Connect with us

LATEST

സൗദിയിലെ പ്രവാസ ജീവിതം നിലനിര്‍ത്താന്‍ പ്രവാസികള്‍ക്ക് ഇനി സോഷ്യല്‍ മീഡിയയും ശ്രദ്ധിക്കേണ്ടി വരും

Published

on

സോഷ്യല്‍ മീഡിയകളില്‍ നാട്ടിലേത് പോലെ ഏതൊരു വ്യക്തിയേയോ സംഘടനയേയോ വീണ്ടു വിചാരമില്ലാതെ നിങ്ങള്‍ സൗദിയില്‍ നിന്നും ഫോളോ ചെയ്യുന്നുണ്ടെങ്കില്‍ ശ്രദ്ധിക്കുക, സൗദി അറേബ്യയില്‍ നിങ്ങളുടെ നിലനില്‍പ്പ്‌ തന്നെ അപകടത്തിലാണ്.

രാജ്യത്തിന്റെ സുരക്ഷയേയും അഖണ്ഡതയേയും മതവിശ്വാസത്തെയും മറ്റൊരു വ്യക്തിയുടെ അന്തസ്സിനേയും അവകാശത്തെയും ബാധിക്കത്ത വിധം നിങ്ങള്‍ക്ക് സോഷ്യല്‍ മീഡിയയില്‍ ന്യായമായ വ്യക്തിഗത അഭിപ്രായ പ്രകടനങ്ങള്‍ക്ക് സൗദി അറേബ്യ അനുവാദം നല്‍കുന്നുണ്ട്.

എന്നാല്‍ ആ അനുവാദം വിനിയോഗിക്കുമ്പോള്‍ ഒരു പ്രവാസി അത്യന്തം ശ്രദ്ധിക്കേണ്ടതുമുണ്ട്. നാട്ടിലേത് പോലെ ഈ അനുവാദം അനിയന്ത്രിതമായി ഉപയോഗിച്ചാല്‍ എട്ടു വര്‍ഷം വരെ തടവ് ശിക്ഷ ലഭിക്കാവുന്ന ഒരു കുറ്റം ചെയ്ത ക്രിമിനലായി നിങ്ങള്‍ മാറും.

സൗദിയില്‍ സ്മാര്‍ട്ട് ഫോണുകള്‍ ഉപയോഗിക്കുമ്പോഴും ഇന്റര്‍നെറ്റ് ഉപയോഗിക്കുമ്പോഴും നിര്‍ബന്ധമായും പാലിക്കേണ്ട സൂക്ഷ്മത സംബന്ധിച്ച് വിശദമായ ലേഖനം കഴിഞ്ഞ ദിവസങ്ങളില്‍ പ്രവാസി കോര്‍ണറില്‍ പ്രസിദ്ധീകരിച്ചിരുന്നു. (ആ ലേഖനം വായിക്കുവാന്‍ ഇവിടെ ക്ലിക്ക് ചെയ്യുക) അത് പോലെ തന്നെ സൗദിയില്‍ സിം കാര്‍ഡുകള്‍ ഉപയോഗിക്കുമ്പോഴും ഉണ്ടാകാന്‍ ഇടയുള്ള അപകടങ്ങളെ സംബന്ധിച്ചും വിശദമായ ലേഖനം മുന്‍പ് പ്രസിദ്ധീകരിച്ചിട്ടുണ്ട്. (ആ ലേഖനം വായിക്കുവാന്‍ ഇവിടെ ക്ലിക്ക് ചെയ്യുക) അതിനാല്‍ ആ വിഷയങ്ങള്‍ ഇവിടെ പരാമര്‍ശിക്കുന്നില്ല.

ഇവിടെ പരാമര്‍ശിക്കുന്നത് സോഷ്യല്‍ മീഡിയ ഉപയോഗിക്കുമ്പോള്‍ അശ്രദ്ധയും അറിവില്ലായ്മയും എങ്ങിനെ നിങ്ങളുടെ ജീവിതം ദുരിതപൂര്‍ണ്ണമാക്കുമെന്നും സൗദി അറേബ്യയില്‍ ഏതെല്ലാം സാഹചര്യത്തില്‍ നിങ്ങള്‍ ഒരു കൊടും ക്രിമിനല്‍ ആയി മാറും എന്നത് സംബന്ധിച്ച് മുന്നറിയിപ്പുകള്‍ നല്‍കാനും ഏതല്ലാം പ്രവൃത്തികള്‍ സൗദി അറേബ്യയിലുള്ള ഒരു പ്രവാസി ഒഴിവാക്കണം എന്നും ഏതെല്ലാം കാര്യങ്ങളില്‍ മുന്‍കരുതലുകള്‍ സ്വീകരിക്കണമെന്നും മുന്നറിയിപ്പ് നല്‍കാന്‍ വേണ്ടി മാത്രമാണ്.

സൗദിയിലെ ഭീകര പ്രവര്‍ത്തനം തടയുന്ന നിയമപ്രകാരം തീവ്രവാദ ആശയത്തേയോ ഭീകര പ്രവര്‍ത്തനത്തേയോ ഭീകര സംഘടനയേയോ പിന്തുണക്കുന്നത് കുറ്റകരമാണ്. ഭീകര പ്രവര്‍ത്തനത്തിന് സാമ്പത്തിക സഹായം നല്‍കുന്നത് സംബന്ധിച്ചാണ് നിയമത്തില്‍ പ്രധാനമായും വിവരിക്കുന്നതെങ്കിലും അനുബന്ധമായി വിവരിക്കുന്ന വകുപ്പുകളിലാണ് പ്രവാസികള്‍ക്ക് അത്യന്തം അപകടകരമായ വ്യവസ്ഥകള്‍ ഉള്‍പ്പെട്ടിരിക്കുന്നത്.

2013 ഡിസംബര്‍ 28 ന് കൊണ്ട് വന്ന ഭീകര പ്രവര്‍ത്തനങ്ങള്‍ തടയുന്നതിനായുള്ള നിയമത്തില്‍ സാരമായ പഴുതുകള്‍ ഉണ്ടെന്ന് തിരിച്ചറിഞ്ഞാണ്‌ 2017 ല്‍ പുതിയ നിയമം കൊണ്ട് വന്നത്. ഈ നിയമ പ്രകാരം ആഭ്യന്തര മന്ത്രാലയത്തില്‍ നിന്നും വിപുലമായ അധികാരം എടുത്തു മാറ്റി പബ്ലിക് പ്രോസിക്യൂഷനിലാണ് നിക്ഷിപ്തമാക്കിയിട്ടുള്ളത്. ആഭ്യന്തര മന്ത്രാലയത്തെ പോലെ തന്നെ രാജ്യ സുരക്ഷക്കായുള്ള പബ്ലിക് പ്രോസിക്യൂഷന്‍ ആന്‍ഡ്‌ പ്രസിഡന്‍സി സംവിധാനവും നേരിട്ട് രാജാവിന് റിപ്പോര്‍ട്ട് ചെയ്യുന്ന ഘടനയിലാണ് ക്രമീകരിച്ചിട്ടുള്ളത്‌.

പത്ത് അധ്യായങ്ങളിലായി 96 വകുപ്പുകളില്‍ ഭീകരവാദത്തെ സംബന്ധിച്ചുള്ള നിയമങ്ങളും നിര്‍വ്വചനങ്ങളും ശിക്ഷകളും ഈ നിയമത്തില്‍ വിശദീകരിക്കുന്നുണ്ട്. കൂടാതെ ഈ നിയമത്തില്‍ വിവിധ 27 വകുപ്പുകളില്‍ ശിക്ഷകളെ കുറിച്ചാണ് വിവരിക്കുന്നതും നിര്‍വ്വചിക്കുന്നതും. അതില്‍ തന്നെ മൂന്ന് വകുപ്പുകളില്‍ ഏതെല്ലാം സാഹചര്യത്തില്‍ പ്രതിക്ക് വധശിക്ഷ നല്‍കാമെന്നും വിവരിക്കുന്നുണ്ട്. എന്നാല്‍ പ്രവാസികള്‍ ശ്രദ്ധിക്കേണ്ടതായ ഏറ്റവും പ്രസക്തമായ കാര്യങ്ങളെ കുറിച്ചു മാത്രമേ ഇവിടെ പരാമര്‍ശിക്കുന്നുള്ളൂ.

ഈ നിയമത്തിലെ വകുപ്പ് 34 ലാണ് പ്രവാസികള്‍ ഏറ്റവും ശ്രദ്ധിക്കേണ്ട ഇക്കാര്യം നിഷ്കര്‍ഷിച്ചിട്ടുള്ളത്. സൗദിയില്‍ ഭീകര/തീവ്രവാദ പ്രവര്‍ത്തനങ്ങളെ പിന്തുണക്കുക, ന്യായീകരിക്കുക, അനുഭാവം പുലര്‍ത്തുക എന്നിവയും ഗുരുതരമായ നിയമ ലംഘനങ്ങളാണ്. ഇവര്‍ക്കും മൂന്ന് വര്‍ഷം മുതല്‍ എട്ടു വര്‍ഷം വരെ തടവ്‌ ശിക്ഷ ലഭിക്കാം. നിയമ ലംഘനത്തിന്റെ സ്വഭാവം എന്ത് തന്നെയായാലും മൂന്ന് വര്‍ഷത്തില്‍ കുറഞ്ഞ ശിക്ഷ ഈ കുറ്റത്തിന് നല്‍കരുതെന്നും നിയമം അനുശാസിക്കുന്നു.

