Connect with us

LATEST

സൗദിയിലെ മലയാളികള്‍ അടക്കം അര ലക്ഷത്തില്‍ അധികം വിദേശികള്‍ ദുരിതത്തിലായ സൗദി ഓജറിന്റെ അസാധാരണ തകര്‍ച്ചയുടെ പിന്നാമ്പുറങ്ങള്‍

Published

on

സൗദി ഓജര്‍ കമ്പനിയുടെ പതനത്തിന് ശേഷം വര്‍ഷങ്ങള്‍ കഴിഞ്ഞിട്ടും എഞ്ചിനീയറായ മുഹമ്മദ്‌ റിയാദില്‍ ജോലി തേടി അലഞ്ഞു നടക്കുകയാണ്.

“ഇഖാമയില്ല. അതുകൊണ്ട് സ്ഥിരമായ ജോലിയില്ല. യാത്രാ വിലക്ക് മൂലം രാജ്യത്തിന്‌ പുറത്തേക്ക് പോകാന്‍ അനുമതിയില്ല. സൗദി ഓജറില്‍ ജോലി ഉണ്ടായിരുന്ന സമയത്ത് എടുത്ത വായ്പ തിരിച്ചടവ് മുടങ്ങിയതാണ് യാത്ര വിലക്കിന് കാരണമായത്. അത് കൊടുത്ത് തീര്‍ക്കാതെ ഫൈനല്‍ എക്സിറ്റ് വിസ കിട്ടില്ല. 3൦ വര്‍ഷത്തെ ഇ.എസ്.ബി കിട്ടാനുണ്ടായിരുന്നു. ഒരു ലക്ഷം റിയാലോളം വരും. എട്ടു മാസത്തെ ശമ്പളവും കിട്ടിയില്ല. ഇപ്പോള്‍ പുറത്ത് പോകുമ്പോള്‍ പോലീസ് ഇല്ലാത്ത സമയം നോക്കി പോകും. റോഡ്‌ ബ്ലോക്ക് ഉണ്ടെങ്കില്‍ ആ വഴി പോകില്ല. ഈ മണ്ണില്‍ എരിഞ്ഞു തീരനാകും വിധി”

സൗദിയില്‍ ഏറ്റവും നന്നായി ജീവിതം കഴിഞ്ഞു പോയിരുന്ന മുഹമ്മദിനെ പോലുള്ള 58,000 ത്തോളം പേര്‍ നരക സമാനമായ ജീവിതത്തിലേക്ക് വഴി മാറി പോകുന്നത് സൗദി ഓജറിന്റെ പതനത്തോടെയാണ്. കഴിഞ്ഞ 38 വര്‍ഷങ്ങളായി സൗദി അറേബ്യയിലെ മുന്‍ നിരനിര്‍മ്മാണ പ്രവര്‍ത്തങ്ങളില്‍ പങ്കാളികളായിരുന്ന പ്രമുഖ നിര്‍മ്മാണ കരാര്‍ കമ്പനിയായിരുന്നു സൗദി ഓജര്‍ കമ്പനി. തൊഴിലാളികളുടെ എണ്ണം കൊണ്ടും ഏറ്റെടുത്ത പദ്ധതികള്‍  കൊണ്ടും സൗദിയിലെ ഏറ്റവും വലിയ രണ്ടാമത്തെ കമ്പനി.

ഒരു കാലത്ത് മലയാളികള്‍ അടക്കമുള്ള പ്രവാസികള്‍ ജോലി ചെയ്യാനായി കൊതിച്ചിരുന്ന ഒരു കമ്പനിയായിരുന്നു സൗദി ഓജര്‍. 2൦൦൦ ത്തോടെ സൗദിയിലെ ഏറ്റവും മികച്ച കമ്പനികളില്‍ ഒന്നായി മാറിയ സൗദി ഓജര്‍ 2൦17 ഓടു കൂടി ഏറ്റവും പാപ്പരായ കമ്പനിയായി മാറിയാണ് പ്രവര്‍ത്തനം അവസാനിപ്പിച്ചത്. 300൦ കോടി റിയാലിന്റെ അആസ്തി ഉണ്ടായിരുന്ന കമ്പനിക്ക് പ്രവര്‍ത്തനം അവസാനിപ്പിക്കുന്ന സമയത്ത് ആസ്തികള്‍ ഒന്നും തന്നെ ഉണ്ടായിരുന്നില്ല. ബാങ്ക് അക്കൌണ്ടില്‍ ഉണ്ടായിരുന്നത് രണ്ടു ലക്ഷത്തില്‍ താഴെ റിയാല്‍ മാത്രവും.

മുന്‍ ലെബനന്‍ പ്രധാന മന്ത്രിയും കോടീശ്വരനുമായ റഫീക്ക് അല്‍ ഹരീരിയായിരുന്നു സൗദി ഓജർ കമ്പനിയുടെ സ്ഥാപകൻ. ലബനന്‍ രാഷ്ട്രീയ രംഗത്തും സാമ്പത്തിക രംഗത്തും ദശാബ്ദങ്ങളായി നിറഞ്ഞു നിന്ന വന്‍ കോടീശ്വരനും മുന്‍ പ്രധാന മന്ത്രിയുമായ സാദ് അല്‍ ഹരീരിയാണ് സൗദി ഓജര്‍ കമ്പനിയുടെ അവസാന കാലങ്ങളിൽ പ്രവര്‍ത്തനങ്ങള്‍ക്ക് നേതൃത്വം നല്‍കിയിരുന്നത്.

വര്‍ഷങ്ങള്‍ മുന്‍പ് വരെ മികച്ച നിലയിലായിരുന്നു കമ്പനിയുടെ പ്രവര്‍ത്തനം. എണ്ണ വിലയിടിവിനെ തുടര്‍ന്ന് ഉണ്ടായ സാമ്പത്തിക പ്രതിസന്ധി കമ്പനിയുടെ അടിത്തറ ഇളക്കി. കൂടാതെ മാനേജ്മെന്റ് രംഗത്ത് വന്ന വീഴ്ചകളും ശരിയായ തീരുമാനം തക്ക സമയത്ത് എടുക്കാന്‍ സാധിക്കാത്ത മേലധികാരികളും, ഉന്നത ഉദ്യോഗസ്ഥരുടെ കാര്യക്ഷമത കുറവും അഴിമതിയും കമ്പനിയെ പതനത്തിലേക്ക് നയിച്ചു.

റിയാദിലെ കിംഗ്‌ ഖാലീദ് എയര്‍പോര്‍ട്ട്, റാബിഗിലെ കിംഗ്‌ അബ്ദുള്ള സയന്‍സ് ആന്‍ഡ്‌ ടെക്നോളജി യൂണിവേഴ്സിറ്റി, മക്കയിലെ ലേ മെറിഡിയന്‍ ടവര്‍, വിദ്യാഭ്യാസ മന്ത്രാലയത്തിന്റെ ആസ്ഥാനം, റിയാദിലെ കിംഗ്‌ അബ്ദുള്‍ അസീസ്‌ ഫ്ലൈഓവര്‍, റിയാദിലെ കിംഗ്‌ അബ്ദുള്ള റോഡ്‌, റിയാദിലെ കിംഗ്‌ അബ്ദുള്ള ബിന്‍ അബ്ദുല്‍ അസീസ്‌ യൂണിവേഴ്സിറ്റി ഹോസ്പിറ്റല്‍, റിയാദിലെ റിറ്റ്സ് കാള്‍ട്ടന്‍ ഹോട്ടല്‍, റിയാദിലെ പ്രിന്‍സ് നൂറ ബിന്‍ത് അബ്ദുള്‍ റഹിമാന്‍ യൂണിവേഴ്സിറ്റി, റിയാദിലെ കിംഗ്‌ അബ്ദുല്‍ അസീസ്‌ കോണ്‍ഫ്രന്‍സ് സെന്റര്‍ എന്നിവയുടെ നിര്‍മ്മാണത്തിലും സൗദി ഓജർ പ്രധാന പങ്കു വഹിച്ചിരുന്നു.

1978 ലാണ് റിയാദ് ആസ്ഥാനമാക്കി ഒരു നിര്‍മ്മാണ കമ്പനി എന്ന നിലയില്‍ സാദ് ഹരീരിയുടെ പിതാവായ മുന്‍ ലെബനന്‍ പ്രധാന മന്ത്രി റഫീക്ക് അല്‍ ഹരീരി സൗദി ഓജർ കമ്പനി സ്ഥാപിക്കുന്നത്. 1965 ലാണ് റഫീക്ക് ഹരീരി ജോലിക്കായി സൗദി അറേബ്യയില്‍ എത്തുന്നത്. 1969 ല്‍ ഒരു ചെറിയ സബ്കോണ്ട്രാക്റ്റിംഗ് സ്ഥാപനം ആരംഭിച്ച് നിര്‍മ്മാണ രംഗത്തേക്ക് കടന്നു.

പിന്നീട് ഫ്രാന്‍സിലെ നിര്‍മ്മാണ സ്ഥാപനമായിരുന്ന ഓജറുമായി ചേര്‍ന്ന് തായിഫിലെ ഹോട്ടല്‍ നിര്‍മ്മാണം പൂര്‍ത്തിയാക്കി. കരാര്‍ സമയത്തിന് മുന്‍പ് തന്നെ നിര്‍മ്മാണം പൂര്‍ത്തിയാക്കി കൈമാറാന്‍ സാധിച്ചത് അന്നത്തെ സൗദി ഭരണാധികാരി ഖലീദ് രാജാവിന്‍റെ ശ്രദ്ധ പിടിച്ചു പറ്റിയതോടെയാണ് റഫീക്ക് ഹരീരിയുടെ ഭാഗ്യ ജാതകം ഉദയം കൊള്ളുന്നത്.

പിന്നീട് റഫീക്ക് ഹരീരി ഫ്രാന്‍സിലെ ഉടമസ്ഥരില്‍ നിന്നും ഓജര്‍ കമ്പനി ഏറ്റെടുത്തു പേര് സൗദി ഓജർ എന്നാക്കി മാറ്റി. സ്വകാര്യ കമ്പനിയായി ആയിരുന്നു എങ്കിലും പിന്നീട് വിപുലീകരണത്തിന് വേണ്ടി 1979 ല്‍ ഫ്രാന്‍സ് ആസ്ഥാനമാക്കി സൗദി ഓജർ ഇന്റര്‍നാഷണല്‍ എന്ന പേരില്‍ അന്താരാഷ്ട്ര കമ്പനിയാക്കി മാറ്റുകയായിരുന്നു.

എങ്കിലും കമ്പനിയുടെ 99 ശതമാനം ഷെയറുകളും റഫീക്ക് ഹരിരി കുടുംബത്തിന്റെ പക്കല്‍ തന്നെയായിരുന്നു. തുടര്‍ന്ന് സൗദിയിലെ വിവിധ പദ്ധതികള്‍ക്ക് വേണ്ടി വിവിധ ഡിവിഷനുകളും സബ്സീഡിയറികളും സ്ഥാപിച്ച് പ്രവര്‍ത്തനം വിപുലീകരിച്ചു.

സൗദി രാജകുടുംബത്തിന്റെ പിന്തുണയോടെ രാജ്യത്തെ പ്രധാനപ്പെട്ട എല്ലാ നിര്‍മ്മാണ കരാറുകളിലും പങ്കാളി ആവുകയായിരുന്നു സൗദി ഓജർ. ഖാലീദ് രാജാവുമായുള്ള അടുത്ത ബന്ധം ഉപയോഗിച്ച് ബിസിനസ് വളര്‍ത്തിയെടുത്ത റഫീക് ഹരീരി ചുരുങ്ങിയ കാലം കൊണ്ട് തന്നെ ശത കോടീശ്വരനായി മാറി. മിഡില്‍ ഈസ്റ്റ്, ആഫ്രിക്ക യൂറോപ്പ് എന്നിവിടങ്ങളില്‍ പദ്ധതികള്‍ ഏറ്റെടുത്ത് നടത്തി സൗദി ഓജർ കമ്പനി ലാഭത്തിലായി.

2010 ൽ മാത്രം സൗദി ഓജർ ശതകോടി ഡോളറുകള്‍ ലാഭമുണ്ടാക്കി. ഈ നൂറ്റാണ്ടിന്റെ ആരംഭമായപ്പോഴേക്കും സൗദിയിലെ ഏറ്റവും മികച്ച കമ്പനികളിലൊന്നായി സൗദി ഓജര്‍ മാറിയിരുന്നു. കോൺട്രാക്​ടിങ്​, റിയൽ എസ്​റ്റേറ്റ്, ടെലികോം, പ്രിൻറിങ്​, കമ്പ്യൂട്ടർ സേവനങ്ങള്‍ തുടങ്ങിയ മേഖലകളിലും സൗദി ഓജര്‍ അസൂയാവഹമായ പ്രകടനം കാഴ്ച വെച്ചിരുന്നു.

