Connect with us

LATEST

ഹുറൂബ് – സൗദിയിലെ വിദേശ തൊഴിലാളികള്‍ നിര്‍ബന്ധമായും വായിച്ചിരിക്കേണ്ടതും അറിഞ്ഞിരിക്കേണ്ടതും

Published

on

മലപ്പുറം സ്വദേശി ഹമീദ് പത്തു വര്‍ഷം ജിദ്ദയില്‍ മാന്‍പവര്‍ സ്ഥാപനത്തിലെ സൂപ്പര്‍വൈസറായിരുന്നു. രണ്ടു പെണ്മക്കളാണ് ഹമീദിന്. മൂത്ത മകളെ കെട്ടിച്ചു. രണ്ടാമത്തെ മകളുടെ വിവാഹത്തിന് ശേഷം നാട്ടില്‍ ഒരു ചെറിയ എന്തെങ്കിലും ബിസിനസുമായി കൂടാം എന്നായിരുന്നു ഹമീദിന്‍റെ പദ്ധതി. പിരിഞ്ഞു പോകുമ്പോള്‍ കിട്ടുന്ന പത്തു വര്‍ഷത്തെ സേവനാനന്തര ആനുകൂല്യമായ-ഇ.എസ്.ബി- ആയിരുന്നു ഇതിനുള്ള മൂലധനമായി ഹമീദ് മനസ്സില്‍ കണ്ടത്. മകളുടെ വിവാഹം ഉറപ്പിച്ച ശേഷം ഫൈനല്‍ എക്സിറ്റില്‍ നാട്ടിലേക്ക് പോകാന്‍ ഉദ്ദേശിക്കുന്ന തിയ്യതിയും സ്പോണ്‍സറോട് പറഞ്ഞു വെച്ചു. സ്പോന്സറുടെ മറുപടി ഞെട്ടിക്കുന്നതായിരുന്നു. ഫൈനല്‍ എക്സിറ്റ് നല്‍കാം, ഇ.എസ്.ബി ആയി ഒന്നും തരാന്‍ സാധിക്കില്ല. അതുമായി പോയ്ക്കൊളണം. ഇല്ലെങ്കില്‍ ഹുറൂബ് ആക്കി കളയും. വെറും കയ്യോടെയാണ് ഹമീദിന് നാട്ടിലേക്ക് മടങ്ങേണ്ടി വന്നത്.

കൊല്ലം സ്വദേശി ബാല എന്ന് വിളിക്കുന്ന ബാലകൃഷണനും സമാനമായ അനുഭവമാണ് ഉണ്ടായത്. പതിനെട്ടു വര്‍ഷമാണ്‌ ബാല ജുബൈലിലെ ഇലക്ട്രിക്കല്‍ കമ്പനിയില്‍ ജോലി ചെയ്തത്. ജോലി ചെയ്തു എന്ന് പറഞ്ഞാല്‍ പോരാ, ബാലയാണ് ആ കമ്പനി ഇന്നത്തെ നിലയില്‍ ആക്കിയതും. സൗദിയില്‍ തന്നെ മറ്റൊരു സ്പോണ്‍സറുടെ കീഴില്‍ ജോലി ചെയ്യുമ്പോള്‍ തന്നെ അയാള്‍ അറിയാതെ കോഴിക്കോട്ടുകാരനായ മെഹബൂബ് തുടങ്ങി വെച്ച സ്ഥാപനമായിരുന്നു അത്. ചെറിയ രീതിയില്‍ തുടങ്ങിയ സ്ഥാപനത്തിന്റെ മേല്‍നോട്ടത്തിനായി ബാലയെ നാട്ടില്‍ നിന്നും കൊണ്ട് വന്നു. മെഹബൂബിനു പുതിയ സ്ഥാപനത്തിന്റെ സ്പോണ്‍സറുടെ കീഴിലേക്ക് പഴയ സ്പോണ്സര്‍ തനാസില്‍ നല്‍കാത്തതിനാല്‍ രണ്ടു വര്‍ഷത്തോളം നാട്ടില്‍ നില്‍ക്കേണ്ടി വന്നപ്പോഴും ബാലയാണ് സ്ഥാപനം നോക്കി നടത്തിയിരുന്നത്.

പുതിയ വിസയില്‍ മെഹബൂബ് തിരിച്ചു വന്നപ്പോഴും 18 വര്‍ഷം ബാല മെഹബൂബിന്റെ നിഴലായി നിന്നും. കമ്പനി ഉയരങ്ങളില്‍ എത്തിയപ്പോഴും ബാല മെഹബൂബിനെ വിട്ടു പോയില്ല. വര്‍ഷങ്ങള്‍ക്ക് ശേഷം പ്രായാധിക്യം മൂലം നാട്ടിലേക്ക് മടങ്ങാന്‍ തീരുമാനിച്ച ബാലയെ പക്ഷെ മെഹബൂബ് ചതിച്ചു. വലിയൊരു തുക ബാലക്ക് ഇ.എസ്.ബി ആയി നല്‍കേണ്ടി വരുമെന്ന് മനസ്സിലാക്കിയ മെഹബൂബ് ബാല ഫൈനല്‍ എക്സിറ്റില്‍ പോകുന്നതിന് മൂന്ന് ദിവസം മുന്‍പ് ബാലയെ വെറും കയ്യോടെ പറഞ്ഞയക്കാന്‍ സ്പോണ്‍സറെ ചട്ടം കെട്ടി ബാലക്കുള്ള ടിക്കറ്റും പാസ്പോര്‍ട്ടും ഏല്‍പ്പിച്ച് ബഹറിനിലേക്ക് സ്ഥലം വിട്ടു. തര്‍ക്കിക്കാന്‍ നിന്നാല്‍ ഹുറൂബ് ആക്കുമെന്നയിരുന്നു സ്പോണ്‍സറുടെ ഭീഷണി. ബാലക്കും നാട്ടിലേക്ക് മടങ്ങിയത് വെറും കയ്യോടെ ആയിരുന്നു.

സൗദി പ്രവാസികളുടെ കണ്ണീർ പുരണ്ട അനുഭവങ്ങളില്‍ പ്രഥമ സ്ഥാനം ഹുറൂബിന്

എഴുപതുകളോടെ ആരംഭിച്ച പ്രവാസ ചരിത്രം സൗദിയിലെ മലയാളിക്ക് സമ്മാനിച്ച ഓര്‍മകള്‍ക്കൊപ്പം തന്നെ അവരില്‍ ചിലര്‍ക്ക് സമ്മാനിച്ച കണ്ണീർ പുരണ്ട അനുഭവങ്ങളില്‍ പ്രഥമ സ്ഥാനം ഹുറൂബിനായിരിക്കുമെന്നത് തീർച്ചയാണ്. എത്രയോ മലയാളി മക്കളുടെ ദുരിത ജീവിതങ്ങള്‍ ഈ കെണിയില്‍പ്പെട്ടു ദുരിത പൂര്‍ണ്ണമായിരിക്കുന്നു.

അന്നം തേടിയുള്ള യാത്രക്കിടയില്‍ സ്വപ്‌നങ്ങള്‍ മാത്രം ബാക്കിയാക്കി പരാജയപ്പെട്ട മനസ്സുമായി പ്രതീക്ഷകള്‍ വിളയുന്ന ഈ മണ്ണില്‍ നാടിനും കുടുംബത്തിനും വേണ്ടി ജീവിച്ചു സ്വയം ജീവിക്കാന്‍ മറന്നു പോയി കടന്നു പോയവര്‍ നിരവധി. നെഞ്ചില്‍ കനലുമായി ജീവിതത്തിന്റെ രണ്ടറ്റവും കൂട്ടിമുട്ടിക്കാന്‍ ഇപ്പോഴും ഹുറൂബിന്റെ ഇരകളായി ഇപ്പോഴും കഴിയുന്ന വ്യക്തികളും കുടുംബങ്ങളും നിരവധി.

‘ഒളിച്ചോടിയവന്‍’ എന്നതിന്റെ അറബി വാക്കാണ്‌ ‘ഹുറൂബ്’. (2012 ൽ ‘ഹുറൂബ്’ എന്നതിന് പകരം ‘തൊഴിലാളി അപ്രത്യക്ഷനായി’ എന്നര്‍ത്ഥം വരുന്ന ‘മുതഗയ്യിബൂന്‍ അനില്‍ അമല്‍’ എന്ന പദം ഉപയോഗിക്കാൻ മനുഷ്യാവകാശ കമ്മീഷന്‍ ജവാസാതിനോട് നിർദ്ദേശിച്ചിരുന്നു.)

വിദേശ തൊഴിലാളിയെ ഹുറൂബ് ആക്കുന്നത് എന്തിന്?

നിയമലംഘകരും കുറ്റവാളികളുമായ വിദേശ തൊഴിലാളികളുടെ ചെയ്തികളില്‍ നിന്ന് സ്വദേശി പൗരന്മാര്‍ക്ക് സംരക്ഷണം നല്‍കുന്നതിന് തന്റെ കീഴിലുള്ള തൊഴിലാളി ഒളിച്ചോടിയാല്‍ അയാളെ നിയമത്തിനു മുന്നില്‍ ‘’പ്രഖ്യാപിത ഒളിച്ചോട്ടക്കാരനായി’’ ചിത്രീകരിക്കുവാന്‍ സൗദി ഗവര്‍മെന്റ് തങ്ങളുടെ പൗരന്മാർക്ക് നല്‍കിയിട്ടുള്ള ഒരു വിശേഷ അധികാരമാണ് ഹുറൂബ്. തന്റെ കീഴിലുള്ള തൊഴിലാളി താനറിയാതെ ഓടിപ്പോയതായും പ്രസ്തുത തൊഴിലാളിയുടെ മേലും അയാളുടെ ചെയ്തികള്‍ക്കും തനിക്ക് യാതൊരു ഉത്തരവാദിത്വവും ഭാവിയില്‍ ഉണടായിരിക്കില്ല എന്നും രേഖാ മൂലം അധികൃതരെ അറിയിക്കുന്ന പ്രക്രിയയാണ് ഹുറൂബ്.

ഒരു തൊഴിലാളി നിശ്ചിത കാലയളവില്‍ തന്റെ സ്പോൺസറുമായി ബന്ധം പുലര്‍ത്താതെ വന്നാല്‍ ഭാവിയിലുണ്ടാകുന്ന ദോഷഫലങ്ങളില്‍ നിന്നും രക്ഷപ്പെടുന്നതിനായി അയാളെ സംബന്ധിച്ചുള്ള രേഖകളുമായി സ്പോൺസർ അധികൃതര്‍ക്ക്‌ മുന്നില്‍ ഹാജരായി പ്രസ്തുത വിവരം റിപ്പോര്‍ട്ട് ചെയ്യുന്നു. അവര്‍ രേഖകള്‍ പരിശോധിച്ച ശേഷം അയാളുടെ ഇഖാമ നമ്പരും, പാസ്സ്പോര്‍ട്ട് വിവരങ്ങളും അവരുടെ സിസ്റ്റത്തില്‍ രജിസ്റ്റര്‍ ചെയ്തു പ്രസ്തുത തൊഴിലാളിയെ ഔദ്യോഗികമായി ഒളിച്ചോട്ടക്കാരനായി (ഹുറൂബ്) പ്രഖ്യാപിക്കുന്നു. ഇതാണ് ഹുറൂബിനെ സംബന്ധിച്ച മൊത്തത്തിലുള്ള നടപടിക്രമമെങ്കിലും ഇപ്പോൾ ഓൺലൈനായും ചെയ്യുന്നു.

ഉത്തരവാദി സ്പോണ്‍സര്‍

സൗദിയിലെ നിയമമനുസരിച്ച് ഒരു തൊഴിലാളിയെ ഇവിടെ എത്തിച്ചാല്‍ പിന്നീട് അയാളെ സംബന്ധിച്ച മുഴുവന്‍ ഉത്തരവാദിത്വവും സ്പോൺസർക്ക് തന്നെയാണ്. പ്രസ്തുത തൊഴിലാളിയുടെ മുഴുവന്‍ ചെയ്തികള്‍ക്കും സ്പോണ്സര്‍ തന്നെ ഉത്തരം പറയേണ്ടി വരും. അതിനാല്‍ ഒരു നിശ്ചിത കാലയളവിനു ശേഷവും ഒരു തൊഴിലാളി തന്റെ സ്പോൺസറുമായി ബന്ധം പുലര്‍ത്താതെയോ, ജോലിക്ക് ഹാജരാവാതിരിക്കുകയോ, കാണാതാവുകയോ ചെയ്‌താല്‍ അതിനെ സംബന്ധിച്ച് ബന്ധപ്പെട്ട അധികാരികള്‍ക്ക് വിവരം നല്‍കണം എന്നത് സൗദി നിയമ പ്രകാരം നിര്‍ബന്ധമായ ഒന്നാണ്.

അല്ലാത്ത പക്ഷം അയാള്‍ മൂലമുണ്ടാകുന്ന പ്രശ്നങ്ങള്‍ക്ക് സ്പോണ്‍സര്‍ കൂടി ഉത്തരവാദിയാകുന്നു. അയാള്‍ക്ക്‌ പ്രസ്തുത കാര്യം റിപ്പോര്‍ട്ട്‌ ചെയ്യാത്തതിനുള്ള ശിക്ഷയും ലഭിക്കും. തന്റെ കീഴിലുള്ള ഒരു തൊഴിലാളിയെ കാണാതായാല്‍ സ്പോണ്‍സര്‍ ഉടനെ തന്നെ ആ വിവരം ബന്ധപ്പെട്ട അധികാരികളെ അറിയിച്ചിരിക്കണമെന്നു നിയമം നിഷ്കര്‍ഷിക്കുന്നു. അല്ലാത്ത പക്ഷം അയാൾക്ക് എതിരായി കർശനമായ നിയമനടപടികൾ ഉണ്ടാവും.

ഹുറൂബുമായി ബന്ധപ്പെട്ട പരാതികളും ഹുറൂബ് റദ്ദാക്കുന്നതിനുള്ള സ്ഥാപനങ്ങളുടെയും വ്യക്തികളുടെയും അപേക്ഷകളും വന്‍തോതില്‍ വര്‍ധിച്ചത് തൊഴില്‍ മന്ത്രാലയത്തിന്റെ ശ്രദ്ദയില്‍ പെട്ടിരുന്നു. മിക്ക ഹുറൂബുകളും സ്‌പോൺസർമാർ തങ്ങളുടെ നിക്ഷിപ്ത താല്‍പ്പര്യങ്ങള്‍ക്ക് വേണ്ടി ഉണ്ടാക്കിയെടുത്തതാണ്‌ എന്നായിരുന്നു ഇതിനെക്കുറിച്ച് പഠനം നടത്തിയ സൗദി മനുഷ്യാവകാശ സംഘടനയുടെ പോലും കണ്ടെത്തല്‍.