സൗദിയില്‍ നിന്നും സോഷ്യല്‍ മീഡിയ ഉപയോഗിക്കുന്ന സ്വദേശികളും വിദേശികളുമായ വ്യക്തികള്‍ അത്യന്തം സൂക്ഷ്മത പുലര്‍ത്തേണ്ടതുണ്ട്. തങ്ങള്‍ ഫോളോ ചെയ്യുന്ന വ്യക്തികളെ തിരഞ്ഞെടുക്കുമ്പോഴും സൂക്ഷ്മത പാലിക്കണം. കാരണം തീവ്രവാദികളോ , ഭീകര പ്രവര്‍ത്തകരോ എന്ന് മുദ്ര കുത്തപ്പെട്ടവരുടെ സോഷ്യല്‍ മീഡിയ അക്കൌണ്ടുകള്‍ പിന്തുടരുന്നത് സൗദി നിയമ പ്രകാരം കടുത്ത നിയമ ലംഘനമാണ്. പിടിക്കപ്പെട്ടു കുറ്റം തെളിഞ്ഞാല്‍ എട്ടു വര്‍ഷം വരെ തടവു ലഭിക്കാവുന്ന കുറ്റമാണ് ഇത്.

തീവ്രവാദ/ഭീകരവാദ പ്രവര്‍ത്തനങ്ങള്‍ ചെയ്യുന്നവരുടെ പോസ്റ്റുകള്‍ക്ക് കീഴില്‍ അനുകൂലമായ കമന്റുകള്‍ ചെയ്യുന്നതും അവരുടെ പ്രവൃത്തികളെ അനുകൂലിക്കുന്നതും അഭിനന്ദിക്കുന്നതും മറ്റും വ്യക്തികളെ കുഴപ്പത്തിലാക്കും.

ആരാണ് ഒരു ഭീകരവാദി / തീവ്രവാദി എന്ന് ഈ നിയമത്തില്‍ വ്യക്തമായി പറഞ്ഞിട്ടുണ്ട്. ഈ നിയമ പ്രകാരം കുറ്റങ്ങളായി നിര്‍വചിക്കപ്പെട്ടിട്ടുള്ള കുറ്റങ്ങള്‍ ചെയ്യുന്ന ഒരു വ്യക്തി ഭീകരവാദി / തീവ്രവാദിയാണ് എന്ന് നിയമം വ്യക്തമാക്കുന്നു. അയാള്‍ ഈ കുറ്റം ചെയ്യണമെന്നില്ല, പക്ഷെ ചെയ്യാന്‍ ശ്രമിക്കുകയോ, അതില്‍ ഭാഗഭാക്കാകുകയോ ചെയ്യുകയാണെങ്കിലും അയാള്‍ ഈ നിര്‍വചനത്തിന്റെ കീഴില്‍ വരുന്നു.

ഈ വകുപ്പിലെ ഏറ്റവും ശ്രദ്ധിക്കേണ്ട ഒരു ഭാഗം, ആ കുറ്റവാളി സൗദി അറേബ്യയില്‍ തന്നെ ഉള്ള ആളായിരിക്കണം എന്നില്ല എന്നതാണ്. സൗദി അറേബ്യയ്ക്ക് പുറത്തുള്ള വ്യക്തികളെ പിന്തുണക്കുക, സാമ്പത്തിക സഹായം നല്‍കുക, ന്യായീകരിക്കുക, അനുഭാവം പുലര്‍ത്തുക എന്നിവയില്‍ ഏതെങ്കിലും ഒരു കാര്യം ചെയ്തിട്ടുണ്ടെങ്കില്‍ അയാള്‍ ഈ നിയമ പ്രകാരം കുറ്റവാളിയായി മാറുന്നു. അത് പോലെ തന്നെ നിങ്ങള്‍ പിന്തുണക്കുകയോ, ന്യായീകരിക്കുകയോ, അഭിനന്ദിക്കുകയോ ചെയ്യുന്ന ഒരു ഭീകര പ്രവര്‍ത്തനം സൗദി അറേബ്യയില്‍ തന്നെ നടന്നതാവണം എന്നും നിര്‍ബന്ധമില്ല.

ഉദാഹരണമായി മുസ്ലീം ബ്രദർ ഹുഡ് ഭീകര സംഘടനയാണെന്നും, ഇസ്ലാം മതത്തെ പ്രതിനിധീകരിക്കുന്നതല്ലെന്നും, മറിച്ച് അതിന്റെ പക്ഷപാത താൽപ്പര്യങ്ങൾ നിറവേറ്റുന്ന ഒരു “തീവ്രവാദ” സംഘടനയാണെന്നും സൗദി മുതിർന്ന പണ്ഡിതന്മാരുടെ കൗൺസിൽ അടുത്തിടെ പ്രസ്താവിച്ചിരുന്നു. ഈ പ്രസ്താവനയെ ഇസ്ലാമിക് അഫയേഴ്സ് മന്ത്രാലയം പിന്തുണച്ചിരുന്നു.

2017 ജൂണ്‍ 5 ന് ബ്രദർ ഹുഡ് തീവ്രവാദ ബന്ധം ആരോപിച്ച് ഖത്തറിനെതിരെ സൗദി ഉപരോധം ഏര്‍പ്പെടുത്തിയ ശേഷം സൗദിയില്‍ ഇരുന്നു കൊണ്ട് ഖത്തര്‍ അനുകൂല അഭിപ്രായ പ്രകടനം നടത്തിയ നിരവധി വിദേശികള്‍ കുഴപ്പങ്ങള്‍ ക്ഷണിച്ചു വരുത്തിയിരുന്നു. ഖത്തറില്‍ നിന്നും സുഹൃത്തുക്കള്‍ സോഷ്യല്‍ മീഡിയകളിലൂടെ പോസ്റ്റ്‌ ചെയ്ത പോസ്റ്റുകള്‍ ഷെയര്‍ ചെയ്തവരും, കമന്റുകള്‍ ചെയ്തവരും കുഴപ്പത്തിലായിരുന്നു.

2017 ഒക്ടോബറില്‍ ഹായില്‍ പ്രവിശ്യയില്‍ നിന്നും സൗദി അറേബ്യയെ ബാധിക്കും വിധത്തിലുള്ള വിഷയങ്ങള്‍ സാമൂഹിക മാധ്യമങ്ങള്‍ വഴി പ്രചരിപ്പിച്ച ഒരു ഖത്തര്‍ പൗരനും 21 സൗദി പൗരന്‍മാരും അടക്കം 22 പേര്‍ സൗദിയില്‍ പിടിയിലായി. രാജ്യവിരുദ്ധ പ്രവര്‍ത്തനങ്ങള്‍ക്ക് പ്രേരണ നല്‍കിയ കുറ്റമാണ് ചുമത്തിയത്. ഭീകര വിരുദ്ധ നിയമ പ്രകാരവും സൈബര്‍ കുറ്റകൃത്യനിരോധന നിയമപ്രകാരവുമുള്ള വകുപ്പുകളാണ് ചുമത്തിയത്.

അത് പോലെ തന്നെ ഇറാന്‍ പിന്തുണയുള്ള യെമനിലെ ഹൂതികളും സൗദി അറേബ്യയില്‍ തീവ്രവാദ സംഘടനയാണ്. സൗദി അറേബ്യയില്‍ നിന്ന് കൊണ്ട് ഇതുപോലുള്ള സംഘടനകളെ സോഷ്യല്‍ മീഡിയകളിലൂടെ പിന്തുണക്കുകയോ, അഭിനന്ദിക്കുകയോ, ന്യായീകരിക്കുകയോ ചെയ്യുന്നത് ശിക്ഷാര്‍ഹമാണ്.

തീവ്രവാദത്തിനും വിഭാഗീയതയ്ക്കും പ്രേരകമാകുന്ന പുസ്തകങ്ങൾ, ചിത്രങ്ങള്‍, രേഖകള്‍, വിവരണങ്ങള്‍, ലേഖനങ്ങള്‍ തുടങ്ങിയവ നിങ്ങള്‍ കൈവശം വെക്കുകയോ സോഷ്യല്‍ മീഡിയകളിലൂടെ ഷെയര്‍ ചെയ്യുകയോ കൈമാറ്റം ചെയ്യുകയോ ചെയ്യുന്നതും നിങ്ങളെ ഈ നിയമ പ്രകാരം കുറ്റവാളിയാക്കും.

ഈ നിയമപ്രകാരം കുറ്റം ചെയ്തിട്ടുണ്ട് എന്ന് പ്രഥമദൃഷ്ട്യ ബോധ്യപ്പെട്ടാല്‍ പബ്ലിക് പ്രോസിക്യൂഷന് ആ വ്യക്തിയെ 30 ദിവസം മുതല്‍ 12 മാസം വരെ വിചാരണക്ക് മുന്‍പായി തടവില്‍ വെക്കാന്‍ അധികാരം നല്‍കുന്നുണ്ട്. കോടതി ഉത്തരവോട് കൂടി ഇതില്‍ കൂടുതല്‍ കാലം പരിധിയില്ലാതെയും തടവില്‍ പാര്‍പ്പിക്കാം. ഈ നിയമത്തിലെ 90 ദിവസം വരെ കുറ്റം ചെയ്തവരെന്ന് സംശയിക്കപ്പെടുന്നവരെ മറ്റുള്ളവരുമായുള്ള ആശയ വിനിമയത്തിന് അനുവദിക്കാതെ തടഞ്ഞു വെക്കാനും ഈ നിയമം അനുവാദം നല്‍കുന്നുണ്ട്.

കൂടാതെ കുറ്റാരോപിതനെ ചോദ്യം ചെയ്യുന്ന വേളയില്‍ അഭിഭാഷകന്റെ സഹായം ആവശ്യപ്പെടാനുള്ള അവകാശവും നിയന്ത്രിക്കപ്പെടാനും നിയമം അനുവദിക്കുന്നുണ്ട്. മാത്രമല്ല അഭിഭാഷകന്റെയോ എതിര്‍കക്ഷിയുടെയോ സാന്നിധ്യം ഇല്ലാതെ തന്നെ സാക്ഷികളെയും വിദഗ്ദരേയും കേള്‍ക്കാനും പ്രത്യേക കോടതികള്‍ക്ക് അനുവാദമുണ്ട്. അവര്‍ നല്‍കുന്ന മൊഴിയുടെ ഉള്ളടക്കം പൊതുവായി അഭിഭാഷകനെയോ പ്രതിയെയോ ബോധ്യപ്പെടുത്തിയാല്‍ മാത്രം മതി.