സൗദി ഓജര്‍ സ്ഥാപിക്കുന്ന സമയത്ത് റഫീക്ക് ഹരീരിക്ക് ലെബനന്‍ പൗരത്വത്തിനു പുറമേ സൗദി പൗരത്വം കൂടി നല്‍കി സൗദി അറേബ്യ ആദരിച്ചിരുന്നു. 1980 കളില്‍ കമ്പനി പ്രവര്‍ത്തനം മികവുറ്റ വിദഗ്ദരെ ഏല്‍പ്പിച്ച് റഫീക്ക് ഹരീരി രാഷ്ട്രീയ ഭാവി ലക്ഷ്യം വെച്ച് ലെബനനിലേക്ക് മടങ്ങി. 1992 മുതല്‍ 1998 വരെയും 2000 മുതല്‍ 2004 വരെയും ലെബനന്‍ പ്രധാന മന്ത്രിയായിരുന്നു റഫീക്ക് അല്‍ ഹരീരി. പിന്നീട് ബെയ്റൂട്ടിലെ സെന്റ്‌ ജോര്‍ജ്ജ് ഹോട്ടലില്‍ വെച്ച് നടന്ന സ്ഫോടനത്തില്‍ റഫീക്ക് ഹരിരി കൊല്ലപ്പെട്ടു.

റഫീക്ക് ഹരീരിക്ക് നിത ബസ്താനി എന്ന ഇറാഖി ഭാര്യയില്‍ ഉണ്ടായ മകനാണ് സൗദി ഓജറിന്റെ പിന്നീടുള്ള പ്രവര്‍ത്തനങ്ങള്‍ക്ക് നേതൃത്വം നല്‍കിയ സാദ് അല്‍ ഹരീരി. പിതാവിനെ പോലെ തന്നെ ബിസിനസ് കാര്യങ്ങളില്‍ അദ്ദേഹം നേരിട്ട് ഇടപെടാറില്ല. എല്ലാ കാര്യങ്ങളും നടത്തുന്നത് പ്രൊഫഷണല്‍ മാനേജ്മെന്റ് ആണ്. എങ്കിലും പ്രാധാനപ്പെട്ട തീരുമാനങ്ങള്‍ സാദ് ഹരീരിയുടെ അറിവോടെ മാത്രമേ നടക്കാറുള്ളൂ.

സൗദി രാജ കുടുംബത്തിന് ഏറെ പ്രിയപ്പെട്ടവനാണ് സാദ് അല്‍ ഹരിരി. 2009 മുതല്‍ 2011 വരെ ലെബനന്‍ പ്രധാന മന്ത്രിയായിരുന്നു സാദ് അല്‍ ഹരിരി.

1980 ല്‍ റിയാദില്‍ വെച്ചായിരുന്നു സാദിന്റെ ജനനം. ബിസിനസ് അഡ്മിനിസ്ട്രെഷനില്‍ യൂറോപ്യന്‍ ബിരുദമുള്ള ഇദ്ദേഹം ഇംഗ്ലീഷ്, ഫ്രഞ്ച്, ഇറ്റാലിയന്‍ ഭാഷകളില്‍ അവഗാഹമുള്ള വ്യക്തിയാണ്. പിതാവ് കൊല്ലപ്പെടുന്നത് വരെ സൗദി ഓജറിന്റെ പ്രവര്‍ത്തനങ്ങള്‍ക്ക് ചുക്കാന്‍ പിടിച്ചു സാദ് റിയാദില്‍ ഉണ്ടായിരുന്നു. പിതാവിന്റെ മരണ ശേഷം സാദ് ലെബനനിലേക്ക് മടങ്ങുകയായിരുന്നു. പിതാവിനെ പോലെ തന്നെ ലെബനന്‍ പൗരത്വം കൂടാതെ സൗദി പൗരത്വം കൂടി നല്‍കി സാദിനെ സൗദി അറേബ്യ ആദരിച്ചു.

വിവിധ രാജ്യങ്ങളില്‍ നിന്നുള്ള 58,000 ത്തോളം തൊഴിലാളികള്‍ സൗദി ഓജര്‍ കമ്പനിയില്‍ സാധാരണ ലേബര്‍ മുതല്‍ മാനേജര്‍ തസ്തിക വരെയുള്ള പദവികളില്‍ ജോലിയെടുക്കുന്നുണ്ടായിരുന്നു. ഇവരില്‍ 13500 ഓളം പേര്‍ സ്വദേശികളായിരുന്നു. 2013 വര്‍ഷത്തിലാണ് യഥാര്‍ത്ഥത്തില്‍ കമ്പനിയുടെ സാമ്പത്തിക പ്രതിസന്ധി തുടങ്ങുന്നത്. എണ്ണ വില കുത്തനെ ഇടിഞ്ഞതോടെ സര്‍ക്കാര്‍ മേഖലയിലെ നിര്‍മാണ പ്രവര്‍ത്തനങ്ങള്‍ നിലച്ചത് കമ്പനിയെ കൂടുതല്‍ പ്രതിസന്ധിയിലാക്കി. ദുരഭിമാനം മൂലം ആ അവസ്ഥ കുറച്ചു കാലം മൂടി വെച്ചുവെങ്കിലും ശമ്പളം കിട്ടാതെ 2016 ജൂലൈയില്‍ തൊഴിലാളികള്‍ പരസ്യമായി സമര രംഗത്ത് ഇതോടെയാണ് കമ്പനിയുടെ പ്രതിസന്ധി പരസ്യമായത്.

കമ്പനിയുടെ അവസാന കാലങ്ങളിൽ അനേക മാസങ്ങളായിട്ടും ശമ്പളം ലഭിക്കാത്ത ആയിരക്കണക്കിന് തൊഴിലാളികളാണ് ദുരിതത്തിലാണ് കഴിഞ്ഞിരുന്നത്. ഇതില്‍ നിരവധി മലയാളികളും ഉൾപ്പെട്ടിരുന്നു. പലർക്കും ഭക്ഷണം കഴിക്കാനുള്ള പണം പോലും ഇല്ലാത്തതിനാല്‍ നരക യാതന അനുഭവിക്കുകയായിരുന്നു ആ സമയങ്ങളിൽ. പലരുടെയും ഇഖാമ കാലാവധി അവസാനിച്ചിട്ടു നിരവധി മാസങ്ങളായെങ്കിലും പുതുക്കാനുള്ള നടപടികളൊന്നും കമ്പനിയുടെ ഭാഗത്ത് നിന്നും ഉണ്ടായിരുന്നില്ല.

പിരിഞ്ഞ് പോകുന്നവര്‍ക്ക് വിമാന ടിക്കറ്റ് പോലും നല്‍കാന്‍ കമ്പനിക്കായിരുന്നില്ല. ഫ്രാന്‍സില്‍ നിന്നുള്ള ഇരുന്നൂറോളം ഉദ്യോഗസ്ഥരും ശമ്പളം ലഭിക്കാതെ ദുരിതത്തിലാണെന്ന് ഫ്രഞ്ച് മാധ്യമങ്ങള്‍ റിപ്പോര്‍ട്ട് ചെയ്തത് ഈ വിഷയത്തില്‍ അന്താരാഷ്ട്ര ശ്രദ്ധ നേടിയിരുന്നു.

കടുത്ത സാമ്പത്തിക പ്രതിസന്ധി നേരിടുന്ന കമ്പനി സ്വമേധയാ തൊഴിലാളികള്‍ക്ക് ശമ്പള ബാക്കിയും ആനുകൂല്യങ്ങളും നല്‍കുമെന്ന് തൊഴിലാളികൾക്കും പ്രതീക്ഷയിലായിരുന്നു. സൗദി തൊഴില്‍ മന്ത്രാലയമോ മറ്റു ഉന്നത അധികാരികളോ ഈ കമ്പനിയില്‍ നിന്നും അത് വാങ്ങി തരുമെന്നും അവർ പ്രതീക്ഷിച്ചിരുന്നു.

നിര്‍മ്മാണം പൂര്‍ത്തിയാക്കിയ പല പദ്ധതികളില്‍ നിന്നും പണം ലഭിക്കാനുണ്ട് എന്നതാണ് കമ്പനിയെ പ്രതിസന്ധിയിലേക്ക് നയിച്ചതെന്നും കമ്പനി അധികൃതര്‍ പറയുന്നു. കമ്പനിയുടെ നിര്‍മ്മാണ വിഭാഗത്തിന്‍റെ പ്രവര്‍ത്തനം പിന്നീട് ഏതാണ്ട് പൂര്‍ണ്ണമായും നിലച്ചു. ശമ്പളം ലഭിക്കാത്തതിനാല്‍ മിടുക്കരായ പല തൊഴിലാളികളും കമ്പനിയില്‍ നിന്ന് സ്വമേധയാ വിടുതല്‍ വാങ്ങി മറ്റു കമ്പനികളിലേക്ക് മാറിയിരുന്നു.

ഇത്തരത്തില്‍ മാറി പോകുന്നവർക്ക് കൊടുക്കാനുള്ള ശമ്പള ബാക്കി പിന്നീട് നൽകാമെന്ന് എഴുതി കൊടുക്കുന്നതല്ലാതെ പണം നല്‍കാനുള്ള നീക്കമൊന്നും കമ്പനിയുടെ ഭാഗത്ത് നിന്ന് ഉണ്ടായിരുന്നില്ല. കൊടുക്കാനുള്ള തുക തവണകളായി നല്‍കുമെന്ന് കമ്പനി ഉറപ്പ് നല്‍കിയിരുന്നുവെങ്കിലും ഒന്നും നല്‍കാതെ ലേബര്‍ ക്യാമ്പിലെ കമ്പനി ഓഫീസ് പൂട്ടി കമ്പനി അധികൃതര്‍ സ്ഥലം വിടുകയാണ് പിന്നീട് ഉണ്ടായത്.

ഇതിനിടയിൽ ഇഖാമ പുതുക്കാത്തതിനാൽ തൊഴിലാളികൾ നരക യാതനയിലായി. തൊഴില്‍ മന്ത്രാലയത്തിന്റെ വേതന സുരക്ഷാ പദ്ധതി അനുസരിച്ച് തൊഴിലാളികള്‍ക്ക് ശമ്പളം നല്‍കാത്തതിനാല്‍ സൗദി ഓജര്‍ കമ്പനിക്കുള്ള സേവനങ്ങള്‍ തൊഴില്‍ മന്ത്രാലയം നിര്‍ത്തി വെച്ചിരുന്നു. ഇത് മൂലമാണ് തൊഴിലാളികളുടെ ഇഖാമകള്‍ പുതുക്കാന്‍ സാധിക്കാത്തത് എന്നായിരുന്നു കമ്പനി അധികൃതരുടെ വാദം. ഗോസിയും (ജനറല്‍ ഓര്‍ഗനൈസേഷന്‍ ഫോര്‍ സോഷ്യല്‍ ഇന്ഷുറന്സ്) പിന്നീട് സൗദി ഓജറിനുള്ള സേവനങ്ങള്‍ നിര്‍ത്തി വെച്ചു.

മാസങ്ങളായി ശമ്പളം ലഭിക്കാത്തതിനാല്‍ തൊഴിലാളികള്‍ കമ്പനിയുടെ ജിദ്ദ ഓഫീസിന് മുന്‍പില്‍ നടത്തിയ രോഷപ്രകടനം അക്രമാസക്തമായിരുന്നു. രോഷാകുലരായ തൊഴിലാളികള്‍ കമ്പനിയുടെ ഓഫീസില്‍ നിര്‍ത്തിയിട്ടിരുന്ന നിരവധി വാഹനങ്ങള്‍ അടിച്ചു തകര്‍ക്കുകയും അഗ്നിക്കിരയാക്കുകയും ചെയ്തിരുന്നു. പോലീസും സിവില്‍ ഡിഫന്‍സും സ്ഥലത്തെത്തിയാണ് തൊഴിലാളികളെ ശാന്തരാക്കിയത്. പിന്നീട് തൊഴിലാളികള്‍ ജിദ്ദയിലെ ഇന്റര്‍സെക്ഷനില്‍ തടിച്ചു കൂടി ഗതാഗതം സ്തംഭിപ്പിക്കുകയും പെട്രോള്‍ പമ്പ് ബലമായി അടപ്പിക്കുകയും ചെയ്തു. പിന്നീട് പോലീസ് എത്തി ഇവരെ പിരിച്ചു വിടുകയായിരുന്നു.

സൗദി ഓജര്‍ കമ്പനിയുടെ പ്രശ്നങ്ങള്‍ക്ക് പരിഹാരം കാണുന്നതിനായി തൊഴില്‍ മന്ത്രാലയം ഒരു കമ്മിറ്റി രൂപീകരിച്ചിരുന്നു. കമ്മിറ്റിയുടെ പ്രവര്‍ത്തനങ്ങള്‍ക്ക് മാര്‍ഗ്ഗ നിര്‍ദ്ദേശങ്ങള്‍ നല്‍കുന്നതി റിയാദ് ഗവര്‍ണറേറ്റില്‍ നിന്നായിരുന്നു. എങ്കിലും തൊഴിലാളികളുടെ ദുരിതങ്ങള്‍ കുറയ്ക്കുന്നതിനോ ശമ്പളമോ ഭക്ഷണമോ ലഭ്യമാക്കുന്നതിനുള്ള നടപടികളോ പിന്നീട് ഉണ്ടായിട്ടില്ല.