സ്പോണ്‍സര്‍ കനിയണം

സൗദി അറേബ്യയിലെ തൊഴില്‍ മേഖലയെ സംബന്ധിച്ചിടത്തോളം തൊഴില്‍ വിസയില്‍ വിദേശ തൊഴിലാളിയെ കൊണ്ട് വരുന്ന ഒരു സ്പോൺസർക്ക് തന്റെ തൊഴിലാളിയുടെ മേല്‍ പരമാധികാരമാണുള്ളത്. തൊഴിലാളിക്ക് വര്‍ക്ക്‌ പെര്‍മിറ്റും ഇഖാമയും തുടങ്ങി എല്ലാ നിയമപരമായ രേഖകള്‍ക്കും കാര്യങ്ങള്‍ക്കും സ്പോൺസർ കനിയണം.

സ്പോൺസറുടെ അനുമതിയും സമ്മതപത്രവും ഉണ്ടെങ്കില്‍ മാത്രമേ എല്ലാം സാധിക്കൂ. തൊഴിലാളിക്ക് മാതൃരാജ്യത്തേക്ക് പോകേണ്ടി വന്നാല്‍, ആധികാരികമായി രാജ്യം വിടാനുള്ള എക്സിറ്റ്‌/റീഎന്‍ട്രി രേഖകള്‍ക്കും സ്പോൺസറുടെ അനുമതി നിര്‍ബന്ധമാണ്. (കഴിഞ്ഞ മാര്‍ച്ചില്‍ പ്രാബല്യത്തില്‍ വന്ന പുതിയ സ്പോണ്‍സര്‍ഷിപ്പ് നിയമത്തില്‍ സ്പോണ്‍സറുടെ അനുമതി ഇല്ലാതെ തന്നെ നിബന്ധനകള്‍ക്ക് വിധേയമായി സ്പോസര്‍ഷിപ്പ് മാറ്റം, ഫൈനല്‍ എക്സിറ്റ്, റീ എന്‍ട്രി എന്നിവക്ക് അനുമതി ഉണ്ടെങ്കിലും പ്രായോഗിക തലത്തില്‍ അതിന്റെ ഗുണ ഫലങ്ങള്‍ വ്യക്തമാവണമെങ്കില്‍ ഇനിയും മാസങ്ങള്‍ കഴിയണം)

മാത്രമല്ല സൗദി നിയമ പ്രകാരം നിയമ വിരുദ്ധമാണെങ്കിലും ഭൂരിഭാഗം തൊഴിലാളികളുടെയും പാസ്പോര്‍ട്ടിന്റെ അനൗദ്യോഗിക സൂക്ഷിപ്പുകാരന്‍ മിക്കവാറും സ്പോൺസർ ആയിരിക്കും. സൗദിനിയമങ്ങളില്‍ പ്രത്യേകിച്ച് തൊഴില്‍ നിയമത്തില്‍ നല്‍കിയിട്ടുള്ള ഒരുപാട് തൊഴിലാളി അനുകൂല നിലപാടുകള്‍ തനിക്കനുകൂലമാക്കി മാറ്റുന്നതില്‍ നിന്നും മേല്പറഞ്ഞ കാരണങ്ങള്‍ കൊണ്ടുണ്ടാകുന്ന തൊഴിലുടമയോടുള്ള വിധേയത്വം അവനെ വിലക്കുന്നു.

എന്തൊക്കെ പ്രകോപനങ്ങള്‍ ഉണ്ടായാലും എല്ലാം സഹിച്ചു തന്റെ കണ്ണീരും വിയര്‍പ്പും നല്‍കി ഇവിടെ തുടരാനും ഒരുവേള ആടുജീവിതം നയിക്കാനും ഗള്‍ഫ്‌ ജീവിതം നെഞ്ചോട്‌ ചേര്‍ത്ത പ്രവാസികളെ പ്രേരിപ്പിക്കുന്നതും ഈ ഘടകങ്ങള്‍ തന്നെയാണ്.

ഹുറൂബ് ആകുന്നവരില്‍ നാല് വിഭാഗങ്ങള്‍

ഹുറൂബ് ആകുന്നവരില്‍ നാല് വിഭാഗങ്ങള്‍ ഉണ്ട്. ന്യായമായ സേവന വേതന ആനുകൂല്യങ്ങള്‍ സ്പോൺസറാൽ നിഷേധിക്കപ്പെടുമ്പോള്‍ അതിനെതിരെ തൊഴില്‍ കോടതിയെ സമീപിക്കുന്നതോടെ പ്രതികാര നടപടിയായി സ്പോണ്സര്‍ ഹുറൂബ് ആക്കുന്ന തൊഴിലാളികള്‍ ആണ് ആദ്യത്തെ വിഭാഗത്തില്‍ പെടുന്നവര്‍. കോടതിയില്‍ കേസ് നല്‍കി അതില്‍ തൊഴിലാളിക്ക് അനുകൂല തീര്‍പ്പുണ്ടായാലും പ്രതികാര നടപടിയായി ചില സ്‌പോണ്‍സര്‍മാര്‍ ‘ഹുറൂബ്’ ആക്കിയ സംഭവങ്ങള്‍ ഉണ്ടായിട്ടുണ്ട്.

മറ്റു പല കാരണങ്ങളാലും സ്പോൺസറുമായി ബന്ധപ്പെടാന്‍ കഴിയാതെയോ സ്പോൺസറുടെ പക്കല്‍ നിന്ന് ന്യായമായ അവകാശങ്ങള്‍ ലഭിക്കാതെയോ വരുമ്പോള്‍ അതിനെതിരെ തൊഴില്‍ കോടതിയെ സമീപിക്കാതെ ഒളിച്ചോടുന്ന വിഭാഗക്കാരാണ് രണ്ടാമത്തെ വിഭാഗം. സ്പോന്സരുടെ കീഴില്‍ ജോലി ചെയ്തു കൊണ്ടിരിക്കുമ്പോള്‍ തന്നെ നിസ്സാര കാര്യങ്ങള്‍ക്ക് പോലും ഹുറൂബാക്കപ്പെടുന്നവരാന് മൂന്നാമത്തെ വിഭാഗം. വിസ കച്ചവടത്തിന് വേണ്ടി ഹുറൂബ് ആക്കപ്പെടുന്നവരാന് നാലാമത്തെ വിഭാഗം.

ഹുറൂബ് ആക്കപ്പെടുന്ന സാഹചര്യങ്ങള്‍

സാഹചര്യങ്ങളാണ് ആദ്യ രണ്ടു വിഭാഗങ്ങളിലും തൊഴിലാളിയെ ഇതിനു പ്രേരിപ്പിക്കുന്നത് എങ്കിലും യാതൊരു ന്യായീകരണവുമില്ലാത്ത കടുത്ത മനുഷ്യാവകാശ ലംഘനമാന് ഹുറൂബ് ആക്കുന്നതിലൂടെ ഈ നാല് വിഭാഗത്തിലും ഉള്‍ക്കൊള്ളുന്നത്. സ്പോൺസറുടെ അറിവോടെ പുറത്തു ജോലി ചെയ്യുന്നവരാണെങ്കിലും സ്പോൺസർ നിഷ്കര്‍ഷിച്ചിട്ടുള്ള കൃത്യമായ ഇടവേളകളില്‍ കൃത്യമായി ബന്ധപ്പെട്ടിട്ടില്ലെങ്കിൽ അവരെ ഹുറൂബ് ആക്കുന്ന സ്പോൺസർമാരുണ്ട്.

സ്പോൺസർമാരുമായി ബന്ധപ്പെടുമ്പോള്‍ ഉണ്ടാകാന്‍ സാധ്യതയുള്ള പ്രശ്നങ്ങള്‍ (പ്രതിമാസ ഫീസ്‌ കൂട്ടി ചോദിക്കല്‍ തുടങ്ങിയവ) ഒഴിവാക്കാനായിയിരിക്കും ഇവര്‍ മിക്കവാറും ബന്ധപ്പെടാതിരിക്കുന്നത്. ഔദ്യോഗിക കാര്യങ്ങള്‍ക്ക് എജെന്റുമായി മാത്രം ബന്ധപ്പെട്ട് സ്പോണ്സറെ ഒരിക്കല്‍ പോലും ബന്ധപ്പെടാതിരുന്നവരെ അതേ കാരണം കൊണ്ട് തന്നെ ഹുറൂബാക്കിയ സ്പോൺസർമാരും ഉണ്ട്. പലരും തങ്ങളുടെ നിയമപരമായ കാര്യങ്ങള്‍ അതായത് ഇഖാമ പുതുക്കല്‍ തുടങ്ങിയവ ഏജന്റുമാര്‍ മുഖേന ചെയ്യിക്കും. പ്രസ്തുത ഏജന്റു പറ്റിക്കുമ്പോഴോ, സ്പോൺസറുമായി ശരിയായ രീതിയില്‍ ആശയവിനിമയം നടതാത്താതാവുമ്പോഴും തെറ്റിദ്ധരിക്കപ്പെട്ടു ഹുറൂബ് ആക്കപ്പെടുന്നവരും കുറവല്ല.

ഹുറൂബ് ആകുന്നവരില്‍ 90 ശതമാനവും നിയമവിരുദ്ധമായ ഫ്രീലാൻസർ പോലെ ജോലി ചെയ്യുന്ന സാധാരണക്കാര്‍ ആണ്. ഹുറൂബ്‌ ആക്കപ്പെടുന്നവരില്‍ ഉന്നത പദവികളിലുള്ള 10 ശതമാനം പേരും ഉള്‍പ്പെടുന്നുവെന്നത് അതിലേറെ വിചിത്രവും ഞെട്ടിപ്പിക്കുന്നതുമായ വസ്തുതയാണ്. ഹുറൂബിന്റെ മറ്റൊരു കാരണക്കാര്‍ അനധികൃത വിസാ കച്ചവടത്തില്‍ ഏര്‍പ്പെട്ടിട്ടുള്ള മദ്ധ്യവർത്തികളും ഏജന്റുമാരുമാണ്.

സൗദിയിലെ മാന്‍പവര്‍ കമ്പനിക്കാരുടെ അമിത ലാഭത്തിതിനുള്ള ആര്‍ത്തിയില്‍ കുടുങ്ങി ഹുറൂബായ പ്രവാസികളും കുറവല്ല. സൗദിയിലെ വിവിധ വ്യവസായങ്ങള്‍ക്കും കമ്പനികള്‍ക്കും ആവശ്യമായ തൊഴിലാളികളെ കരാടിസ്ഥാനത്തില്‍ എത്തിച്ചു കൊടുക്കുന്നവരാണ് ഇവിടുത്തെ മാന്‍പവര്‍ സപ്ലൈ കമ്പനികള്‍. കമ്പനികളില്‍ നിന്ന് ലഭിക്കുന്ന പ്രതിഫലത്തിന്റെ നല്ല ഒരു ഭാഗമെടുത്ത് ബാക്കി തൊഴിലാളിയുടെ ശമ്പളമായി കണക്കാക്കി നല്‍കുകയാണ് ഇവര്‍ ചെയ്യുന്നത്. നല്ല രീതിയില്‍ പ്രവര്‍ത്തിക്കുന്ന ഒരു പാട് മാന്‍പവര്‍ കമ്പനികള്‍ സൗദിയിലുണ്ട്. അതേ സമയം തന്നെ തൊഴിലാളികളെ വളരെ മോശമായ രീതിയില്‍ കൈകാര്യം ചെയ്യുന്ന ചില പ്രാദേശിക ഏജന്‍സികളാണ് ഇവര്‍ക്ക് അപവാദമാവുന്നത്.

പല വ്യാജ വാഗ്ദാനങ്ങളും നല്‍കി നാട്ടില്‍ നിന്നും ആളുകളെ കൊണ്ടുവരുന്ന ഏജന്‍സികള്‍ ഇത് പാലിക്കാറില്ല എന്ന് മാത്രമല്ല ഉള്ള ശമ്പളം കൂടി നല്‍കാറില്ല. പല ഏജന്‍സികളും ഒന്നോ രണ്ടോ മാസത്തെ ശമ്പളം കുടിശ്ശികയായി വാങ്ങി വെച്ചിട്ടുണ്ടാകും. സേവന വേതന വ്യവസ്തകളെക്കുറിച്ചു എന്തെങ്കിലും തര്‍ക്കമുണ്ടായാല്‍ ആ പണം പോലും നല്‍കാതെ സ്പോൺസറിൽ സമ്മര്‍ദ്ദം ചെലുത്തി ആ തൊഴിലാളിയെ ഹുറൂബ് ആക്കുന്നു.

നിരവധി സ്വദേശികള്‍ തങ്ങളുടെ കീഴില്‍ ജോലി ചെയ്യുന്ന വിദേശ ജോലിക്കാര്‍ക്ക് രണ്ടു വര്‍ഷത്തെ ഇഖാമയും വര്‍ക്ക്‌ പെര്‍മിറ്റും എടുത്ത ശേഷം പിന്നീട് അവര്‍ ഓടിപ്പോയെന്നു വ്യാജ പരാതി നല്‍കി അവരെ ഹുറൂബ്‌ ആക്കുകയും പിന്നീട് ആ രേഖകള്‍ ഉപയോഗിച്ച് പുതിയ വിസ കരസ്ഥമാക്കുകയും അവ വില്‍പ്പന നടത്തുയോ റിക്രൂട്ട്മെന്റ് നടത്തുകയോ ചെയ്തിരുന്നു. രണ്ടു വര്‍ഷത്തിനു ശേഷം മുന്‍പ് ഹുറൂബ്‌ ആക്കിയ തൊഴിലാളിയുടെ ഇഖാമ പുതുക്കേണ്ട സമയമാവുമ്പോള്‍ അയാളെയും കൂട്ടി അധികൃതരുടെ അടുത്ത് പോയി ഹുറൂബ്‌ നീക്കാനുള്ള അപേക്ഷ നല്‍കി ഹുറൂബ്‌ മാറ്റിയെടുക്കുകയും ചെയ്തിരുന്നു.

