Connect with us

LATEST

ഇഖാമയുമായി ബന്ധപ്പെട്ട് സൗദി പ്രവാസികള്‍ സാധാരണയായി അഭിമുഖീകരിക്കുന്ന 26 പ്രശ്നങ്ങളും പ്രതിവിധികളും

Published

on

സൗദി അറേബ്യയിലെ സാധാരണക്കാരായ പ്രവാസികളുടെ ഇഖാമയുമായി ബന്ധപ്പെട്ട് ഞങ്ങള്‍ക്ക് ലഭിച്ച ചോദ്യങ്ങളില്‍ നിന്നും ഏറ്റവും കൂടുതല്‍ പേരെ ബാധിക്കുന്ന പൊതുവായ 26 ചോദ്യങ്ങള്‍ക്ക് ഇവിടെ ഉത്തരം നല്‍കുന്നു.

1. ഫൈനല്‍ എക്സിറ്റില്‍ പോകുമ്പോള്‍ ഇഖാമ എന്താണ് ചെയ്യേണ്ടത്?

ഫൈനല്‍ എക്സിറ്റില്‍ തിരിച്ചു പോകുന്ന വിദേശിയുടെ ഇഖാമ മറ്റാരെങ്കിലും ദുരുപയോഗം ചെയ്യാതിരിക്കുക എന്നത് വളരെ പ്രധാനമാണ്. വിദേശ തൊഴിലാളിയുടെ ഇഖാമ തൊഴിലുടമയുടെ ഉത്തരവാദിത്തവുമാണ്. വിദേശ തൊഴിലാളി തൊഴില്‍ കരാര്‍ അവസാനിപ്പിച്ച ശേഷം ഫൈനല്‍ എക്സിറ്റില്‍ നാട്ടിലേക്ക് മടങ്ങുമ്പോള്‍ ഇഖാമ തൊഴിലുടമയെ ഏല്‍പ്പിക്കണമെന്നാണ് ജവാസാതിന്റെ നിര്‍ദ്ദേശം. തൊഴിലുടമ വിദേശികള്‍ രാജ്യം വിട്ട ശേഷം ആ ഇഖാമ നശിപ്പിക്കുകയോ ജവാസാത്ത് ഡയറക്ടറേറ്റിൽ ഏൽപിക്കുകയോ വേണം.

സ്പോണ്‍സറെ ഏല്‍പ്പിക്കാന്‍ സാധിക്കാത്ത ഏതെങ്കിലും സാഹചര്യത്തില്‍ വിമാനത്താവളങ്ങളിലെ ജവാസാത്ത് വിഭാഗത്തിലും ഏല്‍പിക്കാവുന്നതാണ്. തര്‍ഹീല്‍ വഴി ഫൈനല്‍ എക്‌സിറ്റിന് അപേക്ഷിക്കുമ്പോള്‍ ഒറിജിനല്‍ ഇഖാമ അവിടെ നല്‍കേണ്ടി വരും. ആശ്രിത വിസയില്‍ ഉള്ളവരാണെങ്കില്‍ രക്ഷിതാക്കളെ ഏല്‍പ്പിക്കാം. ഇതൊന്നും ചെയ്യാതെ ഇഖാമയുമായി നാട്ടിലേക്ക് പോകുന്നവരും ഉണ്ട്.

ഏതു സാഹചര്യത്തില്‍ ആണെങ്കിലും നിങ്ങളുടെ ഇഖാമ നിങ്ങള്‍ ഫൈനല്‍ എക്സിറ്റില്‍ പോയതിന് ശേഷം മറ്റൊരാള്‍ ദുരുപയോഗം ചെയ്യാത്ത വിധത്തിലാക്കുന്ന സാഹചര്യം ഒഴിവാക്കുക.

2. രാജ്യത്ത് ബാങ്കില്‍ ഇടപാടുകൾ നടത്തുന്നതിനായി ഡിജിറ്റൽ ഇഖാമ കാണിച്ചാല്‍ മതിയാകുമോ?

മതിയാകും. ഇത് സംബന്ധിച്ച സര്‍ക്കുലര്‍ വ്യാഴാഴ്ചയാണ് സൗദി സെന്‍ട്രല്‍ ബാങ്ക് പുറത്തിറക്കിയത്. ഇത് പ്രകാരം ബാങ്ക് ഇടപാടുകള്‍ക്ക് ഇഖാമ കാർഡിന് പകരമായി ഡിജിറ്റൽ ഇഖാമ കാണിച്ചാല്‍ മതി. അബ്ഷീർ ആപ്ലിക്കേഷനിലെ ഡിജിറ്റൽ പതിപ്പ് രേഖയായി കാണിച്ച് ഇടപാടുകൾ നടത്താവുന്നതാണ്. ഈ സര്‍ക്കുലര്‍ എല്ലാ ബാങ്കുകൾക്കും കേന്ദ്ര ബാങ്കിന് കീഴില്‍ വരുന്ന സാമ്പത്തിക സ്ഥാപനങ്ങള്‍ക്കും ഇതിനകം നല്‍കി കഴിഞ്ഞു.

3. ഇഖാമ കാലാവധി തീരുന്നതിന് എത്ര ദിവസം മുന്‍പാണ് ഇഖാമ പുതുക്കേണ്ടത്?

സൗദിയിൽ മുന്‍പ് ഇഖാമ കാലാവധി തീർന്ന് മൂന്നു ദിവസം വരെ സമയം അനുവദിച്ചിരുന്നു. ആ മൂന്ന് ദിവസം വരെ ഇഖാമ പുതുക്കാൻ പിഴ ഈടാക്കിയിരുന്നില്ല. എന്നാല്‍ ഈ നിയമത്തില്‍ ഇപ്പോള്‍ മാറ്റം വരുത്തിയിട്ടുണ്ട്. ഇപ്പോള്‍ ഇഖാമ കാലാവധി തീരുന്നതിന് മൂന്നു ദിവസം മുമ്പേ ഇഖാമ പുതുക്കണമെന്നാണ് ജവാസാത് നിര്‍ദ്ദേശം നല്‍കിയിട്ടുള്ളത്.

4. സൗദിയില്‍ ഡിജിറ്റല്‍ ഇഖാമ ഏതു സമയവും കൈവശം സൂക്ഷിക്കേണ്ടത് നിര്‍ബന്ധമാണോ?

ഒറിജിനൽ ഇഖാമ കാർഡ് കൈവശം ഇല്ലെങ്കിലും ഡിജിറ്റൽ ഐഡി ഉണ്ടായാൽ ഇഖാമ കയ്യിൽ കരുതാത്തതിനുള്ള പിഴയിൽ നിന്ന് ഒഴിവാകാം. ഒറിജിനൽ ഇഖാമ കാർഡ് കൈവശം വയ്ക്കാത്ത സാഹചര്യത്തിൽ കാർഡ് ഉടമക്ക് തന്റെ ഐഡന്റിറ്റി തെളിയിക്കുന്നതിനുള്ള നടപടിക്രമങ്ങൾക്ക് ഡിജിറ്റൽ ഐഡി മതിയാകുമെന്ന് ജവാസാത്ത് വ്യക്തമാക്കിയിട്ടുണ്ട്.

വിദേശ തൊഴിലാളികള്‍ക്ക് ലഭ്യമാക്കിയിരിക്കുന്ന ഡിജിറ്റല്‍ ഇഖാമയില്‍ നിന്നും പ്രസ്തുത തൊഴിലാളിയെ സംബന്ധിച്ചുള്ള മുഴുവന്‍ വിവരങ്ങളും അധികൃതര്‍ക്ക് ഞൊടിയിടയില്‍ ലഭ്യമാകും.

5. പുതിയ തൊഴില്‍ വിസയില്‍ സൗദിയില്‍ എത്തിയാല്‍ പഴയ ഡ്രൈവിംഗ് ലൈസന്‍സ് പുതിയ ഇഖാമയിലേക്ക് മാറ്റാന്‍ സാധിക്കുമോ?

സൗദിയില്‍ ഡ്രൈവിംഗ് ലൈസന്‍സ് ഉള്ളവര്‍ വീണ്ടും പുതിയ വിസയില്‍ തിരിച്ചെത്തിയാല്‍ പുതിയ ഡ്രൈവിംഗ് ലൈസന്‍സ് എടുക്കേണ്ടതില്ല. പഴയ ഡ്രൈവിംഗ് ലൈസന്‍സ് പുതിയ ഇഖാമയിലേക്ക് മാറ്റാന്‍ സാധിക്കും. ഇതിനായി ഡ്രൈവിംഗ് ലൈസന്‍സിലെ പഴയ ഇഖാമ നമ്പര്‍ മാറ്റി പുതിയ ഇഖാമ നമ്പര്‍ ചേര്‍ത്താല്‍ മതി.

ഡ്രൈവിംഗ് ലൈസൻസിലെ പഴയ ഇഖാമ നമ്പർ മാറ്റാൻ പുതിയ വിസയില്‍ എത്തുന്ന വിദേശി പ്രത്യേക അപേക്ഷ സമർപ്പിക്കേണ്ടതുണ്ട്. ഇതിനായി ഡ്രൈവിംഗ് സ്‌കൂളിലെ ട്രാഫിക് വിഭാഗത്തെ സമീപിച്ച് അപേക്ഷ നല്‍കിയാല്‍ പുതിയ ഇഖാമ നമ്പർ രേഖപ്പെടുത്തിയ ഡ്രൈവിംഗ് ലൈസൻസ് അനുവദിക്കും.

6. സൗദിയില്‍ നിലവില്‍ വന്ന പുതിയ തൊഴില്‍ നിയമ ഭേദഗതികള്‍ പ്രകാരം തൊഴിലാളിയുടെ ഇഖാമ, വര്‍ക്ക്‌ പെര്‍മിറ്റ്‌ എന്നിവയുടെ ചിലവുകള്‍ വഹിക്കേണ്ടത് ആരാണ്?

പുതിയ ഭേദഗതിയിലും ഇക്കാര്യത്തില്‍ മാറ്റം വന്നിട്ടില്ല. പഴയത് പോലെ തന്നെ തൊഴിലാളിയുടെ ഇഖാമ, വർക്ക് പെർമിറ്റ് എന്നിവക്കുള്ള ഫീസുകൾ വഹിക്കേണ്ടത് തൊഴിലുടമയുടെ ഉത്തരവാദിത്തമാണ്.

ഫീസുകൾ തൊഴിലാളിയുടെ ഉത്തരവാദിത്തമല്ല. പുതിയ പരിഷ്‌കാരങ്ങൾ നല്‍കുന്ന ആനുകൂല്യങ്ങൾ ഉപയോഗപ്പെടുത്തി വിദേശ തൊഴിലാളി സ്പോണ്സര്‍ഷിപ്പ് മാറുന്ന അവസരത്തിലും ഇഖാമ, വർക്ക് പെർമിറ്റ് ഫീസുകൾ വഹിക്കേണ്ടത് പുതിയ തൊഴിലുടമയാണ്.

