Connect with us

LATEST

ഈ കാര്യങ്ങളില്‍ പ്രാഥമിക അറിവില്ലെങ്കില്‍ പിന്നീടൊരിക്കലും സൗദിയിലേക്ക് പ്രവേശനം സാധിക്കാതെ വന്നേക്കാം

Published

on

കഴിഞ്ഞ ദിവസം ഖത്തറില്‍ നിന്നും സൗദിയിലേക്ക് റോഡ്‌ മാര്‍ഗ്ഗം പ്രവേശിച്ച തങ്ങളുടെ സുഹൃത്തുക്കള്‍ക്ക് സൗദി അതിര്‍ത്തിയില്‍ അധികൃതരുടെ കര്‍ശനമായ പരിശോധന നേരിടേണ്ടി വന്നതായി കഴിഞ്ഞ ദിവസം അനുഭവസ്ഥന്‍ ഫോണിലൂടെ പറയുകയുണ്ടായി. രണ്ടു കാറുകളില്‍ അതിര്‍ത്തി കടന്നതില്‍ ഒരു കാറിനെ പോകാന്‍ അനുവദിക്കുകയും ഈ മലയാളികള്‍ സഞ്ചരിച്ചിരുന്ന കാര്‍ മണിക്കൂറുകളോളം തടഞ്ഞു നിര്‍ത്തി എന്നുമായിരുന്നു ഇവരുടെ പരാതി.

തടഞ്ഞു നിര്‍ത്താന്‍ ഉണ്ടായ കാരണം എന്താണെന്ന് ചോദിച്ചപ്പോള്‍ ഇയാള്‍ക്കും വ്യക്തമായി അറിയില്ല. എന്നാല്‍ സംസാരത്തിനൊടുവില്‍ ഇവരുടെ ലഗേജില്‍ ഉണ്ടായിരുന്ന അരിപ്പൊടി, മസാല പൊടികള്‍ തുടങ്ങിയ രണ്ടോ മൂന്നോ പൊടികള്‍ അധികൃതര്‍ കളയാന്‍ നിര്‍ദേശിച്ചതായും ഇദ്ദേഹം പറഞ്ഞു. രോഗി ആയതിനാല്‍ മൂന്ന് മാസം കഴിക്കാനുള്ള മരുന്നുകളും വലിയ അളവില്‍ കൊണ്ട് വന്നിരുന്നു. ഈ മരുന്നുകളും വിശദമായി പരിശോധിച്ച ശേഷമാണ് പോകാന്‍ അനുവദിച്ചത് എന്ന് കൂടി പറഞ്ഞപ്പോഴാണ് എന്തിനാണ് കസ്റ്റംസ് അധികൃതര്‍ തടഞ്ഞു നിര്‍ത്തിയത് എന്ന് മനസ്സിലാക്കാന്‍ സാധിച്ചത്.

നാട്ടിലുള്ള പ്രവാസികള്‍ ഏതു വിധേനെയും സൗദിയിലേക്ക് തിരിച്ചെത്താനുള്ള ശ്രത്തിലാണ് ഇപ്പോള്‍. വന്‍തുക കടം വാങ്ങിയും മറ്റും ഇങ്ങിനെ യാത്ര ചെയ്യുന്നവര്‍ക്ക് സൗദിയില്‍ തിരിച്ചെത്തി എത്രയും പെട്ടെന്ന് തന്നെ ജോലിയില്‍ പ്രവേശിക്കേണ്ടതും അത്യാവശ്യമാണ്. അത് കൊണ്ട് തന്നെ ഇത്തരം തടഞ്ഞു വെക്കലും തടവും പിഴയും ജയില്‍ ശിക്ഷയുമെല്ലാം ഒഴിവാക്കാന്‍ ചില പ്രാഥമിക കാര്യങ്ങളില്‍ പ്രാഥമികമായ ഒരു അവബോധം ഉണ്ടാകേണ്ടതുണ്ട്. എയര്‍പോര്‍ട്ടിലോ കര അതിര്‍ത്തിയിലോ പ്രവേശിക്കുമ്പോള്‍ നിങ്ങളുടെ ലഗേജില്‍ ഉള്ള എല്ലാ വസ്തുക്കള്‍ക്കും നിങ്ങള്‍ക്ക് തന്നെയാണ് പരിപൂര്‍ണ്ണ ഉത്തരവാദിത്വം. നിയമം അറിയില്ല എന്നത് സൗദിയില്‍ എന്നല്ല ഒരു രാജ്യത്തും ഒരു കാരണമായി കണക്കാക്കില്ല.

കര മാര്‍ഗ്ഗം മാത്രമല്ല വിമാനമാര്‍ഗ്ഗവും കടല്‍ മാര്‍ഗ്ഗവും രാജ്യത്തേക്ക് പ്രവേശിക്കുന്ന എല്ലാ അതിര്‍ത്തികളിലും കര്‍ശനമായ പരിശോധനകള്‍ ഉണ്ടായിരിക്കും. നിരോധിക്കപ്പെട്ട വസ്തുക്കള്‍ അനധികൃതമായി രാജ്യത്തേക്ക് പ്രവേശിപ്പിക്കപ്പെടുന്നത് തടയാന്‍ വേണ്ടിയാണ് ഈ പരിശോധന. സംശയാസ്പദമായ വസ്തുക്കള്‍ കൈവശം ഉണ്ടെങ്കില്‍ അത് പരിശോധിച്ച് ഉറപ്പ് വരുത്തിയ ശേഷം മാത്രമേ സൗദിയിലേക്ക് പ്രവേശിപ്പിക്കാന്‍ അനുവദിക്കുകയുള്ളൂ. സംശയാസ്പദമായ വസ്തുക്കള്‍ കൈവശം ഇല്ലാതിരിക്കുക എന്നതാണ് അതിര്‍ത്തികളില്‍ ബുദ്ധിമുട്ടുകള്‍ ഒഴിവാക്കാനുള്ള ഏറ്റവും എളുപ്പമുള്ള മാര്‍ഗ്ഗം.

വിമാന താവളങ്ങളിലും അതിര്‍ത്തി ചെക്ക് പോസ്റ്റുകളിലും പ്രഥമ ദൃഷ്ട്യ തിരിച്ചറിയാന്‍ സാധിക്കാത്ത പൊടി രൂപത്തിലുള്ളവ, മരുന്നുകള്‍ തുടങ്ങിയ സംശയാസ്പദമായ വസ്തുക്കളുമായി എത്തുന്നവരെ പെട്ടെന്ന് പോകാന്‍ അനുവദിക്കില്ല. അവരെ ബന്ധപ്പട്ടെ അധികൃതര്‍ക്ക് കൈമാറുകയും സംശയം തോന്നിയ വസ്തുവോ പൊടിയോ മരുന്നോ വിദഗ്ദ പരിശോധനക്ക് അയക്ക്കുകയും ചെയ്യും. വിദഗ്ദ പരിശോധനയില്‍ അപകടകരമല്ലെന്നു തെളിഞ്ഞാല്‍ മോചനം ഉണ്ടാകും. എന്നാല്‍ ഈ പരിശോധന റിപ്പോര്‍ട്ട് വരുന്നത് വരെ ചിലപ്പോള്‍ അധികൃതര്‍ അയാളെ തടഞ്ഞു വെക്കും. കൂടുതല്‍ വിദഗ്ദ പരിശോധന ആവശ്യമായി വരുന്ന അവസരങ്ങളില്‍ അത്രയും ദിവസം ബുദ്ധിമുട്ടുകള്‍ അനുഭവിക്കേണ്ടി വരും.

മരുന്നുകളുടെ കാര്യത്തില്‍ കര്‍ശനമായ നിലപാടാണ് അധികൃതര്‍ സ്വീകരിക്കുന്നത്. നാട്ടില്‍ നിന്നും മരുന്നുകള്‍ കൊണ്ട് വരുന്നവര്‍ പരമമായ ശ്രദ്ധ ഇക്കാര്യത്തില്‍ പുലര്‍ത്തേണ്ടതുണ്ട്. വ്യക്തിപരമായ ആവശ്യങ്ങള്‍ക്കുള്ള മരുന്നുകള്‍ സൗദി അറേബ്യയിലേക്ക് കൊണ്ട് വരുന്നതിനെ സംബന്ധിച്ചും സൗദിയില്‍ നിന്ന് വ്യക്തികള്‍ മരുന്നുകള്‍ പുറത്തേക്കു കൊണ്ട് പോകുന്നത് സംബന്ധിച്ചും  സൗദിയിൽ വ്യക്തമായ നടപടിക്രമങ്ങളും നിബന്ധനകളും ഉണ്ട്. ഇത് വ്യക്തമാക്കി കൊണ്ടുള്ള റെഗുലേഷൻ വർഷങ്ങൾക്ക്  മുൻപ് തന്നെ സൗദി തങ്ങളുടെ രാജ്യത്ത് പ്രവർത്തിക്കുന്ന വിദേശ രാജ്യങ്ങളുടെ എംബസ്സികള്‍ക്ക് ഔദ്യോഗികമായി  അയച്ചു കൊടുത്തിട്ടുണ്ട്‌.

ആവശ്യമായ മുൻകരുതലുകൾ എടുക്കാതെ നാട്ടിൽ നിന്നും മരുന്നുകൾ സൗദിയിലേക്ക് കൊണ്ട് വരുന്നത് വളരെ അപകടകരമാണ്. പലപ്പോഴും അജ്ഞതയും അശ്രദ്ധയും മൂലം ഇവർക്ക് ബലി കൊടുക്കേണ്ടി വരുന്നത് പ്രവാസ ജീവിതവും സ്വന്തം ജോലിയും ഭാവിയുമാണ്. ആവശ്യമായ മുൻകരുതലുകൾ എടുത്തില്ലെങ്കിൽ മരുന്നുകൾ സ്വന്തം ആവശ്യത്തിന് കൊണ്ട് വരുന്നവർ മാത്രമല്ല, മറ്റുള്ളവർക്ക് വേണ്ടി നാട്ടിൽനിന്നും കൊണ്ട് വരുന്നവരും പിടിക്കപ്പെടും.

കാരണം നാട്ടില്‍ സ്ഥിരമായി ഉപയോഗിക്കുന്ന ചില മരുന്നുകളും സൗദിയിലേക്ക് കൊണ്ട് വരുന്നത് അപകടകരമായി മാറിയേക്കാം. ഇങ്ങിനെ ബുദ്ധിമുട്ടുകള്‍ ഉണ്ടാകുന്നതിനായി സൗദിയില്‍ നിരോധിക്കപ്പെട്ട മരുന്ന് തന്ന ആവണം നമ്മള്‍ കൊണ്ട് വരുന്നത് എന്നില്ല. നാട്ടില്‍ നമ്മള്‍ സ്ഥിരമായി ഉപയോഗിക്കുന്നതും സൗദിയിലേക്ക് കൊണ്ട് വരുന്നതുമായ മരുന്നുകളില്‍ ഏതെങ്കിലും ഒന്നില്‍ നിരോധിക്കപ്പെട്ട അംശങ്ങള്‍ ഉണ്ടെങ്കില്‍ കുഴപ്പത്തിലാകും. നാട്ടിൽ നിന്നും കൊണ്ട് വരുന്ന മരുന്നുകളിൽ സൗദിയിൽ നിരോധിക്കപ്പെട്ട മരുന്നുകൾ ഉൾപ്പെടുന്നതാണ് നിരവധി പ്രവാസികൾക്ക് ജയിൽ ശിക്ഷ ലഭിക്കുന്നതിന് കാരണമാകുന്നത്.