ലോകമാനമുള്ള തൊഴിലാളികള്‍ ഉണ്ടായിരുന്നത് കൊണ്ട് സൗദി ഓജര്‍ തൊഴിലാളി പ്രശ്നം ലോക ശ്രദ്ധ ആകര്‍ഷിക്കുകയും വിവിധ രാജ്യങ്ങള്‍ തങ്ങളുടെ തൊഴിലാളികളുടെ പ്രശ്നങ്ങള്‍ക്ക് പരിഹാരം കാണണമെന്ന് ആവശ്യപ്പെട്ടു സൗദി സര്‍ക്കാരില്‍ സമ്മര്‍ദ്ദം ചെലുത്തുകയും ചെയ്തതിന്റെ ഫലമായി തൊഴിലാളികളുടെ പ്രശ്നങ്ങള്‍ക്ക് എത്രയും പെട്ടെന്ന് പരിഹാരം കാണണമെന്ന് സൗദി ഭരണാധികാരി സല്‍മാന്‍ രാജാവ് കര്‍ശന നിര്‍ദ്ദേശം നല്‍കിയിരുന്നു. മാസങ്ങളായി ജോലിയും ശമ്പളവും ഇല്ലാതെ നരകിക്കുന്ന തൊഴിലാളികള്‍ക്ക് സഹായമായി സല്‍മാന്‍ രാജാവ് പത്തു കോടി റിയാല്‍ അനുവദിച്ചു. അന്ന് സൗദി ബിന്‍ ലാദിന്റെയും ഓജറിന്റെയും തൊഴിലാളികളാണ് ദുരിതത്തില്‍ കഴിഞ്ഞിരുന്നത്. പക്ഷെ ഓജറിന്റെ തൊഴിലാളികള്‍ തുടര്‍ന്നും ദുരിതത്തിലായിരുന്നു.

ഇതിനെ തുടർന്ന് സൗദി ഓജര്‍ കമ്പനിയുടെ സാമ്പത്തിക പ്രശ്നങ്ങള്‍ക്ക് പരിഹാരം കാണുന്നതിനും തൊഴിലാളികളുടെ മുടങ്ങി കിടക്കുന്ന ശമ്പളവും മറ്റു ആനുകൂല്യങ്ങളും ലഭ്യമാക്കുന്നതിനുള്ള വഴികള്‍ കാണുന്നതിനുമായി സൗദി ഓജര്‍ ഉടമയും മുന്‍ ലെബനന്‍ പ്രധാന മന്ത്രിയുമായ സാദ് അല്‍ ഹരിരി സൗദിയില്‍ എത്തിയതായി റിപ്പോര്‍ട്ട് ചെയ്യപ്പെട്ടിരുന്നു. എന്നാല്‍ എല്ലാവരും പ്രതീക്ഷിച്ചത് പോലെ തൊഴിലാളികളുടെ വിഷയത്തില്‍ തീരുമാനങ്ങള്‍ ഒന്നും തന്നെ ഉണ്ടായില്ല. ഹരീരി അല്‍ സഫാ കൊട്ടാരത്തിലെത്തി സല്‍മാന്‍ രാജാവിന്റെ ആതിഥ്യം സ്വീകരിച്ച് മടങ്ങി പോയി.

എണ്ണ വിലയിടിവ് മൂലവും സൗദി സര്‍ക്കാരില്‍ നിന്നും ലഭിക്കാനുള്ള തുക ലഭിക്കാതെ നീണ്ടു പോകുന്നത് മൂലവുമാണ് കമ്പനിക്ക് പ്രതിസന്ധി ഉണ്ടായത് എന്നായിരുന്നു കമ്പനിയുടെ നിലപാട്. അതിനു പുറമേ തൊഴിലാളികള്‍ക്ക് നല്‍കാനുള്ള തുകകള്‍ നല്‍കാതെ ബില്ലുകള്‍ പാസ്സാക്കി നല്‍കരുതെന്ന സല്‍മാന്‍ രാജാവിന്റെ നിര്‍ദ്ദേശവും സര്‍ക്കാരില്‍ നിന്നും തുക ലഭിക്കുമെന്ന കമ്പനിയുടെ പ്രതീക്ഷകള്‍ക്ക് വിഘാതമായി.

സൗദി ഓജര്‍ കമ്പനിയുടെ ഉടസ്ഥാവകാശം സൗദി സര്‍ക്കാരിനോ രാജകുടുംബത്തിലെ ഏതെങ്കിലും അംഗത്തിനോ കൈമാറാനുള്ള ചര്‍ച്ചകളായിരുന്നു പിന്നീട് നടന്നത്. കമ്പനി ഏറ്റെടുക്കുന്നതിന് സൗദി ഗവണ്‍മെന്റ് താല്‍പര്യം പ്രകടിപ്പിച്ചതായി ലബനാനിലെ അല്‍ അഖ്ബാര്‍ ദിനപത്രം റിപോര്‍ട്ട് ചെയ്യുകയും ചെയ്തു. ഇതിന്റെ മുന്നോടിയായി കൈമാറ്റം സംബന്ധിച്ച് ഹരീരിയും സൗദി ഗവണ്‍മെന്റും തമ്മിലുള്ള ചര്‍ച്ചകള്‍ അവസാനഘട്ടത്തിലാണെന്ന് റിപ്പോര്‍ട്ടില്‍ സൂചിപ്പിച്ചിരുന്നു.

സര്‍ക്കാരിനോ രാജകുടുംബത്തിലെ അംഗങ്ങള്‍ക്കോ കമ്പനി കൈമാറുന്നത് മൂലം സര്‍ക്കാരില്‍ നിന്നും ലഭിക്കാനുള്ള തുകയുടെ ഒരു ഭാഗം എത്രയും പെട്ടെന്ന് ലഭിക്കുമെന്നും അതിലൂടെ തൊഴിലാളികളുടെ പ്രശ്നങ്ങള്‍ക്ക് ഭാഗികമായെങ്കിലും പരിഹാരം കാണാമെന്നും കമ്പനി അധികൃതര്‍ പ്രതീക്ഷിച്ചിരുന്നു. കൂടാതെ തുക ലഭിക്കുന്നതോടെ നിലവിലുള്ള പദ്ധതികള്‍ പൂർത്തിയാക്കാനും പുതിയ പദ്ധതികള്‍ ഏറ്റെടുക്കാനും അതിലൂടെ നിലവിലുള്ള തൊഴിലാളികളില്‍ ഒരു വിഭാഗത്തെ നിലനിര്‍ത്താന്‍ സാധിക്കുമെന്നുമായിരുന്നു കമ്പനി അധികൃതരുടെ കണക്കു കൂട്ടല്‍.

എന്നാൽ കമ്പനിയുടെ ഉടസ്ഥാവകാശം പൂര്‍ണമായും കൈമാറുന്നതിന് ഹരീരിക്ക് താല്‍പര്യമുണ്ടായിരുന്നില്ല. 40 ശതമാനം ഓഹരിയെങ്കിലും കൈവശം വയ്ക്കാനുള്ള വിലപേശലാണ് ഹരീരി നടത്തിയത്. ഇതോടെ ചര്‍ച്ചകള്‍ ഫലപ്രാപ്തിയിലെത്തുന്ന വഴികള്‍ പൂര്‍ണ്ണമായും അടഞ്ഞു.

ഇതോടെ സമീപ കാലത്തൊന്നും സൗദി ഓജര്‍ കമ്പനിക്ക് നിലവിലുള്ള സാമ്പത്തിക ബാധ്യതകളില്‍ നിന്ന് ഉയിര്‍ത്തെഴുന്നേല്‍പ്പ് സാധ്യമല്ലെന്ന് എല്ലാവര്‍ക്കും ബോധ്യമായി. കമ്പനിയുടെ അപ്പോഴത്തെ ബാധ്യത 3000 കോടി റിയാലില്‍ അധികമായിരുന്നു. ബാധ്യതകളില്‍ നിന്നും രക്ഷപ്പെടാന്‍ കമ്പനി പാപ്പരായി പ്രഖ്യാപിക്കാന്‍ സ്വയം ആവശ്യപ്പെടുമെന്ന് കമ്പനിയോട് അടുത്ത വൃത്തങ്ങള്‍ അന്ന് തന്നെ സൂചന നല്‍കിയിരുന്നു.

50,000 ത്തോളം വരുന്ന തൊഴിലാളികള്‍ക്ക് മാസങ്ങളായി ശമ്പളം നല്‍കാന്‍ കമ്പനിക്ക് സാധിച്ചിരുന്നില്ല. 20,000 ത്തോളം വരുന്ന തൊഴിലാളികളുടെ ഇന്‍ഷുറന്‍സ് പുതുക്കിയിയിരുന്നില്ല. ഭൂരിഭാഗം തൊഴിലാളികളുടെ ഇഖാമയും പുതുക്കാന്‍ സാധിച്ചിരുന്നില്ല. ഗോസിയില്‍ അടക്കേണ്ട തുകയും അടക്കാന്‍ സാധിച്ചില്ല. ഇതിനു പുറമേ തൊഴിലാളികള്‍ക്ക് കനത്ത സേവനാനന്തര ആനുകൂല്യവും നല്‍കേണ്ടതുണ്ട്. ദീര്‍ഘകാല സര്‍വീസുള്ള പല തൊഴിലാളികള്‍ക്കും അഞ്ചു ലക്ഷം വരെയുള്ള സേവനാനന്തര ആനുകൂല്യം വരെ കമ്പനി നല്‍കേണ്ടി വരും. കൂടാതെ സബ് കോണ്‍ട്രാക്ടര്‍മാര്‍ക്ക് വന്‍തുക തന്നെ നല്‍കാനുണ്ട്. പാപ്പരായി പ്രഖ്യാപിച്ചാല്‍ ഇത് പോലുള്ള പല ചിലവുകളില്‍ നിന്നും രക്ഷപ്പെടാം എന്നായിരുന്നു കമ്പനിയുടെ നിഗമനം.

എന്നാല്‍ തൊഴിലാളികളുടെ നിലവിലുള്ള തൊഴില്‍ കരാര്‍ അവസാനിപ്പിച്ചാല്‍ കമ്പനിക്കു പുതുക്കിയ സൗദി തൊഴില്‍ നിയമത്തിന്റെ പരിരക്ഷ ലഭിക്കുമെന്ന് നിയമ വിദഗ്ദര്‍ വിലയിരുത്തിയിരുന്നു. പുതുക്കിയ തൊഴില്‍ നിയമത്തിലെ എക്സിക്യൂട്ടീവ് ബൈലോ നിബന്ധകളില്‍ കമ്പനി പ്രവര്‍ത്തനം അവസാനിപ്പിക്കുകയാണെങ്കില്‍ തൊഴില്‍ കരാര്‍ നിയമപരമായി തന്നെ ടെര്‍മിനേറ്റ് ചെയ്യാം എന്ന് വ്യവസ്ഥയുണ്ടെന്ന് അന്ന് സൗദിയിലുണ്ടായിരുന്ന കമ്പനിക്ക് ലഭിച്ച നിയമോപദേശം.

ഈ വ്യവസ്ഥ മുതലാക്കിയാണ് കമ്പനിയുടെ പ്രത്യേക ഡിവിഷനായ നിര്‍മ്മാണ ഡിവിഷന്റെ പ്രവര്‍ത്തനം അവസാനിപ്പിക്കാൻ തീരുമാനിച്ചത്. എന്നാല്‍ ഈ നീക്കം കൃത്യമായ ദിശയിലുള്ളത് ആയിരുന്നില്ല. കരാര്‍ കാലാവധിക്ക് മുന്‍പായി തൊഴിലാളിയുടെ കരാര്‍ റദ്ദാക്കാമെന്നല്ലാതെ പിരിച്ചു വിടുന്ന തൊഴിലാളികള്‍ക്ക് നിയമപ്രകാരമുള്ള എല്ലാ ആനുകൂല്യങ്ങളും നല്‍കുന്നതില്‍ നിന്നും കമ്പനിക്ക് ഒഴിഞ്ഞു മാറാന്‍ സാധിക്കില്ലെന്ന് നിയമ വൃത്തങ്ങള്‍ അന്ന് തന്നെ വ്യക്തമാക്കിയിരുന്നു.

ഇതിനിടെ കമ്പനിക്കെതിരെ നിയമ നടപടികളുമായി കൂടുതല്‍ വിദേശികള്‍ രംഗത്തെത്തിയിരുന്നു. അത് വരെ 31,000 പരാതികള്‍ കമ്പനിക്കെതിരെ ലേബര്‍ കോടതികളില്‍ ഫയല്‍ ചെയ്തിരുന്നു. കൂടാതെ മധ്യസ്ഥ ശ്രമം പൊളിഞ്ഞതോടെ റിയാദ്, ദമ്മാം, ജിദ്ദ ശാഖകളില്‍ ജോലി ചെയ്തിരുന്ന ഫ്രാന്‍സില്‍ നിന്നുള്ള ഉന്നത തസ്തികകളില്‍ ജോലി ചെയ്യുന്നവരും എന്‍ജിനീയര്‍മാരും അഡ്മിനിസ്ട്രെഷന്‍ ജീവനക്കാരും അടങ്ങുന്ന 200 ഓളം ജീവനക്കാര്‍ മുടങ്ങിയ ശമ്പളവും, സേവനാനന്തര ആനുകൂല്യങ്ങളും മറ്റു തൊഴില്‍ നിയമ പരിരക്ഷകളും ആവശ്യപ്പെട്ടു കൊണ്ട് സൗദി ഒജറിനു എതിരെ ഫ്രാന്‍സിലെ കോടതികളില്‍ കേസ് നൽകാനും തീരുമാനമെടുത്തിരുന്നു.