കൂടാതെ ഇഖാമയും വർക്ക് പെർമിറ്റും പുതുക്കാൻ ഏതെങ്കിലും കാരണവശാല്‍ തടസ്സം നേരിട്ടാല്‍ അത് മൂലം ഉണ്ടാകുന്ന പിഴകളും വഹിക്കേണ്ടത് തൊഴിലുടമയാണ്.

7. ഇഖാമ ഇല്ലാത്തവരെ സഹായിക്കുന്നവര്‍ക്കുള്ള പുതിയ ശിക്ഷാ വിധികളുടെ വിശദാംശങ്ങള്‍ എന്തൊക്കെയാണ്?

രാജ്യത്ത് അനധികൃത താമസക്കാര്‍ക്കും നിയമ ലംഘകര്‍ക്കും സഹായം നല്‍കുന്നവര്‍ക്ക് ശിക്ഷ പുതിയ നിയമ പ്രകാരം അതികര്‍ശനമാക്കിയിട്ടുണ്ട്. നുഴഞ്ഞുകയറ്റക്കാരായ നിയമലംഘകര്‍ക്ക് യാത്രാ സൗകര്യം , ജോലി , താമസസൗകര്യം, യാത്ര തുടങ്ങിയ സഹായങ്ങള്‍ നല്‍കുന്നവര്‍ക്കാണ് ശിക്ഷ ലഭിക്കുക. അഞ്ചു വര്‍ഷം മുതല്‍ പതിനഞ്ചു വര്‍ഷം വരെ തടവും പത്തു ലക്ഷം റിയാല്‍ വരെ പിഴയുമാണ് ലഭിക്കുക. കൂടാതെ യാത്രാ സൗകര്യം നല്‍കാന്‍ ഉപയോഗിക്കുന്ന വാഹനങ്ങളും താമസസൗകര്യം നല്‍കാന്‍ ഉപയോഗിക്കുന്ന പാര്‍പ്പിടങ്ങളും കണ്ടുകെട്ടുകയും ചെയ്യും. വാഹനങ്ങളും പാര്‍പ്പിടങ്ങളും മറ്റുള്ളവരുടെ ഉടമസ്ഥതയിലുള്ളതാണെങ്കില്‍ പത്തു ലക്ഷം റിയാലില്‍ കവിയാത്ത തുക നിയമ ലംഘകര്‍ക്ക് പിഴ ചുമത്തും.

അനധികൃത കുടിയേറ്റക്കാര്‍ക്ക് സഹായസൗകര്യങ്ങള്‍ നല്‍കുന്ന വിദേശികളെ സൗദിയില്‍ നിന്ന് നാടുകടത്തുകയും ചെയ്യും. ഇത്തരം കേസുകളില്‍ പബ്ലിക് പ്രോസിക്യൂഷനാണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിക്കുക. ക്രിമിനല്‍ കോടതികളാണ് പരിഗണിക്കുക. 15 ദിവസത്തിനു ശേഷം പുതിയ തീരുമാനം പ്രാബല്യത്തില്‍വരും. ഇതിനു മുമ്പായി അനധികൃത താമസക്കാരെ പിടികൂടാന്‍ സഹായിക്കുന്ന വിവരങ്ങള്‍ നല്‍കുന്നവര്‍ക്ക്  പുതിയ തീരുമാനം അനുസരിച്ചുള്ള ശിക്ഷകളില്‍നിന്ന് ഒഴിവാക്കും.

8. ഇപ്പോള്‍ സൗദിയിലുള്ള എനിക്ക് നാട്ടിലുള്ള എന്റെ കുടുംബാംഗങ്ങളുടെ ഇഖാമ പുതുക്കാന്‍ സാധിക്കുമോ?

പുതുക്കാന്‍ സാധിക്കും. കുടുംബനാഥന്‍ സൗദിക്കകത്ത് ഉണ്ടായാല്‍ മതി. സ്പോണ്‍സറായ കുടുംബനാഥന്‍ സൗദിയില്‍ ഉണ്ടെങ്കില്‍ ആശ്രിത വിസയിലുള്ള കുടുംബാംഗങ്ങള്‍ വിദേശത്താണെങ്കിലും  ഇഖാമ പുതുക്കാന്‍ സാധിക്കും.

9. റീ എന്‍ട്രി വിസയില്‍ പോയി തിരിച്ചെത്താത്ത ആശ്രിതര്‍ക്ക് പ്രവേശന വിലക്ക് ബാധകമാണോ?

റീ-എന്‍ട്രി വിസയില്‍ സൗദി അറേബ്യയില്‍ നിന്ന് പുറത്തുപോയ ശേഷം വിസാ കാലാവധി അവസാനിക്കുന്നതിനു മുമ്പ് തിരിച്ചെത്താത്തതു മൂലമുള്ള പ്രവേശന വിലക്ക് ആശ്രിത വിസക്കാര്‍ക്ക് ബാധമല്ലെന്ന് ജവാസാത്ത് ഡയറക്ടറേറ്റ് വ്യക്തമാക്കിയിട്ടുണ്ട്.

റീ-എന്‍ട്രി വിസയില്‍ രാജ്യം വിട്ട ശേഷം വിസാ കാലാവധിക്കുള്ളില്‍ തിരിച്ചെത്താത്ത വിദേശ തൊഴിലാളികള്‍ക്ക് മൂന്നു വര്‍ഷ വിലക്ക് ബാധകമാണ്. (ഒരു വിദേശ തൊഴിലാളി നാട്ടിലേക്ക് ജോലി അവസാനിപ്പിച്ചു തിരിച്ചു പോകേണ്ടത് തൊഴില്‍ നിയമ പ്രകാരമുള്ള എല്ലാ നടപടി ക്രമങ്ങളും പാലിച്ച് ഫൈനല്‍ എക്സിറ്റ് വിസയിലാണ്. റീ എന്‍ട്രി വിസയില്‍ നാട്ടില്‍ പോയി തിരിച്ചു വരാതിരിക്കുന്നത് തൊഴില്‍ കരാര്‍ ലംഘനമാണ്.  മാര്‍ച്ച് 14 ന് നിലവില്‍ വന്ന പുതിയ സ്പോണ്‍സര്‍ഷിപ്പ് നിയമത്തില്‍ തൊഴില്‍ കരാര്‍ ലംഘിക്കുന്ന വിദേശ തൊഴിലാളികള്‍ക്ക് ആജീവനാന്ത വിലക്ക് ഏര്‍പ്പെടുത്തുമെന്ന് വ്യവസ്ഥ ഉണ്ട് എങ്കിലും ഈ വിഷയത്തില്‍ ജവാസാത് ഡയറക്ടറേറ്റ് പഴയ വ്യവസ്ഥ തന്നെയാണ് നിലവിലും പിന്തുടരുന്നത്)  മൂന്നു കൊല്ലം പിന്നിടാതെ പുതിയ വിസയില്‍ വീണ്ടും രാജ്യത്ത് പ്രവേശിക്കാന്‍ ഇവര്‍ക്ക് സാധിക്കില്ല. എന്നാല്‍ പഴയ തൊഴിലുടമക്ക് കീഴില്‍ ജോലി ചെയ്യുന്നതിന് പുതിയ വിസയില്‍ രാജ്യത്ത് വീണ്ടും പ്രവേശിക്കുന്നതിന് ഇവര്‍ക്ക് വിലക്ക് ബാധകമല്ല.

10. എന്റെ ഇഖാമയിലെ പ്രൊഫഷന്‍ മാറുന്നതിനുള്ള നടപടി ക്രമങ്ങള്‍ക്ക്‌ സ്പോണ്‍സര്‍ക്ക് അസൗകര്യം ഉള്ളത് മൂലം ഞാന്‍ ജവാസാതില്‍ നേരിട്ട് പോയാല്‍ മാറ്റി കിട്ടുമോ?

സ്വകാര്യ മേഖലയിലെ വിദേശികളായ തൊഴിലാളികളുടെ പ്രൊഫഷൻ മാറുന്ന ചുമതല ജവാസാതിന്റെതല്ല. തൊഴിൽ, സാമൂഹിക വികസന മന്ത്രാലയത്തിനാണ് ഇതുമായി ബന്ധപ്പെട്ട തീരുമാനങ്ങളെടുക്കുക. മന്ത്രാലയത്തിന്റെ ലേബര്‍ ഓഫീസുകളില്‍ നിന്ന് ലഭിക്കുന്ന നിർദേശങ്ങൾ പ്രാബല്യത്തിലാക്കുക മാത്രമാണ് ജവാസാത്ത് ചെയ്യുന്നത്.

11. ഹൗസ് ഡ്രൈവര്‍ തുടങ്ങിയ ഗാര്‍ഹിക തൊഴിലാളികള്‍ക്ക് ഇഖാമ മൂന്ന് മാസത്തേക്ക് മാത്രമായി പുതുക്കാന്‍ സാധിക്കുമോ?

ഹൗസ് ഡ്രൈവർ, ഹൗസ് മെയ്ഡ് തുടങ്ങി വീട്ടുജോലി വിസയിലുള്ളവർക്ക് മറ്റു തൊഴിലാളികളെ പോലെ ഇഖാമ മൂന്ന് മാസത്തേക്കോ ആറു മാസത്തേക്കോ ആയി പുതുക്കാന്‍ സാധിക്കില്ല. ഗാർഹിക തൊഴിലാളികൾ തൊഴില്‍ നിയമത്തില്‍ ഉൾപ്പെടാത്തതും ലെവിയിൽ നിന്ന് അവർ ഒഴിവാണ് എന്നതും തന്നെയാണ് കാരണം.

12. അബ്ശിര്‍ വഴി ഇഖാമ പുതുക്കുന്നതിന് പാസ്പോര്‍ട്ട് കാലാവധി നിര്‍ബന്ധമാണോ? മറ്റു നിബന്ധനകള്‍ എന്തൊക്കെയാണ്?

നിര്‍ബന്ധമാണ്‌. കൂടാതെ കാലാവധിയുള്ള ഹെല്‍ത്ത് ഇന്‍ഷുറന്‍സം ഉണ്ടായിരിക്കണം. തൊഴിലാളിയുടെ പേരില്‍ ഗതാഗത നിയമ ലംഘനങ്ങള്‍ക്ക് ചുമത്തിയ പിഴകള്‍ ഉണ്ടായിരിക്കരുത്, തൊഴിലാളിയുടെ ആശ്രിത വിസയില്‍ 21 വയസും അതില്‍ കൂടുതലും പ്രായമുള്ള ആണ്‍മക്കള്‍ ഉണ്ടായിരിക്കരുത് എന്നതും ഓണ്‍ലൈന്‍ വഴി ഇഖാമ പുതുക്കാനുള്ള നിബന്ധനകളാണ്. തൊഴിലാളി സൗദി അറേബ്യക്കകത്ത് ഉണ്ടായിരിക്കുകയും ഹുറൂബ് സ്റ്റാറ്റസ് ഇല്ലാത്ത ആളായിരിക്കുകയും വേണം.

13. എന്റെ മകളുടെ പാസ്പോര്‍ട്ട് കാലാവധി അവസാനിച്ചിരിക്കുകയാണ്. ഈ സാഹചര്യത്തില്‍ എന്റെ ഇഖാമ പുതുക്കാന്‍ സാധിക്കുമോ?