ഉദാഹരണമായി കുറച്ചു വര്‍ഷങ്ങള്‍ക്കു മുന്‍പ് പടിഞ്ഞാറന്‍ പ്രവിശ്യയിലെ യാമ്പു എയര്‍പോര്‍ട്ടില്‍ നിന്നും എമിഗ്രേഷന്‍ അധികൃതര്‍ കസ്റ്റഡിയില്‍ എടുത്തു നാര്‍കോട്ടിക്‌ വിഭാഗത്തിന് കൈമാറിയ തമിഴ്നാട്ടുകാരന്‍ സാദിഖ്‌ പാഷ കൊണ്ട് വന്നത് T.Anximil 0.5 എന്ന മരുന്നായിരുന്നു. പ്രമേഹം, രക്ത സമ്മര്‍ദ്ദം അമിതമായ ഉല്‍ക്കണ്ഠ എന്നിവക്ക് കുറെ വര്‍ഷങ്ങളായി ഈ മരുന്ന് സ്ഥിരമായി കഴിക്കുന്ന വ്യക്തിയായിരുന്നു പാഷ. അവധി കഴിഞ്ഞു വരുമ്പോള്‍ നാട്ടില്‍ നിന്നും കൊണ്ട് വന്നപ്പോഴായിരുന്നു പിടിയിലായത്.

ഈ മരുന്ന് നാട്ടില്‍ നിരോധിച്ചത് ആയിരുന്നില്ല. എന്നാല്‍ അതേ സമയം ഈ മരുന്നില്‍ Alprazolam എന്ന മയക്കം (Sedation) ഉണ്ടാക്കുന്ന മരുന്നിന്‍റെ അംശം ഉള്ളതിനാല്‍ ആയിരുന്നു ഇയാള്‍ 55 ദിവസം നാര്‍കോട്ടിക്‌ വിഭാഗത്തിന്റെ കസ്റ്റഡിയില്‍ കഴിയണ്ടി വന്നത്. ഈ അംശം സൗദിയില്‍ നിരോധിക്കപ്പെട്ടതായിരുന്നു. അതറിയാതെ ഈ മരുന്നുകള്‍ കൊണ്ട് വന്നതിനാണ് ഇയാള്‍ പിടിയിലായത്.

പലപ്പോഴും നമ്മള്‍ മരുന്നുകള്‍ കൊണ്ട് വരുന്നത് ഡോക്ടറുടെ പ്രിസ്ക്രിപ്ഷന്‍ പ്രകാരമായിരിക്കാം. എന്നാല്‍ ഡോക്ടറുടെ കുറിപ്പടി ഉണ്ടായാലും സൗദിയില്‍ നിരോധിച്ച മരുന്നുകളുടെ അംശങ്ങള്‍ കൂട്ടത്തിലുള്ള ഒരു മരുന്നില്‍  കണ്ടെത്തിയാല്‍ നമ്മള്‍ കുഴപ്പത്തിലാകും. അത് പോലെതന്നെ സ്വന്തം ആവശ്യത്തിനു മാത്രമല്ല മറ്റുള്ളവരുടെ ആവശ്യങ്ങള്‍ക്ക് ഇത്തരം മരുന്നുകള്‍ കൊണ്ട് വരുമ്പോഴും അതീവ ശ്രദ്ധ പുലര്‍ത്തെത്തേണ്ടതുണ്ട്.

ഈ രണ്ടു കാര്യങ്ങളും സംബന്ധിച്ച മികച്ച ഉദാഹരണം കോഴിക്കോട്‌ പാലിശ്ശേരി സ്വദേശി ഷംസുവിന്റെതാണ്. സന്ദര്‍ശക വിസയില്‍ വന്ന കുടുംബത്തോടൊപ്പം നാട്ടിലേക്ക് പോയി ആറു മാസത്തെ അവധി കഴിഞ്ഞു തിരിച്ചു വരുമ്പോഴാണ് ശംസുവിനെ പടിഞ്ഞാറന്‍ പ്രവിശ്യയില്‍ എയര്‍പോര്‍ട്ടില്‍ നിന്ന് അധികൃതര്‍ പിടികൂടി നാര്‍കോട്ടിക്‌ വിഭാഗത്തിന് കൈമാറിയത് സുഹൃത്തായ സിദ്ദിഖിന് വേണ്ടി മരുന്നുകള്‍ കൊണ്ട് വന്നപ്പോഴായിരുന്നു. നാട്ടില്‍ നിന്നും ഡോക്ടര്‍മാര്‍ നിര്‍ദ്ദേശിച്ച പ്രകാരമുള്ള മരുന്നുകളായിരുന്നു കൈവശം ഉണ്ടായിരുന്നത്. ഈ മരുന്നുകള്‍ക്ക് ഡോക്ടറുടെ കുറിപ്പടി ഉണ്ടായിട്ടും സൗദിയില്‍ നിരോധിച്ച മരുന്നുകളുടെ അംശങ്ങള്‍ കൂട്ടത്തിലുള്ള ഒരു മരുന്നില്‍ കണ്ടെത്തിയതിനാല്‍ അധികൃതര്‍ തടഞ്ഞു വെച്ച് നാര്‍കോട്ടിക്‌ സെല്ലിനു കൈമാറുകയായിരുന്നു.

ഷംസുവിന്റെ പക്കൽ നാട്ടില്‍ നിന്നും ഡോക്ടര്‍മാര്‍ നിര്‍ദ്ദേശിച്ച പ്രകാരമുള്ള മരുന്നുകളായിരുന്നു ഉണ്ടായിരുന്നത്. ഈ മരുന്നുകള്‍ക്ക് കോഴിക്കോട് മാലാപറമ്പിലെ ഇക്ര ഇന്റര്‍നാഷണല്‍ ആശുപത്രിയിലെ ഇ എന്‍ ടി സര്‍ജന്‍ ഡോക്ടര്‍ സഞ്ജയ്‌ രാഘവന്‍ നൽകിയ പ്രിസ്‌ക്രിപ്‌ഷനും ഉണ്ടായിരുന്നു. എന്നിട്ടും എയർപോർട്ട് അധികൃതർ ഷംസുവിനെ പിടികൂടി നാർക്കോട്ടിക് വിഭാഗത്തിന് കൈമാറുകയായിരുന്നു.

സൗദിയില്‍ നിരോധിച്ച മരുന്നുകളുടെ അംശങ്ങള്‍ കൂട്ടത്തിലുള്ള നെക്സിറ്റോ പ്ലസ് (Escitalopram with Lonazep Combination) എന്ന ഒരു മരുന്നില്‍ കണ്ടെത്തിയാതായിരുന്നു ഷംസുവിന് വിനയായത്. പിന്നീട് ഷംസു നിരപരാധിയെന്ന് ബോധ്യപ്പെട്ടതോടെ അധികൃതർ സിദ്ദിഖിനോട് കീഴടങ്ങാൻ ആവശ്യപ്പെടുകയും സിദ്ദിഖ് അധികൃതർക്ക് മുൻപിൽ കീഴടങ്ങിയതോടെ ഷംസുവിനെ മോചിപ്പിക്കുകയായിരുന്നു.

ഈ മരുന്ന് ഇന്ത്യയില്‍ നിരോധിച്ചിട്ടുള്ളതായിരുന്നില്ല. അനേകം വർഷങ്ങളായി ഈ മരുന്ന് ഉപയോഗിച്ചു വരുന്ന സിദ്ദിഖ് മുൻപ് പലതവണ ഇത് നാട്ടിൽ നിന്നും കൊണ്ട് വന്നിരുന്നു. പക്ഷെ ഈ മരുന്ന് കൂടിയ ഡോസിൽ ഉപയോഗിച്ചാൽ ഒരു മയക്കം ഉണ്ടാകും എന്നതിനാൽ ഇത് ദുരുപയോഗം ചെയ്യപ്പെട്ടിരുന്നതിനാൽ ഇത് അധികൃതരുടെ ഹിറ്റ് ലിസ്റ്റിൽ ഉൾപ്പെട്ടിരുന്നു. മരുന്നിന്റെ ഈ പ്രത്യേകത സിദ്ദിഖിന് പ്രതികൂലമായി. അന്വേഷണത്തിന് ഒടുവിൽ മരുന്നിന്റെ പരിശോധനാ ഫലവും എതിരായതോടെ സിദ്ദിഖിനെ നാട് കടത്താൻ വിധിക്കുകയായിരുന്നു.

മയക്കു മരുന്നായി കണക്കാക്കുന്ന മരുന്നുകളുടെ അംശങ്ങള്‍ (Narcotic Properties) അടങ്ങിയിട്ടുള്ള മരുന്നുകള്‍ കൊണ്ട് വരുമ്പോള്‍ കൂടുതല്‍ ശ്രദ്ധിക്കുക. കാരണം അത് മയക്കം (Sedation) ഉണ്ടാക്കുന്നതിനായി ലഹരി മരുന്നായി ഉപയോഗിക്കാന്‍ സാധ്യത അധികൃതര്‍ തള്ളികളയില്ല. പിടിക്കപ്പെടുന്ന അവസരത്തിൽ ഈ നിയമം അറിയില്ലായിരുന്നു എന്ന വാദത്തിന് യാതൊരു പ്രസക്തിയുമില്ല. കാരണം മനഃപൂർവ്വം മയക്കു മരുന്ന് കടത്തുന്നവരും മനപൂർവ്വമല്ലാതെ കടത്തുന്നവരും പിടിക്കപ്പെടുന്ന സമയത്ത് ഒരുപോലെ ഉയർത്തുന്ന കാരണമാണിത് എന്നത് കൊണ്ട് ഒരു ഉദ്യോഗസ്ഥനും കോടതിയും ഈ കാരണം മുഖവിലക്ക് എടുക്കാറില്ല.

സൗദിയിലേക്ക് നാട്ടിൽ നിന്നും മരുന്നുകൾ കൊണ്ട് വന്നതിന് അഞ്ചു വർഷം ജയിൽ ശിക്ഷ അനുഭവിക്കേണ്ടി വന്നവരിൽ ഒരാളായ അബ്ദുൽ വഹീദ് എന്ന ഹൈദരാബാദ് സ്വദേശി സൽമാൻ രാജാവിന്റെ കാരുണ്യം മൂലമുള്ള പൊതുമാപ്പിൽ മോചനം ലഭിച്ചാണ് നാട്ടില്‍ എത്തിയത്. സൗദിയിൽ ബാങ്ക് ജീവനക്കാരനായി ജോലി ചെയ്തിരുന്ന വഹീദ് റിയാദ് എയർപോർട്ടിൽ വെച്ചാണ് പിടിയിലായത്.

