Connect with us

UAE

എയര്‍ ഇന്ത്യ പൈലറ്റാണ് ഞങ്ങളെ ഹൈജാക്ക് ചെയ്തത്: ഡിംബ്രൈറ്റ് കാദര്‍

Published

on

 

അബുദാബി – കൊച്ചി എയര്‍ ഇന്ത്യ എക്സ്പ്രസ് വിമാനം മോശം കാലാവസ്ഥയെ തുടര്‍ന്ന് തിരുവനന്തപുരത്ത് ഇറക്കിയത്തിന് ശേഷം യാത്രക്കാരെ കൊച്ചിയില്‍ എത്തിക്കാന്‍ തയ്യാറാകാത്തതിനെ തുടര്‍ന്ന് കേരളം ഇന്നേ വരെ കണ്ടിട്ടില്ലാത്ത പ്രതിഷേധമാണ് യാത്രക്കാര്‍ നടത്തിയത്.യാത്രക്കാര്‍ ഒന്നടങ്കം പ്രതിഷേധത്തില്‍ കൂട്ട് ചേര്‍ന്നപ്പോള്‍ അവിടെ അടിയറവു പറഞ്ഞത് എയര്‍ ഇന്ത്യയുടെ മുഷ്ക്കും നിരുത്തരവാദിത്വവും. ചരിത്രത്തില്‍ ആദ്യമായി എയര്‍ ഇന്ത്യയെ മുട്ട് കുത്തിച്ച ആ പ്രതിഷേധത്തില്‍ പ്രവാസികളായ മുഴുവന്‍ യാത്രക്കാര്‍ക്കും വേണ്ടി മുന്നില്‍ നിന്നു ശബ്ദമുയര്‍ത്തിയ ഡിം ബ്രെയ്റ്റ്‌ കാദര്‍ എന്നറിയപ്പെടുന്ന ശ്രീ. അബ്ദുല്‍ കാദര്‍. അവധിക്കു ശേഷം ഇന്ന് രാവിലെയാണ് അബ്ദുല്‍ കാദര്‍ അബുദാബിയില്‍ തിരിച്ചെത്തിയത്.

അബുദാബി പോലീസിലെ ഫോട്ടോഗ്രാഫര്‍ ആയി ജോലി ചെയ്യുന്ന തൃശ്ശൂര്‍ ജില്ലയിലെ കുന്നംകുളം സ്വദേശിയായ അബ്ദുല്‍ കാദര്‍ സംഭവത്തെ കുറിച്ചും ഭാവി പരിപാടികളെ കുറിച്ചും ‘പ്രവാസി കോര്‍ണര്‍.കോം’ പ്രതിനിധിയുമായി സംസാരിക്കുന്നു.

 

‘എയര്‍ ഇന്ത്യ ഹൈജാക്ക് ഡ്രാമ’ എന്ന് ദേശീയ മാധ്യമങ്ങള്‍ പോലും വിശേഷിപ്പിച്ച ആ സംഭവത്തിന്‌ നേതൃത്വം നല്‍കിയ ആളായിരുന്നല്ലോ താങ്കള്‍. എപ്പോഴാണ് യഥാര്‍ത്ഥത്തില്‍ യാത്രക്കാര്‍ പ്രതികരിച്ചു തുടങ്ങിയത് ?

യഥാര്‍ത്ഥത്തില്‍ ഈ ഫ്ലൈറ്റില്‍ ജീവനക്കാര്‍ കുറവായിരുന്നു. കേവലം 5 സ്റ്റാഫിനെ വെച്ച് കൊണ്ടാണ് ഈ ഫ്ലൈറ്റ് ഓപ്പറേറ്റ്‌ ചെയ്തിരുന്നത്. ഞങ്ങള്‍ അബുദാബി എയര്‍പോര്‍ട്ടില്‍ വരുമ്പോള്‍ തന്നെ ഏതാണ്ട് നൂറു മീറ്ററോളം വരുന്ന മൂന്നു ക്യൂവിലാണ് ആളുകള്‍ നിന്നിരുന്നത്. ഇത്രയും ആളുകളെ മാനേജ് ചെയ്യാന്‍ ഈ അഞ്ചു സ്റ്റാഫിനെ കൊണ്ട് കഴിയില്ല എന്ന കാരണം കൊണ്ടാണ് ഫ്ലൈയ്റ്റ്‌ മൂന്നു മണിക്കൂര്‍ വൈകി അവിടെ നിന്നും പുറപ്പെട്ടത്‌. രാത്രി ഒരു മണി കഴിഞ്ഞിട്ടാണ് ഭക്ഷണം തന്നത്. അപ്പോഴൊന്നും യാത്രക്കാര്‍ ഒരു പ്രശ്നവും ഉണ്ടാക്കിയിട്ടില്ല.

കൊച്ചിയില്‍ വന്നു ഇറക്കാന്‍ ശ്രമിച്ചു, സാധിച്ചില്ല. പിന്നീട് തിരുവനന്തപുരത്ത് വന്നു. കൊച്ചിയില്‍ ഇറക്കാതെ തിരുവനന്തപുരത്തു ഇറക്കിയത് മൂടല്‍ മഞ്ഞു മൂലമാണ്. അത് സുരക്ഷയുടെ ഭാഗമാണ്. പ്രകൃതിയില്‍ ഉണ്ടായ പ്രതിഭാസമാണ്. അത് നമ്മള്‍ അംഗീകരിച്ചേ പറ്റൂ.അത് യാത്രക്കാരെല്ലാവരും അംഗീകരിച്ചതുമാണ്. തിരുവനന്തപുരത്തു വന്നപ്പോള്‍ മറ്റു മൂന്നു ഫ്ലൈറ്റുകള്‍ അവിടെ കിടപ്പുണ്ട്. ഇതേ കാരണത്താല്‍. എത്തിഹാദ്‌, ഖത്തര്‍ എയര്‍വേയ്സ്‌, കിങ്ങ്ഫിഷര്‍ എന്നെ മൂന്നു വിമാനങ്ങളാണ് കൊച്ചിയില്‍ ഇറക്കാന്‍ പറ്റാതെ തിരുവനന്തപുരതു ഇറക്കിയിരുന്നത്. പിന്നീട് ആ മൂന്നു ഫ്ലൈറ്റുകളും അവരുടെ യാത്രക്കാരെ എടുത്തു കൊച്ചിയിലേക്ക് പറന്നു. അപ്പോഴും യാത്രക്കാര്‍ പ്രശ്നമുണ്ടാക്കിയില്ല.

ഒന്നര മണിക്കൂര്‍ കഴിഞ്ഞിട്ടും എയര്‍ ഇന്ത്യയുടെ ജീവനക്കാര്‍ ഒന്നും പറയാതെ വന്നപ്പോള്‍ അവരോടു ഞങ്ങള്‍ വിവരം അന്വേഷിച്ചു. അപ്പോഴാണ്‌ ഞങ്ങളുടെ ഡ്യൂട്ടി സമയം കഴിഞ്ഞു എന്നും നിങ്ങള്‍ കൊച്ചിയിലേക്ക് ബസ്സില്‍ പോകണമെന്നും അവര്‍ ഞങ്ങളോട് പറഞ്ഞത്. അപ്പോള്‍ മാത്രമാണ്  യാത്രക്കാര്‍ പ്രതികരിക്കുന്നത്. അത് വരെ യാത്രക്കാര്‍ ഒന്നും പ്രതികരിച്ചിട്ടില്ല.

യാത്രക്കാരുടെ ആവശ്യം എന്തായിരുന്നു ?

ജീവനക്കാരുടെ ജോലി സമയം അവസാനിച്ചു എങ്കില്‍ അവര്‍ പോയ്ക്കോട്ടെ എന്നും മറ്റൊരു പൈലറ്റിനെ കൊണ്ട് വന്നു ഞങ്ങളെ കൊച്ചിയില്‍ എത്തിക്കണമെന്ന് മാത്രമായിരുന്നു ഞങ്ങളുടെ ആവശ്യം.ഞങ്ങള്‍ ടിക്കെറ്റ് എടുത്തിരിക്കുന്നത് കൊച്ചിയിലേക്കാണ്. ബസ്സിന്റെ ടിക്കറ്റ് അല്ല. ഫ്ലൈറ്റിന്റെ ടിക്കറ്റ് തന്നെയാണ്. കൊച്ചിയില്‍ എത്തിക്കുക എന്നത് അവരുടെ കടമയും ഞങ്ങളുടെ അവകാശവുമാണ്. ഞങ്ങള്‍ നല്‍കിയ പണത്തിന്റെ സേവനം ഞങ്ങള്‍ക്ക് ലഭിക്കണം. അത് തീര്‍ച്ചയായും ഞങ്ങള്‍ക്ക് ലഭിച്ചേ മതിയാകൂ. ഇത് മാത്രമേ ഞങ്ങള്‍ പറഞ്ഞിട്ടുള്ളൂ.

മുഖ്യമന്ത്രി അടക്കമുള്ളവര്‍ പിന്നീട് പറഞ്ഞത് ഇത് യാത്രക്കാരുടെ സ്വാഭാവിക പ്രതികരണം മാത്രമാണ് എന്നാണ് . ഇത്രയും സമയം ഫ്ലൈറ്റിനകത്തു പീഡിപ്പിക്കപ്പെട്ട കുട്ടികളും, ഗര്‍ഭിണികളും, പ്രായമായവരും അടങ്ങുന്ന യാത്രകാരുടെ സ്വാഭാവിക പ്രതികരണം.

ഹൈജാക്ക് ചെയ്തുവെന്ന സന്ദേശം ഏതു സാഹചര്യത്തിലായിരുന്നു ? റാഞ്ചുന്നതിന് സമാനമായ സാഹചര്യമുണ്ടായിരുന്നോ?

ഞങ്ങള്‍ ഫ്ലൈറ്റ് ഹൈജാക്ക് ചെയ്തു എന്ന് പറഞ്ഞു പൈലറ്റ് ബട്ടന്‍ അമര്‍ത്തുകയായിരുന്നു.ഹൈജാക്ക് ചെയ്തു എന്ന് പറഞ്ഞു ഫ്ലൈറ്റിലെ കോക്ക്പിറ്റിലെ ഒരു ബട്ടന്‍ അമര്‍ത്തിയാല്‍ ഇന്ത്യയിലെ എല്ലാ എയര്‍പോര്‍ട്ടുകളിലും അത് സംബന്ധിച്ച സന്ദേശം പോകും. അതാണവിടെ സംഭവിച്ചത്. പക്ഷെ അതൊന്നും ഞങ്ങള്‍ അറിയുന്നുണ്ടായിരുന്നില്ല.ഹൈജാക്ക് ചെയ്യണമെങ്കില്‍ ഞങ്ങളുടെ കയ്യില്‍ ഏതെന്കിലും തരത്തിലുള്ള ആയുധം വേണം. ഞങ്ങള്‍ ആരെയെങ്കിലും തടഞ്ഞു വെച്ചിട്ടുണ്ടായിരിക്കണം. അല്ലെങ്കില്‍ മറ്റെന്തെങ്കിലും തരത്തിലുള്ള അക്രമങ്ങള്‍ ഞങ്ങള്‍ കാണിച്ചിട്ടുണ്ടായിരിക്കണം. ഇതൊന്നുമില്ലാതെ ഞങ്ങള്‍ ഫ്ലൈറ്റ് ഹൈജാക്ക് ചെയ്തു എന്ന് പറയുന്നത് അത്രയും നീചമായ പ്രവര്‍ത്തിയാണ്.അതിനെതിരെ പ്രതികരിച്ചതിനാണ് ഞങ്ങളെ തീവ്രവാദികളാക്കി ചിത്രീകരിച്ചത്.

ഇവിടെ ഞങ്ങളല്ല വിമാനം ഹൈജാക്ക്‌ ചെയ്തത്. പൈലറ്റ് ആണ് ഞങ്ങളെ ഹൈജാക്ക് ചെയ്തു തിരുവനന്തപുരത്തു കൊണ്ട് ചെന്നിറക്കിയത് എന്നാണു വാസ്തവത്തില്‍ പറയേണ്ടത്.

യാത്രക്കാരില്‍ മൂന്നു പേര്‍ കോക്ക്പിറ്റിനകത്തു കടന്നു പൈലറ്റിനെ ഭീഷണിപ്പെടുത്തി, അവര്‍ക്ക് പിന്തുണയുമായി മറ്റു മൂന്നു പേര്‍ കൂടി എത്തി എന്ന ആരോപണം ഉണ്ടായിരുന്നു ?

