Connect with us

LATEST

സൗദി പ്രവാസികള്‍ ആവര്‍ത്തിച്ചു ചോദിച്ച ഏറ്റവും പുതിയ 17 ചോദ്യങ്ങള്‍. നാട്ടില്‍ നിന്നും സൗദിയിലേക്ക് തിരിച്ചു വരുന്നവരും സൗദിയില്‍ ഉള്ളവരും അറിഞ്ഞിരിക്കേണ്ടത്

Published

on

1. ഞാന്‍ നാട്ടില്‍ നിന്നും രണ്ടു ഡോസ് വാക്സിന്‍ സ്വീകരിച്ച് തവക്കല്‍നയില്‍ ഇമ്മ്യൂണ്‍ ആയ ശേഷം സൗദിയില്‍ തിരിച്ചെത്തിയ ആളാണ്‌. മാലിദ്വീപില്‍ 14 ദിവസം താമസിച്ചതിനു ശേഷമാണ് സൗദിയിലേക്ക് തിരിച്ചെത്തിയത്. എനിക്ക് അടിയന്തിരമായി ഇപ്പോള്‍ നാട്ടിലേക്ക് പത്തു ദിവസത്തെ അവധിയില്‍ പോകേണ്ടതായിട്ടുണ്ട്. നാട്ടിലേക്ക് പോയി തിരിച്ചു വരുന്ന സമയത്ത് എനിക്ക് നേരിട്ട് സൗദിയിലേക്ക് യാത്ര ചെയ്യുന്നതിനു തടസ്സമുണ്ടോ?

നിലവില്‍ സൗദിയില്‍ നിന്നും രണ്ടു ഡോസ് വാക്സിന്‍ സ്വീകരിച്ചവര്‍ക്ക് മാത്രമേ നേരിട്ട് പ്രവേശനം അനുവദിക്കുകയുള്ളൂ. അല്ലാത്തവര്‍ക്ക് നേരിട്ടുള്ള പ്രവേശനത്തിന് വിലക്കുണ്ട്. സൗദിക്ക് പുറത്ത് നിന്നും വാക്സിന്‍ സ്വീകരിച്ചവര്‍ മറ്റൊരു രാജ്യത്ത് 14 ദിവസം താമസിച്ച ശേഷം മാത്രമേ സൗദിയിലേക്ക് പ്രവേശനം അനുവദിക്കുകയുള്ളൂ എന്ന വ്യവസ്ഥയില്‍ ഇപ്പോഴും മാറ്റം ഉണ്ടായിട്ടില്ല. ഈ നിബന്ധന റെഡ് ലിസ്റ്റില്‍ ഉള്ള രാജ്യത്ത് നിന്നും സൗദിയിലേക്ക് വരുന്ന വിദേശികള്‍ക്ക് ബാധകമാണ്. ഒരിക്കല്‍ ഇമ്മ്യൂണ്‍ ആയി മറ്റൊരു രാജ്യത്ത് 14 ദിവസം താമസിച്ചതിനു ശേഷം സൗദിയില്‍ തിരിച്ചെത്തിയവര്‍ക്കും ഈ നിബന്ധനയില്‍ ഇളവ് ലഭിക്കില്ല. നിലവിലെ നിബന്ധന പ്രകാരം ഇവര്‍ സൗദിയില്‍ നിന്നും നാട്ടിലേക്ക് പോയാല്‍ പിന്നീട് സൗദിയിലേക്ക് പ്രവേശിക്കണമെങ്കില്‍ മറ്റൊരു രാജ്യത്ത് 14 ദിവസം താമസിക്കേണ്ടതായി വരും.

2. ഞാനിപ്പോള്‍ നാട്ടിലാണ് ഉള്ളത്. എന്റെ സൗദി മൊബൈല്‍ നമ്പര്‍ തിരിച്ചു കിട്ടാന്‍ സാധ്യത ഇല്ലാത്ത വിധം നഷ്ടപ്പെട്ടു പോയി. മൊബൈല്‍ ഫോണ്‍ അടക്കമാണ് നഷ്ടപ്പെട്ടു പോയത്. ആ സിം കാര്‍ഡിലാണ് അബ്ഷീര്‍, തവക്കല്‍ന, സ്വഹത്തി എല്ലാം രജിസ്റ്റര്‍ ചെയ്തിട്ടുള്ളത്. ഇതെല്ലം പുതിയ നമ്പരിലേക്ക് മാറ്റാന്‍ എന്തെങ്കിലും മാര്‍ഗ്ഗം ഉണ്ടോ?

ഒരു സൗദി പ്രവാസി എന്ന നിലയില്‍ വളരെ പ്രധാനപ്പെട്ട ഒരു മൊബൈല്‍ നമ്പരാണ് നിങ്ങള്‍ക്ക് നഷ്ടമായത്. സൗദിയില്‍ എത്തിയ ശേഷം ഇതെല്ലാം പുതിയ മൊബൈല്‍ നമ്പരിലേക്ക് മാറ്റാന്‍ സാധിക്കും. നിങ്ങളുടെ പേരില്‍ ഒരു സിം കാര്‍ഡ് എടുക്കുക. എയര്‍പോര്‍ട്ടില്‍ MOI (Ministry of Interior) യുടെ മെഷീനില്‍ വിരലടയാളം കൊടുത്ത് അപ്ഡേറ്റ് മൊബൈല്‍ നമ്പര്‍ എന്ന ഓപ്ഷന്‍ ഉപയോഗിച്ച് അബ്ഷീറില്‍ മൊബൈല്‍ നമ്പര്‍ അപ്ഡേറ്റ് ചെയ്യുക. അബ്ഷീര്‍ അപ്ഡേറ്റ് ചെയ്തു കഴിഞ്ഞാല്‍ അതിനു ശേഷം തവക്കല്‍ന ആക്റ്റിവേറ്റ് ചെയ്യുക. ലോഗിന്‍ പേജില്‍ അപ്ഡേറ്റ് മൊബൈല്‍ നമ്പര്‍ എന്ന ഓപ്ഷന്‍ കാണാന്‍ സാധിക്കും. അതില്‍ ആവശ്യമായ വിവരങ്ങള്‍ നല്‍കി ഒ.ടി.പി എന്റര്‍ ചെയ്‌താല്‍ തവക്കല്‍ന പുതിയ മൊബൈല്‍ നമ്പരിലേക്ക് മാറി കിട്ടും. സ്വിഹത്തിയിലും അപ്ഡേറ്റ് മൊബൈല്‍ നമ്പര്‍ എന്ന ഓപ്ഷന്‍ ഉപയോഗിച്ച് മൊബൈല്‍ നമ്പര്‍ മാറ്റാന്‍ സാധിക്കും. എന്നാല്‍ ഇതെല്ലാം സൗദിയില്‍ എത്തിയ ശേഷമാണ് ചെയ്യാന്‍ സാധിക്കുക.

3. അബ്ഷീര്‍, തവക്കല്‍ന, സ്വഹത്തി മൊബൈല്‍ നമ്പര്‍ നഷ്ടപ്പെട്ടു പോയി. വര്‍ക്ക്‌ ചെയ്യുന്ന മറ്റൊരു സൗദി നമ്പര്‍ കൈവശം ഉണ്ട്. എനിക്ക് ഇപ്പോള്‍ നാട്ടില്‍ നിന്നും ആദ്യ ഡോസ് വാക്സിന്‍ സര്‍ട്ടിഫിക്കറ്റ് കിട്ടാന്‍ എന്തെങ്കിലും മാര്‍ഗ്ഗം ഉണ്ടോ?

രണ്ടു വഴികളാണ് ഉള്ളത്. ഒന്ന് ഒഫീഷ്യലും മറ്റൊന്ന് അണ്‍ ഒഫീഷ്യലും ആണ്. ആരോഗ്യ മന്ത്രാലയവുമായി ബന്ധപ്പെട്ടു പ്രവര്‍ത്തിക്കുന്നവര്‍ മുഖേന ലഭ്യമാക്കുന്നതാണ് ഒരു വഴി. അത് അണ്‍ ഒഫീഷ്യല്‍ ആണ്. അങ്ങിനെയുള്ള ആരെങ്കിലും ഉണ്ടെങ്കില്‍ അവരുമായി ബന്ധപ്പെട്ടാല്‍ സ്വിഹത്തി മെഡിക്കല്‍ സര്‍ട്ടിഫിക്കറ്റ് ലഭിക്കാന്‍ സാധ്യതയുണ്ട്. എം.ഒ.എച്ചില്‍ ജോലി ചെയ്യുന്ന ഡോക്ടര്‍മാര്‍ ഉള്‍പ്പെടെയുള്ള ആരോഗ്യ പ്രവര്‍ത്തകര്‍ക്ക് വ്യക്തികളുടെ മൊബൈല്‍ നമ്പരില്‍ ഒ.ടി.പി ലഭിക്കാതെ തന്നെ സര്‍ട്ടിഫിക്കറ്റ് സിസ്റ്റത്തില്‍ നിന്നും പ്രിന്റ്‌ ചെയ്ത് എടുക്കാന്‍ സാധിക്കും. കുറച്ചു ദിവസം മുന്‍പ് വരെ ഇങ്ങിനെ കുറെ പേര്‍ സര്‍ട്ടിഫിക്കറ്റ് ലഭ്യമാക്കിയിട്ടുണ്ട്. ഇപ്പോള്‍ ലഭ്യമാണോ എന്നറിയില്ല. പണം വാങ്ങിയാണ് ചില ഏജന്റുകള്‍ ഇങ്ങിനെ ചെയ്തു കൊടുതിരുന്നത്. നിയമപരമായ വഴി അല്ലാത്തതിനാല്‍ തിനെ കുറിച്ച് കൂടുതല്‍ പറയാന്‍ സാധിക്കില്ല.

മറ്റൊരു വഴി ഉള്ളത്, എം.ഓ.എച്ച് മായി ഇ മെയില്‍ വഴി ബന്ധപ്പെടുക. ഇഖാമ കോപ്പി, നഷ്ട്ടപ്പെട്ടു പോയ മൊബൈല്‍ നമ്പര്‍, നിലവിലുള്ള മൊബൈല്‍ നമ്പര്‍ എന്നിവയുടെ വിവരങ്ങള്‍ സഹിതം സ്വിഹത്തി മൊബൈല്‍ നമ്പര്‍ പുതിയ നമ്പരിലേക്ക് മാറ്റി കിട്ടുവാന്‍ അഭ്യര്‍ഥിച്ച് [email protected] ലേക്ക് മെയില്‍ അയക്കുക. ശ്രമിച്ച് നോക്കുക. പ്രതികരണം ചിലപ്പോള്‍ വൈകുകയോ ലഭിക്കാതിരിക്കുകയോ ചെയ്യാം.

4. കോവിഡ് ആദ്യ സമയത്ത് നാട്ടിലേക്ക് വന്നതാണ്. ഇപ്പോഴും നാട്ടിലാണ്. ഇപ്പോള്‍ കഫീല്‍ ഇഖാമ പുതുക്കി തന്നിട്ടുണ്ട്. പക്ഷെ ഇതുവരെ തവക്കല്‍ന ഉണ്ടാക്കിയിട്ടില്ല. ഇപ്പോൾ എങ്ങിനെയാണ് ഉണ്ടാക്കുന്നത്. അബ്ഷീര്‍ അക്കൌണ്ട് ഉണ്ടായിരുന്നു. പക്ഷെ ഫോണ്‍ നമ്പര്‍ ഇപ്പോള്‍ ഇല്ല. ഇപ്പോള്‍ സൗദിയിലുള്ള സുഹൃത്ത് മുഖേന സിംകാര്‍ഡ് സംഘടിപ്പിച്ചിട്ടുണ്ട്. ഇത് വെച്ച് നാട്ടില്‍ നിന്നും മാറ്റാരാൾക് ഉണ്ടാക്കാൻ കഴിമോ?