ആശ്രിതരില്‍ ഒരാളുടെ പാസ്‌പോര്‍ട്ട് കാലാവധി അവസാനിച്ചാലും സ്പോണ്‍സറായ കുടുംബനാഥന്റെ ഇഖാമ പുതുക്കുന്നതിന് തടസ്സം ഉണ്ടാവില്ല. കുടുംബ നാഥന്റെ ഇഖമയില്‍ കാലാവധി ഉണ്ടെങ്കില്‍ ഇഖാമ പുതുക്കാന്‍ തടസ്സങ്ങളില്ല.

14. ഞാന്‍ ഫൈനല്‍ എക്സിറ്റില്‍ നാട്ടിലേക്ക് പോകാനിരിക്കുകയാണ്. സ്പോണ്‍സര്‍ ഞാന്‍ ജോലി ചെയ്യുന്ന സ്ഥലത്ത് നിന്നും വളരെ അകലെയാണ്. ഒറിജിനല്‍ ഇഖാമ സ്പോണ്‍സറെ തിരിച്ചേല്‍പ്പിച്ചാല്‍ പരിശോധനയില്‍ പകരമായി പാസ്പോര്‍ട്ട് കാണിച്ചു കൊടുത്താല്‍ മതിയാകുമോ?

ഡിജിറ്റല്‍ ഇഖാമ കാണിച്ചു കൊടുത്താല്‍ മതിയാകും. എന്നാല്‍ അതിനു പകരമായി പാസ്പാര്‍ട്ട്, എക്‌സിറ്റ് റീ എന്‍ട്രി വിസ തുടങ്ങിയവ പരിശോധന നടത്തുന്ന ഉദ്യോഗസ്ഥര്‍ സ്വീകരിക്കില്ല.

15. സൗദി അറേബ്യയിൽ വിദേശ ജോലിക്കാരുടെ ഇഖാമ മൂന്നുമാസത്തേക്ക് മാത്രമായി പുതുക്കാന്‍ സാധിക്കുമോ?

വിദേശ ജോലിക്കാരുടെ ഇഖാമ മൂന്ന് മാസത്തേക്ക് മാത്രമായി എടുക്കാനും പുതുക്കാനും സാധിക്കുന്ന പുതിയ നിയമത്തിന് 26.01.2021 ന് സൽമാൻ രാജാവിന്‍റെ അധ്യക്ഷതയിൽ ചേർന്ന മന്ത്രിസഭാ യോഗം അംഗീകാരം നൽകിട്ടുണ്ട് എങ്കിലും അപേക്ഷിക്കുന്ന പലര്‍ക്കും സാധിക്കുന്നില്ല. അടുത്തു തന്നെ നടപടി ക്രമങ്ങള്‍ പൂര്‍ത്തിയാകും എന്ന് കരുതുന്നു.

ഇത് പ്രകാരം ഇഖാമ ഫീസും ലെവിയും ഒരു വർഷത്തേക്ക് മൊത്തമായി അടക്കാതെ മൂന്ന് മാസമോ ആറുമാസമോ ആയ ഗഡുക്കളായി അടച്ച് അത്രയും കാലളവിലേക്ക് മാത്രമായി എടുക്കാനോ പുതുക്കാനോ സാധിക്കും.

16. എന്റെ പേരിലുള്ള മെഡിക്കല്‍ ഇന്‍ഷുറന്‍സ് കാര്‍ഡ് ഇഖാമ ഇല്ലാത്ത എന്റെ സുഹൃത്തിന് വേണ്ടിയും ചില സാഹചര്യങ്ങളില്‍ ഉപയോഗിക്കുന്നുണ്ട്. ഇഖാമയില്‍ എന്റെ മുഖ സാദൃശ്യം ഉള്ളത് കൊണ്ടും ഫോട്ടോ വ്യക്തമാവാത്തത് കൊണ്ടുമാണ് ഉപയോഗിക്കാന്‍ സാധിക്കുന്നത്. ഇങ്ങിനെ ഉപയോഗിക്കുന്നത് കൊണ്ട് എന്തെങ്കിലും കുഴപ്പമുണ്ടോ?

ഓരോ ഇന്‍ഷുറന്‍സ് കമ്പനിയും ഒരു വ്യക്തിക്ക് അനുവദിച്ചു നല്‍കുന്ന ഇന്‍ഷുറന്‍സ് കാര്‍ഡുകള്‍ ആ വ്യക്തികള്‍ക്ക് മാത്രമേ ഉപയോഗിക്കാന്‍ അനുവാദമുള്ളൂ. മെഡിക്കല്‍ ഇന്‍ഷുറന്‍സ് കാര്‍ഡുകള്‍ ദുരുപയോഗപ്പെടുത്തുന്നത് നിയമ ലംഘനമാണ്. ആള്‍ മാറാട്ട കുറ്റവും ആണ്. പിടിക്കപ്പെട്ടാല്‍ കൗണ്‍സില്‍ ഓഫ് കോഓപ്പറേറ്റീവ് ഇന്‍ഷുറന്‍സ് (CCHI) ആ കാര്‍ഡ് ഉടമക്ക് അവരുടെ ഇഖാമ നമ്പറില്‍ വിലക്ക് ഏര്‍പ്പെടുത്തും. ഇങ്ങിനെ വിലക്ക് ഏര്‍പ്പെടുത്തിയാല്‍ പിന്നീട് ഇന്‍ഷുറന്‍സ് കമ്പനികള്‍ക്ക് പിന്നീട് അതേ ഇഖാമയില്‍ പുതിയ പോളിസി നല്‍കാനോ പഴയത് പുതുക്കാനോ സാധിക്കില്ല. ഇഖാമ പുതുക്കണമെങ്കില്‍ ഇന്‍ഷുറന്‍സ് നിര്‍ബന്ധമാണ്‌ എന്നതിനാല്‍ ഇഖാമ പുതുക്കാനും തടസ്സം നേരിടും.

17. എന്റെ ഇഖാമയിലെ കാലാവധി തീരാറായിട്ടുണ്ട്. എനിക്ക് ഫൈനല്‍ എക്സിറ്റ് വിസ ലഭിച്ചാല്‍ ഇഖാമ കാലാവധി അവസാനിക്കുന്നതിന് മുന്‍പായി സൗദിയില്‍ നിന്നും പുറത്ത് പോകണോ?

ഒരിക്കല്‍ ഫൈനൽ എക്‌സിറ്റ് വിസ ലഭിച്ചാല്‍ അതിനു ശേഷം അയാളുടെ ഇഖാമയുടെ കാലാവധി പരിഗണിക്കില്ല. ഫൈനൽ എക്‌സിറ്റ് വിസയുടെ കാലാവധിയായ 60 ദിവസത്തിനുള്ളില്‍ രാജ്യം വിട്ടാല്‍ മതി. ഈ കാലാവധിക്കുള്ളില്‍ ഇഖാമ കാലാവധി അവസാനിക്കുന്നത് പ്രശ്നമാവില്ല.

18. എനിക്ക് ഫൈനല്‍ എക്സിറ്റ് വിസ ലഭിച്ചിട്ടുണ്ട്. എന്റെ ഇഖാമയില്‍ മൂന്ന് മാസം കൂടി ബാക്കിയുണ്ട്. എനിക്ക് ഇഖാമ കാലാവധി കഴിയുന്നത് വരെ സൗദിയില്‍ തുടരാന്‍ സാധിക്കുമോ?

സാധിക്കില്ല. ഫൈനല്‍ എക്സിറ്റ് വിസ ലഭിച്ചതിനു ശേഷം 60 ദിവസത്തിനുള്ളില്‍ രാജ്യം വിടണം. ഇഖാമയില്‍ അതില്‍ കൂടുതല്‍ കാലാവധി ഉണ്ടെങ്കിലും ഫൈനല്‍ എക്സിറ്റ് വിസ ലഭിച്ചതിന് ശേഷം 60 ദിവസത്തില്‍ കൂടുതല്‍ രാജ്യത്ത് താങ്ങാന്‍ അനുവാദമില്ല.

19. എന്റെ ഫാമിലി വിസയിലുള്ള കുടുംബത്തിലെ ഒരു അംഗം നാട്ടിലാണ്. അടുത്ത ദിവസങ്ങളില്‍ ഞാന്‍ ഫൈനല്‍ എക്സിറ്റ് വിസ എടുക്കുകയാണ്. ഈ അവസരത്തില്‍ നാട്ടില്‍ ഇല്ലാത്ത എന്റെ ആശ്രിതന്റെ കാര്യത്തില്‍ എന്താണ് ചെയ്യേണ്ടത്?

സ്പോണ്‍സറായ കുടുംബനാഥന്റെ ഫൈനൽ എക്‌സിറ്റ് വിസ ആശ്രിതർക്കും ബാധകമാണ്. കുടുംബനാഥനു ഫൈനൽ എക്‌സിറ്റ് വിസ ലഭിച്ചാല്‍ അത് ആശ്രിതർക്കും ബാധകമാണ്. കുടുംബ വിസയിലുള്ള എല്ലാവര്‍ക്കും അത് ഫൈനൽ എക്‌സിറ്റ് ആയി കണക്കാക്കപ്പെടും എന്നതിനാല്‍ ഓരോ ആശ്രിതര്‍ക്കും പ്രത്യേകമായി ഫൈനൽ എക്‌സിറ്റ് വിസ എടുക്കേണ്ടതില്ല.

20. എന്റെ കുടുംബത്തിന് തരിച്ചു പോകാനായി ഫൈനല്‍ എക്സിറ്റ് വിസ അടിച്ചിരിക്കുകയാണ്. 60 ദിവസം കൂടി കഴിയാന്‍ അനുവാദം ഉള്ളതിനാല്‍ മൂന്നഴ്ച്ചക്ക് ശേഷമാണ് അവരുടെ യാത്ര തീരുമാനിച്ചിട്ടുള്ളത്. എന്റെ ഇഖാമ അടുത്ത ആഴ്ച അവസാനിക്കും. ഇത് അവരുടെ യാത്രയെ ബാധിക്കുമോ?

കുടുംബത്തെ ഫൈനല്‍ എക്സിറ്റില്‍ നാട്ടിലേക്ക് അയക്കാന്‍ തീരുമാനിച്ച് ഫൈനല്‍ എക്സിറ്റ് വിസ അടിച്ചിട്ടുണ്ടെങ്കില്‍ സ്പോണ്‍സറായ നിങ്ങളുടെ ഇഖാമ പുതുക്കുന്നതിന് മുന്‍പായി ആശ്രിത വിസയില്‍ ഉള്ളവരെ നാട്ടിലേക്ക് പറഞ്ഞയക്കെണ്ടതുണ്ട്.  നിങ്ങളുടെ ഇഖാമ പുതുക്കുന്ന സമയത്ത് അവര്‍ സൗദിയില്‍ ഉണ്ടെങ്കില്‍ കുടുംബത്തിന്റെ കൂടി ലെവിയും മറ്റു ചിലവുകളും നല്‍കേണ്ടി വരും.