ഞങ്ങള്‍ കോക്ക്പിറ്റിനകത്തു കടന്നു എന്ന് പറയുന്നു. കോക്ക്പിറ്റിനകത്തെക്ക് പുറത്തു നിന്ന് ഒരാള്‍ക്കും കടക്കാന്‍ സാധിക്കില്ല. കാരണം അവര്‍ ഡോര്‍ ലോക്ക് ചെയ്‌താല്‍ പിന്നീട് പുറത്തു നിന്നുള്ള ആര്‍ക്കും അത് തുറക്കാന്‍ സാധിക്കില്ല. അത് പുറത്തു നിന്ന് ഒരാള്‍ക്ക്‌ തുറക്കണമെങ്കില്‍ മറ്റൊരു സ്ഥലത്ത് പാസ്‌വേഡ് ഇട്ടു ലോക്ക് ചെയ്തു വെച്ചിരിക്കുന്ന കീ കൊണ്ട് വന്നു വേണം തുറക്കാന്‍.

യഥാര്‍ത്ഥത്തില്‍ പൈലറ്റ് ചെയ്തിരുന്നത്, അവര്‍ ഡോര്‍ തുറന്നു ഞങ്ങള്‍ക്ക് വിശദീകരിച്ചു നല്‍കുകയായിരുന്നു. ഈ മീറ്റര്‍ ഫ്ലൈറ്റ് സ്റ്റാര്‍ട്ട് ചെയ്തതിനു ശേഷം റണ്‍ ചെയ്യാനുള്ള സമയമാണ്, ആ സമയം അവസാനിച്ചിരിക്കുന്നു, അത് കൊണ്ട് ഇവിടെ നിന്ന് ഇന്ധനം നിറച്ചു തരുന്നില്ല എന്നൊക്കെ.

സാങ്കേതിക കാരണങ്ങളാലാണ് കൊച്ചിയിലേക്ക് നിങ്ങളെ തിരികെ കൊണ്ട് പോകാന്‍ കഴിയാതിരുന്നത് എന്നാണു എയര്‍ ഇന്ത്യയുടെ വാദം ?

ഇതേ പറഞ്ഞ സാങ്കേതികത്വങ്ങളും മറി കടന്നു മറ്റൊരു പൈലറ്റ് വന്നു വിമാനം പറത്തിയിട്ടാണ് ഞങ്ങളെ കൊച്ചിയില്‍ എത്തിച്ചത്. അത് വരെ ഞങ്ങളെ എയര്‍ ഇന്ത്യ വഞ്ചിക്കുകയായിരുന്നു എന്ന് അതില്‍ നിന്ന് തന്നെ വ്യക്തമാണ്.ആകാശത്ത് വെച്ച് പൈലറ്റിന്റെ സമയം അവസാനിച്ചിരുന്നുവെങ്കില്‍ അവര്‍ പാരച്യൂട്ടിലൂടെ ഇറങ്ങി പോകുമായിരുന്നോ?

യാത്രക്കാരുടെ പ്രധാന ആവശ്യം എന്തായിരുന്നു ?

ഞങ്ങള്‍ പറഞ്ഞത്,ഞങ്ങള്‍ക്ക് സാങ്കേതികത്വം അറിയേണ്ട കാര്യമില്ല. കൊച്ചിയിലേക്ക് ടിക്കെറ്റ് എടുത്താല്‍ ഞങ്ങളെ കൊച്ചിയില്‍ ഇറക്കുക. ഇന്ധനം ഇല്ലെങ്കില്‍ ഇന്ധനം നിറക്കുക. പൈലറ്റിന്റെ സമയം കഴിഞ്ഞു എന്നുണ്ടെങ്കില്‍ പുതിയ പൈലറ്റിനെ കൊണ്ട് വരിക.ഇതൊക്കെ ചെയ്തു നിങ്ങള്‍ ഞങ്ങളെ കൊച്ചിയിലെത്തിക്കണം. ഇത് പറഞ്ഞപ്പോഴാണ് പോലീസിനെ വിളിച്ചും കേന്ദ്ര സേനയെ വിളിച്ചും ഞങ്ങളെ ഉപദ്രവിക്കാന്‍ ശ്രമിച്ചത്.

പൈലറ്റ് രൂപാലി വാഗ്മര്‍ ഒരു ഇന്റെര്‍വ്യൂവില്‍ പറഞ്ഞിരുന്നു യാത്രക്കാര്‍ കുറച്ചു സമയം കൂടി സംയമനം പാലിക്കുകയായിരുന്നെന്കില്‍ പ്രശ്നങ്ങള്‍ ഉണ്ടാകില്ലായിരുന്നു എന്ന് ?

ഈ പ്രശ്നത്തിന് കാരണം ഈ പൈലറ്റ് തന്നെയാണ്. ഞങ്ങള്‍ ഫ്ലൈറ്റില്‍ നിന്ന് ഇറങ്ങാന്‍ തയാറാകാതിരുന്നതിനാല്‍ അവര്‍ക്കും ഇറങ്ങി പോകാന്‍ സാധിച്ചില്ല. ഫ്ലൈറ്റില്‍ യാത്രക്കാരേക്കാള്‍ ആദ്യം കയറേണ്ടത് ജീവനക്കാര്‍ ആണ്. അവസാനത്തെ  യാത്രക്കാരനും ഇറങ്ങിയതിനു ശേഷം മാത്രമേ അതിലെ ജീവനക്കാര്‍ക്ക് പുറത്തിറങ്ങാന്‍ സാധിക്കൂ. അത് നിയമമാണ്. മൂന്നു തവണ സ്റ്റാഫിന്റെ സമയം കഴിഞ്ഞതായി അവര്‍ അനൌന്‍സ്‌ ചെയ്തു.പിന്നെയും ഞങ്ങള്‍ പുറത്തിറങ്ങാതായപ്പോള്‍ ഞങ്ങള്‍ ഇറങ്ങി പോകുന്നതിനു വേണ്ടി അവര്‍ ഏ.സി ഓഫ് ചെയ്തു. ഭക്ഷണം തന്നില്ല. വെള്ളം തന്നില്ല. എന്നിങ്ങനെ പരമാവധി പീഡിപ്പിക്കാന്‍ ശ്രമിച്ചു. അതൊന്നും വക വെക്കാതെ ഞങ്ങള്‍ ഫ്ലൈറ്റില്‍ ഇരുന്നതാണ് തെറ്റ് എന്ന് പറയുന്നത്.

അവര്‍ ഇപ്പോള്‍ പറയുന്നത് ഞങ്ങളെ കൊച്ചിയിലേക്ക് കൊണ്ട് പോകാന്‍ അവര്‍ തയ്യാറായിരുന്നു എന്നാണു. യാതൊരു കാരണവശാലും കൊച്ചിയിലേക്ക് പോകില്ല എന്ന് അവര്‍ മൂന്നു തവണ അന്ന് ഫ്ലൈറ്റില്‍ അനൌന്‍സ്‌ ചെയ്തതാണ്.

യാത്രക്കാര്‍ പൈലറ്റിനെതിരെ വധ ഭീഷണി മുഴക്കിയെന്നു ആരോപണമുണ്ട് ?

ഫ്ലൈറ്റില്‍ കുട്ടികള്‍ക്ക് ഭക്ഷണം ഉണ്ടായിരുന്നില്ല. ഒരു യാത്രയില്‍ എത്ര ഭക്ഷണമാണ് നമ്മള്‍ ഒരു കുട്ടിക്ക് കരുതുക?ഇതൊന്നും മുന്‍കൂട്ടി തീരുമാനിച്ചതനുസരിച്ചു നടന്നതല്ലല്ലോ? ഭക്ഷണം തന്നതിന് ശേഷം 22 മണിക്കൂര്‍ കഴിഞ്ഞിരുന്നു അപ്പോള്‍.

ഫ്ലൈറ്റില്‍ ഭക്ഷണവും വെള്ളവും കിട്ടാതെ കിടന്നിരുന്ന ഒരു കുഞ്ഞിനെ കൊണ്ട് പോയി പൈലറ്റിനു കാണിച്ചു കൊടുത്തിരുന്നു. ആ കുഞ്ഞിനെന്തെന്കിലും സംഭവിച്ചാല്‍ ഞാന്‍ എന്തെങ്കിലും ചെയ്യും എന്ന് ആ കുഞ്ഞിന്റെ പിതാവ് അഷറഫ്‌ പറഞ്ഞതാണ് വധഭീഷണിയായി അവരെടുത്തിരിക്കുന്നത്. ആ പറഞ്ഞതിന്റെ സാഹചര്യം കൂടി നമ്മള്‍ മനസ്സിലാക്കണം. ആ ദമ്പതികള്‍ക്ക് ആദ്യത്തെ പ്രസവത്തില്‍ ഉണ്ടായ ഇരട്ട കുട്ടികളില്‍ രണ്ടു  പേരും മരിച്ചു. പിന്നീടുണ്ടായ ഇരട്ട കുട്ടികളില്‍ ഒരു കുഞ്ഞും മരിച്ചു. അതില്‍ മരിക്കാതെ ലഭിച്ച കുഞ്ഞാണിത്. മൂന്നു മാസം ഇന്ക്യുബേറ്ററില്‍ കിടന്ന ആറു മാസം പ്രായമായ ആ കുട്ടിയുടെ കാര്യത്തില്‍ പിതാവ് വികാരാധീനനാവുക സ്വാഭാവികമാണ്.

ഭക്ഷണമില്ലാതെ, വെള്ളമില്ലാതെ 22 മണിക്കൂര്‍ ദുരിതത്തിലാകുമ്പോള്‍ ഏതൊരു മനുഷ്യനും പ്രതികരിക്കില്ലേ? ഞങ്ങളും മനുഷ്യരല്ലേ? ആ സ്വാഭാവിക പ്രതികരണം മാത്രമേ ഞങ്ങളും ചെയ്തിട്ടുള്ളൂ. ഈ സംഭവം തമിഴ്നാട്ടിലോ, യു.പി യിലോ ആയിരുന്നെങ്കില്‍ ഫ്ലൈറ്റ് തന്നെ അവര്‍ കത്തിച്ചു കളഞ്ഞേനെ. പക്ഷെ ഞങ്ങള്‍ അന്തസ്സിന്റെ ഒരു പരിധി പോലും വിട്ടു പെരുമാറിയിട്ടില്ല.

കുടിക്കാന്‍ വെള്ളം ചോദിച്ചപ്പോള്‍ കേന്ദ്ര സേനയിലെ ഉദ്യോഗസ്ഥന്‍ ‘മൂത്രം കുടിക്കാന്‍ തരാം’ എന്ന് പറഞ്ഞുവോ ?

എയര്‍ ഇന്ത്യ ജീവനക്കാര്‍ ഭക്ഷണവും വെള്ളവും എല്ലാം തീര്‍ന്നു എന്ന് പറഞ്ഞപ്പോള്‍ തളര്‍ന്നു കിടന്ന കുഞ്ഞിനു കൊടുക്കാനായി വിമാനത്തിന് താഴെ നിന്നിരുന്ന കേന്ദ്ര സേനയിലെ ഒരു ഉദ്യോഗസ്ഥനോട് കുറച്ചു വെള്ളം ചോദിച്ചു. അപ്പോഴാണ്‌ അയാള്‍ പറഞ്ഞത്, ‘വെള്ളമല്ല, കുടിക്കാന്‍ മൂത്രം തരാമെന്നു’. അതുകേട്ടപ്പോള്‍  എല്ലാവരും കൂടി ബഹളമുണ്ടാക്കി. ഉടനെ അയാള്‍ അവിടെ നിന്നും അപ്രത്യക്ഷനായി. പിന്നെ അയാളെ കണ്ടിട്ടില്ല.

പോലീസിന്റെയും കേന്ദ്ര സേനയുടെയും പെരുമാറ്റം എങ്ങിനെയായിരുന്നു ?

ഫ്ലൈറ്റിനകത്തു കയറിയിട്ടാണ് പോലീസ്‌ ഞങ്ങളെ ഉപദ്രവിക്കാന്‍ ശ്രമിച്ചത്‌. നിങ്ങളൊക്കെ കണ്ടിട്ടുണ്ടാകും ആ വീഡിയോകള്‍. അതിനകത്ത് കണ്ടതൊക്ക അവിടെ നടന്ന സത്യങ്ങള്‍ ആണ്.