അബ്ഷീര്‍ ഇല്ലാത്ത വ്യക്തി ആയിരുന്നെങ്കില്‍ സാധിക്കുമായിരുന്നു. സൗദിയിലുള്ള ഒരാളുടെ മൊബൈല്‍ നമ്പര്‍ വെച്ച് സര്‍ട്ടിഫൈ ചെയ്ത് നാട്ടില്‍ നിന്ന് തന്നെ തവക്കല്‍ന ശരിയാക്കാന്‍ സാധിക്കുമായിരുന്നു. മുന്‍പ് അബ്ഷീര്‍ അക്കൌണ്ട് ഉണ്ടായിരുന്ന വ്യക്തിയാണെങ്കില്‍ ഇപ്പോള്‍ ആ സാധ്യതയില്ല. ആദ്യം അബ്ഷീര്‍ അക്കൌണ്ടില്‍ മൊബൈല്‍ നമ്പര്‍ അപ്ഡേറ്റ് ചെയ്യേണ്ടതുണ്ട്. വിരലടയാളം വെച്ച് അപ്ഡേറ്റ് ചെയ്യണം എന്നതിനാല്‍ സൗദിയില്‍ ഉണ്ടെങ്കില്‍ മാത്രമേ ഇത് അപ്ഡേറ്റ് ചെയ്യാനും സാധിക്കുകയുള്ളൂ.

5. പുതിയ വിസക്കര്‍ക്ക് ദുബായില്‍ നിന്നും സൗദിയിലേക്ക് പോകുന്നതിനു ഏതൊക്കെ രേഖകളാണ് ആവശ്യമായുള്ളത്?

  1. മുഖീം അറൈവല്‍ രജിസ്ട്രേഷന്‍ പ്രിന്റൌട്ട്. മൊബൈലില്‍ പി.ഡി.എഫ് ഫോര്‍മാറ്റില്‍ സൂക്ഷിച്ചാലും മതിയാകും. സൗദിയിലേക്ക് വിമാനം കയറുന്നതിനു മുന്‍പുള്ള മൂന്നോ നാലോ ദിവസം മുന്‍പ് മുഖീമില്‍ രജിസ്റ്റര്‍ ചെയ്യാം.
  2. യാത്ര ചെയ്യുന്നതിന് 72 മണിക്കൂറിനുള്ളില്‍ ചെയ്തിട്ടുള്ള ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട്.
  3. വിസയുള്ള പാസ്പോര്‍ട്ട് ഉണ്ടായിരിക്കണം. പാസ്പോര്‍ട്ട് പുതുക്കിയിട്ടുണ്ട് എങ്കില്‍ പഴയ പാസ്പോര്‍ട്ട് കൂടി കൈവശം കരുതുക.
  4. വാക്സിനേഷന്‍ സര്‍ട്ടിഫിക്കറ്റ് ഉണ്ടായിരിക്കണം.
  5. വിമാന ടിക്കറ്റ്
  6. യു.എ.ഇ വിസിറ്റ് വിസയുടെ കോപ്പി ഉണ്ടായിരിക്കണം.
  7. മൊബൈല്‍ ഫോണില്‍ തവക്കല്‍ന അപ്ളിക്കേഷന്‍ ഡൌണ്‍ലോഡ്‌ ചെയ്തിരിക്കണം. സൗദിയില്‍ എത്തിയ ശേഷം ആക്റ്റിവേറ്റ് ചെയ്‌താല്‍ മതിയാകും. എന്നാല്‍ അപ്ളിക്കേഷന്‍ മൊബൈലില്‍ ഡൌണ്‍ലോഡ്‌ ചെയ്തിരിക്കണം എന്നത് നിര്‍ബന്ധമാണ്‌. സൗദിയില്‍ എത്തിയ ശേഷം പാസ്പോര്‍ട്ട് നമ്പര്‍ വെച്ച് ആക്റ്റിവേറ്റ് ചെയ്യാന്‍ സാധിക്കും.
  8. സൗദിയിലേക്ക് പ്രവേശിക്കുന്നതിന് മുന്‍പായി മറ്റൊരു രാജ്യത്ത് 14 ദിവസം ചിലവഴിച്ചിരിക്കണം എന്നെത് നിര്‍ബന്ധമായ നിബന്ധനയാണ്. ഇതിനായി പ്രത്യേക രേഖയൊന്നും ആവശ്യമില്ല. ഇത് പാസ്പോര്‍ട്ടിലെ സ്റ്റാമ്പില്‍ നിന്നും വ്യക്തമാകും.

6. ഞാന്‍ അടുത്ത ദിവസം ദുബായില്‍ നിന്നും റിയാദിലേക്ക് യാത്ര ചെയ്യുവാനായി ടിക്കറ്റ് ബുക്ക് ചെയ്തിരുന്നു. നാട്ടിലുള്ള ട്രാവല്‍ ഏജന്റാണ് ബുക്ക് ചെയ്തത്. വിമാന യാത്രയില്‍ ഏഴ് കിലോ ഹാന്‍ഡ് ബാഗേജ് മാത്രമാണ് അനുവദിക്കുക എന്ന് പറയുന്നു. പക്ഷെ എനിക്ക് കൂടുതല്‍ ലഗേജ് ഉണ്ട്. അത് കൊണ്ട് പോകാന്‍ ഞാന്‍ എന്താണ് ചെയ്യേണ്ടത്?

ചിലവ് കുറയ്ക്കാനായി നിങ്ങള്‍ക്ക് ടിക്കറ്റ് ബുക്ക് ചെയ്തു തന്ന ട്രാവല്‍ എജന്റ് ഹാന്‍ഡ് ബാഗേജ് മാത്രമുള്ള ടിക്കറ്റ് ആയിരിക്കും നിങ്ങള്‍ക്കായി എടുത്തിട്ടുണ്ടാവുക. ചില ബഡ്ജറ്റ് വിമാന കമ്പനികള്‍ കുറഞ്ഞ നിരക്കില്‍ യാത്രക്കാരെ ആകര്‍ഷിക്കാനായി അത്തരത്തിലുള്ള ടിക്കറ്റുകളും യാത്രക്കാര്‍ക്ക് നല്‍കുന്നുണ്ട്. നിങ്ങള്‍ക്ക് കൂടുതല്‍ ലഗേജ് കൊണ്ട് പോകാനുണ്ടെങ്കില്‍ ഓണ്‍ലൈന്‍ വഴി കൂടുതല്‍ പണം നല്‍കി പര്‍ച്ചേസ് ചെയ്യാന്‍ സാധിക്കും. എയര്‍പോര്‍ട്ടില്‍ എത്തിയതിനു ശേഷം പര്‍ച്ചേസ് ചെയ്യാതെ മുന്‍കൂട്ടി എടുക്കുന്നതായിരിക്കും നല്ലത്. നേരിട്ട് ചെയ്യാന്‍ സാധിക്കുന്നില്ലെങ്കില്‍ നിങ്ങള്‍ക്ക് ടിക്കറ്റ് ബുക്ക് ചെയ്തു തന്ന ട്രാവല്‍ എജന്റുമായി ബന്ധപ്പെടുകയാണ് ഉത്തമം.

7. സൗദിയിലേക്ക് വിസിറ്റ് വിസയില്‍ പോകുന്നവര്‍ എന്തൊക്കെ രേഖകളാണ് കൈവശം സൂക്ഷിക്കേണ്ടത്?

  1. വാക്സിനേറ്റഡ്‌ വിസിറ്റര്‍ എന്ന സ്റ്റാറ്റസ് വെളിപ്പെടുത്തുന്ന മുഖീം രജിസ്ട്രേഷന്‍ പ്രിന്റൌട്ട്. പി ഡി എഫ് കോപിയും സ്വീകാര്യമാണ്. വിമാനം പുറപ്പെടുന്നതിന് മൂന്നോ നാലോ ദിവസത്തിനുള്ളില്‍ മുഖീമില്‍ രജിസ്റ്റര്‍ ചെയ്യാന്‍ സാധിക്കും.
  2. വിസയുള്ള പാസ്പോര്‍ട്ട്.
  3. സൗദിയിലേക്കുള്ള വിമാന ടിക്കറ്റ്.
  4. റിട്ടേണ്‍ ഡമ്മി ടിക്കറ്റ്. ഇത് പലപ്പോഴും ചോദിക്കാറില്ല. പക്ഷെ ചോദിച്ചാല്‍ കാണിച്ചില്ലെങ്കില്‍ യാത്രക്ക് തടസ്സം നേരിടും.
  5. നാട്ടില്‍ നിന്നുള്ള ഒറിജിനല്‍ വാക്സിനേഷന്‍ സര്‍ട്ടിഫിക്കറ്റ്.
  6. മെഡിക്കല്‍ ഇന്‍ഷുറന്‍സ്.
  7. രക്ഷ കര്‍ത്താവിന്റെ (ആശ്രിത വിസ സ്പോണ്‍സര്‍ ചെയ്യുന്ന വ്യക്തി) ഇഖാമ കോപ്പി.
  8. യാത്ര ചെയ്യുന്നതിന് 72 മണിക്കൂറിനുള്ളില്‍ ചെയ്തിട്ടുള്ള ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട്.
  9. മൊബൈല്‍ ഫോണില്‍ തവക്കല്‍ന അപ്ളിക്കേഷന്‍ ഡൌണ്‍ലോഡ്‌ ചെയ്തിരിക്കണം. സൗദിയില്‍ എത്തിയ ശേഷം ആക്റ്റിവേറ്റ് ചെയ്‌താല്‍ മതിയാകും. എന്നാല്‍ അപ്ളിക്കേഷന്‍ മൊബൈലില്‍ ഡൌണ്‍ലോഡ്‌ ചെയ്തിരിക്കണം എന്നത് നിര്‍ബന്ധമാണ്‌. സൗദിയില്‍ എത്തിയ ശേഷം പാസ്പോര്‍ട്ട് നമ്പര്‍ വെച്ച് ആക്റ്റിവേറ്റ് ചെയ്യാന്‍ സാധിക്കും.
  10. സൗദിയിലേക്ക് പ്രവേശിക്കുന്നതിന് മുന്‍പായി മറ്റൊരു രാജ്യത്ത് 14 ദിവസം ചിലവഴിച്ചിരിക്കണം എന്നത് നിര്‍ബന്ധമായ വ്യവസ്ഥയാണ്‌. ഇതിനായി പ്രത്യേക രേഖയൊന്നും ആവശ്യമില്ല. ഇത് പാസ്പോര്‍ട്ടിലെ സ്റ്റാമ്പില്‍ നിന്നും വ്യക്തമാകും.

 

8. എക്സിറ്റ്-റീ എന്‍ട്രി വിസ എങ്ങിനെയാണ് ഓണ്‍ലൈന്‍ ആയി പരിശോധിക്കാന്‍ സാധിക്കുക. അതിന്റെ നടപടി ക്രമങ്ങള്‍ പറഞ്ഞു തരാമോ?

https://muqeem.sa/#/visa-validity/check എന്ന ഈ ലിങ്കില്‍ ക്ലിക്ക് ചെയ്ത് മുഖീമിലെ വിസ വാലിഡിറ്റി പേജിലേക്ക് പ്രവേശിക്കാം. ഇഖാമ നമ്പര്‍ ഉപയോഗിച്ചും വിസ നമ്പര്‍ ഉപയോഗിച്ചും രണ്ടു തരത്തില്‍ എക്സിറ്റ്-റീ എന്‍ട്രി വിസ കാലാവധി പരിശോധിക്കാന്‍ സാധിക്കും. ഏത് ഓപ്ഷന്‍ ഉപയോഗിച്ചാലും അതിനെ ക്രോസ് മാച്ച് ചെയ്യുന്നതിനായി മറ്റു ഏതെങ്കിലും ഒരു വിവരം കൂടി കൊടുക്കേണ്ടതുണ്ട്.

ഇഖാമ നമ്പര്‍ നല്‍കിയാണ്‌ എക്സിറ്റ്-റീ എന്‍ട്രി വിസ കാലാവധി പരിശോധിക്കുന്നതെങ്കില്‍ ഏറ്റവും മുകളില്‍ Iqama Number എന്ന് കാണുന്നിടത്ത് ക്ലിക്ക് ചെയ്യുക.

അതിനു ശേഷം അതിനു താഴെയായി iqama Number എന്ന് കാണുന്നിടത്ത് നിങ്ങളുടെ ഇഖാമ നമ്പര്‍ നല്‍കുക. അതിനു ശേഷം താഴെ Cross Match by എന്ന് കാണുന്നിടത്ത് ക്ലിക്ക് ചെയ്യുമ്പോള്‍ വിസ നമ്പര്‍, പാസ്പോര്‍ട്ട് നമ്പര്‍, പേര്, ജനന തിയ്യതി, ഇഖാമ അവസാനിക്കുന്ന തിയ്യതി, വിസ അവസാനിക്കുന്ന തിയ്യതി എന്നിങ്ങനെയുള്ള ഓപ്ഷനുകള്‍ കാണാന്‍ സാധിക്കും. അതില്‍ നിങ്ങള്‍ക്ക് വിവരം കൊടുക്കുക.