21. ഇഖാമ കാലാവധി അവസാനിച്ചാലും മെഡിക്കല്‍ ഇന്‍ഷുറന്‍സ് കാര്‍ഡ് ഉപയോഗിക്കാന്‍ സാധിക്കുമോ?

ഇല്ല. ഇഖാമയില്‍ കാലാവധി ഉണ്ടെങ്കില്‍ മാത്രമേ വിദേശികള്‍ക്ക് മെഡിക്കല്‍ ഇന്‍ഷുറന്‍സ് ആനുകൂല്യങ്ങള്‍ ലഭിക്കാന്‍ അര്‍ഹത ഉണ്ടാവുകയുള്ളൂ. ഇഖാമ കാലാവധി അവസാനിച്ചാല്‍ മെഡിക്കല്‍ ഇന്‍ഷുറന്‍സ് കാര്‍ഡ് ഉപയോഗിക്കാന്‍ അനുവദിക്കില്ല. വിവരങ്ങള്‍ രജിസ്റ്റര്‍ ചെയ്യുന്ന സമയത്ത് തന്നെ ഇഖാമ കാലാവധി ഇല്ലെങ്കില്‍ കാര്‍ഡ് നിരസിക്കപ്പെടും.

22. ഞാന്‍ എട്ടു മാസമായി സൗദിയില്‍ എത്തിയിട്ട്. ഇതുവരെ എനിക്ക് ഇഖാമ എടുത്തു തന്നിട്ടില്ല. എനിക്ക് ഇഖാമയില്ലാതെ ഫൈനല്‍ എക്സിറ്റില്‍ പോകാന്‍ സാധിക്കുമോ?

സൗദിയില്‍ എത്തിയിട്ട് എട്ടു മാസമായതിനാല്‍ ഫൈനല്‍ എക്സിറ്റില്‍ തിരിച്ചു പോകാന്‍ ഇഖാമ നിര്‍ബന്ധമാണ്‌. സൗദിയിൽ പ്രവേശിച്ച് 90 ദിവസം കഴിഞ്ഞാല്‍ അതിനു ശേഷം ഫൈനൽ എക്‌സിറ്റ് വിസ ലഭിക്കാന്‍ വിദേശ തൊഴിലാളിക്ക് ഇഖാമ നിര്‍ബന്ധമാണ്‌.

23. ഞാന്‍ സൗദിയില്‍ എത്തിയിട്ട് രണ്ടു മാസം പൂര്‍ത്തിയാകുന്നു. കരാര്‍ പ്രകാരം മൂന്ന് മാസമാണ് പ്രൊബേഷന്‍ കാലാവധി. പക്ഷെ എനിക്ക് ഈ ജോലിയില്‍ താല്‍പ്പര്യമില്ല. എനിക്ക് ഇഖാമ ഇല്ലാത്തതിനാല്‍ ഈ ഘട്ടത്തില്‍ ഫൈനല്‍ എക്സിറ്റില്‍ നാട്ടിലേക്ക് പോകുന്നതിനു തടസ്സം ഉണ്ടാകുമോ?

തടസ്സം ഉണ്ടാകില്ല. നിങ്ങള്‍ സൗദിയില്‍ പ്രവേശിച്ചത് മുതലുള്ള 90 ദിവസം പ്രൊബേഷന്‍ കാലാവധി ആയി കണക്കാക്കും എന്നതിനാല്‍ ഇഖാമ നിര്‍ബന്ധമല്ല. അതിനാല്‍ ഈ കാലാവധിക്കുള്ളില്‍ തിരിച്ചു പോകാന്‍ ഫൈനല്‍ എക്സിറ്റ് ലഭിക്കുന്നതിന് ഇഖാമ നിര്‍ബന്ധമാകില്ല.

24. എന്റെ നവജാത ശിശുവിന് ഫൈനല്‍ എക്സിറ്റ് വിസ ലഭിക്കാന്‍ ജനന സര്‍ട്ടിഫിക്കറ്റ് മതിയാകുമോ?

ജനന സര്‍ട്ടിഫിക്കറ്റ് മതിയാകില്ല. നവജാത ശിശുവിന് ഫൈനല്‍ എക്സിറ്റ് വിസ ലഭിക്കുന്നതിന് ഇഖാമ നിര്‍ബന്ധമാണ്‌.

25. എന്റെ ഭാര്യയും മകനും വിസിറ്റ് വിസയില്‍ സൗദിയില്‍ ഉണ്ട്. ഒരു തവണ വിസ പുതുക്കി. അടുത്ത തവണ അവരുടെ വിസിറ്റ് വിസ പെര്‍മെനന്റ് വിസയാക്കി മാറ്റാന്‍ സാധിക്കുമോ?

സാധിക്കില്ല. രാജ്യത്ത് നിലവിലുള്ള നിയമ പ്രകാരം വിസിറ്റ് വിസ ഇഖാമയാക്കി മാറ്റാന്‍ അനുവാദം ലഭിക്കില്ല.

26. സൗദിയില്‍ മുന്‍പ് ജോലി ചെയ്തവര്‍ക്ക് പുതിയ വിസ അടിക്കുന്നതിന് ഫൈനല്‍ എക്സിറ്റ് പേപ്പര്‍ നിര്‍ബന്ധമാണോ?

കഴിഞ്ഞ വര്‍ഷം മുതല്‍ ഫൈനല്‍ എക്സിറ്റ് പേപ്പര്‍ നിര്‍ബന്ധമാക്കിയിരുന്നു. സൗദിയില്‍ നിന്നും റീ എന്‍ട്രി വിസയില്‍ നാട്ടിലേക്ക് അവധിയില്‍ പോയി പിന്നീട് തിരിച്ചുവരാതെ മൂന്നു വര്‍ഷം തികയുന്നതിന് മുന്‍പ് തന്നെ പുതിയ തൊഴില്‍ വിസക്ക് അപേക്ഷ നല്‍കുന്നവരുടെ എണ്ണം വര്‍ദ്ധിച്ചതിനെ തുടര്‍ന്നാണ്‌ ഈ നിബന്ധന അധികൃതര്‍ ഏര്‍പ്പെടുത്തിയത്.

അഡ്വ.ഷിയാസ് കുഞ്ഞിബാവ കോര്‍പറേറ്റ് ലോയര്‍ &കണ്‍സല്‍ട്ടന്റ്. ദുബായ്,റിയാദ്,ഡല്‍ഹി,കൊച്ചി.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/HKliLEuOSKm9p27hj6dpJQ

പ്രവാസി കോര്‍ണര്‍ ഫേസ്ബുക്ക് പേജില്‍ പ്രവേശിക്കാന്‍ ഈ ലിങ്കില്‍ ക്ലിക്ക് ചെയ്യുക https://www.facebook.com/PravasiCornerOfficial

LATEST

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

Published

on

ഞാന്‍ ഇപ്പോള്‍ റിയാദില്‍ ഹൗസ് ഡ്രൈവര്‍ വിസയില്‍ ജോലി ചെയ്യുകയാണ്. സ്വന്തമായാണ് പുറത്ത് ജോലി ചെയ്യുന്നത്. ഹൗസ് ഡ്രൈവര്‍മാര്‍ക്ക് ലെവി ബാധകമാക്കിയല്‍ മുന്നോട്ട് തുടര്‍ന്ന് പോകാന്‍ സാധിക്കില്ല. എന്ന് മുതലാണ്‌ ഈ നിയമം നിലവില്‍ വരുന്നത്, ഏതെങ്കിലും തരത്തിലുള്ള ഒഴിവാക്കലുകള്‍ ഉണ്ടാകുമോ തുടങ്ങിയ കാര്യങ്ങള്‍ വിശദീകരിക്കാമോ? സ്പോണ്‍സര്‍ഷിപ്പ് മാറുന്നതിന് എന്തൊക്കെ നടപടി ക്രമങ്ങളാണ് സ്വീകരിക്കേണ്ടത് എന്നും പറഞ്ഞു തരാമോ?

സൗദിയില്‍ കോവിഡ് വ്യാപനം രൂക്ഷമാവുന്നതിന് മുന്‍പ് അനധികൃത വിദേശികളെ പിടികൂടുന്നതിന് വേണ്ടി വ്യാപകമായ പരിശോധന നടന്നിരുന്നു. നിലവിലെ പ്രത്യേക സുരക്ഷാ ഭീഷണി സാഹചര്യങ്ങള്‍ മുന്‍നിറുത്തി അധികൃതര്‍ ലക്ഷ്യമിട്ടിരുന്നത് പ്രധാനമായും യാതൊരു രേഖകളും ഇല്ലാതെ അതിര്‍ത്തി പ്രദേശങ്ങളിലൂടെ നുഴഞ്ഞു കയറിയവര്‍, രേഖകളുടെ കാലാവധി അവസാനിച്ചിട്ടും രാജ്യത്ത് തുടര്‍ന്നവര്‍ തുടങ്ങിയ അനധികൃത താമസക്കാരെ ആയിരുന്നു. മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധന അല്ലാതിരുന്നിട്ടു കൂടി ഈ പരിശോധനകളില്‍ ജവാസാതിന്റെയും സംയുക്ത സുരക്ഷ സേനകളുടെയും പിടിയില്‍ പത്തു ശതമാനത്തോളം വിദേശികളും ഉള്‍പ്പെട്ടിരുന്നു. ഇതില്‍ അധികവും ഹൗസ് ഡ്രൈവര്‍ വിസയില്‍ സൗദിയിലെത്തി സ്വന്തമായി ജോലി ചെയ്തു വന്നിരുന്നവര്‍ ആയിരുന്നു.

അത് പോലെ തന്നെ മാനവ ശേഷി, സാമൂഹിക വികസന മന്ത്രാലയത്തിന്റെ പരിശോധനകളില്‍ നിരവധി സ്ഥാപനങ്ങളില്‍ അനേകം ഗാര്‍ഹിക തൊഴിലാളികള്‍ അനധികൃതമായി ജോലി ചെയ്തു വരുന്നതായി കണ്ടെത്തിയിരുന്നു. ഹൗസ് ഡ്രൈവര്‍ വിസയില്‍ രാജ്യത്തെത്തി സ്വതന്ത്രമായി ജോലി ചെയ്തു വരുന്നവരായിരുന്നു ഇവര്‍. ഹൗസ് ഡ്രൈവര്‍മാര്‍ക്ക് ലെവി ബാധകമല്ലാത്തതിനാലാണ് വന്‍തുകയുടെ സാമ്പത്തിക ബാധ്യത ഒഴിവാക്കുന്നതിനായി വിദേശികള്‍ ഈ വിസയില്‍ എത്തി ജോലി ചെയ്തു വന്നിരുന്നത്.