കൊച്ചിയില്‍ വന്നതിനു ശേഷം അവിടെ എയര്‍ ഇന്ത്യക്കാരും കേന്ദ്ര സേനയും ചേര്‍ന്ന് മറ്റൊരു തരത്തില്‍ പീഡിപ്പിക്കുകയായിരുന്നു.ഫ്ലൈറ്റിന്റെ വാതിലില്‍ നിന്ന് എമിഗ്രേഷന്‍ കൌണ്ടര്‍ വരെ നിന്ന കേന്ദ്ര സേനക്കാരുടെ ഇടയിലൂടെയാണ് പത്തു പേര് വീതമായി ഞങ്ങളെ ഇറക്കി കൊണ്ട് വന്നത്. അതില്‍ നിന്നും ഞങ്ങള്‍ ആറു പേരെ തിരഞ്ഞു പിടിച്ചു മാറ്റിയിരുത്തുകയായിരുന്നു. ഞങ്ങളുടെ പാസ്പോര്‍ട്ട് വാങ്ങി വെച്ചു. എന്താണ് കാരണമെന്ന് ചോദിച്ചപ്പോള്‍ മിണ്ടിപ്പോകരുത് എന്ന് മാത്രമായിരുന്നു കേന്ദ്ര സേനക്കാരുടെ മറുപടി. ഒന്നും പറയാന്‍ അനുവദിക്കാതെ ഞങ്ങളെ ഭീഷണിപ്പെടുത്തുകയായിരുന്നു കേന്ദ്ര സേനയിലെ ഉയര്‍ന്ന ഉദ്യോഗസ്ഥന്മാര്‍.  അതിനു മാത്രം എന്ത് തെറ്റാണ് ഞങ്ങള്‍ ചെയ്തത്. പണം മുടക്കി എടുത്ത ടിക്കെറ്റില്‍ പറഞ്ഞ സ്ഥലത്ത് ഇറക്കി തരണം എന്ന് പറഞ്ഞതോ. അതാണോ തെറ്റ്?

തിരുവനന്തപുരത്തു വെച്ച് മന്ത്രിമാര്‍ ആരെങ്കിലും പ്രശ്നത്തില്‍ ഇടപെട്ടിരുന്നോ ? 

ഇത്രയും സംഭവങ്ങള്‍ അവിടെ നടന്നു. ടീവിയിലൂടെയും, ഇന്റെര്‍നെറ്റിലൂടെയും മറ്റും ലോകം മുഴുവനും ഇത് കണ്ടു കൊണ്ടിരുന്നിട്ടും തിരുവനന്തപുരതുണ്ടായിരുന്ന ഒരു മന്ത്രി പോലും ഞങ്ങള്‍ക്കനുകൂലമായി പറയാനുണ്ടായിരുന്നില്ല എന്നത് വളരെ ദുഖകരമായിരുന്നു. പ്രവാസികളുടെ ചുമതലയുള്ള കേന്ദ്ര മന്ത്രിയുണ്ട് നമുക്ക്, കേരളത്തിലെ പ്രവാസികളുടെ ചുമതലയുള്ള മന്ത്രിയുണ്ട്, ഇവരൊന്നും ഇതിനെപ്പറ്റി ഒരക്ഷരം മിണ്ടിയില്ല. പ്രവാസികളുടെ സഹായം വാങ്ങാന്‍ എല്ലാവരുമുണ്ട്. ഇതിനൊക്കെ ഒരു പരിഹാരമുണ്ടായെ പറ്റൂ. എത്ര കാലമായി നമ്മളിത് അനുഭവിക്കുന്നു?

എട്ടു ദിവസത്തെ ലീവിന് വന്ന ആള്‍ക്ക് അതില്‍ നാല് ദിവസം പോകുക എന്നത് ദുഖകരമല്ലേ. പെരുന്നാളിന്റെ ലീവിന് വന്ന ആളുകള്‍ ആയിരുന്നു അധികവും. പിതാവ്‌ അത്യാസന്ന നിലയില്‍ ആശുപത്രിയില്‍ കിടക്കുന്ന ഒരു മകനുണ്ടായിരുന്നു അതില്‍. വന്നതിന്റെ പിറ്റേ ദിവസം ബാപ്പ മരിക്കുന്നു. നഷ്ടപ്പെട്ട സമയത്തെ കുറിച്ച് അയാള്‍ക്കെത്ര വിഷമമുണ്ടാകും.ജോലിക്കായി ഇന്റര്‍വ്യൂവിനു വന്നിരുന്ന ആളുകളുണ്ടായിരുന്നു. കല്യാണത്തിന് വന്നവര്‍, അങ്ങിനെ എത്ര പേര്‍. അതില്‍ കുറച്ചു പേരെ പിന്നീട് മൊഴിയെടുക്കാന്‍ വിളിപ്പിക്കുക, തെളിവെടുപ്പിന് വിളിപ്പിക്കുക, എന്തൊരു അക്രമമാണിത്?

ഈ സംഭവത്തെ തുടര്‍ന്ന് നിങ്ങള്‍ക്കെതിരെ പോലീസ്‌ കേസ്‌ എടുത്തിട്ടുണ്ടോ ?

ഈ കേസിലെ പ്രധാന വിഷയം കേസിനെ സംബന്ധിച്ച ഒന്നും തന്നെ പോലീസ്‌ വെളിപ്പെടുത്തുന്നില്ല എന്നതാണ്. ഞങ്ങള്‍ ചോദിക്കുന്നതിനൊന്നും അവര്‍ വ്യക്തമായി മറുപടി പറയുന്നില്ല. ഞങ്ങള്‍ക്കെതിരെ കേസ്‌ എടുക്കില്ല എന്ന് പറഞ്ഞു. എന്നാല്‍ എഫ്ഫ.ഐ.ആര്‍ ഇട്ടിട്ടുണ്ട്. എഫ.ഐ.ആര്‍ ഇടാത്ത ഒരു കേസിന് ഞങ്ങളെ മൊഴിയെടുക്കാന്‍ വിളിക്കേണ്ട ആവശ്യമില്ല. കേസില്ല എന്ന് പറഞ്ഞു പറഞ്ഞയക്കുന്ന സമയത്ത് അവര്‍ പിന്നെയും ഞങ്ങളുടെ എല്ലാവരുടെയും ഫോട്ടോ എടുത്തു. ഞങ്ങള്‍ ആറു പേരെയും നിരത്തി നിര്‍ത്തിയാണ് ഫോട്ടോ എടുത്തത്‌. പിന്നീട് അത് എന്തിനൊക്കെ ഉപയോഗിച്ച് എന്നറിയില്ല.എന്തെങ്കിലും പ്രശ്നങ്ങള്‍ ഉണ്ടാവുകയാണെങ്കില്‍ അതേ നാണയത്തില്‍ തന്നെ നേരിടാം എന്നാണു ഞങ്ങള്‍ക്ക് ലഭിച്ച നിയമോപദേശം.

എഫ്.ഐ.ആറിന്റെ കോപ്പി ഞങ്ങള്‍ ചോദിച്ചില്ല. വാക്കാല്‍ മാത്രമേ കേസില്ല എന്ന് പറഞ്ഞിട്ടുള്ളൂ. പൈലറ്റ് എയര്‍പോര്‍ട്ട് അധികൃതര്‍ക്ക്‌ നല്‍കിയ പരാതിയില്‍ ഡല്‍ഹിയില്‍ നിന്നും വന്ന ഒരു ഉന്നത ഉദ്യോഗസ്ഥന്‍ ഞങ്ങളെ വിളിപ്പിച്ചു. ഞങ്ങള്‍ ഇവിടെ വന്നു രണ്ടു ദിവസം കഴിഞ്ഞിട്ടാണ് വിളിപ്പിച്ചത്. അപ്പോള്‍ ഞങ്ങള്‍ പോയി മൊഴി കൊടുത്തിരുന്നു.  ആ മൊഴി കൊടുത്തതിന്റെ കോപ്പി ഞങ്ങളുടെ കൈവശമുണ്ട്.

തിരുവനന്തപുരം വലിയതുറ പോലീസ്‌ സ്റേഷനില്‍ പൈലറ്റ് രൂപാലി പരാതി നല്‍കിയിട്ടുണ്ട്. എന്നാല്‍ ഹൈജാക്ക് ചെയ്തു എന്നതിന് ബ്ലാക്ക്‌ ബോക്സ് വിശദാംശങ്ങള്‍ നല്‍കണം. അത ഇത് വരെ കൊടുത്തിട്ടില്ല. അത് കൊടുത്താല്‍ ഞങ്ങള്‍ ചെയ്തത് നൂറു ശതമാനം ശരിയാണ് എന്ന് തെളിയും. അത് കൊണ്ടാണ് കൊടുക്കാത്തത്.

യാത്രക്കാര്‍ മദ്യപിച്ചിരുന്നു എന്ന് പറയുന്നു ?

ഫ്ലൈറ്റില്‍ അന്ന് മദ്യം വിതരണം ചെയ്തിരുന്നില്ല. ഭക്ഷണം തന്നെ വളരെ താമസിച്ചായിരുന്നു നല്‍കിയത്. ഫ്ലൈറ്റില്‍ 185 യാത്രക്കാരോളമുണ്ടായിരുന്നു. അവര്‍ പരസ്പരം അറിയുന്നവരല്ല. എല്ലാം ഒരു പ്ലാനിങ്ങുമില്ലാതെ നടന്നതാണ്. എല്ലാം യാദൃശ്ചികമായിരുന്നു. യാതൊരു കോര്‍ഡിനേഷനും ഉണ്ടായിരുന്നില്ല. അവിടെ ഓരോരുത്തരുടെയും അവസ്ഥയും വികാരവും അവര്‍ പ്രകടിപ്പിച്ചു.

തിരുവനന്തപുരത്ത് നിന്നും കൊച്ചിയിലേക്ക് കൊണ്ട് വരുമ്പോള്‍ കേസ് ഉണ്ടാവില്ല എന്ന് ഉറപ്പു തന്നിരുന്നോ ?

തിരുവനന്തപുരത്ത് നിന്നും കൊച്ചിയിലേക്ക് കൊണ്ട് വരുമ്പോള്‍ കേസ് ഉണ്ടാവില്ല എന്ന് ആരും ഉറപ്പു പറഞ്ഞിരുന്നില്ല. അത്തരം പത്രവാര്‍ത്തകളില്‍ ഞങ്ങള്‍ വിശ്വസിക്കുന്നില്ല. കാരണം കേസില്ല എങ്കില്‍ തിരുവനന്തപുരത്തെ വലിയതുറ പോലീസ്‌ സ്റേഷനില്‍ വെച്ച് മൊഴിയെടുതത്തിനു ശേഷം എന്തിനാണ് ഞങ്ങളുടെ ഫോട്ടോ എടുത്തത്. അതിനാണ്  അബ്ദുല്‍ ഖാദര്‍ എം.എല്‍.എ അവിടെ നിരാഹാരമിരുന്നത്. അതിനു അദ്ദേഹത്തിന്റെ പേരിലും കേസുണ്ട്, പോലീസ്‌ സ്റ്റേഷന്റെ പ്രവര്‍ത്തനം തടസ്സപ്പെടുത്തി എന്ന പേരില്‍.

കൊച്ചിയിലെത്തിയപ്പോള്‍ കസ്റ്റഡിയിലായ നിങ്ങളെ കൂടാതെ മറ്റു യാത്രക്കാര്‍ വിമാനത്താവളത്തിന് പുറത്തിറങ്ങി എന്നും നിങ്ങളുടെ ബന്ധുക്കള്‍ പ്രതികരിച്ചപ്പോഴാനു അവര്‍ നിങ്ങളെ വിട്ടു കിട്ടാന്‍ സമരം തുടങ്ങിയതെന്നും പത്രവാര്‍ത്തയുണ്ടായിരുന്നല്ലോ ?

അത് ശരിയല്ല. ഞങ്ങളെ ആറു പേരെ മാത്രം തടഞ്ഞു വെച്ച്. ബാക്കിയുള്ള എല്ലാവരെയും എമിഗ്രേഷന്‍ കഴിഞ്ഞു താഴേക്കു വിട്ടു. അവര്‍ വന്നു ലഗേജ്‌ എടുത്തു പുറത്തു പോകുന്നതിനു മുന്‍പ് ഈ ആറു പേരയും വിട്ടു തരണമെന്ന് ആവശ്യപ്പെട്ടു. ഞങ്ങള്‍ ഒരുമിച്ചു പ്രതികരിച്ചവരാണ്, അവരെ വിട്ടു തരാതെ ഞങ്ങള്‍ പുറത്തു പോവില്ല എന്ന് പറഞ്ഞു യാത്രക്കാര്‍ എയര്‍പോര്‍ട്ടില്‍ നിന്ന് പുറത്തിറങ്ങാതെ ഉള്ളില്‍ തന്നെ ഇരുന്നു. അങ്ങിനെ ഒന്നര മണിക്കൂറിലധികം ഇരുന്നപ്പോഴാണ് മറ്റു യാതൊരു വഴിയുമില്ലാതെ ഞങ്ങളെ വിട്ടയക്കുന്നത്.