നിങ്ങള്‍ ജനന തിയ്യതിയാണ് കൊടുക്കാന്‍ ഉദ്ദേശിക്കുന്നത് എങ്കില്‍ Date of Birth എന്ന ഓപ്ഷനില്‍ ക്ലിക്ക് ചെയ്യുക. തുടര്‍ന്ന് വരുന്ന കലണ്ടറില്‍ നിന്നും ജനന തിയ്യതിയും മാസവും വര്‍ഷവും കൊടുക്കുക. അതിനു ശേഷം താഴെയായി Check  എന്നതില്‍ ക്ലിക്ക് ചെയ്യുമ്പോള്‍ അടുത്ത പേജില്‍ എക്സിറ്റ്-റീ എന്‍ട്രി വിസ കാലാവധി വിവരങ്ങള്‍ കാണിക്കും.

അതില്‍ ഇടത് വശത്ത് ഏറ്റവും മുകളിലായി പാസ്പോര്‍ട്ട് നമ്പര്‍ കാണാം, അതിനു താഴെയായി Duration  എന്ന് കൊടുതിരിക്കുന്നിടത്ത് വിസ അനുവദിച്ചിരുക്കുന്നത് എത്ര ദിവസത്തേക്കാണ് എന്ന് കാണാം. അതിനു താഴെയായി വിസ ഇഷ്യു ചെയ്ത തിയ്യതി (Visa Issue Date), ഏത് തിയ്യതിക്ക് മുന്‍പായാണ് സൗദിയിലേക്ക് തിരിച്ച് പ്രവേശിക്കേണ്ടത് ((Return Before) എന്നിവ കാണാന്‍ സാധിക്കും.

അതിനു എതിര്‍ വശത്തായി വിസ ടൈപ്പ് എന്ന് കാണാം നിങ്ങളുടെ എക്സിറ്റ്-റീ എന്‍ട്രി വിസ ഒരു തവത്തെക്കുള്ള വിസയാണോ (Single) അതോ പല തവണ ഉപയോഗിക്കാവുന്ന വിസയാണോ (Multiple) എന്നതാണ് അത് സൂചിപ്പിക്കുന്നത്. അതിനു താഴെയായി നിങ്ങള്‍ രാജ്യത്തിനകത്താണോ പുറത്താണോ നിലവില്‍ ഉള്ളത് (Inside/Outside Kingdom) എന്നും കാണാം.

അതിനു താഴെയായി നിങ്ങള്‍ തിരിച്ചു സൗദിയിലേക്ക് പ്രവേശിക്കേണ്ട അവസാന തിയ്യതിയും (Return Before) കാണാന്‍ സാധിക്കും. ഇതാണ് നിങ്ങളുടെ എക്സിറ്റ്-റീ എന്‍ട്രി വിസ  കാലാവധി. ഈ തിയ്യതിക്ക് മുന്‍പായി നിങ്ങള്‍ സൗദിയിലേക്ക് തിരിച്ചെത്തിയില്ലെങ്കില്‍ നിങ്ങളുടെ എക്സിറ്റ്-റീ എന്‍ട്രി വിസ സാധുതയില്ലാത്തതായി തീരും. എക്സിറ്റ്-റീ എന്‍ട്രി വിസ നീട്ടി കിട്ടിയിട്ടുണ്ട് എങ്കില്‍ ഇവിടെ അത് കാണാന്‍ സാധിക്കും.

9. യു.എ.ഇ യിലേക്ക് യാത്ര ചെയ്യാന്‍ എന്തൊക്കെ രേഖകളാണ് ആവശ്യമായി വരുന്നത്?

  1. യു.എ.ഇ ടൂറിസ്റ്റ് വിസ
  2. ഇന്‍ഷുറന്‍സ്
  3. വിമാനം പുറപ്പെടുന്നതിന് 48 മണിക്കൂറിനുള്ളില്‍ എടുത്ത ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട്. ഇവിടെ ഒരു കാര്യം പ്രത്യേകം ശ്രദ്ധിക്കുക. സൗദിയിലേക്ക് പോകുന്നതിനാല്‍ 72 മണിക്കൂറിനുള്ളില്‍ എടുത്ത ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട് ഹാജരാക്കേണ്ടത്. യു.എ.ഇ യിലേക്ക് 48 മണിക്കൂര്‍ ആണ് നിബന്ധന. ഇത് മൂലം ചിലരുടെയെങ്കിലും യാത്ര മുടങ്ങിയ സംഭവങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.
  4. വിമാനം പുറപ്പെടുന്നതിന് 6 മണിക്കൂറിനുള്ളില്‍ എടുത്ത റാപിഡ് ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട്. ഇത് യാത്ര ചെയ്യുന്ന എയര്‍പോര്‍ട്ടില്‍ നിന്നും എടുക്കാം.
  5. വാക്സിനേഷന്‍ സര്‍ട്ടിഫിക്കറ്റ്
  6. വിമാന ടിക്കറ്റ്.
  7. റിട്ടേണ്‍ ഡമ്മി ടിക്കറ്റ്. ഇത് പലപ്പോഴും ചോദിക്കാറില്ല. പക്ഷെ ചോദിച്ചാല്‍ കാണിച്ചില്ലെങ്കില്‍ യാത്രക്ക് തടസ്സം നേരിടും.
  8. കാലാവധിയുള്ള പാസ്പോര്‍ട്ട്. ചുരുങ്ങിയത് ആറു മാസമെങ്കിലും കാലാവധി ഉണ്ടായിരിക്കണം.
  9. യു.എ.ഇ യില്‍ താമസ സൗകര്യത്തിന്റെ തെളിവ്. ചിലപ്പോള്‍ ആവ്ശയ്പ്പെട്ടെക്കം. ഹോട്ടല്‍ ബുക്കിംഗ് ഇതിനുള്ള തെളിവായി കാണിക്കാവുന്നതാണ്. പലപ്പോഴും സുഹൃത്തുക്കളുടെയോ ബന്ധുക്കളുടെയോ അടുത്ത താമസിക്കാന്‍ പദ്ധതിയുള്ളവര്‍ ഉണ്ടായിരിക്കും. അവര്‍ തങ്ങള്‍ താമസിക്കാന്‍ ഉദ്ദേശിക്കുന്ന വ്യക്തിയുടെ എമിരേറ്റ്സ് ഐ.ഡി യുടെ കോപ്പി, അയാളുടെ വിലാസം, ബന്ധപ്പെടാനുള്ള നമ്പര്‍ എന്നിവ കൈവശം കരുതുന്നത് നന്നായിരിക്കും.
  10. എയര്‍പോര്‍ട്ടില്‍ നിന്നും നടത്തുന്ന പി സി ആര്‍ ടെസ്റ്റ്‌ റിസള്‍ട്ട് ലഭിക്കുന്നതിന് ആവശ്യമായ ഒരു യു.എ.ഇ മൊബൈല്‍ നമ്പര്‍ ആവശ്യമായുണ്ട്. ഇതിനായി പുതിയ സിം എടുക്കുകയോ സുഹൃത്തിന്റെയോ ബന്ധുവിന്റെയോ നമ്പര്‍ നല്‍കുകയോ ചെയ്യാം.

10. സൗദിയിലേക്ക് കൂടുതല്‍ ആളുകളും ദുബായ് വഴിയാണല്ലോ പോകുന്നത്. എനിക്ക് അബുദാബിയില്‍ ബന്ധുക്കളുണ്ട്. വിസിറ്റ് വിസ എടുത്ത് എനിക്ക് അബുദാബി വഴി സൗദിയിലേക്ക് പോകാന്‍ സാധിക്കുമോ?

സാധിക്കും. യു.എ.ഇ ടൂറിസ്റ്റ് വിസിറ്റ് വിസ എടുത്ത് ഏത് എമിറേറ്റ് വഴിയും പോകാന്‍ സാധിക്കും. രണ്ടു ഡോസ് വാക്സിന്‍ എടുത്തിരിക്കണം.

11. എന്റെ ഇഖാമ കോപ്പി നഷ്ടപ്പെട്ടു. സ്പോണ്‍സറുമായി ബന്ധപ്പെടാതെ ഇഖാമ കോപ്പി ലഭിക്കാന്‍ എന്താണ് മാര്‍ഗ്ഗം?

തവക്കല്‍നയില്‍ നിന്നും കോപ്പി എടുക്കാന്‍ സാധിക്കും. തവക്കല്‍ന പ്രധാന പേജില്‍ ഹോം, സര്‍വീസസ്, എന്നിവ കഴിഞ്ഞാല്‍ വലത്ത് ഭാഗത്ത് ഡിജിറ്റല്‍ ഡോക്യുമെന്റ്സ് എന്ന ഐക്കണില്‍ ക്ലിക്ക് ചെയ്‌താല്‍ ഡിജിറ്റല്‍ ഇഖാമ കാണാന്‍ സാധിക്കും. തവക്കല്‍ന ഓപണ്‍ ചെയ്യാന്‍ സാധിക്കുമെങ്കില്‍ നേരിട്ടും കാണിച്ചു കൊടുക്കാം. ചിലപ്പോള്‍ ഇന്റര്‍നെറ്റ്‌ കണക്റ്റിവിറ്റി പ്രശ്നങ്ങള്‍ മൂലം ഉണ്ടാകുന്ന അസൗകര്യങ്ങള്‍ ഒഴിവാക്കാന്‍ അതില്‍ നിന്നും കോപ്പി എടുത്ത് സൂക്ഷിക്കാം. സ്ക്രീന്‍ ഷോട്ട് ആയാലും മതി.

12. സൗദിയില്‍ ഇഖാമ ഉള്ളവര്‍ക്ക് റോഡ്‌ മാര്‍ഗ്ഗം സൗദിയിലേക്ക് യാത്ര ചെയ്യാന്‍ എന്തെല്ലാം രേഖകളാണ് ആവശ്യമായുള്ളത്?

  1. വാക്സിനേറ്റഡ്‌ റെസിഡന്റ് എന്ന സ്റ്റാറ്റസ് വെളിപ്പെടുത്തുന്ന മുഖീം രജിസ്ട്രേഷന്‍. അതിര്‍ത്തി കടക്കുന്നതിനു മൂന്നോ നാലോ ദിവസം മുന്‍പ് മുഖീമില്‍ രജിസ്റ്റര്‍ ചെയ്യാന്‍ സാധിക്കും.
  2. കാലാവധിയുള്ള എക്സിറ്റ്/റീ എന്‍ട്രി വിസ ഉണ്ടായിരിക്കണം.
  3. കാലാവധിയുള്ള പാസ്പോര്‍ട്ട്
  4. ഇന്ത്യയില്‍ നിന്നുള്ളതോ സൗദിയില്‍ നിന്നുള്ളതോ ആയ വാക്സിനേഷന്‍ സര്‍ട്ടിഫിക്കറ്റ്.
  5. സ്വഹത്തിയില്‍ നിന്നുള്ള സൗദി ആരോഗ്യ മന്ത്രാലയത്തിന്റെ വാക്സിനേഷന്‍ സര്‍ട്ടിഫിക്കറ്റ്. അല്ലെങ്കില്‍ തവക്കല്‍നയിലെ ഹെല്‍ത്ത് പാസ്പോര്‍ട്ട്. അല്ലെങ്കില്‍ തവക്കല്‍നയിലെ ഇമ്മ്യൂണ്‍ സ്റ്റാറ്റസ്. പലപ്പോഴും ഇത് നിര്‍ബന്ധമായി ആവശ്യപ്പെടുന്നില്ല.
  6. യാത്ര ചെയ്യുന്നതിന് 72 മണിക്കൂറിനുള്ളില്‍ ചെയ്തിട്ടുള്ള ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട്.
  7. ഇഖാമ
  8. യു.എ.ഇ വിസിറ്റ് വിസ കോപ്പി.
  9. സൗദിയിലേക്ക് പ്രവേശിക്കുന്നതിന് മുന്‍പായി മറ്റൊരു രാജ്യത്ത് 14 ദിവസം ചിലവഴിച്ചിരിക്കണം എന്നത് നിര്‍ബന്ധമായ വ്യവസ്ഥയാണ്‌. ഇതിനായി പ്രത്യേക രേഖയൊന്നും ആവശ്യമില്ല. ഇത് പാസ്പോര്‍ട്ടിലെ സ്റ്റാമ്പില്‍ നിന്നും വ്യക്തമാകും.