ജൂലൈ 31 ന് കമ്പനി അടച്ചു പൂട്ടുമെന്ന് വ്യക്തമാക്കി മുഴുവന്‍ ജീവനക്കാര്‍ക്കും കമ്പനി നോട്ടീസ് നല്‍കി. ഇതോടെ തൊഴിലാളികളുടെ വിഷയത്തില്‍ തൊഴില്‍, സാമൂഹിക വികസന മന്ത്രാലയം ഇടപെട്ടു. തൊഴിലാളികള്‍ക്ക് ലഭിക്കാനുള്ള മുഴുവന്‍ ശമ്പളവും ആനുകൂല്യങ്ങളും സംബന്ധിച്ച വിവരം മന്ത്രാലയം ശേഖരിച്ചു. തൊഴിലാളികളുടെ അവകാശം ലഭ്യമാക്കുന്നതിന് കമ്പനിക്കെതിരെ കേസ് ഫയല്‍ ചെയ്യുമെന്നായിരുന്നു മന്ത്രാലയം വ്യക്തമാക്കിയിരുന്നത്. ഇതിനായി മന്ത്രാലയത്തിന്റെ ചെലവില്‍ അഭിഭാഷകരെ നിയോഗിക്കുമെന്നും വ്യക്തമാക്കിയിരുന്നു.

ഇത്തരത്തില്‍ 16,000 വിദേശ തൊഴിലാളികളുടെ പ്രശ്നത്തില്‍ മന്ത്രാലയം നേരിട്ട് ഇടപെട്ടിരുന്നു. ഇതില്‍ 11,500 പേര്‍ ജോലി ഉപേക്ഷിച്ചു മടങ്ങി. 27,൦൦൦ പേരെ നേരത്തെ തന്നെ പിരിച്ചു വിട്ടിരുന്നു. ആറായിരത്തോളം തൊഴിലാളികള്‍ക്ക് പുതിയ സ്പോണ്‍സര്‍മാരുടെ കീഴിലേക്ക് മാറാനുള്ള നടപടികളും മന്ത്രാലയം ചെയ്തു കൊടുത്തു. ഫിലിപ്പൈന്‍സ് തൊഴിലാളികളുടെ പ്രശ്നങ്ങളുമായി ബന്ധപ്പെട്ട് സൗദി ഓജറിനെ ബ്ലാക്ക് ലിസ്റ്റ് ചെയ്തു.

പ്രവര്‍ത്തനം അവസാനിപ്പിക്കുമ്പോള്‍ മൂന്നു കരാറുകൾ മാത്രമാണ് കമ്പനിക്കുണ്ടായിരുന്നത്. കിംഗ് അബ്ദുല്ല ശാസ്ത്ര, സാങ്കേതിക സർവകലാശാലയിലെ പതിനഞ്ചു വർഷ കാലാവധിയുള്ള മെയിന്റനൻസ്-ഓപ്പറേഷൻസ് കരാർ, മൊറോക്കൊയിലെ ടാൻഗിയറിൽ സൽമാൻ രാജാവിന്റെ കൊട്ടാരത്തിന്റെ നിർമാണം, മിനയിലെ നിർമാണ പദ്ധതി എന്നിവയായിരുന്നു അവ.

സൗദി ഓജറിലെ 350 ജീവനക്കാരെ സിദ്ർ കമ്പനിയിലേക്ക് മാറ്റി. റിയാദ് റോയൽ കോർട്ട് അടക്കം ചില പദ്ധതികൾ സിദ്ർ കമ്പനിയിലേക്ക് മാറ്റുകയും ചെയ്തു. ജിദ്ദ റോയൽ കോർട്ട് പദ്ധതിയിലെ 25൦ സൗദി ജീവനക്കാരെയും കൂടാതെ മുഴുവൻ വിദേശ തൊഴിലാളികളെയും അൽസമാമ കമ്പനി ഏറ്റെടുത്തു.

2,600 ജീവനക്കാരുടെ സ്‌പോൺസർഷിപ്പ് സൗദി ഓജർ ചെയർമാൻ സാദ്  അൽഹരീരിയുടെ ഭാര്യാ സഹോദരൻ ഹാനി അൽഅദ്മിന്റെ കമ്പനിയായ അൽഇംറാൻ അൽഹദീസ കോൺട്രാക്ടിംഗ് കമ്പനിയിലേക്ക് മാറ്റി. ഈ കമ്പനിയുടെ അവശേഷിക്കുന്ന പത്തു ശതമാനം ഉടമസ്ഥാവകാശം സാദ്  അൽഹരീരിയുടെ പിതാവ് റഫീഖ് അൽഹരീരിയുടെ ഭാര്യമാരിൽ ഒരാളുടെ മകനായ മൂസ അൽ ശൈഖിനായിരുന്നു. സൗദി ഒജറിന്റെ പ്രവര്‍ത്തനം അവസാനിപ്പിക്കുന്ന സമയത്ത് അവശേഷിച്ചിരുന്ന പദ്ധതികളായ കിങ്  അബ്ദുല്ല ശാസ്ത്ര, സാങ്കേതിക സർവകലാശാലാ കരാർ അൽ ഇംറാൻ അൽഹദീസ കോൺട്രാക്ടിംഗ് കമ്പനിക്ക് നൽകി.

കമ്പനി സാമ്പത്തിക പ്രതിസന്ധിയിലായി പ്രവര്‍ത്തനം അവസാനിപ്പിച്ച ദിനങ്ങളില്‍ റിയാദില്‍ നിന്നും 20 കിലോമീറ്റര്‍ അകലെയുള്ള ഖാദിസിയ ലേബര്‍ ക്യാമ്പില്‍ വൃത്തിഹീനമായ അവസ്ഥയില്‍ ഭക്ഷണവും വൈദ്യുതിയും ഇല്ലാതെ ഇന്ത്യക്കാരടക്കം രണ്ടായിരത്തോളം പേര്‍ ഭിക്ഷാടകരെ പോലെ കഴിയേണ്ടി വന്നത് ഇന്ത്യയിലും മാധ്യമ ശ്രദ്ധ ആകര്‍ഷിച്ചു. എംബസ്സി ഉദ്യോഗസ്ഥരോ തൊഴില്‍ മന്ത്രാലയ ഉദ്യോഗസ്ഥരോ എപ്പോഴെങ്കിലും നല്‍കുന്ന ഭക്ഷ്യ വസ്തുക്കള്‍ കഴിച്ചായിരുന്നു അവര്‍ വിശപ്പടക്കിയിരുന്നത്. വൈദ്യ സഹായം പോലും കമ്പനി നല്‍കാതിരുന്നതിനാല്‍ അസുഖങ്ങള്‍ വന്നാല്‍ മറ്റൊരുപാധിയും ഇവര്‍ക്ക് മുന്നില്‍ ഉണ്ടായിരുന്നില്ല. ഓജറിന്റെ മറ്റു ക്യാമ്പുകളുടെ സ്ഥിതിയും മെച്ചമായിരുന്നില്ല.

ദുരിതം അനുഭവിക്കുന്ന ഇന്ത്യക്കാരുടെ എണ്ണം ഏതാണ്ട് 4500 ഓളം വരും എന്നാണു കണക്കുകള്‍ സൂചിപ്പിക്കുന്നത്. മാസങ്ങളായി കമ്പനി ശമ്പളം നല്‍കിയിരുന്നില്ല എങ്കിലും കമ്പനിയുടെ ക്യാമ്പുകളില്‍ പ്രവര്‍ത്തിച്ചിരുന്ന മെസ്സ് ഹാളുകളില്‍ നിന്ന് തൊഴിലാളികള്‍ക്ക് ഭക്ഷണം ലഭിച്ചിരുന്നു. എന്നാല്‍ ഈ സൗകര്യം പോലും കമ്പനി അധികൃതര്‍ നിര്‍ത്തലാക്കിയതിനെ തുടര്‍ന്നാണ്‌ തൊഴിലാളികള്‍ അക്ഷരാര്‍ത്ഥത്തില്‍ പട്ടിണിയില്‍ ആകുന്നതും അന്നത്തെ കേന്ദ്ര വിദേശകാര്യ മന്ത്രി സുഷമ സ്വരാജിനെ ട്വീറ്റ് ചെയ്തു വിവരങ്ങള്‍ അറിയിക്കുന്നതും തുടര്‍ന്ന് വിഷയം ലോകശ്രദ്ധ ആകര്‍ഷിക്കുന്നതും.

തുടക്കത്തില്‍ ഉഴപ്പിയെങ്കിലും പിന്നീട് തൊഴില്‍ നഷ്ടപ്പെട്ട ഇന്ത്യക്കാരുടെ വിഷയത്തില്‍ ഇന്ത്യന്‍ സര്‍ക്കാരും റിയാദിലെ ഇന്ത്യന്‍ എംബസ്സിയും ജിദ്ദയിലെ ഇന്ത്യന്‍ കോണ്‍സുലെറ്റും സ്വീകരിച്ച നടപടികള്‍ അഭിനന്ദനാര്‍ഹമായിരുന്നു. ജിദ്ദയിലെ ആറ് ലേബര്‍ ക്യാമ്പുകളിലായി ഇന്ത്യയില്‍ നിന്നുള്ള 2500 ഓളം തൊഴിലാളികള്‍ ദുരിതത്തിലായിരുന്നു. ഇവര്‍ക്ക് ഭക്ഷണം മുടങ്ങാതിരിക്കാന്‍ കോണ്‍സുലേറ്റ് ത്വരിത ഗതിയില്‍ നടപടികള്‍ സ്വീകരിച്ചു. റിയാദ്, ദമാം മേഖലകളില്‍ പ്രയാസം അനുഭവിക്കുന്നവരെ കണ്ടെത്താന്‍ എംബസി ഉദ്യോഗസ്ഥരെയും വളണ്ടിയര്‍മാരെയും നിശ്ചയിച്ചു. ഇതിനായി റിയാദ് എംബസിയില്‍ പ്രത്യേക യോഗം ചേരുകയും ചെയ്തു.

സൗദി സന്ദര്‍ശിച്ച് കാര്യങ്ങള്‍ വിലയിരുത്താന്‍ മന്ത്രി സുഷമ സ്വരാജ് കേന്ദ്ര വിദേശകാര്യ സഹമന്ത്രിയായിരുന്ന വികെ സിങ്ങിനോട് നിര്‍ദ്ദേശിച്ചു. തുടര്‍ന്ന് സിംഗ് നിരവധി തവണ സൗദിയിലെത്തി. ജിദ്ദയിലെ ഹദ്ദ ടൗണിൽനിന്ന് നാല് കിലോമീറ്റർ അകലെയുള്ള സൗദി ഓജർ കമ്പനിയുടെ കീഴിലുള്ള സുമൈസി ക്യാമ്പ് വി.കെ സിംഗ് സന്ദർശിക്കുകയും ചെയ്തു. ഏഴുനൂറോളം ഇന്ത്യക്കാരടക്കം വിവിധ രാജ്യക്കാരായ 2500 തൊഴിലാളികൾ താമസിക്കുന്ന ക്യാമ്പായിരുന്നു അത്.

ഇന്ത്യന്‍ ശൈലിയില്‍ മന്ത്രിയെ മുദ്രാവാകൃം വിളിച്ച് തൊഴിലാളികൾ സ്വികരിച്ചത് അന്ന് മറ്റു രാജ്യക്കാര്‍ക്ക് പുതുമയായിരുന്നു. ഈ ക്യാമ്പില്‍ ഉണ്ടായിരുന്ന നൂറോളം മലയാളികള്‍ക്കും മന്ത്രിയുടെ സന്ദര്‍ശനം ആശ്വാസം പകര്‍ന്നിരുന്നു. ഏകദേശം രണ്ടര മണിക്കൂർ വി.കെ സിംഗ് ക്യാമ്പിൽ തൊഴിലാളികൾക്കൊപ്പം ചെലവഴിച്ചു. ഇന്ത്യൻ അംബാസിഡർ അഹമ്മദ് ജാവേദ്, കോൺസുൽ ജനറൽ മുഹമ്മദ് നൂർ റഹ്മാൻ ഷേഖ് എന്നിവരും വി കെ സിങിനൊപ്പം ഉണ്ടായിരുന്നു. സൗദി തൊഴിൽകാര്യ മന്ത്രാലയത്തിലെ മക്കാ റീജിയൻ ഓഫിസിലെ ഉദ്യോഗസ്ഥരും മന്ത്രിക്കൊപ്പം തൊഴിലാളികളുടെ ക്യാമ്പിലെത്തിയിരുന്നു. മന്ത്രിയുടെ സന്ദര്‍ശനം നിരാശയിലായിരുന്ന ഇന്ത്യക്കാരില്‍ പുതുപ്രതീക്ഷ ഉണര്‍ത്തുകയും ചെയ്തു.