കേന്ദ്ര സേനയിലെ അറുപതോളം ആളുകള്‍ തോക്കുമായി ലഗേജ്‌ എടുക്കുന്ന സ്ഥലത്തുനിന്നും വാഹനം നില്‍ക്കുന്ന സ്ഥലം വരെ വളഞ്ഞാണ് ഞങ്ങളെ കൊണ്ട് പോയത്. എന്തിനാണ് തീവ്രവാദികളെ കൊണ്ട് പോകുന്നത് പോലെ ഞങ്ങളെ കൊണ്ട് പോയത്. ഒരു തെറ്റും ചെയ്യാതെ തീവ്രവാദി എന്ന് മുദ്ര കുത്തുമ്പോള്‍ ഉണടാകുന്ന ഞങ്ങളുടെ അവസ്ഥ നിങ്ങള്ക്ക് ഊഹിക്കാവുന്നതേയുള്ളൂ.

കേരള പോലീസിന്റെ പെരുമാറ്റം എങ്ങിനെയായിരുന്നു ?

കേരള പോലീസിലെ ഉയര്‍ന്ന രണ്ടു ഉദ്യോഗസ്ഥന്മാരടക്കം ഏതാണ്ട് പതിനഞ്ചു പേര്‍ തിരുവനതപുരത്ത് വെച്ച് ഫ്ലൈറ്റിനടുത്തെക്ക് വന്നു ഞങ്ങളോട് ഉള്ളില്‍ കയ്യറി ഇരിക്കാന്‍ ആവശ്യപ്പെട്ടു. പക്ഷെ ആ സമയത്ത് ഉള്ളില്‍ കയറി ഇരിക്കാന്‍ പറ്റുന്ന അവസ്ഥ ആയിരുന്നില്ല വിമാനത്തില്‍. ഏ.സി ഓഫ് ചെയ്തിരുന്നു. വെള്ളമില്ലാത്തത് മൂലം അതിനകത്ത് ദുര്‍ഗന്ധം നിറഞ്ഞിരുന്നു. ആ സമയത്ത് കേരള പോലീസിലെ ഒരു ഉന്നത ഉദ്യോഗസ്ഥന്‍ മാത്രമാണ് ഞങ്ങളോടെ വളരെ മോശമായി പെരുമാറിയത്. എന്തിന്റെ അടിസ്ഥാനത്തിലാണ് അദ്ദേഹം അങ്ങിനെ പെരുമാറിയത്‌ എന്ന് അറിയില്ല.

കൊച്ചിയിലെത്തിയപ്പോള്‍ കേരള പോലീസ്‌ ഏറ്റവും നന്നായാണ് പെരുമാറിയത്. മാത്രമല്ല ഞങ്ങളെ അഭിനന്ദിക്കുകയും ചെയ്തു. കുറേക്കാലമായി എയര്‍ ഇന്ത്യ നടത്തുന്ന ഇത്തരം പെരുമാറ്റങ്ങളോട് ഇങ്ങിനെ തന്നെയായിരുന്നു പ്രതികരിക്കേണ്ടത് എന്ന് അവര്‍ ഞങ്ങളോട് പറഞ്ഞു. ഇന്ന് വരെ എയര്‍ ഇന്ത്യ തിരുവന്തപുരത്തു ഇറക്കിയവരെ ഫ്ലൈറ്റില്‍ തന്നെ കൊച്ചിയിലെത്തിച്ചിട്ടില്ല. നിങ്ങളെ കൊണ്ട് അത് സാധിച്ചു എന്ന് പറഞ്ഞു ഉന്നത ഉദ്യോഗസ്ഥര്‍ വരെ വന്നു ഞങ്ങളെ അഭിനന്ദിച്ചിരുന്നു.

സംഭവത്തില്‍ പെട്ട അഷറഫ്, അഗസ്റ്റിന്‍, റാഷിദ്, മനോജ്, തോമസ് മറ്റു അഞ്ചു പേരുടെ അവസ്ഥ എന്താണ് ?

സംഭവത്തില പെട്ടിട്ടുള്ള മറ്റു അഞ്ചു പേരുമായി നിരന്തര സമ്പര്‍ക്കമുണ്ട്. എല്ലാവരും തിരിച്ചെത്തി. എയര്‍പോര്‍ട്ടില്‍ നിന്നും പോലീസ്‌ പിടിച്ചു കൊണ്ട് പോകാന്‍ നോക്കിയ തോംസനൊക്കെ തിരിച്ചെത്തിയപ്പോള്‍ നല്ല സ്വീകരണമാണ് പ്രവാസികള്‍ എയര്‍പോര്‍ട്ടില്‍ വെച്ഗ്  നല്‍കിയത്. 

സംഭവത്തിന്‌ ശേഷമെങ്കിലും മന്ത്രിമാരോ ജനപ്രതിനിധികളോ ബന്ധപ്പെട്ടിരുന്നോ?

ഈ സംഭവത്തിന്‌ ശേഷം മന്ത്രിമാരോ മറ്റുള്ളവരോ ബന്ധപ്പെട്ടിട്ടില്ല. കൊച്ചിയില്‍ മൊഴി കൊടുത്തു മടങ്ങുമ്പോള്‍ കെ.വി.അബ്ദുല്‍ ഖാദര്‍ എം.എല്‍.എ ബന്ധപ്പെട്ടിരുന്നു. അദ്ദേഹം ഇങ്ങോട്ട് ബന്ധപ്പെടുകയായിരുന്നു. അദ്ദേഹം ഞങ്ങളുടെ അടുത്ത് വന്നു ഞങ്ങളുടെ മുന്നില്‍ വെച്ച് തന്നെ മുഖ്യ മന്ത്രിയുമായി മൊബൈല്‍ ഫോണില്‍ ബന്ധപ്പെട്ടു. ഒരു കാരണവശാലും ഞങ്ങള്‍ക്കെതിരെ കേസെടുക്കില്ല എന്ന് മുഖ്യമന്ത്രി അദ്ദേഹത്തോട് പറയുന്നത് ഞങ്ങള്‍ കേട്ടിരുന്നു. അതിനു പിറ്റേ ദിവസമാണ് തിരുവനന്തപുരത്ത് നിന്ന് പോലീസ്‌ വിളിക്കുന്നത്. അപ്പോള്‍ ആര് പറയുന്നതാണ് വിശ്വസിക്കുക?മുഖ്യമന്ത്രി പറയുന്നത് പോലും നടക്കുന്നില്ല എന്ന അവസ്ഥയാണുള്ളത്. ആരോടാണ് പിന്നെ സങ്കടം പറയുക?

നമുക്ക് പ്രവാസകാര്യത്തിനു മാത്രമായി ഒരു ഒരു കേന്ദ്രമന്ത്രിയില്ലേ?. അദ്ദേഹം ഇത് വരെ ഇതിനെപ്പറ്റി ഒന്നും പറഞ്ഞില്ല. പ്രതികരിച്ച ആളുകളെ കമ്മ്യൂണിസ്റ്റ്കാരാക്കി,പെണ്‍വാണിഭക്കാരാക്കി. എന്ത് മോശമാണിതൊക്കെ? നമ്മുടെ പേരിലാണ് അദ്ദേഹം ഈ ലോകം ചുറ്റുന്നത്. ഈ സുഖ സൌകര്യങ്ങളൊക്കെ അനുഭവിക്കുന്നത്.

ഞങ്ങള്‍ക്ക് ഒരു വ്യക്തിയോടും വ്യക്തിപരമായി വൈരാഗ്യമില്ല. എന്നാല്‍ പ്രവാസികളുടെ പേരില്‍ ശമ്പളം വാങ്ങി, മറ്റുള്ള എല്ലാ ആനുകൂല്യങ്ങളും പറ്റുന്ന ആളുകള്‍ പ്രവാസികള്‍ക്ക് വേണ്ടി ഒരക്ഷരം പറയാന്‍ തയ്യാറാവുന്നില്ല എന്നറിയുമ്പോള്‍ അതിലും കൂടുതല്‍ സങ്കടം എന്താണുള്ളത്?

പുതിയ മന്ത്രി വേണുഗോപാല്‍ ആദ്യമായി വന്നു.പ്രവാസികള്‍ക്ക് പ്രതീക്ഷയുണ്ടായിരുന്നു. എന്നാല്‍ തിരിച്ചു പോയത് ആരെങ്കിലും അറിഞ്ഞോ? എന്തെങ്കിലും പ്രസ്താവനയുണ്ടായോ? ഒരു എം.എല്‍.എ വന്നു, ഷാഫി പറമ്പില്‍. ഇവരൊക്കെ വന്നത് മാത്രമേ അറിയുന്നുള്ളൂ. പോയത് ആരും അറിയുന്നില്ല. ഞാനിവിടെ വന്നു, ഒരു പരാതി കിട്ടി, അതിനു ഇന്ന തരത്തിലുള്ള നടപടി ഉണ്ടാവും എന്ന് പറയാന്‍ ഒരു മന്ത്രിക്കു പോലും സാധിക്കാത്ത അവസ്ഥയാണിപ്പോള്‍.

നാട്ടുകാരില്‍ നിന്നുള്ള പ്രതികരണം എങ്ങിനെ ആയിരുന്നു ?

നാടുകാരില്‍ നിന്നും നല്ല പ്രതികരണമായിരുന്നു. നാലഞ്ചു ദിവസത്തോളം പത്ര മാധ്യമങ്ങളിലും മറ്റും ഞങ്ങള്‍ നിറഞ്ഞു നിന്നിരുന്ന ഒരു സമയമായിരുന്നു. എല്ലാവരും, പ്രത്യേകിച്ച് പ്രവാസി കുടുംബങ്ങളില്‍ ഉള്ളവര്‍ നിങ്ങള്‍ ചെയ്തത് വളരെ നന്നായി എന്ന രീതിയിലാണ് പ്രതികരിച്ചത്. കാരണം ഒട്ടു മിക്ക പ്രവാസികളും എയര്‍ ഇന്ത്യയില്‍ നിന്ന് ഒരിക്കലെങ്കിലും ഇത്തരം പെരുമാറ്റങ്ങള്‍ ലഭിച്ചവരാണ്.

എയര്‍ ഇന്ത്യയുടെ പ്രതികരണം എങ്ങിനെ ?

ചരിത്രത്തില്‍ ആദ്യമായാണ് ഇത്തരം ഒരു സമരം വിജയിക്കുന്നത്. അതിനാല്‍ എയര്‍ ഇന്ത്യ വിറളി പൂണ്ടിരിക്കുന്നു. എയര്‍ ഇന്ത്യയുടെ പേടി ഈ സംഭവം ഒരു തുടര്‍ച്ചയാകുമോ എന്നാണു. ഇനിയും ഇത്തരം പ്രതികരണങ്ങള്‍ തുടര്‍ന്നാല്‍ അത് എയര്‍ ഇന്ത്യയുടെ ഉത്തരവാദിത്വമില്ലായ്മക്ക് കൂടുതല്‍ ഭീഷണിയാകും. ഞങ്ങള്‍ പ്രതികരിച്ചതിന്റെ അടുത്ത ദിവസം തന്നെ കോഴിക്കോട്‌ ഇറക്കേണ്ട ഫ്ലൈറ്റ് കൊണ്ട് വന്നു കൊച്ചിയിലിറക്കി. ആളുകളോട് ബസ്സില്‍ പോകാന്‍ പറഞ്ഞു. യാത്രക്കാരെല്ലാവരും പുറത്തിറങ്ങി നിന്നു. ആ അവസ്ഥയില്‍ ഒരു ഫ്ലൈറ്റ് പോലും ഇറക്കാന്‍ സാധിച്ചില്ല. അവസാം അവരെ കോഴികോട് കൊണ്ട് പോയി ഇറക്കി കൊടുത്തു. ഇത് ഒരു തുടര്‍ കഥയാകുമോ എന്ന് എയര്‍ ഇന്ത്യക്ക് പേടിയുണ്ട്. അതുണ്ടാവാതിരിക്കാന്‍ ഞങ്ങളെ പലതും പറഞ്ഞു പേടിപ്പിക്കുകയാണ്.

എയര്‍ ഇന്ത്യക്കെതിരെ നിയമ നടപടിക്ക് ഉദ്ദേശമുണ്ടോ ?

എയര്‍ ഇന്ത്യക്കെതിരെ മാനസിക പീഡനത്തിനും ഉപഭോക്തൃ സംരക്ഷണ നിയമനുസരിച്ചും നടപടി സ്വീകരിക്കുന്നതിനുള്ള കാര്യങ്ങള്‍ ആലോചിച്ചു വരികയാണ്. നിയമ വശങ്ങള്‍ മുഴുവന്‍ പഠിച്ച ശേഷം എംബസ്സി മുഖേന പരാതി നല്‍കും.

എയര്‍ ഇന്ത്യ ഇനിയും രക്ഷപ്പെടുമെന്ന് തോന്നുന്നുണ്ടോ ?