13. ഞാന്‍ സൗദിയില്‍ നിന്നും ഫൈനല്‍ എക്സിറ്റില്‍ വന്നതാണ്. പുതിയ വിസയില്‍ രണ്ടാഴ്ച്ചക്ക് ശേഷം തിരിച്ചു പോകേണ്ടതാണ്. എനിക്ക് മറ്റൊരു രാജ്യത്ത് 14 ദിവസം താമസിക്കാതെ തന്നെ നാട്ടില്‍ നിന്നും സൗദിയിലേക്ക് നേരിട്ട് പ്രവേശിക്കാന്‍ സാധിക്കുമോ?

സൗദിയില്‍ നിന്നും രണ്ടു ഡോസ് വാക്സിന്‍ എടുത്തവര്‍ക്ക് സൗദിയിലേക്ക് നേരിട്ട് പ്രവേശിക്കാന്‍ അനുമതിയുണ്ട്. പുതിയ വിസയില്‍ വരുന്നവര്‍ക്കും നേരിട്ട് പ്രവേശിക്കാന്‍ സാധിക്കുമെന്ന് ജവാസാത് സമീപ ദിവസങ്ങളില്‍ വ്യക്തമാക്കിയിട്ടുണ്ട്. എന്നാല്‍ എയര്‍ ഇന്ത്യ എക്സ്പ്രസ് തിരുവനന്തപുരത്ത് നിന്നുള്ള യാത്രക്കാരനെ നേരിട്ട് യാത്ര ചെയ്യാന്‍ അനുവദിക്കാതിരുന്ന സംഭവം കഴിഞ്ഞ ദിവസം ഉണ്ടായിട്ടുണ്ട്. സൗദിയില്‍ ഇഖാമ ഉള്ളവര്‍ക്ക് മാത്രം ബോര്‍ഡിംഗ് പാസ് നല്‍കിയാല്‍ മതിയെന്ന് തങ്ങള്‍ക്ക് നിര്‍ദ്ദേശം ഉണ്ടെന്ന് പറഞ്ഞാണ് യാത്രക്കാരന് ബോര്‍ഡിംഗ് പാസ് നിഷിധിച്ചത്. സമാനമായ അനുഭവം മറ്റു ചില യാത്രക്കാര്‍ക്കും എയര്‍ ഇന്ത്യ എക്സ്പ്രസ്സിന്റെ ഭാഗത്ത് നിന്നും ഉണ്ടായിട്ടുണ്ട്. എന്നാല്‍ ഈ സ്റ്റാറ്റസ് ഇല്ല നിരവധി പേര്‍ ഇന്‍ഡിഗോ സര്‍വീസ് ഉപയോഗപ്പെടുത്തി സൗദിയിലേക്ക് നേരിട്ട് പ്രവേശിച്ചിട്ടുണ്ട്. അതിനാല്‍ നേരിട്ട് പോകാന്‍ ഉദ്ദേശിക്കുന്നുണ്ടെങ്കില്‍ എയര്‍ ഇന്ത്യ എക്സ്പ്രസ് വഴിയുള്ള യാത്ര ഒഴിവാക്കുന്നതാണ് നല്ലത്. ട്രാവല്‍ എജന്റിനോട് ഇക്കാര്യം ചോദിച്ച് ഉറപ്പ് വരുത്തുകയും വേണം.

14. പുതിയ വിസക്കര്‍ക്ക് റോഡ്‌ മാര്‍ഗ്ഗം ദുബായില്‍ നിന്നും സൗദിയിലേക്ക് പോകാന്‍ സാധിക്കുമോ?

തുടക്കത്തില്‍ പുതിയ വിസക്കര്‍ക്ക് തടസ്സങ്ങള്‍ നേരിട്ടിരുന്നു. ഇപ്പോള്‍ അത്തരം പ്രശ്നങ്ങള്‍ ഇല്ല എന്നാണ് അറിവ്. ദുബായ് – ദമ്മാം, റിയാദ് ബസ് സര്‍വീസ് നടത്തുന്നവര്‍ ഇപ്പോള്‍ പുതിയ വിസക്കാരെയും കൊണ്ട് പോകുന്നുണ്ട്.

15. ദുബായില്‍ നിന്നും കാര്‍ / ടാക്സി വഴി യാത്ര ചെയ്യുന്നത് ബസ് മാര്‍ഗ്ഗം പോകുന്നതിനെക്കാള്‍ നല്ലതാണോ? കുടുംബമായി അടുത്ത ആഴ്ച യാത്ര ചെയ്യാനുള്ളതാണ്.

യാത്രാ ചിലവില്‍ കുറച്ച് കൂടി പണം അധികം ചിലവാകും എന്നത് ഒഴിച്ച് നിര്‍ത്തിയാല്‍ കുടുംബമായി യാത്ര ചെയ്യുന്നതാണെങ്കില്‍ ടാക്സി വഴി പോകുന്നതാണ് ബസ് മാര്‍ഗ്ഗം യാത്ര ചെയ്യുന്നതിനേക്കാള്‍ നല്ലത്. ടാക്സി വഴി യാത്ര ചെയ്യുമ്പോള്‍ പല ഗുണങ്ങളും ഉണ്ട്. നിങ്ങളുടെ ബോര്‍ഡിംഗ് പോയിന്റില്‍ വന്നു ടാക്സിക്കാര്‍ നിങ്ങളെ പിക്ക് ചെയ്യും എന്നുള്ളതാണ് അതിലൊന്ന്.

മറ്റൊന്ന് ബോര്‍ഡറില്‍ അധികം സമയം ചിലവഴിക്കേണ്ടി വരില്ല. ബസ് മാര്‍ഗ്ഗം യാത്ര ചെയ്യുമ്പോള്‍ ഏതെങ്കിലും ഒരു യാത്രക്കാരന്റെ യാത്ര രേഖകളില്‍ തകരാര്‍ ഉണ്ടെങ്കില്‍ അത് മറ്റുള്ള യാത്രക്കാരുടെ സമയത്തെ കൂടി ബാധിക്കും. ലഗേജ് പരിശോധനക്കും സമയം ലാഭിക്കാന്‍ കഴിയും.

ദുബായ് സിറ്റിയില്‍ നിന്നുള്ള ഗതാഗത തിരക്ക് കഴിഞ്ഞാല്‍ പിന്നീട് തടസ്സങ്ങള്‍ ഇല്ലാതെ എത്താന്‍ സാധിക്കും. പരമാവധി പത്തു മണിക്കൂറിനുള്ളില്‍ ദുബായില്‍ നിന്ന് റോഡ്‌ മാര്‍ഗ്ഗം ദമ്മാമില്‍ എത്തി ചേരാന്‍ സാധിക്കുമെന്നാണ് അനുഭവസ്ഥര്‍ പറയുന്നത്.

16. സൗദിയില്‍ ഇഖാമ ഉള്ളവര്‍ക്ക് നാട്ടില്‍ നിന്നും നേരിട്ട് സൗദിയിലേക്ക് യാത്ര ചെയ്യാന്‍ ആവശ്യമായ രേഖകള്‍ എന്തൊക്കെയാണ്?

  1. വാക്സിനേറ്റഡ്‌ റെസിഡന്റ് എന്ന സ്റ്റാറ്റസ് വെളിപ്പെടുത്തുന്ന മുഖീം രജിസ്ട്രേഷന്‍. സൗദിയിലേക്ക് വിമാനം കയറുന്നതിനു മുന്‍പുള്ള മൂന്നോ നാലോ ദിവസം മുന്‍പ് മുഖീമില്‍ രജിസ്റ്റര്‍ ചെയ്യാം. അതിന്റെ പ്രിന്റൌട്ട് കൈവശം കരുതുക. മൊബൈലില്‍ പി.ഡി.എഫ് ഫോര്‍മാറ്റില്‍ സൂക്ഷിച്ചാലും മതിയാകും.
  2. കാലാവധിയുള്ള എക്സിറ്റ്/റീ എന്‍ട്രി വിസ ഉണ്ടായിരിക്കണം.
  3. തവക്കല്‍നഇമ്മ്യൂണ്‍ സ്റ്റാറ്റസ്.
  4. തവക്കല്‍ന ഹെല്‍ത്ത് പാസ്പോര്‍ട്ട്.
  5. സ്വഹത്തിയില്‍ നിന്നുള്ള സൗദി ആരോഗ്യ മന്ത്രാലയത്തിന്റെ വാക്സിനേഷന്‍ സര്‍ട്ടിഫിക്കറ്റ്.
  6. കാലാവധിയുള്ള പാസ്പോര്‍ട്ട്
  7. ഇഖാമ കോപ്പി. ഇഖാമ കോപ്പിയോ ഡിജിറ്റല്‍ ഫോര്‍മാറ്റോ കാണിച്ചു കൊടുക്കാം.
  8. വിമാന ടിക്കറ്റ്
  9. യാത്ര ചെയ്യുന്നതിന് 72 മണിക്കൂറിനുള്ളില്‍ ചെയ്തിട്ടുള്ള ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട്.

17. ഇപ്പോള്‍ ദുബായിലാണ് ഉള്ളത്. അടുത്തയാഴ്ച സൗദിയിലേക്ക് വിസിറ്റ് വിസയില്‍ പോകാനുള്ളതാണ്. സൗദിയിലേക്ക് യാത്ര ചെയ്യുമ്പോള്‍ ഡമ്മി റിട്ടേണ്‍ ടിക്കറ്റ് എടുക്കേണ്ട ആവശ്യമുണ്ടോ? ഇതിന് മുന്‍പ് യാത്ര ചെയ്ത എന്റെ സുഹൃത്തിന്റെ കുടുംബത്തിനോടു റിട്ടേണ്‍ ടിക്കറ്റ് ചോദിച്ചിരുന്നില്ല.

വിസിറ്റ് വിസയില്‍ പോകുമ്പോള്‍ റിട്ടേണ്‍ ടിക്കറ്റ് ആവശ്യമാണ്. നിങ്ങളുടെ സുഹൃത്തിന്റെ കുടുംബത്തോട് റിട്ടേണ്‍ ടിക്കറ്റ് ചോദിച്ചില്ല എന്നതിന്റെ അര്‍ഥം അത് ആവശ്യമില്ല എന്നല്ല. ബോര്‍ഡിംഗ് പാസ് ഇഷ്യൂ ചെയ്യുന്ന സമയത്ത് ചിലപ്പോള്‍ ചോദിക്കാം, ചോദിക്കാതിരിക്കാം. ഇത്രയും രേഖകള്‍ ഒരു യാത്രക്കാരന്റെ കൈവശം ഉണ്ടാകണം എന്നത് യാത്രക്കയുള്ള നിബന്ധനയുടെ ഭാഗമാണ്. ചോദിക്കുന്ന അവസരത്തില്‍ റിട്ടേണ്‍ ടിക്കറ്റ് കാണിക്കാന്‍ സാധിച്ചില്ലെങ്കില്‍ യാത്ര മുടങ്ങാനുള്ള സാധ്യതയും കൂടുതലാണ്.