തുടര്‍ന്ന് ഇന്ത്യന്‍ കോണ്‍സുലേലേറ്റ് സൗദി തൊഴില്‍ വകുപ്പുമായി കൈകോര്‍ത്ത് തൊഴിലാളികള്‍ക്ക് ഇതര കമ്പനികളില്‍ തൊഴില്‍ ലഭ്യമാക്കുന്നതിനുള്ള നടപടികള്‍ ആരംഭിച്ചു. ഇതിന്റെ ഭാഗമായി മുപ്പതോളം കമ്പനി പ്രതിനിധികള്‍ക്ക് രണ്ടായിരത്തോളം ഇന്ത്യന്‍ തൊഴിലാളികളുടെ ലിസ്റ്റ് അധികൃതര്‍ കൈമാറി. ഇതിന്റെ അടിസ്ഥാനത്തില്‍ ഈ കമ്പനി പ്രതിനിധികള്‍ സൗദി ഓജറിന്‍റെ ശുമൈസി, ഓജെക്സ് ക്യാമ്പുകളിലെത്തി നിരവധി തൊഴിലാളികളുമായി അഭിമു‍ഖം നടത്തി.

എന്നാല്‍ ജോലി നഷ്ടപ്പെട്ടിട്ടും ഭൂരിഭാഗം മലയാളികളും ജോലി മാറാന്‍ അന്ന് തയാറായില്ല. കാരണം സൗദി ഓജറില്‍ നിന്നും അവര്‍ക്ക് ലഭിച്ചിരുന്നത് മികച്ച ശമ്പളവും ആനുകൂല്യങ്ങളുമായിരുന്നു. പുതിയ കമ്പനികളുടെ വാഗ്ദാനം ഇതിന്റെ പകുതി പോലുമായിരുന്നില്ല. കൂടാതെ സേവനാനന്തര ആനുകൂല്യങ്ങള്‍ നഷ്ടപ്പെടുമോ എന്ന ആശങ്കയാല്‍ നാട്ടിലേക്ക് മടങ്ങാന്‍ തയ്യാറായത് നൂറില്‍ താഴെ ഇന്ത്യക്കാര്‍ മാത്രമായിരുന്നു.

മന്ത്രാലയത്തിന്റെ സേവനങ്ങള്‍ക്ക് പുറമേ സല്‍മാന്‍ രാജാവിന്റെ നിര്‍ദ്ദേശ പ്രകാരം പ്രയാസം അനുഭവിക്കുന്ന എല്ലാ ജീവനക്കാര്‍ക്കും സൗജന്യ ചികിത്സ നല്‍കാനും ഫൈനല്‍ എക്സിറ്റില്‍ പോകാന്‍ ആഗ്രഹിക്കുന്നവര്‍ക്ക് സൗദിയ വഴി സൗജന്യ ടിക്കറ്റ് ലഭ്യമാക്കാനുമുള്ള നടപടികള്‍ സൗദി ഭരണകൂടം എടുത്തിരുന്നു.

2016 ഓഗസ്റ്റ് മാസത്തോടു കൂടി കമ്പനിയുടെ തകർച്ച പൂർണമായി. 2017 ജൂലൈ 17 ന് സൗദിയിലെ ഏറ്റവും വലിയ രണ്ടാമത്തെ കമ്പനിയായ സൗദി ഓജർ 39 വർഷത്തെ പ്രവർത്തനങ്ങൾക്ക് ശേഷം ചരിത്രത്തിന്റെ ഭാഗമായി മാറി. ജൂലൈ 31 ന് സൗദിയിലെ എല്ലാ നഗരങ്ങളിലെയും ശാഖകള്‍ പൂര്‍ണ്ണമായും അവസാനിപ്പിച്ച് പ്രവര്‍ത്തനം ഔദ്യോഗികമായി അവസാനിപ്പിച്ചു. ലിക്വിഡേറ്റ് ചെയ്ത് പ്രവർത്തനം അവസാനിപ്പിക്കുന്നതിന് മുൻപ് തന്നെ കമ്പനിയുടെ പ്രധാനപ്പെട്ട സ്വത്തുവകകൾ എല്ലാം തന്നെ കൈമാറ്റം ചെയ്യപ്പെട്ടിരുന്നു എന്നത് ശ്രദ്ധേയമായിരുന്നു.

പിന്നീട് മുഹമ്മദ് ബിൻ സൽമാൻ രാജകുമാരൻ കിരീടാവകാശി ഭരണത്തിന്റെ മുഖ്യധാരയിലേക്ക് എത്തിയതോടെ രാജ വ്യാപകമായി നടന്ന അഴിമതി വിരുദ്ധ പ്രവർത്തനങ്ങളുടെ ഭാഗമായി സൗദി ഓജറിന്റെ സൗദിയിൽ അവശേഷിക്കുന്ന വസ്തുവകകൾ പിടിച്ചെടുക്കാൻ തീരുമാനമായിരുന്നു. ഇതിന്റെ ഭാഗമായി ജോർദ്ദാനിയൻ – സൗദി ബിസിനസുകാരനായിരുന്ന സാബിഹ് അൽ മസരി അറസ്റ്റിലായതെന്നും റിപ്പോർട്ടുകൾ ഉണ്ടായിരുന്നു.

രണ്ടു വർഷം മുൻപ് കമ്പനിയുടെ കടങ്ങൾ പുനഃക്രമീകരിക്കാനും കൊടുത്തു വീട്ടാനുമായി കോടതി നിർദേശപ്രകാരം തൊഴിൽ മന്ത്രാലയത്തിലെയും നിയമ മന്ത്രാലയത്തിലെയും പ്രതിനിധികൾ അടങ്ങുന്ന ഒരു കമ്മിറ്റി രൂപീകരിച്ചു.

റിയാദ് എക്സിക്യൂട്ടീവ് കോടതിയുടെ എസ്റ്റിമേഷന്‍ പ്രകാരം ഓജര്‍ കമ്പനിയുടെ മൊത്തം കടം 40 ബില്യൺ റിയാലാണ്. ഇതിൽ ബാങ്കുകൾക്ക് നൽകാനുള്ള 13 ബില്യൺ റിയാലും കമ്പനിയുടെ സപ്ലയർമാർക്ക് നൽകാനുള്ള 22 ബില്യൺ റിയാലും തൊഴിലാളികൾക്ക് നൽകാനുള്ള 6.2 ബില്യൺ റിയാലും ഉൾപ്പെടുന്നു. തൊഴിലാളികളുടെ ശമ്പളവും, ഇ.എസ്.ബിയും മറ്റു അലവൻസുകളും അടങ്ങുന്ന തുകയാണിത്. എന്നാല്‍ കോടതിയുടെ കസ്റ്റഡിയിലുള്ള കമ്പനിയുടെ തുക വെറും 83 മില്യൺ റിയാലും അതേ സമയം കമ്പനിയുടെ ബാങ്ക് അക്കൗണ്ടിൽ ശേഷിക്കുന്നത് വെറും 171,000 റിയാലും മാത്രമാണ്. പ്രവര്‍ത്തനം അവസാനിപ്പിക്കുന്ന സമയം മറ്റു ആസ്തികള്‍ ഒന്നും തന്നെ ഉണ്ടായിരുന്നില്ല.

45000 ത്തിലധികം ക്രെഡിറ്റര്‍ ക്ലൈയിമുകളാണ് കമ്പനിക്ക് എതിരായി ഉള്ളത്. 6000 ല്‍ അധികം വ്യക്തികളും ബാങ്കുകളും കമ്പനികളും ഉള്‍പ്പെടുന്നവര്‍ പണം ലഭിക്കുന്നതിനായി കോടതികളെ സമീപിച്ചു കഴിഞ്ഞു. നാഷണല്‍ കമ്മേഴ്സ്യല്‍ ബാങ്കാണ് പാപ്പരത്ത നിയമ പ്രകാരമുള്ള നിയമ നടപടികള്‍ ഇതിനകം സ്വീകരിച്ചിട്ടുള്ളത്. ഒജറും സമാനമായ നീക്കങ്ങള്‍ നടത്തുമെന്നാണ് സൗദിയിലെ പ്രശസ്ത നിയമ സ്ഥാപനമായ ഹമദ് ആന്‍ഡ്‌ അല്‍ മേഹദാര്‍ സൂചന നല്‍കുന്നത്. എന്നാല്‍ ഇത് സംബന്ധിച്ച് വ്യക്തമായ പ്രഖ്യാപനങ്ങള്‍ ഒന്നും തന്നെ ഇതു വരെ ഇവരുടെ ഭാഗത്ത് നിന്നും ഉണ്ടായിട്ടില്ല. ഇതിനിടയില്‍ ബലിയാടുകളായത് തൊഴിലാളികളാണ്. ഏറ്റവും മുകളില്‍ പറഞ്ഞ മുഹമ്മദിനെ പോലുള്ളവര്‍.

അഡ്വ.ഷിയാസ് കുഞ്ഞിബാവ.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DtW7D99bYc62sJ1L3kbxwg

LATEST

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

Published

on

ഞാന്‍ ഇപ്പോള്‍ റിയാദില്‍ ഹൗസ് ഡ്രൈവര്‍ വിസയില്‍ ജോലി ചെയ്യുകയാണ്. സ്വന്തമായാണ് പുറത്ത് ജോലി ചെയ്യുന്നത്. ഹൗസ് ഡ്രൈവര്‍മാര്‍ക്ക് ലെവി ബാധകമാക്കിയല്‍ മുന്നോട്ട് തുടര്‍ന്ന് പോകാന്‍ സാധിക്കില്ല. എന്ന് മുതലാണ്‌ ഈ നിയമം നിലവില്‍ വരുന്നത്, ഏതെങ്കിലും തരത്തിലുള്ള ഒഴിവാക്കലുകള്‍ ഉണ്ടാകുമോ തുടങ്ങിയ കാര്യങ്ങള്‍ വിശദീകരിക്കാമോ? സ്പോണ്‍സര്‍ഷിപ്പ് മാറുന്നതിന് എന്തൊക്കെ നടപടി ക്രമങ്ങളാണ് സ്വീകരിക്കേണ്ടത് എന്നും പറഞ്ഞു തരാമോ?

സൗദിയില്‍ കോവിഡ് വ്യാപനം രൂക്ഷമാവുന്നതിന് മുന്‍പ് അനധികൃത വിദേശികളെ പിടികൂടുന്നതിന് വേണ്ടി വ്യാപകമായ പരിശോധന നടന്നിരുന്നു. നിലവിലെ പ്രത്യേക സുരക്ഷാ ഭീഷണി സാഹചര്യങ്ങള്‍ മുന്‍നിറുത്തി അധികൃതര്‍ ലക്ഷ്യമിട്ടിരുന്നത് പ്രധാനമായും യാതൊരു രേഖകളും ഇല്ലാതെ അതിര്‍ത്തി പ്രദേശങ്ങളിലൂടെ നുഴഞ്ഞു കയറിയവര്‍, രേഖകളുടെ കാലാവധി അവസാനിച്ചിട്ടും രാജ്യത്ത് തുടര്‍ന്നവര്‍ തുടങ്ങിയ അനധികൃത താമസക്കാരെ ആയിരുന്നു. മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധന അല്ലാതിരുന്നിട്ടു കൂടി ഈ പരിശോധനകളില്‍ ജവാസാതിന്റെയും സംയുക്ത സുരക്ഷ സേനകളുടെയും പിടിയില്‍ പത്തു ശതമാനത്തോളം വിദേശികളും ഉള്‍പ്പെട്ടിരുന്നു. ഇതില്‍ അധികവും ഹൗസ് ഡ്രൈവര്‍ വിസയില്‍ സൗദിയിലെത്തി സ്വന്തമായി ജോലി ചെയ്തു വന്നിരുന്നവര്‍ ആയിരുന്നു.

അത് പോലെ തന്നെ മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധനകളില്‍ നിരവധി സ്ഥാപനങ്ങളില്‍ അനേകം ഗാര്‍ഹിക തൊഴിലാളികള്‍ അനധികൃതമായി ജോലി ചെയ്തു വരുന്നതായി കണ്ടെത്തിയിരുന്നു. ഹൗസ് ഡ്രൈവര്‍ വിസയില്‍ രാജ്യത്തെത്തി സ്വതന്ത്രമായി ജോലി ചെയ്തു വരുന്നവരായിരുന്നു ഇവര്‍. ഹൗസ് ഡ്രൈവര്‍മാര്‍ക്ക് ലെവി ബാധകമല്ലാത്തതിനാലാണ് വന്‍തുകയുടെ സാമ്പത്തിക ബാധ്യത ഒഴിവാക്കുന്നതിനായി വിദേശികള്‍ ഈ വിസയില്‍ എത്തി ജോലി ചെയ്തു വന്നിരുന്നത്.

2014 ജൂലൈയിലാണ് രാജ്യത്ത് ആദ്യമായി സ്വകാര്യ മേഖലയിലെ വിദേശ തൊഴിലാളികൾക്ക് ലെവി ബാധകമാക്കിയത്. 2017 ജൂലൈയിൽ ആശ്രിതർക്കും ലെവി നിലവിൽവന്നു. എങ്കിലും ഗാർഹിക തൊഴിലാളികൾക്ക് ലെവി ബാധകമായിരുന്നില്ല. ഈ പഴുത് മുതലെടുത്ത്‌ കൊണ്ടാണ് പല വിദേശികളും ഹൗസ് ഡ്രൈവര്‍ വിസയിലേക്ക് മാറുകയോ ഫൈനല്‍ എക്സിറ്റില്‍ പോയോ പുതിയ ഹൌസ് ഡ്രൈവർ ഉൾപ്പെടെയുള്ള ഗാർഹിക വിസകളില്‍ രാജ്യത്തെത്തുകയോ ചെയ്തു കൊണ്ടിരുന്നത്.