അബ്ദുൽ വഹീദ് മരുന്നുകൾ കൊണ്ട് വന്നത് സ്വന്തം ആവശ്യത്തിനോ ഉപയോഗത്തിനോ ആയിരുന്നില്ല. സുഹൃത്തിന്റെ ഭാര്യക്ക് ഉപയോഗിക്കുന്നതിന് വേണ്ടിയായിരുന്നു ഇയാൾ മരുന്നുകൾ കൊണ്ട് വന്നത്. ഉറക്കം ഇല്ലയ്മക്കും അമിത ഉൽക്കണ്ഠക്കും പരിഹാരമായി ഡോക്ടർമാർ നിർദ്ദേശിച്ച BECALM എന്ന മരുന്ന് ഇയാൾ കൊണ്ട് വന്ന മരുന്നുകളുടെ  കൂട്ടത്തിൽ ഉൾപ്പെട്ടിരുന്നു. അതിൽ അൽപ്രാസോളം എന്ന നിരോധിത മരുന്നിന്റെ അംശങ്ങൾ ഉണ്ടായിരുന്നത് മൂലമാണ് വഹീദ് പിടിയിലായത്.

പിടിയിലായ വഹീദിനെ അധികൃതർ ചോദ്യം ചെയ്തപ്പോൾ അയാളുടെ സുഹൃത്തായ അബ്ദുൽ മൊയിസ് എന്ന ഹൗസ് ഡ്രൈവറുടെ ആവശ്യപ്രകാരമാണ് മരുന്നുകൾ കൊണ്ട് വന്നതെന്ന് വെളിപ്പെട്ടു. മൊയിസിനെ കസ്റ്റഡിയിൽ എടുത്തപ്പോഴാണ് ഈ മരുന്നുകൾ അയാളുടെ സുഹൃത്തായ ഷൈക്ക് ബദർ എന്ന ഹൈദരാബാദ് സ്വദേശിയുടെ നിർദ്ദേശപ്രകാരമാണ് കൊണ്ട് വരാൻ ആവശ്യപ്പെട്ടതെന്ന് മൊഴി നൽകി. തുടർന്ന് ഷെയ്ക്ക് ബദറിനെ ചോദ്യം ചെയ്തപ്പോൾ അയാളുടെ ഭാര്യ ഹാജറ ബീഗത്തിന് വേണ്ടിയാണ് മരുന്നുകൾ കൊണ്ട് വന്നതെന്ന് തെളിഞ്ഞു.

പിടിയിലായ ഒരാൾക്ക് പോലും ഈ മരുന്ന് സൗദിയിലേക്ക് കൊണ്ട് വരാൻ പാടില്ലായിരുന്നു എന്ന നിയമ വശം അറിയുമായിരുന്നില്ല. പക്ഷെ ഈ വാദം കോടതി കണക്കിലെടുത്തില്ല. അന്വേഷണത്തിൽ ഹാജറ ബീഗം ഇതിന് മുൻപ് ഈ മരുന്നോ ഇതുപോലെയുള്ള മരുന്നുകളോ ഉപയോഗിച്ചിരുന്നില്ലെന്ന് അന്വേഷണത്തിൽ വെളിപ്പെട്ടത് ഇവർക്ക് വിനയായി.

2015 ൽ വിചാരണക്കൊടുവിൽ അബ്ദുൽ വഹീദിന് എട്ടു വർഷം തടവും എണ്ണൂറു ചാട്ടയടിയും ഒരുലക്ഷം റിയാൽ പിഴയൊടുക്കാനും വിധിച്ചു. ഷെയ്ക്ക് ബദറിനും ഭാര്യക്കും അഞ്ചു വർഷം വീതം തടവും 500 ചാട്ടയടിയും മോയിസിന് രണ്ടര വർഷം തടവും മുന്നൂറ് ചാട്ടയടിയും കോടതി ശിക്ഷ വിധിച്ചു. എന്നാൽ അപ്രതീക്ഷിതമായെത്തിയ രാജകാരുണ്യത്തിൽ കാലാവധി തികയും മുൻപേ തന്നെ ഇവർക്ക് മോചനം ലഭിക്കുകയായിരുന്നു.

സൗദിയിലേക്ക് മരുന്നുകൾ കൊണ്ട് വരുന്നവർ താഴെ പറയുന്ന കാര്യങ്ങളിൽ അതീവ ശ്രദ്ധ പുലർത്തുക:

1. മരുന്ന് കൊണ്ട് വരുന്നവർ ഈമരുന്നോ മരുന്നിൽ അടങ്ങിയിട്ടുള്ള ഏതെങ്കിലും അംശങ്ങളോ സൗദിയിലോ അന്താരാഷ്ട്രാ തലത്തിലോ നിരോധിക്കപ്പെട്ടതാണോ അല്ലെങ്കിൽ നിയന്ത്രിക്കപ്പെട്ടിട്ടുള്ളതോ (Restricted) എന്ന് അറിഞ്ഞിരിക്കേണ്ടതാണ്.

2. മയക്കു മരുന്നായി കണക്കാക്കുന്ന മരുന്നുകളുടെ അംശങ്ങള്‍ (Narcotic Properties) അടങ്ങിയിട്ടുള്ള മരുന്നുകള്‍ കൊണ്ട് വരുമ്പോൾ കൂടുതൽ ജാഗ്രത പുലർത്തുക.

3. കൊണ്ടു വന്നിട്ടുള്ള മരുന്നുകള്‍ രോഗിയുടെ പരമാവധി ആറു മാസത്തെ ഉപയോഗത്തിന് ആവശ്യമായ അളവിലുള്ളത് ആയിരിക്കണം. അതില്‍ കൂടുതല്‍ കൊണ്ട് വരാന്‍ പാടില്ല.

4. പ്രസ്തുത വ്യക്തി ആറു മാസത്തെ കാലാവധിയിലും കുറവാണ് രാജ്യത്ത്‌ താമസിക്കാന്‍ ഉദ്ദേശിച്ചിട്ടുള്ളതെങ്കില്‍ അത്രയും കാലത്തേക്ക് ഉപയോഗിക്കാന്‍ ആവശ്യമായ അളവില്‍ മാത്രമേ മരുന്നുകള്‍ കൊണ്ട് വരുന്നതിന് അനുവാദമുണ്ടായിരിക്കുകയുള്ളൂ.

5. രോഗിയുടെ ആവശ്യത്തിനുള്ളതില്‍ കൂടുതല്‍ മരുന്നുകള്‍ കൊണ്ട് വരികയാണെങ്കില്‍ അധികമുള്ള മരുന്നുകള്‍ കണ്ടു കെട്ടും.

6. മരുന്ന് കൊണ്ട് വരുന്ന വ്യക്തി രോഗി ആണെങ്കില്‍ ആ വ്യക്തിയുടെ കൈവശം മെഡിക്കൽ റിപ്പോർട്ട് ഉണ്ടായിരിക്കണം.

7. ഈമെഡിക്കൽ റിപ്പോർട്ട് അയാളെ ചികിത്സിച്ചിരുന്ന ആശുപത്രിയുടെതായിരിക്കണം. റിപ്പോർട്ടിന് ആറു മാസ കാലാവധിയില്‍ കൂടുതല്‍ പഴക്കം ഉണ്ടായിരിക്കരുത്.

8. ഈ മെഡിക്കൽ റിപ്പോർട്ടിൽ പ്രസ്തുത വ്യക്തിയുടെ വ്യക്തിപരമായ വിവരങ്ങള്‍ രേഖപ്പെടുത്തിയിരിക്കണം. അയാളുടെ രോഗവും മരുന്നുകള്‍ കഴിക്കേണ്ട രീതിയും എത്ര നാള്‍ മരുന്നുകള്‍ കഴിക്കണമെന്നും വ്യക്തമായി രേഖപ്പെടുത്തിയിരിക്കണം.

9. ഈ മെഡിക്കൽ റിപ്പോർട്ടിൽ മരുന്നിന്റെ ശാസ്ത്രീയ നാമവും ഫാര്‍മസ്യൂട്ടിക്കല്‍ ബ്രാന്‍ഡ്‌ നാമവും മരുന്ന് കഴിക്കേണ്ട അളവുകളും അതില്‍ ഉണ്ടായിരിക്കണം.

10. പ്രസ്തുത ഹോസ്പിറ്റലിലെ അംഗീകാരമുള്ള ഡോക്ടറുടെ പ്രിസ്‌ക്രിപ്‌ഷൻ ഉണ്ടായിരിക്കണം. ആ പ്രിസ്‌ക്രിപ്‌ഷൻ കഴിഞ്ഞ ആറു മാസത്തിനുള്ളില്‍ നല്കിയതായിരിക്കണം.

11. ഈ പ്രിസ്‌ക്രിപ്‌ഷനിൽ അതില്‍ ഡോക്ടറുടെ രോഗ നിര്‍ണ്ണയവും മരുന്നിന്‍റെ ശാസ്ത്രീയ നാമവും ഫാര്‍മസ്യൂട്ടിക്കല്‍ ബ്രാന്‍ഡ്‌ നാമവും ഉണ്ടായിരിക്കണം.

12. പ്രിസ്‌ക്രിപ്‌ഷനിൽ മരുന്നിന്‍റെ ഉപയോഗ ക്രമവും ചികില്‍സയുടെ ദൈര്‍ഘ്യവും രേഖപ്പെടുത്തിയിരിക്കണം.

13. പ്രിസ്‌ക്രിപ്‌ഷനിൽ പ്രസ്തുത വ്യക്തിയ ചികിത്സിച്ചിരുന്ന ആശുപത്രിയുടെ സീല്‍ ഉണ്ടായിരിക്കണം.

14. മറ്റൊരാള്‍ക്ക് വേണ്ടി മരുന്ന് സൗദിയിലേക്ക് കൊണ്ട് വരുന്നയാള്‍ രോഗിയുടെ മാതാപിതാക്കളോ, മക്കളോ, സഹോദരങ്ങളോ, ഭര്‍ത്താവോ തുടങ്ങിയ ബന്ധുക്കള്‍ ആണെങ്കില്‍ രോഗിയുടെ ഔദ്യോഗിക തിരിച്ചറിയൽ രേഖ പകർപ്പ്‌ കൈവശം കരുതണം.

15. രോഗിക്ക് വേണ്ടി മരുന്നുകള്‍ കൊണ്ട് വരുന്നത് രോഗിയുടെ പ്രതിനിധി ആണെങ്കില്‍ പ്രസ്തുത മരുന്നുകള്‍ കൊണ്ട് വരുന്നതിന് സമ്മതം അറിയിച്ചു കൊണ്ടുള്ള സത്യവാങ്മൂലം ആവശ്യമാണ്‌.

16. രാജ്യത്ത്‌ നിന്ന് പുറത്തേക്കു പോകുന്ന രോഗികള്‍ ഇത്തരത്തിലുള്ള മരുന്നുകള്‍ കൂടെ കൊണ്ട് പോകുകയാണെങ്കിലും നിബന്ധനകള്‍ പാലിക്കേണ്ടതുണ്ട്. അവര്‍ ആഭ്യന്തരമായും അന്താരാഷ്ട്രാ തലത്തിലും നിരോധിക്കപ്പെട്ടിട്ടുള്ളതോ നിയന്ത്രിക്കപ്പെട്ടിട്ടുള്ളതോ (Restricted) ആയ മരുന്നുകള്‍ കൊണ്ട് പോകാന്‍ പാടില്ല.