സൗദി തൊഴില്‍ നിയമത്തിലെ 74 മുതല്‍ 83 വരെയുള്ള വകുപ്പുകള്‍ തൊഴില്‍ കരാറിന്റെ റദ്ദാക്കലിനെ സംബന്ധിച്ചുള്ളതാണ്.ഇതില്‍ അഞ്ചാം അധ്യായത്തില്‍ മൂന്നാം ഭാഗത്തില്‍ വകുപ്പ് 80 പ്രകാരം ഒരു തൊഴിലുടമക്ക് തൊഴിലാളിയെ പിരിച്ചു വിടാന്‍ ആവശ്യമായ ഒന്‍പതു കാരണങ്ങള്‍ പറഞ്ഞിരിക്കുന്നു. സാധാരണ ഗതിയില്‍ നിയമപ്രകാരം ഒരു തോഴിലാളിയുടെ തൊഴില്‍ കരാര്‍ റദ്ദാക്കണമെങ്കില്‍ അതിനുള്ള കാരണങ്ങളും റദ്ദാക്കുന്നതിനു മുൻ‌കൂർ മുന്‍പുള്ള നോട്ടീസും തുടങ്ങിയ നടപടി ക്രമങ്ങള്‍ സ്പോണ്സര്‍ പാലിക്കേണ്ടതുണ്ട്.

എങ്കില്‍ തന്നെയും ഈ വകുപ്പ് പ്രകാരം പിരിച്ചു വിടൽ ഉണ്ടാവുകയാണെങ്കിൽ തൊഴിലാളിക്ക് തന്റെ ഭാഗം വിശദീകരിക്കുന്നതിനുള്ള അവസരം നല്‍കേണ്ടി വരുന്നു. അതുപോലെ പിരിച്ചുവിടല്‍ അന്യായമെങ്കിൽ തൊഴിലാളി തൊഴില്‍ കോടതിയെ സമീപിക്കുന്നതിനുള്ള സാധ്യതയും കൂടുതലാണ്. ഈ നടപടി ക്രമങ്ങളില്‍ നിന്നും രക്ഷപ്പെടുന്നതിനുള്ള ഒരു ഉപാധിയായിട്ടാണ് മിക്ക സ്പോണ്‍സര്‍മാരും ഹുറൂബിനെ ഉപയോഗിക്കുന്നത്.

ഹുറൂബ് ആക്കപ്പെടുമ്പോള്‍ നരക തുല്യമാകുന്ന പ്രവാസ ജീവിതം

തൊഴിലാളിയെ ഹുറൂബ് ആക്കുമ്പോള്‍ ആനുകൂല്യങ്ങളും അവകാശങ്ങളും നല്‍കല്‍, മുന്‍കൂര്‍ നോട്ടീസ്‌ നല്‍കല്‍, തൊഴിലാളിയുടെ വിശദീകരണം കേള്‍ക്കല്‍ എന്നീ ബാധ്യതകളില്‍ നിന്നെല്ലാം തൊഴിലുടമ മുക്തനാവുന്നു. ഹുറൂബ് ആക്കുന്നതോട് കൂടി തൊഴില്‍ കരാര്‍ റദ്ദാവുന്നു എന്ന് മാത്രമല്ല തൊഴിലാളിക്ക് നിയമപരമായ മറ്റു അവകാശങ്ങളെല്ലാം നഷ്ടമാവുകയും അത് പുനസ്ഥാപിക്കുന്നതിനു ശ്രമകരങ്ങളായ നടപടി ക്രമങ്ങളിലൂടെ കടന്നു പോകേണ്ടാതായും വരുന്നു. അത് പോലെ തന്നെ തൊഴിലാളിക്ക് നിയമപ്രകാരം നല്‍കേണ്ട എല്ലാ തൊഴില്‍ ആനുകൂല്യങ്ങളും നല്‍കുന്നതില്‍ നിന്നും സ്പോൺസർ രക്ഷപ്പെടുകയും ചെയ്യുന്നു. അയാള്‍ക്ക്‌ പ്രസ്തുത തൊഴിലാളിയെ നാട്ടിലെത്തിക്കുന്നതിനാവശ്യമായമായ വിമാന ടിക്കറ്റ് പോലും നല്‍കേണ്ടി വരുന്നില്ല.

ഹുറൂബ് ആയി പ്രഖ്യാപിക്കപ്പെട്ടു കഴിഞ്ഞാല്‍ അതിനിരയായ ആളുടെ ജീവിതം ചിന്തിക്കാന്‍ കഴിയാത്തത്ര നരകതുല്യമായി മാറുന്നു. അയാള്‍ക്ക്‌ ഈ രാജ്യത്തു നിയമപരമായി താമസിക്കാനുള്ള അവകാശം റദ്ദാവുകയും അനധികൃത താമസക്കാരനായി മാറുകയും ചെയ്യുന്നു. ഔദ്യോഗിക അനുമതി ഇല്ലാത്തതിനാല്‍ പിന്നീട് ഇവിടെ താമസിക്കുന്ന പ്രവാസികള്‍ക്ക് ലഭിക്കുന്ന എല്ലാ അവകാശങ്ങളും സൗകര്യങ്ങളും അയാള്‍ക്ക്‌ നിഷേധിക്കപ്പെടുന്നു. ആശുപത്രിയില്‍ ചികില്‍സ തേടാനോ തൊഴിലെടുക്കാണോ യാത്ര ചെയ്യാനോ രാജ്യത്തിന് പുറത്തു പോകാനോ സാധിക്കാതെ വരുന്നു.

ഇത്തരം അനധികൃത ജോലിക്കാരെ പിന്നീട് ജോലിക്ക് വെക്കുന്നവര്‍, വാഹനത്തില്‍ കൊണ്ട് പോകുന്നവര്‍ എന്നിവര്‍ക്കും ശിക്ഷ ലഭിക്കും. തൊഴിലാളി എന്ന നിലയിലും താമസക്കാരന്‍ എന്ന നിലയിലുമുള്ള എല്ലാ അവകാശങ്ങളും നിഷേധിക്കപ്പെടുന്നതോടെ പിന്നീട് സങ്കീര്‍ണ്ണമായ നടപടിക്രമങ്ങളിലൂടെ നാടുകടത്തല്‍ കേന്ദ്രമായ ‘തര്‍ഹീലി’ലൂടെ മാത്രം നാട്ടില്‍ പോകാന്‍ സാധിക്കൂ എന്ന അവസ്ഥ ഉണ്ടാകുന്നു.

ഒരിക്കല്‍ ഹുറൂബ് ആയി തര്‍ഹീല്‍ വഴി രാജ്യത്തു നിന്നും പുറത്താക്കപ്പെട്ടു കഴിഞ്ഞാല്‍ പിന്നീട് സൗദിയിലേക്ക് പുതിയ വിസയിൽ വരികയാണെങ്കിലും വിരലടയാളം പരിശോധിക്കുന്ന സമയത്ത് അയാളെപ്പറ്റിയുള്ള മുഴുവന്‍ വിവരങ്ങളും കമ്പ്യൂട്ടറില്‍ തെളിഞ്ഞു വരും. ഹുറൂബായി തര്‍ഹീല്‍ വഴി നാട്ടിലെത്തുന്ന പ്രവാസികള്‍ മറ്റു വിസയില്‍ തിരിച്ചെത്താന്‍ ശ്രമിക്കുന്നതിനിടെ വിമാനത്താവളത്തില്‍ വെച്ച് പിടിക്കപ്പെടും. സാധാരണഗതിയില്‍ ഇങ്ങനെ പിടിയിലാകുന്നവരെ എയര്‍പോര്‍ട്ടില്‍ നിന്ന് പുറത്തിറങ്ങാന്‍ പോലും അനുവദിക്കാറില്ല. കംപ്യുട്ടര്‍ നെറ്റ്‌വർക്ക് മൂലം പരസ്പരം ബന്ധപ്പെടുത്തുന്ന സാഹചര്യം ഉണ്ടായാല്‍ ജി.സി.സി രാജ്യങ്ങളിലേക്കും യാത്രാനിരോധനം ബാധകമാവും. ഹജ്ജിനും ഉംറക്കും മാത്രം അനുമതിയുണ്ടാവും.

സാമൂഹിക പ്രവര്‍ത്തകര്‍ ഇടപ്പെട്ടു രക്ഷപ്പെടുത്തുന്നവരെന്ന പേരില്‍ പത്രതാളുകളില്‍ നിറയുന്ന ഹുറൂബ്കാരുടെ വിജയ കഥകള്‍ യഥാര്‍ത്ഥത്തില്‍ അങ്ങിനെയല്ല. പ്രശ്നത്തിലിടപെടുന്ന സാമൂഹിക പ്രവര്‍തകര്‍ സ്പോണ്സറുമായുള്ള പ്രഥമ സംസാരത്തില്‍ തൊഴിലാളിയുടെ ന്യായമായ ആനുകൂല്യങ്ങള്‍ നല്‍കാന്‍ സ്പോണ്സര്‍ തയ്യാറല്ല എന്ന് കാണുന്നതോടെ ശരിയായ എക്സിറ്റ് നല്‍കിയാല്‍ മതി എന്ന ആവശ്യത്തിലേക്ക് വരുന്നു.

അങ്ങിനെ എക്സിറ്റ് ലഭിച്ചാല്‍ പോലും വലിയ വിജയമായാണ് ഹുറൂബുകാര്‍ കാണുന്നത്. കാരണം അവര്‍ക്ക് പിന്നീട് സൗദിയിലേക്ക് മറ്റു വിസകളില്‍ തിരിച്ചു വരാനും മറ്റു ജി.സി.സി രാജ്യങ്ങളിലേക്ക് നിയമപ്രകാരം പോകാനും ജോലിയെടുക്കാനും സാധിക്കും. അതുകൊണ്ടുതന്നെ ഹുറൂബാകുന്നവരില്‍ ബഹുഭൂരിഭാഗവും അവസാന ഘട്ടങ്ങളിൽ മറ്റൊന്നും ആവശ്യപ്പെടാറില്ല. ശരിയായ എക്സിറ്റില്‍ സൗദിയിൽ നിന്ന് പുറത്തു പോകാനുള്ള സ്‌പോൺസറുടെ അനുവാദമൊഴികെ. അതിനു വേണ്ടി തന്റെ മറ്റെല്ലാ ആനുകൂല്യങ്ങളും ത്യജിക്കാന്‍ അവന്‍ തയ്യാറാണ്. യഥാര്‍ത്ഥത്തില്‍ ഇവിടെ സ്പോണ്‍സര്‍ എന്ത് മനസ്സില്‍ കരുതിയോ അത് നടപ്പാകുന്നു.

ഹുറൂബില്‍ ആയ തൊഴിലാളി ഡീപോര്‍ട്ടേഷന്‍ സെന്ററിലെത്തിയാൽ ആദ്യം ലേബര്‍ വിഭാഗത്തില്‍ നിന്ന് അധികൃതര്‍ സ്‌പോണ്‍സറെ ബന്ധപ്പെടാന്‍ ശ്രമിക്കും. പരസ്പര ബാധ്യതകളോ മറ്റോ ഇല്ല എന്ന് ഉറപ്പു വരുത്തുന്നതിന് വേണ്ടിയാണത്. സ്‌പോണ്‍സരുമായി ബന്ധപ്പെടാന്‍ സാധിച്ചില്ലെങ്കില്‍ ഹുറൂബായ വിദേശിയുടെ വിരലടയാളം ശേഖരിച്ച് പൊലീസ് സ്‌റ്റേഷനുകള്‍ വഴി ഇയാള്‍ കുറ്റവാളിയല്ലെന്ന് ഉറപ്പു വരുത്തും. ഇതുകഴിഞ്ഞാല്‍ സ്വാഭാവികമായും എക്‌സിറ്റ് നല്‍കുകയാണ് ചെയ്യുന്നത്.

പാസ്സ്പോര്‍ട്ട് കൈവശം ഇല്ലാത്തവര്‍ക്ക് പാസ്പോര്‍ട്ട്‌ന്റെ കോപ്പിയുടെയോ തിരിച്ചറിയല്‍ രേഖകളുടെയോ അടിസ്ഥാനത്തില്‍ എംബസി നല്‍കുന്ന ഔട്ട് പാസ് ഉപയോഗിക്കാം. രോഗികളായ പലര്‍ക്കും സാമൂഹിക പ്രവര്‍ത്തകരുടെ ജാമ്യത്തില്‍ ഇത്തരത്തിലുള്ള നടപടി ക്രമങ്ങളില്ലാതെ തന്ന എക്‌സിറ്റ് നല്‍കാന്‍ സൗദി അധികൃതര്‍ സന്മനസ്സ് കാണിക്കാറുണ്ട്.

ഹുറൂബ് ആക്കിയാല്‍ എന്ത് ചെയ്യാന്‍ സാധിക്കും?

അന്യായമായാണ് ഹുറൂബാക്കിയെങ്കിൽ തക്ക സമയത്ത് അധികാര കേന്ദ്രങ്ങളെ സമീപിക്കുകയും താന്‍ ഒളിച്ചോടിയിട്ടില്ലെന്നു തെളിയിക്കുന്ന തരത്തിലുള്ള രേഖകള്‍ സമര്‍പ്പിക്കുകയും വേണം. സ്പോണ്സര്‍ ഹുറൂബ് ആക്കിയതിന് ശേഷം മാത്രമാണ് പലരും അതിനെതിരെ നടപടി എടുക്കുന്നതിനു സഹായം ആവശ്യപ്പെട്ട് സാമൂഹിക പ്രവർത്തകരെയോ നയതന്ത്ര കാര്യാലയങ്ങളെയോ സമീപിക്കുന്നത്.