പരിശോധനകളില്‍ ഹൗസ് ഡ്രൈവര്‍ വിസയില്‍ രാജ്യത്തെത്തിയ അനേകം തൊഴിലാളികള്‍ പിടിലാകുന്നത് വര്‍ദ്ധിച്ചതോടെയാണ് ഈ വിഷയം അധികൃതരുടെ ശ്രദ്ധയില്‍ പെടുന്നത്. തുടര്‍ന്ന് ഈ പഴുത് അടക്കുന്നതിനു വേണ്ടിയുള്ള ശ്രമങ്ങളുടെ ഭാഗമായാണ് ഗാര്‍ഹിക തൊഴിലാളികള്‍ക്ക് ലെവി ഏര്‍പ്പെടുതാനുള്ള തീരുമാനം മാനവശേഷി സാമൂഹിക വികസന മന്ത്രാലയ ശുപാര്‍ശ പ്രകാരം സൗദി കാബിനറ്റ്‌ കൈക്കൊള്ളുന്നത്.

പുതിയ തീരുമാന പ്രകാരം ഹൗസ് ഡ്രൈവർ വിസയിലുൾപ്പെടെയുള്ള മുഴുവൻ ഗാർഹിക തൊഴിലാളികൾക്കും ലെവി ബാധകമാണ്. ഓരോ തൊഴിലാളിക്കും വർഷത്തിൽ 9,600 റിയാൽ, അഥവാ പ്രതിമാസം 800 റിയാൽ തോതിലാണ് ലെവി. എന്നാല്‍ ആവശ്യമായ മുന്‍കരുതലുകള്‍ എടുത്തു കൊണ്ട് തന്നെയാണ് ഈ തീരുമാനം മന്ത്രാലയം കൈക്കൊണ്ടിട്ടുള്ളത്. പുതിയ തീരുമാനം മൂലം സ്വദേശികള്‍ക്കും വിദേശികള്‍ക്കും പെട്ടെന്ന് അസൗകര്യം ഉണ്ടാകാത്ത വിധത്തിലാണ് പുതിയ നിബന്ധനകള്‍ നടപ്പിലാക്കുക.

അതായത്, എല്ലാ ഗാര്‍ഹിക തൊഴിലാളികള്‍ക്കും ലെവി ഏര്‍പ്പെടുത്തിയിട്ടില്ല. നാലിൽ കൂടുതൽ ഗാർഹിക തൊഴിലാളികളുള്ള സ്വദേശികളും, രണ്ടിൽ കൂടുതൽ തൊഴിലാളികളുള്ള വിദേശികളും മാത്രമേ പുതിയ തീരുമാന പ്രകാരം ലെവി അടക്കേണ്ടി വരുന്നുള്ളൂ. വിസ കച്ചവടവും അനധികൃത വിസ കൈമാറ്റവും തടയുന്നതിനാണ് ഈ നിബന്ധനകള്‍ കൊണ്ട് വന്നിട്ടുള്ളത്.

മാത്രമല്ല, ഗാര്‍ഹിക തൊഴിലാളികള്‍ക്ക് മറ്റു തൊഴിലുകളിലേക്ക് മാറുന്നതിനാവശ്യമായ സാവകാശവും മന്ത്രാലയം പരോക്ഷമായി നല്‍കുന്നുണ്ട്. അത് കൊണ്ട് തന്നെ രണ്ട് ഘട്ടങ്ങളിലായാണ് തീരുമാനം നടപ്പിലാക്കുക. ഈ വർഷം മെയ് 22 ന് ആരംഭിക്കുന്ന ഒന്നാം ഘട്ടത്തിൽ പുതിയ ഗാർഹിക വിസയിൽ വരുന്ന തൊഴിലാളികൾക്ക് മാത്രമേ ലെവി അടക്കേണ്ടതുള്ളൂ.

കൂടാതെ ഈ വിഷയത്തില്‍ മന്ത്രാലയത്തിന്റെ ഉദാരമായ നിലപാടും പ്രശംസാര്‍ഹമാണ്. പ്രത്യേക വൈദ്യ പരിചരണ ആവശ്യമുള്ള ആളുകൾ, ഭിന്നശേഷിക്കാർക്കുള്ള പരിചരണം തുടങ്ങി മാനുഷികമായ പരിഗണന ആവശ്യപ്പെടുന്ന സന്ദർഭങ്ങളിൽ അത്തരം ജോലികൾക്കായി നിയമിക്കുന്ന ഗാർഹിക തൊഴിലാളിക്ക് ലെവി ബാധകമാവില്ല.

നിലവിൽ രാജ്യത്തുള്ള ഗാർഹിക തൊഴിലാളികൾക്ക് ഒരു വർഷത്തിന് ശേഷം മാത്രമേ ലെവി ബാധകമാകുകയുള്ളൂ. 2023 മെയ് 13 മുതലാണ് ഇവർക്ക് ലെവി അടക്കേണ്ടിവരിക. ഇതിനിടയില്‍ ഇവര്‍ക്ക് മറ്റുള്ള പ്രൊഫഷനുകളിലെക്ക് മാറാനോ ഫൈനല്‍ എക്സിറ്റില്‍ രാജ്യം വിട്ടു പോകാനോ ഉള്ള സാവകാശം ലഭിക്കും. ഇപ്പോൾ ഹൗസ് ഡ്രൈവർ തസ്തികയിലുള്ളവർക്ക് പ്രൊഫഷൻ മാറ്റം അനുവദിക്കുന്നതിനാൽ കൂടുതൽ സുരക്ഷിതമായ തൊഴിലുകൾ കണ്ടെത്തി മാറാവുന്നതാണ്.

സ്പോണ്‍സര്‍ഷിപ്പ് മാറുന്നതിനായി ഖിവ പ്ലാറ്റ്ഫോം വഴിയാണ് അപേക്ഷ നല്‍കേണ്ടത്. പുതിയ സ്പോണ്‍സര്‍ ആണ് മാറാന്‍ അപേക്ഷ നല്‍കേണ്ടത്. തൊഴിലാളിയുടെ ഇഖാമ കാലാവധി ഒരു വര്‍ഷത്തില്‍ കൂടുതല്‍ ഉള്ളതാകരുത് എന്ന നിബന്ധന നിലവിലുണ്ട്. പുതിയ സ്പോണ്‍സര്‍ ഓണ്‍ലൈന്‍ വഴി അപേക്ഷ നല്‍കിയാല്‍ പഴയ സ്പോണ്‍സര്‍ക്ക് എസ്.എം.എസ് ലഭിക്കും. നിലവിലെ സ്പോണ്‍സര്‍ ഇത് അംഗീകരിക്കുന്നതോടെ സ്പോണ്‍സര്‍ഷിപ്പ് മാറ്റം പൂര്‍ത്തിയാകും.

ഹൗസ് ഡ്രൈവര്‍ വിസയില്‍ എത്തി സ്വന്തമായി ജോലി ചെയ്യുകയോ മറ്റു പ്രൊഫഷനുകളില്‍ ജോലി ചെയ്യുകയോ ചെയ്തു വരികയാണെങ്കില്‍ ഈ നിബന്ധന നിലവില്‍ വരുന്നതോടെ താങ്കളുടെ നിലനില്പ് തന്നെ അപകടത്തിലാകും. താങ്കളുടെ സ്പോണ്‍സര്‍ക്ക് നാലില്‍ കൂടുതല്‍ ഗാര്‍ഹിക തൊഴിലാളികള്‍ നിലവില്‍ ഉണ്ടെങ്കില്‍ വർഷത്തിൽ 9,600 റിയാൽ നല്‍കി കൊണ്ട് ഹൗസ് ഡ്രൈവര്‍ വിസയില്‍ മുന്നോട്ട് പോകാന്‍ സാധിക്കില്ല. അതിനാല്‍ നിബന്ധന നിലവില്‍ വരുന്നതിന് മുന്‍പായി ലെവി അടക്കാന്‍ സാധിക്കുന്ന വരുമാനം ലഭിക്കുന്ന മറ്റു പ്രൊഫഷനിലെക്ക് മാറുകയോ അല്ലാത്ത പക്ഷം ഫൈനല്‍ എക്സിറ്റില്‍ പോകുകയോ ചെയ്യുന്നതാണ്‌ ഉചിതം.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD 

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

 

വിവരങ്ങള്‍ നല്‍കിയത്: 

Adv. Shiyas Kunjhibava. Lead Partner, SK Associates. (Dubai, Riyadh, Delhi, Kochi)

Continue Reading

LATEST

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

Published

on

അടുത്ത മാസം പകുതിയോടെ സൗദി അറേബ്യയില്‍ ഓയില്‍ സെക്ടറില്‍ പുതിയ വിസയില്‍ പോകാന്‍ ഒരുങ്ങുകയാണ്. ആദ്യമായാണ് സൗദി കമ്പനിക്ക്  വേണ്ടി ജോലി ചെയ്യാന്‍ സാധിക്കുന്നത്. ഉയര്‍ന്ന തസ്തികയിലാണ് വിസ. ഈ തസ്തിക കാലക്രമേണ നിതാഖാതില്‍ ഉള്‍പ്പെടുത്തി സ്വദേശിവല്‍ക്കരണം ഉണ്ടാകുമെന്നും ജോലി നഷ്ടപ്പെടുമെന്നും നിലവിലുള്ള ജോലി നഷ്ടപ്പെടുത്തി സൗദിയിലേക്ക് പോകുന്നത് ശരിയായ തീരുമാനമല്ല എന്ന് സുഹൃത്ത് പറയുന്നു. എന്താണ് നിതാഖാത് എന്നതിന്റെ അടിസ്ഥാനപരമായ കാര്യങ്ങള്‍ വിശദീകരിച്ചു തരാമോ?    

 

സൗദി അറേബ്യയില്‍ ജോലി ചെയ്യുന്ന വിദേശികളെ സംബന്ധിച്ചിടത്തോളം അല്‍പ്പം അസ്വസ്ഥത പകരുന്ന വാക്കാണ്‌ സൗദി പൗരന്മാരെ നിയമിക്കുന്നതിന് സ്വകാര്യ മേഖലയെ പ്രോത്സാഹിപ്പിക്കുന്നതിനായി സൗദി മാനവ വിഭവശേഷി, സാമൂഹിക വികസന മന്ത്രാലയം രൂപം നല്‍കിയ ഒരു പദ്ധതിയുടെ പേരായ നിതാഖാത്.

പലരും കരുതുന്നത് പോലെ വിദേശികളെ സൗദി അറേബ്യയുടെ തൊഴില്‍ രംഗത്ത് നിന്നും ആത്യന്തികമായി പുറത്താക്കുക എന്നതല്ല മറിച്ച് സ്വദേശി പൗരന്മാരുടെ തൊഴിലില്ലായ്മ കുറക്കുകയും അവര്‍ക്ക് രാജ്യത്തിന്റെ സ്വകാര്യ മേഖലയില്‍ ജോലി ഉറപ്പു വരുത്തുകയാണ് ഈ പദ്ധതിയുടെ ലക്‌ഷ്യം. തങ്ങളുടെ പൗരന്മാര്‍ക്ക് തൊഴിലും ഉയര്‍ന്ന ജീവിത സാഹചര്യങ്ങളും ഉറപ്പു വരുത്തുക എന്നത് ഏതൊരു രാജ്യത്തിന്റെയും പ്രാഥമിക കര്‍ത്തവ്യം കൂടിയാണ് എന്ന തത്വത്തില്‍ അധിഷ്ഠിതമായ പദ്ധതി കൂടിയാണ് നിതാഖാത്.

2011-ൽ ആരംഭിച്ചത് മുതൽ, ഈ പദ്ധതിയിലൂടെ കാലാനുസൃതമായി വിവിധ തൊഴിലുകളെ ദേശസാൽക്കരിക്കാനും സ്വദേശി പൗരന്മാരുടെ കഴിവുകളെ വൈവിധ്യവല്‍ക്കരിക്കാനും ആവശ്യമായ നടപടികൾ നടപ്പിലാക്കിയിട്ടുണ്ട്. ഇതുമൂലം ലക്ഷക്കണക്കിന്‌ സ്വദേശികള്‍ക്ക് തൊഴിലവസരങ്ങള്‍ സൃഷ്ടിക്കാന്‍ സാധിച്ചിട്ടുണ്ട്. ലക്‌ഷ്യത്തിലേക്ക് എത്തുന്നതിനായി കഴിഞ്ഞ 11 വര്‍ഷമായി നിരന്തരമായ അപ്ഡേറ്റുകൾക്കും നിതാഖാത് വിധേയമായിട്ടുണ്ട്. അതിൽ ഏറ്റവും പുതിയത് “അഡ്വാൻസ്ഡ് നിതാഖാത്”/ “പരിഷ്കരിച്ച നിതാഖാത്” എന്ന പേരില്‍ 2021 ഡിസംബറിൽ ആയിരുന്നു.