എന്തൊക്കെ പറഞ്ഞാലും എയര്‍ ഇന്ത്യ തകരണമെന്നോ എയര്‍ ഇന്ത്യയെ ബഹിഷ്കരിക്കണമെന്നോ ഉള്ള അഭിപ്രായം എനിക്കില്ല. കാരണം അതു നമ്മുടെ ഓരോരുത്തരുടെയും സ്വത്താണ്. നമ്മള്‍ നാടിലേക്ക് വരാന്‍ ടിക്കെറ്റ് എടുക്കുന്നതിനു വേണ്ടി വെബ്സൈറ്റില്‍ തിരയുമ്പോള്‍ നമ്മുടെ കൈ ആദ്യം പോകുക എയര്‍ ഇന്ത്യ എക്സ്പ്രസ്സിലേക്ക് ആയിരിക്കും. അത് നമ്മുടെ ദേശീയ ബോധം കൊണ്ടാണ്.

അത് നശിപ്പിക്കാന്‍ നമ്മള്‍ കൂട്ട് നില്‍ക്കരുത്. നമ്മളതിനെ നന്നാക്കിയെടുക്കാനാണ് ശ്രമിക്കേണ്ടത്. നന്നാക്കിയെടുക്കാന്‍ ഇപ്പോഴുള്ളവര്‍ക്ക് പറ്റുന്നില്ലെങ്കില്‍ പറ്റുന്നവരെ നിയമിക്കുക. യൂസഫലി പോലുള്ള ആളുകള്‍ അതില്‍ നിന്നും പുറത്തു പോരുമ്പോള്‍, കെടുകാര്യസ്ഥത എത്രയുണ്ടെന്ന് മനസ്സിലാക്കാം. ഈ സ്ഥാപനം നശിപ്പിച്ചിട്ട് അതിനെ വില കുറച്ചു ആര്‍ക്കും വേണ്ടാതാക്കി ഏറ്റെടുക്കാന്‍ ചില ആളുകള്‍ ഒരുങ്ങിയിരിക്കുന്നുണ്ട്.അവര്‍ക്ക് വേണ്ടി മറ്റുള്ളവര്‍ കളിക്കുന്ന കളികളുടെ ഉദാഹരണങ്ങളാണിതൊക്കെ. അല്ലെങ്കില്‍ അജിത്‌ സിംഗിനെ പോലുള്ളവര്‍ ഇങ്ങിനെ സംസാരിക്കുമോ?

പ്രവാസിയുടെ പ്രശ്നം എയര്‍ ഇന്ത്യ മാത്രമാണോ ?

പ്രവാസിക്ക് ഇപ്പോള്‍ എയര്‍ ഇന്ത്യ പ്രശ്നം മാത്രമല്ല ഉള്ളത്. മറ്റു ഒരു പാട് പ്രശ്നങ്ങളുണ്ട്. ഒരാളും ആവശ്യപ്പെടാത്ത ഒന്നാണ് ശ്മശാനം. നമുക്ക് വേണ്ടത് ശ്മശാനമല്ല. മറിച്ച് നമുക്ക് ലഭിക്കേണ്ട ന്യായമായ അവകാശങ്ങളാണ്. കപ്പല്‍ സര്‍വീസ്‌ ഉണ്ടായിരുന്നല്ലോ ഇവിടെ, എന്ത് സൌകര്യമായിരുന്നു, നിരവധി ആളുകള്‍ അതുപയോഗിച്ചിരുന്നില്ലേ? അതൊക്കെ അവസാനിപ്പിച്ചത് സ്വാര്‍ത്ഥ ലാഭത്തിനു വേണ്ടി മാത്രമാണ്. കൂട്ടായ അവകാശഷങ്ങള്‍ക്ക് വേണ്ടി എല്ലാവരും നിലകൊള്ളണം.

മുഖ്യമന്ത്രിയും മറ്റും പറഞ്ഞിട്ട് നടക്കുന്നില്ല.പ്രവാസികാര്യ മന്ത്രി മിണ്ടുന്നില്ല. ലക്ഷകണക്കിനു വരുന്ന നമ്മുടെ പ്രതിനിധി എന്ന നിലക്ക് ഒരു മന്ത്രി പോലും നമ്മളെ സപ്പോര്‍ട്ട് ചെയ്യാനില്ലാത്ത അവസ്ഥയില്‍  നമ്മള്‍ നമ്മളെ മനസിലാക്കുക.രാഷ്ട്രീയ പാര്‍ട്ടിക്കതീതമായി പ്രവാസികളെ സഹായിക്കുന്നവര്‍ക്ക് വോട്ടു ചെയ്യണമെന്നു നമ്മുടെ കുടുംബങ്ങളോട് ആവശ്യപ്പെടണം.

പ്രവാസികള്‍ ഏതു രീതിയില്‍ പ്രവര്തിക്കനമെന്നാണ് താന്കള്‍ ആഗ്രഹിക്കുന്നത് ?

ഇനിയും നമ്മള്‍ അനുഭവിക്കാനാണ് ആഗ്രഹമെന്കില്‍ ആയിക്കോട്ടെ. അല്ലാത്ത പക്ഷം പ്രവാസി പ്രതികരിക്കണം. കേരളത്തിന്റെ ഒരു വര്‍ഷത്തെ ബജറ്റിനെക്കാള്‍ അധികമാണ് പ്രവാസികള്‍ അയക്കുന്ന പണം. കേരളത്തില്‍ ഇത്രയും വികസനമുണ്ടാവാന്‍ കാരണം പ്രവാസികള്‍ തന്നെയാണ്. ഇവിടെ പ്രവാസി സ്വാധീനമില്ലാത്ത ഒരു കുടുംബത്തിനെ പറയാമോ? അത്രയും സ്വാധീനമുള്ള നമ്മള്‍ ഇത്രയും പീഡനം ഏറ്റു വാങ്ങേണ്ട ആവശ്യമെന്ത്ന്തു? അതിനു നമ്മളൊന്നായേ പറ്റൂ. ചര്‍ച്ചകള്‍ക്കും, പരാതി വാങ്ങാനും എത്തുന്ന നേതാക്കളോട് നമ്മുടെ പ്രശ്നങ്ങള്‍ എഴുതി നല്‍കി പ്രശ്ന പരിഹാരം എഴുതി വാങ്ങിക്കണം.  

ഗള്‍ഫിലെ പ്രവാസി സംഘടനകളുടെ പ്രതികരണം എങ്ങിനെ ആയിരുന്നു ?

ഏറ്റവും നന്നായി പ്രതികരിച്ചവരാണ്  സൗദിയിലെ പ്രവാസികളും, അബുദാബിയിലെ കെ.എം.സി.സിയും. എനിക്ക് വ്യക്തമായ രാഷ്ട്രീയമുണ്ട്. ഞാന്‍ ഇടതുപക്ഷ അനുഭാവിയാണ്. പക്ഷെ നല്ലത് ചെയ്യുമ്പോള്‍ പറയാതിരിക്കാന്‍ വയ്യ. അബുദാബി കെ.എം.സി.സി ഏറ്റവും നന്നായി പ്രതികരിച്ചു. ഏറ്റവും അധികം ആളുകളെ ഉള്‍പ്പെടുത്തി ചര്‍ച്ചകളും മറ്റും സംഘടിപ്പിച്ചു. ഈ പ്രശ്നത്തില്‍ യു.എ.ഇ യില്‍ മുന്നില്‍ നിന്നത് കെ.എം.സി.സി ആണ്.

സൗദിയിലെ കുറെ കൂട്ടായ്മയിലെ ആളുകള്‍ ഒരു യോഗം വിളിച്ചിരുന്നു. ഞാന്‍ അതില്‍ ഫോണിലൂടെ സംസാരിച്ചിരുന്നു. ഫേസ് ബുക്കിലും മറ്റുമൊക്കെ സൗദി പ്രവാസികള്‍ ഏറ്റവും നന്നായി പ്രതികരിച്ചു, ചര്‍ച്ച ചെയ്തു. എങ്കിലും നമുക്ക് ചര്‍ച്ചകള്‍ക്ക് അപ്പുറം പ്രായോഗികമായി മുന്നോട്ടു പോയേ പറ്റൂ. എപ്പോഴും ചര്‍ച്ചയും സെമിനാറും മാത്രമായാല്‍ ഒന്നും നടക്കില്ല. കുറേക്കാലമായി നമ്മള്‍ ഈ ചര്‍ച്ചകളുമായി നടക്കുന്നു. ഇനി പ്രായോഗികമായി പ്രവര്‍ത്തിക്കേണ്ട സമയമായി.

ഭാവി പരിപാടികള്‍ എന്തെങ്കിലും ആസൂത്രണം ചെയ്തിട്ടുണ്ടോ?

ഞങ്ങള്‍ ഒരു രേജിസ്ട്രെട് സംഘടന ഉണ്ടാക്കാന്‍ പോകുന്നു. അതില്‍ രാഷ്ട്രീയമില്ല. പിരിവുകളില്ല. സോഷ്യല്‍ മീഡിയകളിലൂടെ നിരവധി മികച്ച ബന്ധങ്ങള്‍ ലഭിച്ചിട്ടുണ്ട്. അത് ഉപയോഗപ്പെടുത്തി ഓരോ ഭാഗത്തും നല്ല കൂട്ടായ്മകള്‍ ഉണ്ടാക്കി കൂട്ടായ തീരുമാനങ്ങളെടുക്കുക. നാട്ടിലുള്ള ആളുകളും പ്രവാസികളും പിന്തുണക്കുകയാനെന്കില്‍ എംബസ്സി വഴി പരാതി നല്‍കാന്‍ സാധിക്കും. അങ്ങിനെ പരാതികള്‍ നല്‍കുക. നല്ല അഭിഭാഷകര്‍ അതിലുണ്ട്. അവരെല്ലാം വളരെ താല്പ്പര്യതോട് കൂടി നമ്മളെ പിന്തുണയ്ക്കാമെന്ന് അറിയിച്ചിട്ടുണ്ട്.

ഒരു സംഘടനയുമായി മുന്നോട്ടു പോയാല്‍ എല്ലാം ശരിയാക്കാം എന്ന് തോന്നുന്നുണ്ടോ?

നമുക്ക് സാധിക്കും. കാരണം വയലാര്‍ രവി പോലുള്ള ഒരു കേന്ദ്രമന്ത്രി വന്നിട്ട് കേവലം അമ്പതു ആളുകളെ പോലും സദസ്സില്‍ തികച്ചു അണിനിരത്താന്‍ കിട്ടിയില്ല എന്നത് ഒരു വലിയ കാര്യം തന്നെയാണ്. ഉള്ളവരില്‍ തന്നെ മുപ്പതു പേരോളം പത്രക്കാരായിരുന്നു. ഈ വികാരം നിലനിര്‍ത്തി കൊണ്ട് മുന്നേറിയാല്‍ പ്രവാസികള്‍ക്ക് പലതും നേടിയെടുക്കാന്‍ സാധിക്കും. അതിന എല്ലാവരും ഒറ്റക്കെട്ടാവണം എന്നാണു എനിക്ക് പറയാനുള്ളത്. ഒരു രാഷ്ട്രീയവും ഇതിലില്ല. ഗ്രൂപ്പും ഇല്ല. പ്രവാസി എന്ന ഒരു ഐക്യ ബോധവും ചിന്തയും മാത്രം.

പ്രവാസം നമ്മെലെന്നു തുടങ്ങിയോ അന്നു മുതലുണ്ട് ഈ പ്രശ്നം. ഇത്രയും കാലം നമ്മളിവരെ തീറ്റിപോറ്റി. ഗള്‍ഫിലേക്ക് വരുന്നവരെ നമ്മള്‍ സുഖിപ്പിച്ചു വിട്ടു. അന്നൊക്കെ അവര്‍ പല വാഗ്ദാനങ്ങളും നല്‍കി. ഇനി അങ്ങിനെ വിട്ടു കൊടുക്കേണ്ടതില്ല. തിരഞ്ഞെടുപ്പില്‍ നമ്മുടെ ആവശ്യങ്ങള്‍ അംഗീകരിക്കാന്‍ തയാറുള്ള ആളുകളെ മാത്രമേ നമ്മള്‍ അംഗീകരിക്കൂ എന്ന് പ്രവാസികള്‍ കൂട്ടായി തീരുമാനിക്കുകയാണെങ്കില്‍ ഇവരെല്ലാം വരച്ച വരയില്‍ വരും. ഒരു സംശയവുമില്ല. അതിനായി കൂട്ടായ ചര്‍ച്ചകള്‍ ഇപ്പോള്‍ മീഡിയകളിലൂടെ നടന്നു കൊണ്ടിരിക്കുന്നു.

നമ്മള്‍ പ്രവാസികള്‍ രാഷ്ട്രീയത്തിന് വേണ്ടിയും മതത്തിനു വേണ്ടിയും വളരെയധികം കലഹങ്ങള്‍ ഉണ്ടാക്കുന്നു. ആ കലഹത്തിന് പകരം സ്വന്തം ആവശ്യത്തിന് വേണ്ടി ആരും നില കൊള്ളുന്നില്ല. എന്നാല്‍ നില കൊള്ളുന്ന ഒരു അവസ്ഥയിലേക്ക് ഇപ്പോള്‍ നമ്മള്‍ എത്തിയിട്ടുണ്ട്. ഇത് നില നിര്‍ത്താന്‍ സാധിച്ചാല്‍ പ്രവാസികള്‍ രക്ഷപ്പെട്ടു. 