2014 ജൂലൈയിലാണ് രാജ്യത്ത് ആദ്യമായി സ്വകാര്യ മേഖലയിലെ വിദേശ തൊഴിലാളികൾക്ക് ലെവി ബാധകമാക്കിയത്. 2017 ജൂലൈയിൽ ആശ്രിതർക്കും ലെവി നിലവിൽവന്നു. എങ്കിലും ഗാർഹിക തൊഴിലാളികൾക്ക് ലെവി ബാധകമായിരുന്നില്ല. ഈ പഴുത് മുതലെടുത്ത്‌ കൊണ്ടാണ് പല വിദേശികളും ഹൗസ് ഡ്രൈവര്‍ വിസയിലേക്ക് മാറുകയോ ഫൈനല്‍ എക്സിറ്റില്‍ പോയോ പുതിയ ഹൌസ് ഡ്രൈവർ ഉൾപ്പെടെയുള്ള ഗാർഹിക വിസകളില്‍ രാജ്യത്തെത്തുകയോ ചെയ്തു കൊണ്ടിരുന്നത്.

പരിശോധനകളില്‍ ഹൗസ് ഡ്രൈവര്‍ വിസയില്‍ രാജ്യത്തെത്തിയ അനേകം തൊഴിലാളികള്‍ പിടിലാകുന്നത് വര്‍ദ്ധിച്ചതോടെയാണ് ഈ വിഷയം അധികൃതരുടെ ശ്രദ്ധയില്‍ പെടുന്നത്. തുടര്‍ന്ന് ഈ പഴുത് അടക്കുന്നതിനു വേണ്ടിയുള്ള ശ്രമങ്ങളുടെ ഭാഗമായാണ് ഗാര്‍ഹിക തൊഴിലാളികള്‍ക്ക് ലെവി ഏര്‍പ്പെടുതാനുള്ള തീരുമാനം മാനവശേഷി സാമൂഹിക വികസന മന്ത്രാലയ ശുപാര്‍ശ പ്രകാരം സൗദി കാബിനറ്റ്‌ കൈക്കൊള്ളുന്നത്.

പുതിയ തീരുമാന പ്രകാരം ഹൗസ് ഡ്രൈവർ വിസയിലുൾപ്പെടെയുള്ള മുഴുവൻ ഗാർഹിക തൊഴിലാളികൾക്കും ലെവി ബാധകമാണ്. ഓരോ തൊഴിലാളിക്കും വർഷത്തിൽ 9,600 റിയാൽ, അഥവാ പ്രതിമാസം 800 റിയാൽ തോതിലാണ് ലെവി. എന്നാല്‍ ആവശ്യമായ മുന്‍കരുതലുകള്‍ എടുത്തു കൊണ്ട് തന്നെയാണ് ഈ തീരുമാനം മന്ത്രാലയം കൈക്കൊണ്ടിട്ടുള്ളത്. പുതിയ തീരുമാനം മൂലം സ്വദേശികള്‍ക്കും വിദേശികള്‍ക്കും പെട്ടെന്ന് അസൗകര്യം ഉണ്ടാകാത്ത വിധത്തിലാണ് പുതിയ നിബന്ധനകള്‍ നടപ്പിലാക്കുക.

അതായത്, എല്ലാ ഗാര്‍ഹിക തൊഴിലാളികള്‍ക്കും ലെവി ഏര്‍പ്പെടുത്തിയിട്ടില്ല. നാലിൽ കൂടുതൽ ഗാർഹിക തൊഴിലാളികളുള്ള സ്വദേശികളും, രണ്ടിൽ കൂടുതൽ തൊഴിലാളികളുള്ള വിദേശികളും മാത്രമേ പുതിയ തീരുമാന പ്രകാരം ലെവി അടക്കേണ്ടി വരുന്നുള്ളൂ. വിസ കച്ചവടവും അനധികൃത വിസ കൈമാറ്റവും തടയുന്നതിനാണ് ഈ നിബന്ധനകള്‍ കൊണ്ട് വന്നിട്ടുള്ളത്.

മാത്രമല്ല, ഗാര്‍ഹിക തൊഴിലാളികള്‍ക്ക് മറ്റു തൊഴിലുകളിലേക്ക് മാറുന്നതിനാവശ്യമായ സാവകാശവും മന്ത്രാലയം പരോക്ഷമായി നല്‍കുന്നുണ്ട്. അത് കൊണ്ട് തന്നെ രണ്ട് ഘട്ടങ്ങളിലായാണ് തീരുമാനം നടപ്പിലാക്കുക. ഈ വർഷം മെയ് 22 ന് ആരംഭിക്കുന്ന ഒന്നാം ഘട്ടത്തിൽ പുതിയ ഗാർഹിക വിസയിൽ വരുന്ന തൊഴിലാളികൾക്ക് മാത്രമേ ലെവി അടക്കേണ്ടതുള്ളൂ.

കൂടാതെ ഈ വിഷയത്തില്‍ മന്ത്രാലയത്തിന്റെ ഉദാരമായ നിലപാടും പ്രശംസാര്‍ഹമാണ്. പ്രത്യേക വൈദ്യ പരിചരണ ആവശ്യമുള്ള ആളുകൾ, ഭിന്നശേഷിക്കാർക്കുള്ള പരിചരണം തുടങ്ങി മാനുഷികമായ പരിഗണന ആവശ്യപ്പെടുന്ന സന്ദർഭങ്ങളിൽ അത്തരം ജോലികൾക്കായി നിയമിക്കുന്ന ഗാർഹിക തൊഴിലാളിക്ക് ലെവി ബാധകമാവില്ല.

നിലവിൽ രാജ്യത്തുള്ള ഗാർഹിക തൊഴിലാളികൾക്ക് ഒരു വർഷത്തിന് ശേഷം മാത്രമേ ലെവി ബാധകമാകുകയുള്ളൂ. 2023 മെയ് 13 മുതലാണ് ഇവർക്ക് ലെവി അടക്കേണ്ടിവരിക. ഇതിനിടയില്‍ ഇവര്‍ക്ക് മറ്റുള്ള പ്രൊഫഷനുകളിലെക്ക് മാറാനോ ഫൈനല്‍ എക്സിറ്റില്‍ രാജ്യം വിട്ടു പോകാനോ ഉള്ള സാവകാശം ലഭിക്കും. ഇപ്പോൾ ഹൗസ് ഡ്രൈവർ തസ്തികയിലുള്ളവർക്ക് പ്രൊഫഷൻ മാറ്റം അനുവദിക്കുന്നതിനാൽ കൂടുതൽ സുരക്ഷിതമായ തൊഴിലുകൾ കണ്ടെത്തി മാറാവുന്നതാണ്.

സ്പോണ്‍സര്‍ഷിപ്പ് മാറുന്നതിനായി ഖിവ പ്ലാറ്റ്ഫോം വഴിയാണ് അപേക്ഷ നല്‍കേണ്ടത്. പുതിയ സ്പോണ്‍സര്‍ ആണ് മാറാന്‍ അപേക്ഷ നല്‍കേണ്ടത്. തൊഴിലാളിയുടെ ഇഖാമ കാലാവധി ഒരു വര്‍ഷത്തില്‍ കൂടുതല്‍ ഉള്ളതാകരുത് എന്ന നിബന്ധന നിലവിലുണ്ട്. പുതിയ സ്പോണ്‍സര്‍ ഓണ്‍ലൈന്‍ വഴി അപേക്ഷ നല്‍കിയാല്‍ പഴയ സ്പോണ്‍സര്‍ക്ക് എസ്.എം.എസ് ലഭിക്കും. നിലവിലെ സ്പോണ്‍സര്‍ ഇത് അംഗീകരിക്കുന്നതോടെ സ്പോണ്‍സര്‍ഷിപ്പ് മാറ്റം പൂര്‍ത്തിയാകും.

ഹൗസ് ഡ്രൈവര്‍ വിസയില്‍ എത്തി സ്വന്തമായി ജോലി ചെയ്യുകയോ മറ്റു പ്രൊഫഷനുകളില്‍ ജോലി ചെയ്യുകയോ ചെയ്തു വരികയാണെങ്കില്‍ ഈ നിബന്ധന നിലവില്‍ വരുന്നതോടെ താങ്കളുടെ നിലനില്പ് തന്നെ അപകടത്തിലാകും. താങ്കളുടെ സ്പോണ്‍സര്‍ക്ക് നാലില്‍ കൂടുതല്‍ ഗാര്‍ഹിക തൊഴിലാളികള്‍ നിലവില്‍ ഉണ്ടെങ്കില്‍ വർഷത്തിൽ 9,600 റിയാൽ നല്‍കി കൊണ്ട് ഹൗസ് ഡ്രൈവര്‍ വിസയില്‍ മുന്നോട്ട് പോകാന്‍ സാധിക്കില്ല. അതിനാല്‍ നിബന്ധന നിലവില്‍ വരുന്നതിന് മുന്‍പായി ലെവി അടക്കാന്‍ സാധിക്കുന്ന വരുമാനം ലഭിക്കുന്ന മറ്റു പ്രൊഫഷനിലെക്ക് മാറുകയോ അല്ലാത്ത പക്ഷം ഫൈനല്‍ എക്സിറ്റില്‍ പോകുകയോ ചെയ്യുന്നതാണ്‌ ഉചിതം.

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക.     https://chat.whatsapp.com/HvJGe8nUWoHFyki1UwPfMD 

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

 

വിവരങ്ങള്‍ നല്‍കിയത്: 

Adv. Shiyas Kunjhibava. Lead Partner, SK Associates. (Dubai, Riyadh, Delhi, Kochi)

Continue Reading

LATEST

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

Published

on

അടുത്ത മാസം പകുതിയോടെ സൗദി അറേബ്യയില്‍ ഓയില്‍ സെക്ടറില്‍ പുതിയ വിസയില്‍ പോകാന്‍ ഒരുങ്ങുകയാണ്. ആദ്യമായാണ് സൗദി കമ്പനിക്ക്  വേണ്ടി ജോലി ചെയ്യാന്‍ സാധിക്കുന്നത്. ഉയര്‍ന്ന തസ്തികയിലാണ് വിസ. ഈ തസ്തിക കാലക്രമേണ നിതാഖാതില്‍ ഉള്‍പ്പെടുത്തി സ്വദേശിവല്‍ക്കരണം ഉണ്ടാകുമെന്നും ജോലി നഷ്ടപ്പെടുമെന്നും നിലവിലുള്ള ജോലി നഷ്ടപ്പെടുത്തി സൗദിയിലേക്ക് പോകുന്നത് ശരിയായ തീരുമാനമല്ല എന്ന് സുഹൃത്ത് പറയുന്നു. എന്താണ് നിതാഖാത് എന്നതിന്റെ അടിസ്ഥാനപരമായ കാര്യങ്ങള്‍ വിശദീകരിച്ചു തരാമോ?    

 

സൗദി അറേബ്യയില്‍ ജോലി ചെയ്യുന്ന വിദേശികളെ സംബന്ധിച്ചിടത്തോളം അല്‍പ്പം അസ്വസ്ഥത പകരുന്ന വാക്കാണ്‌ സൗദി പൗരന്മാരെ നിയമിക്കുന്നതിന് സ്വകാര്യ മേഖലയെ പ്രോത്സാഹിപ്പിക്കുന്നതിനായി സൗദി മാനവ വിഭവശേഷി, സാമൂഹിക വികസന മന്ത്രാലയം രൂപം നല്‍കിയ ഒരു പദ്ധതിയുടെ പേരായ നിതാഖാത്.