സോഷ്യല്‍ മീഡിയ പ്രവൃത്തികളില്‍ കര്‍ശനമായ നിയന്ത്രണമുള്ള രാജ്യമാണ് സൗദി അറേബ്യ. നിങ്ങളുടെ നിയമ വിരുദ്ധമായ ഓരോ പ്രവൃത്തിയും ഇവിടെ നിരീക്ഷിക്കപ്പെടുന്നുണ്ടാവാം. നിങ്ങള്‍ അറിഞ്ഞോ അറിയാതെയോ ചെയ്യുന്ന ഓരോ നിയമ ലംഘന പ്രവൃത്തിയും നിങ്ങളുടെ പ്രവാസ ജീവിതവും ഭാവിയും അപകടത്തിലാക്കും.

ഉദാഹരണമായി നിങ്ങളുടെ വൈഫൈ കണക്ഷന്‍ ഷെയര്‍ ചെയ്യാന്‍ നിങ്ങള്‍ നിങ്ങളുടെ പരിചിതരെയോ അപരിചിതരെയോ അനുവദിക്കുന്നുണ്ടെങ്കില്‍ അയാള്‍ ഈ സൗകര്യം ഉപയോഗിച്ച് ഈ നിയമ പ്രകാരം കുറ്റകരമായ പ്രവൃത്തികളില്‍ ഏര്‍പ്പെട്ടാല്‍ നിങ്ങള്‍ ആ കുറ്റകൃത്യത്തില്‍ കൂട്ടുപ്രതിയായി മാറും.

2017 ല്‍ മലപ്പുറം സ്വദേശികളായ ഫിറോസ്, മൊയ്തീൻ കുട്ടി, തിരുവനന്തപുരം സ്വദേശിയായ ഫെബിൻ റാഷിദ് എന്നിവർ താമസിക്കുന്ന ജിദ്ദയിലെ മുറിയിലേക്ക് പതിനഞ്ചോളം സുരക്ഷാ സേനാംഗങ്ങൾ ഇരച്ചു കയറി ഉറങ്ങി കിടക്കുകയായിരുന്ന മൂവരെയും കസ്റ്റഡിയിൽ എടുത്തു. അറസ്റ്റ് ചെയ്ത ശേഷം മൂവരെയും കാലിലും കൈയിലും ചങ്ങല ഇടുകയും മുഖം മൂടി ധരിപ്പിക്കുകയും ചെയ്ത് അജ്ഞാത കേന്ദ്രത്തിലേക്ക് മാറ്റുകയും ചെയ്തു.

ജിദ്ദ ഹംദാനിയയിൽ സാന്റ്‌വിച്ച് കടയിൽ ജോലി ചെയ്യുന്ന ഇവർക്ക് എന്തിനാണ് തങ്ങളെ അറസ്റ്റ് ചെയ്തതെന്നും എങ്ങോട്ടാണ് കൊണ്ട് പോകുന്നതെന്നും എന്തിനാണ് കസ്റ്റഡിയിൽ വെക്കുന്നതെന്നും മനസ്സിലായില്ല. വർഷങ്ങളായി ഒരുമിച്ചു ജോലി ചെയ്യുന്ന ഇവർ ഇതുപോലെ അറസ്റ്റ് ചെയ്യപ്പെടാൻ മാത്രം ഗുരുതരമായ എന്തെങ്കിലും തെറ്റുകൾ ചെയ്തതായും ഓർമ്മയിൽ ഉണ്ടായിരുന്നില്ല.

നാല് ദിവസം കഴിഞ്ഞപ്പോഴാണ് സുരക്ഷാസേന ഉദ്യോഗസ്ഥർ ഇവരെ എന്തിനാണ് അറസ്റ്റ് ചെയ്തതെന്നും മറ്റുമുള്ള വിവരങ്ങൾ അറിയിക്കുന്നത്. രാജ്യ സുരക്ഷാ സംബന്ധമായ കുറ്റത്തിനാണ് അറസ്റ്റ് ചെയ്തതെന്ന് ധരിപ്പിച്ച ശേഷം മൂവരെയും ഒരുമിച്ചും പ്രത്യേകമായും ചോദ്യം ചെയ്യാൻ തുടങ്ങി. ചോദ്യം ചെയ്യുന്ന വേളയിൽ ഉദ്യോഗസ്ഥൻ രണ്ട് ഫോട്ടോ കാണിച്ച് ഇവരെ അറിയുമോ എന്ന് ചോദിച്ചു. ഇരുവരും തങ്ങൾ താമസിച്ചിരുന്ന മുറിയുടെ സമീപത്ത് താമസിച്ചിരുന്നവർ ആയിരുന്നു. അവരെ മൂവരും തിരിച്ചറിഞ്ഞു.

റിയാദിൽ സ്‌ഫോടനം നടത്താൻ വന്ന ഭീകരവാദികളുടെ കണ്ണികളാണ് ഇവരെന്നാണ് പോലീസ് പറഞ്ഞത്. അപ്പോഴും തങ്ങളെ എന്തിനാണ് കസ്റ്റഡിയിൽ എടുത്തതെന്നും ചോദ്യം ചെയ്യുന്നതെന്നും ഇവർക്ക് മനസ്സിലായില്ല. തുടർന്ന് ഉദ്യോഗസ്ഥൻ അവർക്ക് നിയമവിരുദ്ധ പ്രവർത്തനങ്ങൾ നടത്തുവാൻ ഇന്റർനെറ്റ് കണക്ഷൻ നൽകിയത് നിങ്ങളാണെന്നും നിങ്ങളുടെ വൈഫൈ കണക്ഷൻ ഉപയോഗിച്ചാണ് ഇവർ പ്രവർത്തിച്ചിരുന്നതെന്നും ഭീകര സംഘടനകളുമായി ആശയ വിനിമയത്തിന് സോഷ്യല്‍ മീഡിയയും മറ്റും ഉപയോഗിച്ചിരുന്നുവെന്നും പറഞ്ഞപ്പോഴാണ് തങ്ങൾ ചെയ്ത കൃത്യത്തിന്റെ ഗുരുതരാവസ്ഥ അവർക്ക് ബോധ്യപ്പെട്ടത്.

മൂവരും താമസിക്കുന്ന മുറിയിൽ ഫെബിൻ റാഷിദിന്റെ ഇഖാമയിൽ ഇന്റർനെറ്റ് കണക്ഷൻ എടുത്തിരുന്നു. ഇന്റർനെറ്റ് കണക്ഷന്റെ മാസവാടകയുടെ ഭാരം കുറക്കുന്നതിനായി മാസ വാടകയുടെ ഒരു ഭാഗം നൽകണമെന്ന വ്യവസ്ഥയിൽ ഇവർ കണക്ഷൻ തൊട്ടടുത്ത റൂമിൽ താമസിക്കുന്ന യെമൻ പൗരന്മാർക്കും പാസ്‌വേഡ് നൽകി ഷെയർ ചെയ്തിരുന്നു. പിന്നീട് സെപ്റ്റംബർ 10 ന് മറ്റു രണ്ടു യെമനികൾ തൊട്ടടുത്ത റൂമിൽ താമസിക്കാനെത്തുകയും അവർ ആവശ്യപ്പെട്ടത് പ്രകാരം അവർക്കും വാടക ഷെയർ അടിസ്ഥാനത്തിൽ പാസ്‌വേഡ് നൽകി ഇന്റർനെറ്റ് ഷെയർ ചെയ്തു.

ആ കണക്ഷൻ യെമനികൾ ദുരുപയോഗം ചെയ്തതിനെ തുടർന്നാണ് ഇന്റർനെറ്റ് കണക്ഷൻ എടുത്ത ഇഖാമ ഉടമസ്ഥനായ ഫെബിനെയും കൂടെ താമസിക്കുന്ന രണ്ടു പേരെയും അറസ്റ്റ് ചെയ്തത്. 23 ദിവസത്തിന് ശേഷം നിരപരാധികളെന്ന് കണ്ട് ഫിറോസിനെയും മൊയ്‌തീൻകുട്ടിയെയും മോചിപ്പിച്ചു. എന്നാൽ ഫെബിൻ റാഷിദിന്റെ ഇഖാമയിലായിരുന്നു കണക്ഷൻ എന്നതിനാൽ ഇയാളെ വിട്ടയച്ചില്ല. പിന്നീട് ദിവസങ്ങള്‍ക്ക് ശേഷമാണ് ഫെബിൻ റാഷിദിനെ സ്‌പോൺസറോടൊപ്പം വിട്ടയക്കുകയും ചെയ്തു.

കസ്റ്റഡിയിൽ എടുത്ത ശേഷം ഇവരുടെ ഫേസ്ബുക്ക്, വാട്‌സ്അപ്പ് എന്നിവ അധികൃതർ ഇഴകീറി പരിശോധിച്ചിരുന്നു. അതിൽ മൂവരും പറഞ്ഞതിന് വിരുദ്ധമായി ഒന്നും കണ്ടെത്താൻ കഴിഞ്ഞിരുന്നില്ല എന്നതിന്റെ അടിസ്ഥാനത്തിൽ ആയിരുന്നു ഇവർക്ക് മോചനം നൽകിയത്.