LATEST

അബുദാബിയുടെ മാറിയ സൈബര്‍ ചിത്രത്തിന് പിന്നിലെ നിശബ്ദ കരങ്ങള്‍ ഈ വിദേശിയുടേത്

Published

on

സൈബര്‍ ഫോറന്‍സിക് സാങ്കേതിക ലോകത്ത് ഇന്ന് ഏറ്റവും അറിയപ്പെടുന്ന ഒരു നാമമാണ് അബുദാബിയുടേത് എന്നറിയുമ്പോള്‍ അവിടെ താമസിക്കുന്ന പല പ്രവാസികളും അത്ഭുതം കൊള്ളും. ലോകത്തെ മികച്ച സൈബര്‍ ഫോറന്‍സിക് സംവിധാനങ്ങളും വിദഗ്ദരും കേരളത്തിന്റെ പത്തിലൊന്ന് പോലും ജനസംഖ്യയില്ലാത്ത, കേരളത്തിലെ ഒരു ജില്ലയുടെ പോലും വലിപ്പമില്ലാത്ത അബുദാബിയില്‍ ഉണ്ട് എന്നറിഞ്ഞാല്‍ സൈബര്‍ ലോകത്തുള്ളവര്‍ക്ക് ഒട്ടും അത്ഭുതമാവില്ല.

അബുദാബിയില്‍ കഴിഞ്ഞ കുറച്ചു വര്‍ഷങ്ങളായി സൈബര്‍ സാങ്കേതിക രംഗത്ത് നടന്ന് വന്ന ഒരു നിശബ്ദ വിപ്ലവം അവിടെയുള്ള പ്രവാസികള്‍ പോലും അറിഞ്ഞിരിക്കില്ല. ആ സാങ്കേതിക വിപ്ലവത്തിന്റെ ഗുണഫലമാണ് ഇന്ന് യു.എ.ഇ യും മറ്റു ഗള്‍ഫ് രാജ്യങ്ങളും അനുഭവിക്കുന്നത്.

സൈബര്‍ സാങ്കേതിക രംഗത്ത് മുന്‍പന്തിയിലുള്ള അമേരിക്ക അടക്കമുള്ള രാജ്യങ്ങളിലെ പല സൈബര്‍ ക്രൈം കോണ്‍ഫറന്‍സുകളിലും ഇന്ന് ആധികാരികതയോടെ പ്രബന്ധങ്ങള്‍ അവതരിപ്പിക്കുന്ന യു.എ.ഇ യുവതികള്‍, അതിസൂക്ഷ്മമായ അന്വേഷണത്വരയും അവലോകന ശേഷിയും കൈമുതലാക്കി മികച്ച അന്വേഷണ സംവിധാനങ്ങളുടെ പിന്‍ബലത്തോടെ കുറ്റവാളികളെ പിടികൂടുകയും കുറ്റകൃത്യങ്ങള്‍ തെളിയിക്കുകായും ചെയ്യുന്ന സൈബര്‍ വിദഗ്ദര്‍. അബുദാബിയുടെയും യു.എ.ഏ യുടെയും സൈബര്‍ ചിത്രം ഇന്ന് ഇങ്ങിനെയാണ്‌.

ഇതിനെല്ലാം പിന്നില്‍ നിശ്ചയദാര്‍ഢ്യമുള്ള ഭരണാധികാരികളും ആത്മാര്‍ത്ഥതയും സമര്‍പ്പണ മനോഭാവവുമുള്ള ഒരു കൂട്ടം യുവാക്കളുമായിരുന്നു. വിദേശ ശാസ്ത്ര സാങ്കേതിക സമൂഹത്തിന്റെ പിന്തുണയോടെ അബുദാബിയിലെ സയ്യിദ് സര്‍വകലാശാലയില്‍ നിന്നും മികച്ച സൈബര്‍ വിദഗ്ദരാണ് ഇപ്പോഴും പുറത്തിറങ്ങി കൊണ്ടിരിക്കുന്നത്.

എന്നാല്‍ ഏതാണ്ട് പത്തു വര്‍ഷങ്ങള്‍ക്ക് മുന്‍പ് അബുദാബിയുടെയും യു.എ.ഇ യുടെയും അവസ്ഥ ഇതായിരുന്നില്ല. പിടികൂടുന്ന സൈബര്‍ ക്രിമിനലുകളെ പ്രോസിക്യൂട്ട് ചെയ്യാന്‍ കഴിയാതെ നിസ്സഹായരാവുന്ന ഒരു അവസ്ഥാ വിശേഷം അന്നുണ്ടായിരുന്നു.

2007 ല്‍ സൈബര്‍ നിയമവുമായി ബന്ധപ്പെട്ട വെറും മൂന്ന് സൈബര്‍ കേസുകളും അടുത്ത വര്‍ഷം അഞ്ചു കേസുകളും മാത്രമാണ് അബുദാബി കോടതികളില്‍ ഉണ്ടായിരുന്നത്. എന്നാല്‍ 2009 ല്‍ ഇത് 33 കേസുകളും 2010 ല്‍ 235 കേസുകളുമായി ഉയര്‍ന്നതോടെ സൈബര്‍ നിയമത്തിന്റെയും സൈബര്‍ സുരക്ഷയുടെയും സാങ്കേതിക മികവിന്റെയും പ്രാധാന്യം ഭരണാധികാരികള്‍ മനസ്സിലാക്കി.

സൈബര്‍ കുറ്റകൃത്യങ്ങള്‍ റിപ്പോര്‍ട്ട് ചെയ്യുന്ന പ്രവണത കാര്യമായി വര്‍ദ്ധിച്ചപ്പോഴും അധികൃതര്‍ നിസ്സഹായരായിരുന്നു. 2006 ല്‍ ഒരുപാട് പഴുതുകളുള്ള ദുര്‍ബലമായ സൈബര്‍ നിയമമായിരുന്നു ഉണ്ടായിരുന്നത്. സൈബര്‍ ക്രിമിനലുകളെ പോലീസ് പിടികൂടിയിരുന്നെങ്കിലും പലപ്പോഴും അവരെ ശിക്ഷിക്കാനുള്ള വകുപ്പുകള്‍ സൈബര്‍ നിയമത്തില്‍ ഉണ്ടായിരുന്നില്ല. പരാതികള്‍ ലഭിക്കുന്ന മുറക്ക് പിടികൂടുന്ന സൈബര്‍ ക്രിമിനലുകളെ പ്രോസിക്യൂട്ട് ചെയ്യാന്‍ കഴിയാതെ നിയമപാലകര്‍ നിസ്സഹായരായിരുന്നു.

ഉദാഹരണമായി പാസ് വേര്‍ഡുകള്‍ മോഷ്ടിക്കുന്നവരെ ശിക്ഷിക്കാന്‍ അന്നത്തെ നിയമത്തിനു സാധിച്ചിരുന്നില്ല. മോഷ്ടിച്ച പാസ് വേര്‍ഡുകള്‍ ഉപയോഗിച്ചാല്‍ മാത്രമാണ് വിചാരണ നടത്തി ശിക്ഷിക്കാനുള്ള വകുപ്പുകള്‍ നിയമത്തില്‍ ഉണ്ടായിരുന്നത്. ആഭിചാര കര്‍മ്മങ്ങള്‍ക്കായുള്ള വെബ്‌ സൈറ്റുകളും ബോബുകളും മറ്റും ഉണ്ടാക്കുന്ന വെബ്‌ സൈറ്റുകളും സൈബര്‍ നിയമത്തിന്റെ പരിധിക്ക് പുറത്തായിരുന്നു. അത് പോലെ തന്നെ ഫേസ് ബുക്ക് വഴി അപമാനിക്കുകയും മാനഹാനി വരുത്തുകയും ചെയ്യുന്നവരെയും ബ്ലാക്ക് മെയില്‍ ചെയ്യുന്നവരെയും പ്രോസിക്യൂട്ട് ചെയ്യാനുള്ള വകുപ്പുകളും നിയമത്തില്‍ ഉണ്ടായിരുന്നില്ല.

സൈബര്‍ സുരക്ഷയും സൈബര്‍ ഫോറന്‍സിക് നിലവാരവും പരിതാപകരമായിരുന്നു. ഇസ്രെയലി ഹാക്കര്‍മാര്‍ക്ക് ഏതു സമയത്തും അബുദാബിയിലെയും യു.എ.ഇ യിലെ മറ്റു പൊതു സ്ഥാപനങ്ങളുടെയും വെബ്‌ സൈറ്റുകള്‍ ഹാക്ക് ചെയ്യാമെന്ന അവസ്ഥ ഉണ്ടായിരുന്നു. കൂടാതെ മറ്റു രാജ്യങ്ങളില്‍ നിന്നുള്ള ഹാക്കര്‍മാരും സര്‍ക്കാര്‍ വെബ്‌ സൈറ്റുകളിലും പൊതു സ്ഥാപനങ്ങളുടെ വെബ്‌ സൈറ്റുകളിലും യഥേഷ്ടം കയറിയിറങ്ങി. ഔദ്യോഗിക വിവരങ്ങളും ഉപയോക്താക്കളുടെ വ്യക്തി വിവരങ്ങളും ഹാക്കര്‍മാര്‍ ചോര്‍ത്തിയെടുത്ത് പരസ്യമാക്കുകയും ഡാര്‍ക്ക് വെബ്ബില്‍ കൊടുക്കുകയും ചെയ്തിരുന്നു.

ഇത് തടയാന്‍ കഴിയാതെ സൈബര്‍ സുരക്ഷാ വിദഗ്ദരും കാരണങ്ങള്‍ തിരിച്ചറിയാന്‍ കഴിയാതെ സൈബര്‍ ഫോറന്‍സിക് വിദഗ്ദരും മിഴിച്ചു നിന്നതോടെ സൈബര്‍ നിയമവും സുരക്ഷയും ഫോറന്‍സിക് സംവിധാനങ്ങളും മികവുറ്റതാക്കിയാല്‍ മാത്രമേ വരും വര്‍ഷങ്ങളില്‍ തങ്ങളുടെ മുന്നോട്ടുള്ള കുതിപ്പിന് പിന്തുണ ലഭിക്കുകയുള്ളൂ എന്ന് അധികൃതര്‍ മനസ്സിലാക്കി. അതില്‍ നിന്നാണ് ലോകത്തെ ഏറ്റവും മികവുറ്റവരെ രാജ്യത്തേക്ക് കൊണ്ട് വന്നു സൈബര്‍ മേഖല ശക്തിമത്താക്കുന്ന നടപടികള്‍ക്ക് അധികൃതര്‍ തുടക്കം കുറിച്ചത്. വിദഗ്ദരെ കൊണ്ട് വന്നു അവരുടെ വൈദഗ്ദ്യത്തെ ആശ്രയിച്ച് മുന്നോട്ടു പോകാതെ ആ വ്യക്തികളുടെ വൈദഗ്ദ്യം ഉപയോഗിച്ച് തങ്ങളുടെ പൗരന്‍ന്മാരില്‍ നിന്നും മികച്ച സൈബര്‍ വിദഗ്ദരെ വാര്‍ത്തെടുക്കാനുള്ള ആ ദീര്‍ഘ ദൃഷ്ടിയില്‍ നിന്നാണ് അബുദാബിയുടെ ഇന്നത്തെ സൈബര്‍ കുതിപ്പിലേക്കുള്ള തുടക്കം ഉണ്ടാകുന്നത്.

ഡോ.ഇബ്രാഹിം ബാഗീലി എന്ന ജോര്‍ദ്ദാന്‍ സ്വദേശിയാണ് അബുദാബിയുടെ ഈ കുതിപ്പിന്റെ തുടക്കക്കാരനും ആസൂത്രകനും എന്ന് പറയുന്നതില്‍ തെറ്റുണ്ടാവില്ല. എന്നാല്‍ ഇദ്ദേഹത്തിന്റെ നാമധേയം ഔദ്യോഗികമായി എവിടെയും കാണാനും ഉണ്ടാവില്ല. അമേരിക്കയില്‍ നിന്നും സൈബര്‍ ഫോറന്‍സിക്കില്‍ ഡോക്ടറേറ്റ് കരസ്ഥമാക്കിയ ഡോ.ബാഗീലിയെ സായിദ് യൂണിവേഴ്സിറ്റിയുടെ സൈബര്‍ ഫോറന്‍സിക് ലബോറട്ടറി ഡയരക്ടറായി നിയമിച്ചതോടെ അബുദാബിയുടെയും ഒപ്പം യു.എ.ഇ യുടെയും സൈബര്‍ സാങ്കേതിക കുതിപ്പിന് തുടക്കമാവുകയായിരുന്നു.