ഹുറൂബ് ആകുമെന്ന സാഹചര്യത്തില്‍ സ്പോൺസറിൽ നിന്നും ഓടി രക്ഷപ്പെടുകയാണ് പ്രവാസി മലയാളികളില്‍ അധികം പേരും ചെയ്യുന്നതായി കണ്ടു വരുന്നത്. ഇത് ബുദ്ധി ശൂന്യതയാണെന്നു മാത്രമല്ല ഭാവിയില്‍ വളരെ ഗുരുതരമായ ഭവിഷ്യത്തുകള്‍ക്കു വഴിയൊരുക്കുകയും ചെയ്യും. സൗദിയിലെ ഇന്നത്തെ കഫാല സമ്പ്രദായത്തില്‍ സ്‌പോൺസറുടെ സഹകരണമില്ലാതെ തര്‍ഹീല്‍ വഴിയാണെന്കിലും പുറത്തു പോകാനാവില്ല. അല്ലാത്ത പക്ഷം അതിനായി ഉന്നത അധികൃതരുടെ വിധി തന്നെ വേണ്ടി വരും. അതിനാല്‍ ഒരു കാരണവശാലും ഒളിച്ചോടുന്നത് ബുദ്ധിയല്ല. അങ്ങിനെ ഒളിച്ചോടുന്നതിലൂടെ നിങ്ങളുടെ ഭാഗം വിശദീകരിക്കാനുള്ള അവസരം നിങ്ങള്‍ നഷ്ടപ്പെടുത്തുന്നു.

സ്പോണ്സര്‍ ഹുറൂബ് ആക്കും എന്ന് നൂറു ശതമാനം ഉറപ്പുണ്ടെങ്കില്‍ അതിനെ മുൻകൂട്ടി പ്രതിരോധിക്കാന്‍ ശ്രമിക്കാം. അന്യായമായ ആരോപണങ്ങള്‍ നിങ്ങളുടെ മേല്‍ ചുമത്തി ഹുറൂബ് ആക്കുന്നതിന് മുന്‍പ് തന്നെ കാര്യങ്ങള്‍ വിശദീകരിച്ചു കൊണ്ട് ഉത്തരവാദപ്പെട്ട അധികാര കേന്ദ്രങ്ങളില്‍ ഒരു പരാതിയെങ്കിലും നല്കുകക. അതിന്റെ ഒരു കോപ്പി കയ്യില്‍ കരുതുക. അതിലൂടെ നിങ്ങള്‍ ഒളിച്ചോടിയിട്ടില്ല എന്നും മറിച്ചുള്ള ആരോപണങ്ങള്‍ കളവാണ് എന്നും തെളിയിക്കാനും ഭാവിയില്‍ സ്പോൺസറിൽ നിന്ന് പ്രശ്നങ്ങളുണ്ടായാൽ പ്രതിരോധിക്കാനും നിങ്ങൾക്ക് സാധിക്കും. അതിനാവശ്യമെന്കില്‍ നയതന്ത്ര കാര്യാലയങ്ങളുടെയോ സാമൂഹിക പ്രവർത്തകരുടെയോ നല്ലവരായ സൗദി പൗരന്മാരുടെയോ സഹായം തേടുകയാണ് വേണ്ടത്.

വ്യാജ ഹുറൂബിനെതിരെ പോരാടി നീതി നേടിയ മലയാളി നഴ്സുമാര്‍.

വര്‍ഷങ്ങള്‍ക്ക് മുന്‍പ് തന്നെ റിയാദിലെ സ്വകാര്യ ആശുപത്രിയിലെ നഴ്‌സ്മാരായിരുന്ന മൂന്ന് മലയാളികള്‍ അത്തരമൊരു ബുദ്ധിപരമായ നീക്കത്തിലൂടെ ഹുറൂബ് ഒഴിവാക്കിയത് മലയാളി പ്രവാസി സമൂഹത്തിന് മികച്ച ഒരു ഉദാഹരണമായിരുന്നു. സാമൂഹിക പ്രവര്‍ത്തകരുടെ സഹായത്തോടു കൂടി വ്യാജ ഹുരൂബിനെതിരെ നടപടികള്‍ സ്വീകരിച്ച് ഇഖാമ പുതുക്കി തൊഴില്‍ വിസയില്‍ തുടരാന്‍ അനുമതി നേടിയവരാണ് റിയാദിലെ സ്വകാര്യ ആശുപത്രിയിലെ നഴ്‌സ്മാരായിരുന്ന ആലപ്പുഴ സ്വദേശിനി സ്മിത എഡ്‌വേര്‍ഡ്‌, എറണാകുളം സ്വദേശിനി വര്‍ഗീസ്‌ ബിന്‍സി, കോഴിക്കോട് സ്വദേശിനി അനുമോള്‍ ചാക്കോ എന്നിവര്‍.

പറഞ്ഞ ശമ്പളം നല്‍കാതെയും കാലാവധിക്കു ശേഷവും തൊഴില്‍ കരാര്‍ പുതുക്കാതെയും ഇവരെ ബുദ്ധിമുട്ടിച്ച സ്പോണ്സര്‍ പിന്നീട് എട്ടു മാസത്തെ ശമ്പള കുടിശ്ശികയും വരുത്തി. ഇതിനെതിരെ ഇവര്‍ ഇന്ത്യന്‍ എംബസിയില്‍ പരാതി നല്കി. തുടര്‍ന്ന് എംബസ്സിയുടെ അധികാരപത്രം ലഭിച്ച സാമൂഹിക പ്രവര്‍ത്തകര്‍ നടത്തിയ അന്വേഷണത്തില്‍ ഇത്ര വര്‍ഷം കഴിഞ്ഞിട്ടും ഇതില്‍ ഒരാള്‍ക്ക് ഇഖാമ എടുത്തിരുന്നില്ലെന്നും രണ്ടാളുടെ ഇഖാമ പിന്നീട് പുതുക്കിയിരുന്നുമില്ല എന്ന് കണ്ടെത്തി. തൊഴിലുടമയുമായി സംസാരിച്ച സാമൂഹിക പ്രവര്‍ത്തകര്‍ക്ക് സ്ഥാപനം നഷ്ടത്തിലായതിനാല്‍ മറ്റൊന്നും ചെയ്യാന്‍ കഴിയില്ലെന്ന ഉത്തരമാണ് ലഭിച്ചത്.

തനിക്കെതിരെ നിയമ നടപടികളുമായി നഴ്സുമാര്‍ മുന്നോട്ടു പോകുമെന്ന് ഉറപ്പായ സ്പോണ്സര്‍ ഇവര്‍ക്കെതിരെ ഒളിച്ചോടിപ്പോയവരാണെന്ന് കാണിച്ച് ജവാസാത്ത് അധികൃതര്‍ക്ക് പരാതി നല്കി‍ ‘ഹുറൂബ്’ ആക്കി. ഹുറൂബ് ആയവര്‍ക്ക് തൊഴില്‍ കോടതിയിലും ഗവര്‍ണറേറ്റിലും പിന്നീട് പരാതി നല്‍കാന്‍ കഴിയില്ല എന്ന വിശ്വാസത്തിന്റെ അടിസ്ഥാനത്തിലാണ് ഇത് ചെയ്തത്. എന്നാല്‍ അതിനു മുന്‍പ് തന്നെ ഇവര്‍ നേരത്തെ തന്നെ ഗവര്‍ണറേറ്റിലെ പരാതി പരിഹാര സെല്ലില്‍ പരാതി സമര്‍പ്പിച്ചിരുന്നു. ഇതറിയാത സ്പോണ്‍സര്‍ ഇവര്‍ വളരെ മുന്‍പ് തെന്നെ ഒളിച്ചോടിപ്പോയതാണെന്നും അതിനാല്‍ തനിക്ക് വളരെയധികം സാമ്പത്തിക നഷ്ടം ഉണ്ടായി എന്നും വാദിച്ചുവെങ്കിലും ഗവര്‍ണറേറ്റിലും ജവസാതിലും ഇരു കൂട്ടരും നല്‍കിയ പരാതികള്‍ താരതമ്യം ചെയ്ത അധികൃതര്‍ ഗവര്‍ണറേറ്റിലെ പരാതി വളരെ മുന്‍പ് തന്നെ സമര്‍പ്പിച്ചിരുന്നതാണെന്ന് കണ്ടെത്തി സ്പോണ്‍സര്‍ ജവാസാതില്‍ നല്‍കിയ പരാതി തള്ളി കളയുകയായിരുന്നു. ഇവര്‍ക്ക് ആവശ്യമെങ്കില്‍ സ്പോണ്‍സര്‍ഷിപ്പ് മാറ്റാനുള്ള അനുമതിയും ലഭിച്ചു.

ഹുറൂബ് ആക്കിയത് നേരായ മാര്‍ഗ്ഗത്തിലൂടെ അല്ലെന്ന് തെളിഞ്ഞാല്‍

തന്റെ പേരിലുള്ള ഹുറൂബ് പരാതി സത്യമല്ലെന്ന് വിദേശ തൊഴിലാളിക്ക് തെളിയിക്കാൻ സാധിക്കുന്ന പക്ഷം ഹുറൂബ് നീക്കം ചെയ്യുന്നതിന് വിദേശികൾക്കും സാധിക്കും. ഹുറൂബ് പരാതികളിൽ ആവശ്യമായ അന്വേഷണം നടത്തി നിജസ്ഥിതി മനസ്സിലാക്കിയ ശേഷം ഹുറൂബ് നീക്കം ചെയ്യുന്നതിന് ലേബർ ഓഫീസുകൾ നടപടി സ്വീകരിക്കും. ഇത്തരത്തിൽ കഴിഞ്ഞ മാസങ്ങളിൽ 1200 അപേക്ഷകളിൽ റിയാദ് പ്രവിശ്യയിൽപെട്ട ലേബർ ഓഫീസുകൾ മാത്രം നടപടികൾ പൂർത്തിയാക്കിയിട്ടുണ്ട്. വിദേശ തൊഴിലാളികളെ ഹുറൂബാക്കിയതിന് ശേഷം 20 ദിവസം കഴിഞ്ഞാൽ സ്പോൺസർമാർക്ക് പ്രത്യേക സാഹചര്യങ്ങളിലല്ലാതെ ഹുറൂബ് നീക്കം ചെയ്യാൻ സാധിക്കില്ല.

ഹുറൂബ് ആക്കിയത് വ്യാജ പരാതി നല്കിയിട്ടാണെങ്കിൽ അത് തെളിയുന്ന പക്ഷം വ്യാജ പരാതി നൽകിയ പഴയ തൊഴിലുടമയുടെ അടുത്തേക്ക് മടങ്ങുന്നതിന് ആ തൊഴിലാളിക്ക് നിയമം അനുവാദം നൽകുന്നില്ല. അത്തരം സാഹചര്യത്തിൽ ഇവർക്ക് മറ്റൊരു തൊഴിലുടമയുടെ പേരിലേക്ക് സ്‌പോൺസർഷിപ്പ് മാറ്റാവുന്നതാണ്.

വിദേശ തൊഴിലാളിയെ വ്യാജമായ പരാതി നൽകി ഹുറൂബാക്കിയതാണെന്ന് തെളിഞ്ഞാൽ സ്പോൺസർക്കെതിരെ കർശനമായ നടപടികൾ ഉണ്ടാവും. ആദ്യ കുറ്റത്തിന് വർക്ക് പെർമിറ്റ് പുതുക്കൽ ഒഴികെ തൊഴിൽ, സാമൂഹിക വികസന മന്ത്രാലയത്തിൽ നിന്നുള്ള എല്ലാ സേവനങ്ങളും ഒരു വർഷത്തേക്ക് സ്ഥാപനത്തിന് വിലക്കും. രണ്ടാമതും നിയമ ലംഘനം ആവർത്തിച്ചാൽ മൂന്നു വർഷത്തേക്ക് സേവനങ്ങൾ വിലക്കും. മൂന്നാമതും ആവർത്തിക്കുന്ന സ്ഥാപനങ്ങൾക്ക് വർക്ക് പെർമിറ്റ് പുതുക്കൽ ഒഴികെ തൊഴിൽ, സാമൂഹിക വികസന മന്ത്രാലയത്തിൽ നിന്നുള്ള എല്ലാ സേവനങ്ങളും അഞ്ചു വർഷത്തേക്ക് വിലക്കും.

ഹുറൂബ് ആകുന്നവരില്‍ വെറും ഒരു ശതമാനം പേര്‍ മാത്രമാണ് അന്യായ ഹുറൂബിനെതിരെ ലഭ്യമായ അനുകൂല നിയമ നടപടികള്‍ സ്വീകരിച്ചു നിയമ പോരാട്ടം നടത്തുന്നത്. ഹുറൂബ് ആയാല്‍ എല്ലാം കഴിഞ്ഞു എന്നാണു പൊതുവായ ധാരണ. എന്നാല്‍ ഏതു നിയമത്തിലും നിയമത്തെ ദുരുപയോഗം ചെയ്യുന്ന ആര്‍ക്കും നിയമ പരിരക്ഷ നല്‍കുന്നില്ല. അത് തെറ്റാണ് എന്ന് തെളിയിക്കാനുള്ള അവകാശം എതിര്‍ പാര്‍ട്ടിക്കും നിയമം നല്‍കുന്നുണ്ട്.

എന്ത് കൊണ്ട് പ്രവാസികള്‍ വ്യാജ ഹുറൂബിനെതിരെ നിയമ നടപടികള്‍ക്ക് മുതിരുന്നില്ല?

സൗദി നിയമങ്ങള്‍ വ്യാജ ഹുരൂബിനെതിരെ പല നിയമ പരിരക്ഷകളും വിദേശ തൊഴിലാളികള്‍ക്ക് നല്‍കുന്നുണ്ടെങ്കിലും മലയാളികള്‍ അടക്കമുള്ള ഭൂരിഭാഗം പ്രവാസികളും പരാതിയും നിയമ നടപടികളുമായി മുന്നോട്ടു പോകുന്നില്ല. അതിന് പല കാരണങ്ങളുമുണ്ട്. ഒന്നാമതായി സ്പോണ്‍സര്‍ക്കെതിരെ പരാതിയുമായി മുന്നോട്ടു പോയാല്‍ ആ തൊഴിലാളി ഒറ്റപ്പെട്ടു പോകും എന്നുള്ളത് തന്നെയാണ്. സൗദിയിലെ നിലവിലുള്ള നിയമ വ്യവസ്ഥിതിയും നടപടി ക്രമങ്ങളെയും കുറിച്ച് അറിയ്യാത്ത ഇവര്‍ക്ക് നടപടികളുമായി മുന്നോട്ടു പോകാന്‍ സാധിക്കില്ല. പ്രാഥമിക അനുരഞ്ജന കേന്ദ്രങ്ങളായ പ്രാദേശിക ലേബര്‍ ഓഫീസുകളെ പോലും ഭീതിയോടെ വീക്ഷിക്കുന്നവരാന് മലയാളി പ്രവാസികള്‍.