പലരും ഡമ്മി റിട്ടേണ്‍ ടിക്കറ്റിലാണ് യാത്ര ചെയ്യുന്നത്. ചിലര്‍ റിട്ടേണ്‍ ടിക്കറ്റ് ചോദിക്കുന്ന സമയത്ത് ഉടനെ എടുക്കാനുള്ള സൗകര്യം ഉപയോഗിച്ചും യാത്ര ചെയ്യുന്നുണ്ട്. അതിനായി നാട്ടിലോ സൗദിയിലോ ദുബായിലോ ഉള്ള ട്രാവല്‍ ഏജന്റിനെ ബന്ധപ്പെടാനുള്ള സൗകര്യം ഉണ്ടാക്കുന്നത് നന്നായിരിക്കും. ചോദിക്കുന്ന സമയത്ത് ഉടനെ ടിക്കറ്റ് ഇഷ്യൂ ചെയ്യാന്‍ സാധിക്കുന്നവരായിരിക്കണം അവര്‍. ഇങ്ങിനെ യാത്ര ചെയ്യാനാണ് ഉദ്ദേശിക്കുന്നതെങ്കില്‍ യാത്രക്ക് മൂന്ന് മണിക്കൂര്‍ എങ്കിലും മുന്‍പ് റിപ്പോര്‍ട്ട് ചെയ്യുന്നതാണ് നല്ലത്. അങ്ങിനെയാണെങ്കില്‍ റിട്ടേണ്‍ ടിക്കറ്റ് ആവശ്യപ്പെട്ട് ബോര്‍ഡിംഗ് പാസ് നിഷേധിക്കുകയാണെങ്കില്‍ അത് ഉടനെ എടുക്കാനുള്ള സമയം ലഭിക്കും.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/J1zYcdCGveeItkPfTH4vck

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

LATEST

യു.എ.ഇ യില്‍ 14 ദിവസം താമസിക്കേണ്ട, സൗദിയിലേക്ക് അനധികൃത ചവിട്ടി കയറ്റല്‍

Published

on

റിയാദ്: യു.എ.ഇ യില്‍ നിന്നും കോവിഡ് നിബന്ധനകളോ നിയമങ്ങളോ പാലിക്കാതെ സൗദിയിലേക്ക് ഇന്ത്യക്കാര്‍ അടക്കമുള്ള യാത്രക്കാര്‍ എത്തുന്നതായി റിപ്പോര്‍ട്ട്. റോഡ്‌ മാര്‍ഗ്ഗമാണ് അനധികൃതമായി യാത്രക്കാരെ സൗദിയിലേക്ക് എത്തിക്കുന്നത്. രണ്ടോ മൂന്നോ ദിവസം യു.എ.ഇ യില്‍ താമസിച്ചവര്‍ പോലും ഇത്തരത്തില്‍ ദുബായില്‍ നിന്നും റോഡ്‌ മാര്‍ഗ്ഗം സൗദിയില്‍ എത്തിയിട്ടുണ്ട്.

സൗദിയില്‍ നിന്നും രണ്ടു വാക്സിന്‍ എടുക്കാത്ത വിദേശികള്‍ മറ്റൊരു രാജ്യത്ത് പതിനാലു ദിവസം താമസിച്ച ശേഷം മാത്രമേ സൗദിയിലേക്ക് പ്രവേശിക്കാന്‍ പാടുള്ളൂ എന്നാണു നിബന്ധന. എന്നാല്‍ ഈ നിബന്ധന മറി കടന്നു കൊണ്ടാണ് വിദേശികളെ സൗദിയിലേക്ക് അനധികൃതമായി എത്തിക്കുന്നത്.

ബസ് മാര്‍ഗ്ഗമാണ് ഇങ്ങിനെ വിദേശികള്‍ അനധികൃതമായി സൗദിയിലേക്ക് പ്രവേശിക്കുന്നത്. ബസ് സര്‍വീസ് നടത്തുന്നവരും ചില എജന്റുമാരും ചേര്‍ന്നാണ് അനധികൃതമായി യാത്രക്കാരെ ചവിട്ടി കയറ്റുന്നത്.

യു.എ.ഇ യില്‍ രണ്ടോ മൂന്നോ ദിവസം താമസിച്ച ശേഷം സൗദിയിലേക്ക് പ്രവേശിക്കാന്‍ സാധിക്കുമോ എന്നും ഇത് നിയമപരമാണോ എന്നും ആരാഞ്ഞു കൊണ്ട് നിരവധി സന്ദേശങ്ങള്‍ കഴിഞ്ഞ ദിവസങ്ങളില്‍ ഞങ്ങള്‍ക്ക് ലഭിച്ചിരുന്നു. ഇതേ തുടര്‍ന്ന് ഞങ്ങളുടെ ദുബായിലുള്ള പ്രതിനിധി യാത്രക്കാരന്‍ എന്ന വ്യാജേന അവിടുത്തെ ഒരു ട്രാവല്‍ എജന്റുമായി ബന്ധപ്പെടുകയുണ്ടായി.

ഓരോ തവണയും ചുരുങ്ങിയ എണ്ണം യാത്രക്കാരെ ഇങ്ങിനെ ചവിട്ടി കയറ്റാമെന്നാണ് എജന്റ് വെളിപ്പെടുത്തിയത്. അതിനു ഓരോ യാത്രക്കാരനും ആറായിരം രൂപ മുതല്‍ എണ്ണായിരം രൂപ വേറെ അധികമായി നല്‍കേണ്ടി വരും. ദുബായ് വിസ എടുത്ത ശേഷം പത്തു ദിവസം കഴിഞ്ഞതിനു ശേഷം മാത്രം ദുബായിലേക്ക് പുറപ്പെട്ടാല്‍ മതി.

ദുബായില്‍ എത്തി രണ്ടോ മൂന്നോ ദിവസം മാത്രം താമസിച്ചാല്‍ മതിയാകും. അതിനുള്ളില്‍ ദമ്മാമില്‍ എത്തിക്കാമെന്നും എജന്റ് ഉറപ്പ് നല്‍കുന്നു. പിടിക്കപ്പെടില്ലെന്ന ഉറപ്പും എജന്റ് നല്‍കുന്നു. മുറിയില്‍ തന്നെ ഉണ്ടാകണമെന്നും ബസ്സില്‍ ഒഴിവ് ഉണ്ടാകുമ്പോള്‍ വിളിക്കുമെന്നും ഉടനെ തന്നെ യാത്രക്ക് സജ്ജരായി ഏത്തണമെന്നുമാണ് നിര്‍ദ്ദേശം.

താമസിക്കുന്ന സ്ഥലത്തെ ആളുകളോടോ സഹായാത്രികരോടോ യാത്രാ വിവരങ്ങളെ കുറിച്ച് യാതൊന്നും വെളിപ്പെടുത്തരുത് എന്നാണ് ഈ യാത്രക്കാര്‍ക്ക് ലഭിക്കുന്ന നിര്‍ദ്ദേശം. യാത്രക്കുള്ള നിര്‍ദ്ദേശം ലഭിക്കുന്ന മാത്രയില്‍ തയ്യാറായി ബസ്സിലേക്ക് പ്രവേശിക്കണമെന്നും മറ്റുള്ള കാര്യങ്ങള്‍ എല്ലാം തന്നെ തങ്ങളുടെ ആളുകള്‍ നോക്കി കൊള്ളൂമെന്നുമാണ് ഇത്തരം യാത്രക്കാരോട് പറയുന്നത്.

ഇതിനെ കുറിച്ച് ഞങ്ങള്‍ നടത്തിയ കൂടുതല്‍ അന്വേഷണത്തില്‍ നിരവധി പേര്‍ ഇത്തരത്തില്‍ അനധികൃതമായി സൗദിയില്‍ എത്തിയതായി വ്യക്തമായി. ഇങ്ങിനെ പ്രവേശിച്ചവരില്‍ കൂടുതല്‍ പേരും വടക്കേ ഇന്ത്യക്കാരാണ്. ബസ്സ്‌ മാര്‍ഗ്ഗമാണ് ഇവര്‍ എല്ലാവരും സൗദിയിലേക്ക് പ്രവേശിച്ചിട്ടുള്ളത്.

സമീപ ദിവസങ്ങളില്‍ ഒരു തമിഴ്നാട്ടുകാരനും ഇങ്ങിനെ സൗദിയിലേക്ക് പ്രവേശിച്ചതായി നേരിട്ട് വ്യക്തമായി. ഇയാള്‍ക്ക് ആര്‍.ടി.പി.സി.ആര്‍ ടെസ്റ്റ്‌ റിസള്‍ട്ട് പോലും ഉണ്ടായിരുന്നില്ല. ഒരു വാക്സിന്‍ മാത്രമെടുത്ത ഇയാള്‍ തവക്കല്‍നയില്‍ ഇമ്മ്യൂണും ആയിരുന്നില്ല.

മൂന്ന് വടക്കേ ഇന്ത്യക്കാര്‍ ഒക്ടോബര്‍ 28 ന് ദുബായില്‍ എത്തിയവരാണ്. രണ്ടു ദിവസം മാത്രം ദുബായില്‍ താമസിച്ച ശേഷം ഇവര്‍ കഴിഞ്ഞ ദിവസം സൗദിയിലേക്ക് പ്രവേശിക്കുകയും ചെയ്തതായി ഞങ്ങളുടെ അന്വേഷണത്തിലൂടെ നേരിട്ട് മനസ്സിലാക്കാന്‍ സാധിച്ചിട്ടുണ്ട്.

സൗദി അതിര്‍ത്തി ചെക്ക് പോസ്റ്റില്‍ ഓരോ യാത്രക്കാരുടെയും പാസ്പോര്‍ട്ട് വിശദമായി പരിശോധിക്കാത്തത് മുതലെടുത്താണ് യാത്രക്കാരെ ഇത്തരത്തില്‍ ചവിട്ടി കയറ്റുന്നത്. ബസ്സിലുള്ള എല്ലാ യാത്രക്കാരുടെയും രേഖകള്‍ ശേഖരിച്ച് ബസ് ജീവനക്കാര്‍ ചെക്ക് പോസ്റ്റില്‍ നല്‍കുകയാണ് ചെയ്യുന്നത്. അതിനിടയിലാണ് കൃത്രിമം നടക്കുന്നത്.

നേരിട്ട് പ്രവേശിക്കാന്‍ വിലക്കുള്ള രാജ്യങ്ങളില്‍ നിന്നുള്ളവര്‍ സൗദിയുടെ റെഡ് ലിസ്റ്റില്‍ ഇല്ലാത്ത മറ്റൊരു രാജ്യത്ത് പതിനാല് ദിവസം താമസിച്ച ശേഷം മാത്രമേ സൗദിയിലേക്ക് പ്രവേശിക്കാന്‍ അനുമതിയുള്ളൂ. ഇങ്ങിനെ മലയാളികള്‍ അടക്കമുള്ള ആയിരക്കണക്കിന് പേര്‍ ദിവസവും ദുബായില്‍ നിന്നും സൗദിയിലേക്ക് പ്രവേശിക്കുന്നുണ്ട്. ഇവരുടെ മറവിലാണ് അനധികൃതമായി ചവിട്ടി കയറ്റല്‍ നടക്കുന്നത്.

പിടിക്കപ്പെടില്ലെന്ന് ഏജന്റുമാര്‍ ഉറപ്പ് നല്കുന്നുണ്ടെങ്കിലും ഏതെങ്കിലും കാരണവശാല്‍ സൗദി ചെക്ക് പോസ്റ്റില്‍ ഉള്ള അധികൃതര്‍ ഓരോ പാസ്പോര്‍ട്ടും പ്രത്യേകം പരിശോധിച്ചാല്‍ ഇവര്‍ പിടിക്കപ്പെടും എന്നുള്ളത് ഉറപ്പാണ്. കാരണം ദുബായില്‍ വന്നിറങ്ങിയ തിയ്യതിയില്‍ നിന്നും  ഇവര്‍ എത്ര ദിവസം യു.എ.ഇ യില്‍ താമസിച്ചു എന്ന് പാസ്പോര്‍ട്ടില്‍ സ്റ്റാമ്പ് ചെയ്തതില്‍ നിന്നും മനസ്സിലാക്കാന്‍ സാധിക്കും. ദുബായ് ചെക്ക് പോസ്റ്റില്‍ നിന്നും എക്സിറ്റ് സ്റ്റാമ്പ് ചെയ്തതിനാല്‍ കൃത്രിമം പിടിക്കപ്പെട്ടു കഴിഞ്ഞാല്‍ പിന്നീട് യു.എ.ഇ യിലേക്ക് മടങ്ങി പോകാനും സാധിക്കില്ല.

കോവിഡ് പ്രോട്ടോക്കോള്‍ ലംഘനവും മറ്റു അനുബന്ധ നിയമ ലംഘനങ്ങളുമാണ് ഇവരില്‍ ചുമത്തുക. ഇത്തരക്കാരെ ജയിലിലേക്ക് മാറ്റുകയും നിയമം അനുശാസിക്കുന്ന കനത്ത പിഴയും തടവും ചുമത്തുകയും ചെയ്യും. പിന്നീട് സൗദിയിലേക്ക് തിരിച്ചു വരാന്‍ സാധിക്കാത്ത വിധം തര്‍ഹീല്‍ വഴി നിയമ ലംഘകരെ നാട് കടത്തുകയാണ് ചെയ്യുക.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DlSqnw7eVy9HWYdQHH8ljx

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading

LATEST

നാട്ടുകാരന്റെ ജീവനെടുക്കാന്‍ കൂട്ടു നിന്ന ഈ സൗദി മലയാളികള്‍ ശരിക്കും മാപ്പ് അര്‍ഹിക്കുന്നുണ്ടോ?