ഇത്തരം രേഖകൾ ഒരു വ്യക്തിയുടെ നിരപരാധിത്വം വെളിവാക്കുന്നതിന് ഹാജരാക്കാവുന്ന രേഖകളായി മാത്രമേ കണക്കാക്കുന്നുള്ളൂ. ഇതിന്റെ ആധികാരികതയെ കുറിച്ചും വിശ്വാസ്യതയെ കുറിച്ചും അവസാന തീരുമാനം ബന്ധപ്പെട്ട സൗദി അധികൃതരുടേതാണ്. ഹാജരാക്കുന്ന രേഖകൾ കൃത്യമാണെങ്കിലും ഏതെങ്കിലും തരത്തിലുള്ള സംശയങ്ങൾ ഉണ്ടായാൽ അത് ദുരീകരിക്കുന്നത് വരെ അന്വേഷണ വിധേയമായി കസ്റ്റഡിയിൽ വെക്കുകയും ചെയ്യാറുണ്ട്.

അത് പോലെ തന്നെ സൗദി അറേബ്യയിലേക്ക് പ്രവേശിപ്പിക്കുന്നത് അത്യന്തം അപകടകരമായ ചില സാധന സാമഗ്രികളെ കുറിച്ച് താഴെ വിവരിക്കുന്നു. ഇവ കൈവശം ഉണ്ടാകാതിരിക്കാന്‍ പ്രവാസികള്‍ ശ്രദ്ധിക്കേണ്ടത് ആവശ്യമാണ്.

മദ്യം ഔദ്യോഗികമായി തന്നെ സൗദി അറേബ്യയില്‍ നിരോധിക്കപ്പെട്ടിരിക്കുന്നു. ഇസ്ലാമിക രാജ്യമായ സൗദിയില്‍ മദ്യം വില്‍ക്കുന്നതും ഉപയോഗിക്കുന്നതും കടുത്ത ശിക്ഷാര്‍ഹമായ കാര്യമാണ്. ആല്‍കഹോള്‍ അടങ്ങിയ എല്ലാ തരത്തിലുമുള്ള പാനീയങ്ങളും നിരോധിക്കപ്പെട്ടിരിക്കുന്നു. മദ്യം, ബിയര്‍, വൈന്‍ തുടങ്ങിയവ ഏതു രൂപത്തില്‍ ആയാലും നിങ്ങളുടെ കൈവശം ഉണ്ടായിരിക്കരുത്.

  • ഇസ്ലാമിക രാജ്യമായ സൗദിയില്‍ എല്ലാ തരത്തിലുമുള്ള ചൂതാട്ടത്തിനും സമ്പൂര്‍ണ്ണ നിരോധനമുണ്ട്. ചൂതാട്ടത്തിന് വേണ്ടി ഉപയോഗിക്കുന്ന എല്ലാ തരത്തിലുള്ള ഉപകരണങ്ങള്‍, മെഷീനുകള്‍ തുടങ്ങിയവ രാജ്യത്തേക്ക് പ്രവേശിപ്പിക്കുന്നത് നിയമ വിരുദ്ധമാണ്. ഇസ്ലാമിക മത പ്രമാണങ്ങള്‍ക്ക് എതിരായിട്ടുള്ള പുസ്തകങ്ങള്‍ ലഗേജില്‍ ഉണ്ടാകാതെ സൂക്ഷിക്കുക.
  • വിശുദ്ധ കഅബയുടെ രൂപങ്ങള്‍, സംസം എന്ന് പേരെഴുതിയിട്ടുള്ള വെള്ളത്തിന്‍റെ കുപ്പികള്‍, കാനുകള്‍, പന്നികളുടെ മാംസം, അതിന്റെ കൊഴുപ്പ്, ചോര, ആന്തരിക ഭാഗങ്ങള്‍ എന്നിവ സൗദിയിലേക്ക് കൊണ്ട് വരാതിരിക്കുക. അത് പോലെ തന്നെ മായം കലര്‍ന്ന പദാര്‍ഥങ്ങള്‍ രാജ്യത്തേക്ക് പ്രവേശിപ്പിക്കരുത്.
  • അശ്ലീല ചിത്രങ്ങള്‍, അശ്ലീല വിഡിയോ, പുസ്തകങ്ങള്‍ എന്നിവ. നിങ്ങളുടെ കൈവശമുള്ള മൊബൈലില്‍ അശ്ലീല ചിത്രങ്ങളോ വീഡിയോകളോ ഉണ്ടെങ്കില്‍ നിങ്ങള്‍ കുഴപ്പത്തിലായേക്കും. (സാധാരണ ഗതിയില്‍ സുരക്ഷാ ഉദ്യോഗസ്ഥര്‍ യാത്രക്കാരുടെ മൊബൈല്‍ ഫോണുകള്‍ വാങ്ങി പരിശോധിക്കാറില്ല. ഒരു പക്ഷെ മറ്റേതെങ്കിലും കാരണത്താല്‍ പരിശോധിക്കേണ്ടി വന്നാല്‍ അശ്ലീലത ഉണ്ടെങ്കില്‍ നിങ്ങള്‍ തടഞ്ഞു വെക്കപ്പെടും.
  • വ്യാവസായിക ആവശ്യങ്ങള്‍ക്ക് ശേഷം ഉണ്ടാകുന്ന വേസ്റ്റുകള്‍, ആരോഗ്യത്തിനു ഹനീകരവും അപകടകരവുമായ വേസ്റ്റുകള്‍ എന്നിവ രാജ്യത്തേക്ക് പ്രവേശിപ്പിക്കുന്നത് നിയമ വിരുദ്ധമാണ്.
  • പടക്കങ്ങള്‍ തുടങ്ങി, പുകയും അഗ്നിയും ഉണ്ടാക്കുന്ന ഏതൊരു വസ്തുക്കളും നിങ്ങളുടെ ലഗേജില്‍ ഉണ്ടാവരുത്. കൂടാതെ തോക്കുകള്‍, സ്ഫോടന വസ്തുക്കള്‍, ബുള്ളറ്റുകള്‍ എന്നിവ രാജ്യത്തേക്ക് കടത്തുന്നത് നിയമ വിരുദ്ധമാണ്. ഒറിജിനല്‍ തോക്കുകളുടെ രൂപത്തിലുള്ള കളിതോക്കുകളും നിങ്ങളുടെ ലഗേജില്‍ നിന്ന് ഒഴിവാക്കുന്നത് നല്ലതാണ്.
  • വിദേശത്ത് പ്രവര്‍ത്തിക്കുന്നതും സൗദിയില്‍ പ്രവര്തിക്കാതതുമായ കമ്പനികളുടെ പേര് സഹിതമുള്ള വെള്ള നിറത്തിലുള്ള ഇന്‍വോയിസുകള്‍.
  • ലക്ഷ്യത്തിലേക്ക് കൃത്യമായി ഉന്നം വെക്കാന്‍ സാധിക്കുന്ന ചുവന്ന ലൈറ്റ് ഉള്ളതും ഇലക്ട്രിക്‌ സര്‍ക്യൂട്ട് മുഖേന പ്രവര്‍ത്തിപ്പിക്കാന്‍ സാധിക്കുന്നതുമായ ബൈനോക്കുലറുകള്‍ രാജ്യത്തേക്ക് പ്രവേശിപ്പിക്കാന്‍ പാടില്ല. അത് പോലെ തന്നെ പട്ടാളക്കാരുടെ യൂണിഫോമുകള്‍, മിലിട്ടറി ആവശ്യങ്ങള്‍ക്ക് ഉപയോഗിക്കുന്ന ഉപകരണങ്ങള്‍ തുടങ്ങിയവ ലഗേജില്‍ ഉള്‍പ്പെടാതിരിക്കാന്‍ ശ്രദ്ധിക്കുക. .
  • ആശയ വിനിമയങ്ങള്‍ക്കായി ഉപയോഗിക്കുന്ന റേഡിയോ ട്രാന്‍സ്മിറ്റര്‍ പോലുള്ള ഉപകരണങ്ങള്‍, റഡാറുകള്‍ കണ്ടു തിരിച്ചറിയുന്നതിനും പിടിക്കുന്നതിനുമായുള്ള ഉപകരണങ്ങള്‍, സുരക്ഷാ വാഹനങ്ങളുടെ സെക്യൂരിറ്റി സൈറന്‍ പോലുള്ള ശബ്ദങ്ങള്‍ ഉണ്ടാക്കുന്നവ, റിമോട്ട് കണ്ട്രോളില്‍ പ്രവര്‍ത്തിക്കുന്ന തരം വിമാനങ്ങള്‍, അവയുടെ ഭാഗങ്ങള്‍, സ്പെയര്‍ പാര്‍ട്ടുകള്‍ എന്നിവ രാജ്യത്തേക്ക് പ്രവേശിപ്പിക്കാതിരിക്കുക.
  • മേല്‍ പറഞ്ഞവക്ക് സമാനമായ കളിപ്പാട്ടങ്ങളും മറ്റും ഒഴിവാക്കുന്നതും നല്ലതാണ്. ഇവ മൂലം ചിലപ്പോള്‍ നിങ്ങള്‍ക്ക് താല്‍ക്കാലികമായ ബുദ്ധിമുട്ടുകള്‍ ഉണ്ടാക്കും.

അവസാനമായി ഒരിക്കല്‍ കൂടി ഈ കാര്യം സൗദിയിലെ പ്രവാസികളോട് ഓര്‍മിപ്പിക്കാന്‍ ആഗ്രഹിക്കുന്നു. സൗദിയിലേക്ക് എയര്‍പോര്‍ട്ടിലൂടെയോ കര അതിര്‍ത്തിയിലൂടെയോ പ്രവേശിക്കുമ്പോള്‍ മേല്‍ പറഞ്ഞ പ്രാഥമികമായ കാര്യങ്ങളെ സംബന്ധിച്ചുള്ള അവബോധം ഉണ്ടായിരിക്കേണ്ടത് ആവശ്യമാണ്. കാരണം മുകളില്‍ പറഞ്ഞ പോലെ തന്നെ നിങ്ങളുടെ ലഗേജില്‍ ഉള്ള എല്ലാ വസ്തുക്കള്‍ക്കും നിങ്ങള്‍ക്ക് തന്നെയാണ് പരിപൂര്‍ണ്ണ ഉത്തരവാദിത്വം. നിയമം അറിയില്ല എന്നത് സൗദിയില്‍ എന്നല്ല ഒരു രാജ്യത്തും ഒരു കാരണമായി കണക്കാക്കില്ല.