വിദേശത്ത് ജോലി ചെയ്യുന്ന പൗരന് നിയമ പരമായ ബുദ്ധിമുട്ടുകള്‍ ഉണ്ടായാല്‍ അവര്‍ക്ക് സഹായത്തിനു എത്തേണ്ടതാണ് അവരുടെ രാഹ്ജ്യത്തെ എമ്ബസ്സികള്‍. എന്നാല്‍ നിയമ നടപടികളുമായി മുന്നോട്ടു പോയാല്‍ ഇന്ത്യന്‍ എംബസ്സിയുടെ സഹകരണം പ്രതീക്ഷിച്ച പോലെ പ്രവാസിക്ക് ലഭിക്കുന്നില്ല. മാത്രമല്ല ശമ്പളവും താമസ സൌകര്യവും നിയമ നടപടികള്‍ മുന്നോട്ടു പോകുന്നത്ര കാലം സൗദിയില്‍ തന്നെ കഴിയുന്നതിനുള്ള പണവും ഇല്ലാതിരിക്കുന്ന അവസ്ഥയില്‍ മാനസികമായും സാമ്പത്തികമായും ഇവര്‍ തളര്‍ന്നു പോകുന്നു. അതുകൊണ്ട് തന്നെയാണ് ഇത്തരം സാഹചര്യങ്ങളില്‍ മലയാളികള്‍ അടക്കമുള്ള ഇന്ത്യന്‍ പ്രവാസികള്‍ നിയമ നടപടികള്‍ക്ക് മുതിരാതെ തര്‍ഹീല്‍ വഴി നാട്ടിലെക്കെത്താന്‍ മുന്‍ഗണന നല്‍കുന്നത്.

പ്രവാസികള്‍ക്ക് നീതി ലഭിക്കാന്‍ നിയമ നടപടികളുമായി മുന്നോട്ടു പോകാന്‍ എന്ത് പിന്തുണയാണ് ലഭിക്കേണ്ടത്?

മുകളില്‍ പറഞ്ഞ പോലെ തന്നെ നിയമ നടപടികളുമായി മുന്നോട്ടു പോകുമ്പോള്‍ അവര്‍ക്ക് ആശ്രയമായി എന്തെങ്കിലും സംവിധാനങ്ങള്‍ ഉണ്ടാവണം. എംബസ്സിക്കാണ് ഇക്കാര്യത്തില്‍ തങ്ങളുടെ സ്വന്തം പൗരന്മാരെ സഹായിക്കാന്‍ സാധിക്കുക. ഇന്ത്യക്കാര്‍ക്ക് നിലവില്‍ ഈ സഹായം ലഭിക്കുന്നില്ല. (സുഷമ സ്വരാജ് കേന്ദ്ര മന്ത്രിയായിരുന്ന സമയത്ത് മാത്രമാണ് ഇന്ത്യക്കാര്‍ക്ക് എംബസ്സി പിന്തുണ നിര്‍ലോഭം ലഭിച്ചിട്ടുള്ളത്. അത് കൊണ്ടുതന്നെ ആ കാലഘട്ടത്തില്‍ ഇന്ത്യന്‍ തൊഴിലാളികളോടെ വളരെ മോശമായി പെരുമാറുന്നതിനും സ്പോണ്‍സര്‍മാര്‍ തെല്ലു ഭയപ്പെട്ടിരുന്നു.).

മാനസികമായ പിന്തുണയ്ക്ക് പുറമേ നിയമ നടപടികളുമായി മുന്നോട്ടു പോകുന്ന സമയങ്ങളില്‍ പ്രതിമാസ അടിസ്ഥാനത്തില്‍ ആ തൊഴിലാളിക്ക് ഭക്ഷണത്തിനും അത്യാവശ്യകാര്യങ്ങള്‍ക്കുമായി ഒരു പ്രതിമാസ അലവന്‍സ് എംബസ്സി നല്‍കണം. സ്വദേശികളായ അഭിഭാഷകരെ ഏര്‍പ്പെടുത്തി ഇന്ത്യക്കാര്‍ക്ക് പ്രാഥമിക നിയമ സഹായങ്ങള്‍ ലഭ്യമാക്കണം. ഈ രണ്ടു കാര്യങ്ങള്‍ക്കും ആവശ്യമായ തുക പ്രവാസികളില്‍ നിന്നുതന്നെ പിരിച്ചെടുക്കുന്ന എംബസ്സിയുടെ വെല്‍ഫെയര്‍ ഫണ്ട് ഉപയോഗപ്പെടുത്താം.

കേസ് മുന്നോട്ടു കൊണ്ട് പോകാനാവശ്യമായ രേഖകള്‍ കൃത്യ സമയത്ത് തന്നെ തൊഴിലാളികള്‍ക്ക് ലഭ്യമാക്കി കൊടുക്കണം. ആവശ്യമായി വന്നാല്‍ തൊഴിലാളികളുടെ പ്രശ്നങ്ങളില്‍ ഇടപെടുന്നതിനുള്ള അനുമതി പത്രങ്ങള്‍ വെല്‍ഫെയര്‍ മെമ്പര്‍മാര്‍ക്ക് ലഭ്യമാക്കണം. ജയിലുകളും തര്‍ഹീലുകളും കൃത്യമായ ഇടവേളകളില്‍ സന്ദര്‍ശിക്കാനുള്ള സംവിധാനം ഇന്ത്യന്‍ എംബസ്സി ഉണ്ടാക്കണം. അവിടങ്ങളില്‍ ഉള്ളവര്‍ക്ക് നിയമ സഹായം ലഭ്യമാക്കുന്നതിനുള്ള സഹായങ്ങള്‍ ചെയ്തു കൊടുക്കണം. (ഇപ്പോഴത്തെ കുവൈറ്റ്‌ അംബാസഡര്‍ ആയ മലയാളിയായ സിബി ജോര്‍ജ്ജ് സൗദിയില്‍ ഡെപ്യൂട്ടി ചീഫ് ഓഫ് മിഷന്‍ ആയിരിക്കുമ്പോള്‍ ഇക്കാര്യങ്ങളില്‍ എംബസ്സി മികച്ച പ്രവര്‍ത്തനം കാഴ്ച വെച്ചിരുന്നു)

പ്രാഥമികമായി മുകളില്‍ പറഞ്ഞ കാര്യങ്ങള്‍ക്ക് പുറമേ എന്തൊക്കെ സഹായങ്ങള്‍ എംബസ്സി ചെയ്തു കൊടുക്കണമെന്ന് അക്കമിട്ട് പറയാന്‍ സാധിക്കില്ല. കാരണം ഒരു വിദേശ രാജ്യത്ത് തങ്ങളുടെ ഒരു പൗരന്‍ ഏതെങ്കിലും തരത്തിലുള്ള ബുദ്ധിമുട്ടുകള്‍ അനുഭവിക്കേണ്ടി വരുന്നുവെങ്കില്‍ അതിലിടപെടുകയും ആവശ്യാമായ സഹായങ്ങള്‍ ചെയ്തു കൊടുക്കുകയും ചെയ്യേണ്ടത് എംബസ്സിയുടേയും കോണ്‍സുലെറ്റിന്റെയും പ്രാഥമിക കര്‍ത്തവ്യമാണ്. അതിനെതൊക്കെ സഹായങ്ങള്‍ ആവശ്യമുണ്ടോ തങ്ങളുടെ അധികാര പരിധിയില്‍ നിന്ന് കൊണ്ട് അതെല്ലാം ചെയ്തു കൊടുക്കേണ്ടതുണ്ട്.

 

സൗദി നിയമങ്ങളും അന്യായമായ ഹുറൂബിനെതിരെ പോരാടാനുള്ള വഴികള്‍ തൊഴിലാളിക്ക് മുന്‍പില്‍ തുറന്നിട്ടുണ്ട്. എന്നാല്‍ തൊണ്ണൂറു ശതമാനം പേരും ഒന്നുമില്ലാതെ നിയമക്കുരുക്കുകള്‍ സൃഷ്ടിക്കുന്ന നിസ്സഹായതയില്‍ ‘തര്‍ഹീല്‍’ മുഖേന നോവുന്ന മനസ്സുകളുമായി നാടണയുന്നു. സൗദിയിലേക്കുള്ള പിന്മടക്കം സാധ്യമാവില്ലെന്ന ദുഃഖസത്യം ഉള്‍ക്കൊണ്ട്‌ തന്നെ.

 

അഡ്വ.ഷിയാസ് കുഞ്ഞിബാവ. കോര്‍പറേറ്റ് ലോയര്‍ & കണ്‍സല്‍ട്ടന്റ്. ദുബായ്,റിയാദ്,ഡല്‍ഹി,കൊച്ചി.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/HKliLEuOSKm9p27hj6dpJQ

LATEST

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

Published

on

എന്റെ ഭാര്യ വിസിറ്റിംഗ് വിസയിലാണ് സൗദിയില്‍ എത്തിയിട്ടുള്ളത്. അഞ്ചു ദിവസത്തെ ക്വാറന്റൈന്‍ കഴിഞ്ഞു. അതിന് ശേഷമുള്ള ആര്‍.ടി.പി.സി.ആറും കഴിഞ്ഞു. പക്ഷെ ഇപ്പോഴും തവക്കല്‍നയില്‍ സ്റ്റാറ്റസ് ഇന്‍സ്റ്റിറ്റ്യൂഷണല്‍ ക്വാറന്റൈന്‍ എന്ന് തന്നെയാണ് ഇപ്പോഴും കാണിച്ചു കൊണ്ടിരിക്കുന്നത്. ഇക്കാര്യത്തില്‍ എന്താണ് ചെയ്യാന്‍ സാധിക്കുക്?

വിസിറ്റ് വിസയിലും പുതിയ വിസയിലും സൗദിയില്‍ എത്തിയ ശേഷം ഇപ്പോള്‍ സമാനമായ പ്രശ്നം നേരിടുന്ന നിരവധി പേരുണ്ട്. അവരുടെ ആര്‍.ടി.പി.സി.ആര്‍ റിസള്‍ട്ട് ഇതുവരെ അപ്ഡേറ്റ് ആവാത്തത് കൊണ്ടാണ് ഇപ്പോഴും തവക്കല്‍ന സ്റ്റാറ്റസ് മാറാതെ ഇന്‍സ്റ്റിറ്റ്യൂഷണല്‍ ക്വാറന്റൈന്‍ എന്ന് തന്നെ ഇപ്പോഴും കാണിച്ചു കൊണ്ടിരിക്കുന്നത്.

ഇക്കാര്യത്തില്‍ ചില പ്രായോഗിക തടസ്സങ്ങള്‍ ഉണ്ടായിരുന്നതിനാല്‍ വിസിറ്റ് വിസയിലും പുതിയ വിസയിലും സൗദിയില്‍ എത്തിയവര്‍ക്ക് ഈ ന്യൂനത പരിഹരിക്കാന്‍ സാധിച്ചിരുന്നില്ല. മറ്റൊരു ആര്‍.ടി.പി.സി.ആര്‍ കൂടി സര്‍ക്കാര്‍ കേന്ദ്രത്തില്‍ നിന്നും അപ്പോയിന്റ്മെന്റ് എടുത്ത് ഈ ന്യൂനത പരിഹരിക്കാന്‍ സാധിക്കുമായിരുന്നു എങ്കിലും ഇവര്‍ക്ക് സിഹത്തി അപ്ളിക്കേഷന്‍ ഇല്ലാത്തത് മൂലമായിരുന്നു പ്രധാനമായും തടസ്സം നേരിട്ടിരുന്നത്.

അത് പോലെ തന്നെ ഇന്‍സ്റ്റിറ്റ്യൂഷണല്‍ ക്വാറന്റൈന്‍ എന്ന സ്റ്റാറ്റസ് കാണിക്കുന്നത് മൂലം ഇവര്‍ക്ക് തവക്കല്‍ന അപ്ളിക്കേഷന്‍ വഴി ആര്‍.ടി.പി.സി.ആര്‍ ബുക്ക് ചെയ്യാനും സാധിച്ചിരുന്നില്ല. ഈ സാഹചര്യത്തില്‍ പലരും ചെയ്തിരുന്നത്, എവിടെ നിന്നാണോ ആര്‍.ടി.പി.സി.ആര്‍ ചെയ്തത്, ആ സെന്ററില്‍ പോയി ഈ വിഷയം പറഞ്ഞു മനസ്സിലാക്കി അപ്ഡേറ്റ് ചെയ്യിക്കുക എന്നതാണ്. അതും പലപ്പോഴും പ്രായോഗികമായിരുന്നില്ല.

എന്നാല്‍ വിസിറ്റ് വിസയിലോ പുതിയ വിസയിലോ രാജ്യത്ത് എത്തിയവര്‍ക്ക് ഇപ്പോള്‍ സെഹത്തി അപ്ളിക്കേഷന്‍ വഴി ആര്‍.ടി.പി.സി.ആര്‍ ബുക്ക് ചെയ്യാന്‍ സാധിക്കുന്ന ഒരു സാഹചര്യം ഉണ്ടായിട്ടുണ്ട്. അതിനായി സെഹതി അപ്ളിക്കേഷന്‍ ഉണ്ടാക്കേണ്ട ആവശ്യമില്ല. ലോഗിന്‍ പേജില്‍ തന്നെയാണ് ഈ സൗകര്യം ലഭ്യമായിട്ടുള്ളത്. അതിലൂടെ ആര്‍.ടി.പി.സി.ആര്‍ ബുക്ക് ചെയ്യാന്‍ സാധിക്കും.

ലോഗിന്‍ പേജില്‍ ‘Welcom to Sehhaty’ എന്നതിന് താഴെയും Create Account, Sign In എന്നതിന് മുകളിലായും ‘Covid – 19 test appointment for border ID and GCC ID holders  എന്ന ഓപ്ഷന്‍ കാണാന്‍ സാധിക്കും. ഇതിലൂടെ അപ്പോയിന്റ്മെന്റ് എടുത്ത് ടെസ്റ്റ്‌ നടത്തിയാല്‍ നിങ്ങളുടെ തവക്കല്‍ന സ്റ്റാറ്റസ് ഇന്‍സ്റ്റിറ്റ്യൂഷണല്‍ ക്വാറന്റൈന്‍ എന്നതില്‍ നിന്നും ഇമ്മ്യൂണ്‍ എന്നായി മാറും. 