പലരും കരുതുന്നത് പോലെ വിദേശികളെ സൗദി അറേബ്യയുടെ തൊഴില്‍ രംഗത്ത് നിന്നും ആത്യന്തികമായി പുറത്താക്കുക എന്നതല്ല മറിച്ച് സ്വദേശി പൗരന്മാരുടെ തൊഴിലില്ലായ്മ കുറക്കുകയും അവര്‍ക്ക് രാജ്യത്തിന്റെ സ്വകാര്യ മേഖലയില്‍ ജോലി ഉറപ്പു വരുത്തുകയാണ് ഈ പദ്ധതിയുടെ ലക്‌ഷ്യം. തങ്ങളുടെ പൗരന്മാര്‍ക്ക് തൊഴിലും ഉയര്‍ന്ന ജീവിത സാഹചര്യങ്ങളും ഉറപ്പു വരുത്തുക എന്നത് ഏതൊരു രാജ്യത്തിന്റെയും പ്രാഥമിക കര്‍ത്തവ്യം കൂടിയാണ് എന്ന തത്വത്തില്‍ അധിഷ്ഠിതമായ പദ്ധതി കൂടിയാണ് നിതാഖാത്.

2011-ൽ ആരംഭിച്ചത് മുതൽ, ഈ പദ്ധതിയിലൂടെ കാലാനുസൃതമായി വിവിധ തൊഴിലുകളെ ദേശസാൽക്കരിക്കാനും സ്വദേശി പൗരന്മാരുടെ കഴിവുകളെ വൈവിധ്യവല്‍ക്കരിക്കാനും ആവശ്യമായ നടപടികൾ നടപ്പിലാക്കിയിട്ടുണ്ട്. ഇതുമൂലം ലക്ഷക്കണക്കിന്‌ സ്വദേശികള്‍ക്ക് തൊഴിലവസരങ്ങള്‍ സൃഷ്ടിക്കാന്‍ സാധിച്ചിട്ടുണ്ട്. ലക്‌ഷ്യത്തിലേക്ക് എത്തുന്നതിനായി കഴിഞ്ഞ 11 വര്‍ഷമായി നിരന്തരമായ അപ്ഡേറ്റുകൾക്കും നിതാഖാത് വിധേയമായിട്ടുണ്ട്. അതിൽ ഏറ്റവും പുതിയത് “അഡ്വാൻസ്ഡ് നിതാഖാത്”/ “പരിഷ്കരിച്ച നിതാഖാത്” എന്ന പേരില്‍ 2021 ഡിസംബറിൽ ആയിരുന്നു.

സൗദി പൗരന്മാര്‍ക്ക് തൊഴില്‍ ഉറപ്പ് വരുത്തുന്നതിനായി സ്വകാര്യ മേഖലയിലെ പ്രത്യേക തൊഴിലുകള്‍ അവര്‍ക്കായി മാത്രം പരിമിതപ്പെടുത്തുക, അതിനായി സ്ഥാപനങ്ങളെ വിവിധ വിഭാഗങ്ങളാക്കി തരം തിരിക്കുക എന്നതാണ് നിതാഖാത് പദ്ധതിയുടെ അടിസ്ഥാന പ്രവര്‍ത്തന രീതി. ഈ പദ്ധതിയിലൂടെ സൗദി പൗരന്മാര്‍ക്ക് കൃത്യമായ അടിസ്ഥാന പ്രതിമാസ ശമ്പളവും മന്ത്രാലയം ഉറപ്പു വരുത്തുന്നുണ്ട്. സൗദി തൊഴിൽ നിയമം ഒരു സൗദി പൗരന് കൃത്യമായ മിനിമം വേതനം നിര്‍ദ്ദേശിക്കുന്നില്ല എന്ന പരിമിതിയെ ഈ പദ്ധതിയിലൂടെ മറികടക്കാനും മന്ത്രാലയത്തിന് സാധിക്കുന്നു.

ആറു ജീവനക്കാരും അതിൽ കൂടുതലുമുള്ള എല്ലാ സ്ഥാപനങ്ങൾക്കും നിതാഖാത്ത് ബാധകമാണ്. നിലവില്‍ ചുവപ്പ്, ഇളം പച്ച, ഇടത്തരം പച്ച, കടും പച്ച, പ്ലാറ്റിനം എന്നിങ്ങനെ അഞ്ച് വിഭാഗങ്ങളാക്കിയാണ് സ്വകാര്യ മേഖലയിലെ സ്ഥാപനങ്ങളെ നിതാഖാത് പദ്ധതി പ്രകാരം തരം തിരിച്ചിട്ടുള്ളത്. പദ്ധതിയുടെ നിബന്ധനകള്‍ പൂര്‍ത്തീകരിക്കുന്നതിന്റെ അടിസ്ഥാനത്തിലാണ്, അതായത് സൗദിവൽക്കരണത്തിന്റെ ശതമാനത്തെ അടിസ്ഥാനമാക്കിയാണ് ഈ സ്ഥാപനങ്ങള്‍ക്ക് പ്രത്യേക അവകാശങ്ങളും പരിമിതികളും ഏര്‍പ്പെടുത്തിയിരിക്കുന്നത്. മിനിമം സൗദിവൽക്കരണം പാലിക്കാത്ത സ്ഥാപനങ്ങൾക്ക് മന്ത്രാലയത്തിൽ നിന്നുള്ള സേവനങ്ങൾ വിലക്കുകയും നിര്‍ദ്ദിഷ്ട സൗദിവല്‍ക്കരണം പാലിക്കുന്ന സ്ഥാപനങ്ങള്‍ക്ക് ആവശ്യമായ പ്രോത്സാഹനം നല്‍കുകയുമാണ് ചെയ്യുന്നത്.

സ്ഥാപനങ്ങളെ തരം തിരിക്കുന്നതിനായി ഇന്റർനാഷണൽ ക്ലാസിഫിക്കേഷൻ സ്റ്റാൻഡേർഡ് (“ISIC4”) എന്ന മാനദണ്ഡമാണ് മൂന്ന് വർഷമായി ഉപയോഗിക്കുന്നത്. ഈ മാനദണ്ഡം ഉപയോഗിച്ച് സ്ഥാപനങ്ങള്‍ ഉള്‍പ്പെടുന്ന മേഖല, സ്ഥാപനത്തിന്റെ പ്രവർത്തനങ്ങൾ, പ്രസ്തുത സ്ഥാപനത്തിലെ ജീവനക്കാരുടെ എണ്ണം തുടങ്ങിയവ ഒരു നിർദ്ദിഷ്‌ട സമവാക്യം ഉപയോഗിച്ച് നിര്‍ണ്ണയിച്ച്  വരുന്ന ഒന്നും രണ്ടും മൂന്നും വർഷങ്ങളിൽ പ്രസ്തുത സ്ഥാപനം  ഏത് വിഭാഗത്തില്‍ ഉള്‍പ്പെടുമെന്ന് നിര്‍ണ്ണയിക്കുന്നു.

പരിഷ്‌കരിച്ച നിതാഖാത്ത് പ്രകാരം സ്വകാര്യ സ്ഥാപനങ്ങൾ മൂന്നു വർഷത്തിനുള്ളിൽ സൗദിവൽക്കരണം ഘട്ടം ഘട്ടമായി നിശ്ചിത ശതമാനം ഉയർത്തൽ നിർബന്ധമാണെന്ന് മന്ത്രാലയം വ്യക്തമാക്കിയിട്ടുണ്ട്. അല്ലാത്ത പക്ഷം ഈ സ്ഥാപനങ്ങളുടെ വിഭാഗത്തിൽ മാറ്റം വരികയും ഉയര്‍ന്ന വിഭാഗത്തില്‍ നിന്നും താഴെയുള്ള വിഭാഗങ്ങളിലേക്ക് പോവുകയും ചെയ്യും. പുതിയ പദ്ധതി പ്രകാരം ആവശ്യമായ മാറ്റങ്ങള്‍ വരുത്തുന്നതിന് ആവശ്യമായ സമയം അനുവദിക്കുക എന്നതാണ് ഈ മൂന്ന് വര്‍ഷ സമയ പരിധിയുടെ ഉദ്ദേശം. ഈ സമയ പരിധിക്കുള്ളില്‍ നാല് ലക്ഷത്തോളം പുതിയ സ്വദേശി തൊഴിലവസരങ്ങളാണ് മന്ത്രാലയം ലക്ഷ്യമിടുന്നത്.

ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍:

മുകളില്‍ അഞ്ചാമത്ത ഖണ്ഡികയില്‍ പറഞ്ഞിരിക്കുന്നത് പോലെ അഞ്ചു വിഭാഗങ്ങളായാണ് നിതാഖത് പദ്ധതി പ്രകാരം സ്വകാര്യ കമ്പനികളെ തരം തിരിച്ചിരിക്കുന്നത്. അതില്‍ ഏറ്റവും താഴെയായി കിടക്കുന്ന സ്ഥാപനങ്ങളാണ് ചുവന്ന വിഭാഗത്തിലുള്ള സ്ഥാപനങ്ങള്‍. മന്ത്രാലയം നിര്‍ദ്ടെഷിചിരിക്കുന്നതരത്തിലുള്ള നിബന്ധനകള്‍ പാലിക്കാന്‍ സാധിക്കാത്ത സ്ഥാപനങ്ങളാണ് ഈ വിഭാഗത്തില്‍ ഉള്‍പ്പെടുന്നത്.അത് കൊണ്ട് തന്നെ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം നല്‍കുന്ന ഉത്തേജന/പ്രോത്സാഹന മാര്‍ഗ്ഗങ്ങള്‍ ലഭ്യമാകില്ല. മറിച്ച് ഇത്തരം സ്ഥാപനങ്ങള്‍ക്ക് അവക്ക് ലഭ്യമായിരുന്ന അടിസ്ഥാന അവകാശങ്ങള്‍ പോലും നഷ്ടമാകുകയും ചെയ്യുന്നു. സ്ഥാപനത്തിനും അതിലെ തൊഴിലാളികള്‍ക്കും താഴെ പറയുന്ന ആനുകൂല്യങ്ങള്‍ നിഷേധിക്കപെടുന്നു:

  1. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് അതിലെ തൊഴിലാളികളുടെ വർക്ക് പെർമിറ്റ് പുതുക്കാൻ സാധിക്കില്ല.
  2. ഇത്തരം സ്ഥാപനങ്ങള്‍ക്ക് തങ്ങളുടെ തൊഴിലാളികളുടെ പ്രൊഫഷനുകള്‍ മാറ്റാൻ സാധിക്കില്ല.
  3. ഈ സ്ഥാപനങ്ങള്‍ക്ക് പുതിയ വിദേശ തൊഴിലാളികൾക്ക് വർക്ക് പെർമിറ്റ് നൽകാൻ സാധിക്കില്ല.
  4. ചുവന്ന വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ വിസകൾക്ക് വേണ്ടി അപേക്ഷിക്കാന്‍ സാധിക്കില്ല.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് വിസ ട്രാന്‍സ്ഫര്‍ ചെയ്യാന്‍ സാധിക്കില്ല.
  6. സ്ഥാപനങ്ങളുടെ പുതിയ ശാഖകൾക്കോ പുതിയ സൗകര്യങ്ങൾക്കോ വേണ്ടി പുതിയ ഫയലുകൾ തുറക്കാൻ അനുവാദം ഉണ്ടായിരിക്കില്ല.