രാജ്യം ഭീകരവാദ/തീവ്രവാദ പ്രവര്‍ത്തനങ്ങളുടെ ഭീഷണി നേരിട്ട് കൊണ്ടിരിക്കുന്ന ഒരു കാലഘട്ടമെന്ന നിലയില്‍ തങ്ങളുടെ ജീവനക്കാര്‍ സോഷ്യല്‍ മീഡിയകളില്‍ ഇത്തരം അക്കൌണ്ടുകള്‍ പിന്തുടരുന്നത് കണ്ടു പിടിക്കേണ്ടത് തൊഴിലുടമകളുടെ കൂടി ഉത്തരവാദിത്വമാണ്. അത്തരം പ്രവര്‍ത്തനങ്ങള്‍ ചെയ്യുന്നുണ്ടോ എന്ന് വ്യക്തമാവുന്നതിനു വേണ്ടി അവരുടെ സോഷ്യല്‍ മീഡിയ അക്കൌണ്ടുകള്‍ പിന്തുടരാനും നിരീക്ഷിക്കാനും തൊഴിലുടമകള്‍ക്ക് അനുവാദമുണ്ട്. തങ്ങളുടെ തൊഴിലാളികള്‍ നിയമ ലംഘനം നടത്തുന്നതായി കണ്ടാല്‍ അക്കാര്യം അധികൃതര്‍ക്ക് റിപ്പോര്‍ട്ട് ചെയ്യുകയും വേണം.

റിയാദില്‍ യെമെന്‍ സ്വദേശിയായ തങ്ങളുടെ ജീവനക്കാരനെ കുറിച്ച് അധികൃതര്‍ക്ക് റിപ്പോര്‍ട്ട് ചെയ്തത് സ്വന്തം കമ്പനി അധികൃതര്‍ തന്നെയായിരുന്നു. ഇയാള്‍ തന്റെ നാട്ടിലെ നിരോധിത സംഘടനയെ കുറിച്ച് തന്റെ സോഷ്യല്‍ മീഡിയയിലൂടെ നിരവധി പോസ്റ്റുകള്‍ ഷെയര്‍ ചെയ്യുകയും സൗദി അറേബ്യ കൂടി പങ്കാളിയായിട്ടുള്ള യെമനിലെ സഖ്യസേനയുടെ അന്തസ്സിനെ ഇടിച്ചു കാണിക്കുന്ന വിധത്തില്‍ അഭിപ്രായ പ്രകടനങ്ങള്‍ നടത്തുകയും ചെയ്തതായി കണ്ടെത്തിയതിനെ തുടര്‍ന്ന് കമ്പനി അധികൃതര്‍ ഇയാളുടെ തൊഴില്‍ കരാര്‍ ടെര്‍മിനേറ്റ് ചെയ്യുകയും പിരിച്ചു വിടുകയും ചെയ്ത ശേഷം അധികൃതര്‍ക്ക് പരാതി നല്‍കുകയായിരുന്നു. തുടര്‍ന്ന് ഇയാള്‍ അറസ്റ്റിലാവുകയും ചെയ്തു.

അറിഞ്ഞു കൊണ്ട് കുറ്റം ചെയ്യുന്നവര്‍ ശിക്ഷിക്കപ്പെടണം എന്നതില്‍ തര്‍ക്കമില്ല. എന്നാല്‍ അറിവില്ലായ്മ കൊണ്ടോ അശ്രദ്ധ കൊണ്ടോ ഒരു പ്രവാസി ചെയ്യുന്ന പ്രവൃത്തി സൗദിയിലെ നിയമ പ്രകാരം  അറിഞ്ഞു കൊണ്ട് കുറ്റം ചെയ്യുന്ന പ്രവൃത്തിക്ക സമാനമാകുന്ന ചില സാഹചര്യങ്ങള്‍ ഉണ്ടാക്കുന്നുണ്ട്. അതില്‍ പലരും ദുരിതം അനുഭവിക്കേണ്ടി വരികയും ചെയ്തിട്ടുണ്ട്. അത് കൊണ്ട് സൗദി അറേബ്യയിലെ നിങ്ങളുടെ പ്രവാസ ജീവിതം അകാലത്തില്‍ അസ്തമിച്ചു പോകാതിരിക്കാന്‍ മേല്‍ പറഞ്ഞ വിഷയങ്ങളില്‍ സാമാന്യമായ അവബോധം ഉണ്ടാക്കിയെടുക്കുകയും ശ്രദ്ധ പതിപ്പിക്കുകയും ചെയ്യേണ്ടത് അത്യാവശ്യമാണ്.

അഡ്വ.ഷിയാസ് കുഞ്ഞിബാവ. കോര്‍പറേറ്റ് കണ്‍സല്‍ട്ടന്റ്. ദുബായ്.റിയാദ്.ഡല്‍ഹി.കൊച്ചി.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/KuwvFcgILVQ05OICLoEBpy

പ്രവാസി കോര്‍ണര്‍ ഫേസ്ബുക്ക് പേജില്‍ പ്രവേശിക്കാന്‍ ഈ ലിങ്കില്‍ ക്ലിക്ക് ചെയ്യുക https://www.facebook.com/PravasiCornerOfficial

 പരസ്യങ്ങള്‍ക്ക് ബന്ധപ്പെടുക: [email protected] / 8921190515 (WatsApp) 

LATEST

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

Published

on

ഞാന്‍ ഇപ്പോള്‍ റിയാദില്‍ ഹൗസ് ഡ്രൈവര്‍ വിസയില്‍ ജോലി ചെയ്യുകയാണ്. സ്വന്തമായാണ് പുറത്ത് ജോലി ചെയ്യുന്നത്. ഹൗസ് ഡ്രൈവര്‍മാര്‍ക്ക് ലെവി ബാധകമാക്കിയല്‍ മുന്നോട്ട് തുടര്‍ന്ന് പോകാന്‍ സാധിക്കില്ല. എന്ന് മുതലാണ്‌ ഈ നിയമം നിലവില്‍ വരുന്നത്, ഏതെങ്കിലും തരത്തിലുള്ള ഒഴിവാക്കലുകള്‍ ഉണ്ടാകുമോ തുടങ്ങിയ കാര്യങ്ങള്‍ വിശദീകരിക്കാമോ? സ്പോണ്‍സര്‍ഷിപ്പ് മാറുന്നതിന് എന്തൊക്കെ നടപടി ക്രമങ്ങളാണ് സ്വീകരിക്കേണ്ടത് എന്നും പറഞ്ഞു തരാമോ?

സൗദിയില്‍ കോവിഡ് വ്യാപനം രൂക്ഷമാവുന്നതിന് മുന്‍പ് അനധികൃത വിദേശികളെ പിടികൂടുന്നതിന് വേണ്ടി വ്യാപകമായ പരിശോധന നടന്നിരുന്നു. നിലവിലെ പ്രത്യേക സുരക്ഷാ ഭീഷണി സാഹചര്യങ്ങള്‍ മുന്‍നിറുത്തി അധികൃതര്‍ ലക്ഷ്യമിട്ടിരുന്നത് പ്രധാനമായും യാതൊരു രേഖകളും ഇല്ലാതെ അതിര്‍ത്തി പ്രദേശങ്ങളിലൂടെ നുഴഞ്ഞു കയറിയവര്‍, രേഖകളുടെ കാലാവധി അവസാനിച്ചിട്ടും രാജ്യത്ത് തുടര്‍ന്നവര്‍ തുടങ്ങിയ അനധികൃത താമസക്കാരെ ആയിരുന്നു. മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധന അല്ലാതിരുന്നിട്ടു കൂടി ഈ പരിശോധനകളില്‍ ജവാസാതിന്റെയും സംയുക്ത സുരക്ഷ സേനകളുടെയും പിടിയില്‍ പത്തു ശതമാനത്തോളം വിദേശികളും ഉള്‍പ്പെട്ടിരുന്നു. ഇതില്‍ അധികവും ഹൗസ് ഡ്രൈവര്‍ വിസയില്‍ സൗദിയിലെത്തി സ്വന്തമായി ജോലി ചെയ്തു വന്നിരുന്നവര്‍ ആയിരുന്നു.

അത് പോലെ തന്നെ മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധനകളില്‍ നിരവധി സ്ഥാപനങ്ങളില്‍ അനേകം ഗാര്‍ഹിക തൊഴിലാളികള്‍ അനധികൃതമായി ജോലി ചെയ്തു വരുന്നതായി കണ്ടെത്തിയിരുന്നു. ഹൗസ് ഡ്രൈവര്‍ വിസയില്‍ രാജ്യത്തെത്തി സ്വതന്ത്രമായി ജോലി ചെയ്തു വരുന്നവരായിരുന്നു ഇവര്‍. ഹൗസ് ഡ്രൈവര്‍മാര്‍ക്ക് ലെവി ബാധകമല്ലാത്തതിനാലാണ് വന്‍തുകയുടെ സാമ്പത്തിക ബാധ്യത ഒഴിവാക്കുന്നതിനായി വിദേശികള്‍ ഈ വിസയില്‍ എത്തി ജോലി ചെയ്തു വന്നിരുന്നത്.

2014 ജൂലൈയിലാണ് രാജ്യത്ത് ആദ്യമായി സ്വകാര്യ മേഖലയിലെ വിദേശ തൊഴിലാളികൾക്ക് ലെവി ബാധകമാക്കിയത്. 2017 ജൂലൈയിൽ ആശ്രിതർക്കും ലെവി നിലവിൽവന്നു. എങ്കിലും ഗാർഹിക തൊഴിലാളികൾക്ക് ലെവി ബാധകമായിരുന്നില്ല. ഈ പഴുത് മുതലെടുത്ത്‌ കൊണ്ടാണ് പല വിദേശികളും ഹൗസ് ഡ്രൈവര്‍ വിസയിലേക്ക് മാറുകയോ ഫൈനല്‍ എക്സിറ്റില്‍ പോയോ പുതിയ ഹൌസ് ഡ്രൈവർ ഉൾപ്പെടെയുള്ള ഗാർഹിക വിസകളില്‍ രാജ്യത്തെത്തുകയോ ചെയ്തു കൊണ്ടിരുന്നത്.