Published

on

റിയാദ്: സൗദിയിലെ മലയാളി സമൂഹത്തെ ഞെട്ടിച്ച കൊലപാതകത്തില്‍ നാട്ടുകാരനായ സഹജീവിയുടെ ജീവനെടുക്കാന്‍ കൂട്ടു നിന്നുവെന്ന ആരോപണത്തില്‍ പിടിയിലായി വിചാരണക്ക് ശേഷം വധശിക്ഷക്ക് വിധിക്കപ്പെട്ട രണ്ടു മലയാളികള്‍ ജീവന്‍ നഷ്ടമാകുന്നതിന്റെ ഒരു കടമ്പ മാത്രം പിന്നിലാണ്. കൊല്ലപ്പെട്ട മലയാളി യുവാവിന്റെ കുടുംബം മാപ്പ് നൽകിയാൽ മാത്രമേ വധ ശിക്ഷയിൽ നിന്ന് രക്ഷപ്പെടാനാകൂ. എന്നാല്‍ കുടുംബം മാപ്പ് നല്‍കാന്‍ തയ്യാറല്ല എന്നാണു ഏറ്റവും ഒടുവിലായി നാട്ടില്‍ നിന്നും ലഭിക്കുന്ന റിപ്പോര്‍ട്ടുകള്‍.

കോഴിക്കോട് കൊടുവള്ളി മുക്കിലങ്ങാടി സ്വദേശി ഷമീറിനെ കൊലപ്പടുത്തിയ കേസിൽ പ്രതികളായ തൃശൂർ കൊടുങ്ങല്ലൂർ ഏറിയാട് സ്വദേശി ചീനികപ്പുറത്ത് നിസാം സാദിഖ് (നിസാമുദ്ദീൻ), കുറ്റ്യാടി സ്വദേശി കുറ്റ്യാടി സ്വദേശി ആശാരിത്തൊടിക അജ്മല്‍ എന്നിവരാണ് കീഴ്ക്കോടതി വിധിച്ച വധശിക്ഷ ദമാം അപ്പീൽ കോടതിയും ശരി വെച്ചതോടെ വധശിക്ഷയിലെക്ക് നടന്നടുക്കുന്നത്. ഇവര്‍ക്ക് പുറമേ അസ്വദ്, ഹുസൈന്‍ അമ്മാര്‍, ഹുസൈന്‍ സലമി, അബുറയ്യാന്‍ എന്ന അലി എന്നീ 4 സൗദി പൗരന്മാർക്കും വധശിക്ഷ വിധിച്ചിട്ടുണ്ട്.

ഷമീറിന്റെ വധത്തില്‍ രണ്ടു മലയാളികള്‍ക്കും കൃത്യമായ പങ്കുണ്ടെന്നാണ് കോടതി കണ്ടെത്തിയിരിക്കുന്നത്. മദ്യ വാറ്റുകാരെയും പലിശക്കാരെയും ചീട്ടുകളി സംഘത്തേയും കണ്ടത്തെി ആക്രമിച്ച് പണവും വിലപിടിപ്പുള്ള സാധനങ്ങളും കൊള്ളയടിക്കുന്ന സൗദി കവർച്ചാ സംഘത്തിനു ഷമീറിനെക്കുറിച്ചുള്ള വിവരങ്ങൾ നൽകിയത് മലയാളികളായ പ്രതികളായിരുന്നുവെത്രേ.

അത്യന്തം ക്രൂരമായാണ് സ്വദേശികളായ ഷമീറിനെ പ്രതികള്‍ കൊലപ്പെടുത്തിയത് എന്നാണ് റിപ്പോര്‍ട്ടുകള്‍. പലപ്പോഴും കണ്ണുകള്‍ മറച്ച് തല കീഴായി കെട്ടിയിട്ടായിരുന്നു മര്‍ദ്ദനം. മൂന്ന് ദിവസത്തോളം തുടര്‍ന്ന മര്‍ദ്ദനത്തിന് ഒടുവിലായാണ് ഷമീറിനു ജീവന്‍ നഷ്ടപ്പെട്ടത്. ഷമീറിനെക്കുറിച്ചുള്ള വിവരങ്ങൾ നല്‍കിയതിന് പുറമേ ബന്ദിയാക്കി വിലപേശാനും പ്രതികളായ മലയാളികള്‍ കൂട്ടു നിന്നതായാണ് കോടതി കണ്ടെത്തിയിരിക്കുന്നത്.

അഞ്ച് വർഷം മുന്‍പ് ഒരു ചെറിയ പെരുന്നാൾ ദിനത്തിന്റെ തലേന്നാണ് ഷമീറിന്റെ മൃതദേഹം കണ്ടെത്തുന്നത്. മൂന്ന് ദിവസം മുമ്പ് കാണാതായ ഷമീറിനെ ബന്ധുക്കളും പൊലീസും തിരയുന്നതിനിടയിലാണ് മൃതദേഹം ജുബൈല്‍ വര്‍ക്ഷോപ്പ് ഏരിയയിലെ മണല്‍ വില്‍ക്കുന്ന ഭാഗത്ത് ബലദിയ വേസ്റ്റ് ബോക്സിനു സമീപം പുലര്‍ച്ചെ പുതപ്പിൽ പൊതിഞ്ഞ നിലയില്‍ കണ്ടെത്തിയത്.

ഷമീറിന്റെ മരണത്തെ കുറിച്ച് വിവിധങ്ങളായ ഊഹാപോഹങ്ങള്‍ മലയാളി സമൂഹത്തില്‍ പ്രചരിച്ചിരുന്നു. കൊല്ലപ്പെട്ട ഷമീര്‍ ഹവാല എജന്റ് ആയിരുന്നുവെന്നും, വ്യാജ മദ്യ വില്‍പ്പനക്ക് ഇടനിലക്കാരനായി പ്രവര്‍ത്തിച്ചിരുന്നുവെന്നും പറയപ്പെടുന്നുണ്ട്.  പണം കവരാൻ വേണ്ടി പ്രതികൾ തട്ടിക്കൊണ്ട് പോകുകയായിരുന്നുവെന്നും ഹവാല പണം ഷമീറിൽ നിന്ന് ലഭിക്കാത്തതിനാല്‍ തടവിലാക്കി വിലപേശുന്നതിനിടയില്‍ മര്‍ദ്ദനം മൂലം ഷമീര്‍ കൊല്ലപ്പെടുകയായിരുന്നുവെന്നുമാണ് പോലീസിന്റെ കണ്ടെത്തല്‍. ആളുമാറി കൊലപ്പെടുത്തിയെന്ന പ്രചരണം വ്യാപമാകുന്നതിനിടയിലായിരുന്നു മരണ കാരണവും പ്രതികളുടെ അറസ്റ്റ് വിവരവും പോലീസ് പുറത്ത് വിടുന്നത്.

ജുബൈലിലെ സാമൂഹിക പ്രവർത്തകനായ സൈഫുദ്ദീൻ പൊറ്റശ്ശേരി പ്രതിയായ നിസാമിന് ആവശ്യമായ നിയമസഹായങ്ങൾ ലഭ്യമാക്കാൻ പ്രതികളെ ജയിലില്‍ സന്ദര്‍ശിക്കുകയും ആവശ്യമായ നിയമ സഹായം ലഭിക്കുന്നതിനുള്ള സഹായങ്ങള്‍ ചെയ്യുകയും ചെയ്തപ്പോള്‍ തന്നെ പ്രതികള്‍ സഹായത്തിനും ദയക്കും അര്‍ഹരാണോ എന്ന ചോദ്യം സൗദിയിലെ പ്രവാസി സമൂഹത്തില്‍ നിന്നും ഉയര്‍ന്നിരുന്നു. നിസാമിന്റെ കുടുംബത്തിന്റെ അപേക്ഷ പരിഗണിച്ചാണ് ഇന്ത്യൻ എംബസി പ്രശ്നത്തില്‍ ഇടപെടാന്‍ സൈഫുദ്ദീന് അധികാര പത്രം നൽകിയത്.

പ്രതികൾക്ക് മാപ്പ് നൽകാൻ കുടുംബം ഷമീറിന്റെ ഇതുവരെ തയ്യാറായിട്ടില്ല. രാജാവിനടക്കം ദയാഹരജി നൽകാനുള്ള ഒരുക്കത്തിലാണ് പ്രതിയായ നിസാമിന്റെ കുടുംബം. എന്നാല്‍ ഷമീറിന്റെ കുടുംബം മാപ്പ് നൽകിയാൽ മാത്രമേ ദയാ ഹരജിക്ക് ഫലമുണ്ടാകൂ. ഈ സന്ദര്‍ഭത്തില്‍ പ്രതികളെ വധശിക്ഷയില്‍ നിന്നും രക്ഷപ്പെടുത്തുന്നതിനായി മുന്നിട്ടിറങ്ങാന്‍ ഒരു സംഘടന ആലോചിക്കുന്നതായാണ് വിവരം.

പ്രവാസി സമൂഹത്തില്‍ നിന്നും മറ്റും പണം പിരിച്ച് ഷമീറിന്റെ കുടുംബത്തിന് ദിയാ ധനമായി നല്‍കി മാപ്പ് സംഘടിപ്പിക്കാനാണ്  പദ്ധതി. ഉടനെ ഇതിനായി രംഗത്തിറങ്ങിയാല്‍ പ്രവാസി സമൂഹത്തില്‍ നിന്നും അസംതൃപ്തി ഉണ്ടാകാനുള്ള സാധ്യത മുന്‍നിര്‍ത്തി രോഷം കെട്ടടങ്ങുന്നത് വരെ കാത്തിരിക്കാനാണ് തീരുമാനം. സമീറിന്റെ മകനും മകളും മൈനര്‍മാര്‍ ആയതിനാല്‍ അതിനാവശ്യമായ സമയം ലഭിക്കുകയും ചെയ്യും.

വധശിക്ഷക്ക് വിധിക്കപ്പെട്ടവരെ സഹായിക്കാന്‍ തുനിഞ്ഞിറങ്ങുന്ന വിഷയത്തില്‍ സമ്മിശ്രമായ പ്രതികരണമാണ് സൗദിയിലെ മലയാളി പ്രവാസി മണ്ഡലങ്ങളില്‍ ഉയരുന്നത്. തെറ്റുകള്‍ മനുഷ്യ സഹജമാണെന്നും പാശ്ചാത്തപിക്കാന്‍ അവസരം നല്‍കണമെന്നും ഒരു വിഭാഗം അഭിപ്രായപ്പെടുന്നു. അതേ സമയം അറിയാതെ തെറ്റ് ചെയ്യുന്നവര്‍ക്കാണ് സഹായങ്ങള്‍ എത്തിക്കേണ്ടതെന്നും മനപ്പൂര്‍വ്വം കൊടും കുറ്റകൃത്യങ്ങള്‍ ചെയ്യുന്നവരെ നിയമത്തിന് വിട്ടു കൊടുക്കണമെന്നും സോഷ്യല്‍ മീഡിയകളില്‍ അഭിപ്രായമുയരുന്നു.

സഹായം എത്തിക്കാന്‍ ആഗ്രഹിക്കുന്ന സംഘടനകള്‍ അതിനായി സ്വന്തമായി പണം കണ്ടെത്തണമെന്നും സൗദി അറേബ്യ പോലെ ഒരു രാജ്യത്ത് വന്ന് കടുത്ത ശിക്ഷ ഉണ്ടാകുമെന്ന് അറിഞ്ഞു കൊണ്ട് തന്നെ കുറ്റകൃത്യങ്ങളും നിയമ വിരുദ്ധ പ്രവര്‍ത്തനങ്ങളും ചെയ്യുന്നവരെ സഹായിക്കാന്‍ പ്രവാസികളില്‍ നിന്നും പണം പിരിച്ചെടുക്കരുതെന്നും ചിലര്‍ അഭിപ്രായപ്പെടുന്നു.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DlSqnw7eVy9HWYdQHH8ljx

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading

LATEST

സൗദി പ്രവാസികള്‍ ഏറ്റവും അധികം ചോദിച്ച 6 ചോദ്യങ്ങള്‍. നിര്‍ബന്ധമായും അറിഞ്ഞിരിക്കേണ്ടത്.