ഇളം പച്ച വിഭാഗത്തില്‍ പെടുന്ന സ്ഥാപനങ്ങള്‍ (ലോ ഗ്രീൻ റേഞ്ച് സ്ഥാപനങ്ങള്‍):

ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ചുവന്ന വിഭാഗത്തില്‍ ഉള്‍പ്പെടുന്ന സ്ഥാപനങ്ങളെ പോലെ മുഴുവന്‍ ആനുകൂല്യങ്ങളും നിഷേധിക്കപ്പെടുന്നില്ല. നാമമാത്രമായ നിയന്ത്രണങ്ങളാണ് ഇത്തരം സ്ഥാപനങ്ങളുടെ പ്രവര്‍ത്തനത്തിലും മന്ത്രാലയം ഏര്‍പ്പെടുത്തിയിട്ടുള്ളത്.

  1. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് പുതിയ തൊഴില്‍ വിസകൾക്കുള്ള അപേക്ഷകൾ സമര്‍പ്പിക്കാന്‍ സാധിക്കില്ല.
  2. ഈ സ്ഥാപനങ്ങളിലെ വിദേശികളായ തൊഴിലാളികളുടെ പ്രോഫഷനുകള്‍ മാറ്റാനുള്ള അനുവാദം നല്‍കിയിട്ടുണ്ട്. എന്നാല്‍ സൗദി പൗരന്മാർക്ക് മാത്രമായി പരിമിതപ്പെടുത്തിയിരിക്കുന്ന പ്രൊഫഷനുകളിലേക്ക് മാറ്റം അനുവദിക്കില്ല.
  3. കുറഞ്ഞ പച്ച വിഭാഗത്തിന് താഴെയുള്ള വിദേശ തൊഴിലാളികളുടെ സേവനങ്ങൾ കൈമാറാനുള്ള അനുവാദം ലഭ്യമാണ്.
  4. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ ലഭ്യമാകും.
  5. ഈ വിഭാഗത്തില്‍ പെടുന്ന സ്ഥാപനങ്ങള്‍ക്ക് തങ്ങളുടെ വിദേശ തൊഴിലാളിയുടെ അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വർക്ക് പെർമിറ്റ് പുതുക്കാന്‍ അനുവാദം നല്‍കും.

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (മിഡ് ഗ്രീൻ റേഞ്ച് സ്ഥാപനങ്ങള്‍)

ഇളം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന ആനുകൂല്യങ്ങള്‍ക്ക് പുറമേ മറ്റു ചില ആനുകൂല്യങ്ങള്‍ കൂടി ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം നിതാഖാത് പദ്ധതി പ്രകാരം ലഭ്യമാക്കുന്നുണ്ട്.

  1. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. സ്പെഷ്യലൈസ്ഡ്‌ ആയിട്ടുള്ള പ്രൊഫഷനുകളില്‍ ജോലി ചെയ്യുന്ന വിദേശ തൊഴിലാളി ഫൈനല്‍ എക്സിറ്റ് വിസയില്‍ പോകുകയാണെങ്കില്‍ അതിനു പകരമായി പുതിയ വിസ (replacement visa) ലഭ്യമാകും.

കടും പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ (ഹൈ ഗ്രീൻ റേഞ്ച് സ്ഥാപനങ്ങള്‍):

ഇടത്തരം പച്ച വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് ലഭ്യമാകുന്ന എല്ലാ ആനുകൂല്യങ്ങളും ലഭ്യമാകുന്നതോടൊപ്പം മറ്റു ചില ആനുകൂല്യങ്ങള്‍ കൂടി ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് മന്ത്രാലയം ലഭ്യമാക്കിയിട്ടുണ്ട്.

  1. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരം വിസ (replacement visa) ലഭ്യമാക്കും.
  2. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കാന്‍ ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങള്‍ക്ക് അനുവാദമുണ്ട്.
  3. ഈ വിഭാഗത്തിലുള്ള സ്ഥാപനങ്ങളിലെ വിദേശികളായ തൊഴിലാളികളുടെ പ്രൊഫഷനുകള്‍ മാറ്റാനുള്ള അനുവാദം ഉണ്ടായിരിക്കും. എന്നാല്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് മാറ്റം അനുവദിക്കില്ല.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. ഈ വിഭാഗത്തില്‍ ഉള്‍പ്പെടുന്ന സ്ഥാപനങ്ങളുടെ വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

പ്ലാറ്റിനം റേഞ്ച് കമ്പനികൾ:

നിതാഖാത് പദ്ധതി പ്രകാരമുള്ള അഞ്ചു വിഭാഗങ്ങളില്‍ ഏറ്റവും ഉയര്‍ന്ന വിഭാഗമാണ്‌ പ്ലാറ്റിനം വിഭാഗം.

  1. ലഭ്യമായിട്ടുള്ള പ്രൊഫഷനുകളില്‍ അനുവദിച്ചിട്ടുള്ള വിസകളുടെ ബാക്കിയുള്ള വിസകള്‍ക്കുള്ള അപേക്ഷകള്‍ സമര്‍പ്പിക്കം.
  2. വിദേശികളായ തൊഴിലാളികളുടെ പ്രൊഫഷനുകള്‍ സൗദി പൗരന്മാർക്ക് മാത്രമായി റിസര്‍വ് ചെയ്തിട്ടുള്ള പ്രൊഫഷനുകളിലേക്ക് ഒഴികെ മാറ്റം.
  3. ഫൈനൽ എക്സിറ്റ് വിസയിൽ പോകുന്ന വിദേശ തൊഴിലാളികള്‍ക്ക് പകരമായി വിസ (replacement visa) ലഭ്യമാക്കും.
  4. അവശേഷിക്കുന്ന ഇഖാമ കാലാവധി ആറു മാസത്തില്‍ കൂടുതല്‍ അല്ല എങ്കില്‍ വിദേശ തൊഴിലാളിയുടെ വർക്ക് പെർമിറ്റ് പുതുക്കാന്‍ അനുവാദം നല്‍കും.
  5. മറ്റു നിതഖാത് വിഭാഗങ്ങളില്‍ നിന്നും തൊഴിലാളികളെ ട്രാന്‍സ്ഫര്‍ ചെയ്യാനുള്ള അനുവാദം ലഭ്യമാണ്.
  6. വിവരങ്ങള്‍ നിതാഖാത് പദ്ധതിയില്‍ പെട്ടെന്ന് തന്നെ അപ്ഡേറ്റ് ചെയ്യപ്പെടുന്നു.

സൗദി പൗരന്മാര്‍ക്ക് മിനിമം വേതനം

നിതാഖാത് പദ്ധതി പ്രകാരം വിവിധ വിഭാഗങ്ങളില്‍ ഉള്‍പ്പെടുന്ന സ്ഥാപനങ്ങള്‍ക്ക് വിവിധ തരം ആനുകൂല്യങ്ങളും പരിമിതികളും ലഭ്യമാകുമ്പോള്‍ മുകളില്‍ പറഞ്ഞ പോലെ ഒരു സൗദി പൗരന് നിര്‍ദ്ദിഷ്ട തുക അടിസ്ഥാന ശമ്പളമായി ലഭിക്കുന്നു എന്നതാണ് സ്വദേശി പൗരന്മാരെ സംബന്ധിച്ചിടത്തോളം ഈ പദ്ധതിയുടെ ഹൈലൈറ്റ്. ആനുകൂല്യങ്ങളും പരിമിതികളും സ്ഥാപനങ്ങള്‍ക്ക് ലഭ്യമാകുമ്പോള്‍ തങ്ങളുടെ പൗരന്മാരുടെ ജീവിത നിലവാരം ഉറപ്പു വരുത്തുന്നതിനുള്ള അടിസ്ഥാന ശമ്പളം ഉറപ്പു വരുത്തുന്ന രീതിയാണ് മന്ത്രാലയത്തിന്റെ നിതഖാത് പദ്ധതിയെ സ്വദേശി പൗരന്മാര്‍ക്ക് ഇടയില്‍ ജനപ്രിയമാക്കി തീര്‍ക്കുന്നത്.

നിതാഖാത് പദ്ധതി പ്രകാരം സ്ഥാപനങ്ങള്‍ക്ക് ആനുകൂല്യങ്ങള്‍ ലഭിക്കണമെങ്കില്‍ സ്വകാര്യ സ്ഥാപനത്തില്‍ ജോലി ചെയ്യുന്ന സൗദി പൗരന്റെ അടിസ്ഥാന പ്രതിമാസ ശമ്പളം ഏറ്റവും കുറഞ്ഞത് 4,000 റിയാൽ എന്ന് നിജപ്പെടുത്തിയിട്ടുണ്ട്. മുന്‍പ് ഈ തുക 3000 റിയാൽ ആയിരുന്നു എങ്കിലും വിവധ സാഹചര്യങ്ങള്‍ കണക്കിലെടുത്ത് സമീപ മാസങ്ങളിലാണ് ഈ തുകയില്‍ മന്ത്രാലയം വര്‍ദ്ധന ഏര്‍പ്പെടുത്തിയത്.

എങ്കിലും ഈ നിബന്ധനയില്‍ പ്രത്യക്ഷമായി ചെറിയ തരത്തിലുള്ള ഇളവ് മന്ത്രാലയം നല്‍കുന്നുണ്ട് എങ്കിലും നിതാഖാത് പ്രകാരമുള്ള പൂര്‍ണ്ണമായ ആനുകൂല്യം ലഭിക്കണമെങ്കില്‍ ഈ നിബന്ധന പൂര്‍ണ്ണമായും പാലിക്കണം എന്നത് മിനിമം വേതനതോട് കൂടി സ്വദേശി പൗരന്മാരെ തങ്ങളുടെ സ്ഥാപനങ്ങളില്‍ നിയമിക്കാന്‍ പരോക്ഷമായി സ്വകാര്യ സ്ഥാപനങ്ങളെ നിര്‍ബന്ധിതരാക്കുന്നു.

അതായത് 4000 റിയാലില്‍ കുറവ് ശമ്പളത്തിനും സ്ഥാപനങ്ങള്‍ക്ക് സ്വദേശി തൊഴിലാളികളെ നിയമിക്കാന്‍ അനുവാദമുണ്ട്. അന്നാല്‍ അതിനു ആനുപാതികമായി പദ്ധതിയില്‍ നിന്നും ലഭിക്കുന്ന ആനുകൂല്യങ്ങള്‍ക്കും കുറവുണ്ടാകും. അതായത് 4000 റിയാലിൽ താഴെയുള്ള ശമ്പളം നല്‍കി നിയമിക്കുന്ന ഒരു സ്വദേശി തൊഴിലാളിയെ നിതാഖാത് പദ്ധതി പ്രകാരം പകുതി തൊഴിലി ആയി മാത്രമേ കണക്കാക്കുകയുള്ളൂ.  പാർട്ട് ടൈം തൊഴിലാളികളുടെ കാര്യത്തിലും ഈ നിബന്ധന ബാധകമാണ്. മാസത്തില്‍ 168 മണിക്കൂറിൽ കുറയാത്ത സേവനം പൂർത്തിയാക്കിയ തൊഴിലാളിയെ (ഫ്ലക്സിബിള്‍ അവേഴ്സ്) സൗദി തൊഴിലാളിയുടെ 1/3 ആയി കണക്കാക്കും.