പരിശോധനകളില്‍ ഹൗസ് ഡ്രൈവര്‍ വിസയില്‍ രാജ്യത്തെത്തിയ അനേകം തൊഴിലാളികള്‍ പിടിലാകുന്നത് വര്‍ദ്ധിച്ചതോടെയാണ് ഈ വിഷയം അധികൃതരുടെ ശ്രദ്ധയില്‍ പെടുന്നത്. തുടര്‍ന്ന് ഈ പഴുത് അടക്കുന്നതിനു വേണ്ടിയുള്ള ശ്രമങ്ങളുടെ ഭാഗമായാണ് ഗാര്‍ഹിക തൊഴിലാളികള്‍ക്ക് ലെവി ഏര്‍പ്പെടുതാനുള്ള തീരുമാനം മാനവശേഷി സാമൂഹിക വികസന മന്ത്രാലയ ശുപാര്‍ശ പ്രകാരം സൗദി കാബിനറ്റ്‌ കൈക്കൊള്ളുന്നത്.

പുതിയ തീരുമാന പ്രകാരം ഹൗസ് ഡ്രൈവർ വിസയിലുൾപ്പെടെയുള്ള മുഴുവൻ ഗാർഹിക തൊഴിലാളികൾക്കും ലെവി ബാധകമാണ്. ഓരോ തൊഴിലാളിക്കും വർഷത്തിൽ 9,600 റിയാൽ, അഥവാ പ്രതിമാസം 800 റിയാൽ തോതിലാണ് ലെവി. എന്നാല്‍ ആവശ്യമായ മുന്‍കരുതലുകള്‍ എടുത്തു കൊണ്ട് തന്നെയാണ് ഈ തീരുമാനം മന്ത്രാലയം കൈക്കൊണ്ടിട്ടുള്ളത്. പുതിയ തീരുമാനം മൂലം സ്വദേശികള്‍ക്കും വിദേശികള്‍ക്കും പെട്ടെന്ന് അസൗകര്യം ഉണ്ടാകാത്ത വിധത്തിലാണ് പുതിയ നിബന്ധനകള്‍ നടപ്പിലാക്കുക.

അതായത്, എല്ലാ ഗാര്‍ഹിക തൊഴിലാളികള്‍ക്കും ലെവി ഏര്‍പ്പെടുത്തിയിട്ടില്ല. നാലിൽ കൂടുതൽ ഗാർഹിക തൊഴിലാളികളുള്ള സ്വദേശികളും, രണ്ടിൽ കൂടുതൽ തൊഴിലാളികളുള്ള വിദേശികളും മാത്രമേ പുതിയ തീരുമാന പ്രകാരം ലെവി അടക്കേണ്ടി വരുന്നുള്ളൂ. വിസ കച്ചവടവും അനധികൃത വിസ കൈമാറ്റവും തടയുന്നതിനാണ് ഈ നിബന്ധനകള്‍ കൊണ്ട് വന്നിട്ടുള്ളത്.

മാത്രമല്ല, ഗാര്‍ഹിക തൊഴിലാളികള്‍ക്ക് മറ്റു തൊഴിലുകളിലേക്ക് മാറുന്നതിനാവശ്യമായ സാവകാശവും മന്ത്രാലയം പരോക്ഷമായി നല്‍കുന്നുണ്ട്. അത് കൊണ്ട് തന്നെ രണ്ട് ഘട്ടങ്ങളിലായാണ് തീരുമാനം നടപ്പിലാക്കുക. ഈ വർഷം മെയ് 22 ന് ആരംഭിക്കുന്ന ഒന്നാം ഘട്ടത്തിൽ പുതിയ ഗാർഹിക വിസയിൽ വരുന്ന തൊഴിലാളികൾക്ക് മാത്രമേ ലെവി അടക്കേണ്ടതുള്ളൂ.

കൂടാതെ ഈ വിഷയത്തില്‍ മന്ത്രാലയത്തിന്റെ ഉദാരമായ നിലപാടും പ്രശംസാര്‍ഹമാണ്. പ്രത്യേക വൈദ്യ പരിചരണ ആവശ്യമുള്ള ആളുകൾ, ഭിന്നശേഷിക്കാർക്കുള്ള പരിചരണം തുടങ്ങി മാനുഷികമായ പരിഗണന ആവശ്യപ്പെടുന്ന സന്ദർഭങ്ങളിൽ അത്തരം ജോലികൾക്കായി നിയമിക്കുന്ന ഗാർഹിക തൊഴിലാളിക്ക് ലെവി ബാധകമാവില്ല.

നിലവിൽ രാജ്യത്തുള്ള ഗാർഹിക തൊഴിലാളികൾക്ക് ഒരു വർഷത്തിന് ശേഷം മാത്രമേ ലെവി ബാധകമാകുകയുള്ളൂ. 2023 മെയ് 13 മുതലാണ് ഇവർക്ക് ലെവി അടക്കേണ്ടിവരിക. ഇതിനിടയില്‍ ഇവര്‍ക്ക് മറ്റുള്ള പ്രൊഫഷനുകളിലെക്ക് മാറാനോ ഫൈനല്‍ എക്സിറ്റില്‍ രാജ്യം വിട്ടു പോകാനോ ഉള്ള സാവകാശം ലഭിക്കും. ഇപ്പോൾ ഹൗസ് ഡ്രൈവർ തസ്തികയിലുള്ളവർക്ക് പ്രൊഫഷൻ മാറ്റം അനുവദിക്കുന്നതിനാൽ കൂടുതൽ സുരക്ഷിതമായ തൊഴിലുകൾ കണ്ടെത്തി മാറാവുന്നതാണ്.

സ്പോണ്‍സര്‍ഷിപ്പ് മാറുന്നതിനായി ഖിവ പ്ലാറ്റ്ഫോം വഴിയാണ് അപേക്ഷ നല്‍കേണ്ടത്. പുതിയ സ്പോണ്‍സര്‍ ആണ് മാറാന്‍ അപേക്ഷ നല്‍കേണ്ടത്. തൊഴിലാളിയുടെ ഇഖാമ കാലാവധി ഒരു വര്‍ഷത്തില്‍ കൂടുതല്‍ ഉള്ളതാകരുത് എന്ന നിബന്ധന നിലവിലുണ്ട്. പുതിയ സ്പോണ്‍സര്‍ ഓണ്‍ലൈന്‍ വഴി അപേക്ഷ നല്‍കിയാല്‍ പഴയ സ്പോണ്‍സര്‍ക്ക് എസ്.എം.എസ് ലഭിക്കും. നിലവിലെ സ്പോണ്‍സര്‍ ഇത് അംഗീകരിക്കുന്നതോടെ സ്പോണ്‍സര്‍ഷിപ്പ് മാറ്റം പൂര്‍ത്തിയാകും.

ഹൗസ് ഡ്രൈവര്‍ വിസയില്‍ എത്തി സ്വന്തമായി ജോലി ചെയ്യുകയോ മറ്റു പ്രൊഫഷനുകളില്‍ ജോലി ചെയ്യുകയോ ചെയ്തു വരികയാണെങ്കില്‍ ഈ നിബന്ധന നിലവില്‍ വരുന്നതോടെ താങ്കളുടെ നിലനില്പ് തന്നെ അപകടത്തിലാകും. താങ്കളുടെ സ്പോണ്‍സര്‍ക്ക് നാലില്‍ കൂടുതല്‍ ഗാര്‍ഹിക തൊഴിലാളികള്‍ നിലവില്‍ ഉണ്ടെങ്കില്‍ വർഷത്തിൽ 9,600 റിയാൽ നല്‍കി കൊണ്ട് ഹൗസ് ഡ്രൈവര്‍ വിസയില്‍ മുന്നോട്ട് പോകാന്‍ സാധിക്കില്ല. അതിനാല്‍ നിബന്ധന നിലവില്‍ വരുന്നതിന് മുന്‍പായി ലെവി അടക്കാന്‍ സാധിക്കുന്ന വരുമാനം ലഭിക്കുന്ന മറ്റു പ്രൊഫഷനിലെക്ക് മാറുകയോ അല്ലാത്ത പക്ഷം ഫൈനല്‍ എക്സിറ്റില്‍ പോകുകയോ ചെയ്യുന്നതാണ്‌ ഉചിതം.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD 

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

 

വിവരങ്ങള്‍ നല്‍കിയത്: 

Adv. Shiyas Kunjhibava. Lead Partner, SK Associates. (Dubai, Riyadh, Delhi, Kochi)

Continue Reading

LATEST

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

Published

on

അടുത്ത മാസം പകുതിയോടെ സൗദി അറേബ്യയില്‍ ഓയില്‍ സെക്ടറില്‍ പുതിയ വിസയില്‍ പോകാന്‍ ഒരുങ്ങുകയാണ്. ആദ്യമായാണ് സൗദി കമ്പനിക്ക്  വേണ്ടി ജോലി ചെയ്യാന്‍ സാധിക്കുന്നത്. ഉയര്‍ന്ന തസ്തികയിലാണ് വിസ. ഈ തസ്തിക കാലക്രമേണ നിതാഖാതില്‍ ഉള്‍പ്പെടുത്തി സ്വദേശിവല്‍ക്കരണം ഉണ്ടാകുമെന്നും ജോലി നഷ്ടപ്പെടുമെന്നും നിലവിലുള്ള ജോലി നഷ്ടപ്പെടുത്തി സൗദിയിലേക്ക് പോകുന്നത് ശരിയായ തീരുമാനമല്ല എന്ന് സുഹൃത്ത് പറയുന്നു. എന്താണ് നിതാഖാത് എന്നതിന്റെ അടിസ്ഥാനപരമായ കാര്യങ്ങള്‍ വിശദീകരിച്ചു തരാമോ?    

 

സൗദി അറേബ്യയില്‍ ജോലി ചെയ്യുന്ന വിദേശികളെ സംബന്ധിച്ചിടത്തോളം അല്‍പ്പം അസ്വസ്ഥത പകരുന്ന വാക്കാണ്‌ സൗദി പൗരന്മാരെ നിയമിക്കുന്നതിന് സ്വകാര്യ മേഖലയെ പ്രോത്സാഹിപ്പിക്കുന്നതിനായി സൗദി മാനവ വിഭവശേഷി, സാമൂഹിക വികസന മന്ത്രാലയം രൂപം നല്‍കിയ ഒരു പദ്ധതിയുടെ പേരായ നിതാഖാത്.