അഡ്വ.ഷിയാസ് കുഞ്ഞിബാവ

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DtW7D99bYc62sJ1L3kbxwg

പ്രവാസി കോര്‍ണര്‍ ഫേസ്ബുക്ക് പേജില്‍ പ്രവേശിക്കാന്‍ ഈ ലിങ്കില്‍ ക്ലിക്ക് ചെയ്യുക  https://www.facebook.com/PravasiCornerOfficial

LATEST

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

Published

on

ഞാന്‍ ഇപ്പോള്‍ റിയാദില്‍ ഹൗസ് ഡ്രൈവര്‍ വിസയില്‍ ജോലി ചെയ്യുകയാണ്. സ്വന്തമായാണ് പുറത്ത് ജോലി ചെയ്യുന്നത്. ഹൗസ് ഡ്രൈവര്‍മാര്‍ക്ക് ലെവി ബാധകമാക്കിയല്‍ മുന്നോട്ട് തുടര്‍ന്ന് പോകാന്‍ സാധിക്കില്ല. എന്ന് മുതലാണ്‌ ഈ നിയമം നിലവില്‍ വരുന്നത്, ഏതെങ്കിലും തരത്തിലുള്ള ഒഴിവാക്കലുകള്‍ ഉണ്ടാകുമോ തുടങ്ങിയ കാര്യങ്ങള്‍ വിശദീകരിക്കാമോ? സ്പോണ്‍സര്‍ഷിപ്പ് മാറുന്നതിന് എന്തൊക്കെ നടപടി ക്രമങ്ങളാണ് സ്വീകരിക്കേണ്ടത് എന്നും പറഞ്ഞു തരാമോ?

സൗദിയില്‍ കോവിഡ് വ്യാപനം രൂക്ഷമാവുന്നതിന് മുന്‍പ് അനധികൃത വിദേശികളെ പിടികൂടുന്നതിന് വേണ്ടി വ്യാപകമായ പരിശോധന നടന്നിരുന്നു. നിലവിലെ പ്രത്യേക സുരക്ഷാ ഭീഷണി സാഹചര്യങ്ങള്‍ മുന്‍നിറുത്തി അധികൃതര്‍ ലക്ഷ്യമിട്ടിരുന്നത് പ്രധാനമായും യാതൊരു രേഖകളും ഇല്ലാതെ അതിര്‍ത്തി പ്രദേശങ്ങളിലൂടെ നുഴഞ്ഞു കയറിയവര്‍, രേഖകളുടെ കാലാവധി അവസാനിച്ചിട്ടും രാജ്യത്ത് തുടര്‍ന്നവര്‍ തുടങ്ങിയ അനധികൃത താമസക്കാരെ ആയിരുന്നു. മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധന അല്ലാതിരുന്നിട്ടു കൂടി ഈ പരിശോധനകളില്‍ ജവാസാതിന്റെയും സംയുക്ത സുരക്ഷ സേനകളുടെയും പിടിയില്‍ പത്തു ശതമാനത്തോളം വിദേശികളും ഉള്‍പ്പെട്ടിരുന്നു. ഇതില്‍ അധികവും ഹൗസ് ഡ്രൈവര്‍ വിസയില്‍ സൗദിയിലെത്തി സ്വന്തമായി ജോലി ചെയ്തു വന്നിരുന്നവര്‍ ആയിരുന്നു.

അത് പോലെ തന്നെ മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധനകളില്‍ നിരവധി സ്ഥാപനങ്ങളില്‍ അനേകം ഗാര്‍ഹിക തൊഴിലാളികള്‍ അനധികൃതമായി ജോലി ചെയ്തു വരുന്നതായി കണ്ടെത്തിയിരുന്നു. ഹൗസ് ഡ്രൈവര്‍ വിസയില്‍ രാജ്യത്തെത്തി സ്വതന്ത്രമായി ജോലി ചെയ്തു വരുന്നവരായിരുന്നു ഇവര്‍. ഹൗസ് ഡ്രൈവര്‍മാര്‍ക്ക് ലെവി ബാധകമല്ലാത്തതിനാലാണ് വന്‍തുകയുടെ സാമ്പത്തിക ബാധ്യത ഒഴിവാക്കുന്നതിനായി വിദേശികള്‍ ഈ വിസയില്‍ എത്തി ജോലി ചെയ്തു വന്നിരുന്നത്.

2014 ജൂലൈയിലാണ് രാജ്യത്ത് ആദ്യമായി സ്വകാര്യ മേഖലയിലെ വിദേശ തൊഴിലാളികൾക്ക് ലെവി ബാധകമാക്കിയത്. 2017 ജൂലൈയിൽ ആശ്രിതർക്കും ലെവി നിലവിൽവന്നു. എങ്കിലും ഗാർഹിക തൊഴിലാളികൾക്ക് ലെവി ബാധകമായിരുന്നില്ല. ഈ പഴുത് മുതലെടുത്ത്‌ കൊണ്ടാണ് പല വിദേശികളും ഹൗസ് ഡ്രൈവര്‍ വിസയിലേക്ക് മാറുകയോ ഫൈനല്‍ എക്സിറ്റില്‍ പോയോ പുതിയ ഹൌസ് ഡ്രൈവർ ഉൾപ്പെടെയുള്ള ഗാർഹിക വിസകളില്‍ രാജ്യത്തെത്തുകയോ ചെയ്തു കൊണ്ടിരുന്നത്.

പരിശോധനകളില്‍ ഹൗസ് ഡ്രൈവര്‍ വിസയില്‍ രാജ്യത്തെത്തിയ അനേകം തൊഴിലാളികള്‍ പിടിലാകുന്നത് വര്‍ദ്ധിച്ചതോടെയാണ് ഈ വിഷയം അധികൃതരുടെ ശ്രദ്ധയില്‍ പെടുന്നത്. തുടര്‍ന്ന് ഈ പഴുത് അടക്കുന്നതിനു വേണ്ടിയുള്ള ശ്രമങ്ങളുടെ ഭാഗമായാണ് ഗാര്‍ഹിക തൊഴിലാളികള്‍ക്ക് ലെവി ഏര്‍പ്പെടുതാനുള്ള തീരുമാനം മാനവശേഷി സാമൂഹിക വികസന മന്ത്രാലയ ശുപാര്‍ശ പ്രകാരം സൗദി കാബിനറ്റ്‌ കൈക്കൊള്ളുന്നത്.

പുതിയ തീരുമാന പ്രകാരം ഹൗസ് ഡ്രൈവർ വിസയിലുൾപ്പെടെയുള്ള മുഴുവൻ ഗാർഹിക തൊഴിലാളികൾക്കും ലെവി ബാധകമാണ്. ഓരോ തൊഴിലാളിക്കും വർഷത്തിൽ 9,600 റിയാൽ, അഥവാ പ്രതിമാസം 800 റിയാൽ തോതിലാണ് ലെവി. എന്നാല്‍ ആവശ്യമായ മുന്‍കരുതലുകള്‍ എടുത്തു കൊണ്ട് തന്നെയാണ് ഈ തീരുമാനം മന്ത്രാലയം കൈക്കൊണ്ടിട്ടുള്ളത്. പുതിയ തീരുമാനം മൂലം സ്വദേശികള്‍ക്കും വിദേശികള്‍ക്കും പെട്ടെന്ന് അസൗകര്യം ഉണ്ടാകാത്ത വിധത്തിലാണ് പുതിയ നിബന്ധനകള്‍ നടപ്പിലാക്കുക.

അതായത്, എല്ലാ ഗാര്‍ഹിക തൊഴിലാളികള്‍ക്കും ലെവി ഏര്‍പ്പെടുത്തിയിട്ടില്ല. നാലിൽ കൂടുതൽ ഗാർഹിക തൊഴിലാളികളുള്ള സ്വദേശികളും, രണ്ടിൽ കൂടുതൽ തൊഴിലാളികളുള്ള വിദേശികളും മാത്രമേ പുതിയ തീരുമാന പ്രകാരം ലെവി അടക്കേണ്ടി വരുന്നുള്ളൂ. വിസ കച്ചവടവും അനധികൃത വിസ കൈമാറ്റവും തടയുന്നതിനാണ് ഈ നിബന്ധനകള്‍ കൊണ്ട് വന്നിട്ടുള്ളത്.

മാത്രമല്ല, ഗാര്‍ഹിക തൊഴിലാളികള്‍ക്ക് മറ്റു തൊഴിലുകളിലേക്ക് മാറുന്നതിനാവശ്യമായ സാവകാശവും മന്ത്രാലയം പരോക്ഷമായി നല്‍കുന്നുണ്ട്. അത് കൊണ്ട് തന്നെ രണ്ട് ഘട്ടങ്ങളിലായാണ് തീരുമാനം നടപ്പിലാക്കുക. ഈ വർഷം മെയ് 22 ന് ആരംഭിക്കുന്ന ഒന്നാം ഘട്ടത്തിൽ പുതിയ ഗാർഹിക വിസയിൽ വരുന്ന തൊഴിലാളികൾക്ക് മാത്രമേ ലെവി അടക്കേണ്ടതുള്ളൂ.

കൂടാതെ ഈ വിഷയത്തില്‍ മന്ത്രാലയത്തിന്റെ ഉദാരമായ നിലപാടും പ്രശംസാര്‍ഹമാണ്. പ്രത്യേക വൈദ്യ പരിചരണ ആവശ്യമുള്ള ആളുകൾ, ഭിന്നശേഷിക്കാർക്കുള്ള പരിചരണം തുടങ്ങി മാനുഷികമായ പരിഗണന ആവശ്യപ്പെടുന്ന സന്ദർഭങ്ങളിൽ അത്തരം ജോലികൾക്കായി നിയമിക്കുന്ന ഗാർഹിക തൊഴിലാളിക്ക് ലെവി ബാധകമാവില്ല.

നിലവിൽ രാജ്യത്തുള്ള ഗാർഹിക തൊഴിലാളികൾക്ക് ഒരു വർഷത്തിന് ശേഷം മാത്രമേ ലെവി ബാധകമാകുകയുള്ളൂ. 2023 മെയ് 13 മുതലാണ് ഇവർക്ക് ലെവി അടക്കേണ്ടിവരിക. ഇതിനിടയില്‍ ഇവര്‍ക്ക് മറ്റുള്ള പ്രൊഫഷനുകളിലെക്ക് മാറാനോ ഫൈനല്‍ എക്സിറ്റില്‍ രാജ്യം വിട്ടു പോകാനോ ഉള്ള സാവകാശം ലഭിക്കും. ഇപ്പോൾ ഹൗസ് ഡ്രൈവർ തസ്തികയിലുള്ളവർക്ക് പ്രൊഫഷൻ മാറ്റം അനുവദിക്കുന്നതിനാൽ കൂടുതൽ സുരക്ഷിതമായ തൊഴിലുകൾ കണ്ടെത്തി മാറാവുന്നതാണ്.

സ്പോണ്‍സര്‍ഷിപ്പ് മാറുന്നതിനായി ഖിവ പ്ലാറ്റ്ഫോം വഴിയാണ് അപേക്ഷ നല്‍കേണ്ടത്. പുതിയ സ്പോണ്‍സര്‍ ആണ് മാറാന്‍ അപേക്ഷ നല്‍കേണ്ടത്. തൊഴിലാളിയുടെ ഇഖാമ കാലാവധി ഒരു വര്‍ഷത്തില്‍ കൂടുതല്‍ ഉള്ളതാകരുത് എന്ന നിബന്ധന നിലവിലുണ്ട്. പുതിയ സ്പോണ്‍സര്‍ ഓണ്‍ലൈന്‍ വഴി അപേക്ഷ നല്‍കിയാല്‍ പഴയ സ്പോണ്‍സര്‍ക്ക് എസ്.എം.എസ് ലഭിക്കും. നിലവിലെ സ്പോണ്‍സര്‍ ഇത് അംഗീകരിക്കുന്നതോടെ സ്പോണ്‍സര്‍ഷിപ്പ് മാറ്റം പൂര്‍ത്തിയാകും.