എനിക്ക് ചൊവ്വാഴ്ച യു.എ.ഇ യില്‍ നിന്നും സൗദിയിലേക്ക് യാത്ര ചെയ്യാന്‍ ടിക്കറ്റ് ബുക്ക് ചെയ്തിട്ടുണ്ട്. ഇപ്പോള്‍ ആര്‍.ടി.പി.സി.ആര്‍ റിസള്‍ട്ട് ലഭിക്കാന്‍ താമസം അനുഭവപ്പെടുന്നു എന്ന് സൗദിയില്‍ നിന്നും കഫീല്‍ വിളിച്ചു പറഞ്ഞിരുന്നു. വൈകീട്ടാണ് ഫ്ലൈറ്റ്. രാവിലെ പരിശോധനക്ക് സാമ്പിള്‍ കൊടുക്കാമെന്നാണ് കരുതിയിരുന്നത്. ഈ സാഹചര്യത്തില്‍ എന്താണ് ചെയ്യാന്‍ സാധിക്കുക?

ആര്‍.ടി.പി.സി.ആര്‍ റിസള്‍ട്ട് ലഭിക്കാന്‍ കാലതാമസം അനുഭവപ്പെടുന്നു എന്നത് വാസ്തവമാണ്. സമയത്തിനു റിസള്‍ട്ട് ലഭിക്കാതെ ഫ്ലൈറ്റ് വിട്ടു പോയ അനുഭവം പലര്‍ക്കും ഉണ്ടാകുന്നുണ്ട്. ഖത്തറിലും, യു.എ.ഇ യിലുമാണ് ഇപ്പോള്‍ ഈ ബുദ്ധിമുട്ട് അനുഭവപ്പെടുന്നത്. സൗദിയില്‍ നിലവില്‍ കാലതാമസം അനുഭവപ്പെടുന്നില്ല. പക്ഷെ വരും ദിവസങ്ങളില്‍ ഉണ്ടാവാന്‍ സാധ്യതയുണ്ട്. എയര്‍ ബബിള്‍ കരാര്‍ സര്‍വീസുകള്‍ ആരംഭിക്കുന്നത് ഈ സാഹചര്യം സങ്കീര്‍ണ്ണമാക്കിയേക്കാം.

യു.എ.ഇ യില്‍ സമയത്തിനു റിസള്‍ട്ട് ലഭിക്കാത്തതിനാല്‍ യാത്രയ്ക്കു വിമാനത്താവളത്തിലെത്തിയ പലർക്കും മടങ്ങേണ്ടി വന്നിട്ടുണ്ട്. പരിശോധനയ്ക്കു എത്തുന്നവരുടെ എണ്ണം കൂടിയതും ലാബ് ജീവനക്കാരിൽ പലർക്കും കോവിഡ് ബാധിച്ചതുമാണ് ഫലം വൈകാൻ കാരണമാവുന്നത്. അത് പോലെ തന്നെ പുതിയ നിയമം അനുസരിച്ച് സർക്കാർ ജീവനക്കാർക്ക് ഈ മാസം മുതൽ നെഗറ്റീവ് ഫലം നിർബന്ധമാക്കിയതും അവധിക്കു ശേഷം എത്തുന്ന വിദ്യാർഥികൾക്ക് പരിശോധനാഫലം ഹാജരാക്കേണ്ടി വരുന്നതും അതോടൊപ്പം യാത്രക്കാരല്ലാത്തവർ വിമാനത്താവളത്തിൽ പരിശോധിക്കാനെത്തുന്നതും കാര്യങ്ങള്‍ കൂടുതല്‍ വഷളാക്കുന്നു.

ഖത്തറിലും സമാന സാഹചര്യമാണുള്ളത്. ഖത്തറില്‍ സിദ്‌റ മെഡിക്കൽ സെന്ററിൽ അധികം തുക നല്‍കിയാല്‍ അടിയന്തര കേസുകളിൽ പെട്ടെന്ന് തന്നെ പരിശോധന ഫലം ലഭിച്ചിരുന്നു എങ്കിലും നിലവില്‍ അപ്പോയിന്റ്മെന്റ് ലഭ്യമാകാത്തത് യാത്രക്കാരെ ബുദ്ധിമുട്ടിലാക്കുന്നുണ്ട്.

അത് കൊണ്ട് മുന്‍ ദിവസങ്ങളെ പോലെ എട്ടു മണിക്കൂറിനുള്ളില്‍ റിസള്‍ട്ട് ലഭിക്കുമെന്ന പ്രതീക്ഷയില്‍ ആ സമയം കണക്കാക്കി യാത്രയ്ക്ക് തലേ ദിവസം ‍ടെസ്റ്റ് എടുത്തവർക്ക് യാത്ര ചെയ്യാനുള്ള സാധ്യതകള്‍ ഇപ്പോള്‍ ലഭ്യമല്ലതായേക്കാം. റിസള്‍ട്ട് ലഭിക്കാന്‍ ഇപ്പോള്‍ പല സ്ഥലങ്ങളിലും സാധാരണ സമയത്തെക്കാള്‍ ആറു മടങ്ങ്‌ സമയം എടുക്കുന്ന സാഹചര്യമാനുള്ളത്.

യാത്ര ചെയ്യാന്‍ പദ്ധതിയിട്ടിള്ളവര്‍ യാത്ര മുടങ്ങാതിരിക്കാന്‍ അതിനനുസരിച്ച് പ്ലാന്‍ ചെയ്യുകയാണ് വേണ്ടത്. ഖത്തറില്‍ നിന്നോ യു.എ.ഇ യില്‍ നിന്നോ സൗദിയിലേക്ക് യാത്ര ചെയ്യാന്‍ ഉദ്ദേശിക്കുന്നവര്‍ യാത്രക്കുള്ള സമയത്തിന്റെ 72 മണിക്കൂര്‍ ആയി കഴിഞ്ഞാല്‍ താമസിയാതെ തന്നെ സാമ്പിള്‍ കൊടുക്കുക.

(ഈ സാഹചര്യത്തില്‍ നാട്ടിലേക്ക് പോകുന്നവര്‍ പ്രത്യേകം ശ്രദ്ധിക്കേണ്ട മറ്റൊരു കാര്യം, അടിയന്തര സാഹചര്യങ്ങളിൽ പി.സി.ആർ ഇല്ലാതെ യാത്ര അനുവദിച്ചിരുന്ന സൗകര്യം കേന്ദ്രം നിർത്തലാക്കി എന്നതാണ്. അതിനാല്‍ ഉറ്റവര്‍ മരണപ്പെട്ട കാരണത്താല്‍ അടിയന്തിര യാത്രക്ക് ഒരുങ്ങുന്നവര്‍ ഈ കാര്യം പ്രത്യേകം ശ്രദ്ധിക്കുക. മുന്‍പ് ഡെത്ത് സര്‍ട്ടിഫിക്കറ്റ് ഹാജരാക്കിയാല്‍ പി.സി.ആര്‍ ഇല്ലാതെ യാത്രാനുമതി നല്‍കിയിരുന്നു എങ്കിലും ഇപ്പോള്‍ എയർസുവിധയിൽ നിന്ന് അനുമതി ലഭിക്കാത്തത് മൂലം യാത്ര മുടങ്ങും.)

എനിക്ക് ഈ മാസം 12 നാണ് നാട്ടിലേക്ക് ടിക്ക് ബുക്ക് ചെയ്തിട്ടുള്ളത്. ആ സമയത്ത് സൗദിയില്‍ നിന്നും ആര്‍.ടി.പി.സി.ആര്‍ റിസള്‍ട്ട് ലഭിക്കാന്‍ വൈകുമെന്നും കുറച്ചു റിയാല്‍ കൂടുതല്‍ കൊടുത്താല്‍ എട്ടു മണിക്കൂറിനുള്ളില്‍ തന്നെ റിസള്‍ട്ട് ലഭ്യമാക്കി തരാം എന്ന് ഒരു സുഹൃത്ത് പറയുന്നു. ഇതില്‍ എന്തെങ്കിലും അപകടമുണ്ടോ?

കുറുക്കു വഴികള്‍ എപ്പോഴും അപകടം ഉണ്ടാക്കും. സൗദിയില്‍ സമീപ ദിവസങ്ങളില്‍ വ്യാജ ആര്‍.ടി.പി.സി.ആര്‍ സര്‍ട്ടിഫിക്കറ്റുകള്‍ കണ്ടെത്തിയിട്ടുണ്ട്. സൗദി പബ്ലിക് ഹെല്‍ത്ത് അതോറിറ്റി അംഗീകാരം ഉള്ള സെന്ററുകളില്‍ നടത്തുന്ന പരിശോധനയുടെ ഫലം മാത്രമേ എയര്‍പോര്‍ട്ടുകളില്‍ സ്വീകരിക്കുകയുള്ളൂ. അതിനാല്‍ അക്കാര്യം ഉറപ്പു വരുത്തുക.

സൗദിയിലെ അംഗീകൃത കോവിഡ് പരിശോധന കേന്ദ്രങ്ങളുടെ പട്ടിക സൗദി പബ്ലിക് ഹെല്‍ത്ത് അതോറിറ്റി കഴിഞ്ഞ ദിവസം പുറത്തു വിട്ടിട്ടുണ്ട്. അത് താഴെ കൊടുക്കുന്നു. അത് പരിശോധിച്ച്, അംഗീകാരം ഉള്ള സെന്റര്‍ ആണോ എന്ന് ഉറപ്പു വരുത്തുക.

റിയാദ് പ്രവിശ്യ

  1. Dr. Sulaiman Al Habib Medical Hospitals Group
  2. Al Borg Medical Laboratories
  3. SMART LAB COMPANY
  4. Al-Farabi Medical Laboratory Company
  5. Specialized Medical Center Hospital
  6. Dallah Hospital
  7. Aldara Hospital and Medical Center
  8. Delta Medical Laboratories Company
  9. Mouwasat Hospital
  10. Hayat National Hospital
  11. Saudi Ajal Laboratories for Health Services
  12. Nourah Medical Company
  13. RIYADH CARE HOSPITAL
  14. Dar AlQanah Medical Laboratories
  15. Advanced Cell Laboratory
  16. Alfa medical laboratories
  17. Tetra Medical Laboratories
  18. Al-Arab Medical Laboratories
  19. One Touch Medical Laboratories
  20. Alhammadi hospital – Alnuzha
  21. Anwa Labs
  22. Integrated Care Medical Laboratory
  23. Hospital of Rana Medical Services Company -CityMed Hospital
  24. ELTA LAB
  25. Oxyhealth Medical Center
  26. NATIOAL HOSPITAL
  27. Dr. Samir medical laboratories
  28. international quality lab
  29. Basma Medical Laboratory Company

മക്ക

  1. AlFarabi Laboratory
  2. Al Borg Medical Laboratories
  3. Atba AlAsr General Medical Complex

ജിദ്ദ

  1. Al Borg Medical Laboratories
  2. International Medical Center
  3. House of Medicine Laboratory for medical analysis
  4. Dr. Soliman Fakeeh Hospital
  5. Hospital – Ghassan Naguib Pharaon
  6. Jeddah National Hospital
  7. Abu Al Khair Polyclinic
  8. Tibyana Medical Labs
  9. Al Mamlaka Medical Labs
  10. Dr. Samir Abbas Hospital Laboratory
  11. Saudi German Hospitals Group
  12. High Quality Clinical Lab’s
  13. Abeer Medical Company
  14. Dr. Erfan and Bagedo General Hospital
  15. Almostaqbal Hospital
  16. New Jeddah Clinic Hospital
  17. ‏Advanced Med Lab
  18. Noor Diagnostics and Discovery Laboratory
  19. Futurelab

കിഴക്കന്‍ പ്രവിശ്യ

ദമ്മാം

  1. Mouwasat Hospital
  2. Dar Afia Medical Company Clinics Complex
  3. Saudi German Hospital
  4. First Laboratory
  5. Arrawdha General Hospital
  6. Al Hokail Digital Academy Laboratory For Specialized Medical Analysis
  7. Al Borg Medical Laboratories
  8. Al Hyatt Medical Laboratory

അല്‍ ഖോബാര്‍

  1. Sulaiman Al Habib Medical Hospitals Group
  2. Almana General Hospital
  3. Modern Care Medical Complex Company
  4. AL HILAL ALZAHZBY Medical Laboratory

അല്‍ ഹസ

  1. Al Mousa Specialized Hospital
  2. Alahsa Hospital
  3. Johns Hopkins Aramco Healthcare

ജുബൈല്‍

  1. Mouwasat Hospital

ദഹറാന്‍

  1. Johns Hopkins Aramco Healthcare

ഖത്തീഫ്

  1. Al Farabi Laboratory

ഹഫര്‍ അല്‍ ബതീന്‍

  1. ‏Laboratory of Maroom medical services company
  2. Ezdan Medical Laboratories

അസീര്‍ പ്രവിശ്യ

ഖമിസ് മുശൈത്ത്

  1. Al Borg Medical Laboratories
  2. International outstanding lab
  3. Saudi German Hospital
  4. Hayat National Hospital
  5. ALFA LAB

അബഹ

  1. Abha International Private Hospital

മദീന പ്രവിശ്യ

മദീന

  1. Al Borg Medical Laboratories
  2. ‏ Hamid S. Al-Ahmadi and Partners Company
  3. BndrGene Medical Lab
  4. AL HAKEEM MEDICAL LABS

അല്‍ ഉല

  1. Prince Abdulmohsen General Hospital

ജസാന്‍ പ്രവിശ്യ

ജസാന്‍

  1. Hayat National Hospital
  2. Al Borg Medical Laboratories
  3. Al-Waseet Medical Complex
  4. Alemeis medical group
  5. Rassurance Medical Lab

ഹായില്‍ പ്രവിശ്യ

ഹായില്‍

  1. IBN SINA POLYCLINIC
  2. ALFARABI MEDICAL LAB

തബുക് പ്രവിശ്യ

തബുക്

  1. Al Borg Medical Laboratories

ദുബ

  1. Bassam Medical Center

ഖസീം പ്രവിശ്യ

ബുറൈദ

  1. Sulaiman Al Habib Medical Hospitals Group

ഉനൈസ

  1. Hayat National Hospital

നജ്റാന്‍ പ്രവിശ്യ

ഷറൊറ

  1. ALFARABI MEDICAL LAB

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading

LATEST

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

Published

on

  • സൗദിയില്‍ ബൂസ്റ്റർ ഡോസ് സ്വീകരിക്കാത്തവർക്ക് പ്രവേശനം നൽകുന്ന സ്ഥാപനങ്ങൾക്ക് 10,000 റിയാൽ വീതം പിഴ ചുമത്തുമെന്ന നിയമം വന്നതായി മെസേജുകള്‍ ലഭിക്കുന്നു. ഇത് വാസ്തവമാണോ?