സൗദി പൗരന്മാര്‍ക്ക് തൊഴില്‍ ഉറപ്പ് വരുത്തുന്നതിനായി സ്വകാര്യ മേഖലയിലെ പ്രത്യേക തൊഴിലുകള്‍ അവര്‍ക്കായി മാത്രം പരിമിതപ്പെടുത്തുക, അതിനായി സ്ഥാപനങ്ങളെ വിവിധ വിഭാഗങ്ങളാക്കി തരം തിരിക്കുക എന്നതാണ് നിതാഖാത് പദ്ധതിയുടെ അടിസ്ഥാന പ്രവര്‍ത്തന രീതി. ഈ പദ്ധതിയിലൂടെ സൗദി പൗരന്മാര്‍ക്ക് കൃത്യമായ അടിസ്ഥാന പ്രതിമാസ ശമ്പളവും മന്ത്രാലയം ഉറപ്പു വരുത്തുന്നുണ്ട്. സൗദി തൊഴിൽ നിയമം ഒരു സൗദി പൗരന് കൃത്യമായ മിനിമം വേതനം നിര്‍ദ്ദേശിക്കുന്നില്ല എന്ന പരിമിതിയെ ഈ പദ്ധതിയിലൂടെ മറികടക്കാനും മന്ത്രാലയത്തിന് സാധിക്കുന്നു.

ആറു ജീവനക്കാരും അതിൽ കൂടുതലുമുള്ള എല്ലാ സ്ഥാപനങ്ങൾക്കും നിതാഖാത്ത് ബാധകമാണ്. നിലവില്‍ ചുവപ്പ്, ഇളം പച്ച, ഇടത്തരം പച്ച, കടും പച്ച, പ്ലാറ്റിനം എന്നിങ്ങനെ അഞ്ച് വിഭാഗങ്ങളാക്കിയാണ് സ്വകാര്യ മേഖലയിലെ സ്ഥാപനങ്ങളെ നിതാഖാത് പദ്ധതി പ്രകാരം തരം തിരിച്ചിട്ടുള്ളത്. പദ്ധതിയുടെ നിബന്ധനകള്‍ പൂര്‍ത്തീകരിക്കുന്നതിന്റെ അടിസ്ഥാനത്തിലാണ്, അതായത് സൗദിവൽക്കരണത്തിന്റെ ശതമാനത്തെ അടിസ്ഥാനമാക്കിയാണ് ഈ സ്ഥാപനങ്ങള്‍ക്ക് പ്രത്യേക അവകാശങ്ങളും പരിമിതികളും ഏര്‍പ്പെടുത്തിയിരിക്കുന്നത്. മിനിമം സൗദിവൽക്കരണം പാലിക്കാത്ത സ്ഥാപനങ്ങൾക്ക് മന്ത്രാലയത്തിൽ നിന്നുള്ള സേവനങ്ങൾ വിലക്കുകയും നിര്‍ദ്ദിഷ്ട സൗദിവല്‍ക്കരണം പാലിക്കുന്ന സ്ഥാപനങ്ങള്‍ക്ക് ആവശ്യമായ പ്രോത്സാഹനം നല്‍കുകയുമാണ് ചെയ്യുന്നത്.

സ്ഥാപനങ്ങളെ തരം തിരിക്കുന്നതിനായി ഇന്റർനാഷണൽ ക്ലാസിഫിക്കേഷൻ സ്റ്റാൻഡേർഡ് (“ISIC4”) എന്ന മാനദണ്ഡമാണ് മൂന്ന് വർഷമായി ഉപയോഗിക്കുന്നത്. ഈ മാനദണ്ഡം ഉപയോഗിച്ച് സ്ഥാപനങ്ങള്‍ ഉള്‍പ്പെടുന്ന മേഖല, സ്ഥാപനത്തിന്റെ പ്രവർത്തനങ്ങൾ, പ്രസ്തുത സ്ഥാപനത്തിലെ ജീവനക്കാരുടെ എണ്ണം തുടങ്ങിയവ ഒരു നിർദ്ദിഷ്‌ട സമവാക്യം ഉപയോഗിച്ച് നിര്‍ണ്ണയിച്ച്  വരുന്ന ഒന്നും രണ്ടും മൂന്നും വർഷങ്ങളിൽ പ്രസ്തുത സ്ഥാപനം  ഏത് വിഭാഗത്തില്‍ ഉള്‍പ്പെടുമെന്ന് നിര്‍ണ്ണയിക്കുന്നു.

പരിഷ്‌കരിച്ച നിതാഖാത്ത് പ്രകാരം സ്വകാര്യ സ്ഥാപനങ്ങൾ മൂന്നു വർഷത്തിനുള്ളിൽ സൗദിവൽക്കരണം ഘട്ടം ഘട്ടമായി നിശ്ചിത ശതമാനം ഉയർത്തൽ നിർബന്ധമാണെന്ന് മന്ത്രാലയം വ്യക്തമാക്കിയിട്ടുണ്ട്. അല്ലാത്ത പക്ഷം ഈ സ്ഥാപനങ്ങളുടെ വിഭാഗത്തിൽ മാറ്റം വരികയും ഉയര്‍ന്ന വിഭാഗത്തില്‍ നിന്നും താഴെയുള്ള വിഭാഗങ്ങളിലേക്ക് പോവുകയും ചെയ്യും. പുതിയ പദ്ധതി പ്രകാരം ആവശ്യമായ മാറ്റങ്ങള്‍ വരുത്തുന്നതിന് ആവശ്യമായ സമയം അനുവദിക്കുക എന്നതാണ് ഈ മൂന്ന് വര്‍ഷ സമയ പരിധിയുടെ ഉദ്ദേശം. ഈ സമയ പരിധിക്കുള്ളില്‍ നാല് ലക്ഷത്തോളം പുതിയ സ്വദേശി തൊഴിലവസരങ്ങളാണ് മന്ത്രാലയം ലക്ഷ്യമിടുന്നത്.

ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍:

മുകളില്‍ അഞ്ചാമത്ത ഖണ്ഡികയില്‍ പറഞ്ഞിരിക്കുന്നത് പോലെ അഞ്ചു വിഭാഗങ്ങളായാണ് നിതാഖത് പദ്ധതി പ്രകാരം സ്വകാര്യ കമ്പനികളെ തരം തിരിച്ചിരിക്കുന്നത്. അതില്‍ ഏറ്റവും താഴെയായി കിടക്കുന്ന സ്ഥാപനങ്ങളാണ് ചുവന്ന വിഭാഗത്തിലുള്ള സ്ഥാപനങ്ങള്‍. മന്ത്രാലയം നിര്‍ദ്ടെഷിചിരിക്കുന്നതരത്തിലുള്ള നിബന്ധനകള്‍ പാലിക്കാന്‍ സാധിക്കാത്ത സ്ഥാപനങ്ങളാണ് ഈ വിഭാഗത്തില്‍ ഉള്‍പ്പെടുന്നത്.അത് കൊണ്ട് തന്നെ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം നല്‍കുന്ന ഉത്തേജന/പ്രോത്സാഹന മാര്‍ഗ്ഗങ്ങള്‍ ലഭ്യമാകില്ല. മറിച്ച് ഇത്തരം സ്ഥാപനങ്ങള്‍ക്ക് അവക്ക് ലഭ്യമായിരുന്ന അടിസ്ഥാന അവകാശങ്ങള്‍ പോലും നഷ്ടമാകുകയും ചെയ്യുന്നു. സ്ഥാപനത്തിനും അതിലെ തൊഴിലാളികള്‍ക്കും താഴെ പറയുന്ന ആനുകൂല്യങ്ങള്‍ നിഷേധിക്കപെടുന്നു:

  1. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് അതിലെ തൊഴിലാളികളുടെ വർക്ക് പെർമിറ്റ് പുതുക്കാൻ സാധിക്കില്ല.
  2. ഇത്തരം സ്ഥാപനങ്ങള്‍ക്ക് തങ്ങളുടെ തൊഴിലാളികളുടെ പ്രൊഫഷനുകള്‍ മാറ്റാൻ സാധിക്കില്ല.
  3. ഈ സ്ഥാപനങ്ങള്‍ക്ക് പുതിയ വിദേശ തൊഴിലാളികൾക്ക് വർക്ക് പെർമിറ്റ് നൽകാൻ സാധിക്കില്ല.
  4. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ വിസകൾക്ക് വേണ്ടി അപേക്ഷിക്കാന്‍ സാധിക്കില്ല.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് വിസ ട്രാന്‍സ്ഫര്‍ ചെയ്യാന്‍ സാധിക്കില്ല.
  6. സ്ഥാപനങ്ങളുടെ പുതിയ ശാഖകൾക്കോ പുതിയ സൗകര്യങ്ങൾക്കോ വേണ്ടി പുതിയ ഫയലുകൾ തുറക്കാൻ അനുവാദം ഉണ്ടായിരിക്കില്ല.

ഇളം പച്ച വിഭാഗത്തില്‍ പെടുന്ന സ്ഥാപനങ്ങള്‍ (ലോ ഗ്രീൻ റേഞ്ച് സ്ഥാപനങ്ങള്‍):

ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങളെ പോലെ മുഴുവന്‍ ആനുകൂല്യങ്ങളും നിഷേധിക്കപ്പെടുന്നില്ല. നാമമാത്രമായ നിയന്ത്രണങ്ങളാണ് ഇത്തരം സ്ഥാപനങ്ങളുടെ പ്രവര്‍ത്തനത്തിലും മന്ത്രാലയം ഏര്‍പ്പെടുത്തിയിട്ടുള്ളത്.

  1. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ തൊഴില്‍ വിസകൾക്കുള്ള അപേക്ഷകൾ സമര്‍പ്പിക്കാന്‍ സാധിക്കില്ല.
  2. ഈ സ്ഥാപനങ്ങളിലെ വിദേശികളായ തൊഴിലാളികളുടെ പ്രോഫഷനുകള്‍ മാറ്റാനുള്ള അനുവാദം നല്‍കിയിട്ടുണ്ട്. എന്നാല്‍ സൗദി പൗരന്മാർക്ക് മാത്രമായി പരിമിതപ്പെടുത്തിയിരിക്കുന്ന പ്രൊഫഷനുകളിലേക്ക് മാറ്റം അനുവദിക്കില്ല.
  3. കുറഞ്ഞ പച്ച വിഭാഗത്തിന് താഴെയുള്ള വിദേശ തൊഴിലാളികളുടെ സേവനങ്ങൾ കൈമാറാനുള്ള അനുവാദം ലഭ്യമാണ്.
  4. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ ലഭ്യമാകും.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് തങ്ങളുടെ വിദേശ തൊഴിലാളിയുടെ അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വർക്ക് പെർമിറ്റ് പുതുക്കാന്‍ അനുവാദം നല്‍കും.

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (മിഡ് ഗ്രീൻ റേഞ്ച് സ്ഥാപനങ്ങള്‍)

ഇളം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന ആനുകൂല്യങ്ങള്‍ക്ക് പുറമേ മറ്റു ചില ആനുകൂല്യങ്ങള്‍ കൂടി ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം ലഭ്യമാക്കുന്നുണ്ട്.

  1. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ (replacement visa) ലഭ്യമാകും.

കടും പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (ഹൈ ഗ്രീൻ റേഞ്ച് സ്ഥാപനങ്ങള്‍):

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന എല്ലാ ആനുകൂല്യങ്ങളും ലഭ്യമാകുന്നതോടൊപ്പം മറ്റു ചില ആനുകൂല്യങ്ങള്‍ കൂടി ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം ലഭ്യമാക്കിയിട്ടുണ്ട്.

  1. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരം വിസ (replacement visa) ലഭ്യമാക്കും.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

പ്ലാറ്റിനം റേഞ്ച് കമ്പനികൾ:

നിതാഖാത് പദ്ധതി പ്രകാരമുള്ള അഞ്ചു വിഭാഗങ്ങളില്‍ ഏറ്റവും ഉയര്‍ന്ന വിഭാഗമാണ്‌ പ്ലാറ്റിനം വിഭാഗം.

  1. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കം.
  2. വിദേശികളായ തൊഴിലാളികളുടെ പ്രൊഫഷനുകള്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് ഒഴികെ മാറ്റം.
  3. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരമായി വിസ (replacement visa) ലഭ്യമാക്കും.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

സൗദി പൗരന്മാര്‍ക്ക് മിനിമം വേതനം

നിതാഖാത് പദ്ധതി പ്രകാരം വിവിധ വിഭാഗങ്ങളില്‍ ഉള്‍പ്പെടുന്ന സ്ഥാപനങ്ങള്‍ക്ക് വിവിധ തരം ആനുകൂല്യങ്ങളും പരിമിതികളും ലഭ്യമാകുമ്പോള്‍ മുകളില്‍ പറഞ്ഞ പോലെ ഒരു സൗദി പൗരന് നിര്‍ദ്ദിഷ്ട തുക അടിസ്ഥാന ശമ്പളമായി ലഭിക്കുന്നു എന്നതാണ് സ്വദേശി പൗരന്മാരെ സംബന്ധിച്ചിടത്തോളം ഈ പദ്ധതിയുടെ ഹൈലൈറ്റ്. ആനുകൂല്യങ്ങളും പരിമിതികളും സ്ഥാപനങ്ങള്‍ക്ക് ലഭ്യമാകുമ്പോള്‍ തങ്ങളുടെ പൗരന്മാരുടെ ജീവിത നിലവാരം ഉറപ്പു വരുത്തുന്നതിനുള്ള അടിസ്ഥാന ശമ്പളം ഉറപ്പു വരുത്തുന്ന രീതിയാണ് മന്ത്രാലയത്തിന്റെ നിതഖാത് പദ്ധതിയെ സ്വദേശി പൗരന്മാര്‍ക്ക് ഇടയില്‍ ജനപ്രിയമാക്കി തീര്‍ക്കുന്നത്.