ഹൗസ് ഡ്രൈവര്‍ വിസയില്‍ എത്തി സ്വന്തമായി ജോലി ചെയ്യുകയോ മറ്റു പ്രൊഫഷനുകളില്‍ ജോലി ചെയ്യുകയോ ചെയ്തു വരികയാണെങ്കില്‍ ഈ നിബന്ധന നിലവില്‍ വരുന്നതോടെ താങ്കളുടെ നിലനില്പ് തന്നെ അപകടത്തിലാകും. താങ്കളുടെ സ്പോണ്‍സര്‍ക്ക് നാലില്‍ കൂടുതല്‍ ഗാര്‍ഹിക തൊഴിലാളികള്‍ നിലവില്‍ ഉണ്ടെങ്കില്‍ വർഷത്തിൽ 9,600 റിയാൽ നല്‍കി കൊണ്ട് ഹൗസ് ഡ്രൈവര്‍ വിസയില്‍ മുന്നോട്ട് പോകാന്‍ സാധിക്കില്ല. അതിനാല്‍ നിബന്ധന നിലവില്‍ വരുന്നതിന് മുന്‍പായി ലെവി അടക്കാന്‍ സാധിക്കുന്ന വരുമാനം ലഭിക്കുന്ന മറ്റു പ്രൊഫഷനിലെക്ക് മാറുകയോ അല്ലാത്ത പക്ഷം ഫൈനല്‍ എക്സിറ്റില്‍ പോകുകയോ ചെയ്യുന്നതാണ്‌ ഉചിതം.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD 

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

 

വിവരങ്ങള്‍ നല്‍കിയത്: 

Adv. Shiyas Kunjhibava. Lead Partner, SK Associates. (Dubai, Riyadh, Delhi, Kochi)

Continue Reading

LATEST

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

Published

on

അടുത്ത മാസം പകുതിയോടെ സൗദി അറേബ്യയില്‍ ഓയില്‍ സെക്ടറില്‍ പുതിയ വിസയില്‍ പോകാന്‍ ഒരുങ്ങുകയാണ്. ആദ്യമായാണ് സൗദി കമ്പനിക്ക്  വേണ്ടി ജോലി ചെയ്യാന്‍ സാധിക്കുന്നത്. ഉയര്‍ന്ന തസ്തികയിലാണ് വിസ. ഈ തസ്തിക കാലക്രമേണ നിതാഖാതില്‍ ഉള്‍പ്പെടുത്തി സ്വദേശിവല്‍ക്കരണം ഉണ്ടാകുമെന്നും ജോലി നഷ്ടപ്പെടുമെന്നും നിലവിലുള്ള ജോലി നഷ്ടപ്പെടുത്തി സൗദിയിലേക്ക് പോകുന്നത് ശരിയായ തീരുമാനമല്ല എന്ന് സുഹൃത്ത് പറയുന്നു. എന്താണ് നിതാഖാത് എന്നതിന്റെ അടിസ്ഥാനപരമായ കാര്യങ്ങള്‍ വിശദീകരിച്ചു തരാമോ?    

 

സൗദി അറേബ്യയില്‍ ജോലി ചെയ്യുന്ന വിദേശികളെ സംബന്ധിച്ചിടത്തോളം അല്‍പ്പം അസ്വസ്ഥത പകരുന്ന വാക്കാണ്‌ സൗദി പൗരന്മാരെ നിയമിക്കുന്നതിന് സ്വകാര്യ മേഖലയെ പ്രോത്സാഹിപ്പിക്കുന്നതിനായി സൗദി മാനവ വിഭവശേഷി, സാമൂഹിക വികസന മന്ത്രാലയം രൂപം നല്‍കിയ ഒരു പദ്ധതിയുടെ പേരായ നിതാഖാത്.

പലരും കരുതുന്നത് പോലെ വിദേശികളെ സൗദി അറേബ്യയുടെ തൊഴില്‍ രംഗത്ത് നിന്നും ആത്യന്തികമായി പുറത്താക്കുക എന്നതല്ല മറിച്ച് സ്വദേശി പൗരന്മാരുടെ തൊഴിലില്ലായ്മ കുറക്കുകയും അവര്‍ക്ക് രാജ്യത്തിന്റെ സ്വകാര്യ മേഖലയില്‍ ജോലി ഉറപ്പു വരുത്തുകയാണ് ഈ പദ്ധതിയുടെ ലക്‌ഷ്യം. തങ്ങളുടെ പൗരന്മാര്‍ക്ക് തൊഴിലും ഉയര്‍ന്ന ജീവിത സാഹചര്യങ്ങളും ഉറപ്പു വരുത്തുക എന്നത് ഏതൊരു രാജ്യത്തിന്റെയും പ്രാഥമിക കര്‍ത്തവ്യം കൂടിയാണ് എന്ന തത്വത്തില്‍ അധിഷ്ഠിതമായ പദ്ധതി കൂടിയാണ് നിതാഖാത്.

2011-ൽ ആരംഭിച്ചത് മുതൽ, ഈ പദ്ധതിയിലൂടെ കാലാനുസൃതമായി വിവിധ തൊഴിലുകളെ ദേശസാൽക്കരിക്കാനും സ്വദേശി പൗരന്മാരുടെ കഴിവുകളെ വൈവിധ്യവല്‍ക്കരിക്കാനും ആവശ്യമായ നടപടികൾ നടപ്പിലാക്കിയിട്ടുണ്ട്. ഇതുമൂലം ലക്ഷക്കണക്കിന്‌ സ്വദേശികള്‍ക്ക് തൊഴിലവസരങ്ങള്‍ സൃഷ്ടിക്കാന്‍ സാധിച്ചിട്ടുണ്ട്. ലക്‌ഷ്യത്തിലേക്ക് എത്തുന്നതിനായി കഴിഞ്ഞ 11 വര്‍ഷമായി നിരന്തരമായ അപ്ഡേറ്റുകൾക്കും നിതാഖാത് വിധേയമായിട്ടുണ്ട്. അതിൽ ഏറ്റവും പുതിയത് “അഡ്വാൻസ്ഡ് നിതാഖാത്”/ “പരിഷ്കരിച്ച നിതാഖാത്” എന്ന പേരില്‍ 2021 ഡിസംബറിൽ ആയിരുന്നു.

സൗദി പൗരന്മാര്‍ക്ക് തൊഴില്‍ ഉറപ്പ് വരുത്തുന്നതിനായി സ്വകാര്യ മേഖലയിലെ പ്രത്യേക തൊഴിലുകള്‍ അവര്‍ക്കായി മാത്രം പരിമിതപ്പെടുത്തുക, അതിനായി സ്ഥാപനങ്ങളെ വിവിധ വിഭാഗങ്ങളാക്കി തരം തിരിക്കുക എന്നതാണ് നിതാഖാത് പദ്ധതിയുടെ അടിസ്ഥാന പ്രവര്‍ത്തന രീതി. ഈ പദ്ധതിയിലൂടെ സൗദി പൗരന്മാര്‍ക്ക് കൃത്യമായ അടിസ്ഥാന പ്രതിമാസ ശമ്പളവും മന്ത്രാലയം ഉറപ്പു വരുത്തുന്നുണ്ട്. സൗദി തൊഴിൽ നിയമം ഒരു സൗദി പൗരന് കൃത്യമായ മിനിമം വേതനം നിര്‍ദ്ദേശിക്കുന്നില്ല എന്ന പരിമിതിയെ ഈ പദ്ധതിയിലൂടെ മറികടക്കാനും മന്ത്രാലയത്തിന് സാധിക്കുന്നു.

ആറു ജീവനക്കാരും അതിൽ കൂടുതലുമുള്ള എല്ലാ സ്ഥാപനങ്ങൾക്കും നിതാഖാത്ത് ബാധകമാണ്. നിലവില്‍ ചുവപ്പ്, ഇളം പച്ച, ഇടത്തരം പച്ച, കടും പച്ച, പ്ലാറ്റിനം എന്നിങ്ങനെ അഞ്ച് വിഭാഗങ്ങളാക്കിയാണ് സ്വകാര്യ മേഖലയിലെ സ്ഥാപനങ്ങളെ നിതാഖാത് പദ്ധതി പ്രകാരം തരം തിരിച്ചിട്ടുള്ളത്. പദ്ധതിയുടെ നിബന്ധനകള്‍ പൂര്‍ത്തീകരിക്കുന്നതിന്റെ അടിസ്ഥാനത്തിലാണ്, അതായത് സൗദിവൽക്കരണത്തിന്റെ ശതമാനത്തെ അടിസ്ഥാനമാക്കിയാണ് ഈ സ്ഥാപനങ്ങള്‍ക്ക് പ്രത്യേക അവകാശങ്ങളും പരിമിതികളും ഏര്‍പ്പെടുത്തിയിരിക്കുന്നത്. മിനിമം സൗദിവൽക്കരണം പാലിക്കാത്ത സ്ഥാപനങ്ങൾക്ക് മന്ത്രാലയത്തിൽ നിന്നുള്ള സേവനങ്ങൾ വിലക്കുകയും നിര്‍ദ്ദിഷ്ട സൗദിവല്‍ക്കരണം പാലിക്കുന്ന സ്ഥാപനങ്ങള്‍ക്ക് ആവശ്യമായ പ്രോത്സാഹനം നല്‍കുകയുമാണ് ചെയ്യുന്നത്.

സ്ഥാപനങ്ങളെ തരം തിരിക്കുന്നതിനായി ഇന്റർനാഷണൽ ക്ലാസിഫിക്കേഷൻ സ്റ്റാൻഡേർഡ് (“ISIC4”) എന്ന മാനദണ്ഡമാണ് മൂന്ന് വർഷമായി ഉപയോഗിക്കുന്നത്. ഈ മാനദണ്ഡം ഉപയോഗിച്ച് സ്ഥാപനങ്ങള്‍ ഉള്‍പ്പെടുന്ന മേഖല, സ്ഥാപനത്തിന്റെ പ്രവർത്തനങ്ങൾ, പ്രസ്തുത സ്ഥാപനത്തിലെ ജീവനക്കാരുടെ എണ്ണം തുടങ്ങിയവ ഒരു നിർദ്ദിഷ്‌ട സമവാക്യം ഉപയോഗിച്ച് നിര്‍ണ്ണയിച്ച്  വരുന്ന ഒന്നും രണ്ടും മൂന്നും വർഷങ്ങളിൽ പ്രസ്തുത സ്ഥാപനം  ഏത് വിഭാഗത്തില്‍ ഉള്‍പ്പെടുമെന്ന് നിര്‍ണ്ണയിക്കുന്നു.