ബാഗീലിയുടെ മികവ് ഭാവിയില്‍ തങ്ങളുടെ കുതിപ്പിന് കാരണമാവുമെന്ന് മനസ്സിലാക്കിയ അബുദാബിയിലെ ഭരണകൂടവും, വിദ്യഭ്യാസ, പോലീസ്, മിലിട്ടറി സംവിധാനങ്ങളും ബാഗീലിക്ക് മികച്ച പിന്തുണ നല്‍കി.

ഈ പിന്തുണയോടു കൂടി തന്നെ ബാഗീലി സായിദ് സര്‍വകലാശാലയില്‍ മികച്ച സൈബര്‍ സാങ്കേതിക കോഴ്സുകള്‍ക്ക് രൂപം നല്‍കി. അന്താരാഷ്ട്രാ നിലവാരത്തിലുള്ള ഫോറന്‍സിക് ലബോറട്ടറി ഒരുക്കി ഈ കോഴ്സുകള്‍ കഴിഞ്ഞു പുറത്തേക്ക് ഇറങ്ങുന്നവരെ ലോകത്തിലെ മറ്റേത് സര്‍വ്വകലാശാലയിലെ ഉല്‍പ്പന്നങ്ങളോടും കിടപിടിക്കുന്ന നിലവാരത്തിലാക്കി.

സൈബര്‍ സാങ്കേതികതയിലും സൈബര്‍ കുറ്റാന്വേഷണങ്ങളിലും മികച്ചതാകുന്നതിന് മറ്റു രാജ്യങ്ങള്‍ അധികം പരീക്ഷിക്കാത്ത വഴിയാണ് അബുദാബി പരീക്ഷിച്ചത്. യുവാക്കളായ കമ്പ്യൂട്ടര്‍ എഞ്ചിനീയര്‍മാരില്‍ നിന്നും കുറ്റാന്വേഷണത്തില്‍ പ്രത്യേക താല്‍പ്പര്യവും ഉള്ളവരെ തിരഞ്ഞെടുത്ത് പോലീസില്‍ ജോലി നല്‍കി. പിന്നീട് അവരെ സയ്യിദ് സര്‍വകലാശാലയില്‍ രണ്ടു വര്‍ഷത്തെ ബിരുദാനന്തര ബിരുദ കോഴ്സുകള്‍ക്ക് അയച്ചു.

2008 ല്‍ തുടങ്ങിയ സായിദ് സര്‍വകലാശാലയുടെ ആദ്യ സൈബര്‍ സെക്യൂരിറ്റി ബിരുദാനന്തര ബിരുദ കോഴ്സ് 2010 ല്‍ അവസാനിക്കുമ്പോള്‍ അബ്ദുദാബി പോലീസില്‍ നിന്നുള്ള 11 വിദ്യാര്‍ത്ഥികളാണ് കോഴ്സ് പൂര്‍ത്തിയാക്കി പുറത്തിറങ്ങിയത്. ഈ വിദ്യാര്‍ഥികളില്‍ അബുദാബി പോലീസിലെ ചീഫ് ഇന്‍ഫോര്‍മേഷന്‍ സെക്യൂരിറ്റി ഓഫീസറായി ജോലി നോക്കിയിരുന്ന മേജര്‍ ഫൈസല്‍ അല്‍ ശമാരിയും ഉള്‍പ്പെട്ടിരുന്നു. അടുത്ത ബാച്ചില്‍ ഈ സംഖ്യ അബുദാബി പോലീസിലും ദുബായ് പോലീസിലും മറ്റും ജോലി ചെയ്തിരുന്ന 27 പേരായി ഉയര്‍ന്നു.

ഇവര്‍ക്ക് പരിശീലനം നല്‍കുന്നതിനായി ലോകത്തിലെ ഏറ്റവും മികച്ച സൈബര്‍ വിദഗ്ദരെ അബുദാബി സര്‍ക്കാര്‍ കൊണ്ട് വന്നു. ഡോ.ബാഗീലിയുടെ മികച്ച കോഴ്സുകളില്‍ നിന്നും മികച്ച പ്രകടനം കാഴ്ച വെച്ച് പുറത്തിറങ്ങുന്നവരെ കുറ്റാന്വേഷണ രംഗത്തേക്കിറക്കി. 2014 ല്‍ ഡോ.ബാഗീലി അമേരിക്കയിലേക്ക് തിരികെ പോകുമ്പോഴേക്കും യു.എ.ഇ യില്‍ ആകമാനം സൈബര്‍ സാങ്കേതിക രംഗത്തും കുറ്റാന്വേഷണ രംഗത്തും മികച്ച ഫലം ലഭിക്കുന്ന തരത്തില്‍ അനേകം പേര്‍ പുറത്തിറങ്ങി കഴിഞ്ഞിരുന്നു.

അക്കാദമിക് തലത്തില്‍ മികച്ച പ്രകടനം കാഴ്ച വെച്ചവരെ സര്‍വ്വകലാശാലയില്‍ അക്കാദമിക് രംഗത്തും കുറ്റാന്വേഷണ മികവ് പ്രകടിപ്പിച്ചവരെ പോലീസ്, മിലിട്ടറി സെനകളിലും അധികൃതര്‍ നിയമിച്ചു. മികച്ച പരിശീലനം ലഭിച്ച് മികച്ച പ്രകടനം കാഴ്ച വെച്ചവരുടെ കീഴില്‍ പരിശീലനം ലഭിക്കുന്ന യുവ സമൂഹം അതിലും മികച്ചവരായാണ് ഇപ്പോള്‍ പുറത്തിറങ്ങുന്നത്. ഇവരില്‍ അധികവും അറബി പെണ്‍കുട്ടികള്‍ ആണ് എന്നതാണ് പ്രത്യേകത.

ഒന്നുമില്ലായ്മയില്‍ തുടങ്ങി ഇന്ന് ഏറ്റവും മികച്ചതായി മാറിയ അബുദാബിയിലെ ഉന്നത സൈബര്‍ സാങ്കേതിക അന്വേഷണം സംവിധാനം ഗള്‍ഫ് രാജ്യങ്ങള്‍ മുഴുവനും പ്രധാനമായ വിഷയങ്ങളില്‍ ഉപയോഗപ്പെടുത്തുന്നുണ്ട്. കുറ്റവാളികള്‍ ആസൂത്രണം ചെയ്യുന്ന കുറ്റകൃത്യങ്ങള്‍ നടപ്പിലാവുന്നതിനു മുന്‍പ് തന്നെ അബുദാബിയില്‍ പിടിയിലാവുന്നു. മറ്റു ഗള്‍ഫ് രാജ്യങ്ങളിലെ പോലീസും ഇന്റലിജന്‍സും മിലിട്ടറിയുമൊക്കെ കുറ്റാന്വേഷണ സംവിധാനങ്ങള്‍ക്ക് അബുദാബിയെ ആശ്രയിക്കുന്നു.

ഇപ്പോഴും സൈബര്‍ വിഷയത്തില്‍ മറ്റു ഗള്‍ഫ് രാജ്യങ്ങള്‍ക്ക് ഏറെ മുന്നിലാണ് അബുദാബി. ലോകത്തെ ആദ്യ നിര്‍മിത ബുദ്ധി സര്‍വകലാശാല തുറന്നത് അബുദാബിയിലാണ്. മുഹമ്മദ് ബിന്‍ സായിദ് യൂണിവേഴ്‌സിറ്റി ഓഫ് ആര്‍ട്ടിഫിഷ്യല്‍ ഇന്റലിജന്‍സില്‍ (എംബിസെഡ്‌യുഎഐ) ബിരുദ, ഗവേഷണ പോഗ്രാമുകള്‍ നിര്‍മിത ബുദ്ധിയില്‍ വൈദഗ്ധ്യമുള്ള തൊഴില്‍ശക്തിയെ വികസിപ്പിക്കാനും സാങ്കേതിക വിദ്യയുടെ മുന്നേറ്റത്തിനും യുഎഇയുടെ സാമ്പത്തിക വൈവിധ്യവത്കരണ ശ്രമങ്ങളെ പരിപോഷിപ്പിക്കാനുമുള്ള ശ്രമത്തിന്റെ ഭാഗമാണ്.

 

പ്രവാസി കോർണർ അപ്ഡേറ്റുകള്‍ ഉടനെ ലഭിക്കുന്നതിനായി വാട്‌സ് ആപ് ഗ്രൂപ്പിൽ അംഗമാകുന്നതിനായി ഈ ലിങ്കിൽ ക്ലിക് ചെയ്യുക. https://chat.whatsapp.com/H8E7DkwUxmhJJ9RZWiLMLG

പ്രവാസി കോര്‍ണര്‍ ഫേസ്ബുക്ക് പേജില്‍ പ്രവേശിക്കാന്‍ ഈ ലിങ്കില്‍ ക്ലിക്ക് ചെയ്യുക https://www.facebook.com/PravasiCornerOfficial

 പരസ്യങ്ങള്‍ക്ക് ബന്ധപ്പെടുക: [email protected] / 8921190515 (WatsApp) 

Continue Reading

LATEST

യാത്രാ വിലക്ക് സമയത്ത് 146 യാത്രക്കാര്‍ കൊച്ചിയില്‍ നിന്നും യു.എ.ഇ യിലേക്ക് പറന്നതെങ്ങിനെ?

Published

on

അബുദാബി: കഴിഞ്ഞ ദിവസം കൊച്ചി അന്താരാഷ്ട്ര വിമാനത്താവളത്തിൽ നിന്നും 146 യാത്രക്കാരുമായി യു.എ.ഇയിലേയ്ക്ക് പറന്ന വിമാനം പ്രവാസികള്‍ക്കിടയില്‍ ചര്‍ച്ച വിഷയമായിരിക്കുകയാണ്. കോവിഡ് രണ്ടാം തരംഗമുണ്ടായ സാഹചര്യത്തിൽ രാജ്യാന്തര വിമാനയാത്രയ്ക്ക് ജൂലായ് 31 വരെ വിലക്ക് നില നില്‍ക്കുന്ന സാഹചര്യത്തില്‍ എങ്ങിനെയാണ് ഇത്രയും യാത്രക്കാരുമായി ഒരു വിമാനം അബുദാബിയിലേയ്ക്ക് പറന്നത് എന്നതാണ് പലര്‍ക്കും ആശ്ചര്യമായത്.

കൊച്ചി അന്താരാഷ്ട്ര വിമാനത്താവളത്തിന്‍റെ ഔദ്യോഗിക ഫേസ്ബുക്ക് പേജില്‍ ഇത് വിമാന താവളത്തിന്റെ നേട്ടമെന്ന രീതിയിലാണ് ഇക്കാര്യം പോസ്റ്റ്‌ ചെയ്തത്. മാനേജിങ് ഡയറക്ടർ എസ്.സുഹാസിന്റെ ഇടപെടലിൽ കൊച്ചി വിമാനത്താവളത്തിൽ റാപിഡ് പി.സി.ആർ പരിശോധനകേന്ദ്രം ആരംഭിച്ചതിനെ തുടര്‍ന്നാണ്‌ ഈ യാത്രക്കാര്‍ക്ക് യു.എ.ഇയിലേയ്ക്ക് പറക്കാന്‍ സാധിച്ചത് എന്നായിരുന്നു പോസ്റ്റ്‌.

പിന്നീട് യു.എ.ഇ സർക്കാരിന്റെ പ്രത്യേക അനുമതി ലഭിച്ചവർക്കാണ് നിലവിൽ റാപിഡ് -പി.സി.ആർ ഉൾപ്പെടെയുള്ള പരിശോധനാ സർട്ടിഫിക്കറ്റ് സമർപ്പിച്ച് യാത്ര പോകാവുന്നത് എന്ന് പോസ്റ്റ്‌ എഡിറ്റ്‌ ചെയ്യുകയും ചെയ്തു.

സത്യത്തില്‍ ഈ വാര്‍ത്തകളും പോസ്റ്റുകളും കണ്ട് യാത്രക്ക് പുറപ്പെടുന്ന ഒരു യാത്രക്കാരന് ഇത്തരത്തില്‍ യു.എ.ഇയിലേയ്ക്ക് പറക്കാന്‍ സാധിക്കില്ല. അതിന് യു.എ.ഇ അധികൃതരുടെ പ്രത്യേക അനുമതി കൂടി ലഭ്യമാക്കണം. മാത്രമല്ല ഇത്തിഹാദിന്റെ ചാര്‍ട്ടേഡ്‌ വിമാനത്തിലാണ് ഈ യാത്രക്കാര്‍ യാത്ര ചെയ്തത്. മുഴുവന്‍ യാത്രക്കാരും ഒരു കമ്പനിയിലെ തന്നെ യാത്രക്കാര്‍ ആയിരുന്നു. യാത്ര ചെയ്തവര്‍ ലുലു ഗ്രൂപ്പിന്റെ ജീവനക്കാര്‍ ആയിരുന്നുവെന്നാണ് സൂചന.