നിതാഖാത് പദ്ധതി പ്രകാരം സ്ഥാപനങ്ങള്‍ക്ക് ആനുകൂല്യങ്ങള്‍ ലഭിക്കണമെങ്കില്‍ സ്വകാര്യ സ്ഥാപനത്തില്‍ ജോലി ചെയ്യുന്ന സൗദി പൗരന്റെ അടിസ്ഥാന പ്രതിമാസ ശമ്പളം ഏറ്റവും കുറഞ്ഞത് 4,000 റിയാൽ എന്ന് നിജപ്പെടുത്തിയിട്ടുണ്ട്. മുന്‍പ് ഈ തുക 3000 റിയാൽ ആയിരുന്നു എങ്കിലും വിവധ സാഹചര്യങ്ങള്‍ കണക്കിലെടുത്ത് സമീപ മാസങ്ങളിലാണ് ഈ തുകയില്‍ മന്ത്രാലയം വര്‍ദ്ധന ഏര്‍പ്പെടുത്തിയത്.

എങ്കിലും ഈ നിബന്ധനയില്‍ പ്രത്യക്ഷമായി ചെറിയ തരത്തിലുള്ള ഇളവ് മന്ത്രാലയം നല്‍കുന്നുണ്ട് എങ്കിലും നിതാഖാത് പ്രകാരമുള്ള പൂര്‍ണ്ണമായ ആനുകൂല്യം ലഭിക്കണമെങ്കില്‍ ഈ നിബന്ധന പൂര്‍ണ്ണമായും പാലിക്കണം എന്നത് മിനിമം വേതനതോട് കൂടി സ്വദേശി പൗരന്മാരെ തങ്ങളുടെ സ്ഥാപനങ്ങളില്‍ നിയമിക്കാന്‍ പരോക്ഷമായി സ്വകാര്യ സ്ഥാപനങ്ങളെ നിര്‍ബന്ധിതരാക്കുന്നു.

അതായത് 4000 റിയാലില്‍ കുറവ് ശമ്പളത്തിനും സ്ഥാപനങ്ങള്‍ക്ക് സ്വദേശി തൊഴിലാളികളെ നിയമിക്കാന്‍ അനുവാദമുണ്ട്. അന്നാല്‍ അതിനു ആനുപാതികമായി പദ്ധതിയില്‍ നിന്നും ലഭിക്കുന്ന ആനുകൂല്യങ്ങള്‍ക്കും കുറവുണ്ടാകും. അതായത് 4000 റിയാലിൽ താഴെയുള്ള ശമ്പളം നല്‍കി നിയമിക്കുന്ന ഒരു സ്വദേശി തൊഴിലാളിയെ നിതാഖാത് പദ്ധതി പ്രകാരം പകുതി തൊഴിലി ആയി മാത്രമേ കണക്കാക്കുകയുള്ളൂ.  പാർട്ട് ടൈം തൊഴിലാളികളുടെ കാര്യത്തിലും ഈ നിബന്ധന ബാധകമാണ്. മാസത്തില്‍ 168 മണിക്കൂറിൽ കുറയാത്ത സേവനം പൂർത്തിയാക്കിയ തൊഴിലാളിയെ (ഫ്ലക്സിബിള്‍ അവേഴ്സ്) സൗദി തൊഴിലാളിയുടെ 1/3 ആയി കണക്കാക്കും.

എന്നാല്‍ വികലാംഗരായ സ്വദേശി തൊഴിലാളികളുടെ കാര്യത്തില്‍ വലിയ ഇളവാണ് മന്ത്രാലയം നല്‍കുന്നത്. 4000 റിയാലില്‍ കുറയാത്ത ശമ്പളത്തില്‍ ഒരു സ്വദേശിയായ വികലാംഗ തൊഴിലാളിയെ നിയമിക്കുന്ന സ്ഥാപനങ്ങള്‍ക്ക് നിതാഖാത് പദ്ധതി പ്രകാരമുള്ള ആനുകൂല്യങ്ങള്‍ക്കായി ഒരു തൊഴിലാളിയെ 4 തൊഴിലാളികളായി കണക്കാക്കും. ഇതിലൂടെ അംഗ പരിമിതരായ തങ്ങളുടെ പൗരന്മാരുടെ തൊഴില്‍ ലഭ്യതയും അവര്‍ക്ക് നിര്‍ദ്ദിഷ്ട ജീവിത സാഹചര്യവും ഉറപ്പു വരുത്താന്‍ മന്ത്രാലയത്തിന് നിതാഖാത് പദ്ധതിയിലൂടെ സാധിക്കുന്നു.

 

ഇതൊക്കെയാണ് നിതാഖാത് പദ്ധതിയെ സംബന്ധിച്ചുള്ള ഏറ്റവും പുതിയ വിവരങ്ങള്‍. നിങ്ങളെ സംബന്ധിച്ച് വിസ ഉന്നത തസ്തികയില്‍ ഉള്ളതായതിനാല്‍ കുറച്ച് അപകട സാധ്യതയും ഇല്ലാതില്ല. കാരണം പലപ്പോഴും പ്രധാന തസ്തികകളാണ് സൗദിവല്ക്കരണത്തില്‍ ഉള്‍പ്പെടുത്താറുള്ളത്. വിദേശികള്‍ ധാരാളമായി ജോലി ചെയ്യുന്ന താഴ്ന്ന തസ്തികകള്‍ അധികമായി ഉള്‍പ്പെടുത്താറില്ല. നിങ്ങളുടെ തസ്തിക ഏതാണെന്ന് വ്യക്തമായി ചോദ്യത്തില്‍ ഉള്‍പ്പെടുത്താതിനാല്‍ അതിനെ കുറിച്ച് കൃത്യമായി പറയാനും സാധിക്കില്ല.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ. ലീഡ് പാര്‍ട്ണര്‍, എസ്.കെ അസോസിയേറ്റ്സ്. (ദുബായ്. റിയാദ്. ഡല്‍ഹി. കൊച്ചി)

 

Continue Reading

LATEST

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

Published

on

ഇന്ത്യന്‍ യൂണിയന്‍ മുസ്ലിം ലീഗിന്റെ വിദ്യാര്‍ത്ഥി ഘടകമായ എം.എസ്.എഫിന്റെ പ്രവര്‍ത്തന ചരിത്രത്തില്‍ പുതിയ ഒരധ്യായം എഴുതി ചേര്‍ത്തു കൊണ്ടാണ് കഴിഞ്ഞ ദിവസങ്ങളില്‍ ഡല്‍ഹിയില്‍ വെച്ചു നടന്ന ദേശീയ സമ്മേളനം സമാപിച്ചത്.

സംസ്ഥാന പ്രതിനിധികള്‍, കേന്ദ്ര സര്‍വ്വകലാശാലാ പ്രതിനിധികള്‍, മുസ്‌ലിം ലീഗ് ദേശീയ നേതാക്കള്‍, വിദ്യാര്‍ത്ഥി സംഘടനാ നേതാക്കള്‍, വിദ്യാഭ്യാസ വിചക്ഷണര്‍, ആക്റ്റിവിസ്റ്റുകള്‍ ഉള്‍പ്പടെയുള്ളവര്‍ പങ്കെടുത്ത സമ്മേളനം വന്‍ വിജയമായതോടൊപ്പം തന്നെ എം.എസ്.എഫ് ദേശീയ കമ്മിറ്റിയുടെ പുതിയ ആസ്ഥാനം പ്രവര്‍ത്തനം ആരംഭിക്കുകയും ചെയ്തു.

മുസ്‌ലിംലീഗ് ഉന്നതാധികാര സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങളാണ് പുതിയ ദേശീയ കമ്മിറ്റി ഓഫീസ് ഉദ്ഘാടനം ചെയ്തത്.

വിവിധ സംസ്ഥാനങ്ങളിലും കേന്ദ്ര, സംസ്ഥാന സര്‍വ്വകലാശാലകളിലും പതിറ്റാണ്ടുകളായി എം എസ് എഫിന്റെ പ്രവര്‍ത്തനം നടക്കുന്നുണ്ടങ്കിലും ദേശീയ കമ്മറ്റി യാഥാര്‍ഥ്യമായത് 2016ലാണ്. ദേശീയ തല പ്രവര്‍ത്തനങ്ങള്‍ എകോപിപ്പിക്കുകയും പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുകയും ചെയ്യുക എന്ന ലക്‌ഷ്യം മുന്‍നിറുത്തി 2016 ഡിസംബര്‍ 17 ന് പാലക്കാട് വെച്ചാണ് എം എസ് എഫിന് ഒരു ദേശീയ കമ്മറ്റി രൂപീകരിക്കുന്നത്. തുടര്‍ന്നാണ്‌ പ്രവര്‍ത്തനം ദേശീയ തലത്തിലേക്ക് വ്യാപിപിക്കുന്നത്.

നിലവില്‍ രാജ്യത്തെ 13 സംസ്ഥാനങ്ങളിലും, വിവിധ കേന്ദ്ര- സംസ്ഥാന സര്‍വ്വകലാശാലകളിലും എം എസ് എഫ് പ്രവര്‍ത്തനം സജീവമാണ്. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്കുന്ന മഹത്തായ ദൗത്യമാണ് എം എസ് എഫ് ദേശീയ കമ്മിറ്റി നിര്‍വ്വഹിച്ചു കൊണ്ടിരിക്കുന്നത്.

പൗരത്വ ഭേദഗതി നിയമവും, വിദ്വേഷ പ്രസംഗങ്ങളും, ആള്‍ക്കൂട്ട കൊലപാതകങ്ങളും, വസ്ത്രവിവേചനങ്ങളുമെല്ലാം കൊണ്ട് അപരവത്കരിക്കപ്പെടുന്ന കാലത്ത് വിദ്യാഭ്യാസം കൊണ്ട് കരുത്തരായി മാറുക എന്നതാണ് പ്രതിരോധമാര്‍ഗം. എം എസ് എഫ് ആ ദൗത്യ നിര്‍വ്വഹണത്തിലേക്കാണ് വിദ്യാര്‍ത്ഥികളെ ഉണര്‍ത്തുന്നത്. അതോടൊപ്പം രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലേക്ക് പാര്‍ശ്വവത്കരിക്കപ്പെട്ടിരുന്ന മുസ്‌ലിം വിദ്യാര്‍ഥികള്‍ക്ക് കടന്നു വരാനുള്ള ആത്മവിശ്വാസം സൃഷ്ടിക്കുക എന്ന ദൗത്യവും എം എസ് എഫ് വിജയകരമായി തന്നെ തുടര്‍ന്ന് പോരുകയാണ്.

മുഹമ്മദ്‌ അഷറഫ് എം എസ് എഫ് ദേശീയ കമ്മിറ്റി പ്രസിഡന്റ് ടി.പി. അഷറഫ് അലിയോടൊപ്പം

ന്യൂനപക്ഷ വിഭാഗങ്ങള്‍ക്ക് ഭരണ ഘടന വിഭാവനം ചെയ്തിട്ടുള്ള അവസര സമത്വവും സാമൂഹിക നീതിയും പോലുള്ള അവകാശങ്ങള്‍ നഷ്ടപ്പെടാതിരിക്കാനും അവകാശങ്ങള്‍ ക്രിയാത്മകമായി ഉപയോഗിക്കാനും  സംഘടിതരായി രാഷ്ട്രീയ ശക്തിയായി നിലനിന്ന് അവകാശങ്ങള്‍ക്ക് വേണ്ടി പൊരുതുക എന്നതാണ് വര്‍ത്തമാന കാലഘട്ടത്തില്‍ വിദ്യര്‍ത്ഥി സമൂഹത്തിന്റെയും ആവശ്യം. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്‍കി അത്തരത്തിലുള്ള സംവാദങ്ങള്‍ക്ക് ശക്തി പകരുകയാണ് ‘വിദ്യാഭ്യാസം, വിമോചനം, ശാക്തീകരണം’ എന്ന മുദ്രാവാക്യത്തിലൂടെ എം എസ് എഫ് നിര്‍വ്വഹിക്കുന്നത്.

രാജ്യതലസ്ഥാനത്ത് തന്നെ പുതിയ പുതിയ ദേശീയ കമ്മിറ്റി ഓഫീസ് സ്ഥാപിതമായതോടെ ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കാനും ശക്തിപ്പെടുത്താനും എം എസ് എഫിന് സാധിക്കുമെന്നാണ് പുതിയ നേതൃത്വം കരുതുന്നത്. അതോടൊപ്പം തന്നെ ഇന്ത്യയിലെ മുസ്‌ലിം സമുദായത്തിന് വരും കാലത്തേക്കുള്ള നേതൃത്വത്തെ വളര്‍ത്തിയെടുക്കുകയെന്ന ദൗത്യം നിര്‍വ്വഹിക്കാനും എം എസ് എഫ് ദേശീയ കമ്മിറ്റിക്ക് സാധിക്കുമെന്നും നേതൃത്വം പ്രത്യാശിക്കുന്നു.

മുഹമ്മദ്‌ അഷറഫ്  

ന്യൂ ഡല്‍ഹി.

 

Continue Reading
LATEST5 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST5 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST5 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST7 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST7 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST7 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST7 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST7 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST8 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST8 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST8 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST8 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!