പരിഷ്‌കരിച്ച നിതാഖാത്ത് പ്രകാരം സ്വകാര്യ സ്ഥാപനങ്ങൾ മൂന്നു വർഷത്തിനുള്ളിൽ സൗദിവൽക്കരണം ഘട്ടം ഘട്ടമായി നിശ്ചിത ശതമാനം ഉയർത്തൽ നിർബന്ധമാണെന്ന് മന്ത്രാലയം വ്യക്തമാക്കിയിട്ടുണ്ട്. അല്ലാത്ത പക്ഷം ഈ സ്ഥാപനങ്ങളുടെ വിഭാഗത്തിൽ മാറ്റം വരികയും ഉയര്‍ന്ന വിഭാഗത്തില്‍ നിന്നും താഴെയുള്ള വിഭാഗങ്ങളിലേക്ക് പോവുകയും ചെയ്യും. പുതിയ പദ്ധതി പ്രകാരം ആവശ്യമായ മാറ്റങ്ങള്‍ വരുത്തുന്നതിന് ആവശ്യമായ സമയം അനുവദിക്കുക എന്നതാണ് ഈ മൂന്ന് വര്‍ഷ സമയ പരിധിയുടെ ഉദ്ദേശം. ഈ സമയ പരിധിക്കുള്ളില്‍ നാല് ലക്ഷത്തോളം പുതിയ സ്വദേശി തൊഴിലവസരങ്ങളാണ് മന്ത്രാലയം ലക്ഷ്യമിടുന്നത്.

ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍:

മുകളില്‍ അഞ്ചാമത്ത ഖണ്ഡികയില്‍ പറഞ്ഞിരിക്കുന്നത് പോലെ അഞ്ചു വിഭാഗങ്ങളായാണ് നിതാഖത് പദ്ധതി പ്രകാരം സ്വകാര്യ കമ്പനികളെ തരം തിരിച്ചിരിക്കുന്നത്. അതില്‍ ഏറ്റവും താഴെയായി കിടക്കുന്ന സ്ഥാപനങ്ങളാണ് ചുവന്ന വിഭാഗത്തിലുള്ള സ്ഥാപനങ്ങള്‍. മന്ത്രാലയം നിര്‍ദ്ടെഷിചിരിക്കുന്നതരത്തിലുള്ള നിബന്ധനകള്‍ പാലിക്കാന്‍ സാധിക്കാത്ത സ്ഥാപനങ്ങളാണ് ഈ വിഭാഗത്തില്‍ ഉള്‍പ്പെടുന്നത്.അത് കൊണ്ട് തന്നെ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം നല്‍കുന്ന ഉത്തേജന/പ്രോത്സാഹന മാര്‍ഗ്ഗങ്ങള്‍ ലഭ്യമാകില്ല. മറിച്ച് ഇത്തരം സ്ഥാപനങ്ങള്‍ക്ക് അവക്ക് ലഭ്യമായിരുന്ന അടിസ്ഥാന അവകാശങ്ങള്‍ പോലും നഷ്ടമാകുകയും ചെയ്യുന്നു. സ്ഥാപനത്തിനും അതിലെ തൊഴിലാളികള്‍ക്കും താഴെ പറയുന്ന ആനുകൂല്യങ്ങള്‍ നിഷേധിക്കപെടുന്നു:

  1. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് അതിലെ തൊഴിലാളികളുടെ വർക്ക് പെർമിറ്റ് പുതുക്കാൻ സാധിക്കില്ല.
  2. ഇത്തരം സ്ഥാപനങ്ങള്‍ക്ക് തങ്ങളുടെ തൊഴിലാളികളുടെ പ്രൊഫഷനുകള്‍ മാറ്റാൻ സാധിക്കില്ല.
  3. ഈ സ്ഥാപനങ്ങള്‍ക്ക് പുതിയ വിദേശ തൊഴിലാളികൾക്ക് വർക്ക് പെർമിറ്റ് നൽകാൻ സാധിക്കില്ല.
  4. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ വിസകൾക്ക് വേണ്ടി അപേക്ഷിക്കാന്‍ സാധിക്കില്ല.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് വിസ ട്രാന്‍സ്ഫര്‍ ചെയ്യാന്‍ സാധിക്കില്ല.
  6. സ്ഥാപനങ്ങളുടെ പുതിയ ശാഖകൾക്കോ പുതിയ സൗകര്യങ്ങൾക്കോ വേണ്ടി പുതിയ ഫയലുകൾ തുറക്കാൻ അനുവാദം ഉണ്ടായിരിക്കില്ല.

ഇളം പച്ച വിഭാഗത്തില്‍ പെടുന്ന സ്ഥാപനങ്ങള്‍ (ലോ ഗ്രീൻ റേഞ്ച് സ്ഥാപനങ്ങള്‍):

ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങളെ പോലെ മുഴുവന്‍ ആനുകൂല്യങ്ങളും നിഷേധിക്കപ്പെടുന്നില്ല. നാമമാത്രമായ നിയന്ത്രണങ്ങളാണ് ഇത്തരം സ്ഥാപനങ്ങളുടെ പ്രവര്‍ത്തനത്തിലും മന്ത്രാലയം ഏര്‍പ്പെടുത്തിയിട്ടുള്ളത്.

  1. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ തൊഴില്‍ വിസകൾക്കുള്ള അപേക്ഷകൾ സമര്‍പ്പിക്കാന്‍ സാധിക്കില്ല.
  2. ഈ സ്ഥാപനങ്ങളിലെ വിദേശികളായ തൊഴിലാളികളുടെ പ്രോഫഷനുകള്‍ മാറ്റാനുള്ള അനുവാദം നല്‍കിയിട്ടുണ്ട്. എന്നാല്‍ സൗദി പൗരന്മാർക്ക് മാത്രമായി പരിമിതപ്പെടുത്തിയിരിക്കുന്ന പ്രൊഫഷനുകളിലേക്ക് മാറ്റം അനുവദിക്കില്ല.
  3. കുറഞ്ഞ പച്ച വിഭാഗത്തിന് താഴെയുള്ള വിദേശ തൊഴിലാളികളുടെ സേവനങ്ങൾ കൈമാറാനുള്ള അനുവാദം ലഭ്യമാണ്.
  4. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ ലഭ്യമാകും.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് തങ്ങളുടെ വിദേശ തൊഴിലാളിയുടെ അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വർക്ക് പെർമിറ്റ് പുതുക്കാന്‍ അനുവാദം നല്‍കും.

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (മിഡ് ഗ്രീൻ റേഞ്ച് സ്ഥാപനങ്ങള്‍)

ഇളം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന ആനുകൂല്യങ്ങള്‍ക്ക് പുറമേ മറ്റു ചില ആനുകൂല്യങ്ങള്‍ കൂടി ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം ലഭ്യമാക്കുന്നുണ്ട്.

  1. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ (replacement visa) ലഭ്യമാകും.

കടും പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (ഹൈ ഗ്രീൻ റേഞ്ച് സ്ഥാപനങ്ങള്‍):

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന എല്ലാ ആനുകൂല്യങ്ങളും ലഭ്യമാകുന്നതോടൊപ്പം മറ്റു ചില ആനുകൂല്യങ്ങള്‍ കൂടി ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം ലഭ്യമാക്കിയിട്ടുണ്ട്.

  1. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരം വിസ (replacement visa) ലഭ്യമാക്കും.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

പ്ലാറ്റിനം റേഞ്ച് കമ്പനികൾ:

നിതാഖാത് പദ്ധതി പ്രകാരമുള്ള അഞ്ചു വിഭാഗങ്ങളില്‍ ഏറ്റവും ഉയര്‍ന്ന വിഭാഗമാണ്‌ പ്ലാറ്റിനം വിഭാഗം.

  1. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കം.
  2. വിദേശികളായ തൊഴിലാളികളുടെ പ്രൊഫഷനുകള്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് ഒഴികെ മാറ്റം.
  3. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരമായി വിസ (replacement visa) ലഭ്യമാക്കും.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

സൗദി പൗരന്മാര്‍ക്ക് മിനിമം വേതനം

നിതാഖാത് പദ്ധതി പ്രകാരം വിവിധ വിഭാഗങ്ങളില്‍ ഉള്‍പ്പെടുന്ന സ്ഥാപനങ്ങള്‍ക്ക് വിവിധ തരം ആനുകൂല്യങ്ങളും പരിമിതികളും ലഭ്യമാകുമ്പോള്‍ മുകളില്‍ പറഞ്ഞ പോലെ ഒരു സൗദി പൗരന് നിര്‍ദ്ദിഷ്ട തുക അടിസ്ഥാന ശമ്പളമായി ലഭിക്കുന്നു എന്നതാണ് സ്വദേശി പൗരന്മാരെ സംബന്ധിച്ചിടത്തോളം ഈ പദ്ധതിയുടെ ഹൈലൈറ്റ്. ആനുകൂല്യങ്ങളും പരിമിതികളും സ്ഥാപനങ്ങള്‍ക്ക് ലഭ്യമാകുമ്പോള്‍ തങ്ങളുടെ പൗരന്മാരുടെ ജീവിത നിലവാരം ഉറപ്പു വരുത്തുന്നതിനുള്ള അടിസ്ഥാന ശമ്പളം ഉറപ്പു വരുത്തുന്ന രീതിയാണ് മന്ത്രാലയത്തിന്റെ നിതഖാത് പദ്ധതിയെ സ്വദേശി പൗരന്മാര്‍ക്ക് ഇടയില്‍ ജനപ്രിയമാക്കി തീര്‍ക്കുന്നത്.

നിതാഖാത് പദ്ധതി പ്രകാരം സ്ഥാപനങ്ങള്‍ക്ക് ആനുകൂല്യങ്ങള്‍ ലഭിക്കണമെങ്കില്‍ സ്വകാര്യ സ്ഥാപനത്തില്‍ ജോലി ചെയ്യുന്ന സൗദി പൗരന്റെ അടിസ്ഥാന പ്രതിമാസ ശമ്പളം ഏറ്റവും കുറഞ്ഞത് 4,000 റിയാൽ എന്ന് നിജപ്പെടുത്തിയിട്ടുണ്ട്. മുന്‍പ് ഈ തുക 3000 റിയാൽ ആയിരുന്നു എങ്കിലും വിവധ സാഹചര്യങ്ങള്‍ കണക്കിലെടുത്ത് സമീപ മാസങ്ങളിലാണ് ഈ തുകയില്‍ മന്ത്രാലയം വര്‍ദ്ധന ഏര്‍പ്പെടുത്തിയത്.

എങ്കിലും ഈ നിബന്ധനയില്‍ പ്രത്യക്ഷമായി ചെറിയ തരത്തിലുള്ള ഇളവ് മന്ത്രാലയം നല്‍കുന്നുണ്ട് എങ്കിലും നിതാഖാത് പ്രകാരമുള്ള പൂര്‍ണ്ണമായ ആനുകൂല്യം ലഭിക്കണമെങ്കില്‍ ഈ നിബന്ധന പൂര്‍ണ്ണമായും പാലിക്കണം എന്നത് മിനിമം വേതനതോട് കൂടി സ്വദേശി പൗരന്മാരെ തങ്ങളുടെ സ്ഥാപനങ്ങളില്‍ നിയമിക്കാന്‍ പരോക്ഷമായി സ്വകാര്യ സ്ഥാപനങ്ങളെ നിര്‍ബന്ധിതരാക്കുന്നു.