ഭാഗികമായി ശരിയാണ്. ചില മേഖലയിലെ സ്ഥാപനങ്ങള്‍ക്ക് മാത്രമാണ് പിഴ നിര്‍ബന്ധമാക്കിയതായി ഔദ്യോഗികമായി വ്യക്തമാക്കിയിട്ടുള്ളത്. എന്നാല്‍ ഇത് നിലവില്‍ വരുന്നത് ഫെബ്രുവരി ഒന്ന് മുതല്‍ മാത്രമാണ്.

ടൂറിസം മന്ത്രാലയമാണ് നിബന്ധനകള്‍ വ്യക്തമാക്കിയിട്ടുള്ളത്. ടൂറിസം മേഖലാ സ്ഥാപനങ്ങൾക്ക് മാത്രമാണ് ഇത് ബാധകമാവുക. ട്രാവൽ ഏജൻസികൾ, ഹോട്ടലുകൾ, ടൂർ ഓപ്പറേറ്റർമാർ എന്നിവ അടക്കമുള്ള ടൂറിസം സ്ഥാപനങ്ങളിലേക്ക് പ്രവേശിക്കാന്‍ ബൂസ്റ്റര്‍ ഡോസ് നിബന്ധന ഫെബ്രുവരി ഒന്ന് മുതല്‍ പ്രാബല്യത്തിലാകും. നിയമം ലംഘിക്കുന്നവര്‍ക്ക് 10,000 റിയാൽ തോതിൽ പിഴ ചുമത്തും. നിയമ ലംഘനം ആവർത്തിക്കുന്ന സ്ഥാപനങ്ങൾക്ക് ഇരട്ടി തുക പിഴ ചുമത്തും.

  • എന്റെ ഭാര്യയെ വിസിറ്റിംഗ് വിസയിലാണ് കൊണ്ട് വന്നത്. തവക്കല്‍നയില്‍ വാക്സിന്‍ സര്‍ട്ടിഫിക്കറ്റുകള്‍ അപ്‌ലോഡ്‌ ചെയ്യുന്നതിന് വേണ്ടി ഞാന്‍ ഇവിടെ ഫിംഗര്‍ പ്രിന്റ്‌ വെച്ച് അബ്ഷീര്‍ അക്കൌണ്ട് ഉണ്ടാക്കിയിട്ടുണ്ട്. ഇപ്പോള്‍ ലോഗിന്‍ ആവുന്നുണ്ട് എങ്കിലും inactive user എന്നാണ് കാണിക്കുന്നത്. ഇനി എന്താണ് ചെയ്യേണ്ടത്?

Ministry of Interior കിയോസ്കിലെ മെഷീനില്‍ ഫിംഗര്‍ പ്രിന്റ്‌ വെച്ച് വെരിഫൈ ചെയ്തു കഴിഞ്ഞാല്‍ അക്കൌണ്ട് ആക്റ്റിവേറ്റ് ആവേണ്ടതാണ്. അബ്ഷീര്‍ അക്കൌണ്ട് തുറക്കുന്നതിനായി യൂസര്‍ നെയിമും പാസ് വേര്‍ഡും എന്റര്‍ ചെയ്യുമ്പോള്‍ നിങ്ങളുടെ രജിസ്ട്രേഡ് മൊബൈല്‍ നമ്പരിലേക്ക് ഓ.ടി.പി വരുന്നുണ്ടോ എന്ന് ശ്രദ്ധിക്കുക. ഓ.ടി.പി വരുന്നുണ്ടെങ്കില്‍ നിങ്ങളുടെ അബ്ഷീര്‍ അക്കൌണ്ട് ആക്റ്റിവേറ്റഡ്‌ ആണ്. കാരണം ആക്റ്റീവ് യൂസര്‍ക്ക് മാത്രമേ മൊബൈലിലൂടെ ഓ.ടി.പി ലഭിക്കൂ. ഇവര്‍ക്ക് ഓ.ടി.പി വരാതെ അക്കൌണ്ട് ഓപണ്‍ ചെയ്യാനും സാധിക്കില്ല.

എന്നാല്‍ മൊബൈലിലേക്ക് ഓ.ടി.പി വരാതെ തന്നെ അക്കൌണ്ട് ഓപണ്‍ ആക്കാന്‍ സാധിക്കുകയാണെങ്കില്‍ അക്കൌണ്ട് ആക്റ്റിവേറ്റ് ആയിട്ടില്ല എന്ന് മനസ്സിലാക്കാന്‍ സാധിക്കും. ഫോട്ടോ കാണിക്കുന്നുണ്ടോ എന്ന് നോക്കുക. ഫോട്ടോയും കാണിക്കുന്നുണ്ടെങ്കില്‍ ചിലപ്പോള്‍ താല്‍ക്കാലികമായ സിസ്റ്റം തകരാര്‍ ആകാനാണ് സാധ്യത. വിവരങ്ങള്‍ അപ്ഡേറ്റ് ആവാന്‍ സമയം എടുക്കുന്ന സാഹചര്യങ്ങളില്‍ അങ്ങിനെ സംഭവിക്കാറുണ്ട്. അത്തരം സന്ദര്‍ഭങ്ങളില്‍ അക്കൌണ്ട് ലോഗ് ഔട്ട്‌ ചെയ്ത ശേഷം വീണ്ടും ലോഗിന്‍ ചെയ്തു നോക്കുക.

  • ഞാന്‍ നാട്ടില്‍ നിന്നും രണ്ടു ഡോസ് വാക്സിന്‍ എടുത്ത് സൗദിയില്‍ എത്തിയതാണ്. ഇപ്പോള്‍ തവക്കല്‍നയിലൂടെ ബൂസ്റ്റര്‍ ഡോസ് ബുക്ക് ചെയ്യാന്‍ ശ്രമിക്കുമ്പോള്‍ ‘No data found’ എന്നാണു കാണിക്കുന്നത്. ബൂസ്റ്റര്‍ ഡോസിന് അപ്പോയിന്റ്മെന്റ് ലഭിക്കാന്‍ എന്താണ് ചെയ്യേണ്ടത്?

നിങ്ങള്‍ നാട്ടില്‍ നിന്നും രണ്ടു വാക്സിന്‍ എടുത്ത ആളാണെങ്കില്‍ അതിന്റെ വിവരങ്ങള്‍ തവക്കല്‍നയില്‍ അപ്ഡേറ്റ് ആയിരിക്കില്ല. അതിനാലാണ് ‘No data found’ എന്ന് കാണിക്കുന്നത്. അതിനാല്‍ തവക്കല്‍ന വഴി ബുക്ക് ചെയ്യാന്‍ സാധിക്കില്ല. നിങ്ങള്‍ക്ക് സെഹത്തി അപ്ളിക്കേഷന്‍ വഴി ബുക്ക് ചെയ്യാന്‍ സാധിക്കും. നിലവില്‍ അപ്പോയിന്റ്മെന്റ് ലഭിക്കുന്നത് കുറച്ചു ബുദ്ധിമുട്ടാണ്.

  • ഞാന്‍ രണ്ടാമത്തെ വാക്സിന്‍ എടുത്ത് മൂന്ന് മാസം കഴിഞ്ഞതാണ്. രണ്ടാമത്തെ വാക്സിന്‍ എടുത്തതിനു ശേഷം എട്ടു മാസത്തിനുള്ളില്‍ ബൂസ്റ്റര്‍ ഡോസ് എടുത്താല്‍ മതിയെന്നാണ് ഞാന്‍ മനസ്സിലാക്കുന്നത്. എനിക്ക് അവധിക്കായി പെട്ടെന്ന് നാട്ടിലേക്ക് പോകേണ്ടതുണ്ട്. ബൂസ്റ്റര്‍ ഡോസ് തിരിച്ചു വന്നിട്ട് എടുക്കാന്‍ ശ്രമിച്ചാല്‍ എന്തെങ്കിലും പ്രശ്നങ്ങള്‍ ഉണ്ടാകാന്‍ സാധ്യതയുണ്ടോ? പോകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്തൊക്കെയാണ്?

ചില കാര്യങ്ങളില്‍ മുന്‍ കരുതലുകള്‍ എടുക്കുന്നത് നല്ലതാണ്. ഈ വിഷയം സംബന്ധിച്ച പല കാര്യങ്ങളെ സംബന്ധിച്ചും പ്രവാസികളുടെ ചോദ്യങ്ങള്‍ക്ക് കഴിഞ്ഞ ദിവസങ്ങളില്‍ ഉത്തരങ്ങള്‍ നല്‍കിയിട്ടുണ്ട്. അതില്‍ പ്രധാനമാണ് റീ എന്‍ട്രി കാലാവധി, ഇഖാമ കാലാവധി, മൊബൈല്‍ റീചാര്‍ജ്ജ് എന്നിവ. ഇഖാമ, റീ എന്‍ട്രി തുടങ്ങിയവയുടെ ഓട്ടോമാറ്റിക് റിന്യൂവല്‍ നടന്നില്ലെങ്കില്‍ സ്പോണ്‍സര്‍ മുഖേന പുതുക്കാനുള്ള ധാരണ മുന്‍പേ ചെയ്തു വെക്കുക. തവക്കല്‍ന, സെഹത്തി, ഹെല്‍ത്ത് പാസ്പോര്‍ട്ട് സംബന്ധിച്ച വിഷയങ്ങളില്‍ മുന്‍പ് നല്‍കിയിട്ടുള്ള ഉത്തരങ്ങള്‍ വായിക്കുക.

പലരും അവഗണിക്കുന്ന ഒരു വിഷയമാണ് മൊബൈല്‍ ഫോണ്‍ സിം കാര്‍ഡ്. നിങ്ങള്‍ മൂന്ന് മാസത്തില്‍ കൂടുതല്‍ നാട്ടില്‍ നില്‍ക്കാന്‍ ഉദ്ദേശിക്കുന്നുവെങ്കില്‍ നിങ്ങളുടെ സൗദിയില്‍ ഉപയോഗിക്കുന്ന സിം കാര്‍ഡ് താല്‍ക്കാലികമായി റദ്ദാവാതിരിക്കാന്‍ ശ്രദ്ധിക്കുക. കാരണം മൊബൈല്‍ ഫോണ്‍ ആക്സസ് നഷ്ടപ്പെട്ടാല്‍ തിരിച്ചു വരുന്ന സമയത്തോ നാട്ടില്‍ കുടുങ്ങി പോകുന്ന സമയത്തോ സൗദിയില്‍ നിന്നും ലഭിക്കേണ്ട പല സേവനങ്ങളും നഷ്ടപ്പെടും.

സൗദിയില്‍ ഉപയോഗിക്കുന്ന സിം കാര്‍ഡ് നഷ്ടപ്പെടുകയോ റീ ചാര്‍ജ്ജ് ചെയ്യാത്തത് മൂലം താല്‍ക്കാലികമായി ഉപയോഗരഹിതമാവുകയോ ചെയ്ത നിരവധി പേര്‍ അബ്ഷീര്‍ പോലുള്ള സേവനങ്ങള്‍ ലഭിക്കാതെ നാട്ടില്‍ പ്രശ്നങ്ങള്‍ നേരിടുന്നുണ്ട്. സിം കാര്‍ഡ് നഷ്ടപ്പെടാതെ സൂക്ഷിക്കുക. നാട്ടിലുള്ളപ്പോഴും സിം കാര്‍ഡ് റീ ചാര്‍ജ്ജ് ചെയ്യാനുള്ള തയ്യാറെടുപ്പുകള്‍ കൈവശം കരുതുക.

നാട്ടിലേക്ക് പോകുന്ന സമയത്ത് പോകുമ്പോള്‍ തന്നെ മൊബൈല്‍ റീചാര്‍ജ്ജ് ചെയ്യുക. അതോടൊപ്പം റീ ചാര്‍ജ്ജ് കാര്‍ഡ് കൈവശം കരുതുക. അവസാനത്തെ റീ ചാര്‍ജ്ജിനു ശേഷം 90 ദിവസത്തിനുള്ളില്‍ റീ ചാര്‍ജ്ജ് ചെയ്തില്ലെങ്കില്‍ സേവനം നഷ്ടപ്പെടാന്‍ സാധ്യതയുണ്ട്. ഈ കാര്യവും യാത്രക്ക് മുന്‍പേ ശ്രദ്ധിക്കുക.

നാട്ടില്‍ പോകുവാന്‍ തയ്യാറെടുക്കുകയാണെങ്കില്‍ ബൂസ്റ്റര്‍ ഡോസ് എടുത്ത ശേഷം പോകുന്നതാണ് നല്ലത് എന്ന് തന്നെയാണ് വിദഗ്ദ അഭിപ്രായം. ആരോഗ്യപരമായും, തിരിച്ചു വരുമ്പോള്‍ യാത്രക്ക് ഉണ്ടാകാന്‍ സാധ്യതയുള്ള സാങ്കേതിക തടസ്സങ്ങള്‍ ഒഴിവാക്കാനും അതാണ്‌ നല്ലത്. താങ്കള്‍ തിരിച്ചു വരാന്‍ പദ്ധതിയിടുന്ന സമയത്ത് എന്താണ് സൗദിയിലെയും നാട്ടിലെയും രോഗ വ്യാപന അവസ്ഥ എന്ന് പ്രവചിക്കാന്‍ അസാധ്യമാണ്.

മരണ സംഖ്യയും ഗുരുതരാവസ്ഥയും കുറഞ്ഞിട്ടുണ്ടെങ്കിലും സൗദിയില്‍ രോഗബാധ സ്ഥിരീകരിച്ചവരില്‍ കൂടുതല്‍ പേര്‍ക്കും ഒമിക്രോണ്‍ ആണ് ബാധിച്ചതെന്നും നിലവില്‍ തീവ്രപരിചരണ വിഭാഗത്തില്‍ കഴിയുന്നവരില്‍ ഭൂരിഭാഗവും പൂര്‍ണ്ണമായ വാക്സിന്‍ കുത്തിവെപ്പുകള്‍ എടുക്കാത്തവരാണ് എന്നാണ് ആരോഗ്യ മന്ത്രാലയം വ്യക്തമാക്കുന്നത്. അതിനാല്‍ ആരോഗ്യപരമായി ചിന്തിക്കുകയാണെങ്കിലും ബൂസ്റ്റര്‍ ഡോസ് എടുക്കുന്നതാണ് ഉത്തമം.