Published

on

  1. എനിക്ക് നാട്ടില്‍ സ്വിഹത്തി അപ്ളിക്കേഷനില്‍ ലൊക്കേഷന്‍ പ്രശ്നം ഉണ്ടാകുന്നു. അപ്ളിക്കേഷന്‍ തുറക്കുമ്പോള്‍ ലൊക്കേഷന്‍ സെറ്റ് ചെയ്യാന്‍ ആവശ്യപ്പെടുന്നുണ്ട്. സിറ്റി, ഡിസ്ട്രിക്റ്റ് എങ്ങിനെയാണ് നാട്ടില്‍ നിന്നും സെറ്റ് ചെയ്യേണ്ടത്?

സൗദിക്ക് പുറത്ത് നിന്നും അപ്ളിക്കേഷന്‍ തുറക്കുമ്പോള്‍ ചിലപ്പോള്‍ ലൊക്കേഷന്‍ പ്രശ്നം ഉണ്ടാകാറുണ്ട്. സൗദിയിലെ സിറ്റികള്‍ കാണിക്കും. എന്നാല്‍ ഡിസ്ട്രിക്റ്റ് കോളത്തില്‍ ഒന്നും വരുന്നില്ല എന്ന പ്രശ്നമാണ് പലര്‍ക്കും അനുഭവപ്പെടുന്നത്. നിങ്ങളുടെ സുഹൃത്തുക്കളോ ബന്ധുക്കളോ ആരെങ്കിലും നിലവില്‍ സൗദിയില്‍ ഉണ്ടെങ്കില്‍ അവര്‍ക്ക് ഇഖാമ നമ്പര്‍, പാസ്‌വേര്‍ഡ്‌ തുടങ്ങിയ വിവരങ്ങള്‍ കൈമാറി അവരോട് അവിടെ നിന്നും നിങ്ങളുടെ അപ്ളിക്കേഷന്‍ ലൊക്കേഷന്‍ സെറ്റ് ചെയ്തു തരാനായി ആവശ്യപ്പെടുക. അതിനു ശേഷം നിങ്ങള്‍ സ്വിഹതി അപ്ളിക്കേഷന്‍ അണ്‍ഇന്‍സ്റ്റാള്‍ ചെയ്യുകയും വീണ്ടും ഇന്‍സ്റ്റാള്‍ ചെയ്യുകയും ചെയ്യുമ്പോള്‍ ലൊക്കേഷന്‍ പ്രശ്നം പരിഹരിക്കപ്പെടുന്നതായാണ് കാണപ്പെടുന്നത്.

  1. മൂന്ന് ദിവസം മുന്‍പ് എന്റെ അബ്ഷീര്‍ അക്കൗണ്ടിലേക്ക് “ടെസ്റ്റ്‌” എന്ന ഒരു സന്ദേശം വന്നിരുന്നു. പക്ഷെ അക്കൌണ്ടില്‍ പ്രത്യേകമായി ഒന്നും കാണാന്‍ സാധിച്ചില്ല. എന്ത് ടെസ്റ്റിന്റെ കാര്യമാണ് ഉദ്ദേശിക്കുന്നത്?

അത് ഒരു സാങ്കേതിക പ്രശ്നം മാത്രമാണ് എന്നാണ് മനസ്സിലാക്കാന്‍ സാധിക്കുന്നത്. താങ്കളുടെ മാത്രമല്ല, അനേകം പേരുടെ മൊബൈല്‍ ഫോണുകളിലേക്ക് അബ്ഷിര്‍ പ്ലാറ്റ്‌ഫോമില്‍നിന്ന് അബ്ഷിര്‍ പ്ലാറ്റ്‌ഫോമില്‍നിന്ന് ടെസ്റ്റ് എന്ന ഒരു സന്ദേശം വന്നിരുന്നു. പക്ഷെ എല്ലാവര്‍ക്കും ഇത് ലഭിച്ചിട്ടുമില്ല. അബ്ഷീര്‍ പ്ലാറ്റ്ഫോം ഭാഗത്ത് നിന്നും ഉണ്ടായ ഒരു സാങ്കേതിക പ്രശ്നമോ, പുതിയ അപ്ഡേറ്റ് വരുത്താനുള്ള സാങ്കേതിക നടപടികളുടെ തുടക്കമോ ആകാം. ഈ വിഷയത്തെ കുറിച്ച് ആരാഞ്ഞവരോട് ഇക്കാര്യത്തില്‍ പ്രത്യേകമായി ഒന്നും ചെയ്യേണ്ടതില്ല എന്നും അവഗണിക്കാനുമാണ് അബ്ഷിര്‍ നല്‍കിയ മറുപടി.

  1. സ്വിഹതി അപ്ളിക്കേഷന്‍ പലരും ഒ.ടി.പി ഇല്ലാതെ ഓപണ്‍ ചെയ്യുന്നത് കാണുന്നുണ്ട്. അവരുടേത് സ്പെഷ്യല്‍ അക്കൌണ്ട് ആണോ? എല്ലാ ഫോണിലും ഇത് ചെയ്യാന്‍ സാധിക്കുമോ? ആണെങ്കില്‍ എങ്ങിനെയാണ് ഇത് ചെയ്യാന്‍ സാധിക്കുന്നത് എന്ന് പറഞ്ഞു തരാമോ?

സ്വിഹത്തി അപ്ളിക്കേഷനില്‍ എല്ലാവര്‍ക്കും ചെയ്യാന്‍ സാധിക്കുന്ന ഒരു ഓപ്ഷന്‍ ആണിത്. എല്ലാ അപ്ളിക്കേഷനിലും അതിനുള്ള സൗകര്യം ഉണ്ട്. നിങ്ങളുടെ സ്വിഹത്തി അപ്ളിക്കേഷന്‍ തുറന്ന് അതിലെ സെറ്റിങ്ങ്സ് ഓപ്ഷനില്‍ പ്രവേശിക്കുക. അതില്‍ ലാംഗ്വേജ് സെറ്റ് ചെയ്യുന്ന ഓപ്ഷന് താഴെയായി പ്രൈവസി എന്നൊരു ഓപ്ഷന്‍ കാണാന്‍ സാധിക്കും. അതില്‍ “Allow Sehhaty to use Fingerprint or Face ID” ഓപ്ഷന്‍ കാണാന്‍ സാധിക്കും. അത് എനേബിള്‍ ആക്കി വിരലടയാളം സെറ്റ് ചെയ്യാം.

സ്വിഹത്തി അപ്ളിക്കേഷനില്‍ ഒരിക്കല്‍ ഈ സൗകര്യം ആക്റ്റിവേറ്റ് ചെയ്തു കഴിഞ്ഞാല്‍ പിന്നീട് മൊബൈല്‍ നമ്പരില്‍ ഒ.ടി.പി ലഭിക്കാതെ തന്നെ നിങ്ങള്‍ക്ക് സ്വിഹത്തി അക്കൌണ്ടില്‍ ലോഗിന്‍ ചെയ്യാന്‍ സാധിക്കും എന്നതാണ് ഏറ്റവും പ്രയോജനകരമായ കാര്യം. ഏതെങ്കിലും കാരണവശാല്‍ സിം കാര്‍ഡ് നഷ്ടപ്പെടുകയോ പ്രയോജന രഹിതമാകുകയോ ചെയ്‌താലും വിരലടയാളം ഉപയോഗിച്ച് ലോഗിന്‍ ചെയ്ത് സ്വിഹത്തി അക്കൌണ്ട് ഉപയോഗിക്കാന്‍ സാധിക്കും.

  1. കഴിഞ്ഞ ദിവസം ജിദ്ദയിലേക്ക് യാത്ര ചെയ്യാനായി എത്തിയ ഒരു പ്രവാസിയുടെ യാത്ര ആര്‍.ടി.പി.സി.ആറിലെ ക്യൂ ആര്‍ കോഡ് പ്രശ്നം മൂലം മുടങ്ങി എന്നുള്ള ഒരു വോയ്സ് മെസേജ് ഗ്രൂപ്പുകളില്‍ പ്രചരിക്കുന്നുണ്ട്. അത് ശരിയാണോ? ഞാന്‍ അടുത്ത ദിവസം റിയാദിലേക്ക് യാത്ര ചെയ്യാന്‍ ടിക്കറ്റ് എടുത്തിട്ടുണ്ട്. എങ്ങിനെയാണ് നമുക്ക് കിട്ടിയിട്ടുള്ള നമുക്ക് ആര്‍.ടി.പി.സി.ആര്‍ സര്‍ട്ടിഫിക്കറ്റിലെ ക്യൂ ആര്‍ കോഡ് ഒറിജിനലാണോ എന്ന് ഉറപ്പു വരുത്താന്‍ സാധിക്കുക?

പ്രസ്തുത വോയ്സ് മെസേജ് കേട്ടിട്ടില്ലാത്തതിനാല്‍ അതിനെ കുറിച്ച് പറയാനാവില്ല. എന്നാല്‍ നിങ്ങളുടെ കൈവശമുള്ള ആര്‍.ടി.പി.സി.ആര്‍ സര്‍ട്ടിഫിക്കറ്റിലെ ക്യൂ.ആര്‍ കോഡ് സ്കാന്‍ ചെയ്‌താല്‍ അതിന്റെ ആധികാരികത പൂര്‍ണ്ണമായും മനസ്സിലാക്കാന്‍ സാധിക്കും. അത് ഓരോരുത്തര്‍ക്കും സ്വയം പരിശോധിച്ച് ഉറപ്പു വരുത്താനും സാധിക്കുന്നതാണ്. ഇതിനായി ക്യൂ.ആര്‍ കോഡ് സ്കാനര്‍ ഉപയോഗിക്കാം. ഈ അപ്ളിക്കേഷന്‍ നിങ്ങള്‍ക്ക് പ്ലേ സ്റ്റോറില്‍ നിന്നും ഡൌണ്‍ലോഡ് ചെയ്തെടുക്കാവുന്നതാണ്.

കൈവശം ഉള്ളത് പ്രിന്റഡ് സര്‍ട്ടിഫിക്കറ്റ് ആണെങ്കിലും പിഡിഎഫ് രൂപത്തിലുള്ളത് ആണെങ്കിലും ഈ അപ്ളിക്കേഷന്‍ ഉപയോഗിച്ച് സ്വയം സ്കാന്‍ ചെയ്യാന്‍ സാധിക്കും. നിങ്ങളുടെ കൈവശമുള്ള ആര്‍.ടി.പി.സി.ആര്‍ സര്‍ട്ടിഫിക്കറ്റിലെ ക്യൂ ആര്‍ കോഡ് ഈ അപ്ളിക്കേഷന്‍ ഉപയോഗിച്ച് സ്കാന്‍ ചെയ്യുക. അപ്പോള്‍ ഒരു ലിങ്ക് നിങ്ങള്‍ക്ക് കാണാന്‍ സാധിക്കും. ആ ലിങ്കില്‍ ക്ലിക്ക് ചെയ്ത് വെബ്സൈറ്റില്‍ പ്രവേശിച്ചാല്‍ പ്രസ്തുത സര്‍ട്ടിഫിക്കറ്റിലെ മുഴുവന്‍ വിവരങ്ങളും പരിശോധിച്ച് ആധികാരികത ഉറപ്പ് വരുത്താന്‍ സാധിക്കും.

  1. എന്റെ റൂമിലുള്ള പുതിയതായി വന്നയാളുടെ തവക്കല്‍ന ഇമ്മ്യൂണ്‍ അല്ല. മറ്റൊരാള്‍ മുഖേന പണം നല്‍കി തവക്കല്‍നാ ആപ്പിലെ ഇമ്മ്യൂണ്‍ സ്റ്റാറ്റസ്, രണ്ടു ഡോസ് വാക്‌സിന്‍ സ്വീകരിച്ചവരാക്കി നല്‍കാമെന്ന് റൂമിലുള്ള മറ്റൊരു സുഹൃത്ത് പറയുന്നു. ഇത് ശരിയാണോ?