കോവിഡ് രണ്ടാം തരംഗം മൂലം ഇന്ത്യയില്‍ നിന്നും രാജ്യാന്തര വിമാനയാത്രയ്ക്ക് ജൂലായ് 31 വരെ വിലക്കുണ്ട്. എന്നാല്‍ കേന്ദ്രസർക്കാരും ചില പ്രത്യേക രാജ്യങ്ങളും തമ്മിലുണ്ടാക്കായ എയര്‍ ബബിള്‍ ധാരണ കരാര്‍ പ്രകാരം നിബന്ധനകള്‍ക്ക് വിധേയമായി പരിമിതമായ തോതിൽ വിദേശയാത്ര സാധ്യമാവും.

ഇതിനോടൊപ്പം ലുലു ഗ്രൂപ്പിന്റെ സ്വാധീനവും കൊച്ചി അന്താരാഷ്ട്ര വിമാനത്താവളത്തില്‍ ആരംഭിച്ച റാപ്പിഡ് -പി.സി.ആർ പരിശോധനാകേന്ദ്രവും മൂലമാണ് ഇവര്‍ക്ക് യു.എ.ഇയിലേയ്ക്ക് പറക്കാനായത്. കാരണം ജൂൺ 19 ന് ദുബായ് സുപ്രീം അതോററ്റി ഓഫ് ഡിസാസ്റ്റർ മാനേജ്‌മെന്റ് പുറത്തിറക്കിയ ഉത്തരവ് പ്രകാരം യാത്രപുറപ്പെടുന്നതിന് നാല് മണിക്കൂർ മുമ്പെടുത്ത ആർ.ടി.പി.സി.ആർ പരിശോധനാ ഫലമുണ്ടെങ്കിൽ ഇന്ത്യാക്കാർക്ക് യു.എ.ഇയിലേയ്ക്ക് യാത്രചെയ്യാന്‍ സാധിക്കും.

കേരള മെഡിക്കൽ സർവീസ് കോർപ്പറേഷൻ അംഗീകരിച്ച ലാബ് ജൂൺ 28 നാണ് കൊച്ചി അന്താരാഷ്ട്ര വിമാനത്താവളത്തില്‍ സ്ഥാപിച്ചത്. അതുകൊണ്ട് മാത്രമാണ് തിങ്കളാഴ്ച രാവിലെ 8.15 ന് പുറപ്പെട്ട എത്തിഹാദ് വിമാനത്തിൽ 146 പേരാണ് യു.എ.ഇയിലേയ്ക്ക് മടങ്ങിപ്പോകാനും സാധിച്ചത്.

എന്ത് തന്നെ ആയാലും കൊച്ചി അന്താരാഷ്ട്ര വിമാനത്താവളത്തില്‍ ആരംഭിച്ച റാപ്പിഡ് -പി.സി.ആർ പരിശോധനാ കേന്ദ്രം വരും ദിവസങ്ങളില്‍ കൂടുതല്‍ പ്രവാസികള്‍ക്ക് ഉപകാര പ്രദമായിരിക്കും.

Continue Reading

LATEST

യു.എ.ഇ യില്‍ വി.പി.എന്‍ ഉപയോഗിക്കുന്നവര്‍ ഇക്കാര്യം അറിയുക

Published

on

യു.എ.ഇ യില്‍ വി.പി.എന്‍ ഉപയോഗിക്കുന്നത് എത്ര മാത്രം കുറ്റകരമാണ്? ഞാന്‍ നാട്ടിലേക്ക് വിളിക്കാനും ഗെയിം കളിക്കാനുമെല്ലാം ചില അവസരങ്ങളില്‍ വി.പി.എന്‍ ഉപയോഗിക്കാറുണ്ട്. പിടിക്കപ്പെട്ടാലുള്ള ശിക്ഷ എന്താണ്? (മുസ്തഫ, അബുദാബി)

യു.എ.ഇ വി.പി.എന്‍ (virtual private networks) ഉപയോഗത്തിന് കടുത്ത നിയന്ത്രണമുള്ള രാജ്യമാണ്. കമ്പനികള്‍ക്കും ബാങ്കുകള്‍ക്കും പോലെയുള്ള പ്രത്യേക സ്ഥാപനങ്ങള്‍ക്ക് അവരുടെ അകത്തുള്ള /ഗാര്‍ഹികമായ ഉപയോഗങ്ങള്‍ക്ക് മാത്രമാണ് വി.പി.എന്‍ ഉപയോഗിക്കാന്‍ അനുമതിയുള്ളത്. മറ്റുള്ള ആവശ്യങ്ങള്‍ക്ക് ഉപയോഗിക്കുന്നത് കടുത്ത ശിക്ഷ ലഭിക്കാന്‍ പര്യാപ്തമായ കുറ്റമാണ്.

പലരും നിയമ വിരുദ്ധമായ ആവശ്യങ്ങള്‍ക്ക് വി.പി.എന്‍ ഉപയോഗിക്കുന്നുണ്ട്. ഗെയിമിംഗ് അപ്പ്ളിക്കേഷനുകള്‍, വിദേശങ്ങളിലെക്ക് വിളിക്കാനുള്ള കാള്‍ അപ്പ്ളിക്കേഷനുകള്‍ എന്നിവ ഡൌണ്‍ലോഡ് ചെയ്യാനും അവ ഉപയോഗിക്കനുമാണ് ഇത്തരക്കാര്‍ വി.പി.എന്‍ ഉപയോഗിക്കുന്നത്. യു.എ.ഇ യില്‍ ഉപയോഗത്തിന് വിലക്കുള്ള ഇത്തരം അപ്പ്ളിക്കേഷനുകളും, വെബ്‌ സൈറ്റുകളും ഉപയോഗിക്കുമ്പോള്‍ സ്വന്തം ഐ.പി അഡ്രസ്സ് മറച്ചു വെക്കുന്നതിനാണ് ഈ വി.പി.എന്‍ ഉപയോഗം.

ദേശ വിരുദ്ധ പ്രവര്‍ത്തനങ്ങള്‍ക്കും, തീവ്രവാദ പ്രവര്‍ത്തനങ്ങള്‍ക്കും, സാമ്പത്തിക കുറ്റകൃത്യങ്ങള്‍ക്കും വി.പി.എന്‍ സൗകര്യങ്ങള്‍ ദുരുപയോഗം ചെയ്യുമെന്നതിനാല്‍ കടുത്ത ശിക്ഷയാണ് ഇത്തരം ഉപയോഗങ്ങള്‍ക്ക് നിയമത്തില്‍ നിഷ്കര്‍ഷിച്ചിട്ടുള്ളത്. അഞ്ചു ലക്ഷം മുതല്‍ രണ്ടു മില്ല്യന്‍ ദിര്‍ഹം വരെ പിഴയും തടവുമാണ് ഇത്തരം നിയമ വിരുദ്ധ ഉപയോഗങ്ങള്‍ക്കുള്ള ശിക്ഷ.

മറുപടി നല്‍കിയത്:

അഡ്വ.ഷിയാസ് കുഞ്ഞിബാവ,

ലീഡ് പാര്‍ട്ട്ണര്‍, എസ്.കെ അസോസിയേറ്റ്സ്, (ദുബായ്,റിയാദ്,ഡല്‍ഹി,കൊച്ചി)

 

Continue Reading
LATEST7 months ago

ആ വഴിയും അടയുന്നു. നിലവിലെ സാഹചര്യത്തില്‍ ലെവി കൊടുത്ത് സൗദിയില്‍ ഇനി മുന്നോട്ടു പോകാന്‍ സാധിക്കില്ല.

LATEST7 months ago

സൗദിയിലെ നിതാഖാത് വിദേശികളുടെ തൊഴില്‍ ഇല്ലാതാക്കാന്‍ വേണ്ടി മാത്രം തുടങ്ങിയ പദ്ധതിയല്ല.

LATEST7 months ago

എം എസ് എഫിന് രാജ്യ തലസ്ഥാനത്ത് ദേശീയ കമ്മിറ്റി ഓഫീസ്. ദേശീയ തലത്തില്‍ സംഘടന പ്രവര്‍ത്തനങ്ങള്‍ ഏകോപിപ്പിക്കലും ശക്തിപ്പെടുത്തലും ലക്‌ഷ്യം

LATEST9 months ago

വിസിറ്റ്-പുതിയ വിസക്കാര്‍ക്ക് അപ്ഡേഷന്‍, യാത്ര മുടങ്ങുന്ന സാഹചര്യം, 93 അംഗീകൃത പരിശോധന കേന്ദ്രങ്ങള്‍: സൗദി പ്രവാസികള്‍ ആവര്‍ത്തിച്ചു ചോദിച്ച ചോദ്യങ്ങള്‍ക്കുള്ള മറുപടികള്‍

LATEST9 months ago

സൗദിയില്‍ ബൂസ്റ്റര്‍ ഡോസ് ഇല്ലെങ്കില്‍ പിഴ?, തവക്കല്‍ന, അബ്ഷീര്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍ക്കുള്ള മറുപടികള്‍.

LATEST9 months ago

സൗദിയിലേക്ക് നഴ്സുമാര്‍ മാന്‍പവര്‍ സപ്ലൈ സ്ഥാപനങ്ങള്‍ വഴി പോകുന്നത് പരമാവധി ഒഴിവാക്കുക

LATEST9 months ago

ബൂസ്റ്റര്‍ ഡോസ്, റീ എന്‍ട്രി, ഇലക്ട്രോണിക് തൊഴില്‍ കരാര്‍, ഒരു ലക്ഷം റിയാല്‍ പിഴ തുടങ്ങിയവയെ കുറിച്ച് സൗദി പ്രവാസികള്‍ ആവര്‍ത്തിച്ച് ചോദിച്ച ചോദ്യങ്ങള്‍

LATEST9 months ago

സൗദിയില്‍ ഇപ്പോള്‍ പ്രവാസികള്‍ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യങ്ങള്‍ വിശദമായി

LATEST9 months ago

സൗദി പ്രവാസികള്‍ ആവര്‍ത്തിച്ചു ആവശ്യപ്പെട്ട ബൂസ്റ്റര്‍ ഡോസ് സംശയങ്ങള്‍ക്കുള്ള മറുപടികള്‍ .

LATEST9 months ago

സൗദി ബൂസ്റ്റര്‍ ഡോസിനെ കുറിച്ച് അറിയേണ്ടതെല്ലാം. വിസിറ്റിംഗ് വിസ, പുതിയ വിസ, റീ എന്‍ട്രിയില്‍ പോകുന്നവര്‍ തുടങ്ങിയവര്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST9 months ago

സൗദി ചാര്‍ട്ടേഡ്‌ ഫ്ലൈറ്റ്‌, ആര്‍.ടി.പി.സി.ആര്‍, ബോര്‍ഡര്‍ നമ്പര്‍, എയര്‍പോര്‍ട്ട് പരിശോധന, ഫൈനല്‍ എക്സിറ്റ്: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST9 months ago

അപ്പോയിന്റ്മെന്റ് ഇല്ലാതെ എയര്‍പോര്‍ട്ടില്‍ ബൂസ്റ്റര്‍ ഡോസ്, തവക്കല്‍നയില്‍ നോണ്‍ ഇമ്മ്യൂണ്‍, സൗദി കര്‍ഫ്യൂ: സൗദി പ്രവാസികളുടെ ചോദ്യങ്ങള്‍ക്ക് മറുപടി

LATEST10 months ago

സിഹത്തി, തവക്കല്‍ന, ബൂസ്റ്റര്‍ ഡോസ്, രാജകാരുണ്യം, ഇഖാമ പുതുക്കല്‍: സൗദി പ്രവാസികള്‍ ഏറ്റവും കൂടുതല്‍ ചോദിച്ച ചോദ്യങ്ങള്‍

LATEST10 months ago

“വന്‍ വിജയം ആഗ്രഹിക്കുന്ന പ്രവാസികള്‍ക്ക് പഠിക്കാന്‍ ഏറെയുള്ള ജീവിതം”. ഇബ്രാഹിം ഹാജിയുടെ വിജയ രഹസ്യങ്ങള്‍ പങ്കു വെക്കുന്ന ഓര്‍മ്മ കുറിപ്പ്.

LATEST10 months ago

സൗദിയില്‍ ഒമിക്രോണ്‍ ആരോഗ്യ ഭീഷണി ഉണ്ടാക്കില്ല. പക്ഷേ വിദേശികളുടെ യാത്രാ സ്വാതന്ത്ര്യം നിലക്കും

Trending

error: Content is protected !!