പലരും കരുതുന്നത് പോലെ വിദേശികളെ സൗദി അറേബ്യയുടെ തൊഴില്‍ രംഗത്ത് നിന്നും ആത്യന്തികമായി പുറത്താക്കുക എന്നതല്ല മറിച്ച് സ്വദേശി പൗരന്മാരുടെ തൊഴിലില്ലായ്മ കുറക്കുകയും അവര്‍ക്ക് രാജ്യത്തിന്റെ സ്വകാര്യ മേഖലയില്‍ ജോലി ഉറപ്പു വരുത്തുകയാണ് ഈ പദ്ധതിയുടെ ലക്‌ഷ്യം. തങ്ങളുടെ പൗരന്മാര്‍ക്ക് തൊഴിലും ഉയര്‍ന്ന ജീവിത സാഹചര്യങ്ങളും ഉറപ്പു വരുത്തുക എന്നത് ഏതൊരു രാജ്യത്തിന്റെയും പ്രാഥമിക കര്‍ത്തവ്യം കൂടിയാണ് എന്ന തത്വത്തില്‍ അധിഷ്ഠിതമായ പദ്ധതി കൂടിയാണ് നിതാഖാത്.

2011-ൽ ആരംഭിച്ചത് മുതൽ, ഈ പദ്ധതിയിലൂടെ കാലാനുസൃതമായി വിവിധ തൊഴിലുകളെ ദേശസാൽക്കരിക്കാനും സ്വദേശി പൗരന്മാരുടെ കഴിവുകളെ വൈവിധ്യവല്‍ക്കരിക്കാനും ആവശ്യമായ നടപടികൾ നടപ്പിലാക്കിയിട്ടുണ്ട്. ഇതുമൂലം ലക്ഷക്കണക്കിന്‌ സ്വദേശികള്‍ക്ക് തൊഴിലവസരങ്ങള്‍ സൃഷ്ടിക്കാന്‍ സാധിച്ചിട്ടുണ്ട്. ലക്‌ഷ്യത്തിലേക്ക് എത്തുന്നതിനായി കഴിഞ്ഞ 11 വര്‍ഷമായി നിരന്തരമായ അപ്ഡേറ്റുകൾക്കും നിതാഖാത് വിധേയമായിട്ടുണ്ട്. അതിൽ ഏറ്റവും പുതിയത് “അഡ്വാൻസ്ഡ് നിതാഖാത്”/ “പരിഷ്കരിച്ച നിതാഖാത്” എന്ന പേരില്‍ 2021 ഡിസംബറിൽ ആയിരുന്നു.

സൗദി പൗരന്മാര്‍ക്ക് തൊഴില്‍ ഉറപ്പ് വരുത്തുന്നതിനായി സ്വകാര്യ മേഖലയിലെ പ്രത്യേക തൊഴിലുകള്‍ അവര്‍ക്കായി മാത്രം പരിമിതപ്പെടുത്തുക, അതിനായി സ്ഥാപനങ്ങളെ വിവിധ വിഭാഗങ്ങളാക്കി തരം തിരിക്കുക എന്നതാണ് നിതാഖാത് പദ്ധതിയുടെ അടിസ്ഥാന പ്രവര്‍ത്തന രീതി. ഈ പദ്ധതിയിലൂടെ സൗദി പൗരന്മാര്‍ക്ക് കൃത്യമായ അടിസ്ഥാന പ്രതിമാസ ശമ്പളവും മന്ത്രാലയം ഉറപ്പു വരുത്തുന്നുണ്ട്. സൗദി തൊഴിൽ നിയമം ഒരു സൗദി പൗരന് കൃത്യമായ മിനിമം വേതനം നിര്‍ദ്ദേശിക്കുന്നില്ല എന്ന പരിമിതിയെ ഈ പദ്ധതിയിലൂടെ മറികടക്കാനും മന്ത്രാലയത്തിന് സാധിക്കുന്നു.

ആറു ജീവനക്കാരും അതിൽ കൂടുതലുമുള്ള എല്ലാ സ്ഥാപനങ്ങൾക്കും നിതാഖാത്ത് ബാധകമാണ്. നിലവില്‍ ചുവപ്പ്, ഇളം പച്ച, ഇടത്തരം പച്ച, കടും പച്ച, പ്ലാറ്റിനം എന്നിങ്ങനെ അഞ്ച് വിഭാഗങ്ങളാക്കിയാണ് സ്വകാര്യ മേഖലയിലെ സ്ഥാപനങ്ങളെ നിതാഖാത് പദ്ധതി പ്രകാരം തരം തിരിച്ചിട്ടുള്ളത്. പദ്ധതിയുടെ നിബന്ധനകള്‍ പൂര്‍ത്തീകരിക്കുന്നതിന്റെ അടിസ്ഥാനത്തിലാണ്, അതായത് സൗദിവൽക്കരണത്തിന്റെ ശതമാനത്തെ അടിസ്ഥാനമാക്കിയാണ് ഈ സ്ഥാപനങ്ങള്‍ക്ക് പ്രത്യേക അവകാശങ്ങളും പരിമിതികളും ഏര്‍പ്പെടുത്തിയിരിക്കുന്നത്. മിനിമം സൗദിവൽക്കരണം പാലിക്കാത്ത സ്ഥാപനങ്ങൾക്ക് മന്ത്രാലയത്തിൽ നിന്നുള്ള സേവനങ്ങൾ വിലക്കുകയും നിര്‍ദ്ദിഷ്ട സൗദിവല്‍ക്കരണം പാലിക്കുന്ന സ്ഥാപനങ്ങള്‍ക്ക് ആവശ്യമായ പ്രോത്സാഹനം നല്‍കുകയുമാണ് ചെയ്യുന്നത്.

സ്ഥാപനങ്ങളെ തരം തിരിക്കുന്നതിനായി ഇന്റർനാഷണൽ ക്ലാസിഫിക്കേഷൻ സ്റ്റാൻഡേർഡ് (“ISIC4”) എന്ന മാനദണ്ഡമാണ് മൂന്ന് വർഷമായി ഉപയോഗിക്കുന്നത്. ഈ മാനദണ്ഡം ഉപയോഗിച്ച് സ്ഥാപനങ്ങള്‍ ഉള്‍പ്പെടുന്ന മേഖല, സ്ഥാപനത്തിന്റെ പ്രവർത്തനങ്ങൾ, പ്രസ്തുത സ്ഥാപനത്തിലെ ജീവനക്കാരുടെ എണ്ണം തുടങ്ങിയവ ഒരു നിർദ്ദിഷ്‌ട സമവാക്യം ഉപയോഗിച്ച് നിര്‍ണ്ണയിച്ച്  വരുന്ന ഒന്നും രണ്ടും മൂന്നും വർഷങ്ങളിൽ പ്രസ്തുത സ്ഥാപനം  ഏത് വിഭാഗത്തില്‍ ഉള്‍പ്പെടുമെന്ന് നിര്‍ണ്ണയിക്കുന്നു.

പരിഷ്‌കരിച്ച നിതാഖാത്ത് പ്രകാരം സ്വകാര്യ സ്ഥാപനങ്ങൾ മൂന്നു വർഷത്തിനുള്ളിൽ സൗദിവൽക്കരണം ഘട്ടം ഘട്ടമായി നിശ്ചിത ശതമാനം ഉയർത്തൽ നിർബന്ധമാണെന്ന് മന്ത്രാലയം വ്യക്തമാക്കിയിട്ടുണ്ട്. അല്ലാത്ത പക്ഷം ഈ സ്ഥാപനങ്ങളുടെ വിഭാഗത്തിൽ മാറ്റം വരികയും ഉയര്‍ന്ന വിഭാഗത്തില്‍ നിന്നും താഴെയുള്ള വിഭാഗങ്ങളിലേക്ക് പോവുകയും ചെയ്യും. പുതിയ പദ്ധതി പ്രകാരം ആവശ്യമായ മാറ്റങ്ങള്‍ വരുത്തുന്നതിന് ആവശ്യമായ സമയം അനുവദിക്കുക എന്നതാണ് ഈ മൂന്ന് വര്‍ഷ സമയ പരിധിയുടെ ഉദ്ദേശം. ഈ സമയ പരിധിക്കുള്ളില്‍ നാല് ലക്ഷത്തോളം പുതിയ സ്വദേശി തൊഴിലവസരങ്ങളാണ് മന്ത്രാലയം ലക്ഷ്യമിടുന്നത്.

ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍:

മുകളില്‍ അഞ്ചാമത്ത ഖണ്ഡികയില്‍ പറഞ്ഞിരിക്കുന്നത് പോലെ അഞ്ചു വിഭാഗങ്ങളായാണ് നിതാഖത് പദ്ധതി പ്രകാരം സ്വകാര്യ കമ്പനികളെ തരം തിരിച്ചിരിക്കുന്നത്. അതില്‍ ഏറ്റവും താഴെയായി കിടക്കുന്ന സ്ഥാപനങ്ങളാണ് ചുവന്ന വിഭാഗത്തിലുള്ള സ്ഥാപനങ്ങള്‍. മന്ത്രാലയം നിര്‍ദ്ടെഷിചിരിക്കുന്നതരത്തിലുള്ള നിബന്ധനകള്‍ പാലിക്കാന്‍ സാധിക്കാത്ത സ്ഥാപനങ്ങളാണ് ഈ വിഭാഗത്തില്‍ ഉള്‍പ്പെടുന്നത്.അത് കൊണ്ട് തന്നെ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം നല്‍കുന്ന ഉത്തേജന/പ്രോത്സാഹന മാര്‍ഗ്ഗങ്ങള്‍ ലഭ്യമാകില്ല. മറിച്ച് ഇത്തരം സ്ഥാപനങ്ങള്‍ക്ക് അവക്ക് ലഭ്യമായിരുന്ന അടിസ്ഥാന അവകാശങ്ങള്‍ പോലും നഷ്ടമാകുകയും ചെയ്യുന്നു. സ്ഥാപനത്തിനും അതിലെ തൊഴിലാളികള്‍ക്കും താഴെ പറയുന്ന ആനുകൂല്യങ്ങള്‍ നിഷേധിക്കപെടുന്നു:

  1. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് അതിലെ തൊഴിലാളികളുടെ വർക്ക് പെർമിറ്റ് പുതുക്കാൻ സാധിക്കില്ല.
  2. ഇത്തരം സ്ഥാപനങ്ങള്‍ക്ക് തങ്ങളുടെ തൊഴിലാളികളുടെ പ്രൊഫഷനുകള്‍ മാറ്റാൻ സാധിക്കില്ല.
  3. ഈ സ്ഥാപനങ്ങള്‍ക്ക് പുതിയ വിദേശ തൊഴിലാളികൾക്ക് വർക്ക് പെർമിറ്റ് നൽകാൻ സാധിക്കില്ല.
  4. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ വിസകൾക്ക് വേണ്ടി അപേക്ഷിക്കാന്‍ സാധിക്കില്ല.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് വിസ ട്രാന്‍സ്ഫര്‍ ചെയ്യാന്‍ സാധിക്കില്ല.
  6. സ്ഥാപനങ്ങളുടെ പുതിയ ശാഖകൾക്കോ പുതിയ സൗകര്യങ്ങൾക്കോ വേണ്ടി പുതിയ ഫയലുകൾ തുറക്കാൻ അനുവാദം ഉണ്ടായിരിക്കില്ല.

ഇളം പച്ച വിഭാഗത്തില്‍ പെടുന്ന സ്ഥാപനങ്ങള്‍ (ലോ ഗ്രീൻ റേഞ്ച് സ്ഥാപനങ്ങള്‍):

ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങളെ പോലെ മുഴുവന്‍ ആനുകൂല്യങ്ങളും നിഷേധിക്കപ്പെടുന്നില്ല. നാമമാത്രമായ നിയന്ത്രണങ്ങളാണ് ഇത്തരം സ്ഥാപനങ്ങളുടെ പ്രവര്‍ത്തനത്തിലും മന്ത്രാലയം ഏര്‍പ്പെടുത്തിയിട്ടുള്ളത്.

  1. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ തൊഴില്‍ വിസകൾക്കുള്ള അപേക്ഷകൾ സമര്‍പ്പിക്കാന്‍ സാധിക്കില്ല.
  2. ഈ സ്ഥാപനങ്ങളിലെ വിദേശികളായ തൊഴിലാളികളുടെ പ്രോഫഷനുകള്‍ മാറ്റാനുള്ള അനുവാദം നല്‍കിയിട്ടുണ്ട്. എന്നാല്‍ സൗദി പൗരന്മാർക്ക് മാത്രമായി പരിമിതപ്പെടുത്തിയിരിക്കുന്ന പ്രൊഫഷനുകളിലേക്ക് മാറ്റം അനുവദിക്കില്ല.
  3. കുറഞ്ഞ പച്ച വിഭാഗത്തിന് താഴെയുള്ള വിദേശ തൊഴിലാളികളുടെ സേവനങ്ങൾ കൈമാറാനുള്ള അനുവാദം ലഭ്യമാണ്.
  4. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ ലഭ്യമാകും.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് തങ്ങളുടെ വിദേശ തൊഴിലാളിയുടെ അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വർക്ക് പെർമിറ്റ് പുതുക്കാന്‍ അനുവാദം നല്‍കും.

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (മിഡ് ഗ്രീൻ റേഞ്ച് സ്ഥാപനങ്ങള്‍)

ഇളം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന ആനുകൂല്യങ്ങള്‍ക്ക് പുറമേ മറ്റു ചില ആനുകൂല്യങ്ങള്‍ കൂടി ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം ലഭ്യമാക്കുന്നുണ്ട്.

  1. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ (replacement visa) ലഭ്യമാകും.

കടും പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (ഹൈ ഗ്രീൻ റേഞ്ച് സ്ഥാപനങ്ങള്‍):

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന എല്ലാ ആനുകൂല്യങ്ങളും ലഭ്യമാകുന്നതോടൊപ്പം മറ്റു ചില ആനുകൂല്യങ്ങള്‍ കൂടി ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം ലഭ്യമാക്കിയിട്ടുണ്ട്.

  1. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരം വിസ (replacement visa) ലഭ്യമാക്കും.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

പ്ലാറ്റിനം റേഞ്ച് കമ്പനികൾ:

നിതാഖാത് പദ്ധതി പ്രകാരമുള്ള അഞ്ചു വിഭാഗങ്ങളില്‍ ഏറ്റവും ഉയര്‍ന്ന വിഭാഗമാണ്‌ പ്ലാറ്റിനം വിഭാഗം.

  1. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കം.
  2. വിദേശികളായ തൊഴിലാളികളുടെ പ്രൊഫഷനുകള്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് ഒഴികെ മാറ്റം.
  3. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരമായി വിസ (replacement visa) ലഭ്യമാക്കും.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

സൗദി പൗരന്മാര്‍ക്ക് മിനിമം വേതനം

നിതാഖാത് പദ്ധതി പ്രകാരം വിവിധ വിഭാഗങ്ങളില്‍ ഉള്‍പ്പെടുന്ന സ്ഥാപനങ്ങള്‍ക്ക് വിവിധ തരം ആനുകൂല്യങ്ങളും പരിമിതികളും ലഭ്യമാകുമ്പോള്‍ മുകളില്‍ പറഞ്ഞ പോലെ ഒരു സൗദി പൗരന് നിര്‍ദ്ദിഷ്ട തുക അടിസ്ഥാന ശമ്പളമായി ലഭിക്കുന്നു എന്നതാണ് സ്വദേശി പൗരന്മാരെ സംബന്ധിച്ചിടത്തോളം ഈ പദ്ധതിയുടെ ഹൈലൈറ്റ്. ആനുകൂല്യങ്ങളും പരിമിതികളും സ്ഥാപനങ്ങള്‍ക്ക് ലഭ്യമാകുമ്പോള്‍ തങ്ങളുടെ പൗരന്മാരുടെ ജീവിത നിലവാരം ഉറപ്പു വരുത്തുന്നതിനുള്ള അടിസ്ഥാന ശമ്പളം ഉറപ്പു വരുത്തുന്ന രീതിയാണ് മന്ത്രാലയത്തിന്റെ നിതഖാത് പദ്ധതിയെ സ്വദേശി പൗരന്മാര്‍ക്ക് ഇടയില്‍ ജനപ്രിയമാക്കി തീര്‍ക്കുന്നത്.

നിതാഖാത് പദ്ധതി പ്രകാരം സ്ഥാപനങ്ങള്‍ക്ക് ആനുകൂല്യങ്ങള്‍ ലഭിക്കണമെങ്കില്‍ സ്വകാര്യ സ്ഥാപനത്തില്‍ ജോലി ചെയ്യുന്ന സൗദി പൗരന്റെ അടിസ്ഥാന പ്രതിമാസ ശമ്പളം ഏറ്റവും കുറഞ്ഞത് 4,000 റിയാൽ എന്ന് നിജപ്പെടുത്തിയിട്ടുണ്ട്. മുന്‍പ് ഈ തുക 3000 റിയാൽ ആയിരുന്നു എങ്കിലും വിവധ സാഹചര്യങ്ങള്‍ കണക്കിലെടുത്ത് സമീപ മാസങ്ങളിലാണ് ഈ തുകയില്‍ മന്ത്രാലയം വര്‍ദ്ധന ഏര്‍പ്പെടുത്തിയത്.

എങ്കിലും ഈ നിബന്ധനയില്‍ പ്രത്യക്ഷമായി ചെറിയ തരത്തിലുള്ള ഇളവ് മന്ത്രാലയം നല്‍കുന്നുണ്ട് എങ്കിലും നിതാഖാത് പ്രകാരമുള്ള പൂര്‍ണ്ണമായ ആനുകൂല്യം ലഭിക്കണമെങ്കില്‍ ഈ നിബന്ധന പൂര്‍ണ്ണമായും പാലിക്കണം എന്നത് മിനിമം വേതനതോട് കൂടി സ്വദേശി പൗരന്മാരെ തങ്ങളുടെ സ്ഥാപനങ്ങളില്‍ നിയമിക്കാന്‍ പരോക്ഷമായി സ്വകാര്യ സ്ഥാപനങ്ങളെ നിര്‍ബന്ധിതരാക്കുന്നു.

അതായത് 4000 റിയാലില്‍ കുറവ് ശമ്പളത്തിനും സ്ഥാപനങ്ങള്‍ക്ക് സ്വദേശി തൊഴിലാളികളെ നിയമിക്കാന്‍ അനുവാദമുണ്ട്. അന്നാല്‍ അതിനു ആനുപാതികമായി പദ്ധതിയില്‍ നിന്നും ലഭിക്കുന്ന ആനുകൂല്യങ്ങള്‍ക്കും കുറവുണ്ടാകും. അതായത് 4000 റിയാലിൽ താഴെയുള്ള ശമ്പളം നല്‍കി നിയമിക്കുന്ന ഒരു സ്വദേശി തൊഴിലാളിയെ നിതാഖാത് പദ്ധതി പ്രകാരം പകുതി തൊഴിലി ആയി മാത്രമേ കണക്കാക്കുകയുള്ളൂ.  പാർട്ട് ടൈം തൊഴിലാളികളുടെ കാര്യത്തിലും ഈ നിബന്ധന ബാധകമാണ്. മാസത്തില്‍ 168 മണിക്കൂറിൽ കുറയാത്ത സേവനം പൂർത്തിയാക്കിയ തൊഴിലാളിയെ (ഫ്ലക്സിബിള്‍ അവേഴ്സ്) സൗദി തൊഴിലാളിയുടെ 1/3 ആയി കണക്കാക്കും.