എന്നാല്‍ വികലാംഗരായ സ്വദേശി തൊഴിലാളികളുടെ കാര്യത്തില്‍ വലിയ ഇളവാണ് മന്ത്രാലയം നല്‍കുന്നത്. 4000 റിയാലില്‍ കുറയാത്ത ശമ്പളത്തില്‍ ഒരു സ്വദേശിയായ വികലാംഗ തൊഴിലാളിയെ നിയമിക്കുന്ന സ്ഥാപനങ്ങള്‍ക്ക് നിതാഖാത് പദ്ധതി പ്രകാരമുള്ള ആനുകൂല്യങ്ങള്‍ക്കായി ഒരു തൊഴിലാളിയെ 4 തൊഴിലാളികളായി കണക്കാക്കും. ഇതിലൂടെ അംഗ പരിമിതരായ തങ്ങളുടെ പൗരന്മാരുടെ തൊഴില്‍ ലഭ്യതയും അവര്‍ക്ക് നിര്‍ദ്ദിഷ്ട ജീവിത സാഹചര്യവും ഉറപ്പു വരുത്താന്‍ മന്ത്രാലയത്തിന് നിതാഖാത് പദ്ധതിയിലൂടെ സാധിക്കുന്നു.

 

ഇതൊക്കെയാണ് നിതാഖാത് പദ്ധതിയെ സംബന്ധിച്ചുള്ള ഏറ്റവും പുതിയ വിവരങ്ങള്‍. നിങ്ങളെ സംബന്ധിച്ച് വിസ ഉന്നത തസ്തികയില്‍ ഉള്ളതായതിനാല്‍ കുറച്ച് അപകട സാധ്യതയും ഇല്ലാതില്ല. കാരണം പലപ്പോഴും പ്രധാന തസ്തികകളാണ് സൗദിവല്ക്കരണത്തില്‍ ഉള്‍പ്പെടുത്താറുള്ളത്. വിദേശികള്‍ ധാരാളമായി ജോലി ചെയ്യുന്ന താഴ്ന്ന തസ്തികകള്‍ അധികമായി ഉള്‍പ്പെടുത്താറില്ല. നിങ്ങളുടെ തസ്തിക ഏതാണെന്ന് വ്യക്തമായി ചോദ്യത്തില്‍ ഉള്‍പ്പെടുത്താതിനാല്‍ അതിനെ കുറിച്ച് കൃത്യമായി പറയാനും സാധിക്കില്ല.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ. ലീഡ് പാര്‍ട്ണര്‍, എസ്.കെ അസോസിയേറ്റ്സ്. (ദുബായ്. റിയാദ്. ഡല്‍ഹി. കൊച്ചി)

 

Continue Reading

LATEST

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

Published

on

ഇന്ത്യന്‍ യൂണിയന്‍ മുസ്ലിം ലീഗിന്റെ വിദ്യാര്‍ത്ഥി ഘടകമായ എം.എസ്.എഫിന്റെ പ്രവര്‍ത്തന ചരിത്രത്തില്‍ പുതിയ ഒരധ്യായം എഴുതി ചേര്‍ത്തു കൊണ്ടാണ് കഴിഞ്ഞ ദിവസങ്ങളില്‍ ഡല്‍ഹിയില്‍ വെച്ചു നടന്ന ദേശീയ സമ്മേളനം സമാപിച്ചത്.

സംസ്ഥാന പ്രതിനിധികള്‍, കേന്ദ്ര സര്‍വ്വകലാശാലാ പ്രതിനിധികള്‍, മുസ്‌ലിം ലീഗ് ദേശീയ നേതാക്കള്‍, വിദ്യാര്‍ത്ഥി സംഘടനാ നേതാക്കള്‍, വിദ്യാഭ്യാസ വിചക്ഷണര്‍, ആക്റ്റിവിസ്റ്റുകള്‍ ഉള്‍പ്പടെയുള്ളവര്‍ പങ്കെടുത്ത സമ്മേളനം വന്‍ വിജയമായതോടൊപ്പം തന്നെ എം.എസ്.എഫ് ദേശീയ കമ്മിറ്റിയുടെ പുതിയ ആസ്ഥാനം പ്രവര്‍ത്തനം ആരംഭിക്കുകയും ചെയ്തു.

മുസ്‌ലിംലീഗ് ഉന്നതാധികാര സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങളാണ് പുതിയ ദേശീയ കമ്മിറ്റി ഓഫീസ് ഉദ്ഘാടനം ചെയ്തത്.

വിവിധ സംസ്ഥാനങ്ങളിലും കേന്ദ്ര, സംസ്ഥാന സര്‍വ്വകലാശാലകളിലും പതിറ്റാണ്ടുകളായി എം എസ് എഫിന്റെ പ്രവര്‍ത്തനം നടക്കുന്നുണ്ടങ്കിലും ദേശീയ കമ്മറ്റി യാഥാര്‍ഥ്യമായത് 2016ലാണ്. ദേശീയ തല പ്രവര്‍ത്തനങ്ങള്‍ എകോപിപ്പിക്കുകയും പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുകയും ചെയ്യുക എന്ന ലക്‌ഷ്യം മുന്‍നിറുത്തി 2016 ഡിസംബര്‍ 17 ന് പാലക്കാട് വെച്ചാണ് എം എസ് എഫിന് ഒരു ദേശീയ കമ്മറ്റി രൂപീകരിക്കുന്നത്. തുടര്‍ന്നാണ്‌ പ്രവര്‍ത്തനം ദേശീയ തലത്തിലേക്ക് വ്യാപിപിക്കുന്നത്.

നിലവില്‍ രാജ്യത്തെ 13 സംസ്ഥാനങ്ങളിലും, വിവിധ കേന്ദ്ര- സംസ്ഥാന സര്‍വ്വകലാശാലകളിലും എം എസ് എഫ് പ്രവര്‍ത്തനം സജീവമാണ്. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്കുന്ന മഹത്തായ ദൗത്യമാണ് എം എസ് എഫ് ദേശീയ കമ്മിറ്റി നിര്‍വ്വഹിച്ചു കൊണ്ടിരിക്കുന്നത്.

പൗരത്വ ഭേദഗതി നിയമവും, വിദ്വേഷ പ്രസംഗങ്ങളും, ആള്‍ക്കൂട്ട കൊലപാതകങ്ങളും, വസ്ത്രവിവേചനങ്ങളുമെല്ലാം കൊണ്ട് അപരവത്കരിക്കപ്പെടുന്ന കാലത്ത് വിദ്യാഭ്യാസം കൊണ്ട് കരുത്തരായി മാറുക എന്നതാണ് പ്രതിരോധമാര്‍ഗം. എം എസ് എഫ് ആ ദൗത്യ നിര്‍വ്വഹണത്തിലേക്കാണ് വിദ്യാര്‍ത്ഥികളെ ഉണര്‍ത്തുന്നത്. അതോടൊപ്പം രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലേക്ക് പാര്‍ശ്വവത്കരിക്കപ്പെട്ടിരുന്ന മുസ്‌ലിം വിദ്യാര്‍ഥികള്‍ക്ക് കടന്നു വരാനുള്ള ആത്മവിശ്വാസം സൃഷ്ടിക്കുക എന്ന ദൗത്യവും എം എസ് എഫ് വിജയകരമായി തന്നെ തുടര്‍ന്ന് പോരുകയാണ്.

മുഹമ്മദ്‌ അഷറഫ് എം എസ് എഫ് ദേശീയ കമ്മിറ്റി പ്രസിഡന്റ് ടി.പി. അഷറഫ് അലിയോടൊപ്പം

ന്യൂനപക്ഷ വിഭാഗങ്ങള്‍ക്ക് ഭരണ ഘടന വിഭാവനം ചെയ്തിട്ടുള്ള അവസര സമത്വവും സാമൂഹിക നീതിയും പോലുള്ള അവകാശങ്ങള്‍ നഷ്ടപ്പെടാതിരിക്കാനും അവകാശങ്ങള്‍ ക്രിയാത്മകമായി ഉപയോഗിക്കാനും  സംഘടിതരായി രാഷ്ട്രീയ ശക്തിയായി നിലനിന്ന് അവകാശങ്ങള്‍ക്ക് വേണ്ടി പൊരുതുക എന്നതാണ് വര്‍ത്തമാന കാലഘട്ടത്തില്‍ വിദ്യര്‍ത്ഥി സമൂഹത്തിന്റെയും ആവശ്യം. ന്യൂനപക്ഷ രാഷ്ട്രീയത്തിന്റെ പ്രത്യയശാസ്ത്രവും, സംഘടിത രാഷ്ട്രീയ ശക്തിയുടെ പ്രസക്തിയും ഇന്ത്യയിലെ വിവിധ സംസ്ഥാനങ്ങളിലെ ന്യൂനപക്ഷങ്ങള്‍ക്ക്, വിശിഷ്യാ മുസ്ലിം വിദ്യാര്‍ഥികള്‍ക്ക് പകര്‍ന്നു നല്‍കി അത്തരത്തിലുള്ള സംവാദങ്ങള്‍ക്ക് ശക്തി പകരുകയാണ് ‘വിദ്യാഭ്യാസം, വിമോചനം, ശാക്തീകരണം’ എന്ന മുദ്രാവാക്യത്തിലൂടെ എം എസ് എഫ് നിര്‍വ്വഹിക്കുന്നത്.

രാജ്യതലസ്ഥാനത്ത് തന്നെ പുതിയ പുതിയ ദേശീയ കമ്മിറ്റി ഓഫീസ് സ്ഥാപിതമായതോടെ ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കാനും ശക്തിപ്പെടുത്താനും എം എസ് എഫിന് സാധിക്കുമെന്നാണ് പുതിയ നേതൃത്വം കരുതുന്നത്. അതോടൊപ്പം തന്നെ ഇന്ത്യയിലെ മുസ്‌ലിം സമുദായത്തിന് വരും കാലത്തേക്കുള്ള നേതൃത്വത്തെ വളര്‍ത്തിയെടുക്കുകയെന്ന ദൗത്യം നിര്‍വ്വഹിക്കാനും എം എസ് എഫ് ദേശീയ കമ്മിറ്റിക്ക് സാധിക്കുമെന്നും നേതൃത്വം പ്രത്യാശിക്കുന്നു.

മുഹമ്മദ്‌ അഷറഫ്  

ന്യൂ ഡല്‍ഹി.

 

Continue Reading
LATEST5 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST5 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST6 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST7 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST7 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST8 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST8 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST8 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST8 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST8 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST8 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST8 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST8 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!