ഇത് നിയമപരമായ വഴിയാകാന്‍ സാധ്യതയില്ല. രണ്ടു ഡോസ് വാക്സിന്‍ എടുത്ത സര്‍ട്ടിഫിക്കറ്റ് അപ്‌ലോഡ്‌ ചെയ്താണ് തവക്കല്‍ന ഇമ്മ്യൂണ്‍ ആകുന്നത്. പണം നല്‍കി  തവക്കല്‍നാ ആപ്പിലെ ഇമ്മ്യൂണ്‍ സ്റ്റാറ്റസ്, രണ്ടു ഡോസ് വാക്‌സിന്‍ സ്വീകരിച്ചവരാക്കി ഇമ്മ്യൂണ്‍ ആകുന്നത് ക്രിമിനല്‍ കുറ്റവുമാണ്. നിരവധി പേര്‍ ഇതിനകംതന്നെ ഈ കുറ്റത്തിന് പിടിയിലായിട്ടുണ്ട്. കഴിഞ്ഞ ദിവസവും ഒരു പാകിസ്താന്‍ പൗരനും യെമനി പൗരനും ഈ കുറ്റത്തിന് പിടിയിലായിട്ടുണ്ട്. മൂന്ന് മാസങ്ങള്‍ക്ക് മുന്‍പ് രണ്ടു തവണയായി 150 ഓളം പേര്‍ പിടിയിലായിട്ടുണ്ട്.

ഇമ്മ്യൂണ്‍ ആക്കി നല്‍കുന്നവര്‍ പിടിയിലായാല്‍ അവരില്‍ നിന്നും ഇമ്മ്യൂണ്‍ ആയവരിലേക്ക് അന്വേഷണ ഉദ്യോഗസ്ഥര്‍ അന്വേഷിച്ചെത്തുന്ന രീതിയാണ് കാണാന്‍ സാധിക്കുന്നത്. അത് കൊണ്ട് താല്‍ക്കാലികമായി ഇമ്മ്യൂണ്‍ ആയാലും പിന്നീട് പിടിക്കപ്പെടാനുള്ള സാധ്യത തള്ളികളയാന്‍ സാധിക്കില്ല.

  1. സൗദിയിലേക്ക് റോഡ്‌ മാര്‍ഗ്ഗം പോകാനായി കഴിഞ്ഞ ദിവസം മുഖീമില്‍ അറൈവല്‍ രജിസ്ട്രേഷന്‍ ചെയ്തിരുന്നു. എന്റെ രജിസ്ട്രേഷന്‍ പ്രിന്റ്‌ ഔട്ടില്‍ വാക്സിനേഷന്‍ ചെയ്ത വിവരങ്ങള്‍ കാണിക്കുന്നില്ല. എന്നാല്‍ എന്റെ സുഹൃത്തിന്റെ അറൈവല്‍ രജിസ്ട്രേഷന്‍ ഫോമില്‍ വാക്സിനേഷന്‍ ചെയ്ത വിവരങ്ങള്‍ ഒന്നാമത്തെ ഡോസ്, രണ്ടാമത്തെ ഡോസ് എന്നിങ്ങനെ മുഴുവനും വിശദമായി കാണുന്നുണ്ട്. ഇത് എന്റെ സര്‍ട്ടിഫിക്കറ്റില്‍ മാത്രം ഉണ്ടായിട്ടുള്ള ഒരു പിശകാണോ? എങ്ങിനെയാണ് ഇത് തിരുത്താന്‍ സാധിക്കുക? ഇത് മൂലം യാത്രക്ക് എന്തെങ്കിലും പ്രശ്നം ഉണ്ടാകാന്‍ സാധ്യതയുണ്ടോ?

ഇത് ഒരു പിശക് ആകാന്‍ സാധ്യതയില്ല. ആദ്യമായി നിങ്ങളുടെ സുഹൃത്തിന്റെ യാത്ര വിവരങ്ങള്‍ പരിശോധിക്കുക. നിലവിലുള്ള വിസയില്‍ അവധിക്ക് വന്നു പോകുന്ന ഇഖാമയുള്ളവരുടെ അറൈവല്‍/മുഖീം രജിസ്ട്രേഷന്‍ ഫോമിലും പുതിയ വിസയില്‍ പോകുന്നവരുടെ ഫോമിലും സാരമായ വ്യത്യാസങ്ങള്‍ ഉണ്ടായിരിക്കും. നിങ്ങളുടെ സുഹൃത്ത് പുതിയ വിസയില്‍ പോകുന്ന ആളാണോ എന്ന് ഉറപ്പു വരുത്തുക.

ഇഖാമയുള്ളവരുടെ അറൈവല്‍ രജിസ്ട്രേഷന്‍ ഫോമില്‍ പേര്, പാസ്പോര്‍ട്ട് നമ്പര്‍, ജനന തിയ്യതി, ഇഖാമ നമ്പര്‍, നാഷനാലിറ്റി, രജിസ്ട്രേഷന്‍ നമ്പര്‍, രജിസ്ട്രേഷന്‍ ഡേറ്റ് എന്നിവ മാത്രമേ കാണുകയുള്ളൂ. വാക്സിനേഷന്‍ ചെയ്ത മുഴുവന്‍ വിവരങ്ങള്‍ പ്രിന്റ്‌ ഔട്ടില്‍ സാധാരണയായി കാണാന്‍ സാധിക്കില്ല.

എന്നാല്‍ പുതിയ വിസയില്‍ പോകുന്നവരുടെ അറൈവല്‍ രജിസ്ട്രേഷന്‍ ഫോമില്‍ പേര്, പാസ്പോര്‍ട്ട് നമ്പര്‍, ജനന തിയ്യതി, വിസ നമ്പര്‍, നാഷനാലിറ്റി, രജിസ്ട്രേഷന്‍ നമ്പര്‍, രജിസ്ട്രേഷന്‍ ഡേറ്റ്, വാക്സിന്‍ എടുത്ത രാജ്യം, എടുത്ത് വാക്സിന്റെ പേര് എത്ര ഡോസ് എടുത്തു, ആദ്യ ഡോസ് എടുത്ത തിയ്യതി, രണ്ടാമത്തെ ടോസ എടുത്ത തിയ്യതി എന്നെ വിവരങ്ങള്‍ വിശദമായി ഉള്‍പ്പെടുത്തിയിരിക്കും.

നിങ്ങളുടെ അറൈവല്‍ രജിസ്ട്രേഷന്‍ ഫോമില്‍ അത്തരം വിവരങ്ങള്‍ കാണുന്നില്ല എന്നതില്‍ ആശങ്ക വേണ്ട. അറൈവല്‍ രജിസ്ട്രേഷന്‍ ഫോമിന്റെ ഇടത് വശത്ത് കാണുന്ന ക്യൂ.ആര്‍ കോഡ് സ്കാന്‍ ചെയ്തു നോക്കിയാല്‍ അധികൃതര്‍ക്ക് ആവശ്യമായ വിവരങ്ങള്‍ അറിയാന്‍ സാധിക്കും. നിങ്ങള്‍ക്കും വിവരങ്ങള്‍ ഉറപ്പ് വരുത്താന്‍ സാധിക്കും. ക്യൂ.ആര്‍ കോഡ് എങ്ങിനെയാണ് സ്കാന്‍ ചെയ്യാന്‍ സാധിക്കുക എന്നത് മുകളിലെ ചോദ്യത്തിന് ഉത്തരമായി നല്‍കിയിട്ടുണ്ട്.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/DlSqnw7eVy9HWYdQHH8ljx

ഫേസ് ബുക്കിലൂടെ പ്രവാസി കോര്‍ണര്‍ അപ്ഡേറ്റുകള്‍ ഉടനെ ലഭിക്കുന്നതിനായി ഈ ലിങ്കില്‍ ക്ലിക്ക് ചെയ്ത് പേജ് ലൈക്ക് ചെയ്യുക https://www.facebook.com/PravasiCornerOfficial

Continue Reading
LATEST4 weeks ago

യു.എ.ഇ യില്‍ 14 ദിവസം താമസിക്കേണ്ട, സൗദിയിലേക്ക് അനധികൃത ചവിട്ടി കയറ്റല്‍

LATEST4 weeks ago

നാട്ടുകാരന്റെ ജീവനെടുക്കാന്‍ കൂട്ടു നിന്ന ഈ സൗദി മലയാളികള്‍ ശരിക്കും മാപ്പ് അര്‍ഹിക്കുന്നുണ്ടോ?

LATEST1 month ago

സൗദി പ്രവാസികള്‍ ഏറ്റവും അധികം ചോദിച്ച 6 ചോദ്യങ്ങള്‍. നിര്‍ബന്ധമായും അറിഞ്ഞിരിക്കേണ്ടത്.

LATEST1 month ago

രാജകാരുണ്യ കാലാവധി കഴിഞ്ഞാല്‍ സൗദി പ്രവാസികള്‍ക്ക് റീ എന്‍ട്രി പുതുക്കി കിട്ടാന്‍ എന്ത് ചെയ്യണം

LATEST1 month ago

മലയാളിക്ക് സൗദിയിലേക്ക് ബോര്‍ഡിംഗ് പാസ് നിഷേധിച്ചത് ഒറ്റപ്പെട്ട സംഭവം. മറ്റു യാത്രക്കാര്‍ക്ക് ആശങ്ക വേണ്ട.

LATEST1 month ago

തവക്കല്‍ന, ഹെല്‍ത്ത് പാസ്പോര്‍ട്ട് മൂലം ബോര്‍ഡിംഗ് പാസ് ലഭിക്കാതെ സൗദിയിലേക്ക് ഒരു മലയാളിയുടെ കൂടി യാത്ര മുടങ്ങി

LATEST1 month ago

സൗദി പ്രവാസികള്‍ ആവര്‍ത്തിച്ചു ചോദിച്ച ഏറ്റവും പുതിയ 17 ചോദ്യങ്ങള്‍. നാട്ടില്‍ നിന്നും സൗദിയിലേക്ക് തിരിച്ചു വരുന്നവരും സൗദിയില്‍ ഉള്ളവരും അറിഞ്ഞിരിക്കേണ്ടത്

LATEST1 month ago

ജിദ്ദ പ്രവാസിയുടെ കൈ പിടിച്ച് പ്രമുഖ ജീവ കാരുണ്യ പ്രവർത്തക നര്‍ഗീസ് പുതിയ ജീവിതത്തിലേക്ക്

LATEST1 month ago

നാട്ടില്‍ നിന്നും സൗദി യാത്രക്ക് അനുമതി നിഷേധിച്ചെന്ന് പ്രവാസി. പിഴവ് തങ്ങളുടേതല്ലെന്ന് എയര്‍ ഇന്ത്യ

LATEST1 month ago

തവക്കല്‍ന മൂലം കഴിഞ്ഞ ദിവസം ബോര്‍ഡിംഗ് പാസ് നിഷേധിച്ച മലയാളിയെ പുതിയ ടിക്കറ്റ് എടുക്കാതെ യു.എ.ഇ യില്‍ നിന്നും ഇന്ന് സൗദിയില്‍ എത്തിച്ച് എയര്‍ അറേബ്യ

LATEST1 month ago

തവക്കല്‍നയില്‍ വീണ്ടും യു.എ.ഇ യില്‍ നിന്നും സൗദിയിലേക്കുള്ള നാല് മലയാളികളുടെ യാത്ര മുടങ്ങി. 

LATEST2 months ago

ബോര്‍ഡിംഗ് പാസ് നല്‍കാതെ സച്ചിദാനന്ദന്റെ സൗദി യാത്ര മുടക്കിയ ആ മലയാളി സ്റ്റാഫ് ഇത് കേള്‍ക്കുന്നുണ്ടോ?

LATEST2 months ago

സൗദിയിലേക്ക് തിരിച്ചു പോകുന്ന പ്രവാസികള്‍ ഏറ്റവും അധികം ചോദിച്ച 12 സംശയങ്ങള്‍

LATEST2 months ago

സൗദിയിലെ തൊഴില്‍ യോഗ്യതാ പരീക്ഷ മൂലം ഇഖാമ പുതുക്കാന്‍ സാധിക്കാതെ യാത്ര മുടങ്ങുമോ എന്ന് പരിശോധിക്കാനുള്ള നടപടി ക്രമങ്ങള്‍

LATEST2 months ago

സൗദി പ്രവാസികള്‍ ഈ കാര്യം ശ്രദ്ധിച്ചില്ലെങ്കില്‍ സൗദിയിലേക്ക് തിരിച്ചു വരവ് എളുപ്പമാകില്ല.

Trending

error: Content is protected !!