മദ്‌ അഷറഫ്  

ന്യൂ ഡല്‍ഹി.

 

Continue Reading
LATEST5 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST5 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST6 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST7 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST7 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST8 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST8 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST8 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST8 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST8 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST8 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST8 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!