എന്നാല്‍ വികലാംഗരായ സ്വദേശി തൊഴിലാളികളുടെ കാര്യത്തില്‍ വലിയ ഇളവാണ് മന്ത്രാലയം നല്‍കുന്നത്. 4000 റിയാലില്‍ കുറയാത്ത ശമ്പളത്തില്‍ ഒരു സ്വദേശിയായ വികലാംഗ തൊഴിലാളിയെ നിയമിക്കുന്ന സ്ഥാപനങ്ങള്‍ക്ക് നിതാഖാത് പദ്ധതി പ്രകാരമുള്ള ആനുകൂല്യങ്ങള്‍ക്കായി ഒരു തൊഴിലാളിയെ 4 തൊഴിലാളികളായി കണക്കാക്കും. ഇതിലൂടെ അംഗ പരിമിതരായ തങ്ങളുടെ പൗരന്മാരുടെ തൊഴില്‍ ലഭ്യതയും അവര്‍ക്ക് നിര്‍ദ്ദിഷ്ട ജീവിത സാഹചര്യവും ഉറപ്പു വരുത്താന്‍ മന്ത്രാലയത്തിന് നിതാഖാത് പദ്ധതിയിലൂടെ സാധിക്കുന്നു.

 

ഇതൊക്കെയാണ് നിതാഖാത് പദ്ധതിയെ സംബന്ധിച്ചുള്ള ഏറ്റവും പുതിയ വിവരങ്ങള്‍. നിങ്ങളെ സംബന്ധിച്ച് വിസ ഉന്നത തസ്തികയില്‍ ഉള്ളതായതിനാല്‍ കുറച്ച് അപകട സാധ്യതയും ഇല്ലാതില്ല. കാരണം പലപ്പോഴും പ്രധാന തസ്തികകളാണ് സൗദിവല്ക്കരണത്തില്‍ ഉള്‍പ്പെടുത്താറുള്ളത്. വിദേശികള്‍ ധാരാളമായി ജോലി ചെയ്യുന്ന താഴ്ന്ന തസ്തികകള്‍ അധികമായി ഉള്‍പ്പെടുത്താറില്ല. നിങ്ങളുടെ തസ്തിക ഏതാണെന്ന് വ്യക്തമായി ചോദ്യത്തില്‍ ഉള്‍പ്പെടുത്താതിനാല്‍ അതിനെ കുറിച്ച് കൃത്യമായി പറയാനും സാധിക്കില്ല.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ. ലീഡ് പാര്‍ട്ണര്‍, എസ്.കെ അസോസിയേറ്റ്സ്. (ദുബായ്. റിയാദ്. ഡല്‍ഹി. കൊച്ചി)

 

Continue Reading

LATEST

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

Published

on

ഇന്ത്യന്‍ യൂണിയന്‍ മുസ്ലിം ലീഗിന്റെ വിദ്യാര്‍ത്ഥി ഘടകമായ എം.എസ്.എഫിന്റെ പ്രവര്‍ത്തന ചരിത്രത്തില്‍ പുതിയ ഒരധ്യായം എഴുതി ചേര്‍ത്തു കൊണ്ടാണ് കഴിഞ്ഞ ദിവസങ്ങളില്‍ ഡല്‍ഹിയില്‍ വെച്ചു നടന്ന ദേശീയ സമ്മേളനം സമാപിച്ചത്.

സംസ്ഥാന പ്രതിനിധികള്‍, കേന്ദ്ര സര്‍വ്വകലാശാലാ പ്രതിനിധികള്‍, മുസ്‌ലിം ലീഗ് ദേശീയ നേതാക്കള്‍, വിദ്യാര്‍ത്ഥി സംഘടനാ നേതാക്കള്‍, വിദ്യാഭ്യാസ വിചക്ഷണര്‍, ആക്റ്റിവിസ്റ്റുകള്‍ ഉള്‍പ്പടെയുള്ളവര്‍ പങ്കെടുത്ത സമ്മേളനം വന്‍ വിജയമായതോടൊപ്പം തന്നെ എം.എസ്.എഫ് ദേശീയ കമ്മിറ്റിയുടെ പുതിയ ആസ്ഥാനം പ്രവര്‍ത്തനം ആരംഭിക്കുകയും ചെയ്തു.

മുസ്‌ലിംലീഗ് ഉന്നതാധികാര സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങളാണ് പുതിയ ദേശീയ കമ്മിറ്റി ഓഫീസ് ഉദ്ഘാടനം ചെയ്തത്.

വിവിധ സംസ്ഥാനങ്ങളിലും കേന്ദ്ര, സംസ്ഥാന സര്‍വ്വകലാശാലകളിലും പതിറ്റാണ്ടുകളായി എം എസ് എഫിന്റെ പ്രവര്‍ത്തനം നടക്കുന്നുണ്ടങ്കിലും ദേശീയ കമ്മറ്റി യാഥാര്‍ഥ്യമായത് 2016ലാണ്. ദേശീയ തല പ്രവര്‍ത്തനങ്ങള്‍ എകോപിപ്പിക്കുകയും പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുകയും ചെയ്യുക എന്ന ലക്‌ഷ്യം മുന്‍നിറുത്തി 2016 ഡിസംബര്‍ 17 ന് പാലക്കാട് വെച്ചാണ് എം എസ് എഫിന് ഒരു ദേശീയ കമ്മറ്റി രൂപീകരിക്കുന്നത്. തുടര്‍ന്നാണ്‌ പ്രവര്‍ത്തനം ദേശീയ തലത്തിലേക്ക് വ്യാപിപിക്കുന്നത്.

നിലവില്‍ രാജ്യത്തെ 13 സംസ്ഥാനങ്ങളിലും, വിവിധ കേന്ദ്ര- സംസ്ഥാന സര്‍വ്വകലാശാലകളിലും എം എസ് എഫ് പ്രവര്‍ത്തനം സജീവമാണ്. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്കുന്ന മഹത്തായ ദൗത്യമാണ് എം എസ് എഫ് ദേശീയ കമ്മിറ്റി നിര്‍വ്വഹിച്ചു കൊണ്ടിരിക്കുന്നത്.

പൗരത്വ ഭേദഗതി നിയമവും, വിദ്വേഷ പ്രസംഗങ്ങളും, ആള്‍ക്കൂട്ട കൊലപാതകങ്ങളും, വസ്ത്രവിവേചനങ്ങളുമെല്ലാം കൊണ്ട് അപരവത്കരിക്കപ്പെടുന്ന കാലത്ത് വിദ്യാഭ്യാസം കൊണ്ട് കരുത്തരായി മാറുക എന്നതാണ് പ്രതിരോധമാര്‍ഗം. എം എസ് എഫ് ആ ദൗത്യ നിര്‍വ്വഹണത്തിലേക്കാണ് വിദ്യാര്‍ത്ഥികളെ ഉണര്‍ത്തുന്നത്. അതോടൊപ്പം രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലേക്ക് പാര്‍ശ്വവത്കരിക്കപ്പെട്ടിരുന്ന മുസ്‌ലിം വിദ്യാര്‍ഥികള്‍ക്ക് കടന്നു വരാനുള്ള ആത്മവിശ്വാസം സൃഷ്ടിക്കുക എന്ന ദൗത്യവും എം എസ് എഫ് വിജയകരമായി തന്നെ തുടര്‍ന്ന് പോരുകയാണ്.

മുഹമ്മദ്‌ അഷറഫ് എം എസ് എഫ് ദേശീയ കമ്മിറ്റി പ്രസിഡന്റ് ടി.പി. അഷറഫ് അലിയോടൊപ്പം

ന്യൂനപക്ഷ വിഭാഗങ്ങള്‍ക്ക് ഭരണ ഘടന വിഭാവനം ചെയ്തിട്ടുള്ള അവസര സമത്വവും സാമൂഹിക നീതിയും പോലുള്ള അവകാശങ്ങള്‍ നഷ്ടപ്പെടാതിരിക്കാനും അവകാശങ്ങള്‍ ക്രിയാത്മകമായി ഉപയോഗിക്കാനും  സംഘടിതരായി രാഷ്ട്രീയ ശക്തിയായി നിലനിന്ന് അവകാശങ്ങള്‍ക്ക് വേണ്ടി പൊരുതുക എന്നതാണ് വര്‍ത്തമാന കാലഘട്ടത്തില്‍ വിദ്യര്‍ത്ഥി സമൂഹത്തിന്റെയും ആവശ്യം. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്‍കി അത്തരത്തിലുള്ള സംവാദങ്ങള്‍ക്ക് ശക്തി പകരുകയാണ് ‘വിദ്യാഭ്യാസം, വിമോചനം, ശാക്തീകരണം’ എന്ന മുദ്രാവാക്യത്തിലൂടെ എം എസ് എഫ് നിര്‍വ്വഹിക്കുന്നത്.

രാജ്യതലസ്ഥാനത്ത് തന്നെ പുതിയ പുതിയ ദേശീയ കമ്മിറ്റി ഓഫീസ് സ്ഥാപിതമായതോടെ ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കാനും ശക്തിപ്പെടുത്താനും എം എസ് എഫിന് സാധിക്കുമെന്നാണ് പുതിയ നേതൃത്വം കരുതുന്നത്. അതോടൊപ്പം തന്നെ ഇന്ത്യയിലെ മുസ്‌ലിം സമുദായത്തിന് വരും കാലത്തേക്കുള്ള നേതൃത്വത്തെ വളര്‍ത്തിയെടുക്കുകയെന്ന ദൗത്യം നിര്‍വ്വഹിക്കാനും എം എസ് എഫ് ദേശീയ കമ്മിറ്റിക്ക് സാധിക്കുമെന്നും നേതൃത്വം പ്രത്യാശിക്കുന്നു.

മുഹമ്മദ്‌ അഷറഫ്  

ന്യൂ ഡല്‍ഹി.

 

Continue Reading
LATEST5 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST5 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST6 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST7 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST7 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST8 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST8 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST8 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST8 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST8 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST8 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST8 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!