ഓരോ ദിവസം കഴിയും തോറും രോഗികളുടെ എണ്ണം വന്‍ തോതിലാണ് വര്‍ദ്ധിച്ചു വരുന്നത്. ഒമിക്രോണിന്റെ വ്യാപന സ്വഭാവം കണക്കിലെടുത്താൽ വരും ദിവസങ്ങളിൽ സൗദിയിൽ ഒമിക്രോൺ വലിയ തോതിൽ വ്യാപിക്കുമെന്നാണ് പ്രതീക്ഷിക്കുന്നത്. ഏറ്റവും പുതിയ കണക്കുകള്‍ പ്രകാരം കഴിഞ്ഞ ദിവസം (5.1.2022) സൗദിയിൽ കോവിഡ് രോഗികളുടെ എണ്ണം 3000 കടന്ന് കഴിഞ്ഞിരിക്കുകയാണ്. 3045 പേർക്കാണ് കഴിഞ്ഞ ദിവസം പുതുതായി രോഗം കണ്ടെത്തിയത്. മൂന്ന് രോഗികൾ മരിച്ചു. 109 പേരുടെ നില ഗുരുതരമായി തുടരുന്നു. സൗദിയില്‍ മാത്രമല്ല യു.എ.ഇ, കുവൈത്ത്, ഖത്തർ, ബഹ്‌റൈൻ, ഒമാൻ എന്നീ രാജ്യങ്ങളിലും കൊറോണ കേസുകളിൽ വൻ വർധനയാണ് കഴിഞ്ഞ ദിവസം റിപ്പോര്‍ട്ട് ചെയ്യപ്പെട്ടിട്ടുള്ളത്.

ഇന്ത്യയിലും രോഗവ്യാപനം വളരെ കൂടുതലാണ്. സൗദിയില്‍ ലോക്ഡൌണും മറ്റു കര്‍ശന നടപടികളും ഉണ്ടാവില്ലെന്ന് കഴിഞ്ഞ ദിവസം അധികൃതര്‍ വ്യക്തമാക്കിയിട്ടുണ്ട് എങ്കിലും നാട്ടിലെ രോഗവ്യാപനം വര്‍ദ്ധിച്ചാല്‍ എന്തൊക്കെ നിയന്ത്രനങ്ങളായിരിക്കും ഏര്‍പ്പെടുത്തുക എന്ന് പറയാനും സാധിക്കില്ല. നേരിട്ടുള്ള പ്രവേശനത്തിന് വിലക്കോ, കര്‍ശന ക്വാറന്റൈന്‍ നിബന്ധനകളോ ഏര്‍പ്പെടുത്തിയാല്‍ തിരിച്ചു വരവ് സങ്കീര്‍ണ്ണമാവും.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/HKliLEuOSKm9p27hj6dpJQ

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading

LATEST

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

Published

on

  • എന്റെ മകള്‍ക്ക് സൗദിയിലെ ഒരു പ്രമുഖ ആശുപത്രിയിലേക്ക് റിക്രൂട്ട്മെന്റ് ഓഫര്‍ വന്നിട്ടുണ്ട്. ആവശ്യമനുസരിച്ച് പല ആശുപത്രികളില്‍ ജോലി ചെയ്യേണ്ടി വരുമെന്നും രണ്ടു വര്‍ഷത്തിനു ശേഷം മാത്രമേ തിരിച്ചു വരാന്‍ സാധിക്കൂ എന്നും പറയുന്നു. പ്രൊമെട്രിക് എക്സാം പാസ് സൗദിയില്‍ എത്തിയതിനു ശേഷം മാത്രം പാസായാല്‍ മതിയെന്നും പറയുന്നു. ആശുപത്രിയിലെ ഉത്തരവാദപ്പെട്ടവരുമായി ബന്ധപ്പെടാനുള്ള നമ്പര്‍ ചോദിച്ചിട്ട് ഇതുവരെ ലഭിച്ചിട്ടില്ല. ഈ സാഹചര്യത്തില്‍ പോകുന്നത് സുരക്ഷിതമാണോ?

ഓഫര്‍ ലെറ്ററും വ്യവസ്ഥകളും അറിയാതെ കൃത്യമായി പറയാന്‍ സാധിക്കില്ല. എങ്കിലും പൊതുവായി വിലയിരുത്തുമ്പോള്‍ ഓഫര്‍ വന്നിട്ടുള്ളത് മാന്‍പവര്‍ സപ്ലൈ സ്ഥാപനം വഴിയാണെന്ന് ഊഹിക്കുന്നു. നോര്‍ക്ക വഴിയും, ആശുപത്രി പ്രതിനിധികള്‍ നേരിട്ടോ പ്രമുഖ റിക്രൂട്ട്മെൻറ് ഏജൻസികളുടെ സഹായത്തോടെയോ ആണ് സാധാരണയായി റിക്രൂട്ട്മെന്റുകള്‍ നടത്താറുള്ളത്. കാര്യങ്ങളില്‍ രഹസ്യ സ്വഭാവം സൂക്ഷിക്കുന്നുണ്ടെങ്കില്‍ മാന്‍പവര്‍ സപ്ലൈ സ്ഥാപനം ആയിരിക്കണം റിക്രൂട്ട്മെന്റ് നടത്തുന്നത് എന്ന് അനുമാനിക്കാം.

സൗദിയിലെ ആശുപത്രികളിലേക്ക് പോകുമ്പോള്‍ ആശുപത്രികളുടെ നേരിട്ടുള്ള സ്പോണ്‍സര്‍ഷിപ്പിന് കീഴില്‍ പോകാന്‍ ശ്രദ്ധിക്കുക. ഇത്തരം ഇടനിലക്കാരെ ഒഴിവാക്കുന്നതാണ് നല്ലത്. ചൂഷണം കൂടുതലായിരിക്കും എന്നത് തന്നെ കാരണം. ഇങ്ങിനെ എത്തുന്നവരെ ആവശ്യാനുസരണം ഹോസ്പിറ്റലുകളിലെക്ക് ജോലിക്കായി അയക്കുകയാണ് ചെയ്യുക. ആശുപത്രി നല്‍കുന്ന മുഴുവന്‍ ശമ്പളവും നഴ്സിന് ലഭിക്കില്ല. ആശുപത്രിയും മാന്‍പവര്‍ സപ്ലൈ കമ്പനിയും തമ്മിലുള്ള ധാരണ പ്രകാരം പ്രതിഫലം വാങ്ങി അതില്‍ നിന്നും കമ്പനിയുടെ വിഹിതം എടുത്തതിനു ശേഷം മാന്‍പവര്‍ സപ്ലൈ കമ്പനിയും നഴ്സും തമ്മിലുള്ള കരാര്‍ പ്രകാരമുള്ള വേതനം മാത്രമേ ലഭിക്കൂ.

ശമ്പളത്തിന്റെ കാര്യത്തില്‍ മാത്രമല്ല, നേരിട്ടുള്ള റിക്രൂട്ട്മെന്റിലൂടെ വരുന്ന നഴ്സുമാര്‍ക്ക് ലഭിക്കുന്ന ആനുകൂല്യങ്ങളെക്കാള്‍ കുറഞ്ഞ ആനുകൂല്യങ്ങള്‍ ആയിരിക്കും മാന്‍പവര്‍ സപ്ലൈ കമ്പനി നല്‍കുക. പല സ്ഥലങ്ങളിലായി ജോലി ചെയ്യേണ്ടിയും വന്നേക്കാം. ആശുപത്രിയുടെ നേരിട്ടുള്ള സ്റ്റാഫ് അല്ലാത്തതിനാല്‍ ആനുകൂല്യങ്ങള്‍ കുറവുണ്ടാകും. താമസം തുടങ്ങിയ കാര്യങ്ങളിലും ആശുപത്രികള്‍ നേരിട്ട് നല്‍കുന്ന സൗകര്യങ്ങള്‍ ഉണ്ടാവാറില്ല.

മാന്‍പവര്‍ സപ്ലൈ കമ്പനിയുമായി രണ്ടു വര്‍ഷ കരാര്‍ ഒപ്പിട്ടിട്ടുണ്ടെങ്കില്‍ അതിനിടയില്‍ അത്യാവശ്യ സാഹചര്യങ്ങള്‍ ഉണ്ടായാല്‍ പോലും നാട്ടിലേക്ക് പോകാന്‍ അനുവാദം നല്‍കാത്ത നിരവധി സംഭവങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. തിരിച്ചു വന്നില്ലെങ്കിലോ എന്ന ഭീതി മൂലം പലപ്പോഴും വലിയ തുക സെക്യൂരിറ്റി ആയി നല്‍കിയും ആള്‍ ജാമ്യം നല്‍കിയും ഒക്കെയായിരിക്കും ഇത്തരത്തില്‍ എത്തിയ പല നഴ്സുമാരും അത്യാവശ്യ സാഹചര്യങ്ങളില്‍ നാട്ടിലേക്ക് പോകാന്‍ അനുവാദം നല്‍കുക.

അവകാശത്തിനു വേണ്ടി ശബ്ദിച്ചാല്‍ സൗദിയിലെ നിയമങ്ങളും നടപടി ക്രമങ്ങളും പറഞ്ഞു കൊണ്ട് നിശ്ശബ്ദരാക്കുകയും ചെയ്യും. പലപ്പോഴും കമ്പനിയുമായി പിണങ്ങുന്ന നഴ്സുമാര്‍ക്ക് നിയമ പ്രകാരമുള്ള ആനുകൂല്യങ്ങളോ എക്സ്പീരിയന്‍സ് സര്‍ട്ടിഫിക്കറ്റ് പോലുള്ളവയോ നല്‍കാതെ പറഞ്ഞയക്കുന്ന സാഹചര്യങ്ങളും ഉണ്ടാകുന്നുണ്ട്. നാട്ടില്‍ നിന്ന് പോകുമ്പോഴോ, സൗദിയില്‍ എത്തിയതിനു ശേഷമോ ഒപ്പിടുവിക്കുന്ന പല പേപ്പറുകളും ഉപയോഗിച്ചും ഭീഷണിപ്പെടുത്തുന്ന സംഭവങ്ങളും ഉണ്ടാകുന്നുണ്ട്.

നഴ്സുമാരുടെ സമ്മതമില്ലാതെ ഇഖാമ പുതുക്കിയ ശേഷം പിന്നീട് നാട്ടിലേക്ക് പോകുന്നതിനു വന്‍തുക ആവശ്യപ്പെട്ട സംഭവം പോലും ഉണ്ടായിട്ടുണ്ട്.  പലപ്പോഴും സഹായത്തിനു ആരുമില്ലാതെ ഏകപക്ഷീയമായി സപ്ലൈ കമ്പനിയുടെ ഏതാണ്ട് എല്ലാ ആവശ്യങ്ങളും അംഗീകരിച്ച് തിരിച്ചു പോരുകയാണ് നഴ്സുമാര്‍ ചെയ്യുന്നത്.

പ്രവൃത്തി പരിചയം അധികം ആവശ്യമില്ല, യോഗ്യത പരീക്ഷ നാട്ടില്‍ നിന്ന് തന്നെ പാസാകേണ്ടതില്ല, മറ്റു രാജ്യങ്ങളിലേക്ക് കുടിയേറാനുള്ള ഒരു വഴിയായി ഉപയോഗിക്കാം തുടങ്ങിയ വാഗ്ദാനങ്ങള്‍ നല്‍കിയാണ്‌ പലരെയും ഇത്തരക്കാര്‍ റിക്രൂട്ട് ചെയ്തു കൊണ്ട് വരുന്നത്. പലപ്പോഴും സൗദിയില്‍ എത്തിയതിനു ശേഷം മാത്രമായിരിക്കും തങ്ങള്‍ക്കും ആശുപത്രിക്കും ഇടയില്‍ മറ്റൊരു ഏജന്‍സി കൂടി ഉണ്ടെന്ന് നഴ്സുമാര്‍ മനസ്സിലാക്കുക.

അറിവില്ലായ്മ കൊണ്ട് പല നഴ്സുമാരും ചതിയില്‍ പെടുന്നുണ്ട്. അതുകൊണ്ട് തന്നെ രേഖകള്‍ നല്‍കുന്ന നടപടി ക്രമങ്ങളിലേക്ക് കടക്കുന്നതിനു മുന്‍പ് തന്നെ റിക്രൂട്ട്മെന്റ് നടത്തുന്നത് ആശുപത്രിയുടെ നേരിട്ടുള്ള സ്പോണ്‍സര്‍ഷിപ്പിനു കീഴിലാണ് എന്ന് ഉറപ്പു വരുത്തുക.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DtW7D99bYc62sJ1L3kbxwg

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading
LATEST2 weeks ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST2 weeks ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST2 weeks ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST3 weeks ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST3 weeks ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST4 weeks ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST4 weeks ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST4 weeks ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST4 weeks ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST4 weeks ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST4 weeks ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST1 month ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

LATEST1 month ago

ബൂസ്റ്റര്‍ ഡോസ് അപ്പോയിന്റ്മെന്റ്: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍, 22.12.2021

LATEST1 month ago

ഹാരീസ് ബീരാനും അജ്മല്‍ മുഫീദും കെ.എം.ഡബ്ലിയു.എ യുടെ പുതിയ സാരഥികള്‍. മലയാളി വിദ്യര്‍ത്ഥിനിക്ക് ആദരം

LATEST1 month ago

സൗദി അറേബ്യ വീണ്ടുമൊരു യാത്രാ നിയന്ത്രണത്തിലേക്കോ? സൗദി പ്രവാസികളുടെ ചോദ്യങ്ങള്‍ക്ക് മറുപടി.

LATEST2 weeks ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST4 weeks ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST4 weeks ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST4 weeks ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST4 weeks ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST3 weeks ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST3 weeks ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST2 weeks ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST2 weeks ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST4 weeks ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST4 weeks ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

Trending

error: Content is protected !!