അതായത് 4000 റിയാലില്‍ കുറവ് ശമ്പളത്തിനും സ്ഥാപനങ്ങള്‍ക്ക് സ്വദേശി തൊഴിലാളികളെ നിയമിക്കാന്‍ അനുവാദമുണ്ട്. അന്നാല്‍ അതിനു ആനുപാതികമായി പദ്ധതിയില്‍ നിന്നും ലഭിക്കുന്ന ആനുകൂല്യങ്ങള്‍ക്കും കുറവുണ്ടാകും. അതായത് 4000 റിയാലിൽ താഴെയുള്ള ശമ്പളം നല്‍കി നിയമിക്കുന്ന ഒരു സ്വദേശി തൊഴിലാളിയെ നിതാഖാത് പദ്ധതി പ്രകാരം പകുതി തൊഴിലി ആയി മാത്രമേ കണക്കാക്കുകയുള്ളൂ.  പാർട്ട് ടൈം തൊഴിലാളികളുടെ കാര്യത്തിലും ഈ നിബന്ധന ബാധകമാണ്. മാസത്തില്‍ 168 മണിക്കൂറിൽ കുറയാത്ത സേവനം പൂർത്തിയാക്കിയ തൊഴിലാളിയെ (ഫ്ലക്സിബിള്‍ അവേഴ്സ്) സൗദി തൊഴിലാളിയുടെ 1/3 ആയി കണക്കാക്കും.

എന്നാല്‍ വികലാംഗരായ സ്വദേശി തൊഴിലാളികളുടെ കാര്യത്തില്‍ വലിയ ഇളവാണ് മന്ത്രാലയം നല്‍കുന്നത്. 4000 റിയാലില്‍ കുറയാത്ത ശമ്പളത്തില്‍ ഒരു സ്വദേശിയായ വികലാംഗ തൊഴിലാളിയെ നിയമിക്കുന്ന സ്ഥാപനങ്ങള്‍ക്ക് നിതാഖാത് പദ്ധതി പ്രകാരമുള്ള ആനുകൂല്യങ്ങള്‍ക്കായി ഒരു തൊഴിലാളിയെ 4 തൊഴിലാളികളായി കണക്കാക്കും. ഇതിലൂടെ അംഗ പരിമിതരായ തങ്ങളുടെ പൗരന്മാരുടെ തൊഴില്‍ ലഭ്യതയും അവര്‍ക്ക് നിര്‍ദ്ദിഷ്ട ജീവിത സാഹചര്യവും ഉറപ്പു വരുത്താന്‍ മന്ത്രാലയത്തിന് നിതാഖാത് പദ്ധതിയിലൂടെ സാധിക്കുന്നു.

 

ഇതൊക്കെയാണ് നിതാഖാത് പദ്ധതിയെ സംബന്ധിച്ചുള്ള ഏറ്റവും പുതിയ വിവരങ്ങള്‍. നിങ്ങളെ സംബന്ധിച്ച് വിസ ഉന്നത തസ്തികയില്‍ ഉള്ളതായതിനാല്‍ കുറച്ച് അപകട സാധ്യതയും ഇല്ലാതില്ല. കാരണം പലപ്പോഴും പ്രധാന തസ്തികകളാണ് സൗദിവല്ക്കരണത്തില്‍ ഉള്‍പ്പെടുത്താറുള്ളത്. വിദേശികള്‍ ധാരാളമായി ജോലി ചെയ്യുന്ന താഴ്ന്ന തസ്തികകള്‍ അധികമായി ഉള്‍പ്പെടുത്താറില്ല. നിങ്ങളുടെ തസ്തിക ഏതാണെന്ന് വ്യക്തമായി ചോദ്യത്തില്‍ ഉള്‍പ്പെടുത്താതിനാല്‍ അതിനെ കുറിച്ച് കൃത്യമായി പറയാനും സാധിക്കില്ല.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ. ലീഡ് പാര്‍ട്ണര്‍, എസ്.കെ അസോസിയേറ്റ്സ്. (ദുബായ്. റിയാദ്. ഡല്‍ഹി. കൊച്ചി)

 

Continue Reading

LATEST

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

Published

on

ഇന്ത്യന്‍ യൂണിയന്‍ മുസ്ലിം ലീഗിന്റെ വിദ്യാര്‍ത്ഥി ഘടകമായ എം.എസ്.എഫിന്റെ പ്രവര്‍ത്തന ചരിത്രത്തില്‍ പുതിയ ഒരധ്യായം എഴുതി ചേര്‍ത്തു കൊണ്ടാണ് കഴിഞ്ഞ ദിവസങ്ങളില്‍ ഡല്‍ഹിയില്‍ വെച്ചു നടന്ന ദേശീയ സമ്മേളനം സമാപിച്ചത്.

സംസ്ഥാന പ്രതിനിധികള്‍, കേന്ദ്ര സര്‍വ്വകലാശാലാ പ്രതിനിധികള്‍, മുസ്‌ലിം ലീഗ് ദേശീയ നേതാക്കള്‍, വിദ്യാര്‍ത്ഥി സംഘടനാ നേതാക്കള്‍, വിദ്യാഭ്യാസ വിചക്ഷണര്‍, ആക്റ്റിവിസ്റ്റുകള്‍ ഉള്‍പ്പടെയുള്ളവര്‍ പങ്കെടുത്ത സമ്മേളനം വന്‍ വിജയമായതോടൊപ്പം തന്നെ എം.എസ്.എഫ് ദേശീയ കമ്മിറ്റിയുടെ പുതിയ ആസ്ഥാനം പ്രവര്‍ത്തനം ആരംഭിക്കുകയും ചെയ്തു.

മുസ്‌ലിംലീഗ് ഉന്നതാധികാര സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങളാണ് പുതിയ ദേശീയ കമ്മിറ്റി ഓഫീസ് ഉദ്ഘാടനം ചെയ്തത്.

വിവിധ സംസ്ഥാനങ്ങളിലും കേന്ദ്ര, സംസ്ഥാന സര്‍വ്വകലാശാലകളിലും പതിറ്റാണ്ടുകളായി എം എസ് എഫിന്റെ പ്രവര്‍ത്തനം നടക്കുന്നുണ്ടങ്കിലും ദേശീയ കമ്മറ്റി യാഥാര്‍ഥ്യമായത് 2016ലാണ്. ദേശീയ തല പ്രവര്‍ത്തനങ്ങള്‍ എകോപിപ്പിക്കുകയും പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുകയും ചെയ്യുക എന്ന ലക്‌ഷ്യം മുന്‍നിറുത്തി 2016 ഡിസംബര്‍ 17 ന് പാലക്കാട് വെച്ചാണ് എം എസ് എഫിന് ഒരു ദേശീയ കമ്മറ്റി രൂപീകരിക്കുന്നത്. തുടര്‍ന്നാണ്‌ പ്രവര്‍ത്തനം ദേശീയ തലത്തിലേക്ക് വ്യാപിപിക്കുന്നത്.

നിലവില്‍ രാജ്യത്തെ 13 സംസ്ഥാനങ്ങളിലും, വിവിധ കേന്ദ്ര- സംസ്ഥാന സര്‍വ്വകലാശാലകളിലും എം എസ് എഫ് പ്രവര്‍ത്തനം സജീവമാണ്. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്കുന്ന മഹത്തായ ദൗത്യമാണ് എം എസ് എഫ് ദേശീയ കമ്മിറ്റി നിര്‍വ്വഹിച്ചു കൊണ്ടിരിക്കുന്നത്.

പൗരത്വ ഭേദഗതി നിയമവും, വിദ്വേഷ പ്രസംഗങ്ങളും, ആള്‍ക്കൂട്ട കൊലപാതകങ്ങളും, വസ്ത്രവിവേചനങ്ങളുമെല്ലാം കൊണ്ട് അപരവത്കരിക്കപ്പെടുന്ന കാലത്ത് വിദ്യാഭ്യാസം കൊണ്ട് കരുത്തരായി മാറുക എന്നതാണ് പ്രതിരോധമാര്‍ഗം. എം എസ് എഫ് ആ ദൗത്യ നിര്‍വ്വഹണത്തിലേക്കാണ് വിദ്യാര്‍ത്ഥികളെ ഉണര്‍ത്തുന്നത്. അതോടൊപ്പം രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലേക്ക് പാര്‍ശ്വവത്കരിക്കപ്പെട്ടിരുന്ന മുസ്‌ലിം വിദ്യാര്‍ഥികള്‍ക്ക് കടന്നു വരാനുള്ള ആത്മവിശ്വാസം സൃഷ്ടിക്കുക എന്ന ദൗത്യവും എം എസ് എഫ് വിജയകരമായി തന്നെ തുടര്‍ന്ന് പോരുകയാണ്.

മുഹമ്മദ്‌ അഷറഫ് എം എസ് എഫ് ദേശീയ കമ്മിറ്റി പ്രസിഡന്റ് ടി.പി. അഷറഫ് അലിയോടൊപ്പം

ന്യൂനപക്ഷ വിഭാഗങ്ങള്‍ക്ക് ഭരണ ഘടന വിഭാവനം ചെയ്തിട്ടുള്ള അവസര സമത്വവും സാമൂഹിക നീതിയും പോലുള്ള അവകാശങ്ങള്‍ നഷ്ടപ്പെടാതിരിക്കാനും അവകാശങ്ങള്‍ ക്രിയാത്മകമായി ഉപയോഗിക്കാനും  സംഘടിതരായി രാഷ്ട്രീയ ശക്തിയായി നിലനിന്ന് അവകാശങ്ങള്‍ക്ക് വേണ്ടി പൊരുതുക എന്നതാണ് വര്‍ത്തമാന കാലഘട്ടത്തില്‍ വിദ്യര്‍ത്ഥി സമൂഹത്തിന്റെയും ആവശ്യം. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്‍കി അത്തരത്തിലുള്ള സംവാദങ്ങള്‍ക്ക് ശക്തി പകരുകയാണ് ‘വിദ്യാഭ്യാസം, വിമോചനം, ശാക്തീകരണം’ എന്ന മുദ്രാവാക്യത്തിലൂടെ എം എസ് എഫ് നിര്‍വ്വഹിക്കുന്നത്.

രാജ്യതലസ്ഥാനത്ത് തന്നെ പുതിയ പുതിയ ദേശീയ കമ്മിറ്റി ഓഫീസ് സ്ഥാപിതമായതോടെ ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കാനും ശക്തിപ്പെടുത്താനും എം എസ് എഫിന് സാധിക്കുമെന്നാണ് പുതിയ നേതൃത്വം കരുതുന്നത്. അതോടൊപ്പം തന്നെ ഇന്ത്യയിലെ മുസ്‌ലിം സമുദായത്തിന് വരും കാലത്തേക്കുള്ള നേതൃത്വത്തെ വളര്‍ത്തിയെടുക്കുകയെന്ന ദൗത്യം നിര്‍വ്വഹിക്കാനും എം എസ് എഫ് ദേശീയ കമ്മിറ്റിക്ക് സാധിക്കുമെന്നും നേതൃത്വം പ്രത്യാശിക്കുന്നു.

മുഹമ്മദ്‌ അഷറഫ്  

ന്യൂ ഡല്‍ഹി.

 

Continue Reading
LATEST5 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST5 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST6 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST7 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST7 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST8 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST8 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST8 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST8 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST8 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST8 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST8 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!